LIKE SUANLƐ 40
?É yó sɛ naan y’a yo sanwun Zoova ɲrun?
Siɛ nin niɛn’m be klo kɛ be mma’m be yo sanwun. I wie yɛle kɛ kwlaa naan ba kaan kun w’a wɔ suklu’n, ɔ ju wie’n niɛn’n ukɛ i naan w’a buɛbuɛ i wun. Ɔ wunnzin i, yɛ ɔ wlɛ i tralɛ yɛin. I wafa kunngba’n e Si Zoova kunndɛ kɛ e bɔbɔ ɔ nin e ninnge mun e yo sanwun. Asa’n, ɔ kunndɛ kɛ e ijɔlɛ nin e ayeliɛ’n nun, ɔ nin akunndan nga e bu’n nun’n e kle kɛ e ti sanwun wie. Kɛ e ti sanwun’n e bɔbɔ e ɲan su ye, kpɛkun i sɔ’n manman Zoova.
1. ?É yó sɛ naan e bɔbɔ nin e ninnge mun y’a yo sanwun?
Zoova se e kɛ: “Ɔ fata kɛ amun yo sanwun.” (1 Piɛli 1:16) Sran ng’ɔ ti sanwun’n, i bɔbɔ ɔ nin i ninnge’m be ti yɛinyɛin, yɛ i ayeliɛ’n ti kpa. Ɔ maan ɔ wunnzin titi, ɔ kpu i tralɛ mun, kpɛkun ɔ yo maan i awlo’n, ɔ nin i loto annzɛ i moto’n be ti yɛin titi. Asa’n, ɔ fata kɛ e yo Ɲanmiɛn Sielɛ Sua’n i sanwun wie. Kɛ e ti sanwun’n i sɔ’n manman Zoova.—2 Korɛntifuɛ Mun 6:3, 4.
2. ?Kɛ ɔ ko yo naan y’a yo sanwun’n ngue yɛ ɔ fataman kɛ e yo-ɔ?
Biblu’n se e kɛ “e wla ninnge nga be saci sran i wunnɛn’n nin i akunndan’n be kwlaa be ase.” (2 Korɛntifuɛ Mun 7:1) Ɔ maan e mian e ɲin e kpalo ninnge kwlaa nga be kwla saci e wunnɛn’n ɔ nin e akunndan’n. Ɔ fata kɛ Zoova i klun jɔ akunndan nga e bu’n su. I sɔ’n ti’n, e mian e ɲin e kpalo akunndan tɛtɛ mun. (Jue Mun 104:34) Asa ekun’n e mian e ɲin naan ndɛ tɛ w’a finman e nuan w’a fiteman.—Kanngan Kolɔsufuɛ Mun 3:8 nun.
?Ngue ekun yɛ é yó naan e ninnge’m b’a yo yɛin naan kusu’n e ayeliɛ’n w’a yo kpa-ɔ? Ninnge wie’m be o lɛ’n be kwla saci e wunnɛn’n. I wie yɛle asra gualɛ’n, nin siklɛti nɔnlɛ’n. I wie ekun yɛle betɛli mma annzɛ koka nɲa kpisalɛ’n, annzɛ drɔgi nɔnlɛ’n. Kɛ e kpalo ninnge sɔ mun’n tukpacɛ wie’m be to fuan e, kpɛkun e kle kɛ nguan’n ti e cinnjin. Kɛ mɔ e kunndɛ kɛ é yó sanwun’n ti’n, e kpalo ayeliɛ kɛ be yasua lika annzɛ be bla lika mɔ be kan nun ngowa sa’n, yɛ kusu’n e nianman bian nin bla nna nga be fa fite nzra nun’n. (Jue Mun 119:37; Efɛzifuɛ Mun 5:5) Wie liɛ’n, kɛ ɔ ko yo naan y’a wla ayeliɛ kwlaa sɔ’m be ase’n, ɔ kwla yo kekle. Sanngɛ Zoova kwla uka e naan y’a yo sɔ.—Kanngan Ezai 41:13 nun.
SI NDƐ’N NUN KPA EKUN
Kɛ e ti sanwun’n wafa nga i sɔ’n manman Zoova’n é wá kɛ́n i ndɛ. Asa’n. é wá wún wafa nga e kwla wla ayeliɛ tɛ wie mɔ be kwla saci e’n be ase’n.
