?Sran kun bu min akunndan?

?Kɛ ndɛ tɔ amun su’n, ɔ nin a yoman amun le kɛ sran fi wunmɛn i wlɛ naan amun a ka amun ngunmin naan amun leman ukafuɛ sa? Kpɛkun wie liɛ bɔbɔ’n, kannzɛ be si sɔ’n, ɔ yo amun kɛ be ndɛ nunman nun sa.

KƐ NDƐ tɔ e su’n, ɔ kwla yo e kɛ nzue dan wie yɛ ɔ su tɔ naan ɔ su kpɛman le sa. Ɔ ju wie’n, e kwla se kɛ sa ng’ɔ o e su’n, ɔ timan su naan i kekle m’ɔ ti’n ti’n, e kwlá suɛnmɛn i bo kun. Kpɛ sunman sɛ e akunndan’n sanngan’n, annzɛ e yoli asidan wie naan i sin afɛ’n tin e su’n, annzɛ tukpacɛ wie m’ɔ o e su’n ɔ wieman’n, annzɛ kusu sa kekle uflɛ wie’m be o e su’n, yɛ e kwla bu i sɔ’n niɔn. Kɛ mɔ e wunman like nga e kwla yo mɔ e sa sin bubu e’n ti’n, e wunman sran nga e ko kpɛ e ɲin i wun naan w’a uka e ɔ. ?Ɔ nin i sɔ ngba’n, e kwla se kɛ sran kun bu e akunndan?

‘Nyanmiɛn b’ɔ jran e sin sa’n kwlaa nun’n’ ɔ bu e akunndan

Biblu’n waan Ɲanmiɛn “ti e Si, ɔ si aunnvuɛ, ɔ ti Nyanmiɛn kun b’ɔ jran e sin sa’n kwlaa nun.” (2 Korɛntfuɛ Mun 1:3) Ɲanmiɛn mɔ i dunman’n yɛle Zoova’n, ɔ si kɛ e sa mian fɔnvɔlɛ wun. Sran ‘sin jranlɛ’n’ i wafawafa’n, Biblu’n kɛn i ndɛ kpɛ ya tra su. Ɔ gua e awlɛn su nzue kɛ sa nga be tɔ e su’n, Ɲanmiɛn wun be wlɛ. Sanngɛ nɛ́n i ngba ɔ. Ɔ kunndɛ kɛ ɔ́ jrán e sin. Kɛ e si sɔ’n ti’n, e wun i wlɛ kɛ kannzɛ ɔ yo e kɛ sran’m be wunman ɲrɛnnɛn ng’ɔ o e su’n sa’n, naan be ndɛ nunman nun’n, sanngɛ Ɲanmiɛn Zoova liɛ’n, ɔ bu e akunndan.

Ɲanmiɛn Ndɛ’n nun’n, e wun weiin kɛ sran’m be tinuntinun be ndɛ lo Zoova. Biblu’n waan: “Anannganman i nyin ta lika’n kwlaa. I nyin ta klunwifuɛ mun nin klun-ufuefuɛ mun.” (Nyanndra Mun 15:3) I kunngba’n, e kɛnngɛn i Zɔb 34:21 nun kɛ: “Nyanmiɛn i nyin ta atin nga sran’m be fa’n su. Ɔ wun ajalɛ kwlaa nga be tu’n.” Like nga e yo’n, kannzɛ ɔ ti tɛ o, kannzɛ ɔ ti kpa o, Zoova wun i. Kpɛkun ɔ wun sa nga be o e su’n. I sɔ’n ti’n, like kwlaa nga kɛ ɔ niɛn i siin, ɔ ti kpa kɛ ɔ yo’n, ɔ yo. Ndɛ nga Anani m’ɔ ti jeliwafuɛ’n yɛle kɛ Ɲanmiɛn nuan ijɔfuɛ’n kannin kleli Zida Famiɛn Aza’n, ɔ yi i sɔ liɛ’n i nglo. Ɔ seli i kɛ: “Afin ɔ [Zoova] nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 Be Nyoliɛ 16:7, 9.

