“Sɛ sran yo amun tɛ’n, nán an yo i wie”
‘Sɛ sran yo amun tɛ’n, nán an yo i wie. Sa kwlaa nga amun yo’n, an yo maan sran’m be kwlaa be wun kɛ an ti kpa.’—RƆMFUƐ MUN 12:17.
1. ?Ngue yɛ ɔ ti sran sunman be nzuɛn ɔn?
SƐ BAKAN kun nin i niaan be o lɛ naan i niaan’n si i like’n, saan ɔ́ yó i wie. Sanngɛ, nán bakanngan’m be ngunmin yɛ be yo sɔ ɔ. Kpɛnngbɛn’m be yo sɔ wie. Sɛ sran wie yo be sa’n, saan bé yí mɛ́n i. Sanngɛ kpɛnngbɛn’m be liɛ’n, nán be wiengu’n i silɛ sa yɛ be si ɔ. Sanngɛ, be yo be liɛ’n i nvialiɛ nun. Yɛle kɛ be nun sunman be tɔn sran ng’ɔ yoli be like’n i suɛn, annzɛ be yo i like uflɛ wie naan sran’n i liɛ w’a yoman ye. I kwlaa yoli o, sran’n kunndɛ kɛ ɔ́ tú i klunngbɔ.
2. (a) ?Ngue ti yɛ Klistfuɛ’m be mian be ɲin naan sɛ sran yo be sa’n, b’a yomɛn i wie ɔ? (b) ?Kosan benin yɛ é wá fá e ɲin síe be su ɔ?
2 Ɔ ti su kɛ klunngbɔ tulɛ’n ti klɔ sran’n i nzuɛn. Sanngɛ Klistfuɛ kpa’m be liɛ’n, be mian be ɲin naan b’a yoman sɔ wie. Be nanti akoto Pɔlu i afɔtuɛ nga su. Ɔ seli kɛ: “Sɛ sran yo amun tɛ’n, nán an yo i wie.” (Rɔmfuɛ Mun 12:17) ?Sanngɛ ngue yɛ maan é nánti mmla sɔ’n su ɔ? ?Wan mun sa trele yɛ sɛ sran yo be tɛ’n, ɔ fataman kɛ be yo i wie ɔ? ?Sɛ sran yo e sa naan e yomɛn i wie’n, mmlusuɛ benin yɛ é ɲɛ́n i ɔ? Kɛ ɔ ko yo naan y’a tɛ kosan sɔ’m be su’n, ɔ fata kɛ e wun akoto Pɔlu i ndɛ sɔ’n, i ɲrun nin i sin’n. Kpɛkun é wá wún kɛ sɛ e nanti ndɛ ng’ɔ o Rɔmfuɛ Mun 12 nun’n su’n, i sɔ’n ti kpa, ɔ kle kɛ e klo sran naan e ti wun ase kanfuɛ. Sa nga ti yɛ ɔ ti sɔ’n, é wá yiyi nun.
I sɔ’n ti’n, ń srɛ́ amun kpa
3, 4. (a) ?Wafa sɛ yɛ Pɔlu boli Rɔmfuɛ Mun 12 i bo ɔ? ?Kɛ Pɔlu seli kɛ “i sɔ’n ti’n,” i bo’n yɛle benin? (b) ?Wafa sɛ yɛ ɔ fata kɛ Ɲanmiɛn i aunnvuɛ silɛ dan’n, ɔ yo Rɔmu lɔ Klistfuɛ mun ɔn?
3 Kɛ Pɔlu bó Rɔmfuɛ Mun 12 i bo’n, ɔ kannin ajalɛ nnan mɔ be kan Klistfuɛ’m be nantilɛ’n, i ndɛ. Wafa nga e nin Zoova, ɔ nin e niaan Klistfuɛ mun, ɔ nin be nga be timan Klistfuɛ’n, ɔ nin e siefuɛ mun e tran’n, Pɔlu kɛnnin i ndɛ. Rɔmfuɛ Mun 12:1 nun’n, Pɔlu kle sa nga ti yɛ ɔ fataman kɛ e yo sa tɛ’n. Like kunngba sɔ’n ti yɛ sɛ sran yo e sa’n, ɔ fataman kɛ e yi man’n niɔn. I waan: ‘Aniaan mun, aunnvuɛ dan mɔ Ɲanmiɛn wunnin e’n ti.’ I klikli nun mɔ Pɔlu klɛ́ ndɛ sɔ’n Glɛki aniɛn nun’n, ɔ boli i bo kɛ “i sɔ’n ti’n.” I sɔ’n kle kɛ w’a dun mmua kan ndɛ wie laa. Ɔ maan, ndɛ ng’ɔ su kɛn i siɛn’n yɛle kɛ, ‘ndɛ kwlaa nga n dun mmua kan kleli amun ti’n, ń srɛ́ amun kpa kɛ nga ń kán gúa su yɛ’n, an fa su.’ ?Sanngɛ ngue ndɛ yɛ Pɔlu dun mmua kannin ɔn?
