?Ngue ti yɛ ɔ fata kɛ e su ‘Klist’ su ɔ?

“Sran nga i waan ɔ́ sú n su’n, maan ɔ klɛn i wun man min, yɛ [...] ɔ su n su.”—LIK 9:23

1, 2. ?Ngue ti yɛ ɔ ti cinnjin kɛ e fa e ɲin e sie i like nga ti yɛ ɔ fata kɛ e su “Krist” su’n, i su ɔ?

KƐ Zoova nian asiɛ’n su wa m’ɔ wun kɛ i sufuɛ mɔ b’a yia’n be nun’n, amun mɔ blɛ yɛ amun a ba uflɛuflɛ’n, ɔ nin gbanflɛn nin talua mun an o be nun wie’n, ɔ yo i fɛ kekleke! Kɛ amún súan Biblu’n nun like titi mɔ amún kɔ́ aɲia’m be bo’n, yɛ kɛ amún sí Ɲanmiɛn Ndɛ’n m’ɔ man nguan’n i nun like kɔ́ i ɲrun’n, ɔ fata kɛ amun bu Zezi i ndɛ ng’ɔ kɛnnin i yɛ’n, i akunndan kpa. I waan: “Sran nga i waan ɔ́ sú n su’n, maan ɔ klɛn i wun man min, yɛ ɔ suɛ i waka’n cɛn kwlaa ɔ su n su.” (Lik 9:23) Zezi i ndɛ sɔ’n i bo’n yɛle kɛ ɔ fata kɛ amun klɛn amun wun naan amun kaci i sɔnnzɔnfuɛ. I sɔ’n ti’n, ɔ ti cinnjin kɛ e si like nga ti yɛ ɔ fata kɛ e su “Krist” su’n.—Matie 16:13-16.

² ?Yɛ ngue yɛ ɔ fata kɛ e nga mɔ y’a dun mmua y’a fa Zezi Klist i ajalɛ’n su’n e yo ɔ? Ɲanmiɛn Ndɛ’n wla e fanngan kɛ e “yo i sɔ tra laa’n.” (1 Tɛsalonikfuɛ Mun 4:1, 2) Kannzɛ e o Ɲanmiɛn sulɛ kpafuɛ’n nun ɔ nin a cɛman annzɛ w’a di le nɲɔn kun’n, like nga ti yɛ ɔ fata kɛ e su Klist su’n, sɛ e fa e ɲin sie su’n, i sɔ’n úka e naan y’a fa Pɔlu i ndɛ’n su naan y’a su Zezi su cɛn kwlaa y’a tra laa’n. Siɛn’n, maan e fa e ɲin e sie i like nga ti yɛ ɔ fata kɛ e su Klist su’n be nun nnun su.

Kɛ ɔ ko yo naan e nin Zoova e afiɛn’n w’a mantan w’a tra laa’n

3. ?Like nɲɔn benin yɛ e kwla fa si Zoova ɔ?

³ I nun mɔ Atɛni lɔ’n, akoto Pɔlu “jin sran’m bɔ be o Areopazi lɛ’n be nyrun” m’ɔ́ kán ndɛ klé be’n, ɔ seli kɛ: “[Nyanmiɛn] sieli be afuɛ nga be di’n i nuan, yɛ ɔ jali nvle kun nin kun be awɛ. Nyanmiɛn yoli i sɔ kɛ be kunndɛ i, wienun-ɔn, sɛ be fuafua be sa-a bé wún i o, afin ɔ nin ye nin e nun wie fi nun-man mmua.” (Sa Nga Be Yoli’n 17:22, 26, 27) E kwla kunndɛ Ɲanmiɛn yɛ e si i sakpa. Sɛ e nian ninnge nga Ɲanmiɛn yili be’n, naan e bu be su akunndan yɛ e si be su ye’n, é wún Ɲanmiɛn i sran’n i wafa’n nin ninnge ng’ɔ kwla yo be’n be dan lika. (Rɔmfuɛ Mun 1:20) Asa ekun’n, Zoova yi i wun nglo kle e Biblu’n nun. (2 Timote 3:16, 17) Sɛ e ‘bu sa ng’ɔ yoli’n be kwlaa be akunndan’n,’ é sí Zoova kpa.—Jue Mun 77:12.

