Sran ng’ɔ lafi Ɲanmiɛn su mɔ i ɲin yi i’n, ɔ yo yakpafuɛ
‘Jran kekle, yo yakpafuɛ, afin min Anannganman ɔ Ɲanmiɛn’n lika kwlaa nga á kɔ́’n n jin ɔ sin.’—ZOZIE 1:9.
1, 2. (a) ?Kɛ e niɛn i kpa sa’n, Izraɛlifuɛ’m be kwla Kanaanfuɛ mun ɔn, ɔ yo ye? (b) ?Fanngan wlalɛ ndɛ mennin yɛ Zoova kan kleli Zozie ɔ?
AFUƐ nga be flɛ i 1473 nun ka naan y’a ju Zezi blɛ su’n, Izraɛlifuɛ’m be juli mɛn nga Ɲanmiɛn seli kɛ ɔ́ fá mán be’n i tiwa. Sa kekle ng’ɔ kwla tanndan be ɲrun lɔ’n ti’n, Moizi seli be kɛ: ‘Izraɛlifuɛ mun, Zurdɛn’n yɛ amun su wa kpɛ i lɛ ɔ. Amún kó fá nvle mɔ be dandan tra amun liɛ’n, mɔ be nun sran’m be kekle tra amun’n. Nvle sɔ’m be nun klɔ’m be ti dandan, yɛ be wun talɛ’m be ti cinnjin kpa, yɛ be ti nglonglo. Nvle dan sɔ’m be nunfuɛ’m be wie yɛle Anakfuɛ mun, be ti sran jajraajra. Be yɛ be kan be ndɛ kɛ: “?Anak i mma mun’n, wan yɛ ɔ jran be ɲrun ɔn ɔ yo ye ɔ?”’ (Mmla’n 9:1, 2) Sɛ Moizi seli sɔ’n, w’a buaman ato. Afin nvle sɔ’n i nunfuɛ’m be ti blamiɛn, yɛ be dunman’n fuli kpa. Asa ekun’n, be nun wie’m be le alɛ ninnge kpakpa. Be le blalɛ kakaklolo, yɛ be siesieli ninnge nnana kpa mun kakaklolo sɔ’m be ja’m be wun.—Jɔlɛ Difuɛ Mun 4:13.
2 Izraɛlifuɛ’m be liɛ’n, be fin kanga, yɛ be w’a trannin aawlɛ flɛnnɛn’n nun afuɛ 40. Ɔ maan kɛ e niɛn i kpa sa’n, be kwlá jranman nvle sɔ’m be ɲrun naan b’a kwla be. Sanngɛ Moizi liɛ’n, ɔ lafili Ɲanmiɛn su. Ɔ ti kɛ ɔ “wun” Zoova m’ɔ dun be ɲrun mmua’n sa. (Ebre Mun 11:27) I sɔ’n ti’n, ɔ seli nvlefuɛ’m be kɛ: ‘Anannganman amun Ɲanmiɛn’n ɔ́ dún mmua amun ɲrun. I yɛ ɔ́ gúa be ɲin ase ɔ. Ɔ maan amún wá fúan be, amún wá kún be ndɛndɛ kpa.’ (Mmla’n 9:3; Jue Mun 33:16, 17) I sin’n, kɛ Moizi wuli’n, Zoova seli Zozie kɛ ɔ́ jrɛ́n i sin. Ɔ seli i kɛ: ‘Siesie ɔ wun naan a nin Izraɛli nvle’n amun kpɛ Zurdɛn nzue’n m’ɔ o yɛ’n, amun wɔ mɛn nga n su wa fa man Izraɛlifuɛ mun’n i nun. Sran fi su kwlá jranman ɔ ɲrun lele saan ɔ wie. Ń wá jrán ɔ sin kɛ n jrannin Moizi i sin’n sa.’—Zozie 1:2, 5.
3. ?Ngue yɛ maan Zozie lafili Ɲanmiɛn su m’ɔ yoli yakpafuɛ ɔ?
