Like nga Ɲanmiɛn kan be bo nun’n, nán maan sran fi ti be nun
‘Be timan sran nɲɔn kun, sanngɛ be ti sran wunmuan. Ɔ maan like nga Ɲanmiɛn kan be bo nun’n, nán maan sran fi ti be nun.’—MATIE 19:6.
1, 2. ?Ngue ti yɛ kɛ e kanngan Biblu’n nun mɔ e wun sa nga be ju’n, e si kɛ be nga be ja bla annzɛ bian’n ndɛ tɔ́ be aja’n nun ɔn?
MAAN ɔ yo amun kɛ amun su wa tu ajalɛ kɔ lika mmua sa. Loto yɛ amún fá kɔ́ ɔ. Kɛ amún kɔ́ lɛ’n, sɛ amun bu i kɛ sa fi kwlá juman atin nun’n, an su laka amun wun. Nzue kwla tɔ annzɛ aunmuan dan wie kwla tu. Sɛ ɔ yo sɔ’n, ɔ fata kɛ amun cisan loto’n blɛblɛblɛ. Kusu loto’n kwla saci. Sɛ i sɔ sa ju naan amun wunmɛn i yowlɛ’n, saan amún kúnndɛ sran naan ɔ uka amun. Ɔ fata kɛ amun dun mmua bu ninnge sɔ’m be angunndan naan amun a tu ajalɛ’n. ?Sanngɛ amún sé kɛ sɛ ɔ ti kɛ amun a tuman ajalɛ’n ɔ flunman naan i ti’n, amún yáci loto’n lɛ’n bé kɔ́? Ɔ su yoman sɔ. Afin sran ng’ɔ kɔ mmua, ɔ si kɛ kɛ ɔ́ kɔ́ lɛ’n sa kwla ju atin’n nun naan ɔ ti m’ɔ wun be trawlɛ ɔ.
2 Kɛ aja’n ti sɔ ɔ. Aja’n i nun ndɛ’n wieman. Ɔ maan, be nga be o aja nun’n, sɛ be bu i kɛ be aja’n yó fɛ lele guɛ́ i ti nin bo’n, nn be su laka be wun. Afin, 1 Korɛentfuɛ Mun 7:28 kle weiin kɛ be nga be ja bla annzɛ bian’n ‘bé wún be ɲin su.’ ?Yɛ ngue ti ɔ? Afin fɔ’n o klɔ sran’n nun. Kpɔkun ‘lika’n w’a yo kekle.’ (2 Timote 3:1; Rɔmfuɛ Mun 3:23) Ɔ maan, yasua nin bla nga bɔbɔ mɔ be nuan sɛ mɔ be nanti Ɲanmiɛn mmla’n su’n, ndɛ kwla tɔ be afiɛn.
3. (a) ?Wafa sɛ yɛ sran sunman be bu aja’n niɔn? (b) ?Ngue ti yɛ Klistfuɛ’m be mian be ɲin naan be aja’n w’a yo ye ɔ?
3 Like nga w’a ju su siɛn’n yɛle kɛ, kɛ ndɛ ko tɔ yasua kun nin i yi be afiɛn’n, be wun ralɛ’n yɛ be si i ɔ. Nvle sunman nun’n, be wun ralɛ’n i trulɛ mɔ w’a tru’n, ɔ te yo tɛ te kɔ. Sanngɛ Klistfuɛ kpa’m be liɛ’n, be yoman sɔ. Kɛ sa tɔ be nin be yi be afiɛn’n, be tran be siesie. ?Ngue ti yɛ be yo sɔ ɔ? Afin, be si kɛ aja’n fin Zoova. Zezi kan kleli be nga be o aja nun’n be kɛ: ‘Like nga Ɲanmiɛn kan be bo nun’n, nán maan sran fi ti be nun.’ (Matie 19:6) Zezi i ndɛ sɔ’n i su nantilɛ’n kwla yo kekle. Afin wie liɛ’n, afɔtuɛ nga e osufuɛ mun, annzɛ be nga be waan be si aja nun ndɛ’n be man e’n, ɔ nin Ɲanmiɛn liɛ’n be sansan be wun. Be liɛ’n, kɛ ndɛ kan ko tɔ yasua kun nin i yi be afiɛn’n, kpɔkun be waan be ra.a Sanngɛ Klistfuɛ’m be si kɛ sɛ ndɛ tɔ yasua kun nin i yi be afiɛn’n, sɛ be siesie’n, ɔ flunman tra kɛ be kpli be ra’n. Afin be si kɛ, kɛ be ja bla annzɛ bian’n, ɔ fata kɛ be mian be ɲin be nanti Zoova i atin liɛ’n su. Naan ɔ fataman kɛ be fa atin uflɛ su.—Nyanndra Mun 14:12.
