Blɛ sukusuku nga nun’n, maan e nin Ɲanmiɛn e nanti

‘Enɔki nin Ɲanmiɛn be nantili klanman kpɔkun b’a wunmɛn i kun, afin Ɲanmiɛn fɛli i.’—BO BOLƐ 5:24.

1. ?Sa tɛ mennin wie mun yɛ be o lɛ mɔ be nin a wunman be wunsu le ɔ?

BLƐ sukusuku! Ndɛ mma sɔ’n kle wafa nga mɛn fa ti’n. Afin, kɛ ɔ fɛ i afuɛ 1914 nun mɔ be takali Mɛsi i Sielɛ Blɛ’n lele andɛ’n, sa kekleekle yolɛ yɛ sran’m be wun i ɔ. Afuɛ sɔ’n nun yɛ ‘mɛn’n i bue nuan’n’ boli i bo ɔ. Ɲrɛnnɛn kɛ awe’n m’ɔ kpɛn’n, ɔ nin tukpaciɛ m’ɔ sa ndɛndɛ’n, ɔ nin asiɛ’n m’ɔ keje’n, ɔ nin alɛ sa mɔ be tin sran’m be su’n, be nin a wunman i sɔ le. (2 Timote 3:1; Sa Nglo Yilɛ 6:1-8) Be nga be su Zoova kusu’n, be wun be ɲrun wie kpa. Sa nga be yo maan lika ti kekle kpa’n yɛle sika ndɛ’n, ɔ nin politiki’n, ɔ nin sran kunlɛ’n, ɔ nin tukpaciɛ’n.

2. ?Sa cinnjin mennin yɛ ɔ nin i fata kɛ Zoova sufuɛ’m be jrɛn i ɲrun kekle ɔ?

² Asa ekun’n, Satan fali alɛ wlali be nga ‘be fa Ɲanmiɛn mmla’n, nin ndɛ nanwlɛ nga Zezi yili i nglo’n su’n,’ be sin. I sɔ’n ti’n, be kleli Klistfuɛ kpa’m be yalɛ dan. (Sa Nglo Yilɛ 12:17) Sɛ bɔbɔ Klistfuɛ’m be kwlaa be wunman ɲrɛnnɛn kɛ nga sa’n, sanngɛ e kwlaa e nin mmusu’m be si Satan m’ɔ wlawla sran mun’n e kun. (Efɛzfuɛ Mun 2:2; 6:12) Kɛ mɔ suklu lɔ, annzɛ junman lɔ, annzɛ lika uflɛ nun e nin be mɔ be suman Ɲanmiɛn yɛ e o ti’n, ɔ nin i fata kɛ e nian e wun su kpa naan mɛn nun angunndan’n w’a saman e.

Maan e fa Ɲanmiɛn atin’n su nán e fa mɛn’n i liɛ’n

3, 4. ?Ajalɛ mennin nun yɛ Klistfuɛ’m be nin mɛn nunfuɛ’m be timan kun ɔn?

³ Klistfuɛ klikli’m be nin mɛn nunfuɛ’m b’a yoman kun mlɔnmlɔn. Afin be kusu be miannin be ɲin kpa naan b’a faman be angunndan’n i su. Kɛ akoto Pɔlu kán ngbaciɛ sɔ’n i ndɛ’n ɔ klɛli i kɛ: ‘I sɔ’n ti’n, e Min’n dunman nun n se amun kɛ yoo: nán amun nzuɛn’n fa be mɔ be timan Zuifu’n be liɛ’n kun. Be leman angunndan, yɛ be kwlá wunman sa wlɛ. Nguan nga Ɲanmiɛn fa man sran’n, be dunman tɛman nun wie, afin b’a kete, ɔ maan be siman sa fi. Be siman ɲannzuɛn kun, wlaka’n w’a kun be kpo, be yaciman sa tɛtɛ’m be yolɛ’n mlɔnmlɔn.’—Efɛzfuɛ Mun 4:17-19.

