?Wafa sɛ yɛ be wu sran kun i uflɛ ɔ?

ZEZI kannin sa nga ti yɛ ɔ ti cinnjin kɛ be wu sran kun i uflɛ’n nin sran nga mɔ maan be kwla yo i sɔ’n, ɔ nin sa nga ti yɛ ɔ fata kɛ be yo i sɔ’n, be ndɛ kleli Nikodɛmu. Sanngɛ w’a kaman i sɔ’n su. Ɔ kannin wafa nga be wu sran kun uflɛ’n i ndɛ wie. Zezi seli kɛ: “Sɛ sran i awuliɛ’n fin-man nzue nin Nyanmiɛn wawɛ’n, ɔ su kwlá yo-man mɛn nga Nyanmiɛn sie’n i nunfuɛ.” (Zan 3:5) Ɔ maan nzue nin Ɲanmiɛn wawɛ’n yɛ be fa wu sran kun uflɛ ɔ. ?Sanngɛ ngue like yɛle “nzue nin Nyanmiɛn wawɛ’n” nga be kan be ndɛ’n?

?Ngue yɛle “nzue nin Nyanmiɛn wawɛ’n”?

Kɛ mɔ Nikodɛmu ti Zuifu’m be mmla sifuɛ dan kun’n ti’n, wafa nga be kan “Nyanmiɛn wawɛ’n” i ndɛ Biblu’n i bue nga be klɛli i Ebre nun’n, ɔ si i kpa. Ɔ si kɛ Ɲanmiɛn i wunmiɛn m’ɔ fa yo abonuan sa mun’n yɛ be kɛn i ndɛ ɔ. (Bo Bolɛ 41:38; Ezipt Lɔ Tulɛ 31:3; 1 Samiɛl 10:6) Ɔ maan kɛ Zezi kannin “Nyanmiɛn wawɛ’n” i ndɛ’n, Nikodɛmu wunnin i wlɛ kɛ Ɲanmiɛn i wunmiɛn’n i ndɛ yɛ ɔ kan ɔn.

?Yɛ nzue nga Zezi kɛn i ndɛ’n nin? Be dun mmua klɛli ndɛ wie mun ka naan Zezi nin Nikodɛmu b’a koko be yalɛ’n. Asa kusu’n, kɛ be wieli ijɔ’n, be klɛli ndɛ wie mun. Maan e fa e ɲin e sie be su. Ndɛ sɔ’m be kle kɛ Zan batɛmu yofuɛ’n nin Zezi i sɔnnzɔnfuɛ’m be yoli sran’m be batɛmu nzue’n nun. (Zan 1:19, 31; 3:22; 4:1-3) Zerizalɛmufuɛ’m be sili nzue nun batɛmu yolɛ’n kpa. Ɔ maan, kɛ Zezi kán nzue’n i ndɛ’n, Nikodɛmu wunnin i wlɛ kɛ nán nzue ngbɛn sa i ndɛ yɛ ɔ kan ɔn. Sanngɛ batɛmu nga be yo i nzue’n nun’n i ndɛ yɛ ɔ kan ɔn.

Ɔ “fa Nyanmiɛn wawɛ’n yo” batɛmu

Kɛ be se kɛ ‘sran i awuliɛ’n fin nzue’n,’ i bo’n yɛle kɛ be yoli sran sɔ’n i batɛmu nzue’n nun. ?Sɛ ɔ ti sɔ’n, kɛ be se kɛ ‘sran i awuliɛ’n fin Nyanmiɛn wawɛ’n,’ i bo’n yɛle benin? Kwlaa naan Nikodɛmu nin Zezi b’a koko be yalɛ’n, Zan batɛmu yofuɛ’n kannin kɛ nán nzue kunngba yɛ bé fá yó batɛmu ɔ. Sanngɛ bé fá Ɲanmiɛn wawɛ’n wie. Ɔ seli kɛ: “N liɛ’n, n yoli amun batɛm nzue’n nun, sanngɛ i [Zezi] liɛ’n, ɔ́ wá fá Nyanmiɛn wawɛ’n yó amun batɛm.” (Mark 1:7, 8) Mark m’ɔ klɛli Zezi i su ndɛ’n, ɔ kannin kpɛ klikli nga be yoli i sɔ batɛmu’n i ndɛ. Ɔ klɛli i kɛ: “I blɛ sɔ’n nun’n, Jésus fin Nazarɛt b’ɔ o Galile mɛn’n nun bali naan Zan w’a yo i batɛm Zurdɛn’n nun. Kɛ Jésus fín nzue’n nun fíte’n, i osu kunngba’n nun ɔ wunnin kɛ Nyanmiɛn su lɔ’n su ti muaan, yɛ Nyanmiɛn wawɛ’n jrɛli i su kɛ auble sa.” (Mark 1:9, 10) Kɛ be mlɔnnin Zezi Zurdɛn nzue ba’n nun’n, yɛ ɔ ti i nzue’n nun batɛmu yolɛ’n niɔn. Ɲanmiɛn wawɛ’n m’ɔ jrɛli i su’n, ɔ kle kɛ b’a fa Ɲanmiɛn wawɛ’n b’a yo i batɛmu.