Sa’m be ɲrun jranlɛ
4, 5. (a) ?Ndɛ benin yɛ ɔ kwla tɔ yasua kun nin i yi be afiɛn ɔn? (b) ?Ngue ti yɛ sɛ ndɛ tɔ yasua kun nin i yi be afiɛn’n, Ɲanmiɛn Ndɛ’n kwla uka be sakpa ɔ?
4 Ɔ ju blɛ wie’n, ɔ fata kɛ be nga b’a ja bla annzɛ bian’n, be tran naan be kan awlo’n nun ndɛ’n. Yɛle kɛ, maan be siesie ndɛ kanngan ng’ɔ o be afiɛn’n. Sanngɛ wie liɛ’n, sa ng’ɔ fata kɛ be fa be ɲin sie su naan be siesie’n, nán ndɛ kaan ɔn. Afin, i sɔ ndɛ liɛ’n kwla saci be afiɛn mlɔnmlɔn. Ɔ maan, sɛ ɔ fata kɛ be usa Klistfuɛ nga be jali be wun w’a cɛ’n, be ngwlɛlɛ afɛ’n, maan be usa. Sanngɛ nán maan be bu i kɛ, kɛ mɔ sa’m be tɔ be aja’n nun ti’n, nn be aja’n w’a saci. Ɔ timan sɔ. I li sa nga be tɔ awlo nun’n, be kle kɛ sɛ e nanti Biblu’n nun mmla’m be su sɛsɛsɛ’n, é wún be trawlɛ.
5 Zoova yɛ ɔ yili klɔ sran ɔn. I yɛ ɔ kpɛli aja’n i ba ɔ. Ɔ maan, like ng’ɔ fata kɛ sran kun yo naan i aja’n w’a yo kpa’n, Zoova si i kwlaa kpan. Sanngɛ ndɛ kan ng’ɔ o lɛ’n yɛle kɛ: ?Afɔtuɛ nga Ɲanmiɛn Ndɛ’n man e’n, e fa su? Sɛ e fa be su’n, e liɛ yó ye. Zoova kan kleli Izraɛlifuɛ’m be kɛ: ‘Sɛ ɔ ti kɛ amun sieli amun su mmla nga m mannin amun’n i bo’n, nn amún dí alaje. Sɛ alaje sɔ’n ti nzue’n, nn ń sé kɛ ɔ́ yó kɛ nzue ba kun m’ɔ sonji kpuu m’ɔ kpɛman’n sa. Sɛ ɔ ti kɛ amun sieli amun su mmla sɔ’n i bo’n, nn amún ɲán muae. Sɛ muae sɔ’n ti jenvie’n, nn ń sé kɛ ɔ́ bó gúa cenje’n su tititi.’ (Ezai 48:18) Sɛ e nanti Biblu’n nun mmla nga be kan aja ndɛ’n be su’n, saan e aja’n yó ye. I sɔ’n ti’n, é wá fá e ɲin sie i afɔtuɛ nga Biblu’n man yasua mun’n, be su.
“An klo amun yi mun”
6. ?Afɔtuɛ benin yɛ Biblu’n man yasua mun ɔn?
6 Kɛ akoto Pɔlu klɛli fluwa ko mannin Efɛzi lɔ Klistfuɛ mun’n, ɔ mannin yasua’m be afɔtuɛ. Ɔ seli be kɛ: ‘Yasua mun, kɛ Klist kloli Asɔnun’n, amun kusu an klo amun yi mun sɔ. I sɔ’n ti’n, yasua mun, an klo amun yi mun kɛ an fa klo amun bɔbɔ amun wun’n sa. Sran ng’ɔ klo i yi’n, nn ɔ klo i bɔbɔ wun. Sran fi kpɔmɛn i bɔbɔ wun, sanngɛ ɔ tɛ i wun, ɔ niɛn i wun su kɛ Klist kusu nian Asɔnun’n i lika’n sa, sanngɛ kusu ɔ ti amun liɛ wie. Maan yasua kun klo i yi kɛ ɔ fa klo i bɔbɔ wun’n sa.’—Efɛzfuɛ Mun 5:25, 28, 29, 33.