⁴ Nanwlɛ, Pɔlu ndɛ sɔ’n kle kɛ i blɛ liɛ’n, ɔ nin e blɛ liɛ’n i nunfuɛ’m be ayeliɛ’n nin be angunndan bulɛ’n kle kɛ be o aosin tuun kpa nun! Kɛ nga Klistfuɛ klikli’m be fa yoli’n sa’n, andɛ Klistfuɛ’m be kusu be ‘nzuɛn’n faman be mɔ be ti mɛn nunfuɛ’m be liɛ’n.’ Like ng’ɔ yo be fɛ kpa m’ɔ ti be cenjele like’n, yɛle kɛ be nin Ɲanmiɛn be nanti. I yo, sran wie’m be kwla usa kɛ: ?Klɔ sran ngbɛn sa’n nin Zoova be kwla nanti? Nanwlɛ, Biblu’n kle e kɛ i sɔ liɛ’n kwla yo ye. Asa ekun’n, Zoova wla e fanngan kɛ e yo i sɔ bɔbɔ. Afuɛ ya kpɔlɛ mɔcuɛ nun ka naan y’a ju Zezi blɛ su’n, Ɲanmiɛn nuan ijɔfuɛ Mise klɛli i kɛ: ‘Atin nga ɔ ti kpa’n, mɔ Zoova waan amun fa su’n, like nga i waan amun yo’n, be dun mmua kan kleli amun. Like nga i waan amun yo’n yɛle kɛ i waan nán an bu amun wiengu lufle, klun ufue su like’n yɛ amun yo ɔ, yɛ atin nga amun Ɲanmiɛn’n kle amun’n, amun fa su nin amun wun ase kanlɛ.’—Mise 6:8.

?Wafa sɛ, yɛ ngue ti yɛ e nin Ɲanmiɛn e nanti ɔ?

5. ?Wafa sɛ yɛ klɔ sran sa ngbɛn’n, ɔ nin Ɲanmiɛn be kwla nanti ɔ?

⁵ ?Wafa sɛ yɛ e nin Ɲanmiɛn Kpli e kwla nanti ɔ? Nán wafa nga e nin e wiengu klɔ sran e nanti’n, yɛ e nin Ɲanmiɛn e kwla nanti ɔ. Biblu’n nun’n ndɛ mma “nantilɛ’n” ɔ kwla yo ‘ajalɛ wafa kun i falɛ.’a Sɛ e wun ndɛ sɔ’n i wlɛ’n, é wún kɛ sran nga ɔ nin Ɲanmiɛn nanti’n, ɔ fa ajalɛ nga Ɲanmiɛn kle i’n, i su. Sɛ e fa ajalɛ sɔ’n su’n, i sɔ’n yo maan ngbaciɛ tran e nin mɛn nun sran sunman be afiɛn. Nanwlɛ, ajalɛ kunngba cɛ nga ɔ fata kɛ Klistfuɛ’m be fa’n yɛle ngalɛ’n. ?Ngue ti ɔ? Like ti m’ɔ ti sɔ’n, ɔ sɔnnin.

6, 7. ?Ngue ti yɛ e nin Ɲanmiɛn e nantilɛ’n ti like kpafuɛ nga e su ɲɛnmɛn i wunsu le’n niɔn?

⁶ I klikli nun’n, yɛle kɛ Zoova yɛ ɔ ti e Nguan Manfuɛ’n niɔn. Kpɔkun i yɛ ɔ man e like kwlaa nga ɔ mian e sa naan y’a ka nguan nun ɔn. (Sa Nglo Yilɛ 4:11) Kɛ mɔ Zoova yɛ ɔ ti e Yifuɛ’n ti’n, i yɛ ɔ fata kɛ ɔ kle e wafa nga e nanti’n niɔn. Asa ekun’n, ajalɛ nga ɔ kwla yo e ye’n, i kpafuɛ’n yɛle kɛ e nin Ɲanmiɛn e nanti. Be nga be nin Zoova be nanti’n, ɔ fali ajalɛ naan be yaci be sa tɛ’n cɛ be. Kpɔkun, ɔ yoli maan bé kwlá ɲán anannganman nguan. I yo, be nga be nin Ɲanmiɛn be nanti’n fɔ o be nun sɔ, yɛ be o Satan i mɛn tɛ nga nun. Sanngɛ, be Si Ɲanmiɛn m’ɔ o nglo lɔ m’ɔ klo be’n, ɔ man be afɔtuɛ kpakpa mun. Afɔtuɛ sɔ’m be yo maan be mɛn dilɛ’n man be aklunjuɛ. (Zan 3:16; 2 Timote 3:15, 16; 1 Zan 1:8; 2:25; 5:19) Like cinnjin kpa kun nga ti yɛ ɔ fata kɛ e nin Ɲanmiɛn e nanti’n, yɛle kɛ kɛ e tu e kun e fa ajalɛ sɔ’n, ɔ yo maan e tran fɔun nun yɛ e bo yo kun asɔnun’n nun.—Kolɔsfuɛ Mun 3:15, 16.

