Nán like wie ti’n aɲrunɲan’n to fuan e

“Sanngɛ sran ng’ɔ kɛn i wun ase’n ɔ nyan nyrun.”​—NYA. 29:23.

?AMÚN TƐ́ SU SƐ?

?Aɲrunɲan benin yɛ Ɲanmiɛn kwla man e ɔ?

?Ngue ti yɛ aɲrunɲan ng’ɔ fin Ɲanmiɛn’n, ɔ kwla to fuan e ɔ?

?Wafa sɛ yɛ e awlɛn tralɛ’n kwla yo sran uflɛ i aɲrunɲan like ɔ?

1, 2. (a) ?Ebre nun’n, ndɛ mma nga Wawe’n kaci i kɛ “ɔ le ɲrun’n,” like benin yɛ be fa kɛn i ndɛ ɔ? (b) ?Kosan benin yɛ é wá yíyí be nun like suanlɛ nga nun ɔn?

?KƐ BE se kɛ like kun “le ɲrun’n,” ngue yɛ amun ka lɛ bu i akunndan ɔn? ?Ninnge nga Ɲanmiɛn yili be mɔ be yo ɲɛnmɛn’n, be su yɛ amun akunndan’n kɔ ɔ? (Jue. 19:2) ?Annzɛ kusu manmanlɛ mɔ be manman aɲanbeunfuɛ mun’n, annzɛ ngwlɛlɛfuɛ mun’n, annzɛ be nga be liɛ yoli ye’n, i su yɛ amun akunndan’n kɔ ɔ? Biblu’n nun’n, Ebre nun ndɛ mma nga Wawle’n kaci i kɛ “ɔ le ɲrun’n,” be fa kan like ng’ɔ yo nɔnnin’n i ndɛ. Laa nun’n, sika ɔkwlɛ annzɛ jɛtɛ ufue yɛ be fa yi sika mma ɔ. Sika mma ng’ɔ yo nɔnnin’n, i yɛ ɔ le ɲrun ɔn, yɛ be bu i like dan ɔn. Ɔ maan sɛ be se kɛ like kun “le ɲrun’n,” nn like sɔ’n be bu i like nanndoliɛ dan.

² Titi’n, sran’m be manman be nga be le kwlalɛ’n, annzɛ be nga be dunman’n w’a fu’n. ?Sanngɛ Ɲanmiɛn liɛ’n, ngue su yɛ ɔ jran naan w’a se kɛ sran kun le ɲrun ɔn? Nyanndra Mun 22:4 se kɛ: “Sran nga b’ɔ kɛn i wun ase b’ɔ i nyin yi Anannganman’n, ɔ nyɛn i wun. Sran wun i-ɔ, i nyin yi i. Ɔ cɛ.” Zezi i sɔnnzɔnfuɛ Zaki kusu seli kɛ : “An yo amun wun aenvuɛ e Min Nyanmiɛn’n i nyrun, yɛ ɔ maan amún nyán nyrun.” (Zak 4:10) ?Aɲrunɲan nga Zoova man sran kun’n yɛle benin? ?Ngue yɛ ɔ kwla tanndan sran kun ɲrun mɔ i ti’n, aɲrunɲan sɔ’n kwla to fuɛn i ɔ? ?Yɛ wafa sɛ yɛ e kwla uka sran uflɛ naan w’a ɲan ɲrun ɔn?

3-5. ?Wafa sɛ yɛ Zoova yo naan y’a ɲan ɲrun ɔn?

³ Jue tofuɛ’n lafili su kɛ Zoova trɛ́ i sa fama’n, naan ɔ́ fɛ́ i sín aɲrunɲan atin’n su. (An kanngan Jue Mun 73:23, 24 nun.) ?Wafa sɛ yɛ Zoova yo naan be nga be ɲin yi i’n, b’a ɲan ɲrun ɔn? Wafa ng’ɔ yo i sɔ liɛ’n yɛle kɛ i klun jɔ be wun, yɛ ɔ yra be su ninnge wafawafa kpanngban nun. I wie yɛle kɛ, ɔ uka be naan b’a wun i klun sa’n i wlɛ. Kpɛkun, ɔ man be atin naan be fa be wun mɛntɛn i.​—1 Kor. 2:7; Zak 4:8.

