Maan e wla e wun ase e kunndɛ Zoova i suralɛ’n
“Be nga be kunndɛ [Ɲanmiɛn’n], ɔ́ yí i wun klé be [“ɔ́ rá be su,” NW].”—EBR. 11:6.
1, 2. (a) ?Ngue yɛ sran kpanngban be yo naan Ɲanmiɛn w’a ra be su ɔ? (b) ?Ngue ti yɛ ɔ fata kɛ e jran nun cinnjin kpa kɛ Zoova ra e su ɔ?
“MAAN Ɲanmiɛn yo wɔ liɛ ye!” Nvle wie nun’n, sɛ sran yo i wiengu kpa’n, kɛ be kɛn i sɔ ɔ. Wie liɛ’n, Ɲanmiɛn sulɛ wafa’m be su kpɛnngbɛn’m be ra sran mun, ɔ nin nnɛn mun yɛ ninnge uflɛ’m be nguan. Sran’m be kɔ lika wie’m be nun be ko wlanwlan lɔ. Afin be seli be kɛ sɛ be yo sɔ’n, bé ɲán suralɛ. Kpɛ sunman’n, politikifuɛ’m be se Ɲanmiɛn kɛ ɔ ra be nvle’n su. ?Kɛ amun niɛn i sa’n, Ɲanmiɛn nga be srɛ i sɔ’n, ɔ nin i fata? ?Ɲanmiɛn ra be su sakpa? ?Wan yɛ Ɲanmiɛn rɛ i su ɔ? ?Yɛ ngue ti ɔ?
2 Zoova dun mmua kannin kɛ, kɛ mɛn’n wá wíe’n, sran mɔ be ti sanwun mɔ be kloman ndɛnngan mɔ be fin nvlenvle kpanngban nun’n, bé yó i nvle. I waan kannzɛ sran’m be kpɔ be naan be tanndan be ɲrun’n, sanngɛ bé bó Ɲanmiɛn Sielɛ’n i jasin fɛ’n mɛn wunmuan’n nun. (Eza. 2:2-4; Mat. 24:14; Ngl. 7:9, 14) E nga mɔ e kplinnin su kɛ é yó i sran’m be nunfuɛ wie’n, e kunndɛ kɛ ɔ ra e su. Yɛ e sa miɛn i sɔ’n i wun kpa. Afin sɛ Ɲanmiɛn w’a raman e su’n, e kwlá yoman like fi. (Jue. 127:1) ?Sanngɛ ngue yɛ e kwla yo naan Ɲanmiɛn w’a ra e su ɔ?
Aɲinyiɛfuɛ’m bé ɲán suralɛ dan
3. ?Sɛ Izraɛlifuɛ’m be fali Ɲanmiɛn nuan ndɛ’n su’n, nn ngue yɛ be ɲɛnnin i ɔ?
3 An kanngan Nyanndra Mun 10:6, 7 nun. Kɛ Izraɛli nvle’n wá wlú Mɛn nga Ɲanmiɛn tali nda kɛ ɔ́ fá mɛ́n i’n i nun’n, Zoova kleli kɛ sɛ be fɛ i nuan ndɛ’n su’n, bé dí ye yɛ ɔ́ sásá be. (Mml. 28:1, 2) Zoova wá rá be su kpa liɛ su. Sran kpa sɔ’m be kwla lafi su.
4. ?Wafa sɛ yɛ sran kun kwla fa Ɲanmiɛn nuan ndɛ’n su sakpa ɔ?
4 ?Wafa sɛ yɛ ɔ fata kɛ Izraɛlifuɛ’m be fa Ɲanmiɛn i nuan ndɛ’n su ɔ? Ɲanmiɛn i Mmla’n waan sɛ i sran’m ‘b’a tu-man be klun b’a su-mɛn’ i’n, ɔ su yomɛn i fɛ. (An kanngan Mmla’n 28:45-47 nun.) Zoova i nuan ndɛ’n i su falɛ’n, nɛ́n i yɛle ndɛ nga Zoova kan’n i su nantilɛ ngbɛn sa. Afin, nnɛn nin mmusu’m be kusu sɛ be se be kɛ be yo sa be yo sa’n, kpɛkun be su yo. (Mar. 1:27; Zak 3:3) Ɔ fata kɛ Ɲanmiɛn i nuan ndɛ’n i su falɛ’n taka klolɛ’n su. Sran ng’ɔ fa Zoova nuan ndɛ’n su sakpa’n, ɔ yo i aklunjuɛ su. Afin ɔ lafi su kɛ Zoova i mmla’m be su falɛ’n yoman ya. Naan “be nga be kunndɛ i’n, ɔ́ yí i wun klé be [“ɔ́ rá be su,” NW].”—Ebr. 11:6; 1 Zan 5:3.
