Wie’n m’ɔ ti e kpɔfuɛ kasiɛnfuɛ’n, ɔ su tranman lɛ kun
“Ɔ́ tíɛ i kpɔfuɛ’m be kwlaa be su, be kwlaa be nun kasiɛnfuɛ’n yɛlɛ wie’n.”—1 KOR. 15:25, 26.
?WAFA SƐ YƐ AMÚN TƐ́ SU Ɔ?
?Ngue yɛ klolɛ su’n, Zoova seli Adam kɛ nán ɔ yo ɔ?
?Ngue ti yɛ wie’n bali mɛn’n nun ɔn?
?Blɛ benin nun yɛ sran’m be ‘kpɔfuɛ’m be kwlaa be nun kasiɛnfuɛ’n mɔ yɛlɛ wie’n,’ ɔ su tranman lɛ kun ɔn?
1, 2. (a) ?Wafa sɛ yɛ Adam nin Ɛvu be blɛ su mɛn’n i nun tranlɛ’n, ɔ yoli ɔ? (b) ?Kosan benin mun yɛ like suanlɛ nga wá tɛ́ be su ɔ?
KƐ ƝANMIƐN yí Adam nin Ɛvu’n, ɔ yili be kpa, fɔ w’a tranman be nun. Kpɛkun, Ɲanmiɛn fa be sieli asiɛ’n i lika klanman kun su. Kɛ ɔ́ yó sɔ’n, nn Adam nin Ɛvu be leman kpɔfuɛ fi. Be nin be Si Ɲanmiɛn be tran klanman cɛ, yɛ be o lɛ fɔuun. (Bob. 2:7-9; Lik 3:38) Ɲanmiɛn mannin be junman cinnjin kpa kun kɛ be di. (An kanngan Bo Bolɛ 1:28 nun.) ?Blɛ nɲɛ yɛ bé fá dí junman sɔ’n niɔn? Ɲanmiɛn seli be kɛ: “An yi asiɛ’n, an sie i.” Adam nin Ɛvu be kwla wie junman sɔ’n i di blɛ wie nun. Sanngɛ Ɲanmiɛn seli be ekun kɛ: “Nnɛn nga be wlan asiɛ’n su’n, amun sie be kwlakwla.” I sɔ junman liɛ’n, Adam nin Ɛvu bé wá dí i titi. Yɛ be su wiemɛn i di le. I sɔ’n ti’n, ɔ fata kɛ be tran nguan nun titi naan b’a kwla di.
2 Andɛ mɛn’n timan kɛ Adam nin Ɛvu be blɛ su’n sa. Ninnge kpanngban b’a kaci e kpɔfuɛ. Be nun tɛ kpafuɛ’n yɛle wie’n. Ɔ maan e klun jɔman. ?Ngue ti yɛ wie’n bali mɛn’n nun ɔn? ?Ngue yɛ Ɲanmiɛn wá yó naan e kpɔfuɛ sɔ’n w’a tranman lɛ kun ɔn? Like suanlɛ nga nun’n, é wá wún wafa nga Biblu’n tɛ kosan sɔ’m be su’n.
ƝANMIƐN KLELI BE LIKE NG’Ɔ FATAMAN KƐ BE YO’N
3, 4. (a) ?Ndɛ benin yɛ Ɲanmiɛn kan kleli Adam nin Ɛvu ɔ? (b) ?Ngue ti yɛ ɔ ti cinnjin kɛ be nanti Ɲanmiɛn i nuan ndɛ sɔ’n su ɔ?
3 Ɲanmiɛn yili Adam nin Ɛvu kɛ be ka nguan nun titi. Kɛ ɔ ko yo naan b’a ka nguan nun sɔ’n, ɔ fata kɛ be di aliɛ, be nɔn nzue, be lo wunmiɛn, yɛ be la be lafi. Sanngɛ like cinnjin kpafuɛ ng’ɔ fata kɛ be yo’n, yɛle kɛ be nanti ndɛ nga be Yifuɛ Ɲanmiɛn kan kleli be’n su. (Mml. 8:3) Sɛ be yo sɔ’n, be liɛ yó ye titi. Like ng’ɔ fataman kɛ Adam yo’n, Ɲanmiɛn kan kleli i lele naan w’a yi Ɛvu. Ɲanmiɛn Ndɛ’n waan: “Anannganman Nyanmiɛn wlali sran’n i su nun kɛ: ‘Fie’n nun waka mun yɛ be o lɛ-ɔ, be mma kwlaa nga ɔ waan á dí’n, di. Sanngɛ sa kpa’n nin sa tɛ’n be silɛ waka’n i mma liɛ’n, nán di i li. Sɛ a di’n, saan wulɛ cɛ yɛ á wú-ɔ.’”—Bob. 2:16, 17.