3. Kɛ e bɔbɔ nin e ninnge mun be ti sanwun’n i sɔ’n manman Zoova
Kɛ e fa e ɲin e sie i mmla nga Zoova fa mannin Izraɛlifuɛ mun laa’n su’n e wun kɛ ɔ klo sanwun yolɛ’n. An kanngan Ezipti Lɔ Tulɛ 19:10; 30:17-19 nun, i sin’n an koko kosan yɛ’m be su yalɛ:
?Kɛ e nian ndɛ mma nga’m be nun’n, wafa sɛ yɛ Zoova bu be wun sanwun yolɛ’n niɔn?
?Ninnge benin mun yɛ sɛ e yo be titi’n, e bɔbɔ ɔ nin e ninnge mun é yó sanwun-ɔn?
Kannzɛ e sa nun yoman fɛ-o, annzɛ sɛ lika nga e tran lɛ’n timan sanwun-o, e kwla mian e ɲin e yo sanwun. An bo VIDEO’N, i sin an koko kosan yɛ’n i su yalɛ.
?Kɛ e bɔbɔ ɔ nin e ninnge mun e ti sanwun’n wafa sɛ yɛ jasin nga e bo’n ɔ ɲan ɲrun-ɔn?
4. Wla ayeliɛ tɛtɛ’m be ase
Zoova kwla uka e naan y’a wla ayeliɛ tɛ’m be ase.
Sran ng’ɔ nɔn siklɛti annzɛ drɔgi’n, kɛ ɔ ko yo naan ɔ yaci i sɔ yolɛ’n ɔ timan pɔpɔ. ?Ngue yɛ ɔ kwla ukɛ i-ɔ? Sɛ a nɔn siklɛti annzɛ drɔgi’n, bu wafa nga i bo’n gúa’n i akunndan. An kanngan Matie 22:37-39 nun. I sin’n, an koko wafa nga siklɛti annzɛ drɔgi nɔnlɛ’n i bo’n gua’n i su yalɛ.
?Wafa sɛ yɛ ninnge sɔ’m be kwla saci e nin Zoova e afiɛn-ɔn?
?Wafa sɛ yɛ be kwla yo e awlofuɛ mun ɔ nin e wiengu’m be tɛ-ɔ?
?Wafa sɛ yɛ sran kun kwla wla ayeliɛ tɛ wie ase-ɔ?a An bo VIDEO’N.
An kanngan Filipufuɛ Mun 4:13 nun, i sin’n an koko kosan yɛ’n i su yalɛ:
?Wafa sɛ yɛ Ɲanmiɛn srɛlɛ’n, nin Biblu’n nun like suanlɛ’n, ɔ nin aɲia’m be bo tranlɛ’n ɔ kwla uka sran kun naan w’a wla ayeliɛ tɛ wie ase-ɔ?
5. Wla ayeliɛ nga be saci sran akunndan’n be ase
An kanngan Kolɔsufuɛ Mun 3:5 nun, i sin’n an koko kosan yɛ’m be su yalɛ:
?Ngue ti yɛ e kwla se kɛ bian nin bla nna nga be fa fite nzra nun’n, ɔ nin be yasua lika’n, annzɛ be bla lika’n i nun ngowa kanlɛ’n, annzɛ aɔwi tɛtɛ mɔ be di be pɔɔtablu nun’n be ti like tɛ Ɲanmiɛn ɲrun-ɔn?
?Kɛ Zoova se e kɛ maan e ayeliɛ’n yo kpa’n a bu i kɛ i sɔ’n ti su? ?Ngue ti-ɔ?
?Wafa sɛ yɛ e kwla mian e ɲin naan y’a kpalo akunndan tɛtɛ mun-ɔn? An bo VIDEO’N.
Zezi fali sunnzun ase kun kleli kɛ ɔ fata kɛ e fa ajalɛ yakpa su naan y’a kwla ka sanwun titi. An kanngan Matie 5:29, 30 nun, i sin’n an koko kosan yɛ’n i su yalɛ:
Ndɛ nga Zezi kannin’n kleman kɛ ɔ fata kɛ e yo e wun like yaya. Sanngɛ ɔ su se kɛ ɔ fata kɛ e fa ajalɛ yakpa su. ?Ajalɛ benin yɛ sran kun kwla fa naan w’a kpalo akunndan tɛtɛ mun-ɔn?b
Sɛ a su mian ɔ ɲin kpa naan w’a wla akunndan tɛtɛ bulɛ’n i ase’n, Zoova bu ɔ ɲin mɔ a mian’n i like dan. An kanngan Jue Mun 103:13, 14 nun, i sin’n an koko kosan yɛ’n i su yalɛ:
?Sɛ a su mian ɔ ɲin kpa naan w’a wla ayeliɛ tɛ wie ase’n, wafa sɛ yɛ Biblu’n nun ndɛ mma nga wla ɔ fanngan naan ɔ sa sin w’a bubuman wɔ-ɔ?