3 Saan Zozie kánngan Ɲanmiɛn Ndɛ’n nun, ɔ́ bú su angunndan, ɔ́ nánti su naan Zoova w’a jrɛn i sin naan w’a bo i ɲrun atin. Zoova bɔbɔ seli i kɛ: ‘Sɛ a yo sɔ’n yɛ like nga a yo’n ɔ́ yó ye ɔ. Nán ɔ wla fi ndɛ nga n kan kleli wɔ’n su. Jran kekle, yo yakpafuɛ, nán srɛ kun wɔ, nán ɔ klun titi wɔ, afin min Anannganman ɔ Ɲanmiɛn’n lika kwlaa nga á kɔ́’n n jin ɔ sin.’ (Zozie 1:8, 9) Zozie fali Zoova i ndɛ’n su. Ɔ maan, ɔ jrannin kekle, ɔ yoli yakpafuɛ, kpɔkun like ng’ɔ yo’n yoli ye. Sanngɛ i wiengu sunman mɔ be kpaloli Zoova nuan ndɛ’n, be liɛ’n w’a yoman ye, afin be wieli wu aawlɛ flɛnnɛn’n nun.
Ɲanmiɛn su mɔ b’a lafiman’n ti’n, be yoli srongble
4, 5. (a) ?Wafa sɛ yɛ lika kplafuɛ blu’n be ayeliɛ’n nin Zozie nin Kalɛbu be liɛ’n, ɔ timan kun ɔn? (b) ?Zoova su mɔ nvlefuɛ’m b’a lafiman’n ti’n, ɔ yoli i sɛ?
4 I klikli nun’n, kɛ be juli Kanaan mɛn’n i tiwa’n, Moizi sunmannin sran 12 kɛ be ko kpla mɛn’n be nian. Ɔ yoli sɔ i afuɛ ablanan yɛ. Kɛ sran sɔ’m be sali be sin’n, srɛ kpa kunnin be nun blu. Be seli kɛ: ‘Mɛn nga e ɔli nun lɛ’n, ɔ ti mɛn kun mɔ sɛ e waan é kó trán nun’n, e su ɲanman alaje. Afin sran nga e wunnin be lɔ’n be kwlaa be ti sran jajraajra ngunmin. Be ti Anak i osu nunfuɛ mun. Kɛ e nin be e jran sa’n, be tra e su fatifati, e ti be bo kɛ ijrewa mun sa.’ ?Sanngɛ sakpa naan ‘sran kwlaa’ nga be wunnin be lɔ’n be ti sran jajraajra kɛ Anak i osu nunfuɛ mun sa? Cɛcɛ! B’a diman nvlefuɛ’m be nanwlɛ. I sɔ’n ti’n, srɛ kunnin be kwlaa. Ɔ maan, be seli kɛ sɛ be sa be sin Ezipti lɔ bɔbɔ naan be ko di kanga ekun’n, ɔ flunman!—Kalɛ 13:31–14:4.
5 Sanngɛ Zozie nin Kalɛbu mɔ be ko kplali mɛn’n wie’n be liɛ’n, be waan saan bé wlú lɔ. Be seli kɛ: ‘Be su juman e lika fi, é kwlá be ndɛndɛ kpa. Afin be amuɛn nga be sasa be’n b’a wanndi be, sanngɛ Anannganman jin e sin. I ti nán maan srɛ kun amun.’ (Kalɛ 14:9) ?Klenzua kplɔwa su yɛ Zozie nin Kalɛbu be lafili ɔ? Cɛcɛ. Afin i nun mɔ Zoova fá ɲrɛnnɛn blu gúa Ezipti nvle m’ɔ le tinmin kpa’n su’n, m’ɔ́ sókpa be amuɛn mun’n, ɔ yoli be ɲrun. Asa ekun’n, kɛ Zoova núnnún Ezipti famiɛn’n nin i sonja mun ndɛ mma jenvie’n nun’n, be wunnin nun. (Jue Mun 136:15) Ɔ maan, srɛ ng’ɔ kunnin sran blu’n, ɔ nin be mɔ be fali be ndɛ’n su’n, ɔ leman bo. Zoova fali ya dan be wun. Ɔ seli kɛ: ‘?Atrɛ nga n yi be be ɲrun’n cɛn kwlaa mɔ be lafiman su lɛ’n, cɛn onin ko yɛ be lafi min su ɔ?’—Kalɛ 14:11.
