?Kɛ be wu sran kun i uflɛ’n ɔ nin Ɲanmiɛn be afiɛn’n yo sɛ?

KƐ Zezi kán batɛmu nga be yo i nin Ɲanmiɛn wawɛ’n i ndɛ’n, ɔ seli kɛ sɛ sran’n i ‘awuliɛ’n fin-man Nyanmiɛn wawɛ’n’ ɔ su kwlá yoman mɛn nga Ɲanmiɛn sie’n i nunfuɛ. ?Ngue ti yɛ ɔ seli sɔ ɔ? (Zan 3:5) Kɛ bé kán akunndan nun ndɛ mɔ be fa “awuliɛ’n” kan ndɛ sɔ’n, i bo’n yɛle kɛ “b’a bo like sɔ’n i bo.” Ɔ maan kɛ be se kɛ “be wu be uflɛ’n” ɔ kle kɛ “b’a bo like uflɛ yolɛ bo.” I sɔ’n ti’n, ndɛ mma “awuliɛ’n” ɔ nin “be wuli be uflɛ’n” mɔ be ti akunndan nun ndɛ’n, be kle kɛ be nga be yo be batɛmu nin Ɲanmiɛn wawɛ’n be nin Ɲanmiɛn be afiɛn’n m’ɔ́ wá sɛ́’n, ɔ́ yó wafa uflɛ. ?Wafa sɛ yɛ be nin Ɲanmiɛn be afiɛn’n m’ɔ́ sɛ́ sɔ’n, ɔ́ yó ye ɔ?

Akoto Pɔlu kannin wafa nga Ɲanmiɛn siesieli sran wie mun naan be ko di famiɛn ɲanmiɛn su lɔ’n i ndɛ. Kɛ ɔ́ kán’n, ɔ fali awlobo nun tranlɛ’n i su sunnzun ase kun. Ɔ klɛli i blɛ su Klistfuɛ’m be fluwa kɛ ‘bé káci Nyanmiɛn klun ba mun.’ Ɔ maan Ɲanmiɛn ‘bú be i wa.’ (Galasifuɛ Mun 4:5; Ebre Mun 12:7) Gbanflɛn kan nga be fa yo be klun ba’n i su sunnzun ase’n kwla uka e naan kɛ Ɲanmiɛn fɛ i wawɛ’n man sran kun’n, wafa nga ninnge wie’m be kaci i mɛn dilɛ nun’n y’a wun i wlɛ. Kɛ ɔ ko yo naan y’a wun i sɔ liɛ’n i wlɛ’n, maan e fa e ɲin sie i yasua kan nga mɔ i waan ɔ́ kɔ́ ɔnvuɛ’m be suklu’n nun’n, i su sunnzun ase’n su.

B’a yo Ɲanmiɛn i klun ba ti b’a kaci

Sunnzun ase’n nun’n, gbanflɛn kan’n kwlá klɛmɛn i dunman suklu’n nun. Afin ɔ timan klɔ’n sufuɛ. ?Sanngɛ sɛ cɛn kun’n ninnge’m be kaci’n nin? ?Yɛle kɛ sɛ klɔ’n sufuɛ kun fɛ i kaci i klun ba naan ɔ yo i wun fluwa’n nin? ?Wafa sɛ yɛ i sɔ’n káci gbanflɛn kan’n i mɛn’n dilɛ’n niɔn? Kɛ mɔ klɔ’n sufuɛ kun w’a fɛ i w’a kaci i wa’n, ɔ kwla yo ninnge nga be nga’m be yo’n wie. Ɔ kwla klɛ i dunman suklu’n nun wie siɛn’n. Kɛ mɔ sran kun fɛli i yoli i klun ba’n ti’n, ɔ kwla yo ninnge kpanngban siɛn’n.

I sɔ’n yi wafa nga be nga be wu be uflɛ’n be ninnge yolɛ’n kaci’n i nglo kpa. Maan e nian wafa nga ndɛ nɲɔn sɔ’m be fa be wun’n. Gbanflɛn kan nga e fɛ i su sunnzun ase’n, sɛ ɔ yia ninnge wie’m be nuan’n, yɛ bé klɛ́ i dunman suklu’n nun ɔn. Yɛle kɛ ɔ fata kɛ ɔ yo klɔ’n i sufuɛ. Sanngɛ i bɔbɔ kwlá yoman naan w’a kaci klɔ’n i sufuɛ. I kunngba’n, ka naan sran wie’m b’a kwla di famiɛn ɲanmiɛn su lɔ’n, ɔ fata kɛ be yia ninnge wie’m be nuan. Yɛle kɛ ɔ fata kɛ “be wu be ekun.” Sanngɛ be bɔbɔ be kwlá seman kɛ be wu be ekun, afin be awuliɛ uflɛ’n, ɔ fin Ɲanmiɛn.

