Zoova ti Ɲanmiɛn kun m’ɔ yoman ninnge sukusuku-ɔ. (1 Korɛntifuɛ Mun 14:33) Ɔ maan e kwla lafi su kɛ wafa nga i sufuɛ’m be yo ninnge mun’n ɔ su yoman sukusuku. ?Wafa sɛ yɛ ninnge’m be yolɛ’n ti siesiewa Klisifuɛ’m be asɔnun’n nun-ɔn? ?Ngue yɛ e kwla yo naan ninnge’m be yolɛ’n w’a yoman sukusuku asɔnun’n nun-ɔn?

1. ?Wan yɛ ɔ ti asɔnun’n i su kpɛn’n niɔn?

‘Zezi Klisi yɛ ɔ ti asɔnun’n i su kpɛn’n niɔn.’ (Efɛzifuɛ Mun 5:23) Kɛ Zezi o ɲanmiɛn su lɔ’n ɔ nian Zoova i sufuɛ’m be junman’n su mɛn wunmuan’n nun. Zezi kpali sran wie mun. Be flɛ be kɛ ‘junman difuɛ nanwlɛfuɛ m’ɔ si ngwlɛlɛ’n.’ Be yɛ be ti e anuannzɛ’n i ɲrun dinfuɛ mun-ɔn. (Kanngan Matie 24:45-47 nun.) Klisifuɛ klikli’m be blɛ su’n, Zezi i akoto mun ɔ nin kpɛnngbɛn nga be o Zerizalɛmun lɔ’n, be yɛ be dunnin asɔnun’m be kwlaa be ɲrun mmua-ɔ. Andɛ kusu’n, sran akpasua kaan nga Zezi kpali be’n be yɛ be dun asɔnun wunmuan’m be ɲrun mmua-ɔ. (Sa Nga Be Yoli’n 15:2) Sanngɛ be timan e anuannzɛ’n i su kpɛn. Be suan Biblu’n nun like naan b’a si like nga Zoova kunndɛ kɛ be yo’n, yɛ be klun klo su be fa atin nga Zezi kle be’n su.

2. ?Junman benin yɛ asɔnun kpɛnngbɛn’m be di-ɔ?

Asɔnun kpɛnngbɛn’m be ti sran mɔ be ɲin w’a ti Ɲanmiɛn sulɛ’n nun-ɔn. Be fa Ɲanmiɛn Ndɛ’n be uka Zoova i sufuɛ mun yɛ be wla be fanngan. Be tanninman be kalɛ. ‘Nán kɛ be kunndɛ kɛ bé ɲán junman nga be di’n i nun like ti yɛ be di-ɔ, sanngɛ be tu be klun be di be junman’n.’ (1 Piɛli 5:1, 2) Aniaan wie mɔ be sieli be asɔnunfuɛ’m be ukafuɛ’n be uka asɔnun kpɛnngbɛn mun. Kɛ ɔ́ kɔ́ i ɲrun’n, be bɔbɔ be kwla kaci asɔnun kpɛnngbɛn wie.

E anuannzɛ’n i ɲrun dinfuɛ mun be sie aniaan wie mun akpasua sunianfuɛ. Be sinsin asɔnun’m be su be wla aniaan’m be fanngan, yɛ be uka be. Akpasua sunianfuɛ’m be nian ndɛ nga Biblu’n kan’n su naan b’a sie aniaan wie mun asɔnun kpɛnngbɛn annzɛ asɔnunfuɛ’m be ukafuɛ.—1 Timote 3:1-10, 12; Titi 1:5-9.

3. ?Ngue yɛ Zoova i Lalofuɛ’m be tinuntinun be yo-ɔ?

Asɔnun’n nunfuɛ’m be kwlaa “be manman Zoova i dunman’n.” Yɛle kɛ e aɲia’m be bo’n be tɛ kosan’m be su, be ijɔ nzra nun, be yi ninnge wie’m be nglo, yɛ be to jue. Asa ekun’n, be mian be ɲin be bo jasin fɛ’n.—Kanngan Jue Mun 148:12, 13 nun.

