?Wafa sɛ yɛ ɲrɛnnɛn lika’n, i su nanwlɛ ndɛ’n kan e ɔ?

BE NGA be kle sran’m be kɛ sin fɛtɛ kun o lɛ naan be kle sran’m be ɲrɛnnɛn nun’n, be ti Ɲanmiɛn Zoova i dunman’n i sacifuɛ dan kpa. Ndɛ nga Biblu’n kan’n yɛle kɛ Ɲanmiɛn waan ɔ́ wá núnnún klunwifuɛ mun. (2 Tɛsalonikfuɛ Mun 1:6-9) Ɲanmiɛn kwla fa ya sɔ, sanngɛ ya falɛ’n timɛn i nzuɛn’m be nun cinnjinfuɛ’n.

Ɲanmiɛn faman e wun sa fa siemɛn i klun. Ɔ usali bɔbɔ kɛ: “?Amun bu i kɛ n klo kɛ klunwifuɛ’m be wu?” (Ezekiɛl 18:23) ?Sɛ Ɲanmiɛn kloman kɛ klunwifuɛ’m be wu’n, ɔ yo sɛ yɛ ɲrɛnnɛn mɔ sran’m bé wún i sa trilili’n, ɔ́ kó yó i fɛ yɛ?

Ɲanmiɛn i nzuɛn nga i kpa trɛ i ngba’n, yɛle i sran klolɛ’n. (1 Zan 4:8) Nanwlɛ, “Anannganman ti kpa man sran’m be kwlakwla. Ɔ klo ninnge b’ɔ yili be’n be ngba.” (Jue Mun 145:9) Ɔ maan e liɛ’n, like nga Ɲanmiɛn kunndɛ kɛ e yo’n, yɛle kɛ e klo i kpa.—Matie 22:35-38.

?Ɲrɛnnɛn lika’n yɛ e sro i annzɛ Ɲanmiɛn yɛ e klo i ɔ?

Be kle sran’m be kɛ klɔ sran le i sin like kun m’ɔ wun ɲrɛnnɛn lika kun mɔ lɔ sin’n nuanman’n nun. I sɔ’n yo maan sran’m be sro Ɲanmiɛn kɛ be fa sro like sroesroe wie sa. Sanngɛ sran ng’ɔ suan Ɲanmiɛn i su nanwlɛ ndɛ’n, m’ɔ ko klo i’n, ɔ sro i wie. Yɛle kɛ i ɲin yi i. Jue Mun 111:10 yiyi nun kɛ: “Be nyin b’ɔ yi Anannganman yɛ ɔ ti ngwlɛlɛ silɛ’n i bo bolɛ’n niɔn. Be kwlaa nga be yo i sɔ’n, be lɛ akunndan ti ɔ.” Ɲanmiɛn i srolɛ sɔ’n, ɔ timan kɛ like sroesroe wie i srolɛ sa. Sanngɛ ɔ ti aɲinyiɛ dan mɔ e fa man e Yifuɛ’n niɔn. I sɔ’n yo maan e sro i mmla’m be fɔnlɛ.

Wafa nga ɲrɛnnɛn lika’n i su like suanlɛ’n yoli bla kun mɔ be flɛ i Katelini i ye’n, maan e fa e ɲin e sie su e nian. Bla sɔ’n le afuɛ 32, kpɛkun ɔ nɔn drɔgi’n kpa. Mɛn dilɛ’n, ɔ nin nzaje sa yolɛ’n, ɔ nin bian kunndɛlɛ sukusuku’n yɛ ɔ kacili i junman ɔn. I bɔbɔ’n bumɛn i wun sran kun. Ɔ seli kɛ: “Kɛ n niannin min wa bla kan’n m’ɔ le afuɛ kun’n, n buli akunndan. N seli min wun kɛ: ‘nian like nga a su yo min wa’n. Bé wá rá ɔ ɲrɛnnɛn lika mɔ lɔ sin’n nuanman’n nun.’” Katelini miɛnnin i ɲin naan ɔ́ yáci drɔgi nɔnlɛ’n, sanngɛ ngbɛn ɔn. Ɔ seli kɛ: “N kunndɛli kɛ ń yó sran kpa. Sanngɛ like fi timan kpa min mɛn dilɛ’n nun. Mɛn’n bɔbɔ’n ɔ timan kpa wie. Ɔ maan ɔ yo kɛ nán n bowɛ n kle min wun yalɛ kɛ ń kúnndɛ ń yó sran kpa sa.”

