AN SIE I KPA

Ba nga be fa wla sran uflɛ sa nun kɛ ɔ niɛn i lika’n, i su ndɛ nga Biblu’n kan’n

Afuɛ nga be flɛ i 1988 nun’n, ndɛ akpasua kun m’ɔ yo fɛ kpa’n fiteli La Tour de Garde 1^er Septembre nun. I flɛlɛ’n yɛ: “ ‘ Placer ’ ses enfants — Est-ce la voie de la sagesse ? ” Aniaan nga be o e sran ble mɛn’n i afiɛn lɔ’n, ɔ nin be nga be o wia atɔliɛ lɔ bue liɛ’n su’n, be sunman lika b’a kwlá kannganman ndɛ akpasua sɔ’n nun wie. Afin blɛ sɔ nun’n nn be nin a kaciman Zoova i Lalofuɛ. Ɔ maan, e fali ndɛ akpasua sɔ’n i nun ndɛ wie mun e wlali Ɲanmiɛn Sielɛ Blɛ junman fluwa nga nun. I liɛ’n, é kwlá sí ndɛ sɔ’n i su akunndan nga Zoova bu’n.

1. ?Wafa sɛ yɛ e sran ble mun e bu ba mun ɔn?

¹ ?Ngue ti yɛ be fa be mma’m be wlɛ i sran uflɛ sa nun ɔn? Kannzɛ mɛn nun ninnge sunman be su kaci­kaci’n, sanngɛ e sran ble mun e liɛ’n, e te di ninnge wie’m be su. I wie yɛle kɛ e waan ba nga be wu i sa’n, ɔ timan i awuliɛ siɛ nin niɛn be ngunmin be liɛ. Sanngɛ, ɔ ti be osufuɛ’m be liɛ wie. Be kusu’n, be bu ba sɔ’n kɛ be klun ba sa. Ɔ maan like nga be fa yo be klun ba’n, be kwla fa yo i wie. I sɔ’n ti’n, be bu be ɲanndra kɛ: “Sran kunngba yɛ ɔ wu ba’n niɔn sanngɛ sran ngba yɛ ɔ tɛ i ɔ.”

2, 3. a) ?Ngue ti yɛ siɛ nin niɛn wie’m be fa be mma’m be wlɛ i sran uflɛ sa nun ɔn? b) ?Ye benin yɛ ba nga be fa wlɛ i sran uflɛ sa nun’n, ɔ kwlá diman wie ɔ? ?Ngue ti ɔ? (An nian kuku’n nun.)

² I sɔ’n ti’n, sɛ wienun ɔn ba’n i si nin i nin be wu’n, ɔwuliɛ’m be osufuɛ’m be sisiman be bo, be fa aika ba’n be sie be wun. Sanngɛ sɛ e fa wie’n i ndɛ’n e sie i bue kun’n, blɛ sunman nun’n, sika ndɛ’n ti yɛ siɛ nin niɛn wie’m be fa be mma’m be wlɛ i sran uflɛ sa nun ɔn. Yɛle kɛ, kɛ mɔ siɛ nin niɛn’m be ti yalɛfuɛ mɔ ba kpanngban o be sa nun’n, be kwla se kɛ sɛ be wa kun annzɛ nɲɔn be ko tran be osufuɛ kun m’ɔ le sika’n i wun’n, ɔ flunman. Afin be waan be osufuɛ sɔ’n kwla nian ba’m be lika. Yɛle kɛ ɔ kwla wla be suklu, ɔ kwla to tralɛ man be. Kusu sɛ be tɔ tukpaciɛ’n, ɔ kwla yo be are, kpɛkun ɔ kwla man be aliɛ. Ɔ maan nán kɛ siɛ nin niɛn sɔ’m be kloman be mma mun ti ɔ. Sanngɛ be kunndɛ kɛ cɛn wie lele’n, be mma’m be yo kpa i ti yɛ be fa be be wla sran uflɛ sa nun ɔn.

