“Mɛn ng’ɔ o yɛ’n ɔ cɛman”

‘Nja mun, an nian ndɛ nga ń kán klé amun’n yɛ: e ɲrun a ka koko.’—1 KORƐNTFUƐ MUN 7:29.

1, 2. ?Mɛn’n nun ninnge mɔ be cɛman be kaci’n be nzɔliɛ mennin yɛ amun sieli ɔ?

?KƐ BE wuli amun lele m’ɔ́ fá jú andɛ’n, mɛn’n nun ninnge mɔ be cɛman be kaci’n, be nzɔliɛ mennin yɛ amun sieli ɔ? ?Amun kwla kan ninnge sɔ’m be nun wie’m be ndɛ? Be nun wie yɛle kɛ, sran’m be ayre yolɛ nun’n, dɔɔtrɔ’m b’a ɔ be ɲrun kpa. Ɔ maan laa nun klɔ wie’m be su’n, sɛ be waan sran’n w’a cɛ o, yɛle afuɛ ablenun (50). Sanngɛ sran’m be ayre yolɛ sɔ’n ti’n, siɛn’n, sran’m be cɛ lele be di afuɛ ableso (70) tra su! I wie ekun yɛle kɛ, andɛ sran kun kwla ɲɛn i bɔbɔ i aladio, annzɛ televiziɔn, annzɛ selilɛli, annzɛ mannzin nga kɛ be klɛ fluwa’n, be fa wla nun m’ɔ ko to sran ndɛndɛ kpa’n (fax). Like nga e wla kwlá fiman su ekun’n yɛle kɛ, sran’m be fluwa klelɛ nun’n, ɔ nin ninnge kɛ loto annzɛ alapla sa’n, yɛ mmla nga be kpɛ be fa sasa sran’n, be nun’n, sran’m b’a ɔ be ɲrun dan kpa. Ɔ maan sran kpanngban be mɛn dilɛ’n ɔ ɲan ɲrun.

² Sanngɛ, nán ninnge’m be kacilɛ’n i wafa kwlaa yɛ ɔ yoli kpa mannin sran mun ɔn. Afin amun e nian. Sran kunlɛ’n w’a kaci ngowa like siɛn’n. Sran’m be buman nzuɛn ng’ɔ ti kpa’n i like fi kun. Drɔgi nɔnlɛ’n w’a kaci kɛ aliɛ dilɛ sa. Sran’m be ja be wun nglɛmun’n, be yra be wun nnɔsua. Ninnge’m be gua’n ɔ yo dan kɔ i ɲrun cɛn kwlaa, yɛ kakawlonga sa’m be trulɛ mɔ b’a tru’n be ndɛ liɛ’n, be kɛnmɛn i lele. I sɔ ngalɛ’n kwlaa nun’n, e wun kɛ ndɛ nga akoto Pɔlu kannin i osu w’a cɛ kpa’n, ɔ ti nanwlɛ. I waan: ‘Mɛn nga ɔ o yɛ’n ɔ cɛman.’—1 Korɛntfuɛ Mun 7:31.

3. ?Kɛ Pɔlu seli kɛ ‘mɛn nga ɔ o yɛ’n ɔ cɛman’n,’ ngue su yɛ i angunndan’n ɔli ɔ?

³ Kɛ Pɔlu kán ndɛ sɔ’n, ɔ fali mɛn’n nun ninnge mɔ be cɛman be kaci’n fa sunnzunnin like kɛ anɔ yilɛ’n sa. Anɔ sɔ’n i yifuɛ mun yɛle politikifuɛ mun, ɔ nin Ɲanmiɛn sulɛ wafa mun, yɛ sran nga be dunman w’a fu’n. Yɛ kɛ sran kun ko wie i like liɛ’n yo’n, nn sran uflɛ w’a sin i osu’n nun. Be boli anɔ sɔ’n i yilɛ’n bo w’a cɛ kpa. Laa nun’n, kɛ famiɛn kun ko fa mɛn’n, ɔ kwla tran bia’n su afuɛ ya naan blɛblɛblɛ i blɛ liɛ’n w’a sin. Sanngɛ e blɛ liɛ nun’n, ɔ timan sɔ kun mlɔnmlɔn. Afin wie liɛ’n, sran’m be kun famiɛn’n i bia’n su, annzɛ be tu i kekle su. Kɛ ɔ ko yo sɔ’n, nn lika’n w’a ka lɛ w’a kaci! Nanwlɛ, mɛn’n i sukusuku m’ɔ su yo kɔ́’n ti’n, e kwlá siman ainman ndɛ.

