Zoova ti nanwlɛfuɛ yɛ ɔ yaci sran wun sa cɛ

“Min Min, ɔ klun ti kpa, a yaci sran wun sa cɛ i. Be nga be kpan flɛ wɔ’n, a yi wɔ aklunye’n i nglo kle be.”​—JUE. 86:5.

?AMUN KWLA YIYI NUN?

?Wafa sɛ yɛ e kwla yo nanwlɛfuɛ kɛ Zoova sa ɔ?

?Wafa sɛ yɛ e kwla yaci sran wun sa cɛ i kɛ Zoova sa ɔ?

?Ngue ti yɛ e kunndɛ kɛ é súan Zoova i nzuɛn wafa’m be su like titi naan é yó kɛ i sa ɔ?

1, 2. (a) ?Sran wafa benin yɛ e kunndɛ kɛ é trɛ́ i janvuɛ ɔ? (b) ?Kosan benin yɛ é wá tɛ́ be su ɔ?

?NGUE ti yɛ amun kwla se kɛ sran kun ti amun janvuɛ kpa ɔ? Be flɛ aniaan bla kun kɛ Asle. Ɔ seli kɛ i liɛ’n, kɛ ɔ́ fá jú m’ɔ́ sé kɛ sran kun ti i janvuɛ kpa’n, nn sran sɔ’n w’a yimɛn i ase le. Sɛ ɔ loli i ngasi’n, ɔ yaci cɛli i klun ufue su. E kwlakwla e kunndɛ é trɛ́ i sɔ janvuɛ. Afin kɛ e nin i é sán nun’n, e wla gua ase.​—Nya. 17:17.

² Janvuɛ’n i kpafuɛ mɔ e kwla tra’n, yɛle Zoova. Afin, ɔ yimɛn i sufuɛ nanwlɛfuɛ’m be ase le. Kpɛkun, sɛ be yo i sa’n, ɔ yaci cɛ be klun ufue su. Jue tofuɛ’n seli kɛ: “Min Min, ɔ klun ti kpa, a yaci sran wun sa cɛ i. Be nga be kpan flɛ wɔ’n, a yi wɔ aklunye’n [annzɛ ɔ “sran klolɛ nanwlɛ su’n”] i nglo kle be.” (Jue. 86:5) ?Wafa sɛ yɛ Zoova yi i nzuɛn wafa sɔ mɔ be yo ɲɛnmɛn’n, be nglo ɔ? ?Wafa sɛ yɛ e kwla yo kɛ i sa ɔ? Sɛ e wun kosan sɔ’m be su tɛlɛ’n, é kló Zoova m’ɔ ti e janvuɛ’n i kpa ekun. Asa ekun’n, e nin e niaan Klistfuɛ mun e afiɛn mántan kpa.​—1 Zan 4:7, 8.

ZOOVA TI NANWLƐFUƐ

3. ?Ngue yɛ sran ng’ɔ ti nanwlɛfuɛ’n yo ɔ?

³ Sran ng’ɔ ti nanwlɛfuɛ’n, ɔ ti sran kpa. Sɛ ɔ tra sran kun i janvuɛ’n, maan lika’n yo sɛ yo sɛ’n, ɔ yimɛn i ase. Sanngɛ ɔ suɛn i bo, ɔ wlɛ i fanngan. Biblu’n kle kɛ i sɔ yɛ Zoova yo ɔ, naan ɔ ti “nanwlɛfuɛ.”​—Mml. 7:9.

4, 5. (a) ?Wafa sɛ yɛ Zoova kle kɛ ɔ ti nanwlɛfuɛ ɔ? (b) ?Kɛ e wun kɛ Ɲanmiɛn yiman i sufuɛ nanwlɛfuɛ’m be ase’n, ɔ yo e sɛ?