³ Like ti yɛ be yo i sɔ’n, i kun ekun yɛle kɛ be kunndɛ kɛ ba’m be wɔ suklu. Atrɛkpa’n, lika nga be tran lɛ’n, suklu sua nunman koko lɛ. Ɔ o mmua kpa. Kusu’n, ɔ kwla yo kekle man awlobofuɛ mun kɛ be tu be klɔ’n su be wɔ klɔ uflɛ su naan ba’m b’a kwla wɔ suklu. I sɔ’n ti’n, siɛ nin niɛn’m be kwla se kɛ bé fá be mma’m bé wlá be osufuɛ nga ɔ o klɔ sɔ’n su i sa nun naan ba’m b’a kwla wɔ suklu.

4. ?Biblu’n nun ndɛ nɲɔn benin yɛ ɔ fata kɛ aniaan kun fɛ i ɲin sie su ɔ?

⁴ Ɔ ti cinnjin kɛ ba’m be nin Zoova be afiɛn’n mantan. Sulɛ m’ɔ fata kɛ ba’n su Zoova’n yɛ ɔ ti cinnjin tra like kwlaa ɔ. Siɛ nin niɛn mun yɛ ɔ fata kɛ be uka be mma mun naan be nin Zoova be afiɛn’n w’a mantan kpa ɔ. Ɲanmiɛn mɔ ngwlɛlɛ talie’n o i sa nun’n yɛ ɔ fali junman sɔ’n wlali be sa nun ɔn. Ɲanmiɛn seli Izraɛlifuɛ nga ba o be sa nun’n kɛ: “Maan mmla nga n su fa man amun ndɛkɛn yɛ’n be ka amun klun. Amun fa kle amun mma mun, sɛ amun ti amun awlo lɔ, amun kan, sɛ amun wo atin su amun su kɔ lika o, amun kan, sɛ amun wa la o, sɛ amun tinnge o, amun kan.” (Mml. 6:​6, 7) Afɔtuɛ kunngba’n yɛ akoto Pɔlu mannin siɛ mun ɔn. Ɔ seli kɛ: “Nán an yo sa b’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.”​—⁠Efɛ. 6:⁠4.

5. ?Sɛ e fa e mma mun e wlɛ i e osufuɛ wie sa nun’n, e wa’n ɔ nin Zoova be afiɛn’n wá yó sɛ?

⁵ ?Sɛ e fali e wa kun e wlɛli i e osufuɛ mɔ be suman Zoova’n be sa nun’n, be kwla ‘tɛ i kpa e Min’n liɛ’n su, yɛ be tu i fɔ, be kle i ngwlɛlɛ’? Sɛ sika annzɛ suklu ndɛ ti yɛ e yo maan e mma’m be nin Zoova be afiɛn ti nun’n, be flɛ i kɛ sinnzin yɛ y’a di ɔ!

6. ?Sɛ e fa ba’n e wlɛ i e niaan Zoova i Lalofuɛ kun i sa nun’n, e kwla se kɛ ndɛ’n i ti kpɛli? ?Ngue ti ɔ?

⁶ ?Yɛ sɛ e fa e wa’n e wlɛ i e niaan Zoova i Lalofuɛ kun i sa nun’n nin? Nanwlɛ, ɔ flunman kɛ e fɛ i e wla i sa nun tra kɛ e fɛ i e wla be nga be suman Zoova’n be sa nun. Sanngɛ ndɛ wie ti’n, i sɔ yolɛ’n kusu timan su. Yɛle kɛ, awlo uflɛ nga ba’n wá trán nun’n, ɔ nin sran uflɛ nga ɔ́ wún be’n, ɔ nin sa uflɛ nga bé wá jú’n, be kwla sɛnngɛn i akunndan’n. Wie’m be liɛ’n, be akunndan’n m’ɔ sanngan sɔ’n, ɔ kaci i liɛ tukpaciɛ. Wie mun ekun be fite janvuɛ tɛ’m be su. Wie mun kusu’n, Zoova sulɛ’n timan be nanndoliɛ kun.

7. a) ?Ngue yɛ ɔ fata kɛ siɛ nin niɛn’m be yo naan be mma’m b’a klo Zoova ɔ? b) ?Like cinnjin benin yɛ ɔ kwla fi ba’n i sa ɔ?