?Ngue yɛ ɔ yoli maan gbanflɛn kan’n kwla yo ninnge wie mun siɛn’n niɔn? Kɛ m’ɔ kacili sran kun i wa mɔ be yoli i wun fluwa’n ti ɔ. Nán kɛ i sɔ’n ti’n, gbanflɛn’n kacili sran uflɛ ɔ. Sran kunngba’n niɔn. Kannzɛ ɔ ti sɔ’n, sanngɛ kɛ mɔ be yoli i wun fluwa m’ɔ kacili klɔ’n sufuɛ kun i wa’n, gbanflɛn’n kwla yo ninnge wie mun siɛn’n. Ɔ ti kɛ b’a wu i i uflɛ sa. Sran sɔ’n w’a kaci i si. I sɔ’n ti’n, ɔ kwla klɛ i dunman suklu’n nun kpɛkun ɔ ti i si i awlo’n nun ba.

I kunngba’n, Zoova yoli maan klɔ sran wie mɔ fɔ o be nun’n, ninnge nga be kwla yo’n kacili. Afin ɔ fali mmla kun su, ɔ maan ɔ fali be yoli i klun ba. Akoto Pɔlu m’ɔ ti sran sɔ’m be nunfuɛ’n, ɔ klɛli i wiengu Klistfuɛ’m be fluwa kɛ: ‘Nyanmiɛn i wawɛ’n b’ɔ fa mannin amun’n, ɔ fa amun kaci kɛ Nyanmiɛn klun ba sa. I sɔ’n ti’n, e kwla kpan flɛ Nyanmiɛn kɛ: “Baba!” Nyanmiɛn wawɛ’n kle ye weiin kpa e anwlɛn’n nun kɛ e ti Nyanmiɛn i wa sakpa.’ (Rɔmfuɛ Mun 8:15, 16) Kɛ mɔ Ɲanmiɛn yoli mɔ Klistfuɛ wie’m be kacili i wa’n ti’n, be yoli i awlo’n nunfuɛ, annzɛ “i mma mun.”—1 Zan 3:1; 2 Korɛntfuɛ Mun 6:18.

Nán kɛ mɔ Ɲanmiɛn fali be yoli i wa’n ti yɛ be sran wafa’n kaci ɔ. Afin fɔ’n te o be nun. (1 Zan 1:8) Sanngɛ, kɛ nga Pɔlu fa yiyili nun’n sa’n, kɛ Ɲanmiɛn yoli maan be kacili i wa’n, ninnge nga be kwla yo be siɛn’n, ɔ timan kɛ laa’n sa kun. Kusu’n, Ɲanmiɛn i wawɛ m’ɔ o be awlɛn’n nun’n ti’n, be si kpa kɛ be nin Klist bé kó trán ɲanmiɛn su lɔ. (1 Zan 3:2) I sɔ liɛ’n mɔ Ɲanmiɛn i wawɛ’n ti’n be jran su kpa’n, maan wafa nga be fa wun ninnge mun’n, ɔ timan kɛ laa’n sa. (2 Korɛntfuɛ Mun 1:21, 22) Ɔ ti kɛ b’a bo like uflɛ bo sa. Yɛle kɛ ɔ ti kɛ blɛ li yɛ b’a wu be sa.

Kɛ Biblu’n kán be nga Ɲanmiɛn fali be yoli i mma’m be ndɛ’n, ɔ se kɛ: “Bé yó Nyanmiɛn nin Krist be nyrun jranfuɛ, be nin Krist yɛ bé dí famiɛn afuɛ akpi nin-ɔn.” (Sa Nglo Yilɛ 20:6) Be nga Ɲanmiɛn fali be yoli i wa’n be nin Klist bé yó Ɲanmiɛn i Sielɛ’n, annzɛ i awa’n i nun famiɛn ɲanmiɛn su lɔ. Akoto Piɛli seli i wiengu Klistfuɛ’m be kɛ bé wá ɲán like kpa kun mɔ Ɲanmiɛn “sieli i nyanmiɛn su lɔ’n. Like sɔ’n kwlá saci-man, ɔ yo-man fiɛn, yɛ ɔ mlin-man.” (1 Piɛr 1:3, 4) Nanwlɛ, like dan yɛle i sɔ’n!

Sanngɛ, be sielɛ sɔ’n ti maan e fa kosan wie e usa e wun. ?Sɛ be nga be wuli be uflɛ’n bé kó dí famiɛn ɲanmiɛn su lɔ’n, wan mun yɛ bé síe be ɔ? É wá tɛ́ kosan sɔ’n su ndɛ ng’ɔ́ bá lɛ’n nun.

[Foto, bue 10]

?Ngue ndɛ yɛ Pɔlu kɛnnin i be nga Ɲanmiɛn fali be kacili i wa’n be su ɔ?