I sin’n, Katelini nin Zoova i Lalofuɛ’m be wa yiali nun. Katelini seli kɛ: “Be kleli min kɛ ɲrɛnnɛn lika kun mɔ lɔ sin’n nuanman’n, ɔ nunman lɛ. Biblu’n nun ndɛ mma nga be fa yiyili nun’n, ɔ ti weiin. Kɛ n wa sili kɛ be su raman min ɲrɛnnɛn lika kun mɔ lɔ sin’n nuanman’n nun’n, min wla’n wa guali ase.” Like ng’ɔ suɛnnin i ekun’n yɛle kɛ Ɲanmiɛn tali nda kɛ, kɛ klunwifuɛ’n su tranman asiɛ’n su kun’n, klɔ sran’m be ɲan anannganman nguan asiɛ’n su. (Jue Mun 37:10, 11, 29; Lik 23:43) Ɔ kan guali su kɛ: “Siɛn’n n lafi su kɛ ń kwlá ɲán anannganman nguan mɛn klanman’n nun!”

?Ɲrɛnnɛn lika’n mɔ lɔ sin’n nuanman’n, i srolɛ’n ɔ kwla ukali Katelini naan w’a yaci drɔgi nɔnlɛ’n? Ɔ seli kɛ: “Kɛ n konvi sɔ drɔgi nɔnlɛ kpa’n, n srɛ Ɲanmiɛn Zoova tankaan kɛ ɔ uka min. Wafa nga Zoova bu i sɔ aeliɛ’n, kɛ ɔ kpɛn min ti nun’n, n kunndɛman kɛ ń bó i wla. Ɔ tɛli min srɛlɛ’m be su.” (2 Korɛntfuɛ Mun 7:1) Ɲanmiɛn i mmla mun mɔ Katelini sro be fɔnlɛ’n ti’n, ɔ kwla ɲannin wunmiɛn ɔ wlali i aeliɛ tɛtɛ’m be ase.

Nanwlɛ, sɛ e klo Ɲanmiɛn naan e ɲin yi i’n, i sɔ’n úka e naan y’a yo Ɲanmiɛn klun sa, naan y’a di aklunjuɛ tititi. Sanngɛ sɛ e yo sɔ’n nán ɲrɛnnɛn lika kun mɔ lɔ sin’n nuanman’n i wun srɛ ti ɔ. Jue tofuɛ’n klɛli i kɛ: “Sran nga i nyin yi Anannganman’n b’ɔ nanti i atin’n su’n, i liɛ su ti ye!”—Jue Mun 128:1.

[Kuku/Foto, bue 9]

?WAN MUN YƐ BÉ FÍN BLƆLƆ [ANNZƐ NDIA NUN] LƆ BÉ FÍTE Ɔ?

Wafa nga Biblu wie’m be kaci Glɛki ndɛ mma nɲɔn nga be flɛ i Zeɛni nin Hadɛsi mɔ be timan kun’n, ɔ sanngan sran’m be akunndan’n. Afin, be kacili be kɛ ndɛ mma kunngba sa. Ndɛ mma sɔ’n yɛle “nyrɛnnɛn lika’n bɔ lɔ sin’n nuanman’n.” Biblu’n nun’n, ndɛ mma Zeɛni ti like nga be nunnun i mlɔnmlɔn’n, m’ɔ kwlá sɛmɛn i sin nguan nun kun’n i nzɔliɛ. Sanngɛ Hadɛsi, i liɛ’n be kwla cɛn be fin nun be fite.

Ɔ maan, kɛ Zezi wuli mɔ be cɛnnin i’n, akoto Piɛli kwla seli i ndɛ tiefuɛ mun kɛ Ɲanmiɛn w’a “yaciman [Zezi] blɔlɔ [annzɛ ndia nun] lɔ.” (Sa Nga Be Yoli’n 2:27, 31, 32; Jue Mun 16:10) Glɛki aniɛn nun’n, ndɛ mma Hadɛsi yɛ be kacili i wa kɛ ‘blɔlɔ’n’ niɔn. Ɔ maan, Zezi w’a ɔman lika kun mɔ lɔ sin nuanman’n i nun. Hadɛsi annzɛ ‘blɔlɔ’n’ yɛle ndia’n. Sanngɛ nán Zezi kunngba cɛ yɛ Ɲanmiɛn maan ɔ́ fín Hadɛsi annzɛ ndia nun lɔ fíte ɔ.

Kɛ Biblu’n kán sran cɛnlɛ ndɛ’n, ɔ se kɛ: “Be nga be o wie’n nin blɔlɔ’m [annzɛ ndia’m] be sa nun’n, be yi be mannin.” (Sa Nglo Yilɛ 20:13, 14) Kɛ be se kɛ like fi su tranman ‘blɔlɔ’n’ annzɛ ndia’n i sa nun kun’n, i bo’n yɛle kɛ be kwlaa nga Ɲanmiɛn bu be sran kpa’n bé cɛ́n. (Zan 5:28, 29; Sa Nga Be Yoli’n 24:15) Nanwlɛ, kɛ é wá wún e awlɛn su sran nga be wuli mɔ bé fín ndia’n nun fíte’n, nán e ɲrun lɔ like ɲɛnmɛn kpa kun yɛ ɔ o lɛ ɔ! Maan e fa e wla e gua su. Zoova m’ɔ ti Ɲanmiɛn m’ɔ klo sran lele’n, ɔ́ yó i sɔ like’n.