6. ?Wafa sɛ yɛ Ɲanmiɛn sulafilɛ’n nin yakpa yolɛ’n, be kɔ likawlɛ ɔ? ?Yɛ wafa sɛ yɛ andɛ e wun i sɔ liɛ’n niɔn?
6 Zoova yili nvlefuɛ’m be srongble yolɛ’n i bo. Yɛle kɛ be lafimɛn i su. Afin sran ng’ɔ lafi Ɲanmiɛn su’n, ɔ yo yakpafuɛ. I sɔ’n ti’n, kɛ akoto Zan kán alɛ nga Klistfuɛ’m be kun mɔ nán be nin klɔ sran yɛ be kun’n i ndɛ’n, ɔ seli kɛ: ‘Ɲanmiɛn su mɔ e lafi’n ti yɛ maan e kwla mɛn’n nun ninnge sɔ’m be kwlaa mɔ be ti kɛ e kpɔfuɛ sa mun ɔn.’ (1 Zan 5:4) Andɛ’n, Zoova i Lalofuɛ ko ju miliɔn nsiɛn tra su be lafi Ɲanmiɛn su kɛ Zozie nin Kalɛbu be liɛ’n sa. Ɔ maan, sɛ be ti gbaflɛn annzɛ kpɛnngbɛn o, sɛ be ti juejue annzɛ be timan juejue o, be kwlaa be bo Ɲanmiɛn Sielɛ Blɛ jasin fɛ’n mɛn wunmuan’n nun. Sonja yakpafuɛ sɔ mun’n, be kpɔfuɛ fi kwlá jranman be junman’n.—Rɔmfuɛ Mun 8:31.
Nán e ‘cuɛn e wun e wɔ siɛn’
7. ?Kɛ be se kɛ be “cuɛn be wun kɔ siɛn’n,” i bo’n yɛle mennin?
7 Andɛ Zoova i sufuɛ’m be bo jasin fɛ’n i yakpa su. Be bu angunndan nga akoto Pɔlu buli’n wie. Ɔ seli kɛ: ‘E liɛ’n, nán be nga be cuɛn be wun kɔ siɛn’n mɔ maan be mlin’n be wie yɛle e, sanngɛ e ti be nga be lafi Ɲanmiɛn su mɔ be ɲan be ti’n be wie.’ (Ebre Mun 10:39) Kɛ Pɔlu se kɛ be “cuɛn be wun kɔ siɛn’n,” nán srɛ m’ɔ kun e sa wie ti’n, i ndɛ yɛ ɔ kan ɔn. Afin srɛ kunnin Ɲanmiɛn i sufuɛ kpa sunman wie bɔbɔ. (1 Samiɛl 21:13; 1 Famiɛn Mun 19:1-4) Sanngɛ, fluwa kun m’ɔ tutu Biblu’n nun ndɛ mma’m be bo’n waan, sran ng’ɔ ‘cuɛn i wun kɔ siɛn’n,’ yɛle sran m’ɔ “sɛ i sin’n.” Sran sɔ’n, ɔ “fa ndɛ nanwlɛ’n trɛtrɛ i sa bɛ’n nun.” Ɔ yo kɛ mmeli mɔ kɛ be kɛn i tannin i ase’n, ɔ “kɔ blɛblɛ’n” sa. Ɔ maan, sran sɔ’n diman Ɲanmiɛn i junman’n i juejue su. Sanngɛ be nga be lafi Ɲanmiɛn su kpa’n, kɛ lika’n yo kekle be su’n, maan ɔ yo ɲrɛnnɛn klelɛ o, annzɛ tukpaciɛ o, annzɛ sa uflɛ wie ti o, be “kɔman blɛblɛ.” Be mian be ɲin be su Zoova. Afin be si kɛ Zoova nian be lika naan ɔ si kan be sa’n ju lɛ’n. (Jue Mun 55:23; 103:14) ?Kɛ amun lafi Ɲanmiɛn su sɔ wie ɔ?