4. (a) ?Mɛn’n nun sa mɔ be ti kɛ anɔ yilɛ sa’n i bue mennin yɛ ɔ fata kɛ Klistfuɛ’m be nian ɔn? (b) ?Like nɲɔn mennin mɔ be kle weiin kɛ mɛn uflɛ’n w’a mantan koko’n, yɛ é wá fá e ɲin síe be su ɔ?

⁴ Sɛ mɛn’n ti kɛ anɔ yilɛ sa naan i yifuɛ mun yɛle mɛn’n i siefuɛ mun’n, anɔ’n i nianfuɛ mun yɛle Klistfuɛ muna. Yɛ kɛ mɔ ‘be timan mɛn nunfuɛ’n’ ti’n, sɛ anɔ yifuɛ’m be wun kpɛ o, annzɛ be wun kpɛman o, nán i li su yɛ be ɲin o ɔ (Zan 17:16). Sanngɛ, wafa nga anɔ sɔ’n ɔ́ wíe’n, i li yɛ be wun blibli be kɛ bé wún i ɔ. Afin, be si kɛ mɛn tɛ kain nga ɔ́ núnnún kwlaa ka naan Zoova w’a siesie mɛn uflɛ kpa mɔ Klistfuɛ’m be minndɛ i w’a cɛ kpa’n.b I sɔ’n ti’n, amun e fa e ɲin e sie i like nɲɔn su. Like nɲɔn sɔ’n, bé klé e weiin kɛ e o mɛn nga i blɛ kasiɛn nun naan e su wa wlu mɛn uflɛ’n nun. I klikli’n yɛle Biblu’n nun blɛ’n ɔ nin sa’m be nun kpɛkpɛlɛ’n. Yɛ i nɲɔn su’n yɛle mɛn’n i sacilɛ m’ɔ su saci kɔ́ i ɲrun’n.—Matie 24:21; 2 Piɛr 3:13.

Be wunnin ndɛ nga be ti fiawa’n be wlɛ

5. ?Blɛ mennin yɛle ‘be mɔ be timan Zuifu’n be blɛ’n?’ ?Yɛ ngue ti yɛ blɛ sɔ’n ti e cinnjin ɔn?

⁵ Blɛ’m be nun kpɛkpɛlɛ’n, yɛle blɛ’n ɔ nin sa nga be ju blɛ sɔ’m be nun’n, be su like suanlɛ’n. Zezi kannin blɛ kun mɔ Ɲanmiɛn wá yáci sran’m be lɛ naan be sie mɛn’n, i ndɛ. Ɔ flɛli blɛ sɔ’n kɛ: ‘Be mɔ be timan Zuifu’n be blɛ.’ (Lik 21:24). I klikli nun’n, kɛ ‘blɛ sɔ’n’ i nuan ko ju’n, Ɲanmiɛn Sielɛ Blɛ mɔ Zezi yɛ ɔ ti i nun Famiɛn’n, ɔ́ ‘kwlá i kpɔfuɛ mun’ (Jue Mun 110:2). Kpɔkun i sin’n, kɛ nga Daniɛl 2:44 fa kannin’n sa’n, Ɲanmiɛn i Famiɛn Diwlɛ’n “núnnún famiɛn diwlɛ kun nga mun,” mɔ yɛle sran’m be famiɛn diwlɛ liɛ mun’n be kwlaa’n, kpɔkun i bɔbɔ ɔ́ ká lɛ tititi.

6. ?Wafa sɛ e kwla si ‘be mɔ be timan Zuifu’n be blɛ’n,’ i bo bolɛ’n, ɔ nin afuɛ nga ɔ di’n, ɔ nin i awieliɛ blɛ’n niɔn?