Like uflɛ ti yɛ Zoova nian e su titi ɔ. Zezi yiyili nun kɛ: “Sran fi kwlá ba-man n sin saan be nga n Si b’ɔ sunmannin min’n ɔ maan be ba n sin’n.” (Zan 6:44) Kɛ mɔ e ndɛ lo Zoova’n ti’n, ɔ nian sran’m be awlɛn nun nian, sɛ be kunndɛ kɛ bé sí i kpa o. Sɛ ɔ wun kɛ sran kun waan ɔ́ sí i’n, ɔ kwla ukɛ i kpa. I wie yɛle bla ng’ɔ o nvle nga be flɛ i Republique Dominicaine lɔ’n, i ndɛ liɛ’n. Tukpacɛ nga be flɛ i kansɛli’n tɔli i su. Ɔ maan ɔ ɔli dɔɔtrɔ yɛ ɔ nin i fata kɛ be kpaci i nun. Ɔ srɛli Ɲanmiɛn kɛ ɔ ukɛ i naan ɔ si Ɲanmiɛn sulɛ kpafuɛ’n. Kɛ ɔ yoli sɔ cɛ’n, i wun fali fluwa ?Ngue like yɛ Ɲanmiɛn Kpli kunndɛ kɛ e yo ɔ? ko mɛnnin i.a Cɛn kunngba sɔ’n i nglɛmun nun yɛ Zoova i Lalofuɛ’m be fali fluwa sɔ’n be mɛnnin i awlo lɔ ɔ. Bla’n kanngannin nun. Kpɛkun ɔ wunnin i kɛ Ɲanmiɛn w’a tɛ i srɛlɛ’n su. Ɔ kplinnin su kɛ ɔ nin Zoova i Lalofuɛ’m bé súan like. Kpɛkun w’a diman anglo nsiɛn, ɔ fɛli i wun mannin Ɲanmiɛn yɛ be yoli i batɛmu.

Biblu’n nun fluwa ng’ɔ suan Jue Mun’n i nun’n, laa Ebre wie mun kɛ Famiɛn Davidi sa’n, be toli fɔnvɔlɛ jue wie mun. Jue sɔ’m be nun’n, be kannin kɛ Zoova niɛn i sufuɛ’m be lika klanman kpa. Jue Mun 56:8 9 nun’n, Famiɛn Davidi srɛli Ɲanmiɛn kɛ: “Sɔ min nyinmuɛn nzue’n ɔ sɛ’n nun nian. Sɛ m bua-man ato-ɔ, a sunnzunnin min nyinmuɛn sɔ’n a niannin.” Kɛ nga e fa wun i sunnzun ase ng’ɔ o ndɛ’n sɔ’n i nun’n sa’n, Davidi si kɛ sa ng’ɔ o i su’n, ɔ nin wafa nga sa sɔ’n yo i’n, Zoova si i. Zoova si ɲrɛnnɛn ng’ɔ o Davidi su’n, ɔ nin like nga ti yɛ i ɲinmuɛn’n gua’n. Nanwlɛ, e Yifuɛ’n nian be kwlaa nga be bo manndrɛn be yo i klun sa’n be lika. “Be nga be fa be wla’n kwlaa guɛ i su’n,” ɔ nian be su.

Biblu’n nun ndɛ uflɛ ekun m’ɔ kan wafa nga Ɲanmiɛn niɛn i sufuɛ’m be lika klolɛ su’n, yɛle ng’ɔ o Jue Mun 23 nun’n. Jue sɔ’n i su fitilɛ’n fa Ɲanmiɛn sunnzun bua tafuɛ kun m’ɔ klo i bua’m be kpa’n. Be klɛli i lɛ kɛ: “N ti kɛ bua sa, Anannganman yɛ ɔ nian min su-ɔ. Like fi su mian-man min.” Nvle nga be klɛli Biblu’n lɔ’n, bua’m be kwlaa be tinuntinun be ndɛ lo bua sunianfuɛ’m be kpa. Be tɔn be bua’m be kwlaa be dunman bɔbɔ. Aliɛ ba kun nun’n, bua sunianfuɛ’n flɛ i bua’m be tinuntinun, ɔ fɛ i sa kpakpa be wun nian naan sɛ like wie yoli be o. Sɛ ɔ wun kɛ be nun kun w’a bo fɛ’n, ɔ kpakpa su are naan w’a yo juejue ndɛndɛ. Sɛ kun kpinndinman’n, ɔ fa are’n guɛ i nuan nun kekle nun. Ɔ trɛ i nun naan w’a jran nglo. Kɛ ɔ ko yo naan w’a laman naan w’a wuman’n, i ti yɛ ɔ yo sɔ ɔ. Nanwlɛ i sɔ nzɔliɛ liɛ’n, ɔ yi wafa nga Zoova nian be nga be kpɛ be ɲin i wun lɔ’n be lika’n, i nglo klanman.