8, 9. (a) ?Ngue yɛ Zoova yoli naan Klistfuɛ klikli’m b’a lafi i su kpa ɔ? (b) ?Yɛ é yó sɛ naan y’a lafi Ɲanmiɛn su kpa wie?
8 Blɛ wie nun’n, Zezi i akoto’m be wunnin kɛ be lafiman Ɲanmiɛn su kpa kun. Ɔ maan, be seli Zezi kɛ: ‘Man e awlɛn maan e lafi Ɲanmiɛn su kpa.’ (Lik 17:5) Ɲanmiɛn tɛli be srɛlɛ sɔ’n su. I li kɛ afuɛ nga be flɛ i 33 Pantekɔtu nun mɔ Ɲanmiɛn fɛli i wawɛ’n mannin be’n, kɛ nga Zezi fa kannin’n sa’n, be wunnin Ɲanmiɛn ndɛ’n nin i klun sa’n be bo kpa. (Zan 14:26; Sa Nga Be Yoli’n 2:1-4) Kɛ ɔ yoli sɔ mɔ be Ɲanmiɛn sulafilɛ’n takali kpa’n, b’a buman yalɛ nga be kpɔfuɛ’m be kle be’n i like. Be boli jasin fɛ’n “kleli asiɛ’n sufuɛ’m be kwlaa.”—Kolɔsfuɛ Mun 1:23; Sa Nga Be Yoli’n 1:8; 28:22.
9 Kɛ ɔ ko yo naan y’a lafi Ɲanmiɛn su kpa naan y’a wla e wun ase y’a bo jasin fɛ’n i kpa’n ti’n, ɔ fata kɛ e kusu e yo ninnge wie mun. Yɛle kɛ maan e suan Biblu’n nun like, e bu su angunndan, yɛ e srɛ Ɲanmiɛn naan ɔ fɛ i wawɛ’n man e. Ɲanmiɛn Ndɛ’n trannin Zozie nin Kalɛbu nin Klistfuɛ klikli’m be awlɛn’n nun. Sɛ ɔ ka e awlɛn nun sɔ wie’n, é láfi Ɲanmiɛn su yɛ é yó yakpafuɛ. Ɔ maan, é kwlá mɛn nun ninnge mɔ be ti kɛ e kpɔfuɛ mun sa’n.—Rɔmfuɛ Mun 10:17.
Kɛ be se kɛ be lafi Ɲanmiɛn su’n, nɛ́n i ngunmin yɛle kɛ be si kɛ ɔ o lɛ’n
10. ?Kɛ be se kɛ be lafi Ɲanmiɛn su’n, i bo’n yɛle mennin?
10 Be nga laa be nin Ɲanmiɛn nantili klanman’n, be ajalɛ’n yi like kun nglo. Yɛle kɛ Ɲanmiɛn mɔ be si kɛ ɔ o lɛ’n, nɛ́n i yɛle i sulafilɛ m’ɔ wla sran yakpa mɔ maan sran’n trɛ i awlɛn’n. (Zak 2:19) Sran ng’ɔ lafi Ɲanmiɛn su’n, ɔ si Ɲanmiɛn kɛ sran nɲɔn be si be wun’n sa. (Jue Mun 78:5-8; Nyanndra Mun 3:5, 6) Sran ng’ɔ lafi Ɲanmiɛn su’n, ɔ si kɛ sɛ ɔ nanti Ɲanmiɛn i mmla’m be su’n, i bɔbɔ i kpa yolɛ ti ɔ. (Ezai 48:17, 18) Sran ng’ɔ lafi Ɲanmiɛn su’n, ɔ lafi su kpa ekun kɛ ninnge kwlaa nga Ɲanmiɛn seli kɛ ɔ́ yó be’n, saan ɔ́ yó. Yɛ “be nga be lafi i su’n, ɔ yi i wun kle be.”—Ebre Mun 11:1, 6; Ezai 55:11.