⁶ ?Blɛ mennin nun yɛ ‘be mɔ be timan Zuifu’n be blɛ’ sɔ’n i nuan jú mɔ Ɲanmiɛn Sielɛ Blɛ’n ɔ́ fá kwlalɛ’n niɔn? Kosan sɔ’n i su tɛlɛ’n ɔ́ yó “fiawa lele saan awieliɛ blɛ’n ɔ́ jú.” Ninnge nga bé úka e naan y’a tɛ kosan sɔ’n su’n, be nun kun yɛle Biblu’n nun blɛ ɔ nin sa’m be nun kpɛkpɛlɛ’n (Daniɛl 12:9). Kɛ “blɛ” sɔ’n ɔ́ kɔ́ i bue nuan’n, Zoova tikeli ndɛ’n su blɛblɛblɛ kleli sran wun ase kanfuɛ akpasua kaan nga be suan Biblu’n nun like’n. Ɲanmiɛn wawɛ’n maan be sili kɛ, kɛ afuɛ 607 nun laa blɛ liɛ nun be sacili Zerizalɛmu klɔ’n, yɛ ‘be mɔ be timan Zuifu’n be blɛ’n,’ ɔ boli i bo ɔ, naan “blɛ” sɔ’n ɔ́ dí afuɛ 2.520 naan i nuan w’a ju. Ɔ maan kɛ be bubuli blɛ’m be nun’n, be wunnin i wlɛ kɛ ‘be mɔ be timan Zuifu’n be blɛ’n,’ i nuan juli afuɛ 1914 nun. Be wunnin i wlɛ ekun kɛ mɛn tɛ kain nga i awieliɛ’n boli i bo afuɛ 1914 sɔ’n nun. ?Wafa nga be bubuli blɛ’m be nun m’ɔ tɔli afuɛ 1914 nun’n, amun mɔ amun ti Biblu’n nun like suanfuɛ’n, amun kwla fa Biblu’n be yiyi nun?c

7. ?Biblu’n nun ndɛ mma mennin mun yɛ be uka e naan y’a si “afuɛ nso” nga Daniɛli fluwa’n kɛn i ndɛ’n i bo bolɛ’n, ɔ nin afuɛ nga ɔ́ dí’n, ɔ nin i awieliɛ’n niɔn?

⁷ Like nga mɔ maan e kwla yiyi blɛ sɔ nun’n, i kun o Daniɛli i fluwa’n nun. Kɛ Zoova maan afuɛ 607 nun L.B.N, Nɛbikadnɛzali m’ɔ ti Babilɔni famiɛn’n ɔ sacili Zerizalɛmu klɔ’n, i sɔ’n nun yɛ ‘be mɔ be timan Zuifu’n be blɛ’n’ ɔ boli i bo ɔ. Kɛ ɔ yoli sɔ’n, Zoova bɔbɔ kleli famiɛn sɔ’n kɛ ɔ́ yáci famiɛn’m be lɛ maan bé síe mɛn’n lele ɔ́ dí afuɛ nso. Afuɛ nso sɔ’n ti nzɔliɛ like (Ezekiɛl 21:26, 27; Daniɛl 4:16, 23-25). ?Sanngɛ afuɛ nso sɔ’n ɔ ti cɛn nɲɛ? Sa Nglo Yilɛ 11:2, 3; ɔ nin 12:6, 14, be kle kɛ afuɛ nsan nin sin’n, ɔ ti cɛn ba akpi kun cɛn ba ya nɲɔn cɛn ba ablesiɛn (1.260). Ɔ maan e wun i wlɛ kɛ afuɛ nso sɔ’n, ɔ ti afuɛ nsan nin sin’n i sɔ fa nɲɔn. Yɛle kɛ, ɔ ti cɛn ba akpi nɲɔn ya nnun cɛn ba ablaɔn (2. 520). ?Sanngɛ afuɛ nso sɔ m’ɔ ti nzɔliɛ like’n i bo tutulɛ’n, i ngba yɛle ngalɛ’n? Cɛcɛ. Afin ndɛ nga Zoova kan kleli Ezekiɛli m’ɔ ti Daniɛli i blɛ su sran’n, ɔ uka e maan e wun afuɛ sɔ m’ɔ ti nzɔliɛ like’n i wlɛ kpa ekun. Zoova seli Ezekiɛli kɛ: ‘Cɛn ba kun nga ḿ mían wɔ mɔ á dí’n, ɔ nin afuɛ nuan kun mɔ be dili i sa tɛ yolɛ nun’n bé sɛ́.’ (Ezekiɛl 4:6). Ɔ maan e kwla wun kɛ, afuɛ nso sɔ m’ɔ ti nzɔliɛ like’n, ɔ ti afuɛ 2.520. Kɛ mɔ e si kɛ afuɛ 607 nun yɛ be mɔ be timan Zuifu’n be blɛ’n ɔ boli i bo’n, naan ɔ́ dí afuɛ 2.520 ti’n, e wun kɛ be blɛ’n sɔ’n i nuan’n yiali afuɛ 1914 nun.