4 Kɛ ɔ fɛ i Rɔmfuɛ Mun ndɛ 1 su lele fa ju 11 su’n, Pɔlu yiyili nun kɛ Ɲanmiɛn mannin be nga be ti Zuifu nin be nga be ti Glɛki’n be atin naan be nin Klist be di famiɛn i Sielɛ Blɛ’n nun. Sɛ i sɔ’n kwla yoli ye’n, ‘aunnvuɛ dan mɔ Ɲanmiɛn wunnin be’n ti ɔ.’ Cenjele like sɔ’n, Izraɛlifuɛ mun yɛ be dun mmua ɲɛnnin i wun atin ɔn. Sanngɛ be yili i ase. (Rɔmfuɛ Mun 11:13-36) ?Wafa sɛ yɛ ɔ nin i fata kɛ Klistfuɛ sɔ’m be sɔ ye dan sɔ mɔ Ɲanmiɛn sili be’n, i nun ɔn? Ɔ fata kɛ be kusu be si ye dan wie naan i sɔ’n ti’n, be nanti Pɔlu i ndɛ ng’ɔ o yɛ’n su. Ɔ seli kɛ: ‘An fa amun wun mɛn i kɛ sraka mɔ be rɛ i’n sa, m’ɔ ti i liɛ mlɔnmlɔn mɔ i klun jɔ su, i yɛ ɔ ti i sɔlɛ wafa m’ɔ ti su ɔ.’ (Rɔmfuɛ Mun 12:1) ?Sanngɛ, wafa sɛ yɛ Klistfuɛ sɔ’m be kwla fa be wun man Ɲanmiɛn kɛ “sraka” sa ɔ?
5. (a) ?Wafa sɛ yɛ sran kun kwla fɛ i wun man Ɲanmiɛn kɛ “sraka” sa ɔ? (b) ?Wafa sɛ yɛ ɔ fata kɛ Klistfuɛ’m be nanti ɔ?
5 Pɔlu yiyi i ndɛ’n nun kɛ: ‘Nán an yo kɛ sran mun mɔ be o lɛ ndɛ’n be sa, sanngɛ maan Ɲanmiɛn kaci amun akunndan’n naan an kaci mlɔnmlɔn. Kɛ ɔ ko yo sɔ’n, amún wún Ɲanmiɛn i klun sa’n i wlɛ, yɛ amún sí sa ng’ɔ ti kpa, m’ɔ jɔ i klun, mɔ maan amún yó kpa’n.’ (Rɔmfuɛ Mun 12:2) Ɔ fataman kɛ akunndan nga mɛn nunfuɛ’m be bu’n, i wie yɛ Klistfuɛ sɔ’m be bu ɔ. Sanngɛ, ɔ fata kɛ be kaci mlɔnmlɔn naan be bu Klist i akunndan’n wie. (1 Korɛntfuɛ Mun 2:16; Filipfuɛ Mun 2:5) I sɔ yɛ ɔ fata kɛ cɛn kwlaa be yo ɔ. I sɔ yɛ ɔ fata kɛ andɛ Klistfuɛ kpa’m be yo wie ɔ.
6. ?Kɛ e nian ndɛ nga Pɔlu kɛnnin i Rɔmfuɛ Mun 12:1, 2 nun’n, ngue ti yɛ sɛ sran yo e sa’n, e su yomɛn i wie ɔ?