11. ?Zozie nin Kalɛbu be Ɲanmiɛn sulafilɛ’n nin be yakpa yolɛ’n ti’n, ye mennin yɛ be dili ɔ?
11 Sɛ Ɲanmiɛn sulafilɛ nga e kɛnnin i ndɛ lɛ’n ti sran’n, nn é sé kɛ ɔ ɲin. Ɔ kɛmɛn i osu kunngba’n nun. Kɛ e nanti ndɛ nanwlɛ’n su mɔ e ‘sie e ɲin ase e niɛn’ i su mmlusuɛ nga e ɲɛn i’n, mɔ e “wun” kɛ Zoova tɛ e srɛlɛ’n su naan ɔ bo e ɲrun atin’n, yɛ e Ɲanmiɛn sulafilɛ’n ɲin ɔn. (Jue Mun 34:9; 1 Zan 5:14, 15) ?Ngue ti yɛ Zozie nin Kalɛbu be lafili Ɲanmiɛn su ɔ? ?Nán kɛ be sieli be ɲin ase be niannin mɔ be wunnin kɛ Zoova i klun ti ufue’n ti ɔ? (Zozie 23:14) Amun e nian. Afuɛ 40 nga Izraɛlifuɛ’m be dili i awlɛn flɛnnɛn’n nun lɔ’n, Zozie nin Kalɛbu be fiteli nun kɛ nga Zoova tali be nda’n sa. (Kalɛ 14:27-30; 32:11, 12) Asa ekun’n, afuɛ nsiɛn nga Izraɛlifuɛ’m be kunnin alɛ naan b’a fa Kanaanfuɛ’m be mɛn’n, Zozie nin Kalɛbu be fali alɛ sɔ’n i nun ta kpa. Ɔ maan i agualiɛ su’n, Ɲanmiɛn maan be ɲannin be bɔbɔ be asiɛ liɛ, kpɔkun be dili ye. Nanwlɛ, be nga be lafi Zoova su mɔ be su i yakpa su’n, ɔ yi i wun kle be dan!—Zozie 14:6, 9-14; 19:49, 50; 24:29.
12. ?Kɛ Zoova i ndɛ’n kpɛn su’n, ɔ kpɛn su sɛ?
12 Ye nga Zoova yoli Zozie nin Kalɛbu i ti’n, e wla kpɛn ndɛ kun mɔ jue tofuɛ’n kannin’n su. Ɔ seli kɛ: ‘Ndɛ nga a kan kleli min’n, a niannin su yoli i su like. I kpa bɔ a yoli trali su.’ (Jue Mun 138:2) Kɛ Zoova waan i dunman nun ɔ́ yó like kun mɔ like sɔ’n kpɛn su’n, ɔ kpɛn su tra su. (Efɛzfuɛ Mun 3:20) Nanwlɛ, be nga be fa Ɲanmiɛn ‘yo be awlɛn su like’n,’ ɔ yiman be ase le mlɔnmlɔn.—Jue Mun 37:3, 4.
Ɲanmiɛn “klun jɔli i wun”
13, 14. ?Ngue ti yɛ ɔ nin i fatali kɛ Enɔku lafi Ɲanmiɛn su naan ɔ yo yakpafuɛ ɔ?