⁴ ?Wafa sɛ yɛ Zoova kle kɛ ɔ ti nanwlɛfuɛ ɔ? Yɛle kɛ ɔ yimɛn i sufuɛ nanwlɛfuɛ’m be ase le. Famiɛn Davidi sieli Zoova i nzuɛn sɔ’n i nzɔliɛ kpa. (An kanngan 2 Samiɛl 22:26 nun.) Yɛle kɛ, kɛ kekle tɔli i su’n, Zoova suɛnnin i bo, ɔ sɛsɛli i kpɛkun ɔ deli i. (2 Sam. 22:1) Ɔ maan, Davidi wunnin kɛ Zoova seman ngbɛn kɛ ɔ ti nanwlɛfuɛ. Sanngɛ ɔ yo i nuan su sa. ?Ngue ti yɛ Zoova yoli Davidi i ye dan sɔ ɔ? Afin Davidi ti ‘sran ndɛnmanfuɛ.’ Be nga ti sɔ’n, Zoova fa be yo i sran nanndoliɛ. Ɔ maan ɔ yiman be ase le.​—Nya. 2:6-8.

⁵ Kɛ e wun kɛ Zoova yimɛn i sufuɛ nanwlɛfuɛ’m be ase’n, e wla gua ase dan. I sɔ yɛ ɔ yoli e niaan kun mɔ be flɛ i Rɛdi’n niɔn. Ɔ seli kɛ: “Kɛ n kanngan wafa nga blɛ kekle’n nun Zoova nin Davidi be trannin’n i su ndɛ’n, min wla gua ase. Afin sɛ Davidi wánndi o, ɔ́ kó fía o, Zoova nin i ɔ. I sɔ’n wla min fanngan. N wun i wlɛ kɛ sa kwlaa ng’ɔ́ jú min su’n, maan ɔ yo sɛ yo sɛ o, Zoova su yiman min ase le.” ?Nán kɛ amun bu i sɔ wie ɔ?​—Rɔm. 8:38, 39.

6. ?Wafa kun ekun nga Zoova kle kɛ ɔ ti nanwlɛfuɛ’n yɛle benin? ?Zoova i nzuɛn wafa sɔ’n, ɔ yo i sufuɛ’m be sɛ?

⁶ Wafa kun ekun nga Zoova kle kɛ ɔ ti nanwlɛfuɛ’n yɛle kɛ ndɛ ng’ɔ kan’n, i bɔbɔ di su. Ɔ seli kɛ: “Kɛ amún yó oke’n, wuun n tɛ o n osu nun.” (Eza. 46:4) Zoova w’a kaciman, ɔ te di ndɛ ng’ɔ kan’n, be su. (Mal. 3:6) Asa ekun’n, like nga Zoova se kɛ ɔ́ yó’n, ɔ yo. (Eza. 55:11) Zoova i nzuɛn wafa sɔ’n ti’n, i sufuɛ’m be wla gua ase. Afin be si kɛ sɛ be mian be ɲin be nanti i mmla’m be su’n, like ng’ɔ seli kɛ ɔ́ yó mán be’n, saan ɔ́ yó.​—Eza. 48:17, 18.

MAAN E YO NANWLƐFUƐ KƐ ZOOVA SA

7. ?Wafa kun nga e kwla yo nanwlɛfuɛ kɛ Ɲanmiɛn sa’n, yɛle benin?

⁷ ?Wafa sɛ yɛ e kwla yo nanwlɛfuɛ kɛ Zoova sa ɔ? Yɛle kɛ be nga afɛ o be su’n, maan e uka be. (Nya. 3:27) Wienun ɔn, e niaan wie o lɛ ɔ kpinndinman annzɛ Ɲanmiɛn sulɛ’n ti’n, i fuɛ’m be kle i yalɛ. Annzɛ kusu, ɔ yo i kɛ like fi yoman ye i sa nun. I sɔ’n ti’n, i wla bo i wun. Aniaan sɔ’n, maan e ko fɔnvɔ i naan ‘i wla gua ase.’ (Zkr. 1:13)a Sɛ e yo sɔ’n, é klé kɛ e ti i janvuɛ kpa m’ɔ ‘tra be niaan’n.’​—Nya. 18:24.