4 “Sa kpa’n nin sa tɛ’n be silɛ waka’n” m’ɔ o fie’n nun’n, ɔ ti like nzɔliɛ . Ɔ kle kɛ Ɲanmiɛn yɛ ɔ le atin se kɛ sa kun ti kpa annzɛ ɔ ti tɛ ɔ. Ɲanmiɛn yili Adam kɛ i bɔbɔ sa cɛ. Adam bu akunndan, yɛ ɔ si sa kpa’n nin sa tɛ’n be ngbaciɛ’n. Kɛ ɔ nin Ɛvu be wun waka’n m’ɔ o fie’n nun’n, be wla kpɛn su kɛ Ɲanmiɛn yɛ ɔ fata kɛ ɔ sie be titi ɔ. Sɛ be di waka sɔ’n i mma liɛ’n, nn b’a yo ɲin kekle Ɲanmiɛn su. Yɛ i bo guá tɛ mán be bɔbɔ nin be mma mun.
LIKE NGA TI YƐ WIE’N BALI MƐN’N NUN’N
5. ?Ngue ti yɛ Adam nin Ɛvu be dili waka’n i mma’n niɔn?
5 Kɛ Ɲanmiɛn yili Ɛvu, Adam w’a fiaman ndɛ nga Ɲanmiɛn kan kleli i’n su. Ɔ kɛnnin i kwlaa kleli Ɛvu. Ɛvu kusu i wla w’a fiman ndɛ sɔ’n su. Afin kɛ Satan usɛli i waka’n i su kosan’n, ɔ tɛli i su kɛ nga Adam kan kleli i’n sa cɛ. (Bob. 3:1-3) Satan kunndɛli kɛ be su i bɔbɔ. I sɔ akunndan m’ɔ buli’n, w’a wlɛmɛn i ase. Ɔ maan, ɔ sinnin wuo kun i lika, ɔ nin bla’n be ijɔli. (An nian Zak 1:14, 15 nun wie.) Ɔ seli Ɛvu kɛ sɛ i ɲin w’a yiman Ɲanmiɛn’n, ɔ su wuman. Sanngɛ, Ɛvu yó kɛ Ɲanmiɛn bɔbɔ sa. I lɛ’n nun’n, Satan su se kɛ Ɲanmiɛn ti atofuɛ. (Bob. 3:4, 5) Ɛvu buli Satan i nanwlɛfuɛ. Ɔ maan, ɔ dili waka’n i mma’n. Kpɛkun, ɔ fa wie mannin Adam, yɛ be nɲɔn’n be dili ɔ. (Bob. 3:6, 17) Satan lakali Ɛvu. (An kanngan 1 Timote 2:14 nun.) Adam kusu’n, ɔ si kɛ Ɛvu w’a yoman like kpa. Sanngɛ, i “yi i aniɛn liɛ’n yɛ [ɔ] tili” ɔ. Satan liɛ’n, ɔ si kɛ sɛ Adam nin Ɛvu be di waka’n i mma’n, i bo gúa tɛ kpa mán be. Sanngɛ be ndɛ w’a lomɛn i. Kɛ ɔ́ yó naan w’a ɲan Adam nin Ɛvu ti’n, ɔ yoli i wun kɛ ɔ ti be sran kpa sa.
6, 7. ?Ngue yɛ Zoova dun mmua yoli naan w’a bu Adam nin Ɛvu be fɔ ɔ?
6 Adam nin Ɛvu be buli be ngunmin be wun akunndan be yoli ɲin kekle Zoova su. Sanngɛ nn Zoova yɛ ɔ mannin be ninnge kpakpa’n kwlakwla ɔ. Kɛ Satan nin Ɛvu bé íjɔ mɔ i sin’n, Ɛvu nin Adam bé dí waka’n i mma’n, Zoova wunnin i kwlaa nun. (1 Nyo. 28:9; an kanngan Nyanndra Mun 15:3 nun.) Sanngɛ, ɔ yacili be nsan’n be lɛ naan ɔ́ nían sɛ be klo i sakpa o. Nanwlɛ, like nga be yoli’n w’a yoman Ɲanmiɛn i fɛ kaan sa. (An nian Bo Bolɛ 6:6 nun wie.) I sɔ’n ti’n, ɔ dili be jɔlɛ.