5. ?Wafa sɛ yɛ nda nga Zoova tali’n i su lafilɛ’n kwla uka sran kun naan w’a fa mmla ng’ɔ o Mmla’n 15:7, 8 nun’n i su ɔ?
5 Wafa nga sran kun kwla kle kɛ ɔ lafi su kɛ sɛ ɔ fa Ɲanmiɛn nuan ndɛ’n su’n ɔ́ ɲán suralɛ’n, ndɛ ng’ɔ o Mmla’n 15:7, 8 nun’n i su falɛ’n kwla yi i nglo. (An kanngan nun.) Sɛ sran kun fa mmla’n sɔ’n su naan nɛ́n i klunklo su’n, i yo ɔ kwla yo yalɛfuɛ’n i ye sɔ. ?Sanngɛ sɛ ɔ yo i sɔ’n, anuannzɛ kwla tran Ɲanmiɛn i nvlefuɛ’m be afiɛn? Kusu e si kɛ Zoova kwla niɛn i sufuɛ’m be lika. ?Sanngɛ sran ng’ɔ fa mmla’n sɔ’n su mɔ nɛ́n i klun su’n, ɔ kwla yi i nglo kɛ lafi su kɛ Zoova kwla niɛn i sufuɛ’m be lika naan ɔ su yo aklunye kɛ Zoova sa? Asa ekun’n, i sɔ’n klé kɛ sran’n kwlá yimɛn i nglo kɛ Ɲanmiɛn ti aklunyefuɛ. Sran ng’ɔ yo sran ye’n, Ɲanmiɛn nian naan sɛ ɔ ti i klun su o. Sɛ ɔ ti i klun su’n, ɔ tali nda kɛ ɔ́ rá sran sɔ’n su. Ɔ maan like kwlaa ng’ɔ yo’n ɔ nin junman kwlaa ng’ɔ di’n, ɔ́ yó ye i sa nun. (Mml. 15:10) Sran ng’ɔ lafi i sɔ liɛ’n su’n, ɔ́ fá ajalɛ. Kpɛkun ajalɛ sɔ’n ti’n, ɔ́ ɲán suralɛ kpanngban.—Nya. 28:20.
6. ?Ngue like yɛ Ebre Mun 11:6 cici e wla kɛ é ɲɛ́n i ɔ?
6 Ebre Mun 11:6 kle kɛ ɔ fata kɛ e lafi su kɛ Zoova yi i wun nglo kle sran mun yɛle kɛ ɔ ra be su. Yɛle kɛ ɔ yo be mo. Sanngɛ nɛ́n i ngba ɔ. Ɔ kle e wie kɛ sɛ e waan Ɲanmiɛn ra e su’n, nzuɛn kun ekun o lɛ m’ɔ fata kɛ e yi i nglo ɔ. Maan e sie i nzɔliɛ kɛ Zoova yo be nga “be kunndɛ i’n” be mo. Ndɛ mma nga i nun mɔ bé klɛ́ Biblu’n be fa klɛli ndɛ sɔ’n, ɔ wɔ like nga be kpinngbin be wun be yo’n. Nanwlɛ, ɔ fata kɛ ndɛ mma sɔ’n cici e wla! Ɔ kle e kɛ saan Ɲanmiɛn rá e su. Afin sran nga m’ɔ maan be klɛli ndɛ sɔ’n, yɛle Ɲanmiɛn Kpli “b’ɔ bua-man ato’n.” (Tit 1:2) I afuɛ akpingbinngbin kpanngban yɛ, ɔ kleli kɛ nda ng’ɔ ta’n be kwla lafi su. Ndɛ ng’ɔ kan’n to fuanman. I kwlaa kpɛn su titi. (Eza. 55:11) Ɔ maan e kwla lafi su kpa kɛ sɛ e lafi Ɲanmiɛn su sakpa’n, ɔ́ rá e su wie.