7. (a) ?Ngue su yɛ Klistfuɛ’m be aja’n, ɔ taka ɔ? (b) ?Kɛ be se yasua mun kɛ be klo be yi mun’n, i bo’n yɛle benin?
7 Nán sa ng’ɔ saci yasua nin i yi be afiɛn’n yɛ Pɔlu yiyi nun tɛɛn ɔn. Sanngɛ sɛ aja’n ti sua’n, like nga be fa wlɛ i bo ase naan kannzɛ ɔ yo sɛ’n w’a taka kpa’n, i su yɛ ɔ fa e ɲin sie ɔ. Like sɔ’n yɛle be wiengu klolɛ. Efɛzi lɔ Klistfuɛ’m be fluwa nga Pɔlu klɛli’n, ɔ boli sran klolɛ’n su kpɛ nsiɛn. Kusu maan e sie i nzɔliɛ kɛ Pɔlu i afɔtuɛ’n nun’n, ɔ se yasua’m be kɛ: “An klo amun yi mun.” I bo bolɛ nun’n, ndɛ sɔ’n i bo kpa’n yɛle kɛ nán yasua’m be yaci be yi’m be klolɛ. Pɔlu i ndɛ sɔ’n kle kɛ, sran nga be wun i kpɛ kunngba kpɔkun be klo i’n, ɔ timan kekle. Sanngɛ ng’ɔ ti ndɛ’n, yɛle sran’n i klolɛ titi’n. I sɔ yolɛ’n timan blɛblɛ. Afin, kɛ ‘mɛn’n ɔ́ kɔ́ i bue nuan’n’ nn sran mun ‘bé bú be bɔbɔ be wun akunndan, be yo be sa’n be yaci cɛman.’ (2 Timote 3:1-3) Andɛ’n, nzuɛn tɛ sɔ’n w’a saci awlo sunman. Sanngɛ yasua ng’ɔ klo i yi’n, ɔ fataman kɛ ɔ tran lɛ naan mɛn’n nun nzuɛn tɛ’n saci i.—Rɔmfuɛ Mun 12:2.
Wafa nga an kwla nian amun yi’m be lika’n
8, 9. ?Wafa sɛ yɛ ninnge wie’m be nun’n, Klistfuɛ yasua’n kwla nian i yi’n i lika ɔ?
8 ?E mɔ e ti Klistfuɛ’n, ngue yɛ é yó naan y’a buman e ngunmin e wun angunndan naan y’a klo e yi sakpa? Efɛzifuɛ’m be fluwa nga Pɔlu klɛli’n kleli ajalɛ nɲɔn. Pɔlu waan e ta e yi mun. Kpɔkun i waan e nian e yi’m be lika kɛ nga e fa nian e wun su’n sa. ?Wafa sɛ yɛ be ta bla ɔ? Like klikli ng’ɔ fata kɛ e fa man e yi’n, yɛle ninnge kɛ sua nin tralɛ nin aliɛ nin ninnge wie mun ekun sa. Pɔlu seli Timote kɛ: ‘Sran ng’ɔ niɛnmɛn i fuɛ’m be lika’n ɔ ti tɛ, nga m’ɔ ti tɛ’n tra su’n yɛle sran ng’ɔ niɛnmɛn i bɔbɔ i awlo’n i lika’n, ɔ timan Ɲanmiɛn sufuɛ, i tɛ liɛ’n tra sran ng’ɔ lafiman Klist su’n.’—1 Timote 5:8.