7 Adam si waka’n i mma’n i su ndɛ nga Ɲanmiɛn kan kleli i’n. Ɲanmiɛn seli i kɛ: “Sɛ a di’n, saan wulɛ cɛ yɛ á wú-ɔ.” Kɛ Adam dili waka’n i mma’n atrɛkpa’n, ɔ buli i kɛ ɔ́ wú cɛn kunngba sɔ’n nun. Sanngɛ, kɛ “nnɔsua aunngban’n fíta’n,” Zoova wa niannin be osu. (Bob. 3:8) Zoova ti Jɔlɛ difuɛ kpa. I sɔ’n ti’n, ɔ dun mmua tieli Adam nin Ɛvu be nuan ndɛ. (Bob. 3:9-13) I sin yɛ ɔ buli be fɔ ɔ. (Bob. 3:14-19) Kɛ ɔ fin i lɛ’n, yɛ sa tɛ’n nin wie’n be bali mɛn’n nun ɔn. Sɛ Adam nin Ɛvu be ka lɛ be wuli’n, like nga Ɲanmiɛn sunnzunnin’n ɔ su kwlá kpɛnman su. (Eza. 55:11) I sɔ’n ti, ɔ yacili Adam nin Ɛvu be lɛ be wuli ba mun. Ba sɔ’m be liɛ’n, cɛn wie lele bé kwlá fíte nun. Sanngɛ Ɲanmiɛn liɛ’n, “cɛn” kunngba nga Adam nin Ɛvu be yoli sa tɛ’n, wulɛ cɛ, yɛ be wuli ɔ. Afin, afuɛ akpi’n ti Ɲanmiɛn i ɲrun cɛn ba kun. Yɛ Adam nin Ɛvu b’a diman afuɛ akpi.—2 Piɛ. 3:8.
8, 9. ?Adam i sa tɛ’n i su sa benin yɛ i mma’m be wun i ɔ?
8 Sa tɛ nga Adam nin Ɛvu be yoli’n, be mma’m be wun i su afɛ’n wie. ?Ngue ti ɔ? Rɔmfuɛ Mun 5:12 nun’n, Pɔlu tɛ su kɛ: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” Pɔlu se ekun kɛ: “Sran kunngba i nyin kekle’n ti ɔ maan sran kpanngban be kacili sa tɛ yofuɛ.” (Rɔm. 5:19) Sran ng’ɔ dun mmua wuli’n, yɛle Abɛli m’ɔ ti sran kpa’n. (Bob. 4:8) I sin’n, Adam i mma nin i anunman onga’m be yoli oke yɛ be wuli. E siman wafa nga sa tɛ’n nin wie’n be fin Adam nun mɔ be wluli i mma nin i anunman’n be nun lele fa ju andɛ’n. Like nga e si i’n yɛle kɛ Adam ti’n, sran’m be ti sa tɛ’n nin wie’n be kanga. Ɔ maan, be yo sa tɛ yɛ be wu.
9 Like nga Biblu’n fa sa tɛ’n nin wie’n sunnzun i’n, e wun i wlɛ weiin. Ɔ fa sunnzun “sɛ tannin ng’ɔ kata sran’m be kwlaa be su’n.” Yɛ ɔ fa sunnzun ‘awlabɔɛ kondro ng’ɔ kata nvlenvle be kwlaa be su’n.’ (Eza. 25:7) Sɛ tannin’n nin awlabɔɛ kondro’n mɔ be ti wie’n i nzɔliɛ’n, ɔ kata sran’m be kwlaa be su. E lemɛn i yowlɛ. I sɔ’n ti yɛ Ɲanmiɛn Ndɛ’n se kɛ “Adam ti sran’m be kwlaa be wu’n” niɔn. (1 Kor. 15:22) Pɔlu usali kɛ: “?Wan yɛ ɔ́ tú min nzuɛn nga b’ɔ maan ń wú’n, i su-ɔ?” ?Naan sran fi kwlá deman Pɔlu?a—Rɔm. 7:24.