⁷ E nin Ɲanmiɛn e nantilɛ’n i cinnjin lika kpafuɛ’n, yɛle kɛ kɛ e yo sɔ’n, e kle sran nga e jrɛn i sin akplowa ng’ɔ tɔli nglo nin asiɛ’n be sielɛ su’n. (Bo Bolɛ 3:1-6) E mɛn dilɛ’n nun yɛ e kle kɛ e klɛnnin e wun e mannin Zoova ɔ. Kpɔkun, e kan kle sran mun kɛ i kunngba cɛ yɛ ɔ le atin sie nglo nin asiɛ’n niɔn. (Jue Mun 83:19) I kwlaa sɔ’n kle kɛ srɛlɛ mɔ e srɛ Ɲanmiɛn kɛ maan sran be wun i wlɛ kɛ i ngunmin’n yɛ ɔ ti Ɲanmiɛn’n, e fa su. (Matie 6:9, 10) Nanwlɛ, be nga be fali ajalɛ kɛ be nin Ɲanmiɛn be nanti’n, be ti ngwlɛlɛfuɛ! Be kwla lafi su kɛ be fali ajalɛ kpafuɛ’n, afin Zoova yɛ ɔ ti ‘ngwlɛlɛfuɛ mɔ like fi nunmɛn i sin’n’ niɔn. Ɔ su fɔnman mlɔnmlɔn le.—Rɔmfuɛ Mun 16:27.

8. ?Wafa sɛ yɛ Enɔki nin Nowe be blɛ liɛ’m be ti kɛ e liɛ’n sa ɔ?

⁸ ?Sanngɛ yo, ɔ́ yó sɛ naan y’a kwla tran e Klistfuɛ tranlɛ mɛn sukusuku nga, ɔ nin i nun sran sunman mɔ be kloman Zoova’n be afiɛn? Sɛ e fa e ɲin e sie i sran nga laa blɛ kekle nun bɔbɔ be jrannin kekle mɔ b’a fɔnman be ajalɛ’n su’n, e kwla tɛ kosan sɔ’n su. Laa sran sɔ’m be nun sran nɲɔn yɛle Enɔki nin Nowe. Be sran nɲɔn sɔ’n be mɛn liɛ nga be trannin nun’n, be yoli sukusuku kɛ e liɛ’n sa wie. Sa tɛ’n yoli dan kpa be blɛ liɛ’n su. Nowe blɛ su’n, nzaje sa nin sa sukusuku yolɛ’n yili asiɛ wunmuan’n piɛ. Sanngɛ i sɔ ngalɛ’n nun’n, Enɔki nin Nowe be jrannin kekle be mɛn tɛ’n liɛ’n i angunndan’n i ɲrun, yɛ be nin Zoova be nantili. ?Ngue ti yɛ be kwla yoli i sɔ ɔ? Kɛ ɔ ko yo naan y’a tɛ kosan sɔ’n su’n, é wá kókó Enɔki i ajalɛ liɛ’n su yalɛ e like suanlɛ nga nun. Kpɔkun, e like suanlɛ ng’ɔ́ bá lɔ’n i nun’n, é wá kókó Nowe liɛ’n su yalɛ.

Blɛ sukusuku nun’n, Enɔki nin Ɲanmiɛn be nantili

9. ?Ngue ndɛ yɛ e si i Enɔki su ɔ?