Ɲanmiɛn srɛlɛ’n nin sran cɛnlɛ’n be kle kɛ Ɲanmiɛn bu e akunndan

B’a klɛman Jue nga e kɛnnin i ndɛ lɛ’n, ɔ nin jue nglanmannglanman uflɛ’m be Biblu’n nun kɛ e kanngan be nun naan be yo e fɛ ngbɛn. Be kle e wafa nga laa Ɲanmiɛn i sufuɛ kpa’m be kannin be klun ndɛ kleli Zoova’n. Be kannin ninnge nga be mian be sa’n i ndɛ. Kpɛkun kɛ Zoova kle be atin m’ɔ ra be su’n, be lɛli i ase. I sɔ’n ndɛ mɔ be kannin’n kle kɛ laa Ɲanmiɛn i sufuɛ sɔ’m be lafi su kpa kɛ be ndɛ lo Ɲanmiɛn. Be ndɛ sɔ m’ɔ yi wafa nga be wun fa yoli be’n i nglo’n i kannganlɛ nin i su akunndan bulɛ’n, be kwla uka e naan y’a bu Ɲanmiɛn kɛ nga be fa buli i’n sa wie. Atin nga Zoova man e kɛ e srɛ i’n, ɔ kle kpa kɛ e ndɛ lo i sakpa.

Sanngɛ ɔ ju wie’n, ndɛ m’ɔ tin e su dan’n ti’n, e wunman wafa nga e ko yo naan y’a kan kle Ɲanmiɛn ɔn. ?Sanngɛ i sɔ’n ti Zoova siman ndɛ ng’ɔ o e su’n? Rɔmfuɛ Mun 8:26 tɛ su kɛ: “Nyanmiɛn wawɛ’n jran e sin ɔ uka ye, afin e si-man like nga e srɛ Nyanmiɛn kɛ ɔ fa man e b’ɔ ti i su’n. I wawɛ’n bɔbɔ oto, ɔ jran e nuan ɔ srɛ i man ye.” Ndɛ mma sɔ’n se e kɛ laa srɛlɛ nga Ɲanmiɛn maan i sufuɛ’m be srɛli i mɔ be o Biblu’n nun’n, be yi wafa nga e wun fa yo e’n i nglo. Ɔ maan ɔ ti kɛ e bɔbɔ yɛ e su srɛ Zoova sa. I ti’n, i mɔ ‘be srɛ i ɔ, ɔ ti’n,’ ɔ tɛ srɛlɛ sɔ’m be su man e.—Jue Mun 65:3.

Sran cɛnlɛ mɔ e wla o su’n kusu’n, ɔ kle weiin kɛ e tinuntinun e ndɛ lo Ɲanmiɛn. Zezi Klist seli kɛ: “Cɛn wie lele be kwlaa nga be o ndia nun’n, bé tí [Zezi] i nɛn, yɛ bé fín ndia’n nun fíte.” (Zan 5:28, 29) Glɛki nun ndɛ mma nga be kacili i kɛ be kwlaa nga be o “ndia” nun wa’n, ɔ kle kɛ be kwlaa nga be wuli’n be o Ɲanmiɛn i klun. I sɔ’n kle kɛ kannzɛ sran kun wuli’n, Ɲanmiɛn i wla fimɛn i su.

Maan e bu i akunndan e nian. Ɔ nin i fata kɛ Ɲanmiɛn si sran’n i su like kwlaa ka naan w’a kwla cɛn i. Ɔ nin i fata kɛ ɔ si wafa ng’ɔ ti’n, ɔ nin ninnge ng’ɔ nin be fin i nin klun’n, ɔ nin nga ɔ wa ɲannin be kasiɛn’n. Yɛ ɔ nin i fata kɛ ɔ si ninnge nga be o i akunndan’n nun’n be kwlaa. (Mark 10:27) Kannzɛ bɔbɔ ɔ́ dí afuɛ akpiakpi kpanngban’n, Ɲanmiɛn wla fiman sran sɔ’n su le. (Zɔb 14:13-15; Lik 20:38) I ti’n, sran miliɔn kpanngban mɔ be wuli’n, be sran wafa nga be ti’n, i kwlaa o Ɲanmiɛn Zoova klun. I sɔ’n kle kɛ e tinuntinun e ndɛ lo Ɲanmiɛn!

Zoova yi i wun nglo kle e

?Sɛ e kunndɛ kɛ Ɲanmiɛn bu e akunndan’n, ngue yɛ ɔ fata kɛ e yo ɔ? I klikli’n, ɔ fata kɛ e kle kɛ ndɛ ng’ɔ kan’n, e bu i nanwlɛ naan e ɲin yi i yɛ e lafi i su. Akoto Pɔlu kannin Ɲanmiɛn i su lafilɛ’n ɔ nin e lika m’ɔ nian mɔ be kɔ likawlɛ’n, be ndɛ. Ɔ klɛli i kɛ: “Sɛ be lafi-mɛn i [Nyanmiɛn] su’n, i klun jɔ-man be wun mlɔnmlɔn. Ɔ maan sran nga i waan ɔ́ fɛ́ i wun mántan Nyanmiɛn’n, maan ɔ lafi su kɛ ɔ o lɛ, yɛ be nga be kunndɛ i’n, ɔ́ yí i wun klé be.”—Ebre Mun 11:6.