13 Enɔku m’ɔ yoli Zoova i Lalofuɛ laa kpa nun’n, i ajalɛ’n kwla kle e wafa nga e kwla lafi Ɲanmiɛn su naan y’a yo yakpafuɛ’n. Ka naan w’a bo i Ɲanmiɛn nuan ijɔlɛ junman’n i dilɛ bo’n, ɔ si kɛ i Ɲanmiɛn sulafilɛ’n nin i yakpa yolɛ’n ti’n, bé klé i yalɛ. ?Ngue ti yɛ ɔ kwla sili sɔ ɔ? Ndɛ nga Zoova kɛnnin i Edɛni fie’n nun lɔ’n ti ɔ. Ɔ seli kɛ kpɔlɛ trán Ɲanmiɛn i sufuɛ mun nin Satan i sran’m be afiɛn. (Bo Bolɛ 3:15) Asa ekun’n, Enɔku si kɛ, kɛ Kaɛn kunnin i niaan Abɛli’n, yɛ kpɔlɛ sɔ’n boli i bo klɔ sran’m be afiɛn ɔn. I li bɔɔ kɛ be wuli Enɔku’n, Kaɛn nin Abɛli be si Adam dili afuɛ 310 ekun naan w’a wu.—Bo Bolɛ 5:3-18.
14 Sanngɛ Enɔku w’a yoman srongble. Ɔ nin ‘Ɲanmiɛn be nantili klanman.’ Kpɔkun, be nga be kan Ɲanmiɛn ‘wun ndɛ tɛtɛ’n’, ɔ buli be fɔ. (Bo Bolɛ 5:22; Zid 14, 15) Ɲanmiɛn mɔ Enɔku su i yakpa su’n ti’n, i kpɔfuɛ’m be ɲin cili i. Be waan bé kún i bɔbɔ. Sanngɛ Zoova w’a kplinman su kɛ Enɔku wu be sa nun. Zoova kleli Enɔku kɛ i “klun jɔli i wun.” I sin’n, Zoova “mɛnnin i su.” Yɛle kɛ, ɔ yoli maan atrɛkpa’n, like wie tɔli i su kɛ ɔ su cɛn laliɛ sa yɛ ɔ wunnin aolia nun like, kpɔkun ɔ kali lɛ wuli.—Ebre Mun 11:5, 13; Bo Bolɛ 5:24.
15. ?Enɔku i ajalɛ klanman mennin yɛ andɛ Zoova i sufuɛ’m be kwla nian su ɔ?
15 Kɛ Pɔlu wieli Enɔku i falɛ mɔ Ɲanmiɛn fɛli i’n i ndɛ kan cɛ’n, ɔ kannin Ɲanmiɛn sulafilɛ’n i cinnjin m’ɔ ti’n i ndɛ wie. Ɔ seli kɛ: ‘Sɛ be lafiman Ɲanmiɛn su’n, i klun jɔman be wun mlɔnmlɔn.’ (Ebre Mun 11:6) Ɲanmiɛn su mɔ Enɔku lafi’n ti’n, ɔ yoli yakpafuɛ. Ɔ maan, ɔ nin Zoova be nantili klanman, kpɔkun ɔ kannin jɔlɛ nga Ɲanmiɛn wá dí sran tɛtɛ mun’n, i ndɛ. Enɔku kle e ajalɛ klanman kpa. Afin, mɛn tɛ nga mɔ sran’m be kloman kɛ bé sú Ɲanmiɛn kɛ nga ɔ klo’n sa’n, i nun yɛ e di junman nga Enɔku dili’n wie ɔ.—Jue Mun 92:8; Matie 24:14; Sa Nglo Yilɛ 12:17.
Kɛ be ɲin yi Ɲanmiɛn’n be yo yakpafuɛ
16, 17. ?Wan yɛle Abdiasi? ?I blɛ su’n, nn lika’n ti sɛ?
16 Kɛ nga e fa wun i lɛ sa’n, sɛ e lafi Ɲanmiɛn su’n, é yó yakpafuɛ. Sanngɛ sɛ e ɲin yi i’n, é yó yakpafuɛ wie. I lɛ nun’n, sran kun mɔ wafa nga i ɲin yili Ɲanmiɛn’n ɔ yo ɲɛnmɛn’n, amun e fɛ i ndɛ naan e nian. Sran sɔ’n, ɔ ti Ɲanmiɛn nuan ijɔfuɛ Elize i blɛ sufuɛ. Kɛ ɔ́ yó sɔ’n, nn Famiɛn Akabu yɛ ɔ sie Izraɛli i nglo lɔ lika’n niɔn. Blɛ sɔ nun’n, amuɛn nga be flɛ i Baali’n i sɔlɛ’n truli kpokpaa. Afin amun bɔbɔ amun nian. Be takali waka mɔ be yi yasua lika’n i nglo’n, kpɔkun sran’m be sɔ be. Kpɔkun Baali i nuan ijɔfuɛ ya nnan ablenun, nin waka nga be taka mɔ be sɔ’n i nuan ijɔfuɛ ya nnan, be nin Akabu i yi Zezabɛli be “yia be di like.”—1 Famiɛn Mun 16:30-33; 18:19.