⁹ Enɔki yɛ ɔ ti sran klikli mɔ Ɲanmiɛn Ndɛ’n seli kɛ ɔ nin Ɲanmiɛn be nantili’n niɔn. Biblu’n se kɛ: ‘Kɛ Enɔki wuli Mɛtisela’n, ɔ nin Ɲanmiɛn be nantili klanman.’ (Bo Bolɛ 5:22) I sin’n, Biblu’n kɛnnin i nguan ɲanman’n i ndɛ. I nguan ɲanman sɔ’n sɛ be fa sunnzun e liɛ’n ɔ ti tɛnndɛn kpa. Sanngɛ sɛ e fa sunnzun Enɔki bɔbɔ blɛ su sran’m be liɛ’n, ɔ ti kaan. Kɛ Biblu’n wieli i sɔ’n kan’n, ɔ seli ekun kɛ: ‘Enɔki nin Ɲanmiɛn be nantili klanman kpɔkun b’a wunmɛn i kun, afin Ɲanmiɛn fɛli i.’ (Bo Bolɛ 5:24) Ɔ mɛnnin i su. Yɛle kɛ Enɔki wuli. Ɔ maan i kpɔfuɛ’m b’a kwlá klemɛn i ɲrɛnnɛn. (Ebre Mun 11:5, 13) Nán Biblu’n nun ndɛ mma nga’m be ngunmin yɛ be kan Enɔki ndɛ ɔ. Biblu’n nun ndɛ wie’m be kɛn i ndɛ. E kwla se weiin kɛ Enɔki blɛ’n yoli sukusuku, afin ndɛ nga e wunnin be lɛ’n ɔ nin uflɛ wie mun ekun, be yi i nglo sɔ.

10, 11. (a) ?Kɛ Adam nin Ɛvu be fɔnnin Ɲanmiɛn wun’n, wafa sɛ yɛ sa tɛ’n wa truli mɛn’n nun ɔn? (b) ?Ɲanmiɛn nuan ndɛ mennin yɛ Enɔki kɛnnin i ndɛ ɔ? ?Yɛ wafa sɛ yɛ sran’m be sɔli nun ɔn?

¹⁰ Amun e bu wafa nga kɛ Adam fɔnnin’n, sa tɛ’n truli’n, i angunndan. Biblu’n se kɛ Adam i wa kpɛnngbɛn Kaɛn yɛ ɔ ti sran klikli m’ɔ kunnin sran’n niɔn. Afin, ɔ kunnin i sinma Abɛli. (Bo Bolɛ 4:8-10) I sin’n, Adam nin Ɛvu b’a wuli Sɛti. Biblu’n kan ba sɔ’n i ndɛ kɛ: ‘Sɛti kusu wuli ba yasua kun, ɔ flɛli i kɛ Enɔki. Kɛ ɔ fɛ i lɛ’n, kɛ sran’m bé srɛ́ Ɲanmiɛn siɛn’n, be flɛ i kɛ Anannganman.’ (Bo Bolɛ 4:25, 26) ‘Kɛ ɔ fɛ i lɛ’n, kɛ sran’m bé srɛ́ Ɲanmiɛn siɛn’n, be flɛ i kɛ Anannganman’ sɔ, sanngɛ nɛ́n i kpa’n wie ɔ. Afin, be jasoli Ɲanmiɛn wun.b Kɛ be wuli Enɔki ɔ cɛli kpa, kpɔkun yɛ be wa wuli Lemɛki ɔ. Lemɛki ti Kaɛn i afinliɛ nunfuɛ’n kun. Ɔ kpɛli jue kun mɛnnin i yi mun. Jue sɔ’n nun’n, Lemɛki waan gbaflɛn kun boli i afɛ, ɔ maan ɔ kunnin i. I bɔbɔ seli kɛ: ‘Sɛ ɔ fata kɛ be kun sran kpɛ nso be sie Kaɛn osu’n, nn bé kún sran kpɛ ableso nin nso yɛ bé fá síe min osu ɔ.’—Bo Bolɛ 4:10, 19, 23, 24.