⁴ Asa ekun’n, jasin fɛ’n bolɛ junman m’ɔ ti aɲrunɲan like’n, Zoova fa wla e sa nun kɛ e di. (2 Kor. 4:1, 7) Junman sɔ’n kusu ti’n, e ɲan ɲrun. Be kwlaa nga be di junman sɔ’n kɛ bé fá mánmán Zoova naan kusu bé úka sran uflɛ’n, Zoova bo be kasiɛ. Ɔ se kɛ: “Be nga be bu min sran’n, ḿ bú be sran.” (1 Sam. 2:30) Nanwlɛ, be nga be di i sɔ junman’n, Zoova yo maan be ɲan ɲrun. Kpɛkun wie liɛ’n, be wiengu Klistfuɛ’m be kan be ndɛ klanman.​—Nya. 11:16; 22:1.

⁵ ?Ngue yɛ Zoova waan ɔ́ yó mán sran nga i ɲin yi i’n niɔn? Biblu’n waan: “Ɔ́ [Zoova] dí wɔ nɛnnɛn, mɛn’n ɔ́ yó ɔ liɛ. Klunwifuɛ’m be nunnunlɛ’n ɔ́ yó ɔ nyrun.” (Jue. 37:34) Ɔ maan, Ɲanmiɛn i sufuɛ’m be wla kwla tran su kɛ bé ɲán anannganman nguan.​—Jue. 37:29.

“N KUNNDƐ-MAN KƐ SRAN BO N DUNMAN”

6, 7. ?Ngue ti yɛ sran kpanngban b’a lafiman su kɛ Zezi yɛ ɔ ti Mɛsi’n niɔn?

⁶ ?Ngue yɛ ɔ kwla tanndan sran kun ɲrun naan w’a ɲanman ɲrun Zoova sa nun ɔn? Wie liɛ’n, be nga be nin Ɲanmiɛn be nantiman klanman’n, e kwla bu be ndɛ liɛ’n i cinnjin dan. I sɔ yɛ Zezi i blɛ su kpɛnngbɛn wie’m be yoli ɔ. Kɛ akoto Zan kán be ndɛ’n, ɔ seli kɛ: “Zuif kpɛnngbɛn’m be nun kpanngban be lafili Jésus su, sanngɛ Farizifuɛ’m be ti, b’a yi-man be wun nglo. Sɛ be yoli sɔ’n, wuun be kannin be bo Nyanmiɛn ndɛ suanlɛ nin i srɛlɛ sua’n nun. Afin be klo dunman nga sran’m be bo be’n tra nga Nyanmiɛn bo be’n.” (Zan 12:42, 43) Sɛ ɔ ti kɛ Zuifu kpɛnngbɛn sɔ’m b’a buman Farizifuɛ’m be ndɛ nga be kan’n i cinnjin w’a traman Zezi liɛ’n, nn ɔ yoli kpa mannin be.

⁷ Zezi kannin like nga ti yɛ sran sunman b’a lafimɛn i su kɛ ɔ ti Mɛsi’n, i ndɛ weiin. (An kanngan Zan 5:39-44 nun.) Ka naan Mɛsi’n w’a ba’n, Izraɛlifuɛ’m be ɲin trɛnnin i sin afuɛ ya kpanngban kpa. Kɛ Zezi boli like klelɛ bo’n, sran wie’m be wunnin i wlɛ kɛ ndɛ nga Ɲanmiɛn nuan ijɔfuɛ Daniɛli kannin’n, ɔ kle kɛ Mɛsi’n i balɛ’n w’a ju. Blɛ wie nun bɔbɔ’n, sran’m be buli i kɛ Zan batɛmu yofuɛ’n yɛ ɔ ti Mɛsi’n niɔn. (Lik 3:15) Sanngɛ kɛ Mɛsi mɔ be minndɛli i lele’n bali’n, Mmla klefuɛ’m b’a lafimɛn i su. ?Ngue ti ɔ? Zezi tuli sa nga ti yɛ b’a lafimɛn i su’n i ɲin. Ɔ seli kɛ: “?Amun bɔ an klo kɛ amun wiengu bo amun dunman’n, bɔ an klo-man kɛ Nyanmiɛn b’ɔ ti kunngba cɛ’n yɛ ɔ bo amun dunman’n, ɔ́ yó sɛ yɛ amún kwlá láfi i su-ɔ?”

8, 9. ?Ngue ti yɛ sran’m be klo kɛ be wiengu’m be bo be dunman tra kɛ Ɲanmiɛn bo be dunman ɔn? Amun fa kannin’n i kpajalɛ’n i su sunnzun ase be yiyi nun.