“Awieliɛ blɛ’n” w’a ju sakpa

8. ?Kɛ ɔ fɛ i afuɛ 1914 nun lele m’ɔ́ fá jú andɛ’n, sa mennin mun yɛ be kle kɛ mɛn’n w’a saci sakpa ɔ?

⁸ Kɛ ɔ fɛ i afuɛ 1914 nun lele m’ɔ́ fá jú andɛ’n, mɛn’n nun sa’m be kle weiin kɛ ndɛ nga y’a dun mmua yiyi nun m’ɔ taka Biblu’n nun blɛ’m be nun kpɛkpɛlɛ’n su’n, ɔ ti nanwlɛ. Zezi bɔbɔ seli kɛ alɛ kunlɛ nin awe m’ɔ́ kpɛ́n’n, ɔ nin tukpaciɛ m’ɔ sa ndɛndɛ’n, bé yó “mɛn’n i awieliɛ’n” i nzɔliɛ’n (Matie 24:3-8; Sa Nglo Yilɛ 6:2-8). Kɛ ɔ fɛ i afuɛ 1914 nun lele m’ɔ́ fá jú andɛ’n, ninnge sɔ mun yɛ e wun be sakpa ɔ. Akoto Pɔlu kan guali su ekun kɛ, ayeliɛ nga sran’m bé yí i nglo be wiengu’m be lika’n, ɔ́ káci. Wafa ng’ɔ kannin sran’m be ayeliɛ’n i kacilɛ sɔ’n i ndɛ’n, ɔ kpɛn su sɛsɛsɛ e kwlaa e ɲin bo lɛ andɛ.—2 Timote 3:1-5.

9. ?Kɛ be fa be ɲin sie i sa nga be juli mɛn’n nun afuɛ 1914 nun lele m’ɔ́ fá jú andɛ’n be su’n, ndɛ mennin yɛ sran nɲɔn be kannin ɔn?

⁹ ?Kɛ ɔ fɛ i afuɛ 1914 nun m’ɔ́ fá jú andɛ’n, ‘mɛn nga ɔ o yɛ’n’ ɔ cɛman, yɛ w’a kaci sakpa ɔ? Fluwa La génération de 1914 (angl.) nun’n, Robert Wohl m’ɔ ti fluwa sifuɛ dan kun’n ɔ seli kɛ: “Be nga alɛ dan klikli’n yoli be ɲrun’n, angunndan nga be bu i titi’n yɛle kɛ, afuɛ 1914 nun Utu anglo nun’n, mɛn kun wieli naan uflɛ boli i bo.” Dr. Jorge A. Costa Silva, ɔ ti mɛn wunmuan nunfuɛ’m be anuannzɛ nga ɔ nian sran’m be aunkpinndiɛ’n su’n (Organisation mondiale de la santé), i su kpɛnngbɛn’n kun. Kɛ ɔ́ klé kɛ ndɛ nga Robert Wohl kannin’n ɔ ti nanwlɛ’n, ɔ seli kɛ: “Mɛn nga é dí yɛ’n ɔ cɛman naan w’a kaci. Ngokoɛ nin awlaboɛ nga i sɔ’n man sran mun’n, awlanmannun be nin a wunmɛn i sɔ le.” ?Amun bɔbɔ amun sieli i nzɔliɛ sɔ wie?

10. ?Wafa sɛ yɛ Biblu’n maan e si sran nga ti yɛ kɛ ɔ fɛ i afuɛ 1914 nun lele m’ɔ́ fá jú andɛ’n, mɛn’n w’a yo tɛ’n niɔn?

¹⁰ ?Klunwifuɛ mennin ti yɛ mɛn’n w’a yo tɛ dan sɔ’n niɔn? Sa Nglo Yilɛ 12:7-9 ɔ yi i sɔfuɛ i nglo. I waan: ‘Alɛ tɔli Ɲanmiɛn su lɔ. Misɛli [Zezi Klist] nin i anzi’m be nin dragɔn [mmusu’m be si Satan] nin i anzi’m be kunnin. Dragɔn’n w’a ɲanman jranwlɛ, b’a mɛnmɛn i nin i anzi’m be lika ɲanmiɛn su lɔ kun. Be kannin dragɔn sroesroe dan sɔ’n ɔ nin i anzi’m be bo guali asiɛ’n su wa. [...]. I yɛ ɔ laka mɛn wunmuan’n nunfuɛ’m be kwlaa’n niɔn.’ Kɛ mɔ mmusu’m be si Satan yɛ ɔ ti lika sannganfuɛ’n, mɔ afuɛ 1914 nun be kɛnnin i bo ɲanmiɛn su lɔ’n ti’n, ‘asiɛ’n nin jenvie’n, amun yako! Afin mmusu’m be si Satan’n w’a ba amun wun wa ya su yɛle kɛ ɔ si kɛ i cɛn’n w’a sɔnman kun.’—Sa Nglo Yilɛ 12:10, 12.

