Fluwa’n nun kannganfuɛ’m be kosan mun

Zezi seli Nikodɛmu kɛ: ‘Sran fi nin a ɔman ɲanmiɛn su lɔ le saan n mɔ n kacili Sran’n mɔ n fin lɔ bali’n.’ ?Ndɛ sɔ’n i bo’n yɛle mennin?—Zan 3:13.

Blɛ sɔ nun’n, nn Zezi te o asiɛ’n su wa, ɔ nin a sɛmɛn i sin ɲanmiɛn su lɔ. Sanngɛ Zezi i su ndɛ nga e si i’n nin blɛ ng’ɔ kannin ndɛ sɔ’n nun’n, ɔ nin like nga ti yɛ ɔ kannin ndɛ sɔ’n, be kwla uka e ndɛ sɔ’n i wlɛ wunlɛ nun.

Zezi ‘fin ɲanmiɛn su lɔ bali.’ Yɛle kɛ kwlaa naan w’a ba asiɛ’n su wa’n, ɔ nin i Si yɛ be o ɲanmiɛn su lɔ ɔ. Sanngɛ kɛ i blɛ’n juli’n, Ɲanmiɛn yoli maan Mali wuli i Wa Zezi asiɛ’n su wa kɛ klɔ sran sa. (Lik 1:30-35; Galasifuɛ Mun 4:4; Ebre Mun 2:9, 14, 17) Kɛ Zezi wá wú’n, Zoova wá cɛ́n i, kpɔkun ɔ́ sɛ́ i sin Zoova wun lɔ ekun ɲanmiɛn su lɔ. I sɔ ti yɛ kwlaa naan b’a kun i’n, Zezi kwla srɛli Ɲanmiɛn kɛ: ‘Min Si, ɲrun nga kɛ n o ɔ wun lɔ’n n le i’n naan w’a yi mɛn’n, maan n ɲan ɲrun kunngba sɔ’n ɔ wun lɔ ekun.’—Zan 17:5; Rɔmfuɛ Mun 6:4, 9; Ebre Mun 9:24; 1 Piɛr 3:18.

Kɛ Zezi kán ndɛ sɔ’n klé Nikodɛmu m’ɔ ti Farizifuɛ nin Izraɛli lɔ like klefuɛ kun’n, nn ɔ nin a sɛmɛn i sin ɲanmiɛn su lɔ. Blɛ sɔ nun kusu’n, sran fi nin a wuman nin a ɔman ɲanmiɛn su lɔ. Zezi bɔbɔ seli kɛ, Ɲanmiɛn nuan ijɔfuɛ’m be nun’n, sran wie fi nunman lɛ m’ɔ le ɲrun tra Zan batɛmu yofuɛ’n niɔn. Sanngɛ ɔ kan guali su kɛ ‘be nga Ɲanmiɛn sie be’n be nun kaanfuɛ’n i dan trɛ i.’ (Matie 11:11) Akoto Piɛli kusu seli kɛ Famiɛn Davidi m’ɔ lafili Ɲanmiɛn su bɔbɔ’n, kɛ ɔ fin blɛ m’ɔ wuli’n, ɔ te o ndia’n nun. Davidi w’a ɔman ɲanmiɛn su. (Sa Nga Be Yoli’n 2:29, 34) Ɔ le like nga ti yɛ Davidi nin Zan batɛmu yofuɛ’n, ɔ nin sran uflɛ wie mun ekun mɔ be lafili Ɲanmiɛn su’n, mɔ be dun mmua wuli naan Zezi w’a wu’n, b’a ɔman ɲanmiɛn su’n. Yɛle kɛ sran sɔ’m be dun mmua wuli kwlaa naan Zezi w’a wu. Kusu sran ng’ɔ fata kɛ ɔ tike ɲanmiɛn su lɔ kɔlɛ’n i wun atin’n, yɛle Zezi. Kɛ akoto Pɔlu kán ɲanmiɛn su lɔ kɔlɛ ndɛ’n, i waan Zezi ti kɛ sran m’ɔ dun mmua’n sa, ‘ɔ kpɛli atin mannin e koko nun wa, ɔ tanninman mlɔnmlɔn.’—Ebre Mun 6:19, 20; 9:24; 10:19, 20.

Zezi nin a wuman naan se kɛ bé cɛ́n i. ?Yɛ ngue ti yɛ ɔ seli Nikodɛmu kɛ: ‘Sran fi nin a ɔman ɲanmiɛn su lɔ le saan n mɔ n kacili Sran’n mɔ n fin lɔ bali’n’ niɔn? (Zan 3:13) Maan e nian like nga ti yɛ Zezi kannin sɔ’n.

Kɛ Zuifu bian sɔ m’ɔ ti mmla klefuɛ’n ɔli Zezi wun lɔ kɔnguɛ’n, Zezi seli i kɛ: ‘Nanwlɛ, sran nga b’a wumɛn i ekun’n, ɔ su kwlá yoman mɛn nga Ɲanmiɛn sie’n i nunfuɛ mlɔnmlɔn.’ (Zan 3:3) Nikodɛmu usɛli i kɛ: ‘?Wafa sɛ yɛ i sɔ liɛ’n kwla yo ye ɔ? ?Sran kun yó sɛ yɛ bé kwlá wú i ekun ɔn?’ W’a wunman Ɲanmiɛn i Sielɛ Blɛ nun tranlɛ’n i su ndɛ sɔ’n i wlɛ. ?Ɔ le wafa kun m’ɔ kwla si ndɛ sɔ’n i su like ɔ? Ɔ si’ɛ! Sran wie fi kwlá yiyiman ndɛ sɔ’n nun klemɛn i. Afin kɛ ɔ́ yó sɔ’n, nn sran fi nin a ɔman ɲanmiɛn su lɔ le. Ɔ maan sran fi kwlá yiyiman Ɲanmiɛn i Sielɛ Blɛ’n nun lɔ tranlɛ’n ndɛ’n nun. Sran kunngba lekeleke ng’ɔ kwla yo i sɔ’n, yɛle Zezi. Kɛ m’ɔ fin ɲanmiɛn su lɔ yɛ ɔ bali’n, mɔ i yɛ ɔ kwla yiyi ndɛ sɔ’n nun kle sran mun’n ti’n, ɔ kwla kle Nikodɛmu nin sran uflɛ wie mun ekun be like.

Biblu’n nun ndɛ mma sɔ’n i su kosan sɔ’n kle e like cinnjin kun Ɲanmiɛn Ndɛ’n i suanlɛ’n nun. Yɛle kɛ sɛ e wunman Biblu’n nun ndɛ kun wlɛ’n, ɔ nin i fataman kɛ i sɔ’n ti’n, e angunndan’n sanngan. Ndɛ nga be kɛn i Biblu’n i bue kun nun’n, Biblu’n i bue uflɛ’m be nun ndɛ’m be kwla uka e naan y’a wun i wlɛ, yɛ ndɛ sɔ’m be su sansanman be wun. I kpa’n bɔbɔ’n, blɛ sunman nun’n, blɛ nga be kannin ndɛ’n nun’n, ɔ nin like nga ti yɛ be kannin ndɛ’n, ɔ kwla uka e naan ndɛ nga i wlɛ wunlɛ ti kekle’n, y’a wun i wlɛ weiin.