?AMUN WLA KWLA KPƐN SU?
?Sasafuɛ Tranwlɛ’n nga be fiteli koko nun wa’n, amun kanngannin be nun kpa? Amun nian sɛ amun kwla tɛ kosan nga’m be su o.
?Dɔ benin su yɛ be kun Delɛ cɛn nnɛn mun ɔn?
Biblu wie’m be nun’n, be se kɛ, kɛ “lika’n yó mantanmantan mɔ aosin’n kúnndɛ wlá’n,” yɛ Izraɛlifuɛ’m be kun nnɛn mun ɔn. Yɛle kɛ, kɛ wia’n tɔ mɔ lika’n nin a luman’n, yɛ be kun nnɛn mun ɔn. (Tul. 12:6)—w13 1/12 bue 20.
?Ajalɛ kpa benin yɛ gbanflɛn nin talua’m be jran Ɲanmiɛn Ndɛ’n su be fa ɔ?
Ɔ ti ajalɛ nsan. (1) Be fa be wun man Ɲanmiɛn maan ɔ sie be, yɛ be yo i klun sa’n. (Mat. 6:19-34) (2) Sran ukalɛ yo be fɛ. (Yol. 20:35) (3) Be tu be klun be su Ɲanmiɛn blɛ mɔ be te yo gbanflɛn annzɛ talua’n i nun. (Aku. 12:1)—w14 1/1 bue 19-20.
?Kɛ ɔ fɛ i afuɛ 1914 nun’n, nnɛn kpanngɔ su fufuɛ nnan benin yɛ be bo nun ɔn?
Zezi yɛ ɔ ti nnɛn kpanngɔ ufue’n su ɔ. Junman klikli ng’ɔ dili’n yɛle kɛ, ɔ fuannin Satan nin i mmusu mun ɲanmiɛn su lɔ. Sran ng’ɔ ti nnɛn kpanngɔ ɔkwlɛ’n su’n, ɔ fa alɛ yi i asiɛ’n su. Sran ng’ɔ ti nnɛn kpanngɔ ble’n su’n, toe kun o i sa nun. Ɔ ti awe’n i nzɔliɛ. Sran ng’ɔ ti nnɛn kpanngɔ nzuɛnnzuɛn’n su’n, ɔ ti tukpacɛ m’ɔ sa ndɛndɛ’n i nzɔliɛ. Yɛ w’a kun sran akpi kpanngban. (Ngl. 6:2-8)—w14 1/2 bue 6-7.
?Blɛ benin nun yɛ ‘Bua Gbanflɛn’n fɛ́ i atɔnvlɛ’n’ niɔn? (Ngl. 19:7)
Zezi Klist m’ɔ ti famiɛn’n, ɔ́ núnnún Babilɔni klɔ dan’n i mlɔnmlɔn. Kpɛkun, kɛ ɔ ko wie Armagedɔn alɛ’n i kun’n, yɛ i m’ɔ ti Bua Gbanflɛn’n ɔ́ fɛ́ i “atɔnvlɛ’n” niɔn.—w14 1/2 bue 15.
?Ngue ti yɛ Zezi blɛ su Zuifu’m be ‘ɲin tali Krist sin’ ɔn? (Lik 3:15)
E kwlá seman weiin kɛ Zezi blɛ su Zuifu’m be wunnin Mɛsi i wun ndɛ nga Ɲanmiɛn nuan ijɔfuɛ Daniɛli kannin’n i wlɛ kpa, kɛ nga e fa wun i wlɛ andɛ’n sa. (Dan. 9:24-27) Sanngɛ atrɛkpa’n, be tili ndɛ nga anzi’m be kan kleli bua sunianfuɛ wie mun’n. Annzɛ kusu kɛ Zezi i nɔnman nun be fɛ i ɔli Ɲanmiɛn i sua’n nun lɔ mɔ Ɲanmiɛn nuan ijɔfuɛ Ani wunnin i’n, be tili ndɛ nga bla’n kannin’n. Asa ekun’n, mɛn nun sa sifuɛ’m be bali ‘Zuifu’m be famiɛn’n bɔ be wuli i’n’ i nianlɛ. (Mat. 2:1, 2) Kɛ ɔ́ kɔ́ i ɲrun’n, Zan batɛmu yofuɛ’n kleli kɛ Klist i balɛ’n w’a mantan koko.—w13 1/2 bue 23-26.
?Kɛ siɛ annzɛ niɛn’m be yaci be awlobo’n be kɔ nvle uflɛ nun sika kunndɛlɛ’n, ngue sa yɛ ɔ kwla ju ɔ?
Kɛ siɛ mun annzɛ niɛn’m be nin ba’m be tranman likawlɛ’n, klunngbɔ kwla tran ba’m be klun. Kpɛkun, be yo sa sukusuku mun. Asa ekun’n, ɔ cɛman naan yasua’n w’a kunndɛ bla i yi bo, annzɛ bla’n w’a kunndɛ bian i wun bo.—w14 1/4 bue 19-20.
?Ngue ti yɛ laa kɛ be bobo sa tɛ yofuɛ mun waka su’n, be bubu be ja mun ɔn?
Laa Rɔmufuɛ’m be bobo sa tɛ yofuɛ wie mun waka su. Kɛ be boboli Zezi nin sa tɛ yofuɛ nɲɔn waka su’n, Zuifu’m be seli kɛ maan be bubu be ja mun. I liɛ’n, bé wú ndɛndɛ. Kpɛkun, bé ká lɛ bé síe be le kunngba’n nun. (Mml. 21:22, 23)—w14 1/5 bue 31.
?Kɛ é bó jasin fɛ’n, kosan nnan benin yɛ ɔ fata kɛ e fa usa e wun ɔn?
Kosan sɔ mun yɛ: ?Wan yɛ n su bo jasin fɛ’n ń klé i ɔ? ?Nin yɛ n su bo jasin fɛ’n niɔn? ?Blɛ benin nun yɛ n su bo jasin fɛ’n niɔn? ?Wafa sɛ yɛ ɔ fata kɛ m bo jasin’n fɛ’n niɔn?—w14 1/5 bue 14-17.
?Siklɛti nɔnlɛ’n w’a kun sran nɲɛ?
Afuɛ ya nga be sinnin lɛ’n nun’n, ɔ kunnin sran 100.000.000. Afuɛ kun nun sa’n, ɔ kun sran 6.000.000.—w14 1/6 bue 3.