Wafa nga mɛn’n i nun sa kasiɛn’n ɔ́ jú’n

11. (a) ?Ajalɛ mennin yɛ Satan fa laka ‘mɛn wunmuan nunfuɛ mun’ ɔn? (b) ?Ngue yɛ Satan wlɛ i wun ase kpa ɔ yo mɔ akoto Pɔlu fa e ɲin sie su ɔ?

¹¹ Kɛ ɔ fɛ i afuɛ 1914 nun’n, Satan si kɛ i cɛn’n w’a sɔnman kun. I sɔ’n ti’n, ɔ wlɛ i wun ase kpa laka ‘mɛn wunmuan nunfuɛ mun’ ekun tra su. Satan yɛ titi nvialiɛ nun’n, ɔ yo maan mɛn siefuɛ mun nin be nga be kpɛ ninnge uflɛ’m be yolɛ ba’n, be yo maan mɛn’n nun ninnge’m be fite nzra nun’n niɔn (2 Timote 3:13; 1 Zan 5:19). Sa kun nga ti yɛ Satan laka sran mun sɔ’n yɛle kɛ, ɔ kunndɛ kɛ sran’m be bu i kɛ i bɔbɔ Satan’n i mɛn sielɛ liɛ’n yɛ ɔ kwla man alaje dilɛ kpafuɛ’n niɔn. I sɔ liɛ mɔ sɛ é kwlá sé’n ɔ bo i ndolo sin’n, ɔ ɲan ta kpa sran’m be su. Ɔ maan, kannzɛ bɔbɔ sran’m be wun jrɛiin kɛ mɛn’n ɔ yo tɛ kɔ i ɲrun titi’n, sanngɛ be lafi su kɛ lika’n wá yó kpa mán be. Akoto Pɔlu seli kɛ, ka naan mɛn tɛ nga w’a nunnun’n, sran’m bé síe ndɛ kun nzɔliɛ kpa weiin. Ndɛ sɔ’n ɔ fin Satan. Ɔ seli kɛ: ‘Kɛ sran’m bé sé kɛ: “Y’a ɲan e ti, y’a di alaje’n,” kpɔkun ɲrɛnnɛn dan kpa tɔ́ be su kɛ wunnzɛfuɛ i ba wulɛ aklunya’n tɔ i su’n sa.’—1 Tɛsalonikfuɛ Mun 5:3; Sa Nglo Yilɛ 16:13, 14.

12. ?E blɛ liɛ nun alaje dilɛ’n i wun ajalɛ mennin yɛ sran’m be miannin be ɲin be fali ɔ?

¹² Afuɛ koko nga’m be nun’n, ajalɛ fanunfanun nga politikifuɛ’m be fɛli i alaje dilɛ’n i lika’n, ndɛ mma ‘y’a ɲan e ti, y’a di alaje’n,’ ɔ fiteli be nuan nun kpa. I wie yɛle kɛ, be tɔnnin afuɛ akpi kun ya ngwlan afuɛ ablaɔcuɛ nin nsiɛn’n (1986) i dunman kɛ asiɛ wunmuan’n su alaje dilɛ afuɛ (Année internationnale de la paix). Sanngɛ nn sran’m b’a diman alaje kɛ nga be fa flɛli afuɛ sɔ’n sa’n. Kɛ nga e wun i lɛ’n, mɛn siefuɛ’m be mian be ɲin naan sran’m be di alaje. ?Sanngɛ i sɔ’n yɛ ɔ ti 1 Tɛsalonikfuɛ Mun 5:3 i nun ndɛ’n i su kpɛnlɛ’n, annzɛ kusu sa dan ngunmin kun m’ɔ́ wá jú sran kwlaa be ɲrun’n, yɛ ɔ́ yó ndɛ sɔ mɔ Pɔlu kannin’n i su kpɛnlɛ’n niɔn?

