Nán e fa e wun mantan Ɲanmiɛn sulɛ wafa ng’ɔ ti tɛ’n!
‘I sɔ’n ti’n, e Min Ɲanmiɛn seli kɛ: “An jao be nun, nán an fa amun wun mantan be. Nán an kan fiɛn.”’—2 KORƐNTFUƐ MUN 6:17.
1. ?Ngue yɛ sran kpanngban nga be waan bé sú Ɲanmiɛn’n be simɛn i ɔ?
BE NGA be waan bé sú Ɲanmiɛn sakpa’n, be nun sunman be siman Ɲanmiɛn i su ndɛ nanwlɛ’n, ɔ nin ninnge nga Ɲanmiɛn wá yó mán sran mun’n. Yɛ kɛ mɔ be ɲanman kosan nga be fa usa be wun’n be su tɛlɛ trele kun’n ti’n, be angunndan’n sanngan kpɔkun be wunman ajalɛ nga bé fá’n. Ndɛ nga be ti kɛ ngua sa’n, ɔ nin sa nga be ti e nannannannan’m be nzuɛn’n be su falɛ’n, ɔ nin cɛn wie’m be dilɛ’n mɔ be ti e Bofuɛ’n i finfin yolɛ’n, sran kpanngban be te nanti be su. I wie yɛle kɛ e mantanfuɛ nin e osufuɛ wie’m be lafi su kɛ blɔlɔ sin dan kun o lɛ, annzɛ Ɲanmiɛn ti atre nsan, annzɛ be wu be o lɔ. Yɛ be lafi ato ndɛ wie’m be su ekun.
2. ?Ngue yɛ Ɲanmiɛn sulɛ wafa ng’ɔ ti tɛ’n be kpɛnngbɛn’m be yo ɔ? ?Yɛ i sɔ’n i bo’n gua sɛ?
2 ?Sɛ sran’m be siman Ɲanmiɛn i su ndɛ nanwlɛ’n, ɔ fin wan? I sɔ’n fin Ɲanmiɛn sulɛ wafa mun. Sanngɛ i dan kpa’n, ɔ fin Ɲanmiɛn sulɛ wafa dandan mun. Afin be kpɛnngbɛn’m be kle Ɲanmiɛn i su ato like. (Mark 7:7, 8) I sɔ’n ti’n, sran kpanngban be bu i kɛ be su Ɲanmiɛn. Sanngɛ nn be yo Ɲanmiɛn i finfin, yɛ b’a mlin. Nanwlɛ, sran’m be mlinlɛ sɔ’n, ɔ fin Ɲanmiɛn sulɛ wafa ng’ɔ ti tɛ’n.
3. ?Wan yɛ ɔ kpɛli Ɲanmiɛn sulɛ wafa ng’ɔ ti tɛ’n i ba ɔ? ?Yɛ wafa sɛ yɛ Biblu’n kɛn i ndɛ ɔ?
3 Aolia nun sran kun jin Ɲanmiɛn sulɛ wafa ng’ɔ ti tɛ’n i sin. Kɛ akoto Pɔlu kɛ́n i ndɛ’n, ɔ seli kɛ: ‘Mɛn nga i min’n ɔ sacili be angunndan’n naan Klist m’ɔ fa Ɲanmiɛn’n i wafa ng’ɔ ti’n i kwlaa i jasin fɛ’n, b’a wunmɛn i wlɛ.’ (2 Korɛntfuɛ Mun 4:4) Sran sɔ m’ɔ ti “mɛn nga i min’n,” yɛle mmusu’m be si Satan. I yɛ ɔ kpɛli Ɲanmiɛn sulɛ wafa ng’ɔ ti tɛ’n i ba ɔ. Pɔlu waan: ‘Satan bɔbɔ kaci i wun kɛ anzi m’ɔ kpaja’n sa. Ɔ maan sɛ i junman difuɛ mun be yo be wun kɛ be nga be junman yɛle nanwlɛ’n i klelɛ’n be liɛ’n sa’n, nn b’a fɛmɛn i ase.’ (2 Korɛntfuɛ Mun 11:14, 15) Satan yo maan like ng’ɔ ti tɛ’n, sran’m be bu i like kpa. Kpɔkun, ɔ laka sran mun maan be fa ato ndɛ’m be su.