4. ?Sɛ e fa Klist i ajalɛ’n su kpa’n, wafa sɛ yɛ ɔ kwla uka e naan e nin Zoova e afiɛn’n w’a mantan kpa ɔ?

⁴ Sɛ e kunndɛ kɛ e nin Zoova e afiɛn’n mantan kpa’n, maan e su Zezi su. Ɲrun nga kɛ Zezi wo i Si wun lɔ’n ɔ le i’n “naan [Nyanmiɛn] w’a yi mɛn’n,” maan e bu i sin kan e nian! (Zan 17:5) Ɔ ti “Ɲanmiɛn i ninnge ng’ɔ yili be’n be kwlaa be bo bolɛ.” (Sa Nglo Yilɛ 3:14, NW) Zezi m’ɔ ‘ti Nyanmiɛn i Wa kpɛn’n,’ ɔ nin i Si Zoova be trannin ɲanmiɛn su lɔ lelele ka naan w’a ba asiɛ’n su wa. I blɛ sɔ’n nun’n, ɔ nin i Si b’a tranman lɛ sa ngbɛn. Zezi yoli Ɲanmiɛn i janvuɛ kpa. Ɔ nin Ɲanmiɛn mɔ like fi nunmɛn i sin’n be dili junman likawlɛ. Wafa nga ɔ nin Ɲanmiɛn be afiɛn’n mantannin’n ɔ lemɛn i wunsu. Zezi niannin wafa nga i Si fa yo ninnge mun’n yɛ ɔ fɛli i ɲin sieli i sran’n i wafa’n su. Sanngɛ nɛ́n i sɔ ngunmin yɛ ɔ yoli ɔ. Like kwlaa nga i Si yoli’n, ɔ kɛli i klun kpɛkun ɔ niannin su yoli. I sɔ’n ti’n, Ba sɔ m’ɔ ti aɲinyiɛfuɛ’n, ɔ kacili kɛ i Si sa cɛ. Ɔ maan Biblu’n se kɛ ɔ ‘fa Nyanmiɛn bɔ be wun-mɛn i’n.’ (Kolɔsfuɛ Mun 1:15) Sɛ e nian Klist i ajalɛ liɛ’n su kpa’n, e nin Zoova e afiɛn’n kwla mantan kpa.

Kɛ ɔ ko yo naan y’a nian like nga Zoova yo’n su kpa y’a tra laa’n

5. ?Ngue yɛ ɔ kwla uka e naan y’a nian like nga Zoova yo’n su y’a tra laa ɔ? ?Yɛ ngue ti ɔ?

⁵ Ɲanmiɛn ‘yili sran kɛ i bɔbɔ sa cɛ.’ Ɔ maan e kwla yi i nzuɛn’n i nglo. (Bo Bolɛ 1:26) Akoto Pɔlu wlali Klistfuɛ’m be fanngan kɛ, kɛ mɔ ‘be ti Nyanmiɛn i anwlɛn su ba’n, be nian like ng’ɔ yo’n su, be yo.’ (Efɛzfuɛ Mun 5:1) Kɛ e su Klist su’n, i sɔ’n uka e naan y’a nian like nga e Si m’ɔ o nglo lɔ’n yo’n su y’a yo. Like nga ti yɛ ɔ ti sɔ’n, yɛle kɛ sran fi siman Ɲanmiɛn i klun akunndan’n, ɔ nin i nzuɛn’n traman Zezi. Annzɛ kusu sran fi kwlá yiyiman Ɲanmiɛn i sran’n i wafa’n nun trɛmɛn i. I nun mɔ Zezi o asiɛ’n su wa’n, nán Zoova i dunman ngunmin yɛ ɔ yoli maan sran’m be sili i ɔ. Sanngɛ ɔ kleli sran’n i wafa nga Ɲanmiɛn ti’n. (An kanngan Matie 11:27 nun.) Ndɛ nga Zezi kannin’n, ɔ nin i aeliɛ’n ɔ nin ninnge ng’ɔ kleli’n, be yili i sɔ’n kwlaa i nglo.