13. ?Kɛ sran’m bé kpán sé kɛ: ‘Y’a ɲan e ti, y’a di alaje’n,’ Pɔlu fali ɲrɛnnɛn ng’ɔ́ wá jú’n sunnzunnin ngue? ?Yɛ ngue yɛ i sɔ’n kle e ɔ?

¹³ Kɛ mɔ Biblu’n nun ndɛ nga b’a dun mmua kpɛn su’n, annzɛ be su kpɛn su e ɲrun’n, mɔ be ti yɛ e kwla wun sa kun i wlɛ kpa’n ti’n, ɔ fata kɛ e tran e minndɛ. Like ng’ɔ fata kɛ e sie i nzɔliɛ’n yɛle kɛ, kɛ ɲrɛnnɛn dan kpa’n wá tɔ́ sran’m be su’n, be kpanlɛ mɔ bé wá kpán sé kɛ: ‘Y’a ɲan e ti, y’a di alaje’n,’ Pɔlu fa sunnzunnin wunnzɛfuɛ’n i ba wulɛ aklunya’n. Lele mɔ anglo ngwlan fá jú’n, wunnzɛfuɛ’n ɔ sie i nzɔliɛ kɛ ba’n su kaci sran i ku sɛ’n nun lɔ. Yɛle kɛ wie liɛ’n, ɔ kwla ti i wa’n i awlɛn ba’n m’ɔ si kpukpukpu’n, annzɛ ba’n i wun kpɛlɛ m’ɔ kpɛ’n. Cɛn wie bɔbɔ’n, ba’n ɔ sisi i nin’n i klun. Kɛ kuɛ’n tín’n, nn ba’n ɔ́ kplí kpa ekun. Ba’n yo sɔ lele kpɔkun cɛn kun’n, aklunya w’a tɔ bla’n su. Cɛn sɔ nun’n, bla’n si kɛ i ba wulɛ w’a ju naan ɔ su wa fite nun. Kɛ ɔ yo sɔ’n, bla’n si kɛ cɛn sɔ’n ti i ba wulɛ cɛn, kpɔkun w’a wu ba’n sakpa. I sɔ kunngba’n, kpanlɛ nga sran’m bé kpán bé sé kɛ ‘y’a ɲan e ti, y’a di alaje’n,’ i sin ɲrɛnnɛn ng’ɔ́ jú’n ɔ́ fú be nun. Sanngɛ, cɛn sɔ’n mán alaje dilɛ. Afin, mɛn tɛ’n ɔ́ núnnún kpɔkun é wlú mɛn uflɛ’n nun.

14. ?Wafa sɛ yɛ sa nga bé wá jú e ɲrun lɔ’n bé sú be wun su ɔ? ?Yɛ be kwlaa be bɔ’n gúa sɛ?

¹⁴ Ɲrɛnnɛn dan sɔ m’ɔ su wa ju’n, ɔ́ yó Klistfuɛ kpa be ɲin bo lɛ, yɛ ɔ́ wlá be srɛ dan kpa. I klikli nun’n, asiɛ’n su famiɛn mun (Satan i mɛn’n i akpasua nga ɔ yo Politiki’n) bé kpɛ́ be ɲin Babilɔni klɔ dan’n (Ɲanmiɛn sulɛ wafa tɛtɛ’m be ti Satan i mɛn’n i akpasua’n i kun ekun) i nunfuɛ’m be su, kpɔkun bé núnnún be mlɔnmlɔn (Sa Nglo Yilɛ 17:1, 15-18). I sin’n, be su wunman sa ti’n, kpɔkun Satan i mɛn’n i akpasua sɔ’m bé búbú be wun nun yɛ sran kun ɔ́ kún i wiengu. I sɔ nun’n, Satan su kwlá jranman be (Matie 12:25, 26). Nanwlɛ, Zoova ɔ́ sé asiɛ’n su famiɛn’m be kɛ ‘be yo i bɔbɔ Ɲanmiɛn i klun sa’n.’ Yɛle kɛ, bé núnnún asiɛ’n su Ɲanmiɛn sulɛ wafa tɛtɛ mun. Kpɔkun, kɛ be ko nunnun Ɲanmiɛn sulɛ wafa sɔ mun ko wie’n, Zezi ɔ́ dún mmua ɲanmiɛn su lɔ alɛ kunfuɛ’m be ɲrun, kpɔkun bé núnnún Satan i aata dilɛ nin i politiki mɛn’n mlɔnmlɔn. I agualiɛ su’n, bé cí Satan. Ɔ maan ɔ su kwlá yoman like fi kun. Sa kasiɛn sɔ’n, yɛ ɔ́ yó Satan i mɛn’n i awieliɛ mlɔnmlɔn kɛ anɔ yilɛ fa wie sa’n niɔn.—Sa Nglo Yilɛ 16:14-16; 19:11-21; 20:1-3.