SA TƐ NIN WIE’N BE SU TRANMAN LƐ KUN
10. (a) ?Biblu’n i nun ndɛ benin yɛ ɔ kle kɛ Zoova wá yí wie’n mɔ Adam fa yili i sran’m be su’n niɔn? (b) ?Zoova nin Zezi be su like benin yɛ ndɛ sɔ’n kle e ɔ?
10 Zoova yɛ ɔ kwla de Pɔlu i nzuɛn nga m’ɔ maan ɔ́ wú’n, i su ɔ. Ɲanmiɛn nuan ijɔfuɛ Ezai seli kɛ: “Ɔ́ núnnún wie’n mlɔnmlɔnmlɔn. Anannganman ɔ́ núnnún sran’m be kwlaa be ɲinmuɛn’n.” (Eza. 25:8) Kɛ siɛ kun wun kɛ i wa’n sro like wie naan i sɔ’n ti, ɔ su sun’n, ɔ fuan like sɔ’n. Kpɛkun, ɔ nunnun i wa’n i ɲinmuɛn’n. Like kunngba’n yɛ Ɲanmiɛn wá yó ɔ. Ɔ́ wá yí wie’n mɔ Adam fa yili i sran’m be su’n. Kɛ Zoova wá dí i sɔ junman’n, Zezi úkɛ i. 1 Korɛntfuɛ Mun 15:22 se kɛ: “Kɛ Adam ti sran’m be kwlaa be wu’n, i kunngba’n, Krist ti Nyanmiɛn maan sran’m be kwlaa bé nyán nguan ekun.” Pɔlu usali kɛ: “?Wan yɛ ɔ́ tú min nzuɛn nga b’ɔ maan ń wú’n, i su-ɔ?” I bɔbɔ tɛli su kɛ: “Nyanmiɛn kwla o! Afin i yɛ maan e Min Jésus-Krist deli ye-ɔ.” (Rɔm. 7:25) I sɔ’n kle weiin kɛ, kannzɛ Adam nin Ɛvu be yoli sa tɛ’n, sanngɛ Zoova w’a yaciman sran’m be klolɛ. Zezi kusu m’ɔ nin i Si yɛ be yili Adam nin Ɛvu, ɔ klo sran mun kpa wie. Yɛ ɔ yaciman be klolɛ. (Nya. 8:30, 31) ?Ngue yɛ Ɲanmiɛn wá yó naan sa tɛ’n nin wie’n b’a tranman lɛ kun ɔn?
11. ?Ngue yɛ Zoova yoli naan sran’m b’a fite nun ɔn?
11 Kɛ nga Zoova fa kannin’n sa’n, kɛ Adam yoli sa tɛ’n ɔ wuli. I ti yɛ sran’m be kwlaa be yo sa tɛ’n niɔn. Yɛ i ti yɛ wie’n o sran’m be kwlaa be su ɔ. (Rɔm. 5:12, 16) Rɔmfuɛ Mun 5:18 se kɛ: “Sran kunngba i sa ng’ɔ yoli’n i lɔnglɛ cili sran’m be kwlaa.” ?I lɛ’n nun’n, ngue yɛ Zoova yó m’ɔ ti su sɛsɛsɛ naan sran’m b’a fite nun ɔn? Zezi tɛ su kɛ: “M bɔ n kacili Sran’n [...] m bali kɛ [...] ń fá min wun kpɔ́ sran sunman be ti.” (Mat. 20:28) Fɔ nunman Zezi nun, yɛ w’a yoman sa tɛ. Ɔ maan, ɔ kwla fɛ i wun kpɔ sran’m be ti. ?Ngue ti yɛ tɛ’n mɔ Zezi wá fɛ́ i wun yí’n, ɔ ti su sɛsɛsɛ ɔ?—1 Tim. 2:5, 6.
12. ?Ngue ti yɛ tɛ’n mɔ Zezi fɛli i wun yili’n, ɔ ti su sɛsɛsɛ ɔ?