6. ?Ngue yɛ like nga Zezi kle’n yi i nglo Zoova su ɔ?

⁶ Zezi kleli e like nga Ɲanmiɛn kunndɛ kɛ e yo’n, ɔ nin wafa ng’ɔ bu i sufuɛ mun’n. (Matie 22:36-40; Lik 12:6, 7; 15:4-7) E kwla fa ndɛ wie mun e yiyi i sɔ liɛ’n nun. Yɛle kɛ Zezi kannin Mmla blu’n be nun kun i ndɛ. Mmla sɔ’n se kɛ: “Nán kunndɛ bla ɔ yi bo, annzɛ bian ɔ wun bo.” Kɛ Zezi seli sɔ’n, ɔ kleli wafa nga Ɲanmiɛn bu akunndan ng’ɔ o sran’n i klun ka naan w’a yo sa tɛ sɔ’n. Ɔ seli kɛ: “Sran kwlaa ng’ɔ wun bla kun b’ɔ bu i kunndɛlɛ akunndan i anwlɛn nun’n, wuun w’a kunndɛ bla sɔ’n.” (Ezipt Lɔ Tulɛ 20:14; Matie 5:27, 28) Farizifuɛ’m be kpɛli Ɲanmiɛn i Mmla wun be seli kɛ: “Klo ɔ wiengu, yɛ kpɔ ɔ kpɔfuɛ.” Kɛ Zezi boli i sɔ ndɛ’n su’n, ɔ kleli Zoova i akunndan’n. I waan: “Be nga be kpɔ amun’n, an yo be kpa, yɛ be nga be yo amun tɛtɛ bɔ be kle amun yalɛ’n, an srɛ Nyanmiɛn kɛ ɔ yo be kpa.” (Matie 5:43, 44; Ezipt Lɔ Tulɛ 23:4; Saun Yolɛ 19:18) Kɛ e wun Ɲanmiɛn i akunndan’n, ɔ nin wafa ng’ɔ fa wun ninnge mun’n be wlɛ’n, i sɔ’n uka e naan y’a nian like ng’ɔ yo’n su kpa y’a tra laa’n.

7, 8. ?Ngue yɛ Zezi i aeliɛ’n kle e Zoova su ɔ?

⁷ Zezi i mɛn dilɛ nun’n, ɔ kle e wafa nga i Si fa ti’n. Kɛ e kanngan Zezi i su ndɛ nga be klɛli’n nun’n, e wun kɛ be nga be leman wie’n, ɔ nin be nga afɛ o be su’n be yoli Zezi i annvɔ. Yɛ kɛ i sɔnnzɔnfuɛ’m b’a kplinman su kɛ ba kanngan’m be wɔ i sin’n, ɔ yoli i ya. ?Nɛ́n i sɔ kunngba’n yɛ i Si fa yo ɔ? (Mark 1:40-42; 10:13, 14; Zan 11:32-35) Maan e bu ninnge nga Zezi yoli be mɔ be uka e naan y’a si Ɲanmiɛn i sran’n i wafa ng’ɔ ti abonuan’n be akunndan. ?Abonuan sa nga Klist yoli be’n, be kleman kɛ i tinmin ng’ɔ le i’n ti dan? Ɔ nin i sɔ ngba’n, w’a fa yoman i bɔbɔ i klunklo like le. Annzɛ w’a fa yoman sran tɛ. (Lik 4:1-4) Wafa ng’ɔ kannin aata difuɛ’m be bo Ɲanmiɛn i sua’n nun lɔ’n, ɔ yi i nglo weiin kɛ ɔ klo sa’n i nuan su yolɛ dan! (Mark 11:15-17; Zan 2:13-16) Ninnge ng’ɔ kleli be’n, ɔ nin i nuan nun ndɛ fɛ’n, be kannin sran’m be awlɛn’n. I sɔ’n kle kɛ i ngwlɛlɛ’n “i dan tra Salomɔn” liɛ’n. (Matie 12:42) KIolɛ mɔ Zezi klo sran ti’n, ɔ fɛ i wun mannin. ?Nán “sran klolɛ ng’ɔ ti dan trɛ i ngba’n” yɛle ngalɛ’n?—Zan 15:13.