4. ?Be nga be waan be ti Ɲanmiɛn nuan ijɔfuɛ’n be wun mmla onin yɛ Ɲanmiɛn kpɛ mannin laa Izraɛli ɔ?
4 Biblu’n bu Ɲanmiɛn sulɛ wafa ng’ɔ ti tɛ’n i fɔ kekle kpa! Moizi Mmla’n nun bɔbɔ’n, Ɲanmiɛn wlali i nvle nunfuɛ’m be su nun kpa kɛ be nian be wun su be nga be waan be ti i nuan ijɔfuɛ’n, be lika. Sran kwlaa ng’ɔ su i wiengu’m be bo kɛ be fa ato ndɛ’m be su naan be sɔ amuɛn’n, ‘maan be kun i. Afin sran sɔ’n waan be jaso Ɲanmiɛn wun.’ Ɲanmiɛn seli Izraɛlifuɛ’m be kɛ be ‘tu sa tɛ’n be afiɛn.’ (Mmla’n 13:2-6) Nanwlɛ, Zoova bu i sulɛ wafa ng’ɔ ti tɛ’n i like tɛ dan.—Ezekiɛl 13:3.
5. ?Afɔtuɛ onin mun yɛ ɔ fata kɛ e fa be su andɛ ɔ?
5 Wafa nga Zoova bu i sulɛ wafa ng’ɔ ti tɛ’n, Zezi Klist nin i akoto’m be buli i sɔ wie. Zezi seli i sɔnnzɔnfuɛ’m be kɛ: ‘An sasa amun wun be nga be tɔn be wun suɛn kɛ be ti Ɲanmiɛn nuan ijɔfuɛ’n be lika. Be fa bua kplo wla be wun, be ba amun wun, sanngɛ be ti gboklo be saci nnɛn mun.’ (Matie 7:15; Mark 13:22, 23) Pɔlu seli kɛ ‘sran’m be ɲin m’ɔ yiman Ɲanmiɛn’n nin sa tɛtɛ’n kwlaa mɔ be yo’n ti, Ɲanmiɛn kle be kɛ i ya’n wá jáso. Be sa tɛtɛ yolɛ sɔ’n ti, ɔ maan sran’m be wunman Ɲanmiɛn ndɛ’n i nanwlɛ.’ (Rɔmfuɛ Mun 1:18) Ɔ ti cinnjin kɛ Klistfuɛ kpa’m be nanti afɔtuɛ sɔ’m be su, naan be kpalo sran kwlaa ng’ɔ fa ato ndɛ tru’n mɔ i ti be wunman Ɲanmiɛn ndɛ’n i nanwlɛ’n!—1 Zan 4:1.
An fin “Babilɔni klɔ dan’n” nun fite
6. ?Wafa sɛ yɛ Biblu’n kan “Babilɔni klɔ dan’n” i ndɛ ɔ?
6 Amun nian wafa nga Sa Nglo Yilɛ fluwa’n kan Ɲanmiɛn sulɛ wafa ng’ɔ ti tɛ’n i ndɛ’n. I waan Ɲanmiɛn sulɛ wafa sɔ’n ti kɛ tekle bla sa, naan ɔ sie asiɛ’n su famiɛn sunman nin sran kpanngban. Bla sɔ’n m’ɔ ti nzɔliɛ like’n, ɔ nin asiɛ’n su famiɛn’m be la. Kpɔkun Ɲanmiɛn i sufuɛ kpa m’ɔ kun be’n be mmoja’n w’a bo i kɛ nzan sa. (Sa Nglo Yilɛ 17:1, 2, 6, 18) I nzuɛn tɛ nin sa tɛtɛ ng’ɔ yo be’n, i su dunman klɛ i wunmuan’n su. Dunman sɔ’n yɛ: “Babilɔni klɔ dan’n, tekle bla’m be nin asiɛ’n su tete sa yofuɛ’m be nin’n.”—Sa Nglo Yilɛ 17:5.