6 ?Wafa sɛ yɛ ndɛ nga Pɔlu yiyi nun Rɔmfuɛ Mun 12:1, 2 nun’n, ɔ kwla yo e ye ɔ? Kɛ Rɔmu lɔ Klistfuɛ nga be kpali be sieli be ngunmin’n be sa’n, andɛ kusu ye nin aunnvuɛ dan mɔ Ɲanmiɛn te si e cɛn kwlaa’n ti’n, ɔ fata kɛ e lɛ i ase. I sɔ’n ti’n, sɛ e si ye’n, maan e fa e wunmiɛn nin e wla’n kwlaa gua Ɲanmiɛn su, e su i. Nán e bu akunndan nga sran’m be bu’n wie. Sanngɛ Klist i akunndan’n wie yɛ e bu ɔ. I sɔ’n i ɲin fíte wafa nga e nin e wiengu mun e tran’n nun. Yɛle kɛ, ɔ́ fíte wafa nga e nin e niaan Klistfuɛ mun nin be nga be ti Klistfuɛ’n e tran’n nun. (Galasifuɛ Mun 5:25) I wie yɛle kɛ Klist i akunndan mɔ e bu’n ti’n, sɛ sran yo e sa’n, e su yomɛn i wie.—1 Piɛr 2:21-23.
“Nán amun sran klolɛ’n ɔ yo amun nuan bui su”
7. ?Sran klolɛ’n i wafa benin yɛ Rɔmfuɛ Mun 12 kɛn i ndɛ ɔ?
7 Sɛ sran yo e sa’n, nán e yo i wie. Afin, ɔ ti kpa yɛ ɔ kle kɛ e klo sran. Siɛn’n, maan e nian wafa nga Pɔlu kle kɛ sran klolɛ’n kwla su e bo naan y’a yo sɔ’n. Rɔmfuɛ Mun be fluwa’n nun’n, Pɔlu kan Ɲanmiɛn nin Klist be sran klolɛ’n i ndɛ kpɛ sunman. Sran “klolɛ” sɔ’n, Glɛki aniɛn’n nun be se kɛ a·gaʹpe. (Rɔmfuɛ Mun 5:5, 8; 8:35, 39) Rɔmfuɛ Mun ndɛ tre 12 nun’n, Pɔlu fa a·gaʹpe sɔ’n kan sran klolɛ wafa uflɛ ndɛ. Yɛle wafa nga klɔ sran kun klo i wiengu’n. Pɔlu kleli kɛ like nga Ɲanmiɛn wawɛ’n maan e kwlɛ i yo’n, be ti fanunfanun. Kɛ ɔ wieli i sɔ’n kan’n, ɔ kleli like ng’ɔ fata kɛ Klistfuɛ’m be kwlaa be yo’n, i ndɛ. Ɔ seli kɛ: “Nán amun sran klolɛ’n ɔ yo amun nuan bui su.” (Rɔmfuɛ Mun 12:4-9) Be wiengu klolɛ’n ti Klistfuɛ kpa’m be nzɔliɛ. (Mark 12:28-31) Ɔ maan, Pɔlu wla e fanngan kɛ nán maan e wiengu klolɛ’n yo e nuan bui su.
8. ?Wafa sɛ yɛ e kwla yo naan y’a kloman sran e nuan bui su ɔ?
8 Asa ekun’n, wafa nga e kwla kle kɛ e kloman sran e nuan bui su’n, Pɔlu kle e. Ɔ se kɛ: “An kpɔ sa tɛ’n, nán an nian, sanngɛ like nga be ti kpa’n, maan be lo amun.” (Rɔmfuɛ Mun 12:9) Kɛ be se kɛ be ‘kpɔ like naan be nianman’n,’ i bo’n ti kploun. Nán sa tɛ’n i sin sa’n ngunmin yɛ ɔ fata kɛ e ɲin ci ɔ. Sanngɛ ɔ fata kɛ sa tɛ bɔbɔ’n, e kpɔ i wie. (Jue Mun 97:10) Kusu kɛ be se kɛ like kun “lo” sran’n, i bo’n ti kploun wie. Kɛ Rɔmfuɛ Mun 12:9 se kɛ maan like “lo amun’n,” i bo kpa Glɛki aniɛn nun’n, yɛle kɛ e fa e wun “mantan” like’n. Ɔ maan, Klistfuɛ ng’ɔ kloman sran i nuan bui su’n, sɛ é kwlá sé’n, ɔ fɛ i wun mantan sa kpa’n, i like liɛ ng’ɔ klo i’n, yɛle sa kpa yolɛ’n. Sa kpa yolɛ’n ti i nzuɛn.
9. ?Afɔtuɛ benin yɛ Pɔlu man flan nun ɔn?