⁸ Sran’m be klo kɛ be wiengu’m be bo be dunman tra kɛ Ɲanmiɛn bo be dunman’n. Ɔ maan aɲrunɲan ng’ɔ fin Ɲanmiɛn’n, ɔ to fuan be. Kɛ ɔ ko yo naan y’a wun like nga ti yɛ ɔ ti sɔ’n, maan e fa kannin’n i kpajalɛ’n i su sunnzun ase. Nglo lɔ ninnge nga be kpaja’n, be diman be yalɛ. Atrɛkpa’n, kɛ lika’n ko san mɔ nzraama’m bé kpája’n, amun a wun i le. Nanwlɛ, be kpajalɛ’n yo klanman dan. (1 Kor. 15:40, 41) Sanngɛ blɔfuɛ klɔ wie’m be su kannin’m be kpajalɛ ti’n, nzraama’m be wunlɛ’n ti kekle. ?Ngue ti ɔ? ?Kannin nga be o akpɔ’m be nuan’n, ɔ nin balɔn towlɛ’m be nun’n, ɔ nin sua fleinflein’m be su’n, be kpajalɛ’n tra nzraama’m be liɛ’n ti ɔ? Cɛcɛ. Kɛ mɔ klɔ’m be su kannin’m be o sran’m be wun koko’n, i ti yɛ nzraama’m be wunlɛ’n ti kekle’n niɔn. Sɛ be waan bé wún nzraama’m be kpajalɛ klanman’n, saan bé kɔ́ lika wie mɔ blɔfuɛ klɔ kannin nunman lɔ’n.

⁹ I kunngba’n yɛle sran’m be ɲrun dunman kunndɛlɛ’n, ɔ nin aɲrunɲan m’ɔ fin Ɲanmiɛn’n i kunndɛlɛ’n. Yɛle kɛ sɛ sran kun klo sran ɲrun dunman kunndɛlɛ’n, ɔ su wunman aɲrunɲan m’ɔ fin Ɲanmiɛn’n i cinnjin m’ɔ ti’n. Sran kpanngban be sɔman jasin fɛ’n nun, afin be sro be janvuɛ nin be osufuɛ’m be nuan’n. Ɔ kwla yo Zoova i sufuɛ bɔbɔ wie’m be sɔ. I wie yɛle kɛ, be kwla se gbanflɛn annzɛ talua kun kɛ ɔ bo jasin fɛ’n lika kun m’ɔ si sran kwlaa lɛ’n, i nun. Sanngɛ, lika sɔ’n i nunfuɛ’m be siman kɛ ɔ ti Zoova i Lalofuɛ. ?I lɛ’n niɔn, srɛ kún i kɛ ɔ ko bo jasin’n annzɛ srɛ su kunmɛn i? Sa kun ekun yɛ. Jasin bofuɛ kun kunndɛ kɛ ɔ́ úka junman ng’ɔ di man Zoova su. I sɔ’n ti’n i wiengu’m be sri i. ?Ɔ́ fɛ́ i ɲin síe i wiengu sɔ mɔ be buman Zoova i junman i like’n, be aeliɛ’n su? Wie liɛ kusu’n, ɔ kwla yo Klistfuɛ kun mɔ w’a yo sa tɛ wie’n. ?Junman mɔ be kwla le i sa nun asɔnun nun’n, annzɛ i janvuɛ nin i osufuɛ m’ɔ kwla bo be wla’n ti’n, ɔ́ fía su? Sɛ Zoova i janvuɛ tralɛ’n ti i cinnjin kpa’n, ɔ́ kó wún asɔnun kpɛnngbɛn’m be wun naan be ukɛ i.​—An kanngan Zak 5:14-16 nun.

10. (a) ?Sɛ e koko wafa nga sran’m bé bú e’n i su ngboko’n, wafa sɛ yɛ i bo’n kwla gua man e ɔ? (b) ?Sɛ e ti wun ase kanfuɛ’n, ngue yɛ e kwla lafi su kɛ é ɲɛ́n i ɔ?