⁸ Ninnge kwlaa nga Ɲanmiɛn i Wa’n yoli’n nun’n, ɔ nian nun yoli be kɛ Zoova sa cɛ. Ɔ maan ɔ kwla seli kɛ: “Sran ng’ɔ wun min’n, wuun w’a wun e Si’n.” (An kanngan Zan 14:9-11 nun.) Sɛ e sɔnnzɔn Klist’n, nn Zoova yɛ y’a sɔnnzɔn i ɔ.

Zoova kpali Zezi sieli i ngunmin

9. ?Blɛ benin nun yɛ Zezi kacili sran mɔ Ɲanmiɛn kpɛli i sieli i ngunmin ɔn? ?Yɛ wafa sɛ yɛ ɔ kacili sɔ ɔ?

⁹ Afuɛ nga be flɛ i 29 nun’n, kɛ Zezi ɲannin afuɛ 30 m’ɔ ɔli Zan batɛmu yofuɛ i wun lɔ’n, sa ng’ɔ juli’n, maan e fa e ɲin e sie su. Biblu’n se kɛ: “Kɛ ɔ yoli Jésus batɛm b’ɔ fin nzue’n nun fiteli cɛ’n, kpɛkuun nyanmiɛn su lɔ’n i su tikeli muaan, Jésus wunnin Nyanmiɛn wawɛ’n, ɔ jra ba kɛ auble sa, ɔ wa trɛnnin i su.” Kɛ ɔ fin i lɛ’n, yɛ Zezi kacili Klist annzɛ Mɛsi’n niɔn. Blɛ sɔ nun’n, Zoova bɔbɔ yili i nglo weiin kɛ Zezi yɛ ɔ ti sran m’ɔ kpɛli i sieli i ngunmin ɔn. Ɔ maan ɔ seli kɛ: “Min anwlɛn su ba’n yɛ, i su yɛ m’an fa n wla kwlaa m’an gua-a.” (Matie 3:13-17) I sɔ’n ti’n, nanwlɛ ɔ fata kɛ e su Klist su!

10, 11. (a) ?Wafa sɛ yɛ be fa “Krist” be fa kan Zezi i ndɛ ɔ? (b) ?Ngue ti yɛ ɔ nin i fataman kɛ e ɲin kpa Zezi Klist i su sulɛ’n su kaan sa ɔ?

¹⁰ Biblu’n nun’n, Zezi i flɛlɛ’n ti wafawafa. Be flɛ i kɛ Zezi Klist annzɛ Klist Zezi annzɛ Klist. Zezi bɔbɔ yɛ ɔ dun mmua flɛli dunman ‘Jésus-Krist’n’ niɔn. Yɛle kɛ ɔ dun mmua se kɛ Zezi naan w’a fa Klist w’a nannan su. Ɲanmiɛn srɛlɛ kun nun’n, ɔ seli i Si kɛ: “Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n nin Jésus-Krist bɔ a sunmɛnnin i’n.” (Zan 17:3) Kɛ be flɛ i sɔ’n, ɔ kle kɛ i yɛ Ɲanmiɛn sunmɛnnin i m’ɔ yoli sran nga Ɲanmiɛn kpɛli i sieli i ngunmin’n niɔn. Kɛ be dun mmua se kɛ Klist naan b’a fa Zezi b’a nannan su kɛ “Krist-Jésus” sa’n, be tin junman ng’ɔ di’n su. (2 Korɛntfuɛ Mun 4:5) Kɛ be se kɛ “Krist” mɔ be faman Zezi sieman su’n, i sɔ’n ti wafa uflɛ mɔ be fa tin Zezi i Mɛsi junman ng’ɔ di’n su ɔ.—Matie 16:16.