9 Wafa nga e kwla yi e sran klolɛ’n i nglo’n, Pɔlu kɛn i ndɛ kpɛ sunman. I waan: ‘Be nga be kle amun yalɛ’n, an ra amun nuan kɛ Ɲanmiɛn yo be kpa. Nán an wua be amuin, sanngɛ an se Ɲanmiɛn kɛ ɔ yo be kpa.’ “Sɛ sran yo amun tɛ’n, nán an yo i wie.” “N sran kpa mun, nán amun se kɛ amun bɔbɔ amún tú amun klunngbɔ’n.” “Nán maan be nga be yo amun tɛ’n be kwla amun, sanngɛ an yo be kpa lele an kwla be.” (Rɔmfuɛ Mun 12:14, 17-19, 21) Ndɛ sɔ mɔ Pɔlu kannin be lɛ’n, be kle e wafa ng’ɔ fata kɛ e yo be nga be timan Klistfuɛ nin be nga be tanndan e ɲrun’n i weiin.
‘Be nga be kle amun yalɛ’n, an ra amun nuan kɛ Ɲanmiɛn yo be kpa’
10. ?Wafa sɛ yɛ e kwla ra e kpɔfuɛ’m be nguan ɔn?
10 Pɔlu seli kɛ: ‘Be nga be kle amun yalɛ’n, an ra amun nuan kɛ Ɲanmiɛn yo be kpa.’ ?Sanngɛ, wafa sɛ yɛ e kwla nanti Pɔlu i ndɛ sɔ’n su ɔ? (Rɔmfuɛ Mun 12:14) Zezi seli i sɔnnzɔnfuɛ’m be kɛ: ‘An klo amun kpɔfuɛ mun, yɛ be nga be yo amun tɛtɛ mɔ be kle amun yalɛ’n, an srɛ Ɲanmiɛn kɛ ɔ yo be kpa.’ (Matie 5:44; Lik 6:27, 28) Ɔ maan, e srɛ Ɲanmiɛn kɛ ɔ ra be nguan. E jran su kpa naan sɛ be siman nun ti yɛ be kpɔ e’n, maan Ɲanmiɛn kaci be awlɛn naan nanwlɛ’n kan be. (2 Korɛntfuɛ Mun 4:4) I yo, ɔ kwla yo e kɛnsrɛn kɛ e srɛ Ɲanmiɛn man be nga be kpɔ e’n. Sanngɛ, kɛ e akunndan’n káci kɛ Klist liɛ’n sa’n, nn é kló be nga be kpɔ e’n. (Lik 23:34) ?Sɛ e klo e kpɔfuɛ mun sɔ’n, i bo’n gúa sɛ?
11. (a) ?Afɔtuɛ benin yɛ Etiɛni i su ndɛ’n man e ɔ? (b) ?Kɛ Pɔlu liɛ’n sa’n, wafa sɛ yɛ e ɲrɛnnɛn klefuɛ kun kwla kaci ɔ?
11 Be nga be srɛli Ɲanmiɛn mannin be kpɔfuɛ mun’n, be nun kun yɛle Etiɛni. I Ɲanmiɛn srɛlɛ’n kusu w’a yoman ngbɛn. Kɛ be dili Pantekɔtu afuɛ nga be flɛ i 33 nun’n, w’a cɛman yɛ Klistfuɛ’m be kpɔfuɛ’m be trali Etiɛni ɔ. Be cuɛnnin i ɔli Zerizalɛmu klɔ’n i sin lɔ be ko totoli i yɛbuɛ. Sanngɛ kwlaa naan w’a wu’n, ɔ kpan seli Ɲanmiɛn kɛ: “Nannan, sa nga be yo min yɛ’n, nán fa sie ɔ klun.” (Sa Nga Be Yoli’n 7:58–8:1) Cɛn sɔ nun’n, be nga be o lɛ mɔ Etiɛni srɛli mannin be’n, be nun kun yɛle Sɔlu. I sa o Etiɛni i kunlɛ nun wie. Sanngɛ i sin’n, kɛ Zezi wuli mɔ Ɲanmiɛn cɛnnin i’n, ɔ fiteli Sɔlu i ɲrun. Sɔlu sɔ mɔ laa ɔ kleli Klistfuɛ’m be ɲrɛnnɛn’n, ɔ wa kacili Klist i sɔnnzɔnfuɛ. I yɛ be wa flɛli i kasiɛn’n nun kɛ Pɔlu’n niɔn. I yɛ ɔ klɛli fluwa ko mannin Rɔmfuɛ mun ɔn. (Sa Nga Be Yoli’n 26:12-18) Sa ng’ɔ juli Pɔlu su’n kle kɛ, Zoova yacili ɲrɛnnɛn kwlaa nga Pɔlu kleli asɔnun’n cɛli i. (1 Timote 1:12-16) Ɔ maan, sɛ Pɔlu wlali Klistfuɛ’m be fanngan kɛ: ‘Be nga be kle amun yalɛ’n, an ra amun nuan kɛ Ɲanmiɛn yo be kpa’n,’ ɔ boman e nuan. Afin i bɔbɔ si kɛ be nga be kle e ɲrɛnnɛn’n, be kwla kaci Ɲanmiɛn i sufuɛ. Afin, i bɔbɔ kleli sran’m be ɲrɛnnɛn wie laa. Andɛ kusu’n, be nga be kle e ɲrɛnnɛn’n, be wie be kacili Zoova i sufuɛ. Afin, be wunnin kɛ be nin sran tran fɔun.