¹⁰ Maan ɔ yo kɛ, e mian e ɲin naan é káci Klistfuɛ kpa kun sa, sanngɛ aniaan bian kun man e afɔtuɛ blɛ sunman. ?E bɔbɔ e kpa yolɛ ti’n, é sɔ́ afɔtuɛ’n nun klanman? ?Annzɛ tutre’n ti’n, é bú e su nun waka, afin e kunndɛ e bɔbɔ e dunman fɛ? ?Annzɛ kusu’n, ndɛ nga be kan kle e’n, kɛ ɔ yo naan e fa su’n, é kán e liɛ uflɛ? Maan ɔ yo ekun kɛ, e nin e niaan Klistfuɛ wie mun e su di junman likawlɛ sa. E tu e klun e di junman’n, yɛ e ajalɛ liɛ’n i su yɛ be nian be di junman’n niɔn. Kpɛkun junman’n di kpa. ?Like ng’ɔ́ yó e cinnjin’n yɛle kɛ wan yɛ i dunman fíte nun ɔn? Sɛ sa kwlaa sɔ’m be nun kun tɔ amun su’n, maan amun si kɛ “sran ng’ɔ kɛn i wun ase’n ɔ nyan nyrun.”​—Nya. 29:23.

11. ?Wafa sɛ yɛ ɔ fata kɛ e bu mo nga be yo e’n niɔn? ?Ngue ti ɔ?

¹¹ Asɔnun kpɛnngbɛn nin aniaan kwlaa nga be mian be ɲin be di junman asɔnun’n nun naan be uka be junman’n su’n, ɔ fata kɛ be nian be wun kpa naan b’a kunndɛman kɛ ‘sran wie bo be dunman.’ (1 Tɛs. 2:6; 1 Tim. 3:1) ?Sɛ aniaan wie i junman’n dili kpa naan be yo i mo’n, wafa sɛ yɛ ɔ́ tɛ́ su ɔ? Ɔ fataman kɛ ɔ yo kɛ Famiɛn Saili mɔ i wun manmanlɛ ti’n, ɔ ko kplannin nzɔliɛ like kun’n sa. (1 Sam. 15:12) Sanngɛ ɔ fata kɛ ɔ wun i wlɛ kɛ, Zoova dunman nun ti yɛ ɔ kwla dili junman’n niɔn, naan sɛ i junman’n dí kpa cɛn uflɛ’n, ɔ fin Zoova kunngba’n. (1 Piɛ. 4:11) Wafa nga e awlɛn’n nun lɔ e bu mo nga be yo e’n, sɛ Ɲanmiɛn annzɛ sran ɲrun dunman yɛ e kunndɛ’n, i sɔ liɛ’n yi i nglo.​—Nya. 27:21.

‘AN KLO KƐ AMÚN YÓ AMUN SI I KLUN SA’

12. ?Ngue ti yɛ Zuifu wie’m b’a tieman ndɛ nga Zezi kannin’n niɔn?

¹² Like kun ekun m’ɔ kwla yo naan y’a ɲanman ɲrun Zoova ɲrun’n, yɛle e konvi tɛ’n. E konvi tɛ’n ti’n, e kwla kpalo ndɛ nanwlɛ’n. (An kanngan Zan 8:43-47 nun.) Zezi seli Zuifu mun kɛ be klo kɛ bé yó mmusu’m be si Satan m’ɔ ti be si’n i klun sa ti’n, be tieman ndɛ ng’ɔ kan kle be’n.

13, 14. (a) ?E ti nun miɛn’n, ɔ nin sran’m be nɛn’n be su ndɛ benin yɛ fluwa sifuɛ’m be kannin ɔn? (b) ?Ngue ti yɛ e sie e su sran kun i nuan bo ɔ?

¹³ Wie liɛ’n, ndɛ nga e klo i’n, yɛ e fa e su sie i bo ɔ. (2 Piɛ. 3:5) Wafa nga Zoova yili e ti nun miɛn’n ti’n, e kwla kpalo ndɛ wie mun. Maan amun tran diin naan amun sie amun su be nian. ?Amun ti ninnge wie’m be tɛlɛ? Atrɛkpa’n, amun a timan ninnge sɔ’m be ngan laa. ?Ngue ti ɔ? Yɛle kɛ kannzɛ e kwla sie e su e tie ninnge fanunfanun be ngan likawlɛ’n, sanngɛ like kunngba su yɛ amun akunndan’n wɔli ɔ. Sanngɛ sɛ sran’m be su ijɔ’n, e kwlá sieman e su ndɛ nga be kan’n i kwlaa bo likawlɛ. Fluwa sifuɛ’m be waan sran kunngba cɛ i nuan bo yɛ e kwla sie e su ɔ. I sɔ’n kle kɛ sɛ sran nɲɔn be su kan ndɛ kle e’n, sran nga e klo kɛ é tí i ndɛ liɛ’n i nuan bo yɛ e sie e su ɔ. Zezi i blɛ su Zuifu’m be kunndɛli kɛ bé yó mmusu’m be si Satan m’ɔ ti be si’n i klun sa. I ti yɛ b’a kunndɛman kɛ bé tíe Zezi i ndɛ liɛ’n niɔn.

