Zan yoli Zezi i batɛmun

Zezi su w’a ɲan afuɛ ablasan (30). Ɔ ko toli Zan Batɛmun yofuɛ’n Zurdɛn nzue ba’n i nuan lɔ. Kɛ ɔ́ yó sɔ’n, nn Zan w’a bo i junman’n i dilɛ bo w’a di anglo nsiɛn. ?Yɛ ngue ti yɛ Zezi ko toli Zan lɔ-ɔ? ?I osu nianlɛ ngbɛn yɛ ɔ ɔli-ɔ, annzɛ wafa nga Zan di i junman’n i nianlɛ yɛ ɔ ɔli-ɔ? Cɛcɛ, nɛ́n i sɔ’n ti yɛ ɔ ɔli-ɔ. Ɔ ɔli naan ɔ́ kó sé Zan kɛ ɔ yo i batɛmun.

Sanngɛ Zan w’a kplinman su. Ɔ seli kɛ: “?Nán min li yɛ ɔ fata kɛ a yo min batɛmun-ɔn, kpɛkun wɔ yɛ a su ba min sin-ɔn?” (Matie 3:14) I yo, sɛ Zan seli sɔ’n, i su-ɔ. Ɔ si kɛ Zezi ti Ɲanmiɛn i Wa. Afin i nun m’ɔ te o i nin Elizabɛti i ku sɛ nun’n, Mari ko niannin Elizabɛti osu. Kɛ ɔ́ yó sɔ’n, nn Mari w’a wunnzɛ Zezi. Blɛ sɔ’n nun’n, kɛ Elizabɛti wunnin Mari’n, ɔ yoli Zan i fɛ. Ɔ maan ɔ kplikplili i nin klun lɔ. Atrɛkpa’n, Elizabɛti yiyili sa sɔ’n nun kleli Zan. Asa ekun’n, Zan tili i kɛ anzi kun seli Mari kɛ ɔ́ wá wú Zezi. Yɛ ɔ tili i ekun kɛ kɔnguɛ kunngba nga be wuli Zezi’n nun’n, anzi kpanngban wie mun ekun be fiteli bua tafuɛ’m be ɲrun.

Asa kusu’n, Zan si kɛ batɛmun ng’ɔ yo’n, ɔ ti be nga b’a wla be nzuɛn tɛ’n i ase’n be liɛ. Zezi kusu timan sa tɛ yofuɛ. I sɔ’n ti yɛ Zan w’a kplinman su kɛ ɔ́ yó i batɛmun-ɔn. Sanngɛ Zezi seli i kɛ: “Ɔ li yo, afin i sɔ yɛ ɔ nin i fata kɛ e yo naan y’a yo like kwlaa ng’ɔ ti i nuan su’n niɔn.”​—Matie 3:15.

?Kɛ mɔ Zezi w’a yoman sa tɛ’n, ngue ti yɛ ɔ fata kɛ be yo i batɛmun wie-ɔ? Batɛmun nga bé wá yó i’n, ɔ́ klé kɛ ɔ su wa yo i Si i klun sa siɛn’n. (Ebre Mun 10:5-7) Afin laa’n, Zezi ti waka sɛfuɛ. Sanngɛ siɛn’n, ɔ su wa di junman nga ti yɛ i Si m’ɔ o ɲanmiɛn su lɔ’n sunmɛnnin i asiɛ’n su wa’n. Zan si kɛ, kɛ ɔ́ wá yó Zezi i batɛmun’n, sa kun wá jú.