‘Nán amun nin sran kan ndɛ’
12. ?Wafa sɛ yɛ afɔtuɛ nga Pɔlu mɛnnin i ndɛ mma 9 nin 17, be kɔ likawlɛ ɔ?
12 Siɛn’n, wafa ng’ɔ fata kɛ e nin be nga be ti Klistfuɛ annzɛ be timan Klistfuɛ’n e tran’n, Pɔlu kɛn i ndɛ. I waan: “Sɛ sran yo amun tɛ’n, nán an yo i wie.” Kɛ mɔ Pɔlu dun mmua kannin kɛ ‘an kpɔ sa tɛ’n, nán an nian’n,’ i sɔ’n ti yɛ ɔ kannin ndɛ kasiɛn nga ukali su ɔ. Afin, sran ng’ɔ kpɔ sa tɛ’n m’ɔ nianman’n, sɛ sran yo i tɛ’n, ɔ su yomɛn i wie. Sran nga w’a yoman sɔ’n, nn ɔ ‘klo sran i nuan bui su.’ I sin’n, Pɔlu kan kɛ: “Sa kwlaa nga amun yo’n, an yo maan sran’m be kwlaa be wun kɛ an ti kpa.” (Rɔmfuɛ Mun 12:9, 17) ?Wafa sɛ yɛ e kwla nanti ndɛ nga’m be su ɔ?
13. ?Wafa sɛ yɛ “sran’m be kwlaa” be ɲrun’n, e kwla nanti ɔ?
13 Kwlaa naan Pɔlu w’a klɛ Rɔmufuɛ’m be fluwa’n, ɔ dun mmua klɛli Korɛnti lɔ Klistfuɛ’m be fluwa. I fluwa sɔ nun’n, ɔ kannin kɛ akoto’m be wunnin ɲrɛnnɛn. Ɔ seli kɛ: ‘Y’a kaci finfinfuɛ sran nin anzi’m be ɲrun kɛ sran mɔ be su wa kun i sa. Be kpɛ e nzowa ɔ e yi manman be nga be kpɛ e nzowa sɔ’n, muae yɛ e bo man be ɔ. Be kle e yalɛ ɔ ɔ sɔn e nun. Be saci e dunman ɔn e tɛman su.’ (1 Korɛntfuɛ Mun 4:9-13) Andɛ kusu’n, sran’m be ɲin o Klistfuɛ’m be su wie. Sanngɛ sɛ be wun kɛ be kle e ɲrɛnnɛn naan e tɛman su’n, i sɔ’n kwla yo maan jasin fɛ’n nga e bo kle be’n, bé fá su.—1 Piɛr 2:12.
14. ?Wafa sɛ yɛ é yó naan e nin sran y’a kanman ndɛ ɔ?
14 ?Wafa sɛ yɛ é yó naan e nin sran y’a kanman ndɛ ɔ? Yɛle kɛ e yo like kwlaa nga e kwla yo’n. I sɔ yɛ akoto Pɔlu seli i niaan Klistfuɛ mun kɛ be yo ɔ. Ɔ seli kɛ: ‘Like kwlaa nga amun kwla yo mɔ amun nin sran su kanman ndɛ’n, amun yo.’ (Rɔmfuɛ Mun 12:18) Kɛ be se kɛ “like kwlaa nga amun kwla yo’n” i sɔ’n kle kɛ e kwla fa ajalɛ kɛ e nin sran e su kanman ndɛ. Sanngɛ, nán cɛn kwlaa yɛ i sɔ’n yó ye ɔ. I wie yɛle kɛ, kannzɛ e yo like kwlaa nga e kwla yo naan e nin e wiengu e nuan w’a sɛ’n, sanngɛ e su fɔnman Ɲanmiɛn mmla’n i sɔ’n ti. (Matie 10:34-36; Ebre Mun 12:14) Ɔ maan, like kwlaa nga e kwla yo naan e nin “sran’m be kwlaa” y’a kanman ndɛ naan e kunngba’n, y’a fɔnman Ɲanmiɛn mmla’n, yɛ é yó ɔ.