9 Sanngɛ nán aliɛ nin tralɛ nin sua mɔ be fa man bla’n, i ti yɛ be se kɛ be si bla ta ɔ. ?Ngue ti ɔ? Yɛle kɛ sɛ bla’n ɲan aliɛ di, ɔ ɲan tralɛ wla yɛ ɔ le sua tran nun’n, naan sanngɛ yasua’n yɛyɛmɛn i’n, yɛ ɔ ukɛmɛn i naan ɔ nin Ɲanmiɛn be afiɛn’n w’a yo kpa’n, i sɔ’n nin i fataman. Afin kɛ bla’m be o lɛ’n, sɛ be wun’m be yɛyɛman be yɛ be nianman be lika Ɲanmiɛn sulɛ nun’n, be su yoman kpa. Klistfuɛ sunman be junman nga be di i asɔnun nun’n timan kaan. Sanngɛ nɛ́n i sɔ’n ti yɛ be ɲin kpá be awlofuɛ’m be su Ɲanmiɛn sulɛ nun ɔn. (1 Timote 3:5, 12) Sasafuɛ Tranwlɛ’n kun kannin asɔnun sunianfuɛ’m be junman’n i ndɛ i afuɛ wie yɛ. Ɔ seli kɛ: “E kwla se kɛ ‘asɔnun sunianfuɛ junman’n bo i bo awlo lɔ.’ Sɛ asɔnun kpɛnngbɛn kun ukɛmɛn i awlofuɛ mun Ɲanmiɛn sulɛ nun’n, be kwla tu i asɔnun kpɛnngbɛn junman’n nun.”b Ɔ maan, ɔ ti cinnjin kɛ e man e yi’n i aliɛ nin tralɛ nin sua nin ninnge wie mun ekun. Yɛ ɔ ti cinnjin kɛ e yɛyɛ i. Sanngɛ ng’ɔ ti cinnjin trɛ i kwlaa’n, yɛle kɛ e ukɛ i naan i kusu w’a kwla yo kpa Ɲanmiɛn sulɛ nun.
?Wafa sɛ yɛ be yɛyɛ be yi ɔ?
10. ?Wafa sɛ yɛ yasua kun kwla yɛyɛ i yi ɔ?
10 Sran ng’ɔ yɛyɛ i yi’n, ɔ niɛn i lika kpa, afin ɔ klo i. Wafa nga e kwla yɛyɛ e yi’n, ɔ sɔnnin. I klikli’n, yɛle kɛ e fa blɛ naan e nin e yi’n e tran. Sɛ e yoman sɔ’n, ɔ cɛman naan e yi’n w’a kloman e kun. Wie liɛ kusu’n, kɛ e wun e yi’n, e kwla se e wun kɛ ndɛ cinnjin nunman lɛ mɔ i ti ɔ fata kɛ e nin i e tran e koko yalɛ ɔ. Sanngɛ wafa nga e bu i sɔ lɛ’n, nɛ́n i sɔ yɛ wie liɛ’n bla’n bu i wie ɔ. E kwla se kɛ min liɛ’n, n yɛyɛ min yi’n. Sanngɛ nán e liɛ nga e kan’n yɛ ɔ ti cinnjin ɔn. Bla’n liɛ’n niɔn. Sɛ ɔ fite bla’n bɔbɔ i nuan kɛ min wun yɛyɛ min’n, i liɛ’n e si kɛ y’a yo like kun. Pɔlu seli kɛ: ‘Nán maan sran fi bu i bɔbɔ wun angunndan, sanngɛ maan ɔ bu i wiengu angunndan.’ (1 Korɛentfuɛ Mun 10:24) I sɔ’n ti’n, maan e yo yasua kpa. Yɛle kɛ, like nga bla’n kunndɛ’n, maan e fa mɛn i.—Filipfuɛ Mun 2:4.
11. ?Sɛ yasua kun nin i yi be tranman klanman’n, wafa sɛ yɛ i sɔ’n kwla saci i nin asɔnun’n nin Ɲanmiɛn be afiɛn ɔn?