8. ?Sɛ e jali bla annzɛ bian’n, wafa sɛ yɛ e kwla yo nanwlɛfuɛ kɛ Zoova sa ɔ?

⁸ Wafa nga e kwla yo nanwlɛfuɛ kɛ Zoova sa’n, i kun ekun yɛle kɛ nán maan e kunndɛ bla e yi bo annzɛ bian e wun bo. (Nya. 5:15-18) I kpa bɔbɔ’n, nán e bu akunndan tɛ m’ɔ́ fá e yí i sɔ sa nun’n. (Mat. 5:28) Asa ekun’n, nán e kan e niaan’m be wun ndɛ tɛ, yɛ nán e fa be wun ndɛ e tru. Sɛ be su kan be wun ndɛ tɛ kusu’n, nán e tran lɛ e tie. Sɛ e yo sɔ’n, é klé kɛ e ti e nanwlɛfuɛ kɛ Zoova sa.​—Nya. 12:18.

9, 10. (a) ?I kwlaa yoli o, wan yɛ ɔ fataman kɛ e yi i ase ɔ? (b) ?Ngue yɛ ɔ kle kɛ Zoova i mmla’m be su nantilɛ’n timan pɔpɔ titi ɔ?

⁹ I kwlaa i ti nin i bo’n, yɛle kɛ Zoova bɔbɔ’n, nán e yi i ase. Like ng’ɔ klo i’n, maan e klo i wie. Yɛ ng’ɔ kpɔ i’n, maan e kpɔ i naan e yo like ng’ɔ jɔ i klun’n. (An kanngan Jue Mun 97:10 nun.) Sɛ akunndan nga Zoova bu’n i wie yɛ e bu’n, i mmla’m be falɛ’n yó e sa nun pɔpɔ.​—Jue. 119:104.

¹⁰ E si kɛ, ɔ fata kɛ e mian e ɲin naan y’a nanti Zoova i mmla’m be su titi. I wie yɛle kɛ aniaan wie’m be kunndɛ kɛ bé já bla annzɛ bian, sanngɛ be ɲanman be wiengu Zoova i sufuɛ mɔ be kwla jɛ i ɔ. (1 Kor. 7:39) E kwla fa aniaan bla kun i sunnzun ase. Kɛ m’ɔ nin a jaman bian ti’n, i ngunmin i tranlɛ’n, ɔ su tin i su. Kɛ ɔ́ yó sɔ’n, nn i junman’n su lɔ’n, i wiengu’m bé sé i kɛ ɔ nin yasua kun be fata naan ɔ nin i be san nun. Ɔ nin i sɔ ngba’n, ɔ miɛn i ɲin nanti seiin naan ɔ nin Zoova be afiɛn w’a saciman. Be kwlaa nga be yo nanwlɛfuɛ kɛ aniaan bla sɔ’n sa’n, Zoova i wla fiman be le. Saan ɔ́ yí i wun nglo klé be.​—Ebr. 11:6.

ZOOVA YACI SRAN WUN SA CƐ

11. ?Ngue ti yɛ sran kun kwla yaci sa cɛ ɔ?

¹¹ Sran ng’ɔ yaci sa cɛ’n, nán kɛ sa nga be yoli i’n, ɔ yomɛn i ya ti yɛ ɔ yaci cɛ ɔ. Sanngɛ, ɔ kunndɛman kɛ ɔ́ fá sa nga i wiengu yoli i’n, ɔ́ síe i klun naan w’a kaci ble be afiɛn. Kɛ be se kɛ be yaci sran wun sa cɛ i’n, Zoova yɛ ɔ yi i sɔ nzuɛn’n i nglo kpa ɔ. Biblu’n se kɛ sran nga i sa tɛ’n yo i nzisɔ m’ɔ yaci’n, Zoova “yaci [i] wun sa cɛ i.”​—Jue. 86:5.

12. (a) ?Wafa sɛ yɛ Zoova yaci sa cɛ ɔ? (b) ?Kɛ be se kɛ be yaci sran kun i wun sa ‘cɛ i mlɔnmlɔn’n,’ i bo yɛle benin?