7. ?Ngue yɛ e kwla yo naan y’a lafi su kɛ saan Abraamu i ‘anunman’n’ ti’n, é ɲán suralɛ ɔ?
7 Zezi Klist yɛ ɔ yoli Abraamu i ‘anunman’m’ be nun sran cinnjin’n niɔn. Kpɛkun Klistfuɛ nga be kpali be sieli be ngunmin’n yɛ be ukɛ i ɔ. Be seli be kɛ be ‘yi i b’ɔ flɛli be kɛ be jao aosin nun, be bla lika ng’ɔ kpaja kpa nun’n i ayɛ.’ (Gal. 3:7-9, 14, 16, 26-29; 1 Piɛ. 2:9) Sɛ e buman be nga Zezi fɛli i ninnge mun wlali be sa nun kɛ be nian su’n be wie’n, e nin Zoova e afiɛn’n kwlá sɛman kpa. Sɛ ɔ timan “sran kpa nanwlɛfuɛ b’ɔ si ngwlɛlɛ’n” ti’n, e su wunman ndɛ nga e kɛnngɛn i Ɲanmiɛn Ndɛ’n nun’n, i wlɛ kpa sa. Yɛ e su wunman wafa nga e kwla nanti su’n. (Mat. 24:45-47) Sɛ e nanti ninnge nga e suan be Biblu’n nun’n be su’n, e kwla lafi su kɛ Ɲanmiɛn rá e su.
Nán e ɲin kpa Ɲanmiɛn i klun sa’n i yolɛ’n su
8, 9. ?Wafa sɛ yɛ lalafuɛ bian Zakɔbu miɛnnin i ɲin yoli like nga ɔ kunndɛ’n i nuan su sa ɔ?
8 Kɛ be kan kɛ sran nga i waan Ɲanmiɛn rɛ i su’n, ɔ fata kɛ ɔ miɛn i ɲin’n, ɔ yo maan e wla kpɛn lalafuɛ sran Zakɔbu su. Ɔ siman wafa nga nda nga Ɲanmiɛn tali Abraamu’n, ɔ́ kpɛ́n su’n. Sanngɛ ɔ lafili su kɛ Zoova yó maan i nannan’n i osu nunfuɛ’m bé sɔ́n. Yɛ bé káci nvle dan kun. I sɔ’n ti’n, afuɛ nga be flɛ i 1781 ka naan b’a wu Zezi i nun’n, Zakɔbu ɔli Aran. Ɔ ɔli bla ng’ɔ ko jɛ i’n i kunndɛlɛ. Nán bla klanman kun kunndɛlɛ ngbɛn sa yɛ ɔ ɔli ɔ. Sanngɛ ɔ ɔli bla ng’ɔ ti Zoova i sufuɛ mɔ Zoova i ninnge’m be lo i’n, m’ɔ kwla tɛ i mma mun kpa’n, i kunndɛlɛ.
9 E si kɛ Zakɔbu nin Rasɛli be yiali nun. Ɔ wa kloli Rasɛli. Ɔ maan ɔ kplinnin su kɛ ɔ́ dí junman afuɛ nso mán Rasɛli i si Laban naan Laban fɛ i wa’n mɛn i naan ɔ jɛ i. I sɔ liɛ’n timan aja ndɛ fɛfɛ kun sa ngbɛn. Ɔ ti weiin kɛ Zakɔbu si nda nga Ɲanmiɛn mɔ like fi nunmɛn i sin’n, ɔ tali i nannan Abraamu m’ɔ boli su kleli i si Izaaki’n. (Bob. 18:18; 22:17, 18; 26:3-5, 24, 25) Izaaki kusu seli i wa Zakɔbu kɛ: “Maan Nyanmiɛn b’ɔ kwla like kwlaa yo’n ɔ jran ɔ sin, maan ɔ man ɔ ba kpanngban, maan ɔ osu’n trɛ dan kpa. Maan ɔ fa muae ng’ɔ mannin Abraam’n i wie man wɔ nin ɔ osu’n. Maan mɛn nga a ti nun aofuɛ yɛ’n, bɔ Nyanmiɛn fa mannin Abraam’n ɔ yo ɔ liɛ.” (Bob. 28:3, 4) Ɔ maan Zakɔbu i ɲin ng’ɔ miannin kunndɛli bla ng’ɔ nin i fata m’ɔ nin i be kwla wu ba’n, ɔ yi i nglo kɛ ɔ lafi ndɛ nga Zoova kannin’n su.
