5 ?Ninfan yɛ blɛ benin nun yɛ ɔ fata kɛ e srɛ Ɲanmiɛn ɔn?
ATRƐKPA’N amun a sie i nzɔliɛ le kɛ Ɲanmiɛn sulɛ wafawafa’m be kplan sua dandan mun, be siesie be ye naan sran’m be srɛ Ɲanmiɛn nun. Kpɛkun be kle Ɲanmiɛn srɛlɛ dɔ’n. ?Biblu’n kle dɔ nin lika trele kun sa m’ɔ fata kɛ e srɛ Ɲanmiɛn ɔn?
Biblu’n kle kɛ ɔ le blɛ ng’ɔ nin Ɲanmiɛn srɛlɛ’n fata ɔ. I wie yɛle kɛ ka naan Zezi nin i sɔnnzɔnfuɛ’m b’a di like’n, ɔ lali Ɲanmiɛn i ase. (Lik 22:17) Asa ekun’n, kɛ i sɔnnzɔnfuɛ’m be yiali kɛ bé sú Ɲanmiɛn’n, be srɛli likawlɛ. Ɔ maan like sɔ mɔ Zuifu’m be yo i be Ɲanmiɛn ndɛ suanlɛ nin i srɛlɛ sua’m be nun ɔ nin Ɲanmiɛn i sua’n nun Zerizalɛmu lɔ’n, yɛ be yoli i titi ɔ. Ɲanmiɛn waan ɔ fata kɛ i sua’n yo “nvle-nvle’m be kwlaa be Nyanmiɛn srɛlɛ sua.”—Mark 11:17.
Kɛ Ɲanmiɛn i sufuɛ’m be yia be srɛ i’n, be srɛlɛ’n i bo’n kwla gua kpa. Sɛ be akunndan’n ti kun naan srɛlɛ nga be srɛ be man be’n, ɔ taka Biblu’n nun akunndan’n su’n, ɔ yo Ɲanmiɛn i fɛ. Ɔ maan srɛlɛ sɔ’n kwla yo maan Ɲanmiɛn yo like nga w’a sunnzunman kɛ ɔ́ yó’n bɔbɔ. (Ebre Mun 13:18, 19) Zoova i Lalofuɛ’m be aɲia’m be bo’n, be srɛ Ɲanmiɛn titi. É yía amun kɛ amun wɔ Ɲanmiɛn Sielɛ Sua ng’ɔ mantan amun wun koko lɛ’n nun, naan amun bɔbɔ amun ko tie i sɔ srɛlɛ’n wie.
Kusu Biblu’n kleman blɛ nin lika trele kun sa mɔ be nun cɛ yɛ e kwla srɛ Ɲanmiɛn ɔn. Biblu’n nun’n, e wun kɛ Ɲanmiɛn i sufuɛ’m be srɛli i dɔ kwlaa su ɔ nin lika kwlaa. Zezi seli kɛ: “Sanngɛ ɔ liɛ’n, kɛ a nin Nyanmiɛn amún kókó yalɛ’n, wlu ɔ sua ba’n nun lɔ nyin anuan’n naan a nin ɔ Si b’ɔ o nvialiɛ nun’n amu’an ijɔ, yɛ ɔ Si b’ɔ wun nvialiɛ nun sa’n, ɔ́ wá yó wɔ mo.”—Matie 6:6.
I sɔ liɛ’n su e bo kɛ e srɛ Ɲanmiɛn. E nin nglo nin asiɛ’n be su Famiɛn’n e kwla koko e afiɛn yalɛ blɛ kwlaa nun. Kpɛkun e kwla lafi su kɛ ɔ́ fɛ́ i su síe e nuan bo. Ɔ maan e wun i wlɛ weiin kɛ i sɔ’n ti yɛ kpɛ sunman Zezi cuɛnnin i wun ko srɛli Ɲanmiɛn’n niɔn! Cɛn kun’n, ɔ srɛli Ɲanmiɛn lele aliɛ fa cɛnnin i. Ɔ kunndɛli kɛ Ɲanmiɛn kle i atin naan w’a fa ajalɛ cinnjin kpa kun.—Lik 6:12, 13.
Biblu’n nun’n, kɛ sa cinnjin wie’m be tɔli sran wie’m be su’n annzɛ ɔ fatali kɛ be fa ajalɛ cinnjin wie mun’n, be srɛli Ɲanmiɛn. Wie liɛ’n be man be nɛn’n su be srɛ. Wie liɛ kusu’n, be srɛ i be klun lɔ. Kɛ be nin be wiengu’m be o’n, yɛ kɛ be ngunmin be o’n be srɛ. Like ng’ɔ ti cinnjin’n, yɛle kɛ be srɛli Ɲanmiɛn. I kpa’n, Ɲanmiɛn wlɛ i sufuɛ’m be fanngan kɛ: “An koko yalɛ kle Nyanmiɛn titi, nán an yaci.” (1 Tɛsalonikfuɛ Mun 5:17) Ɔ klo kɛ ɔ́ fɛ́ i su síe i be nga be yo i klun sa’n, be srɛlɛ’n bo tititi. ?E wunman kɛ, kɛ Zoova se e kɛ e srɛ i sɔ’n, ɔ yi klolɛ m’ɔ klo e’n i nglo?
Kusu mɛn tɛ yɛ’n nun’n, sran sunman be usa be wun sɛ Ɲanmiɛn srɛlɛ’n kwla yo be wun sa ye o. Ɔ maan e kwla usa e wun kɛ: ‘?Ɲanmiɛn srɛlɛ’n kwla yo min ye sakpa?’
[Ndɛ kwle, bue 9]
E kwla srɛ Ɲanmiɛn blɛ kwlaa nun nin lika kwlaa.