¹¹ Sa nga e dun mmua boli be su lɛ’n, be kle kɛ sa tɛ nga Satan kpɛli i ba Edɛni fie nun lɔ’n, ɔ sali Adam i afinliɛ nunfuɛ mun ndɛndɛ kpa. Mɛn sukusuku sɔ’n nun yɛ Enɔki yoli Ɲanmiɛn i nuan ijɔfuɛ. Ɲanmiɛn maan ɔ kannin ndɛ cinnjin kun m’ɔ ti e liɛ wie andɛ ɔ. Enɔki i ndɛ sɔ’n, Zidi boli su. I waan: ‘N wunnin e Min’n nin i anzi akpiakpi kpanngban kpa be bali kɛ bé fá sran’m be kwlaa blá be ja su naan be nga be sroman Ɲanmiɛn’n be sa nga be yoli’n, bé fɛ́ i nuan like mán be. Afin sa tɛ yofuɛ sɔ mɔ be sroman Ɲanmiɛn’n, be yo Ɲanmiɛn sa, yɛ be kɛn i wun ndɛ tɛtɛ.’ (Zid 14, 15) Ndɛ sɔ’n, Armagedɔn alɛ’n nun yɛ ɔ́ wíe su kpɛ́n mlɔnmlɔn. (Sa Nglo Yilɛ 16:14, 16) E kwla lafi su kɛ Enɔki blɛ sɔ’n nun’n, “sa tɛ yofuɛ” sunman be tili i ndɛ’n. Sanngɛ, i sɔ’n yoli be liɛ kɛ safle yɛ b’a wɔ be sa. E wun i wlɛ siɛn’n kɛ sɛ Ɲanmiɛn fali Enɔki lika sukusuku sɔ’n nun’n naan i kpɔfuɛ’m b’a klemɛn i ɲrɛnnɛn’n, ɔ ti klolɛ ayeliɛ.

?Ngue yɛ ɔ wlali Enɔki fanngan m’ɔ nin Ɲanmiɛn be nantili ɔ?

12. ?Ngue yɛ Enɔki yoli m’ɔ nin i blɛ su sran’m be liɛ’n timan kun ɔn?

¹² Maan e bu sa nga ɔ juli Edɛni fie nun lɔ’n, i angunndan ekun e nian. Adam nin Ɛvu be tieli Satan i aniɛn liɛ’n. Ɔ maan, Adam jasoli Zoova wun. (Bo Bolɛ 3:1-6) Abɛli liɛ’n, w’a faman i si’m be ajalɛ tɛ’n su. I sɔ’n ti’n, Zoova klun jɔli i wun. (Bo Bolɛ 4:3, 4) Sa sɔ’n, i tɛ lika’n, yɛle kɛ Adam i afinliɛ nunfuɛ’m be sunman lika b’a faman Abɛli i ajalɛ kpa’n su. Sanngɛ, Enɔki mɔ be wuli Abɛli lelele naan b’a wu i’n, ɔ fɛli i ajalɛ kpa’n su. ?Ngbaciɛ mennin yɛ ɔ o Enɔki nin Adam i afinliɛ nunfuɛ sunman be afiɛn ɔn? Akoto Pɔlu tɛ kosan sɔ’n su kɛ: ‘Ɲanmiɛn su mɔ Enɔki lafi’n ti yɛ ɔ fɛli i’n niɔn. B’a wunmɛn i kun afin Ɲanmiɛn mɛnnin i su. Be klɛli kɛ Ɲanmiɛn klun jɔli i wun naan w’a mɛn i su.’ (Ebre Mun 11:5) Laa ‘sran kpanngban kpa mɔ be kan Ɲanmiɛn sulafilɛ ndɛ’n,’ Enɔki o be nun wie. (Ebre Mun 12:1) Enɔki ɔ ɲannin afuɛ 300 tra su. I afuɛ sɔ’n ɔ tra e liɛ andɛ lele. Sanngɛ, Ɲanmiɛn sulafilɛ kpa m’ɔ lafili’n ti’n, ɔ kwla trɛli i awlɛn afuɛ wunmuan sɔ’n nun kɛ ɔ nin i fata’n sa!

13. ?Enɔki i Ɲanmiɛn sulafilɛ wafa’n yoli sɛ?

¹³ Kɛ Pɔlu kán Enɔki nin sran kpanngban kpa wie’m be Ɲanmiɛn sulafilɛ’n i ndɛ’n, ɔ seli kɛ: ‘Ɲanmiɛn su mɔ e lafi’n ti, e si weiin kpa kɛ y’a ɲan like nga e wla o su’n, ɔ maan e si kpa kɛ like nga e wunmɛn i’n o lɛ.’ (Ebre Mun 11:1) Kɛ be se kɛ be lafi Ɲanmiɛn su’n yɛle kɛ be si weiin kpa kɛ bé ɲán lika nga be wla o su’n. E wla dan mɔ e fa guɛ i like sɔ’n su ti’n, ɔ ɲan ta e ninnge’m be yolɛ su. Ɲanmiɛn sulafilɛ sɔ’n, yɛ ɔ ukali Enɔki maan mɛn sukusuku sɔ’n nun’n, ɔ nin Ɲanmiɛn be kwla nantili ɔ.