7, 8. ?Wafa sɛ yɛ Ɲanmiɛn sulɛ wafa ng’ɔ ti tɛ’n bo tekle ɔ? ?Yɛ i bo’n gua sɛ?
7 Mɛn’n nun Ɲanmiɛn sulɛ wafa kwlaa nga be ti tɛ’n, yɛ Biblu’n kan be bo nun flɛ i Babilɔni klɔ dan’n niɔn. Afin kannzɛ be ti fanunfanun’n, sanngɛ be angunndan’n ɔ nin be ninnge’m be yolɛ’n, ti kun. Kɛ nga Sa Nglo Yilɛ fa kan’n sa’n, Ɲanmiɛn sulɛ wafa ng’ɔ ti tɛ’n sie famiɛn mun. Kpɔkun kɛ bla kun m’ɔ kunndɛ bian i wun bo’n sa’n, ɔ bo tekle. Afin, ɔ nin asiɛ’n su famiɛn fanunfanun be tra aenguɛ. Zaki m’ɔ ti Zezi i sɔnnzɔnfuɛ’n seli kɛ: ‘An ti kɛ bla m’ɔ kunndɛ bian i wun bo sa. ?An siman kɛ sran ng’ɔ klo mɛn’n i dilɛ’n, nn ɔ kpɔ Ɲanmiɛn? Ɔ maan sran nga i waan ɔ́ fá mɛn’n tɛ́kɛ i ti su’n, ɔ kaci Ɲanmiɛn i kpɔfuɛ.’—Zak 4:4.
8 Ɲanmiɛn sulɛ wafa ng’ɔ ti tɛ’n ɔ nin famiɛn’m be aenguɛ tralɛ’n ti’n, sran’m be wun ɲrɛnnɛn. Onena Mangu m’ɔ kan sran ble mɛn’n nun politiki yolɛ’n i su ndɛ’n, ɔ seli kɛ: “Mɛn’n nun sa’m be kle kɛ sran nga be kun be kpanngbanngban’n, ɔ fin Ɲanmiɛn sulɛ wafa mɔ be fa be wun wla politiki nun’n.” Koko nga nun fluwa kun seli kɛ: “Sran kpanngban nga be kun be’n, ɔ nin andɛ utre dandan’m be fin Ɲanmiɛn sulɛ wafa mun.” Kɛ mɔ Ɲanmiɛn sulɛ wafa ng’ɔ ti tɛ’n i sa o ndɛ ng’ɔ tɔ’m be nun ti’n, ɔ kun sran akpinngbin. I tɛ bɔbɔ’n, Babilɔni klɔ dan’n kleli Ɲanmiɛn i sufuɛ’n kpa be yalɛ kpɔkun ɔ kunnin be. Ɔ maan sɛ é kwlá sé’n, be mmoja’n m’ɔ nɔn’n w’a bo i kɛ nzan sa.—Sa Nglo Yilɛ 18:24.
9. ?Wafa sɛ yɛ Ɲanmiɛn sulɛ wafa ng’ɔ ti tɛ’n i ndɛ nga Sa Nglo Yilɛ fluwa’n kan’n, ɔ kle kɛ Zoova kpɔ i ɔ?
9 Sa ng’ɔ́ wá tɔ́ Babilɔni klɔ dan’n su’n, ɔ kle kɛ Zoova kpɔ i tɛ kpa. Sa Nglo Yilɛ 17:16 waan: “Wuɛ blu mɔ a wunnin be’n, nin nnɛn’n bé kpɔ́ tekle bla’n, bé dé i wun ninnge’n, bé kpɛ́ i wun, bé dí i nnɛn, yɛ bé yrɛ́ i sin nun mlɔnmlɔn.” I klikli nun’n, nnɛn’n yí bla’n i ase ɔ́ kún i, kpɔkun ɔ́ dí i nnɛn’n. Kpɔkun i nnɛn’n ng’ɔ ka lɛ’n, bé yrɛ́ i sin nun mlɔnmlɔn. Ɔ ka kaan sa’n, mɛn’n nun famiɛn’m bé sáci Ɲanmiɛn sulɛ wafa ng’ɔ ti tɛ’n. Ɲanmiɛn yɛ ɔ́ fɛ́ i sɔ angunndan wlá be ti nun ɔn. (Sa Nglo Yilɛ 17:17) Babilɔni klɔ dan’n mɔ yɛle mɛn wunmuan’n nun Ɲanmiɛn sulɛ wafa ng’ɔ ti tɛ’n i nzɔliɛ’n, ɔ ka kaan sa bé núnnún i. ‘Be su wunmɛn i kun.’—Sa Nglo Yilɛ 18:21.