¹⁴ Biblu’n se kɛ sɛ é kwlá sé’n, “akunndan’n” nin “sinnzin’n” be yia e kɛ e sie e su be nuan bo. (Nya. 9:1-5, 13-17) Ɔ fata kɛ e sie e su be nun kun i nuan bo. ?Wan yɛ é tíe i ndɛ liɛ’n niɔn? Be nun kun nga e klo kɛ é yó i klun sa’n, i ndɛ liɛ’n yɛ é tí ɔ. Sɛ e ti Zezi i bua ba’m be nun kun’n, é tíe ndɛ ng’ɔ kan’n, yɛ é sú i su. (Zan 10:16, 27) Zezi seli kɛ i sɔnnzɔnfuɛ’m be ‘si nanwlɛ’n.’ (Zan 18:37) Yɛ “be su-man sran wie su, sanngɛ be wanndi i, afin be si-mɛn i nɛn’n.” (Zan 10:5) Sran ng’ɔ kɛn i wun ase su Zezi su’n, Ɲanmiɛn maan ɔ ɲan ɲrun.​—Nya. 3:13, 16; 8:1, 18.

“Ɔ TI AMUN ANYRUNNYAN LIKE”

15. ?Ngue ti yɛ Pɔlu seli kɛ ɲrɛnnɛn ng’ɔ wun i’n, ɔ ti Efɛzfuɛ mun be “anyrunnyan like” ɔ?

¹⁵ ?Wafa sɛ yɛ e kwla uka sran uflɛ mun naan b’a ɲan ɲrun Ɲanmiɛn sa nun ɔn? Wafa kun nga e kwla yo i sɔ liɛ’n yɛle e awlɛn mɔ e tra’n. Pɔlu klɛli Efɛzfuɛ mun be fluwa seli kɛ: “Ń srɛ́ amun kɛ, nán amun sa sin bubu amun nyrɛnnɛn nga n wun i amun ti’n ti, afin ɔ ti amun anyrunnyan like.” (Efɛ. 3:13) ?Ngue ti yɛ Pɔlu seli kɛ ɲrɛnnɛn ng’ɔ wun i’n, ɔ ti Efɛzfuɛ mun be “anyrunnyan like” ɔ? Yɛle kɛ kannzɛ ɲrɛnnɛn tɔli Pɔlu su sɛ’n, sanngɛ w’a yaciman i niaan’m be sulɛ le. I lɛ nun’n, Pɔlu kleli be kɛ like ng’ɔ fata kɛ ɔ yo Klistfuɛ’m be cinnjin kpa’n, yɛle Ɲanmiɛn i sulɛ’n. Kɛ afɛ’n tɔli Pɔlu su’n, sɛ ɔ ti kɛ ɔ yacili Ɲanmiɛn sulɛ’n, nn i niaan’m be buli i kɛ ɔ timan cinnjin kɛ be nin Zoova be nanti, naan be di i junman’n, naan be wla tran like kun su kɛ bé ɲɛ́n i. Pɔlu i awlɛn tralɛ’n, ɔ wlali i niaan Klistfuɛ’m be fanngan. Ɔ kleli be kɛ sɛ be yo like kwlaa nga be kwla yo naan be ka Klistfuɛ titi’n, ɔ ti kpa.

16. ?Sa benin yɛ ɔ juli Pɔlu su Listri lɔ ɔ?

¹⁶ Maan e bu wafa nga Pɔlu i Ɲanmiɛn sulɛ juejue su’n, ɔ nin i awlɛn tralɛ’n yoli aniaan mun’n i akunndan e nian. Sa Nga Be Yoli’n 14:19, 20 kannin sa kun m’ɔ juli Pɔlu su Listri lɔ’n i ndɛ. I waan: “Zuif wie bɔ be fin Antiɔs nin Ikoni’n be bali, be sacili sran’m be ti nun, naan b’a finfin Pɔl yɛbuɛ. Kɛ be bu i kɛ w’a wu’n, be cuɛnnin ko yili klɔ’n sin lɔ. Sanngɛ Jésus sɔnnzɔnfuɛ’m bɔ be o Listri lɛ’n, be sin yiɛli i naan w’a jao a sɛ i sin klɔ lɔ ekun. Kɛ aliɛ cɛnnin’n, ɔ nin Barnabas be ɔli Dɛrbu.” Sran kun mɔ be finfinnin i yɛbuɛ m’ɔ ka kan naan w’a wu’n, kɛ i aliɛ cɛnnin’n, ɔ nantili kilo lele 100 kun! Amun bɔbɔ amun nian!