14. ?Atrɛkpa’n, like mennin su yɛ Enɔki i Ɲanmiɛn sulafilɛ’n takali ɔ?

¹⁴ Ɲanmiɛn sulafilɛ kpa’n, ɔ taka like silɛ kpa’n su. ?Like mennin yɛ Enɔki sili ɔ? (Rɔmfuɛ Mun 10:14, 17; 1 Timote 2:4) Nanwlɛ, sa kwlaa nga ɔ yoli Edɛni fie nun lɔ’n, Enɔki sili i. Asa kusu’n, mɛn klanman nga ɔ o Edɛni lɔ’n, Enɔki tili ndɛ wie. Kannzɛ bɔbɔ Ɲanmiɛn fuannin sran mun Edɛni fie nun’n, sanngɛ atrɛkpa’n, Enɔki blɛ su’n nn Edɛni fie sɔ’n te o lɛ. (Bo Bolɛ 3:23, 24) Asa ekun’n, Enɔki si Ɲanmiɛn i klun sa mɔ yɛle kɛ Adam i afinliɛ nunfuɛ’m be yi asiɛ’n, kpɔkun naan be yo naan mɛn klanman’n ɔ trɛ asiɛ wunmuan’n su’n. (Bo Bolɛ 1:28) Kusu’n, Zoova i nda nga ɔ tɛli i kɛ sran kun wá bá naan wá kpɔ́tɔ Satan i ti naan sran sɔ’n yɛ wá kún Satan’n, Enɔki i ɲin o su wie kpa. (Bo Bolɛ 3:15) Ɔ maan kɛ e nian kpa sa’n, Ɲanmiɛn nuan ndɛ mɔ Enɔki kannin’n m’ɔ o Zid fluwa nun’n, Satan i osu’n i nunnunlɛ’n i ndɛ yɛ ɔ kan ɔn. Kɛ mɔ Enɔki lafili Ɲanmiɛn su m’ɔ suli i’n, ɔ sili kɛ ‘be nga be kunndɛ Ɲanmiɛn’n, ɔ yi i wun nglo kle be.’ (Ebre Mun 11:6) Ɔ maan, kannzɛ bɔbɔ Enɔki i like liɛ nga ɔ si i’n timan dan kɛ e liɛ’n sa’n, sanngɛ i like liɛ nga ɔ sili i’n, ɔ fa wlali i Ɲanmiɛn sulafilɛ’n i bo ase kpa. Mɛn sukusuku sɔ’n nun’n, Enɔki fali i Ɲanmiɛn sulafilɛ sɔ’n, ɔ fa jrannin kekle w’a fɔnman.

Maan e nanti Enɔki i ajalɛ’n su

15, 16. ?Wafa sɛ yɛ e kwla nanti Enɔki i ajalɛ’n su ɔ?

¹⁵ Kɛ mɔ mɛn sukusuku nga e o nun yɛ’n nun e kunndɛ kɛ Zoova klun jɔ e wun kɛ Enɔki liɛ sa’n, ɔ nin i fata kɛ e su Enɔki i ajalɛ’n su. I sɔ’n ti’n, ɔ nin i fata kɛ e suan Zoova i su ndɛ’n nin i klun sa mun naan e fa be e sie e klun. Sanngɛ nán ngalɛ ngunmin yɛ ɔ fata kɛ e yo ɔ. Ɔ nin i fata kusu kɛ e yaci ninnge nga e suan be’n be lɛ naan be kaci e nzuɛn’n. (Jue Mun 119:101; 2 Piɛr 1:19) Asa ekun’n, ɔ nin i fata kɛ ninnge nga Ɲanmiɛn kle e’n tinngɛ e ɲrun atin. E mian e ɲin titi naan e like kwlaa yolɛ nun’n, Ɲanmiɛn klun jɔ e wun.