10. ?Ajalɛ onin yɛ ɔ fata kɛ é fɛ́ i Ɲanmiɛn sulɛ wafa ng’ɔ ti tɛ’n i lika ɔ?
10 ?Ajalɛ onin yɛ ɔ fata kɛ Ɲanmiɛn i sufuɛ kpa’m be fɛ i Babilɔni klɔ dan’n i lika ɔ? Biblu’n kle i wun ajalɛ’n weiin. I waan: ‘N sran mun, an fin klɔ’n nun fite naan amun a yoman sa tɛ ng’ɔ yo’n wie, an fite naan ɲrɛnnɛn ng’ɔ́ wá tɔ́ i su’n w’a tɔman amun su wie.’ (Sa Nglo Yilɛ 18:4) Be nga be kunndɛ kɛ bé ɲán nguan’n, ɔ fata kɛ be fite ndɛndɛ naan sa w’a fuman be nun. I nun mɔ Zezi o asiɛ’n su wa’n, ɔ seli kɛ blɛ kasiɛn nun’n, sran sunman bé wá sé kɛ be ti i sɔnnzɔnfuɛ. (Matie 24:3-5) Sanngɛ ɔ́ sé be kɛ: ‘Amun mɔ amun saci mmla’n, an fa jao min wun lɛ. N siman amun mlɔnmlɔn.’ (Matie 7:23) Zezi Klist mɔ Ɲanmiɛn sieli i Famiɛn’n, ɔ kpalo Ɲanmiɛn sulɛ wafa ng’ɔ ti tɛ’n.
?Wafa sɛ yɛ e kwla fite ɔ?
11. ?Wafa sɛ yɛ e kwla kpalo Ɲanmiɛn sulɛ wafa ng’ɔ ti tɛ’n niɔn?
11 Klistfuɛ kpa’m be kpalo ninnge nga Ɲanmiɛn sulɛ wafa ng’ɔ ti tɛ’n kle’n. Yɛle kɛ, e tieman be ninnge nga be yo be aladio nun’n, yɛ e nianman nga be fite televiziɔn nun’n. E kannganman be fluwa’m be nun. Afin, be kan Ɲanmiɛn nin i Ndɛ’n be su ato ndɛ. (Jue Mun 119:37) Asa ekun’n, aɲia nin be ɲin su yiyilɛ nga Ɲanmiɛn sulɛ wafa ng’ɔ ti tɛ’n i sa o be nun’n, e tranman be bo. Nanwlɛ, ɔ fataman kɛ e fa e wun wla like kwlaa mɔ Ɲanmiɛn sulɛ wafa ng’ɔ ti tɛ’n i sa o nun’n, be nun kaan sa. (1 Korɛntfuɛ Mun 10:21) Sɛ e yo sɔ’n, é sásá e wun naan ‘sran fi w’a fɛmɛn i sa ng’ɔ si i’n nin sa ngbɛn wie w’a fa lakaman e naan w’a ɲan e. Sa sɔ’m be fin lalafuɛ’m be nzuɛn’n, nin ninnge nga e nannan’m be kle’n, be finman Klist.’—Kolɔsfuɛ Mun 2:8.
12. ?Wafa sɛ yɛ sran kun kwla kle kɛ ɔ nunman Ɲanmiɛn sulɛ wafa ng’ɔ ti tɛ’n nun kun ɔn?