¹¹ Kannzɛ be se kɛ “Krist” o, annzɛ “Jésus-Krist” o, annzɛ “Krist-Jésus” o, i kwlaa ngalɛ’n kle e ndɛ cinnjin kun. Yɛle kɛ kannzɛ Ɲanmiɛn i Wa’n bali asiɛ’n su wa kɛ klɔ sran sa’n, naan ɔ yoli maan be sili i Si klun sa’n, sanngɛ ɔ timan sran ngbɛn sa, annzɛ Ɲanmiɛn nuan ijɔfuɛ ngbɛn. Ɔ bali kɛ ɔ́ wá yó sran nga Zoova kpɛli i sieli i ngunmin’n. Ɔ fataman kɛ e ɲin kpa i su sulɛ’n su kaan sa.

Zezi kunngba cɛ yɛ ɔ ti nguan’n i atin’n niɔn

12. ?Ka naan Zezi w’a wu’n, ndɛ cinnjin benin yɛ ɔ kan kleli akoto Toma ɔ?

¹² Kɛ Zezi wá wú’n, ndɛ ng’ɔ kannin kleli i akoto mun’n, ɔ kle e like cinnjin uflɛ nga ti yɛ ɔ fata kɛ e su Mɛsi’n su titi’n. Zezi seli kɛ ɔ́ kɔ́ ɲanmiɛn su lɔ ɔ́ kó síesíe lika mɛ́n i sɔnnzɔnfuɛ mun. I sɔ’n ti’n Toma usɛli i kosan kun. Zezi tɛli i su kɛ: “Min yɛ n ti atin nin nanwlɛ nin nguan nin-ɔn. Sran nga w’a sin-man min nun’n, ɔ ju-man e Si wun lɔ.” (Zan 14:1-6) Zezi i akoto 11 mɔ b’a kpɔcimɛn i’n, be yɛ ɔ kannin ndɛ sɔ’n kleli be ɔ. Ɔ seli be kɛ ɔ́ mán be tranwlɛ ɲanmiɛn su lɔ. Sanngɛ be nga bé wá ɲán anannganman nguan asiɛ’n su wa’n, ndɛ sɔ’n ti cinnjin man be wie. (Sa Nglo Yilɛ 7:9, 10; 21:1-4) ?Ngue ti yɛ e kwla se sɔ ɔ?

13. ?Wafa sɛ yɛ Zezi ti ‘atin’n’ niɔn?

¹³ Zezi Klist yɛ ɔ ti ‘atin’n’ niɔn. Yɛle kɛ i kunngba cɛ yɛ e kwla sin i sin naan y’a to Ɲanmiɛn ɔn. Saan sɛ e srɛ Ɲanmiɛn like Zezi dunman nun’n, yɛ e kwla lafi su kɛ sɛ ɔ ti e Si i klun su’n, ɔ́ mán e ɔ. (Zan 15:16) Sanngɛ Zezi ti “atin” like uflɛ nun ekun. Sa tɛ’n ti e nin Ɲanmiɛn e afiɛn’n w’a ti nun. (Ezai 59:2) Zezi ‘fɛli i wun kpɔli sran sunman be ti.’ (Matie 20:28) I sɔ’n ti’n, Biblu’n se kɛ: “Jésus i mmoja’n maan e wun sa tɛ kwlaa wíe.” (1 Zan 1:7) Ɔ maan Ɲanmiɛn Wa’n yoli maan e nin Ɲanmiɛn e afiɛn’n kwla sɛ ekun. (Rɔmfuɛ Mun 5:8-10) Sɛ be lafi Zezi su naan be ɲin yi i’n, yɛ be nin Ɲanmiɛn be afiɛn kwla sɛ ɔ.—Zan 3:36.