¹⁶ Biblu’n nun’n, b’a kanman sran uflɛ fi i ndɛ mɔ Enɔki blɛ su’n, ɔ suli Zoova ɔ. I sɔ’n ti’n, kɛ e niɛn i sa’n, atrɛkpa’n Enɔki kunngba annzɛ sran akpasua kaan sa yɛ be suli Zoova ɔ. E kusu, mɛn wunmuan’n nun’n y’a sɔnman sɔ liɛ. Sanngɛ i sɔ’n bubuman e sa sin. Sa kwlaa ng’ɔ́ tánndan e ɲrun’n, Zoova ɔ́ nían e lika i nun. (Rɔmfuɛ Mun 8:31) Enɔki w’a sisimɛn i bo, yakpa su ɔ kannin sran tɛ’m be nunnunlɛ ndɛ kleli i mɛn nunfuɛ mun. E kusu kɛ é ‘kán Ɲanmiɛn sielɛ’n i jasin fɛ’n’ mɔ be sri e, be tanndan e ɲrun, be kle e ɲrɛnnɛn’n mɔ sanngɛ e te bo’n, ɔ kle kɛ e ti yakpafuɛ wie. (Matie 24:14) Enɔki w’a tranman nguan nun w’a cɛman lele kɛ i mɛn nunfuɛ wie mun sa. Sanngɛ, like nga ɔ fɛli i wla guali su kɛ ɔ ɲɛ́n i’n, ɔ nunman asiɛ’n su wa. Like nga ɔ fɛli i wla guali su’n, ɔ ti dan kpa lele. (Ebre Mun 11:10, 35) E kusu like nga e fa e ɲin sie su’n, yɛle Zoova i klun sa’n i su kpɛnlɛ’n. Ɔ maan, e kunndɛman mɛn’n nun ninnge’m be ngboko. (1 Korɛntfuɛ Mun 7:31) Like nga e fa sie e like kwlaa ɲrun’n yɛle Zoova i junman’n i dilɛ’n.

17. ?Ɲanmiɛn ninnge’m be nun like mennin yɛ e le i mɔ Enɔki w’a ɲɛnmɛn i ɔ? ?Yɛ like sɔ’n, ngue yɛ ɔ nin i fata kɛ e fa yo ɔ?

¹⁷ Enɔki lafili su kɛ Ɲanmiɛn i Osu nga ɔ fata kɛ ɔ bla’n, sɛ ɔ ju Zoova blɛ liɛ’n su’n ɔ́ bá. Ɲanmiɛn i Osu sɔ’n kusu bali. Ɔ bali i afuɛ ko ju 2.000 yɛ. Osu sɔ’n yɛle Zezi Klist. Kɛ ɔ bali’n, ɔ yili e ti tɛ. E ti tɛ sɔ’n tikeli e bɔbɔ nin be nga laa be lafili Ɲanmiɛn su kɛ Enɔki sa’n e ɲrun atin. Ɔ maan, cɛn wie lele e kwla ɲan anannganman nguan. Kɛ é sé yɛ’n, Ɲanmiɛn i osu sɔ’n ti Famiɛn i Sielɛ Blɛ’n su. Kɛ be sieli i famiɛn’n, ɔ fuannin Satan ɲanmiɛn su lɔ yili i asiɛ’n i nvɛnwun wa. I sɔ’n ti yɛ e wun asiɛ’n su sa sukusuku beblebe mun’n niɔn. (Sa Nglo Yilɛ 12:12) Nanwlɛ, Ɲanmiɛn ninnge’m be nun like nga e le i’n ti dan tra Enɔki liɛ’n. I sɔ’n ti’n, maan e Ɲanmiɛn sulafilɛ’n taka kpa kɛ Enɔki liɛ’n sa. Maan e lafi su kpa kɛ Ɲanmiɛn i klun sa’m bé kpɛ́n su, yɛ maan be wun i sɔ liɛ’n e like kwlaa yolɛ nun. Maan e kusu mɛn sukusuku nga e o nun yɛ nun’n, e yo kɛ Enɔki sa, yɛ maan e nin Ɲanmiɛn e nanti.

[Ja ngua lɛ ndɛ mun]

?Wafa sɛ yɛ amún tɛ́ kosan’m be su ɔ?

• ?Kɛ be se kɛ be nin Ɲanmiɛn be nanti’n, i bo’n yɛle mennin?

• ?Ngue ti yɛ e nin Ɲanmiɛn e nantilɛ’n ti e mɛn’n nun like kpafuɛ’n niɔn?

• ?Kannzɛ bɔbɔ sɛ Enɔki trannin mɛn sukusuku nun’n, ngue yɛ ɔ kwla ukɛli naan ɔ nin Ɲanmiɛn b’a kwla nanti ɔ?

• ?Wafa sɛ yɛ e kwla nanti Enɔki i ajalɛ’n su ɔ?