12 ?Sɛ sran kun kunndɛ kɛ ɔ́ yó Zoova i Lalofuɛ’n naan i dunman klɛ Ɲanmiɛn sulɛ wafa ng’ɔ ti tɛ’n be nun kun nun’n, ngue yɛ ɔ fata kɛ ɔ yo ɔ? I lɛ nun’n, maan ɔ klɛ fluwa ko man be kɛ ɔ timan be nunfuɛ kun. Ɔ ti cinnjin kɛ sran’n, ɔ fa ajalɛ trele kun kɛ ɔ yoman Ɲanmiɛn sulɛ ng’ɔ ti tɛ’n i ninnge wie fi kun. Ɔ fata kɛ ajalɛ mɔ sran sɔ’n fa’n, ɔ kle weiin kɛ ɔ nunman Ɲanmiɛn sulɛ ng’ɔ ti tɛ’n nun kun.
13. ?Afɔtuɛ onin yɛ Biblu’n man e Ɲanmiɛn sulɛ wafa ng’ɔ ti tɛ’n i lika ɔ?
13 Akoto Pɔlu seli kɛ: ‘Nán amun nin be nga be lafiman Klist su’n, mɔ amun nzuɛn’n sɛman’n, an san nun. ?Nzu anuannzɛ yɛ sran kpa nin sran tɛ’n be di ɔ? ?Wia’n nin aosin’n be kwla tran likawlɛ? ?Klist nin mmusu’m be si Satan’n be nuan sɛ? ?Sran ng’ɔ lafi Klist su’n nin sran ng’ɔ lafimɛn i su’n be angunndan’n ti kun? ?Be kwla fa sua kun yo Ɲanmiɛn nin amuɛn’m be sua? I sɔ’n ti’n, e Min Ɲanmiɛn seli kɛ: “An jao be nun, nán an fa amun wun mantan be. Nán an kan fiɛn.”’ (2 Korɛntfuɛ Mun 6:14-17) Kɛ e kpalo Ɲanmiɛn sulɛ wafa ng’ɔ ti tɛ’n, yɛ e nanti afɔtuɛ sɔ’n su ɔ. ?Sanngɛ Pɔlu i ndɛ sɔ’n kle kɛ nán e nin be nga be Ɲanmiɛn sulɛ’n ti tɛ’n, e di?
“An fa ngwlɛlɛ yo” sa mun
14. ?Be nga be Ɲanmiɛn sulɛ’n ti tɛ’n, ɔ fata kɛ e kpalo be mlɔnmlɔn? Amun yiyi nun.
14 ?Be nga be o Ɲanmiɛn sulɛ wafa ng’ɔ ti tɛ’n i nun’n, ɔ fataman kɛ e nin be e di mlɔnmlɔn? Cɛcɛ. Mmla dan’n i nɲɔn su’n waan: “Klo ɔ wiengu kɛ a fa klo ɔ bɔbɔ wun’n sa.” (Matie 22:39) Kɛ e klo e wiengu mun’n ti’n, e bo Sielɛ Blɛ jasin fɛ’n e kle be. Kpɔkun e kle be Biblu’n nun like’n naan be fin Ɲanmiɛn sulɛ wafa ng’ɔ ti tɛ’n nun be fite.
15. ?Kɛ Biblu’n se kɛ e nunman “mɛn nunfuɛ’m be nun’n,” i bo’n yɛle onin?
15 Kannzɛ e bo jasin fɛ’n e kle e wiengu mun’n, sanngɛ e nunman “mɛn nunfuɛ’m be nun.” (Zan 15:19) “Mɛn” nga Biblu’n kɛn i ndɛ’n, yɛle be nga be faman be wun mantanman Ɲanmiɛn’n. (Efɛzfuɛ Mun 4:17-19; 1 Zan 5:19) I sɔfuɛ’m be ayeliɛ’n, ɔ nin be ijɔlɛ’n, ɔ nin be nzuɛn’n, m’ɔ wɔ Zoova i safle’n, e kpalo be. (1 Zan 2:15-17) Asa ekun’n, Ɲanmiɛn i mmla ng’ɔ se kɛ ‘sɛ sran kpa nin sran tɛ be san nun’n, i nzuɛn tɛ’n sɛ i’n,’ e nanti su. Ɔ maan be nga be nantiman Ɲanmiɛn mmla’m be su’n, e nin be e sanman nun. (1 Korɛntfuɛ Mun 15:33) Sɛ e waan e yoman mɛn nunfuɛ’n, ɔ fata kɛ e nian e wun su “mɛn nun sa tɛtɛ yolɛ’m be nun.” (Zak 1:27) Ɔ maan kɛ Biblu’n se kɛ e nunman mɛn nunfuɛ’m be nun’n, w’a seman kɛ nán e nin sran mun e di mlɔnmlɔn.—Zan 17:15, 16; 1 Korɛntfuɛ Mun 5:9, 10.