¹² ?Wafa sɛ yɛ Zoova yaci sa cɛ ɔ? Biblu’n kle kɛ, kɛ Zoova yaci sran’m be wun sa cɛ be’n, ɔ yaci cɛ be ‘weiin.’ Kpɛkun ɔ boman su diman jɔlɛ kun mlɔnmlɔn. (Eza. 55:7) ?Kɛ Zoova yaci sa cɛ’n, ngue yɛ ɔ kle kɛ ɔ yaci cɛ weiin ɔn? Ɔ fin ndɛ ng’ɔ o Sa Nga Be Yoli’n 3:19 nun’n. (An kanngan nun.) Akoto Piɛli seli kɛ sɛ sran kun kunndɛ kɛ be yaci i wun sa cɛ i’n, ɔ fata kɛ ɔ ‘kaci i nzuɛn’n, yɛ ɔ sɛ i sin.’ Kɛ sran kun yo sa tɛ m’ɔ yo i nzisɔ’n, ɔ yoman sa kunngba sɔ’n kun. Ɔ miɛn i ɲin wlɛ i ase. Siɛn’n, sa nga Ɲanmiɛn klun jɔ su’n, yɛ ɔ yo ɔ. (2 Kor. 7:10, 11) Piɛli waan sran ng’ɔ yo sɔ’n, Zoova ‘yaci sa nga ɔ yoli i’n cɛ i mlɔnmlɔnmlɔn.’ Ɔ ti kɛ like mɔ b’a fa bunnde b’a klɛ i tɛbua su mɔ be lualua tafuɛn be fa nunnun’n sa. Kɛ ɔ yo sɔ’n, be wunmɛn i osu kun. I kunngba’n yɛ Zoova yo ɔ. Kɛ ɔ yaci sa cɛ’n, ɔ ti kɛ w’a fa nzue w’a salo sa sɔ’n w’a gua sa. Be wunmɛn i osu kun mlɔnmlɔn.​—Ebr. 10:22; 1 Zan 1:7.

13. ?Kɛ Zoova se kɛ ‘ɔ su bo-man be sa tɛ’n su di-man jɔlɛ kun’n,’ ɔ yo e sɛ?

¹³ ?Kɛ Zoova yaci sran kun i wun sa cɛ i’n, ngue yɛ ɔ kle kɛ ɔ boman su diman jɔlɛ mlɔnmlɔn kun ɔn? Ɔ fin be nga bé kɔ́ ɲanmiɛn su’n, be su ndɛ nga Ɲanmiɛn nuan ijɔfuɛ Zeremi kannin’n. (An kanngan Zeremi 31:34 nun.) Zoova seli kɛ: “Sa nga be yoli min’n, ń yáci ń cɛ́ be. N su bo-man be sa tɛ’n su di-man jɔlɛ kun.” I sɔ mɔ Zoova yo’n, ɔ gua e awlɛn su nzue dan. Ɔ yaci sa cɛ mlɔnmlɔn.​—Rɔm. 4:7, 8.

14. ?Kɛ e bu wafa nga Zoova yaci sran i wun sa cɛ’n i akunndan’n, ɔ yo e sɛ? An fa sa kun yiyi nun.