Zan seli kɛ: “Sran ng’ɔ sunmannin min kɛ n yo sran’m be batɛmun nzue nun’n, ɔ seli min kɛ: ‘Sran nga a wun kɛ Ɲanmiɛn wawɛ’n jrɛ i su, m’ɔ kɛ i su’n, yɛle sran ng’ɔ fa Ɲanmiɛn wawɛ’n yo sran’m be batɛmun’n.’” (Zan 1:33) Ndɛ sɔ’n kle kɛ Zan si kɛ Ɲanmiɛn wawɛ’n wá jrá sran kun m’ɔ́ wá yó i batɛmun’n i su. I sɔ kusu yɛ ɔ juli-ɔ. Afin kɛ Zezi fin nzue’n nun fiteli cɛ’n, Zan wunnin ‘Ɲanmiɛn i wawɛ’n, ɔ jra kɛ auble wie sa, ɔ ba Zezi su.’ Nanwlɛ, kɛ Zan wunnin i sɔ’n w’a bomɛn i nuan.​—Matie 3:16.

Sanngɛ sa kun ekun juli. Yɛle kɛ “ɲanmiɛn su lɔ tikeli” Zezi ɲrun. ?Ngue yɛ sa sɔ’n kle-ɔ? Atrɛkpa’n, sa sɔ’n kle kɛ Zezi i wla kpɛnnin blɛ m’ɔ trannin ɲanmiɛn su lɔ’n su. Ɔ maan i wla kpɛnnin su kɛ laa’n ɔ ti aolia nun sran ɲanmiɛn su lɔ, yɛ ɔ ti Zoova i wa. Asa ekun’n, like kwlaa nga Ɲanmiɛn kleli i ka naan w’a ba asiɛ’n su wa’n, i wla kpɛnnin su.

Asa kusu’n, kɛ bé yó Zezi i batɛmun’n, nɛn kun tɛli ɲanmiɛn su lɔ. Ɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn.” (Matie 3:17) ?Wan yɛ ɔ ijɔli lɛ-ɔ? E kwlá seman kɛ Zezi-ɔ. Afin kɛ ɔ́ yó sɔ’n, nn ɔ jin Zan i wun lɛ. Ɔ maan Ɲanmiɛn yɛ ɔ ijɔli-ɔ. I sɔ’n kleli weiin kɛ nán Zezi yɛ ɔ ti Ɲanmiɛn’n niɔn, sanngɛ ɔ ti Ɲanmiɛn i Wa.

I nun nga Zezi o asiɛ’n su wa’n, ɔ ti Ɲanmiɛn wa kɛ Adan m’ɔ ti klɔ sran klikli’n yoli Ɲanmiɛn wa’n sa. I sɔ ndɛ’n yɛ Zezi i sɔnnzɔnfuɛ Liki kannin-ɔn. Kɛ ɔ kannin sa nga be juli Zezi i batɛmun yolɛ nun’n be ndɛ’n, i sin’n ɔ seli kɛ: “Kɛ Zezi bó i junman’n i dilɛ bo’n, nn ɔ le afuɛ ablasan (30). Yɛ sran’m be waan ɔ ti Zozɛfu wa, [ɔ] ti Eli wa. [...] [Ɔ] ti Davidi wa. [...] [Ɔ] ti Abraamun wa, [...] [ɔ] ti Nowe wa, [...] [ɔ] ti Adan wa, Adan ti Ɲanmiɛn wa.”​—Liki 3:23-38.

Ɔ maan kɛ nga Adan ti “Ɲanmiɛn wa” sa’n, Zezi kusu ti Ɲanmiɛn wa wie. Kɛ be yoli Zezi i batɛmun’n, Zoova fɛli i wawɛ’n mɛnnin i. Ɔ maan Zezi wunnin i wlɛ kɛ ɔ ti Ɲanmiɛn i Wa mɔ cɛn wie lele’n ɔ́ sɛ́ i sin ɲanmiɛn su lɔ’n. I sɔ’n ti’n siɛn’n, Zezi kwla kan Ɲanmiɛn ndɛ’n i weinwein klé sran mun. Asa ekun’n, ɔ kwla kle nguan’n i atin’n. Ɔ maan kɛ ɔ fɛ i lɛ’n atin nga Zezi wá fá’n, ɔ́ fɛ́ i sɔ lele ɔ́ fɛ́ i wun yí klɔ sran mɔ be ti sa tɛ yofuɛ’n, be ti tɛ.