16, 17. ?Wafa sɛ yɛ ɔ fata kɛ Klistfuɛ’m be nin be nga be siman Biblu’n nun ndɛ’n, be tran ɔn?
16 ?Wafa sɛ yɛ ɔ fata kɛ Klistfuɛ’m be nin be nga be siman Biblu’n nun ndɛ’n, be tran ɔn? Pɔlu seli Kolɔsfuɛ mun kɛ: ‘Like nga an yo man be mɔ be timan Klistfuɛ’n, an fa ngwlɛlɛ yo. Kɛ amun a ɲan amun ti’n, nán an tran lɛ ngbɛn, an yo like ng’ɔ yo sa ye’n. Maan amun ijɔlɛ wafa’n yo sran’m be fɛ, maan amun nuan nun ndɛ’n yo fɛ kɛ njin sa naan amun a tɛ sran ng’ɔ usa amun sa’n, i su klanman.’ (Kolɔsfuɛ Mun 4:5, 6) Piɛli seli kɛ: ‘Sanngɛ an bu Klist sran, yɛ an bu i amun Min. An bu sa ti yɛ amun wla o Klist su’n i angunndan sie naan sɛ be usa amun i su sa’n amun a kwla tɛ su.’ (1 Piɛr 3:15, 16) Pɔlu seli Klistfuɛ mun ekun kɛ ‘nán maan be kan sran wun ndɛ, nán maan be klo utre, maan be yaci sa cɛ, maan sran’n kwlaa be wun kɛ be ti wɛtɛfuɛ.’—Tit 3:2.
17 E mɔ e ti Zoova i Lalofuɛ’n, e ɲin yi e wiengu mun. E yoman be kpokokpoko. E faman nzowa kpɛlɛ dunman e flɛman be nga be Ɲanmiɛn sulɛ’n nin e liɛ’n timan kun’n. Kannzɛ e awlofuɛ mun, annzɛ e mantanfuɛ mun, annzɛ e wiengu junman difuɛ’m be yo e finfin’n, e liɛ e yo wɛtɛɛfuɛ.—Kolɔsfuɛ Mun 4:6; 2 Timote 2:24.
“Fa ndɛ nanwlɛ nga n kan kleli wɔ’n su, nian su yo”
18. ?Wafa sɛ yɛ be nga be sa be sin Ɲanmiɛn sulɛ wafa ng’ɔ ti tɛ’n nun ekun’n be liɛ’n, ɔ ti tɛ tra klikli’n niɔn?
18 Kɛ sran kun ko si ndɛ nanwlɛ’n mɔ i sin’n, ɔ sɛ i sin Ɲanmiɛn sulɛ wafa ng’ɔ ti tɛ’n nun ekun’n, i sɔ’n ti tɛ dan! Wafa nga i sɔfuɛ’n i liɛ’n yo tɛ tra klikli’n, Biblu’n kɛn i ndɛ. I waan: ‘Afin sran nga be si e Min Zezi Klist e Defuɛ’n, mɔ maan be yaci sa nga be yo ɔ be saci’n, sɛ be sa be sin ko fa sa sɔ’n kaci be junman ekun’n, be sacilɛ kasiɛn liɛ’n, ɔ yo tɛ tra klikli liɛ’n. Sa nga be yoli’n, ɔ maan ɲanndra nga be bu se kɛ: “Alua’n w’a sɛ i sin a ko di like ng’ɔ kpuli’n,” ɔ nin “Kɔkɔti’n mɔ be wunnzinnin i’n w’a sɛ i sin a ko bo i nnɔtiɛ’n ekun’n,” ɔ ti nanwlɛ.’—2 Piɛr 2:20-22.