Nán maan ɔ sa sin bubu wɔ mlɔnmlɔn!
Ɔ ju wie’n a kwla se wɔ wun kɛ: ‘N mian min ɲin sanngɛ ɔ yoman ye. Ɔ maan min sa sin w’a bubu min.’ Sanngɛ nán ɔ wla fi su kɛ sran ng’ɔ su si wanndilɛ nun akplowa’n, kannzɛ i ja kwla kpla annzɛ ɔ tɔ’n i sɔ’n kleman kɛ i ɲin ng’ɔ miannin’n ti ngbɛn. I wafa kunngba’n, sɛ a su mian ɔ ɲin naan w’a wla ayeliɛ tɛ wie ase naan a tɔ sa sɔ’n i yolɛ nun ekun’n, i sɔ’n kleman kɛ ɔ ɲin nga a miɛnnin i lele’n ɔ ti ngbɛn. Sanngɛ ɔ fata kɛ a mian ɔ ɲin titi. Ɔ maan nán ɔ sa sin bubu wɔ. Zoova fanngan nun’n, a kwla wla ayeliɛ tɛ’n i ase.
SRAN WIE’M BE WAAN: “N su kwlá kaciman le, min liɛ su-ɔ.”
?Biblu’n nun ndɛ mma benin yɛ a kwla fa uka sran sɔ’n naan w’a wun i wlɛ kɛ Zoova fanngan nun’n, ɔ kwla wla ayeliɛ tɛ’n i ase-ɔ?
NDƐ’N I KPƆLƐ BOLƐ
Kɛ e nian e wun lika’n, mɔ e kpalo akunndan tɛtɛ mun’n, mɔ e nzuɛn’n ti kpa’n e kle kɛ e ti sanwun Zoova ɲrun, yɛ i sɔ’n jɔ i klun.
Ndɛ’n i nun flanlɛ
?Ngue ti yɛ ɔ ti cinnjin kpa kɛ e yo sanwun-ɔn?
?Ngue yɛ á yó naan ɔ bɔbɔ nin ɔ ninnge mun b’a yo sanwun-ɔn?
?Ngue yɛ é yó naan e akunndan’n nin e ayeliɛ’n b’a yo kpa Ɲanmiɛn ɲrun-ɔn?
NDƐ WIE MUN EKUN
?Kannzɛ bɔbɔ e sa nun yoman fɛ’n ninnge benin mun yɛ e kwla yo naan e bɔbɔ nin e ninnge mun b’a yo sanwun-ɔn?
Ninnge nga a kwla yo naan w’a yaci siklɛti nɔnlɛ’n.
“?Ngue yɛ á yó naan w’a yaci siklɛti nɔnlɛ’n niɔn?” (An tinnge nun ndɛ)
Bian nin bla nna nga be fa fite nzra nun’n i su ndɛ.
Like ng’ɔ ukali bian kun naan w’a wla bian nin bla nna nga be fa fite nzra nun’n i nianlɛ’n i ase’n.
“W’a yoman pɔpɔ, sanngɛ n kwla wlɛli i ase” (Sasafuɛ Tranwlɛ’n nun ndɛ)
a Ndɛ ng’ɔ suan “?Ngue yɛ á yó naan w’a yaci siklɛti nɔnlɛ’n niɔn?” kan ninnge nga be kwla uka sran kun naan w’a wla ayeliɛ tɛ wie ase’n be ndɛ. Ɔ o ndɛ akpasua ng’ɔ suan Ndɛ Wie Mun Ekun nun lɔ.
b Sɛ a kunndɛ kɛ á wlá ayeliɛ tɛ mɔ yɛle be yasua lika annzɛ be bla lika i nun ngowa kanlɛ’n i ase’n, kanngan ndɛ ng’ɔ suan “?Ngue yɛ ń yó naan m’an wla be yasua lika annzɛ be bla lika’n i nun ngowa kanlɛ’n i ase-ɔ?” i nun. Ɔ o fluwa Gbanflɛn nin talua’m be kosan mun: Be su tɛlɛ’n uka be nun.