17 Zezabɛli kpɔ Zoova tɛ kpa. I waan ɔ́ núnnún Zoova i sulɛ’n naan sran fi w’a sumɛn i kun. I sɔ’n ti’n, ɔ kunnin Zoova i nuan ijɔfuɛ wie mun. Ɔ kunndɛli kɛ ɔ́ kún Elize wie bɔbɔ, naan Zoova w’a kle Elize i fiawlɛ kun Zurdɛn’n nuan lɔ. (1 Famiɛn Mun 17:1-3; 18:13) Nanwlɛ, sran nga i waan ɔ́ jrán Zoova i sulɛ’n i sin blɛ sɔ nun’n, ɔ yoli kekle mɛnnin i. I li sɛ sran sɔ’n di junman famiɛn’n i awlo’n nun lɔ’n, i kekle liɛ’n m’ɔ́ yó’n, be kanman. I sɔ yɛ bian wie mɔ be flɛ i Abdiasia, ɔ wunnin i ɔ. Afin, ɔ ti famiɛn Akabu i awlo’n su kpɛn. Kpɔkun i ɲin yi Ɲanmiɛn.—1 Famiɛn Mun 18:3.
18. ?Ngue ti yɛ Abdiasi m’ɔ ti Zoova i sufuɛ’n i ayeliɛ’n yo ɲɛnmɛn ɔn?
18 Abdiasi w’a yaciman Zoova sulɛ le. Afin 1 Famiɛn Mun 18:3 waan: ‘Abdiasi sɔ’n i ɲin yi Anannganman kpa.’ Sanngɛ, kɛ mɔ asasabeun timan srɛ’n ti’n, ɔ nantili ngwlɛlɛ su. Nanwlɛ, Abdiasi i aɲinyiɛ’n yo ɲɛnmɛn! I aɲinyiɛ sɔ’n ti’n, ɔ yoli yakpafuɛ. Kɛ Zezabɛli kún Zoova i nuan ijɔfuɛ mun’n, yɛ Abdiasi yili i yakpa yolɛ sɔ’n i nglo kpa ɔ.
19. ?Wafa sɛ yɛ Abdiasi yili i yakpa yolɛ’n i nglo ɔ?
19 Biblu’n waan: ‘Blɛ nga famiɛn’n i yi Zezabɛli maan be kunnin Anannganman i nuan ijɔfuɛ mun’n, Abdiasi fali be nun ya fiali. Ɔ fali ablenun fiali yɔbuɛ buɛ kun nun, yɛ ɔ fali ablenun fiali yɛbuɛ buɛ kun ekun nun. I bɔbɔ tali be, yɛ ɔ mannin be nzue nɔnwa.’ (1 Famiɛn Mun 18:4) ?Like nga Abdiasi yoli i lɛ’n, sɛ be trɛli i’n nn b’a kunmɛn i? Afin Akabu nin i yi Zezabɛli, ɔ nin amuɛn’m be nuan ijɔfuɛ 850 nga be o lɛ’n, be kwlaa be o famiɛn’n i awlo’n nun. Kpɔkun, Baali i sɔfuɛ beblebe nga be o nvle’n nun mɔ be kunndɛ kɛ famiɛn’n i klun jɔ be wun’n, sɛ be wunnin Abdiasi’n nn be yili i be mannin. Sanngɛ amuɛn sɔfuɛ kwlaa sɔ’m be ɲin bo lɛ’n, Abdiasi tali Zoova i nuan ijɔfuɛ mun. Srɛ w’a kunmɛn i. Nanwlɛ, sran nga i ɲin yi Ɲanmiɛn’n, ɔ yo yakpafuɛ sakpa!