14. ?Wafa sɛ yɛ Zezi ti ‘nanwlɛ’n’ niɔn?

¹⁴ Nán kɛ Zezi ti nanwlɛfuɛ ngunmin ti yɛ ɔ ti ‘nanwlɛ’n’ niɔn. Sanngɛ Mɛsi’n i su ndɛ nga Ɲanmiɛn nuan ijɔfuɛ’m be klɛli’n, be nun sunman b’a kpɛn su Zezi i lika. Akoto Pɔlu klɛli i kɛ: “Sa kwlaa nga Nyanmiɛn waan ɔ́ yó’n, Krist kplin su yɛ ɔ yiɛ i nuan.” (2 Korɛntfuɛ Mun 1:20) Moizi Mmla m’ɔ “ti kɛ like kpakpa nga bé bá’n be wawɛ sa” bɔbɔ’n, be kpɛnnin su Klist Zezi lika. (Ebre Mun 10:1; Kolɔsfuɛ Mun 2:17) Ɲanmiɛn nuan ndɛ kwlaa nga be kannin’n, be kwlaa be ti yia Zezi su. Yɛ be uka e maan e wun junman cinnjin nga Zezi di i Zoova klun sa’n i su kpɛnlɛ’n nun’n, i wlɛ. (Sa Nglo Yilɛ 19:10) Ninnge nga Ɲanmiɛn seli kɛ ɔ́ wá yó be mán e’n, kɛ ɔ ko yo naan y’a di su wie’n ɔ fata kɛ e su Mɛsi’n su.

15. ?Wafa sɛ yɛ Zezi ti ‘nguan’n’ niɔn?

¹⁵ Like nga ti yɛ Zezi ti ‘nguan’n,’ yɛle kɛ ɔ fɛli i mmoja’n fa toli klɔ sran mun. Ɔ maan anannganman nguan’n ti like mɔ “e Min Krist-Jésus [...] ti’n,” Ɲanmiɛn fa cɛli e ɔ. (Rɔmfuɛ Mun 6:23) Zezi ti “nguan” man be nga be wuli’n wie. (Zan 5:28, 29) Asa kusu’n, kɛ ɔ́ wá yó Ɲanmiɛn ɲrun jranfuɛ’m be su kpɛn i afuɛ akpi sielɛ blɛ nun’n, maan e bu like ng’ɔ́ wá yó’n i akunndan e nian. Ɔ́ yó maan sran ng’ɔ́ síe be asiɛ’n su wa’n, bé ɲán be ti sa tɛ’n nin wie’m be sa nun mlɔnmlɔnmlɔn!—Ebre Mun 9:11, 12, 28.

16. ?Ngue ti yɛ ɔ fata kɛ e su Zezi su ɔ?

¹⁶ Kɛ e fa wunnin i lɛ’n, wafa nga Zezi fa tɛli Toma i kosan’n su’n, ɔ ti e cinnjin wie. Zezi ti atin nin nanwlɛ nin nguan’n. I yɛ Ɲanmiɛn sunmɛnnin i mɛn’n nun kɛ ɔ bla naan mɛn’n nunfuɛ’m be ɲan be ti’n niɔn. (Zan 3:17) Sran nga w’a sinmɛn i nun’n, ɔ su juman e Si i wun lɔ. Biblu’n kɛn i weiin kɛ: “I kunngba cɛ yɛ ɔ kwla de sran-an yɛlɛ kɛ Nyanmiɛn a sie-man sran uflɛ fi mɛn’n nun wa bɔ i dunman nun e kwla fite nun-ɔn.” (Sa Nga Be Yoli’n 4:12) Ɔ maan kannzɛ maan like nga be kleli e laa’n ɔ yo sɛ, sɛ e si ngwlɛlɛ’n, é láfi Zezi su, é káci i sɔnnzɔnfuɛ naan ɔ kle e nguan’n i atin’n.—Zan 20:31.