15, 16. ?Kɛ mɔ e si kɛ ‘e ɲrun a ka koko’n’ ti’n, ngue yɛ ɔ fata kɛ e yo ɔ?

¹⁵ ?Sanngɛ cɛn mennin yɛ sa sɔ’m bé jú ɔ? Nanwlɛ, e siman cɛn’n ɔ nin i dɔ’n (Matie 24:36). Sanngɛ, like nga e si i’n yɛle kɛ, ‘e ɲrun a ka koko.’ (1 Korɛntfuɛ Mun 7:29). I sɔ’n ti’n, ɔ ti cinnjin kpa kɛ e fa blɛ nga ɔ ka lɛ’n e yo ninnge mun ngwlɛlɛ su. ?Wafa sɛ? Kɛ nga akoto Pɔlu fa kan sa’n, ‘nán e tran lɛ ngbɛn.’ Sanngɛ, maan e fa blɛ nga e le i’n e yo like ng’ɔ yo sa ye’n i cɛn kwlaa. ?Ngue ti ɔ? “Afin blɛ nga e o nun yɛ’n ti tɛ.” Ɔ maan, sɛ e ‘mian e ɲin kɛ é sí like nga e Min’n [Zoova, NW] klo kɛ e yo’n,’ e su saciman blɛ nga e le i m’ɔ ti nanndoliɛ’n.—Efɛzfuɛ Mun 5:15-17; 1 Piɛr 4:1-4.

¹⁶ ?Kɛ mɔ e si kɛ mɛn tɛ wunmuan’n i sacilɛ’n w’a mantan koko’n ti’n, ngue yɛ ɔ fata kɛ e yo ɔ? Fluwa nga akoto Piɛli klɛli’n ɔ uka e. I waan: ‘?Sɛ ninnge sɔ’n kwlaa bé sáci sɔ’n, like onin yɛ sɛ an yo ɔ ɔ ti su ɔ? Maan amun nzuɛn’n yo kpa, yɛ án fá amun wun mántan Ɲanmiɛn!’ (2 Piɛr 3:11). Ɛɛn, i sɔ ninnge mun yɛ ɔ fata kɛ e yo be ɔ! Afɔtuɛ ng’ɔ o Piɛli i ndɛ’n nun’n yɛle kɛ i klikli nun’n, maan e nzuɛn’n yo kpa. Yɛ i nɲɔn su’n, i waan maan e fa e wun mantan Ɲanmiɛn, yɛ e nian kpa, sɛ e juejue yolɛ Zoova i junman’n dilɛ nun’n ɔ yi klolɛ nga e fa klo i’n i nglo o.

17. ?Satan i aya mennin yɛ ɔ fata kɛ Klistfuɛ kpa’m be sasa be wun i lika titi ɔ?

¹⁷ Kannzɛ bɔbɔ mɛn’n kle e ninnge nga e ɲin kwla ka be sin’n, sanngɛ Ɲanmiɛn mɔ e klo i’n ti’n, e su faman mɛn sɔ’n i dilɛ’n e ciciman e ti. Nanwlɛ, kɛ mɔ e si kɛ mɛn yɛ’n ɔ́ wá wíe’n ti’n, ɔ fataman kɛ e klo i nun ninnge mun ngboko naan e fɛ i dilɛ’n e cici e ti. Ɔ maan, kannzɛ bɔbɔ e o mɛn’n nun yɛ e di nun junman’n, sanngɛ Biblu’n nun afɔtuɛ nga ɔ se kɛ nán e ɲin blo i nun ninnge’m be kunndɛlɛ’n su ngboko’n, ɔ fata kɛ e fa su (1 Korɛntfuɛ Mun 7:31). I kpa bɔbɔ’n, ɔ fata kɛ e sasa e wun ninnge nga mɛn’n fa kle e m’ɔ blɔ be cɛn kwlaa’n, be lika. Mɛn yɛ’n su kwlá yiman e su sa mun le. I kpa bɔbɔ’n, ɔ su kaman lɛ tititi. ?Ngue ti yɛ e kwla se sɔ ɔ? Ɔ fin ndɛ nga Biblu’n kan’n. I waan: ‘Mɛn’n nin i nun ninnge kwlaa mɔ sran ɲin blo su’n, bé wíe, sanngɛ sran ng’ɔ yo Ɲanmiɛn klun sa’n, ɔ́ ká lɛ tititi.’—1 Zan 2:17.