‘Nán amun se kɛ amun bɔbɔ amún tú amun klunngbɔ’
15. ?Ngue ndɛ yɛ Rɔmfuɛ Mun 12:19 kan mɔ i ti yɛ ɔ fataman kɛ e bɔbɔ e tu e klunngbɔ ɔ?
15 Like nga ti yɛ sɛ sran yo e like’n, ɔ fataman kɛ e yo i wie’n, Pɔlu mɛn i wun ajalɛ uflɛ. I waan ɔ ti be wun ase kanlɛ. Ɔ seli kɛ: ‘N sran kpa mun, nán amun se kɛ amun bɔbɔ amún tú amun klunngbɔ’n, sanngɛ an yaci man Ɲanmiɛn, afin be klɛli i kɛ: “E Min’n se kɛ: ‘Min yɛ n tu klunngbɔ’n niɔn, min yɛ ń túa be kalɛ ɔ.’”’ (Rɔmfuɛ Mun 12:19) Klistfuɛ ng’ɔ kunndɛ kɛ ɔ́ tú i klunngbɔ’n, ɔ ti wun tufuɛ. Afin, like nga Ɲanmiɛn bɔbɔ waan ɔ́ wá yó’n, yɛ i waan ɔ́ yó ɔ. (Matie 7:1) Zoova seli kɛ ‘min yɛ ń túa be kalɛ’n.’ Ɔ maan, sran ng’ɔ tu i klunngbɔ’n, nn ɔ lafiman ndɛ sɔ’n su. Sanngɛ Klistfuɛ kpa’m be liɛ’n, be lafi su kɛ ‘be nga Zoova kpali be’n, ɔ́ jrán be sin dí be ndɛ’n.’ (Lik 18:7, 8; 2 Tɛsalonikfuɛ Mun 1:6-8) Ɔ maan, be kan be wun ase, be yaci be ndɛ’n Zoova sa nun.—Zeremi 30:23, 24; Rɔmfuɛ Mun 1:18.
16, 17. (a) ?Kɛ be se kɛ ‘ɔ ti kɛ sɛnmlɛn ɲanɲanɲan yɛ w’a tiɛn i nuan i ti su sa’n,’ i bo’n yɛle benin? (b) ?Amun si sran kun mɔ e ayeliɛ kpa’n ti’n, ɔ kacili Klistfuɛ? An kɛn i ndɛ.
16 Sɛ sran yo e like naan e tu e klunngbɔ’n, ɔ cɛman naan sran’n w’a kete. Sanngɛ sɛ e yo sran’n i kpa’n, ɔ kwla lo. ?Ngue ti yɛ e se sɔ ɔ? Maan e nian ndɛ nga Pɔlu kannin’n. I waan: ‘Sɛ awe kun ɔ kpɔfuɛ’n, mɛn i like maan ɔ di. Sɛ nzuewe kun i’n, mɛn i nzue maan ɔ nɔn. Afin sɛ a yo sɔ’n, ɔ ti kɛ sɛnmlɛn ɲanɲanɲan yɛ w’a tiɛn i nuan i ti su sa.’ (Rɔmfuɛ Mun 12:20; Nyanndra Mun 25:21, 22) ?Ndɛ sɔ’n i bo’n yɛle benin?