11 Wafa kun ekun nga e kwla kle kɛ e yɛyɛ e yi’n, yɛle i cɛcɛ yolɛ. E ndɛ kanlɛ nun o, e ayeliɛ nun o, maan e kle kɛ e yo e yi cɛcɛ. (Nyanndra Mun 12:18) Pɔlu seli Kolɔsu lɔ Klistfuɛ’m be kɛ: ‘Yasua mun, an klo amun yi mun, nán an yo amun ɲrun wiwi be wun.’ (Kolɔsfuɛ Mun 3:19) Fluwa kun waan kɛ Pɔlu se kɛ nán an yo amun ɲrun wiwi be wun’n, be kwla kaci i kɛ: “Nán an yo amun yi mun kɛ afanniɛn mun sa.” Yasua nga awlo lɔ o, annzɛ lika uflɛ o, i yi kwlá kanman ndɛ i ɲrun’n, i sɔ yasua liɛ’n, ɔ yɛyɛmɛn i yi’n. Sɛ i sɔfuɛ’n w’a kacimɛn i sa’n, ɔ nin Ɲanmiɛn be le i. Akoto Piɛli seli kɛ: ‘Nja mun, kɛ mɔ an si kɛ amun yi’m be wunmiɛn’n juman amun liɛ nun’n, amun nin be tran kpa. An bu be sran, afin ye nga Ɲanmiɛn yoli amun mɔ maan amún ɲán nguan’n, ɔ yoli be wie. Sɛ an yoman sɔ’n, amun nin Ɲanmiɛn su kwlá kokoman yalɛ wafa ng’ɔ ti su’n.’c—1 Piɛr 3:7.
12. ?Afɔtuɛ benin yɛ wafa nga Zezi yo Asɔnun’n, ɔ man yasua mun ɔn?
12 Nán maan e bu i le kɛ klolɛ nga e yi klo e’n, ɔ nin i fin i nin klun. I ti’n, maan e kle e yi kɛ e te klo i. I sɔ yolɛ nun’n, Zezi kleli yasua’m be ajalɛ klanman. Wafa nga Zezi kloli Asɔnun’n, i su yɛ ɔ fata kɛ yasua’m be nian ɔn. Kɛ i sɔnnzɔnfuɛ’m be yo like ng’ɔ timan kpa’n, sɛ bɔbɔ be yo be flan nun’n, Zezi si be aunnvuɛ, ɔ yaci be wun sa cɛ be, yɛ ɔ yo be cɛcɛ. I sɔ’n ti’n, Zezi kwla seli kɛ: ‘An bla min sin. Afin n ti sran wɛtɛɛ yɛ min awlɛn’n ti flɔlɔ. Yɛ amún wla wá gúa ase.’ (Matie 11:28, 29) Klistfuɛ nga i waan ɔ́ nían Zezi i ajalɛ’n su’n, ɔ fata kɛ ɔ yo i yi’n kɛ nga Zezi fa yoli Asɔnun’n sa. Yasua ng’ɔ yɛyɛ i yi sakpa’n, i ijɔlɛ nun o, i ayeliɛ nun o, be wun i sɔ liɛ’n. Kɛ i sɔ yasua’n ɔ o lɛ’n, i yi wla’n gua ase sakpa.
Bla nga be nanti Ɲanmiɛn i mmla’n su’n
13. ?Biblu’n nun mmla benin yɛ ɔ kwla uka bla mun ɔn?
13 Biblu’n man bla’m be afɔtuɛ wie. Efɛzfuɛ Mun 5:22-24, 33 se kɛ: ‘Bla mun, an bu amun wun’m be sran, kɛ an bu e Min’n i sran’n sa. Nán an fa amun ɲin wlawla be, afin yasua yɛ ɔ ti bla i su kpɛn kɛ Klist kusu ti Asɔnun i su kpɛn’n sa. I yɛ ɔ ti Asɔnun’n m’ɔ ti i wunnɛn’n i Defuɛ ɔ. Kɛ asɔnun’n bu Klist sran’n, maan mmla’m be bu be wun’m be sran sɔ sa’n kwlaa nun. Maan mmla’m be kusu be bu be wun’m be sran.’
14. ?Ngue ti yɛ kɛ Biblu’n se kɛ yasua yɛ ɔ sie bla’n, i sɔ’n kleman kɛ bla’m be leman ɲrun ɔn?