Mɛn kpafuɛ’n w’a mantan koko!

18, 19. ?Ninnge’m be kacilɛ mennin yɛ é wá wú be mɛn uflɛ’n nun ɔn? ?Yɛ ngue ti yɛ e kwla se kɛ blɛ sɔ’n i minndɛlɛ’n ɔ timan e wun yalɛ klelɛ ngbɛn ɔn?

¹⁸ Ɔ ka kaan sa Zoova wá núnnún Satan nin i minniɛn mun. Sanngɛ, ɔ́ yó maan “mɛn’n” uflɛ’n i nun junman nga i sufuɛ nga bé ɲán be ti’n bé dí’n, ɔ́ ká lɛ tititi. Be su kunman alɛ kun. Afin, Ɲanmiɛn yó maan ‘kɛ ɔ fɛ i lele m’ɔ́ fá jú mɛn’n i awieliɛ lɔ’n, alɛ kunlɛ’n w’a wie.’ (Jue Mun 46:10). Awe’n su kpɛnman kun. Afin, ‘ble’n ɔ́ sú lele ɔ́ bú mɛn’n nun. [...], be wun kɛ aunmuan’n keje ble ja kpanngban.’ (Jue Mun 72:16). Bisua nin polisi sua mun, ɔ nin bian nin bla kunndɛlɛ sukusuku’n ɔ nin i nun tukpaciɛ m’ɔ sa ndɛndɛ’n be su tranman lɛ kun. Drɔgi aata difuɛ mun, ɔ nin yasua nin bla mɔ be yra’n, ɔ nin junman diwlɛ m’ɔ be saci’n, yɛ kakawlonga sa’m be su tranman lɛ kun.—Jue Mun 37:29; Ezai 33:24; Sa Nglo Yilɛ 21:3-5.

¹⁹ Sran kpanngban nga be wuli’n bé cɛ́n, yɛ sɛ bé sá be sin asiɛ’n su wa ekun. Nanwlɛ, kɛ sran nga mɔ wie’n ti’n, be nin be awlɛn su sran’m be tili nun w’a cɛ kpa mɔ bé wá wún be wun ekun, mɔ bé tɔ́ be wun nun’n, amun nian aklunjuɛ mɔ i sɔ’n ɔ́ mán ɔn! I agualiɛ su’n, sran kwlaa bé sú Zoova (Sa Nglo Yilɛ 5:13). Kɛ ninnge kwlaa sɔ’m be ko yo’n, asiɛ wunmuan’n káci mɛn klanman. ?Kɛ amun bu i sɔ liɛ’n i angunndan’n, ɔ yo amun sɛ? Nanwlɛ, e su kwlá traman e awlɛn i blɛ sɔ’n nun. Ɔ maan, é sé kɛ: ‘Ee, y’a kleman e wun yalɛ y’a minndɛman ngbɛn!’

[Ja ngua lɛ ndɛ mun]

?Wafa sɛ yɛ amún tɛ́ kosan’m be su ɔ?

• ?Kɛ akoto Pɔlu seli kɛ ‘mɛn nga ɔ o yɛ’n ɔ cɛman’n,’ wafa sɛ yɛ ndɛ sɔ’n ti nanwlɛ e blɛ liɛ’n nun ɔn?

• ?Wafa sɛ yɛ Biblu’n nun blɛ’m be nun kpɛkpɛlɛ’n ɔ uka e maan e wun ‘be mɔ be timan Zuifu’n be blɛ’n’ i nuan’n i yialɛ’n niɔn?

• ?Wafa sɛ yɛ mɛn’n nun sa mɔ be su yo tɛ kɔ́ i ɲrun’n, ɔ kle kɛ mɛn’n i awieliɛ’n ɔ boli i bo afuɛ 1914 nun sakpa ɔ?

• ?Kɛ mɔ e si kɛ ‘e ɲrun a ka koko’n’ ti’n, ngue yɛ ɔ fata kɛ e yo ɔ?