Ɔ fata kɛ e fa ndɛ nga Klist kan’n su

17. ?Ngue ti yɛ ɔ ti cinnjin kɛ e sie e su e tie ndɛ nga Ɲanmiɛn i Wa’n kan’n niɔn?

¹⁷ Piɛli nin Zan nin Zaki be wunnin aolia nun like kun m’ɔ ti abonuan’n. Blɛ sɔ’n nun’n, be tili sran kun i nɛn ɲanmiɛn su lɔ. Ɔ seli kɛ: “N wa bɔ n kpɛli i’n yɛ. An tie ndɛ ng’ɔ kan’n.” (Lik 9:28, 29, 35) Kɛ be se e kɛ e sie e su e tie ndɛ nga Mɛsi’n kan’n, ɔ fata kɛ ɔ yo e cinnjin.—An kanngan Sa Nga Be Yoli’n 3:22, 23 nun.

18. ?Wafa sɛ yɛ e kwla tie ndɛ nga Zezi Klist kan’n niɔn?

¹⁸ Kɛ be se kɛ e tie ndɛ nga Zezi kan’n, i wie yɛle kɛ ‘e kpɛ e nyin e niɛn i, naan e bu i ajalɛ’n i akunndan.’ (Ebre Mun 12:2, 3) Ɔ maan, kɛ e kanngan Zezi i su ndɛ Biblu’n nin Biblu’n i akua mɔ “sran kpa nanwlɛfuɛ b’ɔ si ngwlɛlɛ’n” yi be’n be nun’n, ɔ nin i fata kɛ “e fa ndɛ nga e tili be’n sie e klun kpa tra laa’n.” Kɛ be kan ndɛ be kle e aɲia’m be bo lɔ’n, i sɔ’n kunngba’n yɛ ɔ fata kɛ e yo ɔ. (Ebre Mun 2:1; Matie 24:45) Maan e mɔ e ti Zezi i bua mun’n, e mian e ɲin e tie i nuan ndɛ’n naan e su i su.—Zan 10:27.

19. ?Ngue yɛ ɔ kwla uka e naan y’a su Klist su titi ɔ?

¹⁹ ?Kannzɛ sa’m be tɔ e su sɛ’n, sanngɛ é kwlá sú Klist su titi? Ɛɛn, e kwla yo sɔ. Yɛle kɛ sɛ ‘sran wunmuan bɔ e nin Krist-Jésus ti’n ti e lafi Nyanmiɛn su, yɛ e klo Nyanmiɛn nin sran’n, é fá ndɛ nanwlɛ nga be kan kleli e’n su yɛ é nían su yó.’—2 Timote 1:13.

?Ngue yɛ amun suannin ɔn?

• ?Ngue ti yɛ sɛ e su “Krist” su’n, e nin Zoova e afiɛn’n kwla mantan kpa ɔ?

• ?Ngue ti yɛ sɛ e sɔnnzɔn Zezi’n, nn Zoova yɛ y’a sɔnnzɔn i ɔ?

• ?Wafa sɛ yɛ Zezi ti “atin nin nanwlɛ nin nguan nin-ɔn”?

• ?Ngue ti yɛ ɔ fata kɛ e tie Zoova i sran ng’ɔ kpɛli i’n i ndɛ’n niɔn?

[Foto, bue 28]

Akunndan nga Zoova bu’n i su yɛ Zezi i like klelɛ’n taka ɔ.

[Foto, bue 29]

Ɔ fata kɛ e su Zoova i sran ng’ɔ kpɛli i’n su titi.

[Foto, bue 31]

Zoova seli kɛ: “N Wa [...] yɛ. An tie ndɛ ng’ɔ kan’n.”