14 Amun e sie i nzɔliɛ kɛ Pɔlu se bla’m be kɛ be bu be wun’m be sran yɛ nán be fa be ɲin wlawla be. Ɔ fata kɛ bla’n bu i wun i sran. Ɲanmiɛn yɛ ɔ siesieli i sɔ ɔ. Like kwlaa nga be yili be ɲanmiɛn su lɔ nin asiɛ’n su wa’n, be le be siefuɛ. Zezi bɔbɔ’n, Ɲanmiɛn yɛ ɔ sie i ɔ. (1 Korɛentfuɛ Mun 11:3) I yo, sɛ yasua’n sie bla’n kɛ ɔ nin i fata sa’n, ɔ́ yó pɔpɔ mán bla’n. Ɔ maan, bla’n kusu i wun sran bulɛ’n su yoman kekle mɛnmɛn i.
15. ?Biblu’n nun mmla benin yɛ ɔ ti bla’m be liɛ ɔ?
15 Kɛ Pɔlu se kɛ “maan bla’m be bu be wun’m be sran’n” yɛle kɛ maan ‘be awlɛn yo wɛtɛɛ yɛ be yo sran diin.’ Ɔ maan, bla’n nin yasua’n be su kpliman awlo’n i sielɛ’n. Nɛ́n i liɛ ng’ɔ klo’n yɛ ɔ́ yó ɔ. (1 Piɛr 3:4) Klistfuɛ bla ng’ɔ nanti Ɲanmiɛn ndɛ’n su’n, ɔ tu i klun yo i awlofuɛ’m be ye. Ɔ maan, i wun’n ɲan ɲrun. (Tit 2:4, 5) Ɔ tu i klun kɛn i wun’n i wun ndɛ klanman. Ɔ yoman like wie mɔ maan i wun’n su ɲanman ɲrun ɔn. Ajalɛ nga yasua’n waan be fa’n, ɔ tu i klun suɛn i bo.—Nyanndra Mun 14:1.
16. ?Ajalɛ kpa benin yɛ Sara nin Rebeka be kle Klistfuɛ bla mun ɔn?
16 Kɛ be se kɛ maan bla’n i awlɛn yo wɛtɛɛ naan ɔ yo bla diin’n, nán kɛ ɔ leman ndɛ kɛnmɛn i awlo’n nun ɔn. Annzɛ kusu nán kɛ i ndɛ liɛ’n ng’ɔ kan’n, ɔ timan kpa ti ɔ. Lalafuɛ nun bla kɛ Sara nin Rebeka be kannin be klun ndɛ. Yɛle kɛ be awlo’m be nun ndɛ’n ti’n, b’a kwlá muanman be nuan. Biblu’n waan Zoova klun jɔli be ajalɛ sɔ’n su. (Bo Bolɛ 21:8-12; 27:46–28:4) Klistfuɛ bla’m be kusu sɛ ndɛ wie tɔ awlo nun naan be waan bé kán be klun ndɛ’n, ɔ fata kɛ be kan. Sanngɛ maan be kɛn i amanniɛn su. Sɛ be yo sɔ’n, be wun’m be kwla fa be ndɛ liɛ’n su.
Maan e nin e yi annzɛ e wun e tran lele e guɛ i ti nin i bo
17, 18. ?Wafa sɛ yɛ yasua kun nin i yi be kwla yo naan b’a jran Satan i ɲrun kekle naan w’a saciman be aja’n niɔn?
17 Aja’n timan le nɲɔn like. Ɔ maan, ɔ fata kɛ i yasua o, i bla o, be mian be ɲin naan be nin be yi annzɛ be wun be tran lele guɛ i ti nin i bo. Sɛ yasua nin bla’n be tranman be kokoman ndɛ’m be su yalɛ kɛ ɔ nin i fata’n sa’n, ɔ cɛman naan ndɛ’n w’a tra ndin naan i bo tulɛ w’a yo kekle. Kɛ ndɛ o lɛ mɔ be diman nanwlɛ’n yɛ maan klunngbɔ’n ba ɔ. Kɛ ɔ ko yo sɔ’n, kpɔkun yasua nin bla’n be tannin nvlɛ. Kɛ bé yó sɔ lɛ’n, nn atrɛkpa’n, be nin sran uflɛ be su san nun. Zezi seli kɛ: ‘Sran kwlaa ng’ɔ wun bla kun m’ɔ bu i kunndɛlɛ angunndan i awlɛn nun’n, nn w’a kunndɛ bla sɔ’n.’—Matie 5:28.