Kɛ be yoli Zezi i batɛmu m’ɔ́ dí afuɛ ko ju nsan’n, ɔ seli i akoto’m be kɛ: “Ɔ di le nnyɔn kun’n, Nyanmiɛn wá fɛ́ i wawɛ’n yó amun batɛm.” (Sa Nga Be Yoli’n 1:5) ?Blɛ benin nun yɛ i sɔ liɛ’n juli ɔ?

Afuɛ nga be flɛ i 33 i pantekɔtu nun’n, Zezi i akoto ko ju 120 be yiali sua kun nun Zerizalɛmu lɔ. “Kɛ be ti lɛ’n, kpɛkun be ti like kun ngan, ɔ fin nyanmiɛn su lɔ ɔ kpla kɛ aunngban sa, ɔ wluli sua nga be o nun’n, i nun. Bé nían-an, like wie bɔ be ti kɛ sin taaman sa’n be yɛ [...], Nyanmiɛn wawɛ’n wluli be nun.” (Sa Nga Be Yoli’n 2:1-4) Cɛn kunngba sɔ’n nun’n, be wlali Zerizalɛmu lɔ sran uflɛ wie’m be fanngan kɛ be yo be batɛmu nzue’n nun. Akoto Piɛli seli sran kpanngban nga be yiali lɛ’n be kɛ: “An kaci amun nzuɛn’n maan be yo amun kwlakwlakwla amun batɛm Jésus-Krist dunman nun naan Nyanmiɛn yaci sa nga an yoli i’n cɛ amun yɛ ɔ fɛ i wawɛ’n man amun.” ?Kɛ ɔ yoli sɔ’n i bo’n guali sɛ? “Be bɔ be fɛli i ndɛ’n su’n, be yoli be batɛmu. Cɛn sɔ’n nun’n sran bɔ be ju bɔ akpi nsan (3000) kun be ukali be su.”—Sa Nga Be Yoli’n 2:38, 41.

Ajalɛ nɲɔn

?Ngue yɛ batɛmu sɔ’m be kle e sran i awuliɛ uflɛ’n su ɔ? Be kle e kɛ ɔ fata kɛ sran kun yia ajalɛ nɲɔn nuan naan b’a kwla se kɛ b’a wu i uflɛ. Maan e sie i nzɔliɛ kɛ be dun mmua yoli Zezi i batɛmu nzue’n nun. I sin’n Ɲanmiɛn wawɛ’n jrɛli i su. I kunngba’n, be yoli Zezi i sɔnnzɔnfuɛ klikli’m be batɛmu nzue’n nun (Zan batɛmu yofuɛ’n yɛ ɔ yoli be wie’m be batɛmu ɔ). I sin’n, Ɲanmiɛn wawɛ’n jrali be su. (Zan 1:26-36) I sɔ kunngba’n, be yoli sran 3.000 nga be kacili Zezi i sɔnnzɔnfuɛ’n be batɛmu nzue’n nun ka, naan i sin’n Ɲanmiɛn wawɛ’n w’a jra be su.

?Kɛ e bu batɛmu nga be yoli be afuɛ nga be flɛ i 33 i Pantekɔtu nun’n be akunndan’n, e kwla sunnzun kɛ andɛ sran’m be awuliɛ uflɛ’n yó wafa sɛ? Wafa ng’ɔ fa yoli Zezi i akoto nin i sɔnnzɔnfuɛ klikli’m be blɛ su’n, i kunngba’n yɛ ɔ́ fá yó andɛ ɔ. I klikli’n, sran’n i sa tɛ ng’ɔ yoli’n yo i nsisɔ ɔ maan ɔ kaci i nzuɛn’n yɛ ɔ fɛ i wun man Zoova kɛ ɔ́ sú i. Kpɛkun ɔ fɛ i wun kle sran’m be kwlaa kɛ w’a fɛ i wun w’a man Ɲanmiɛn yɛle kɛ be yo i batɛmu nzue’n nun. Sɛ Ɲanmiɛn fɛli i kɛ ɔ di famiɛn i Sielɛ’n nun’n, ɔ fɛ i wawɛ’n mɛn i. Sran kun bɔbɔ yɛ ɔ fa ajalɛ nɲɔn sɔ’n i nun klikli’n niɔn (Nzue’n nun batɛmu yolɛ’n). Sanngɛ Ɲanmiɛn yɛ ɔ fa ajalɛ nɲɔn su’n niɔn (Batɛmu nga be fa Ɲanmiɛn wawɛ’n be yo’n). Kɛ be ko yo sran kun i batɛmu nɲɔn sɔ’n, nn b’a wu i uflɛ.

?Yɛ ngue ti yɛ kɛ Zezi nin Nikodɛmu bé kókó yalɛ’n, ɔ seli kɛ sɛ ‘sran i awuliɛ’n fin-man nzue nin Nyanmiɛn wawɛ’n,’ ɔ kwlá yoman mɛn nga Ɲanmiɛn sie’n i nunfuɛ’n niɔn? Ɔ kannin sɔ fa tinnin su kɛ be nga be fa nzue’n nin Ɲanmiɛn wawɛ’n be yo be batɛmu’n, bé káci dan kpa. Ndɛ ng’ɔ́ bá lɛ’n, ɔ́ wá yíyí i sɔ’n nun.

[Foto, bue 9]

Izraɛlifuɛ nga be kacili be nzuɛn’n, Zan yoli be batɛmu nzue’n nun.