12 Fɔ nunman Zezi nun yɛ w’a yoman sa tɛ. Ɔ maan, ɔ kwla tran nguan nun tititi. I sɔ yɛ Ɲanmiɛn kunndɛli kɛ Adam nin i mma’m be tran asiɛ’n su ɔ. Sanngɛ, w’a yoman ye. Zezi liɛ’n, ɔ klo i Si nin Adam i mma mun. I sɔ’n ti’n, ɔ fɛli i wun yili tɛ naan ɔ́ mán nguan mɔ Adam w’a kwlá manman’n. I sin’n, Ɲanmiɛn cɛnnin Zezi aolia nun sran. Kpɛkun, Zezi sɛli i sin ɲanmiɛn su lɔ. (1 Piɛ. 3:18) Tɛ’n mɔ Zezi fɛli i wun yili’n, Zoova sɔli nun klanman. Afin Zezi ti kɛ i nun mɔ Adam nin a yoman sa tɛ’n sa. Fɔ nunmɛn i nun. Ɔ maan cɛn wie lele’n, Adam i mma’m bé kwlá ɲán anannganman nguan. Zezi mannin nguan mɔ Adam w’a kwlá manman’n. I sɔ’n ti, Pɔlu se kɛ: “Be klɛli i kɛ: ‘Adam b’ɔ ti sran klikli’n, ɔ nyannin nguan yɛ ɔ yoli sran.’ Adam kasiɛnfuɛ’n yoli aolia nun sran b’ɔ man nguan.”—1 Kor. 15:45.
13. ?Ngue yɛ Zezi m’ɔ ti “Adam kasiɛnfuɛ’n,” ɔ́ wá yó mán be nga be wuli’n mun ɔn?
13 Ɔ cɛ kan’n, Zezi m’ɔ ti “Adam kasiɛnfuɛ’n,” ɔ́ wá klé kɛ ɔ ti ‘aolia nun sran b’ɔ man nguan’n.’ Yɛle kɛ, ɔ́ mán Adam i mma nin i anunman’m be nguan. Be nga be wuli bɔbɔ’n, ɔ́ mán be nguan wie. Yɛle kɛ, ɔ́ cɛ́n be. Kpɛkun, be nun kpanngban bé trán asiɛ’n su wa ekun.—Zan 5:28, 29.
14. ?Ngue yɛ Zoova yoli naan sa tɛ’n nin wie’n mɔ be ti sran’m be aja like’n, w’a tranman lɛ kun ɔn?
14 ?Wafa sɛ yɛ sa tɛ nin wie’n m’ɔ ti sran’m be aja like’n, ɔ kwla wie ɔ? Yɛle kɛ, Zoova takali famiɛn diwlɛ kun ɲanmiɛn su lɔ. Kpɛkun, ɔ fali Zezi m’ɔ ti “Adam kasiɛnfuɛ’n” sieli i famiɛn. I sin’n, ɔ fali sran 144.000 naan be nin Zezi be di famiɛn. (An kanngan Sa Nglo Yilɛ 5:9, 10 nun.) Sran sɔ mɔ be nin Zezi bé wá dí famiɛn ɲanmiɛn su lɔ’n, be fin asiɛ’n su wa. Ɔ maan, be wun sa ng’ɔ o sran’m be su’n i wlɛ. Kɛ be nin Zezi bé wá dí famiɛn afuɛ akpi’n, bé wá yó maan sa tɛ’n nin wie’n be su tranman lɛ kun.—Ngl. 20:6.
15, 16. (a) ?Ngue yɛ Ɲanmiɛn Ndɛ’n flɛ i kɛ sran’m be kpɔfuɛ’n “be kwlaa be nun kasiɛnfuɛ’n” niɔn? (b) ?Ngue yɛ 1 Korɛntfuɛ Mun 15:28 waan Zezi wá yó ɔ?
15 Kɛ Zezi i afuɛ akpi famiɛn dilɛ’n ɔ́ wíe’n, nn fɔ’n w’a wie sran’m be nun yɛ be wuman kun. Ɲanmiɛn maan Pɔlu seli kɛ: “Kɛ Adam ti sran’m be kwlaa be wu’n, i kunngba’n, Krist ti Nyanmiɛn maan sran’m be kwlaa bé nyán nguan ekun, sanngɛ ɔ to be ɔ to be. Krist yɛ ɔ ti be klikli-ɔ, i sin be nga be ti Krist liɛ’n, kɛ ɔ́ bá’n, be yɛ ɔ́ tó be-ɔ. I sin kɛ mɛn’n ɔ́ wá wíe’n, Krist wá tú mmusu nin kpɛnngbɛn’m be kwlaa nin bae’n, yɛ ɔ́ fá bia’n mɛ́n i Si Nyanmiɛn. Afin ɔ́ síe lele saan Nyanmiɛn maan ɔ́ tíɛ i kpɔfuɛ’m be kwlaa be su, be kwlaa be nun kasiɛnfuɛ’n yɛlɛ wie’n.” (1 Kor. 15:22-26) Nanwlɛ, wie’n mɔ Adam fa yili i sran’m be su’n, ɔ su tranman lɛ kun. Ɲanmiɛn wá yí “sɛ tannin ng’ɔ kata sran’m be kwlaa be su’n” i mlɔnmlɔn.—Eza. 25:7, 8.