¹⁴ Kɛ e bu wafa nga Zoova yaci sran wun sa cɛ i’n i akunndan’n, e wla gua ase fɔun. I wie yɛle aniaan bla kun mɔ be flɛ i kɛ Elɛni i liɛ’n. Be tuli i asɔnun’n nun. Ɔ cɛli kpa naan w’a sɛ i sin w’a yo e niaan. Sanngɛ ɔ se i klun lɔ kɛ Zoova w’a yacimɛn i wun sa’n w’a cɛmɛn i sakpa. Naan Zoova klomɛn i kɛ be nga mun sa. Sanngɛ kɛ ɔ kanngannin Biblu’n nun’n, ɔ wunnin wafa nga Zoova yaci sran i wun sa cɛ i’n. Ɔ wunnin kɛ, kɛ Zoova yaci sran i wun sa cɛ i’n, ɔ ti kɛ sran mɔ b’a wunnzin i’n sa. Ɔ maan i wun kpɛjɛ i kpa.b Kɛ Elɛni buli ndɛ sɔ’m be akunndan’n, i wla guali ase. I waan: “N buli i kɛ Zoova kwlá yaciman min wun sa’n cɛman min naan sa sɔ’n, ɔ́ ká min su kɛ trɔ sa trilili. Sanngɛ siɛn’n, blɛblɛblɛ e nin Zoova e afiɛn su mantan. Ɔ maan ɔ yo min kɛ b’a sike min ti su trɔ sa. Min wun kpaja min.” Nanwlɛ, Ɲanmiɛn ti kpa man e yɛ ɔ yaci e wun sa’n cɛ sakpa!​—Jue. 103:9.

MAAN E YACI SRAN WUN SA CƐ I KƐ ZOOVA SA

15. ?Wafa sɛ yɛ e kwla yaci sran i wun sa cɛ i’n kɛ e Zoova sa ɔ?

¹⁵ Sɛ e wiengu yo e sa naan e yaci e cɛ i’n, é klé kɛ e fa Zoova i nzuɛn liɛ’n. (An kanngan Lik 17:3, 4 nun.) Maan e wla kpɛn su kɛ, kɛ Zoova yaci sran i wun sa cɛ i’n, ɔ boman su diman jɔlɛ kun mlɔnmlɔn. I sɔ wie yɛ ɔ fata kɛ e yo ɔ. Sɛ e yaci e wiengu kun i sa tɛ’n e cɛ i’n, nán e bu i akunndan naan e bo su e di jɔlɛ ekun.

16. (a) ?Ngue ti yɛ e yaci e wiengu’m be wun sa e cɛ be ɔ? (b) ?Ngue yɛ ɔ fata kɛ e yo naan Ɲanmiɛn w’a yaci e wun sa’n w’a cɛ e ɔ?

¹⁶ Sɛ e yaci sa nga be yoli e’n cɛ’n, nán kɛ sa sɔ’n yoman e ya ti yɛ e yaci e cɛ ɔ. Kusu’n, nán kɛ e ti luflefuɛ ti ɔ. Sanngɛ e kunndɛman kɛ ble tran e nin e wiengu e afiɛn, i ti yɛ e yaci ɔ. E wla fiman su kɛ sɛ e waan Zoova yaci e wun sa’n cɛ e’n, ɔ fata kɛ e bɔbɔ’n, e yaci e wiengu’m be wun sa cɛ be wie. (Mat. 6:14, 15) I kwlaa yoli o, Zoova si e aunnvuɛ, afin ɔ si kɛ “fa yɛ ɔ fa yili ye-ɔ.” (Jue. 103:14) Kɛ mɔ fa kunngba’n yɛ be fa yili e wiengu mun ti’n, sɛ be yo e sa annzɛ be lo e ngasi’n, maan e si be aunnvuɛ. Yɛ e yaci be wun sa’n e cɛ be klun ufue su.​—Efɛ. 4:32; Kol. 3:13.

17. ?Sɛ e niaan kun yoli e sa’n, é yó sɛ naan w’a yoman ndɛ?

