CƐNLƐ mɔ be cɛnnin Zezi’n, ɔ timan sa ngbɛn wie m’ɔ juli m’ɔ timan e liɛ wie andɛ ɔ. Akoto Pɔlu kleli like nga e ɲɛn i Zezi i cɛnlɛ’n nun’n. Ɔ seli kɛ: “Nyanmiɛn cɛnnin Krist sakpa, ɔ maan ɔ ti be nga be wu bɔ bé cɛ́n’n be nun klikli. Kɛ bɔ sran kun ti yɛ wie’n bali’n, sran kun kusu ti yɛ sɛ sran wu-ɔ ɔ́ cɛ́n-ɔn. [...] Adam ti sran’m be kwlaa be wu’n, i kunngba’n, Krist ti Nyanmiɛn maan sran’m be kwlaa bé nyán nguan ekun.”​—1 Korɛntfuɛ Mun 15:20-22.

Ndɛ nga Pɔlu kɛnnin i kasiɛn’n, ɔ kle like nga Zezi i cɛnlɛ’n mɛnnin i wun atin’n. Ɔ seli kɛ: “Kɛ bɔ sran kun ti yɛ wie’n bali’n, sran kun kusu ti yɛ sɛ sran wu-ɔ ɔ́ cɛ́n-ɔn.” Kɛ mɔ Adam ti’n sa tɛ yolɛ nin fɔ’n be trannin e kwlaa e nun ti’n, e kwlaa e wu. Sanngɛ Zezi mɔ fɔ nunmɛn i nun’n, ɔ fɛli i wun kpɔli sran’m be kwlaa be ti. I ti’n, sran’m bé cɛ́n yɛ bé ɲán be ti sa tɛ nin wie’n mɔ be kacili be kanga’n be sa nun. Pɔlu kɛnnin i sɔ liɛ’n i ndɛ klanman kpa Rɔmfuɛ Mun 6:23 nun. Ɔ seli kɛ: “Sa tɛ’n i akatua’n yɛlɛ wie, sanngɛ like nga Nyanmiɛn fa cɛ ye’n yɛlɛ anannganman nguan’n bɔ e nyɛn i e Min Krist-Jésus [...] ti’n.”