Maan e sie i nzɔliɛ kɛ sɛ e kunndɛ kɛ Ɲanmiɛn klun jɔ wafa nga e lafi i su’n i su’n, ɔ fata kɛ e yo like nɲɔn. I klikli’n, ɔ fata kɛ e “lafi su kɛ ɔ o lɛ.” Yɛle kɛ e lafi su kɛ i yɛ ɔ ti e Siefuɛ mɔ like fi nunmɛn i sin’n niɔn. Naan ɔ fata kɛ e ɲin yi i yɛ e su i. I nɲɔn su’n, ɔ fata kɛ e lafi su kɛ “be nga be kunndɛ i’n, ɔ́ yí i wun klé be.” Ɲanmiɛn sulafilɛ kpafuɛ’n i wie yɛle kɛ e lafi su kɛ be kwlaa nga be tu be klun be yo Ɲanmiɛn klun sa’n, ɔ kunndɛ kɛ be yo kpa. Naan ɔ yi i wun nglo kle be. Yɛle kɛ ɔ ra be su. Sɛ e suan Ɲanmiɛn Ndɛ’n naan e nin be nga be ɲin yi i’n e yia e su i’n, e kusu e kwla ɲan sulafilɛ nga sɛ sran kun le i’n, Ɲanmiɛn rɛ i su m’ɔ niɛn i lika klolɛ su’n.

Andɛ sran kpanngban be bu i kɛ Ɲanmiɛn ndɛ nunman klɔ sran’m be ndɛ nun. Sanngɛ kɛ nga y’a fa wun i lɛ’n, Biblu’n kle weiin kɛ be nga be yi i nglo kɛ be lafi Ɲanmiɛn su sakpa’n, be ndɛ lo i. Kannzɛ bɔbɔ andɛ mɛn nga nun’n, ɲrɛnnɛn’n tɔ e su annzɛ srɛ kun e annzɛ kusu e awlɛn’n kpɛ e klun annzɛ be yo e like yaya’n, sanngɛ ɔ fataman kɛ e wla’n bo e wun. Afin, Ɲanmiɛn Zoova bu e akunndan. I kpa’n, ɔ se e klolɛ su kɛ e kpɛ e ɲin i wun lɔ naan ɔ́ súan e bo. Jue tofuɛ’n waan: “Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo. Ɔ su yaci-mɛn i sufuɛ kpa’n lɛ maan srɛ kun-mɛn i naan i wun usu-mɛn i.”—Jue Mun 55:23.

[Ja ngua lɛ ndɛ’n]

[Kuku/Foto, bue 27]

Biblu’n nun ndɛ mma mɔ be wla n fanngan kɛ Ɲanmiɛn nian min lika klolɛ su’n

“[Zoova] nian-nian asiɛ wunmuan’n su naan ɔ́ súan be nga be fa be wla’n kwlaa guɛ i su’n be bo.”—2 BE NYOLIƐ 16:9

“Sɔ min nyinmuɛn nzue’n ɔ sɛ’n nun nian. Sɛ m bua-man ato-ɔ, a sunnzunnin min nyinmuɛn sɔ’n a niannin.”—JUE MUN 56:9

“N ti kɛ bua sa, Anannganman yɛ ɔ nian min su ɔ. Like fi su mian-man min.”—JUE MUN 23:1

“Sɛ be srɛ wɔ-ɔ, a ti. Sran’m be kwlaa bé bá ɔ sin.”—JUE MUN 65:3

“Kpɛkuun blɛ nga a kleli kɛ sɛ ɔ ju-ɔ á wún min’n, sɛ ɔ ju naan a flɛ min’n ń sró, afin n ti ɔ sa nuan like.”—ZƆB 14:15

“Sran nga i waan ɔ́ fɛ́ i wun mántan Nyanmiɛn’n, maan ɔ lafi su kɛ ɔ o lɛ, yɛ be nga be kunndɛ i’n, ɔ́ yí i wun klé be.”—EBRE MUN 11:6

“Fa sa ng’ɔ o ɔ su’n kwlaa wlɛ i Anannganman sa nun, ɔ́ súan ɔ bo. Ɔ su yaci-mɛn i sufuɛ kpa’n lɛ maan srɛ kun-mɛn i naan i wun usu-mɛn i.”—JUE MUN 55:23