19. ?Ngue ti yɛ ɔ ti cinnjin kɛ e nian e wun su titi naan like fi w’a saciman e nin Ɲanmiɛn e afiɛn ɔn?
19 Maan e nian e wun su titi naan like fi w’a saciman e nin Ɲanmiɛn e afiɛn. Afin sɛ é kwlá sé’n, sɛ e kunnin wuo’n, e nin a kpɛmɛn i ti’n! Akoto Pɔlu kpɛn e wla kɛ: ‘Ɲanmiɛn wawɛ’n kɛn i weiin kɛ, cɛn wie lele kɛ mɛn’n kɔ́ i bue nuan’n, sran wie’m be su lafiman Ɲanmiɛn su kun, bé fá like nga mmusu mɔ be laka sran’n be kle’n su.’ (1 Timote 4:1) Andɛ e o ‘mɛn’n i bue nuan’ blɛ’n nun. Ɔ maan be nga be o Ɲanmiɛn sulɛ wafa ng’ɔ ti tɛ’n nun’n, be ti kɛ ‘ba kaan kun m’ɔ fa ato ndɛ kwlaa nga sran’m be gblɛ’n ti be kɛn i kɛ bé fá lákaláka sran mun’n su, mɔ maan be kɔ wa kɔ wa kɛ mmeli mɔ aunmuan’n fɛ i kɔ wa kɔ wa’n sa.’—Efɛzfuɛ Mun 4:13, 14.
20. ?Wafa sɛ yɛ e kwla sasa e wun Ɲanmiɛn sulɛ tɛ’n i lika ɔ?
20 ?Wafa sɛ yɛ e kwla sasa e wun Ɲanmiɛn sulɛ wafa ng’ɔ ti tɛ’n i lika ɔ? Maan e ɲin tran ninnge kwlaa nga Zoova mannin e’n, be su. I kun yɛle Biblu’n m’ɔ ti i nuan ndɛ’n. (2 Timote 3:16, 17) Asa ekun’n, Zoova sin “sran kpa nanwlɛfuɛ m’ɔ si ngwlɛlɛ’n” i lika, ɔ man e ninnge kpanngban mɔ maan e kwla su i kpa’n. (Matie 24:45) ?Nán kɛ é sí ndɛ nanwlɛ’n kɔ́ i ɲrun’n, yɛ ɔ fata kɛ e konvi sɔ ‘be nga b’a yo sran’n be aliɛ’n,’ naan e tran asɔnun aɲia mɔ Ɲanmiɛn fa kle e like’n, be bo titi ɔ? (Ebre Mun 5:13, 14; Jue Mun 26:8) Maan e ta nda kɛ ninnge kwlaa nga Zoova man e’n, é sɔ́ be nun klanman naan é ‘fá ndɛ nanwlɛ nga be kan kleli e’n su, é nían su yó.’ (2 Timote 1:13) I liɛ’n, e su faman e wun mantanman Ɲanmiɛn sulɛ wafa ng’ɔ ti tɛ’n.
?Ngue yɛ amun suannin ɔn?
• ?Ngue yɛ be flɛ i “Babilɔni klɔ dan’n” niɔn?
• ?Ngue yɛ ɔ fata kɛ e yo naan y’a faman e wun y’a mantan Ɲanmiɛn sulɛ wafa ng’ɔ ti tɛ’n niɔn?
• ?E nin Ɲanmiɛn e afiɛn sacilɛ like onin yɛ ɔ fata kɛ e kpalo i ɔ?
[Foto, bue 14]
?Amun si sa nga ti yɛ Biblu’n waan “Babilɔni klɔ dan’n” ti kɛ tekle bla wie sa’n?
[Foto, bue 15]
Ɔ ka kaan sa bé núnnún “Babilɔni klɔ dan’n” mlɔnmlɔn.
[Foto, bue 17]
Be nga be lafiman e Ɲanmiɛn’n su wie’n, e “tɛ be su amanniɛn su.”