SI NDƐ’N NUN KPA EKUN

4. Zezi ti siefuɛ kpa

Zezi wla e fanngan kɛ e blɛ i sin. An kanngan Matie 11:28-30 nun, i sin’n an koko kosan yɛ’n i su yalɛ:

• ?Wafa sɛ yɛ Zezi kunndɛ kɛ be ng’ɔ sie be’n be wun yo be-ɔ?

VIDEO: Kɛ asiɛ’n kejeli Nepali lɔ’n asɔnun kpɛnngbɛn’m be fali ajalɛ (4:56)

Biblu’n kan wafa ng’ɔ fata kɛ asɔnun kpɛnngbɛn’m be di be junman’n i ndɛ.

An kanngan Ezai 32:2, ɔ nin 1 Piɛli 5:1-3 nun, i sin’n an koko kosan yɛ’m be su yalɛ:

• ?Kɛ a wun kɛ asɔnun kpɛnngbɛn’m be fɔnvɔ be wiengu mun kɛ nga Zezi fa yoli’n sa’n, i sɔ’n yo wɔ sɛ?

• ?Wafa sɛ yɛ asɔnun kpɛnngbɛn’m be nian Zezi i ajalɛ’n su ekun-ɔn?

5. Asɔnun kpɛnngbɛn’m be kle e ajalɛ kpa

VIDEO: Asɔnun kpɛnngbɛn’m be dun e ɲrun mmua! (7:39)

Zezi kleli wafa ng’ɔ fata kɛ be nga be dun e ɲrun mmua asɔnun’n nun’n be di be junman’n. An kanngan Matie 23:8-12 nun, i sin’n an koko kosan yɛ’n i su yalɛ:

• ?Kɛ a fa like nga Biblu’n waan asɔnun kpɛnngbɛn’m be yo’n a fa sunnzun like nga Ɲanmiɛn sulɛ wafa’m be su kpɛnngbɛn’m be yo’n, ngue yɛ a sie i nzɔliɛ?

1. Asɔnun kpɛnngbɛn’m be uka be awlofuɛ mun naan be nin Ɲanmiɛn be afiɛn mantan kpa.

2. Asɔnun kpɛnngbɛn’m be nian asɔnun’n nunfuɛ’m be kwlaa be lika.

3. Asɔnun kpɛnngbɛn’m be bo jasin fɛ’n titi.

4. Asɔnun kpɛnngbɛn’m be kle like asɔnun’n nun. Be uka aniaan mun naan b’a yo asɔnun sua’n i nun yɛinyɛin, yɛ be yo ninnge uflɛ wie mun ekun.

6. E kwla suan asɔnun kpɛnngbɛn’m be bo

Biblu’n kan sa cinnjin nga ti yɛ ɔ fata kɛ e suan asɔnun kpɛnngbɛn’m be bo’n i ndɛ. An kanngan Ebre Mun 13:17 nun, i sin’n an koko kosan yɛ’m be su yalɛ:

• ?Ngue ti yɛ Biblu’n wla e fanngan kɛ e lo e wun e man be nga be dun e ɲrun mmua’n niɔn? ?Wafa sɛ yɛ a bu i sɔ liɛ’n niɔn?

An kanngan Liki 16:10 nun, i sin’n an koko kosan yɛ’n i su yalɛ:

• ?Sɛ asɔnun kpɛnngbɛn’m be se e kɛ e yo like wie naan e bu i kɛ ɔ timan cinnjin’n, ngue ti yɛ ɔ fata kɛ e mian e ɲin e yo-ɔ?

NDƐ’N I KPƆLƐ BOLƐ

Zezi yɛ ɔ ti asɔnun’n i su kpɛn’n niɔn. Asɔnun kpɛnngbɛn mun be lo be wun be mɛn i. E kusu e klun klo su e lo e wun e man be, afin be wla e fanngan yɛ be kle e ajalɛ.