18 Akoto Pɔlu mannin Klistfuɛ’m be kwlaa be afɔtuɛ kun. Be nga be le bla nin bian’n be o nun wie. Ɔ seli kɛ: ‘Sɛ an fa ya’n, nán an yo sa tɛ. Nán an fa ya sɔ’n lele maan wia’n tɔ su. Nán an man mmusu’m be si Satan’n i wluwlɛ.’ (Efɛzfuɛ Mun 4:26, 27) E kpɔfuɛ’m be ti’n, yɛle Satan. I liɛ ng’ɔ kunndɛ’n, yɛle kɛ sa kwlaa ng’ɔ kwla tɔ Klistfuɛ nɲɔn be afiɛn’n, ɔ́ jrán su yó be like. Nán maan e mɛn i atin naan ɔ yo sɔ! Kɛ ndɛ tɔ’n, maan e nian Biblu’n nun e kunndɛ i siesielɛ. Wafa nga Zoova wun ndɛ’n, maan e wun i wlɛ wie. E fa Biblu’n i akua mun e nian nun. I sin’n, e tran ase naan amanniɛn su e kan ndɛ ng’ɔ o e klun’n i weinwein. Kɛ ɔ ko yo sɔ’n, Ɲanmiɛn mmla nga e suannin’n, e fa naan e fa bo e ɲrun atin siɛn’n. (Zak 1:22-25) E nga e o aja nun’n, maan e jran cinnjin kɛ e nin e yi annzɛ e wun’n e nanti Ɲanmiɛn i atin’n su titi. Yɛ nán e man like uflɛ atin annzɛ sran uflɛ atin naan like nga Ɲanmiɛn w’a kan be w’a bo nun’n, ɔ ti be nun!—Mise 6:8.
[Ja ngua lɛ ndɛ mun]
a Sɛ amun waan amún sí nun kpa’n, an nian Réveillez-vous !, afuɛ 2002, Fevrie 8 i bue 10, kuku nga be klɛli nun kɛ “ Divorce et séparation ” i nun. Zoova i Lalofuɛ mun yɛ be yili ɔ.
b Sɛ amun waan amún sí nun kpa’n, an nian Sasafuɛ Tranwlɛ’n, afuɛ 1989 Marsi 15 (w-F) i bue 12 nun.
c Sɛ aniaan kun waan be mɛn i junman asɔnun’n nun naan ɔ di’n, ɔ fataman kɛ ɔ yo “utre difuɛ.” Yɛle kɛ nán maan ɔ di utre bɔbɔ. Annzɛ kusu nán maan ndɛ ng’ɔ fin i nuan nun fite’n, ɔ yo kɛ sran m’ɔ klo utre sa. Ɔ maan, Sasafuɛ Tranwlɛ’n, afuɛ 1990 Sɛptamblu 1 (w-F) i bue 25 seli kɛ: “Klistfuɛ nga gua su lɔ’n, ɔ yo i wun kɛ ɔ yo Ɲanmiɛn klun sa, kpɔkun i awlo lɔ’n, be kwlá kɛnmɛn i ɲrun ndɛ’n, i sɔfuɛ’n nin asɔnun’n nun junman dilɛ fataman.”—1 Timote 3:2-5, 12.
?Amun wla kwla kpɛn su?
• ?Ɔ yo sɛ yɛ maan ndɛ kwla tɔ Klistfuɛ kun nin yi be afiɛn ɔn?
• ?Wafa sɛ yɛ yasua kun kle kɛ ɔ niɛn i yi’n i lika naan ɔ yɛyɛ i ɔ?
• ?Ngue yɛ bla kun kwla yo naan w’a kle kɛ ɔ bu i wun’n i sran ɔn?
• ?Ngue yɛ yasua kun nin i yi be kwla yo naan b’a klo be wun lele b’a guɛ i ti nin i bo ɔ?
[Foto, bue 24]
Ɔ fata kɛ yasua’n ta bla’n kpa yɛ ɔ ukɛ i naan ɔ nin Ɲanmiɛn be afiɛn’n yo kpa wie.
[Foto, bue 25]
Kɛ yasua’n yɛyɛ bla’n, bla’n i wla gua ase.
[Foto, bue 26]
Aɲinyiɛ su yɛ ɔ fata kɛ Klistfuɛ bla’m be kan be klun ndɛ liɛ’n kle be wun mun ɔn.