¹⁷ Kɛ be se kɛ e yaci e wiengu i wun sa cɛ i’n, nán cɛn ngba yɛ ɔ yo pɔpɔ man e ɔ. Akoto’m be blɛ su bɔbɔ’n, Pɔlu wlali Klistfuɛ wie mɔ Ɲanmiɛn fali be kɛ bé kɔ́ ɲanmiɛn su’n, be fanngan. Ɔ seli be nun wie mun kɛ be siesie be afiɛn. (Fil. 4:2) ?Sanngɛ sɛ e niaan kun yoli e sa’n, é yó sɛ naan w’a yoman ndɛ? Maan e wla kpɛn sa kun m’ɔ juli Zɔbu blɛ su’n, i su. Yɛle kɛ Elifaz nin Bildad nin Zɔfar mɔ be ti Zɔbu i janvuɛ’n, be tɔnnin Zɔbu i suɛn kɛ ɔ yoli sa tɛ. Sa sɔ’n yoli Zɔbu i ya kpa. (Zɔb 10:1; 19:2) Zoova buli Zɔbu i janvuɛ nsan’m be fɔ. Kpɛkun i sin’n, ɔ seli be kɛ be fa nnɛn ko man Zɔbu naan ɔ fa yi be ti tɛ. (Zɔb 42:7-9) Zɔbu kusu, ɔ le i like liɛ mɔ Zoova seli i kɛ ɔ yo ɔ. Zoova seli i kɛ ɔ srɛ i janvuɛ nsan’n be ti. Zɔbu niannin su yoli fa kleli kɛ ɔ yaci cɛli be. I sɔ’n ti’n, Zoova yrɛli i su dan. (An kanngan Zɔb 42:10, 12, 16, 17 nun.) ?Afɔtuɛ benin yɛ Zɔbu i su ndɛ sɔ’n man e ɔ? Yɛlɛ kɛ sɛ sran yo e sa naan e srɛ e mɛn i’n, e su fa yoman ndɛ kun.

MAAN E KLO ZOOVA I NZUƐN WAFA’M BE SU LIKE SUANLƐ TITI NAAN E YO KƐ I SA

18, 19. ?Ngue yɛ ɔ fata kɛ e yo i tititi ɔ?

¹⁸ E wunnin kɛ Zoova kpaman sran nun naan e kwla fa e wun mɛntɛn i. E wunnin wie ekun kɛ Zoova ti aklunyefuɛ naan i like yolɛ yoman ya. Y’a wun kɛ ɔ ti nanwlɛfuɛ naan ɔ yaci sa cɛ. Zoova i nzuɛn wafa sɔ’m be su like suanlɛ’n, ɔ yoli e fɛ dan. Sanngɛ be wlɛ wunlɛ kaan sa yɛ y’a wun be ɔ. Afin Zoova i nzuɛn wafa’m be ti kploun. Kɛ é wá ɲán anannganman nguan bɔbɔ’n, e su wieman be su like si le. (Aku. 3:11) Ɔ maan ndɛ kun mɔ akoto Pɔlu kannin’n, ɔ ti e liɛ su. Ɔ seli kɛ: “Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa’n kwlakwla kpan!” Kɛ ng’ɔ fa kɛnnin i lɛ’n, e kwla se kɛ Zoova i nzuɛn wafa nsiɛn nga e kannin be ndɛ like suanlɛ nga nun’n, be ti kploun wie.​—Rɔm. 11:33.

¹⁹ I sɔ’n ti’n, maan e klo Zoova i nzuɛn wafa’m be su like suanlɛ titi, e bu be su akunndan naan e yo kɛ i sa. (Efɛ. 5:1) Sɛ e yo sɔ’n, é kló Zoova kpa trá laa’n. Yɛ, e nin i e afiɛn’n mántan kpa. Ɔ maan ndɛ nga jue tofuɛ’n kannin’n, é kán wie. Ɔ seli kɛ: “Nyanmiɛn i tranlɛ bɔ e nin wɔ tran’n ɔ ti min anyanbeun like.”​—Jue. 73:28.

[Ja ngua lɛ ndɛ mun]

[Foto, bue 18]

[Foto, bue 20]

“Janvuɛ’n wie kusu ti kpa tra be niaan.”​—Nya. 18:24. (An nian ndɛ kpɔlɛ 7 nun.)

“Sa nga amun wiengu yo amun’n, an yaci cɛ i.”​—Efɛ. 4:32. (An nian ndɛ kpɔlɛ 16 nun.)

[Foto, bue 22]

Sɛ sran yo e sa’n, maan e tu e klun e srɛ e mɛn i. (An nian ndɛ kpɔlɛ 17 nun.)