Like nga ti yɛ Zezi wunnin i wun fɛ’n

?ZEZI wunnin i wun fɛ sakpa? I nun m’ɔ o asiɛ’n su wa’n, i si nin i nin’n b’a yoman aɲanbeunfuɛ. I bɔbɔ kusu’n, w’a yoman aɲanbeunfuɛ. Ɔ seli kɛ: “N lɛ-man lika bɔ n la nun de wunmiɛn bɔ kaan-an.” (Lik 9:57, 58) Asa ekun’n, sran’m be kpɔli i, be tɔnnin i suɛn. I agualiɛ su’n, be kunnin i.

Kɛ amun niɛn i sa’n, amun kwla se kɛ ‘nán sran mɔ be se kɛ ɔ wunnin i wun fɛ’n i wie yɛle Zezi liɛ’n!’ Sanngɛ Zezi yoli ninnge kpanngban m’ɔ fata kɛ e bu be akunndan ɔn. Maan e kan ninnge sɔ’m be nun nnan be ndɛ.

1. ZEZI SILI KƐ ƝANMIƐN I KLUN SA YOLƐ’N TI YƐ Ɔ BALI ASIƐ’N SU Ɔ.

“Min aliɛ’n yɛlɛ sran ng’ɔ sunmannin min’n i klun sa’n yolɛ.”—Zan 4:34.

Zezi i ijɔlɛ nin i aeliɛ’n be kleli kɛ, ɔ kunndɛli kɛ ɔ́ yó i Si Ɲanmiɛn Zoovaa i klun sa. Ɲanmiɛn klun sa yolɛ’n yoli i fɛ kpa. I sɔ’n ti’n, ɔ fa sunnzunnin aliɛ dilɛ. Sa nga ti yɛ ɔ kannin sɔ’n, é wá kɛ́n i ndɛ.

Kɛ Zezi kán ndɛ sɔ’n, nn wia’n w’a jran. (Zan 4:6) Kɛ ɔ fɛ i nglɛmun lele m’ɔ́ fá jú dɔ sɔ’n su’n, ɔ nanti sinnin Samari klɔ’n nun. Klɔ sɔ’n kusu ti kpɔlɛkpɔlɛ. Ɔ maan ɔ fɛli yɛ awe kunnin i. I sɔnnzɔnfuɛ’m be seli i kɛ: “Baba, di like’n.” (Zan 4:31) I ndɛ liɛ ng’ɔ́ kán’n, ɔ kleli kɛ Ɲanmiɛn i kun sa yolɛ’n mɛnnin i wunmiɛn kpa. Naan ɔ ti kɛ aliɛ yɛ w’a di sa. Ɔ maan sɛ e se kɛ Zezi w’a wunmɛn i wun fɛ’n, ɔ ti ato.

2. ZEZI KLOLI I SI KPA.

“N klo e Si’n.”​—Zan 14:31.

Zezi nin i Si be trannin klanman kpa ɲanmiɛn su lɔ naan w’a ba asiɛ’n su wa. Kɛ m’ɔ klo i Si Ɲanmiɛn kpa ti’n, ɔ yoli maan sran’m be sili i. Yɛle kɛ ɔ boli i Si i dunman’n kleli sran mun. Ɔ kannin i Si i nzuɛn’n, ɔ nin like nga i Si waan ɔ́ yó’n, be ndɛ. I ijɔlɛ nun o, i ninnge’m be yolɛ nun o, ɔ fɛli i Si kpa. Ɔ maan kɛ Filipu seli i kɛ: “Nannan, [...] kle ye e Si’n,” ɔ seli Filipu kɛ: “Sran ng’ɔ wun min’n, wuun w’a wun e Si’n.”​—Zan 14:8, 9.

Zezi kloli i Si kpa. I sɔ’n ti’n, ɔ fɛli i Si’n i mmla’m be su lele be kunnin i. (Filipfuɛ Mun 2:7, 8; 1 Zan 5:3) Kɛ mɔ Zezi kloli i Si dan ti’n, ɔ wunnin i wun fɛ.

3. ZEZI KLOLI SRAN.

“Sran klolɛ ng’ɔ ti dan trɛ i ngba’n yɛlɛ sran bɔ i janvuɛ ti ɔ fɛ i wun man’n.”​—Zan 15:13.

Kɛ mɔ fɔ’n o e nun’n ti’n, e wun e ɲrun. Ɲanmiɛn Ndɛ’n waan: “Sran kun [mɔ yɛle Adam] ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” (Rɔmfuɛ Mun 5:12) E ngunmin e kwlá fiteman wie’n i sa nun. Afin sa tɛ’n i akatua’n yɛle wie’n.​—Rɔmfuɛ Mun 6:23.

Sanngɛ Zoova m’ɔ ti sran klofuɛ’n, ɔ yoli sa kun naan e fite nun. I sɔ’n ti’n, é lɛ́ i ase lele! Yɛle kɛ ɔ kplinnin su kɛ i Wa Zezi mɔ fɔ nunmɛn i nun’n, yɛ w’a yoman sa tɛ’n, ɔ w’a wun ɲrɛnnɛn naan ɔ wu, naan e ɲan e ti sa tɛ nin wie’n be sa nun. Klolɛ dan mɔ Zezi kloli i Si’n nin sran mun ti’n, ɔ fɛli i nguan’n kpɔli sran’m be ti. (Rɔmfuɛ Mun 5:6-8) Kɛ mɔ Zezi kloli sran mun ti’n, ɔ wunnin i wun fɛ.b

4. ZEZI SILI KƐ I SI KLO I NAAN Ɔ FƐ I WLA GUƐ I SU.

“Min anwlɛn su ba’n yɛ, i su yɛ m’an fa n wla kwlaa m’an gua-a.”​—Matie 3:17.

Blɛ mɔ bé yó Zezi i batɛmu’n, yɛ Zoova kannin ndɛ sɔ’n niɔn. Ndɛ sɔ’n kleli wein kɛ Zoova klo i Wa Zezi naan ɔ fɛ i wla kwlaa guɛ i su. I ti’n, Zezi seli kɛ: “N Si klo min”! (Zan 10:17) Kɛ mɔ Zezi si kɛ i Si klo i naan ɔ fɛ i wla kwlaa guɛ i su’n ti’n, ɔ ɲannin awlɛn jrannin yalɛ nin ndɛ tɛtɛ kwlaa nga be kan kleli i’n, be ɲrun kekle. Wie’n i ɲrun bɔbɔ’n, w’a usuman. (Zan 10:18) Kɛ mɔ Zezi si kɛ i Si klo i naan ɔ fɛ i wla guɛ i su’n ti’n, ɔ wunnin i wun fɛ.

I kwlaa nga e wunnin i lɛ’n kle kɛ Zezi wunnin i wun fɛ. Sɛ e niɛn i ajalɛ’n su’n, e kwla wun e wun fɛ mɛn nga nun. Wafa nga sran kun kwla nanti naan w’a wun i wun fɛ’n, Zezi yiyili nun weinwein kleli i sɔnnzɔnfuɛ mun. Ndɛ ng’ɔ́ bá lɛ’n nun’n, é wá bó su kan.

[Ja ngua lɛ ndɛ mun]

[Foto mun, bue 4, 5]