20. ?Wafa sɛ yɛ Abdiasi i ɲin m’ɔ yi Ɲanmiɛn’n suɛnnin i bo ɔ? ?Yɛ ajalɛ klanman mennin yɛ ɔ man amun ɔn?
20 Kɛ mɔ Abdiasi i ɲin yili Zoova m’ɔ yoli yakpafuɛ’n ti’n, Zoova kusu sɛsɛli i. Nyanndra Mun 29:25 waan: ‘Srongble’n i agualiɛ’n timan kpa. Sran ng’ɔ fɛ i wun wlɛ i Anannganman sa nun’n i liɛ’n, kɛ ɔ o lɛ’n yɛ ɔ wo ɔ.’ Abdiasi ti kɛ e kwlaa e sa. Yɛle kɛ srɛ kunnin i, afin sa ng’ɔ yoli’n ti’n, sɛ be trɛli i’n nn be kunnin i. (1 Famiɛn Mun 18:7-9, 12) Sanngɛ i ɲin m’ɔ yi Ɲanmiɛn’n ti’n, w’a yoman srongble. Abdiasi man e kwlaa e ajalɛ klanman kpa. I li be nga Zoova sulɛ’n ti’n, be kwla wla be bisua annzɛ be kwla kun be’n, be yɛ ɔ man be ajalɛ kpa’n niɔn. (Matie 24:9) Sanngɛ i kwlaa yoli o, maan e kwlaa e mian e ɲin e su Ɲanmiɛn ‘srolɛ mɔ e sro i’n nin sran mɔ e bu i’n ti.’—Ebre Mun 12:28.
21. ?Ngue yɛ like suanlɛ ng’ɔ́ bá lɔ’n wá yíyí nun ɔn?
21 Sran ng’ɔ lafi Ɲanmiɛn su mɔ i ɲin yi’n, ɔ yo yakpafuɛ. Sanngɛ sɛ ɔ klo Ɲanmiɛn nin sran’n, ɔ kwla yo yakpafuɛ wie dan. Akoto Pɔlu seli kɛ: ‘Ɲanmiɛn a fɛmɛn i wawɛ’n w’a manman e kɛ e sa ɲan, sanngɛ ɔ fa mannin e kɛ ɔ wla e fanngan, e klo i bɔbɔ Ɲanmiɛn nin sran, yɛ e si ngwlɛlɛ.’ (2 Timote 1:7) Mɛn nga y’a ju i bue nuan yɛ’n nun’n, sɛ e klo Ɲanmiɛn nin sran’n, i sɔ’n kwla wla e fanngan naan y’a su Zoova kpa. I sɔ ndɛ yɛ like suanlɛ ng’ɔ́ bá lɔ’n wá yíyí nun ɔn.—2 Timote 3:1.
[Ja ngua lɛ ndɛ’n]
a Nán Abdiasi ng’ɔ ti Ɲanmiɛn nuan ijɔfuɛ’n niɔn.
?Amún tɛ́ su sɛ?
• ?Ngue ti yɛ Zozie nin Kalɛbu be yoli yakpafuɛ ɔ?
• ?Kɛ be se kɛ be lafi Ɲanmiɛn su’n, i bo’n yɛle mennin?
• ?Kɛ Enɔku kán jɔlɛ nga Ɲanmiɛn wá dí’n i ndɛ’n, ngue ti yɛ srɛ w’a kunmɛn i ɔ?
• ?Wafa sɛ yɛ sran nga i ɲin yi Ɲanmiɛn’n, ɔ yo yakpafuɛ ɔ?
[Foto, bue 15]
Zoova seli Zozie kɛ: “Jran kekle, yo yakpafuɛ.”
[Foto, bue 17]
Enɔku kannin Ɲanmiɛn ndɛ’n i yakpa su.