⁷ Siɛ nin niɛn’m be si kɛ nán be ja nun lɛ yɛ ba kun, ɔ́ ká lɛ kló Zoova ɔ. Ɔ fata kɛ siɛ nin niɛn’m be yo ninnge mun ngwlɛlɛ su naan be tra be awlɛn. Sɛ i sɔ’n timan pɔpɔ manman siɛ nin niɛn mɔ be si be wa’n kpa’n, nán aniaan nin i yi nga é fá e wa’n é wlɛ́ i be sa nun’n, yɛ ɔ́ yó pɔpɔ mán be ɔ. Maan siɛ nin niɛn’m be bu i akunndan kpa yɛ be fa wlɛ i Zoova sa nun. ?Be wa mɔ bé fá wlɛ́ i sran uflɛ sa nun’n, ɔ su kpɛman ndɛ uflɛ baman? Afin anannganman nguan’n kwla fi ba’n i sa.

8. ?Kɛ nga 1 Timote 5:8 fa kan’n sa’n, junman benin yɛ be fa wlali siɛ nin niɛn’m be sa nun ɔn?

⁸ Siɛ nin niɛn mun yɛ ɔ fata kɛ be bu wafa nga bé fá afɔtuɛ ng’ɔ o 1 Timote 5:8 nun’n i su’n, i akunndan ɔn. Be klɛli i lɔ kɛ: “Sran ng’ɔ niɛn-mɛn i fuɛ’m be lika’n ɔ ti tɛ, nga b’ɔ ti tɛ’n tra su’n yɛlɛ sran ng’ɔ niɛn-mɛn i bɔbɔ i awlo’n i lika’n, ɔ ti-man Nyanmiɛn sufuɛ, i tɛ liɛ’n tra sran ng’ɔ lafi-man Krist su’n.” Atrɛkpa’n, asamian’n ti’n, siɛ nin niɛn’m be bɔbɔ be kwlá nianman be mma’m be lika kpa sa. Sɛ ɔ ti sɔ’n, ajalɛ nga be ko fa naan be wa’n ɔ nin Zoova be afiɛn’n w’a mantan kpa’n, maan be fa.

9. ?Sɛ siɛ nin niɛn’m be nian Biblu’n nun mmla’n su nanti titi’n, i bo’n gúa’n sɛ mán be?

⁹ Ɲanmiɛn Zoova yɛ ɔ man ba mun ɔn. (Jue. 127:⁠3) I sɔ’n ti’n, maan be ndɛ lo amun yɛ maan be tran amun wun. Amun klo be naan be kusu be klo amun. Amun uka be naan cɛn wie lele’n, be nin Zoova be afiɛn’n mantan kpa. Afin sɛ amun yo sɔ’n, bé ɲán anannganman nguan. Ɔ maan atrɛkpa’n, be nga Zan ukali be naan b’a su Zoova’n, be su ndɛ nga ɔ kannin’n, amún wá kán wie. Ɔ seli kɛ: “Sa fi jɔ-man n klun kɛ kɛ n ti i kɛ m mma’m be di nanwlɛ titi’n sa.”​—⁠3 Zan 4.

[Kuku, bue 4]

Aniaan nga be osufuɛ wie fɛli i wa’n wlali be sa nun’n, annzɛ kusu, be nga be nian sran wie i wa’n i lika mɔ be tannin be kalɛ’n, nán maan be bui kɛ, kɛ mɔ be ti Zoova i sufuɛ’n ti’n, Ɲanmiɛn klun jɔ́ ba sɔ’n i wun. Afin nán be yɛ be ti ba’n i awuliɛ siɛ’n annzɛ i awuliɛ niɛn’n niɔn. Ɔ maan ye nga Ɲanmiɛn yo siɛ nin niɛn nin be klun mma mun’n, ba sɔ’n diman su wie. (1 Kor. 7:14) Sanngɛ, kɛ ba’n te o be sa nun’n, maan be tu be klun be kle i Ɲanmiɛn i Ndɛ’n. Sɛ ɔ tie naan ɔ nian su nanti’n, ɔ́ ɲán su mmlusuɛ.