?Sran kpa’m be kwlaa be kɔ ɲanmiɛn su?

KƆNGUƐ kasiɛn ka naan b’a kun Zezi’n, kɛ ɔ nin i akoto’m be dili e Min’n i aliɛ kasiɛn’n, ɔ tali be nda. Ɔ seli be kɛ ɔ́ mán be tranwlɛ ɲanmiɛn su lɔ. I waan: “N Si i awlo lɔ tranwlɛ’n sɔnnin, n su ko siesie lika ń mán amun. Sɛ ɔ ti-man sɔ’n, wuun m’an kan kle-man amun.” (Zan 14:2) ?Ngue ti yɛ Zezi mán be tranwlɛ ɲanmiɛn su lɔ ɔ? ?Ngue yɛ bé kó yó i lɔ ɔ?

Kɛ Zezi kán sɔ’n, nn ɔ le junman cinnjin kpa man i sɔnnzɔnfuɛ mun. Kɔnguɛ kunngba sɔ’n nun’n, ɔ seli kɛ: “Sa ng’ɔ tɔli’n n su’n, i kwlaa nun amu’an yaci-man n le. Ɔ maan kɛ n Si sieli n famiɛn’n, n kusu ń síe amun famiɛn.” (Lik 22:28, 29) Ɲanmiɛn tali Zezi i nda kɛ ɔ́ wá yó Famiɛn naan ɔ́ wá fá like ng’ɔ mian klɔ sran’m be sa kpafuɛ’n mán be. Yɛle kɛ ɔ́ síe be kpa. Zezi wá yí ɲrɛnnɛn’n ng’ɔ o klɔ sran’m be su’n, yɛ ɔ́ núnnún be nga be kle sran’m be yalɛ’n. Kannzɛ “kɛ ɔ fɛ i asiɛ’n i bue kun su b’ɔ́ fá jú i bue kun lɔ’n su’n,” Zezi síe sran mun’n, sanngɛ ɲanmiɛn su lɔ yɛ ɔ́ trán dí i famiɛn’n niɔn.—Jue Mun 72:4, 8; Daniɛl 7:13, 14.

Sanngɛ, nán Zezi kunngba yɛ ɔ́ dí famiɛn’n niɔn. I sɔ’n ti yɛ ɔ tɛli i akoto’m be nda kɛ ɔ́ mán be tranwlɛ ɲanmiɛn su lɔ’n niɔn. Be nga be kpali be kɛ ‘be yɛ bé síe sran mun asiɛ’n su wa’n,’ be yɛ be ti be nun klikli mun ɔn.—Sa Nglo Yilɛ 5:10.

?Sran nɲɛ yɛ be kɔ ɲanmiɛn su ɔ? Kɛ klɔ sran’m be awa mun sa’n, be nga bé dí famiɛn Ɲanmiɛn i Sielɛ’n nun’n b’a sɔnman. Be nga bé trán Sielɛ sɔ’n i bo’n be yɛ be sɔnnin ɔn. Zezi seli be nga be nin i bé dí famiɛn’n be kɛ: “Amun bɔ an ti kɛ bua akpasua kaan kun sa’n, nán srɛ kun amun, yɛlɛ kɛ amun Si klo kɛ amun tran be ng’ɔ sie be’n be nun.” (Lik 12:32) I agualiɛ su’n, “bua akpasua kaan” sɔ’n, be nuan yó sran 144.000. (Sa Nglo Yilɛ 14:1) Sran sɔ’m be nuan ti kaan tra sran miliɔn kpanngban nga bé wá trán Ɲanmiɛn i Sielɛ’n i bo aklunjuɛ nun tititi asiɛ’n su wa’n.—Sa Nglo Yilɛ 21:4.

Ɔ maan, sran kpa’m be kwlaa be su kɔman ɲanmiɛn su lɔ. Akoto Piɛli kannin Davidi m’ɔ yoli Famiɛn kpa’n i ndɛ kɛ: “David bɔbɔ a fu-man nyanmiɛn su lɔ.” (Sa Nga Be Yoli’n 2:34) Zan batɛmu yofuɛ’n yoli sran kpa. Sanngɛ Zezi kleli kɛ be su siemɛn i kɛ ɔ di famiɛn ɲanmiɛn su lɔ. I waan: “Be kwlaa nga bla wuli be’n, be nun wie fi nun-man lɛ bɔ i dan tra Zan batɛm yofuɛ nin-ɔn. Sanngɛ be nga Nyanmiɛn sie be’n be nun kaanfuɛ’n i dan trɛ i.”—Matie 11:11.

?Amún ɲán mmlusuɛ nga sran kpa’m bé ɲɛ́n i’n wie?

?Sɛ sran kun waan ɔ́ ɲán mmlusuɛ mɔ yɛle asiɛ’n su wa tranlɛ tititi’n, ngue yɛ ɔ fata kɛ ɔ yo ɔ? Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) Maan e sie i nzɔliɛ kɛ klolɛ mɔ Ɲanmiɛn klo mɛn’n ti’n, ɔ yoli maan sran ngba kwla ɲan anannganman nguan’n. Sanngɛ be nga bé ɲán mmlusuɛ sɔ’n sakpa’n, yɛle be nga be “lafi i su’n.”

Sɛ amun waan amún láfi Ɲanmiɛn su’n, ɔ fata kɛ amun si like ng’ɔ ti nanwlɛ’n i kpa. (Zan 17:3) Sɛ amun waan amún klé kɛ amun ti sran kpa’n, ɔ fata kɛ amun suan ninnge nga Zoova waan ɔ́ yó mán sran mun’n, be su like kpa liɛ su. Like nga amun suan’n, amun lafi su kpa naan amun yo i nuan su like. Yɛ amun lafi su kɛ anannganman nguan’n kwla yo amun liɛ wie.

[Kuku, bue 7]

?Ngue ndɛ yɛ Biblu’n kan ɔn?

Kosan:

?Kɛ sran kpa’m be wu’n, ngue yɛ ɔ ju i sin ɔn?

I su tɛlɛ:

“Be nga b’a wu’n be liɛ’n be wun-man sa fi wlɛ.”—AKUNNDANFUƐ’N 9:4-5.

Kosan:

?Ngue yɛ sran kpa’m bé ɲɛ́n i cɛn wie lele ɔ?

I su tɛlɛ:

“Cɛn wie lele be kwlaa nga be o ndia nun’n, bé tí [Zezi] i nɛn, yɛ bé fín ndia’n nun fíte.”—ZAN 5:28, 29.

Kosan:

?Nin yɛ sran kpa’m be sunman lika bé trán ɔn?

I su tɛlɛ:

“Mɛn’n ɔ́ yó sran kpa’m be liɛ. Bé trán nun tititi.”—JUE MUN 37:29.