Ndɛ’n i nun flanlɛ

• ?Wan yɛ ɔ ti asɔnun’n i su kpɛn’n niɔn?

• ?Wafa sɛ yɛ asɔnun kpɛnngbɛn’m be uka asɔnun’n i nunfuɛ mun-ɔn?

• ?Ngue yɛ Zoova i sufuɛ’m be tinuntinun be yo-ɔ?

NDƐ WIE MUN EKUN

Like ng’ɔ kle kɛ e ndɛ lo e anuannzɛ’n i ɲrun difuɛ mun ɔ nin asɔnun kpɛnngbɛn mun andɛ’n.

E niaan nga be tanninnin be Ɲanmiɛn sulɛ’n be fanngan wlalɛ (4:22)

Junman nga akpasua sunianfuɛ’m be di’n.

Akpasua su nianlɛ junman’n i dilɛ klɔ kanngan’m be su’n (4:51)

Junman nga bla’m be di i asɔnun’n nun’n.

“Junman benin yɛ bla’m be di i Zoova i Lalofuɛ’m be asɔnun’n nun-ɔn?” (Sasafuɛ Tranwlɛ’n nun ndɛ)

Wafa nga asɔnun kpɛnngbɛn’m be mian be ɲin kpa naan b’a kwla uka be niaan mun’n.

“Asɔnun kpɛnngbɛn’m ‘be uka e e di junman naan e klun jɔ’” (Sasafuɛ Tranwlɛ’n, afuɛ 2013, Zanvie 1)

1. ?Afɔtuɛ benin yɛ Biblu’n man yasua nga b’a ja bla mun-ɔn?

Zoova sieli yasua’n awlobo’n i su kpɛn. (Kanngan Efɛzifuɛ Mun 5:23 nun.) Zoova kunndɛ kɛ ajalɛ ng’ɔ́ fá be’n be yo i awlobofuɛ’m be ye. Biblu’n se yasua nga b’a ja bla’m be kɛ: “An klo amun yi mun titi.” (Efɛzifuɛ Mun 5:25) ?Wafa sɛ yɛ be kwla yo i sɔ-ɔ? Yasua ng’ɔ klo i yi’n, maan ɔ yo awlo lɔ-o, annzɛ nzra nun-o, ɔ yi i nglo kɛ ɔ klo i. Ɔ yo i cɛcɛ, yɛ ɔ miɛn i ɲin yo like ng’ɔ kwla yo’n naan i yi’n i wun w’a fɛ i feke. (1 Timote 5:8) Sanngɛ i nun cinnjin kpafuɛ’n yɛle kɛ ɔ ukɛ i naan ɔ nin Zoova be afiɛn w’a mantan kpa. (Matie 4:4) I wie yɛle kɛ ɔ nin i yi be kwla srɛ Ɲanmiɛn yɛ be kanngan Biblu’n nun likawlɛ. Yasua ng’ɔ niɛn i yi lika’n, ɔ nin Zoova be afiɛn mantan.​​—1 Piɛli 3:7.

Zezi yɛ ɔ ti asɔnun’n i su kpɛn’n niɔn. (Efɛzifuɛ Mun 5:23) Kɛ Zezi o ɲanmiɛn su lɔ’n, ɔ sin ‘junman difuɛ nanwlɛfuɛ m’ɔ si ngwlɛlɛ’n’ i lika naan w’a kle i sɔnnzɔnfuɛ nga be o asiɛ’n su wa’n be atin. (Kanngan Matie 24:45 nun.) Zezi bɔbɔ yɛ ɔ sieli junman difuɛ sɔ’n niɔn, yɛ ɔ mɛnnin i atin kɛ ɔ fa ajalɛ wie mun. “Junman difuɛ” sɔ’n lo i wun man Zezi, yɛ ɔ uka Zezi i niaan mun. ?Wan yɛle junman difuɛ sɔ’n? ?Yɛ wafa sɛ yɛ ɔ nian e lika-ɔ?