17 Wafa nga laa be fa sɛnmlɛn be klo like kɛ blalɛ sa’n, i su sunnzun ase yɛ Pɔlu fali ɔ. Yɛle kɛ be fɛ i sɔ like’n sie i sɛnmlɛn su, kpɛkun be fa sɛnmlɛn’n wie gua su naan ɔ lo dan. Kɛ ɔ ko yo sɔ’n, nn w’a klo. Ɔ maan, i nun fiɛn’n sin bue kun, kpɛkun be fɛ i kpafuɛ’n. I kunngba’n yɛ ɔ fata kɛ e yo e kpɔfuɛ mun ɔn. Yɛle kɛ sɛ e yo be kpa’n, sɛ é kwlá sé’n, be klunwi’n “kló.” Ɔ maan, be nzuɛn kpa’n i ɲin fíte. (2 Famiɛn Mun 6:14-23) Sran sunman nga be kacili Klistfuɛ’n, wie liɛ’n, ayeliɛ klanman nga Zoova i Lalofuɛ’m be yili i nglo be lika’n i ti ɔ.
Like nga ti yɛ e tuman e klunngbɔ’n
18. ?Ngue ti yɛ sɛ e tuman e klunngbɔ’n, i sɔ’n ti kpa, ɔ kle kɛ e klo sran naan e ti wun ase kanfuɛ ɔ?
18 Kɛ e fa e ɲin sie i Rɔmfuɛ Mun ndɛ tre 12 su’n, e wun ajalɛ kpanngban nga ti yɛ ‘sɛ sran yo e tɛ’n, e yomɛn i wie’n,’ i wlɛ. I klikli nun’n, yɛle kɛ sɛ sran yo e tɛ naan e yomɛn i wie’n, ɔ ti like kpa m’ɔ fata kɛ e yo ɔ. Afin, kɛ e bu ye dan nga Ɲanmiɛn sili e’n i akunndan’n, ɔ nin i fata kɛ e klɛn e wun e mɛn i. Yɛle kɛ, e nanti i mmla’m be su. I mmla sɔ’n kun yɛle kɛ e klo e kpɔfuɛ mun. I nɲɔn su’n, sɛ sran yo e tɛ naan e yomɛn i wie’n, ɔ kle kɛ e klo sran. Sɛ e yaci sran’m be wun sa cɛ be naan e nin be kanman ndɛ’n, e lafi su kɛ i sɔ’n kwla uka be nga wie liɛ be kpɔ e’n naan b’a kaci Zoova i sufuɛ. I nsan su’n, sran nga be yo i tɛ m’ɔ yoman wie’n, ɔ ti wun ase kanfuɛ. Sran nga i bɔbɔ tu i klunngbɔ’n, ɔ tu i wun. Afin Zoova seli kɛ: ‘Min yɛ n tu klunngbɔ’n niɔn.’ Ɲanmiɛn ndɛ’n kusu wla e su nun kpa kɛ: ‘Tutre’n i sinma yɛle ɲannzuɛn. Akunndan’n kusu ti wun ase kanfuɛ’m be liɛ.’ (Nyanndra Mun 11:2) Sɛ e yaci Zoova lɛ naan ɔ di sa nga be ti tɛ’n, é klé kɛ e ti wun ase kanfuɛ.
19. ?Kosan benin yɛ é wá tɛ́ be su like suanlɛ ng’ɔ́ bá lɛ’n nun ɔn?
19 Ndɛ nga Pɔlu fa yiɛ i ndɛ’n i nuan’n yɛ. I waan: ‘Nán maan be nga be yo amun tɛ’n be kwla amun, sanngɛ an yo be kpa lele an kwla be.’ (Rɔmfuɛ Mun 12:21) ?Sran tɛtɛ benin yɛ andɛ ɔ fata kɛ e jran be ɲrun kekle ɔ? ?Wafa sɛ yɛ e kwla jran be ɲrun kekle lele e kwla be ɔ? Like suanlɛ ng’ɔ́ bá lɛ’n wá tɛ́ kosan sɔ mun nin wie mun ekun be su.
?Amun kwla yiyi nun?
• ?Ngue ndɛ yɛ Rɔmfuɛ Mun 12 kan flan nun ɔn?
• ?Ngue yɛ maan e su tuman e klunngbɔ ɔ?
• ?‘Sɛ sran yo e tɛ naan y’a yomɛn i wie’n,’ mmlusuɛ benin yɛ e bɔbɔ nin be nga mun é ɲɛ́n i ɔ?
[Kuku, bue 24]
Rɔmfuɛ Mun 12 kan Klistfuɛ’n
• nin Zoova
• nin i niaan Klistfuɛ’n
• nin be nga be timan Klistfuɛ’n, be afiɛn ndɛ
[Foto, bue 25]
?Afɔtuɛ benin yɛ Zezi i sɔnnzɔnfuɛ Etiɛni i su ndɛ’n man e ɔ?