16 Pɔlu se ekun kɛ: “Kɛ ɔ ko fa Krist ko sie like’n kwlaa su’n, i sin Krist bɔbɔ b’ɔ ti i Wa’n, ɔ́ fɛ́ i wun mɛ́n i kɛ ɔ sie i naan Nyanmiɛn sie like’n kwlakwlakwla.” (1 Kor. 15:28) I blɛ sɔ’n nun’n, nn Zezi w’a wie junman nga ti yɛ Ɲanmiɛn sieli i famiɛn’n i di. Sran mɔ fɔ nunman be nun kun’n, Zezi wá fá be wlá Zoova sa nun aklunjuɛ su. Kpɛkun, i bɔbɔ fɛ́ i wun mán Zoova kɛ ɔ sie i.
17. ?I agualiɛ su’n, ngue yɛ ɔ́ wá jú Satan su ɔ?
17 ?Satan m’ɔ fa ɲrɛnnɛn’n i wafa kwlakwla yi i sran’m be su’n, i liɛ yó sɛ? Sa Nglo Yilɛ 20:7-15 tɛ su weiin man e. Kɛ Zezi i afuɛ akpi famiɛn dilɛ blɛ’n, ɔ ko wie’n, Ɲanmiɛn wá yáci Satan lɛ naan ɔ laka sran mun. I sin’n, Ɲanmiɛn wá núnnún Satan nin be kwlaa nga bé sú i su’n. I sɔ’n yɛ Ɲanmiɛn Ndɛ’n flɛ i kɛ “wie’n i nnyɔn su nin-ɔn.” (Ngl. 21:8) Be kwlaa nga Ɲanmiɛn maan bé wú sɔ’n, be su saman be sin nguan nun kun mlɔnmlɔn. Be nga be nin Ɲanmiɛn be nanti klanman’n be liɛ’n, be su siman ‘wie’n i nnyɔn su’n.’
18. ?Junman nga Ɲanmiɛn fa mannin Adam mɔ w’a kwlá diman’n, wan mun yɛ bé wá dí bé gúɛgúɛ i bo ɔ?
18 Fɔ’n su tranman sran’m be nun kun. Yɛ be kpɔfuɛ fi su tranman lɛ kun. Ɲanmiɛn i klun jɔ́ sran’m be kwlaa be wun. Yɛ ɔ́ mán be anannganman nguan. Kpɛkun, junman nga Ɲanmiɛn fa mannin Adam mɔ w’a diman’n, bé wá dí bé gúɛgúɛ i bo ɔ. Yɛle kɛ, bé síe asiɛ’n, ɔ nin i su ninnge’m be kwlakwla. Blɛ sɔ’n nun’n, aklunjuɛ’n yó dan. Afin, Zoova maan wie’n m’ɔ ti e kpɔfuɛ kasiɛnfuɛ’n su tranman lɛ kun.
[Ja ngua lɛ ndɛ’n]
a Like nga ti yɛ sran’m be yo oke’n, ɔ nin like nga ti yɛ be wu’n, Ɲanmiɛn Ndɛ’n i nun yiyilɛ fluwa kun kannin kɛ fluwa sifuɛ dandan’m be mian be ɲin kpa kɛ bé sí i. I waan: “Be lafiman su kɛ e Yifuɛ Ɲanmiɛn bɔbɔ yɛ ɔ seli kɛ Adam nin Ɛvu be sa tɛ’n ti’n, bé wú ɔ. Ɔ maan kannzɛ be yo sɛ’n, be kwlá wunman like nga ti yɛ sran’m be wu’n i wlɛ kpa sa le.”—Étude perspicace des Écritures, vol. 2 p. 1147.