17, 18. (a) ?Ngue ti yɛ Timote kwla sili kɛ Pɔlu wunnin ɲrɛnnɛn Listri lɔ ɔ? (b) ?Wafa sɛ yɛ Pɔlu i awlɛn tralɛ’n ɔ yoli Timote ye ɔ?

¹⁷ ?Timote trannin “Jésus sɔnnzɔnfuɛ” mɔ be bali Pɔlu delɛ’n be nun wie? Sa Nga Be Yoli’n fluwa’n kɛnmɛn i trele, sanngɛ e kwla bu i sɔ. Timote si sa ng’ɔ juli’n. Fluwa’n i nɲɔn su nga Pɔlu klɛli ko mɛnnin i nun’n, ɔ seli kɛ: “A si like nga n kle’n kpa, nin min nzuɛn’n, nin min akunndan’n.” Timote si kɛ be finfinnin Pɔlu yɛbuɛ Listri lɔ. Be fuɛnnin i Antiɔsu, naan Ikoni lɔ’n be kunndɛli kɛ bé fínfín i yɛbuɛ.​—2 Tim. 3:10, 11; Yol. 13:50; 14:5, 19.

¹⁸ Timote si kɛ Pɔlu trɛli i awlɛn ɲrɛnnɛn kwlaa sɔ’m be nun. Pɔlu i nzuɛn kpa sɔ’n wluwluli Timote wun, ɔ maan i wla kwlá fiman su. Kɛ Pɔlu ɔli Listri lɔ’n, ɔ wunnin kɛ Timote ti sran kpa asɔnun’n nun naan “Listri nin Ikoni lɔ’n be bo i dunman kpa.” (Yol. 16:1, 2) Kɛ ɔ́ kɔ́ i ɲrun’n, Timote wa kwla dili junman dan asɔnun’n nun.​—Fil. 2:19, 20; 1 Tim. 1:3.

19. ?Wafa sɛ yɛ e awlɛn tralɛ’n kwla uka e wiengu ɔ?

¹⁹ Sɛ e kusu e su Ɲanmiɛn klanman titi’n, gbanflɛn nin talua’m bé kwlá nían e nzuɛn kpa’n su. Wafa nga kɛ é bó jasin fɛ’n e yiyi ndɛ’m be nun klanman’n, gbaflɛn nin talua’m be fa be ɲin sie su, kpɛkun be nian su be su Zoova kpa. Sanngɛ nɛ́n i ngba ɔ. Kɛ sa tɔ e su mɔ e jran kekle’n, i sɔ’n uka be wie kpa. Pɔlu seli kɛ ɔ trɛli i awlɛn sa kwlaa nun naan w’a kwla ukɛ i wiengu mun naan b’a ɲan ɲrun m’ɔ wieman’n.​—2 Tim. 2:10.

20. ?Ngue ti yɛ ɔ fataman kɛ e yaci aɲrunɲan nga Ɲanmiɛn man’n i kunndɛlɛ ɔ?

²⁰ ?Sɛ e klo kɛ ‘Nyanmiɛn b’ɔ ti kunngba cɛ’n yɛ ɔ bo e dunman’ titi’n, nɛ́n i sɔ yɛ ɔ ti kpa ɔ? (Zan 5:44; 7:18) E kɛnmɛn i lele! (An kanngan Rɔmfuɛ Mun 2:6, 7 nun.) Zoova waan be nga be kunndɛ kɛ “bé nyán nyrun naan be bu be sran’n, bɔ be kunndɛ nguan’n, ɔ́ mán be anannganman nguan.” Asa ekun’n, “be nga be tra be anwlɛn be yo sa kpa’n,” be aeliɛ’n su be wiengu’m be bo naan b’a jran kekle naan b’a ka anannganman nguan atin’n su. I sɔ’n ti’n, nán like wie ti’n, aɲrunɲan mɔ Ɲanmiɛn man’n, ɔ to fuan e.

[Foto, bue 22]

[Foto, bue 25]

[Foto, bue 26]

Gbanflɛn nin talua’m be fa be ɲin sie wafa nga asɔnun nun kpɛnngbɛn’m be tra be awlɛn’n su.