10. ?Ngue ti yɛ ɔ yoli Zoova i fɛ kɛ ɔ ra Zakɔbu su kɛ nga Zakɔbu fa srɛli i’n sa ɔ?
10 Zakɔbu w’a kunndɛman aɲanbeun ninnge mun naan i awlofuɛ’m be di fɛ. I osu’n i su ndɛ nga Zoova kannin’n i su yɛ i akunndan’n trannin ɔn. Wafa nga Zoova i klun sa’n kpɛ́n su’n, i su yɛ ɔ fɛli ɲin sieli ɔ. Kannzɛ bɔbɔ lika’n yoli kekle sɛ’n, sanngɛ Zakɔbu trɛli i awlɛn yoli like kwlaa ng’ɔ kwlɛ i yo’n naan Zoova rɛ i su. Lele m’ɔ́ fá yó kpɛnngbɛn’n, ɔ yoli sɔ. Ɔ maan i sɔ’n ti’n, Zoova rɛli i su.—An kanngan Bo Bolɛ 32:25-30 nun.
11. ?Ɲanmiɛn i klun sa m’ɔ boli su i Ndɛ’n nun’n ti’n, ngue yɛ ɔ fata kɛ e mian e ɲin e yo ɔ?
11 Kɛ Zakɔbu sa’n, e siman wafa nga Zoova i klun sa’n i ngbɛsungbɛsu’n kwlaa kpɛ́n su’n. Sanngɛ kɛ e suan Ɲanmiɛn Ndɛ’n e wun sa ng’ɔ́ jú “e Min’n i balɛ’n [“Zoova i cɛn’n,” NW]” i nun’n i wlɛ kan. (2 Piɛ. 3:10, 17) I wie yɛle kɛ e siman cɛn trele sɔ’n, sanngɛ e si kɛ w’a mantan koko. Kɛ Ɲanmiɛn Ndɛ’n se kɛ sɛ e tu e klun e bo jasin fɛ’n kpa blɛ kaan ng’ɔ ka lɛ’n nun’n, é dé e bɔbɔ e wun yɛ é dé be nga be ti e ndɛ’n, e lafi su.—1 Tim. 4:16.
12. ?Ngue yɛ e si i ɔ?
12 E wun i wlɛ kɛ mɛn’n kwla ka lɛ wie kpɛ kunngba. Ɔ nunman nun kɛ Zoova minndɛ lele naan e bo jasin fɛ’n e kle asiɛ’n sufuɛ’m be tinuntinun. (Mat. 10:23) Asa ekun’n, be kle e wafa nga e kwla di jasin fɛ’n i bolɛ junman’n i kpa’n. E lafi Ɲanmiɛn su e bo jasin fɛ’n e ju kan e sa kwla ju lɛ’n. E fa e sa nun ninnge kwlaa e wlɛ i sɔ’n i yolɛ’n nun. ?Sanngɛ e jasin fɛ bowlɛ’n nun lɔfuɛ’m be sunman lika bé sɔ́ jasin nga e bo’n nun klanman? Nanwlɛ i sɔ liɛ’n e kwlá wunmɛn i wlɛ. (An kanngan Akunndanfuɛ’n 11:5, 6 nun.) E junman nga e di’n, yɛle jasin fɛ’n i bolɛ. E lafi su kɛ Zoova rá e su. (1 Kor. 3:6, 7) Maan e si kɛ ɔ wun e ɲin nga e mian’n yɛ ɔ́ fɛ́ i wawɛ’n kle e atin ng’ɔ nin i fata’n.—Jue. 32:8.
Maan e kunndɛ ukalɛ Ɲanmiɛn wawɛ’n i sa nun
13, 14. ?Wafa sɛ yɛ Ɲanmiɛn wawɛ’n i tinmin’n i ɲin fiteli Ɲanmiɛn i sufuɛ’m be ukalɛ’n nun ɔn?
13 ?Sɛ ɔ yo e kɛ e kwlá diman Ɲanmiɛn i junman wafa wie annzɛ e kwlá boman jasin fɛ’n, ngue yɛ ɔ fata kɛ e yo ɔ? Ɔ fata kɛ e srɛ Zoova naan ɔ fɛ i wawɛ’n uka e naan like kan nga e si i yo i junman’n i dilɛ’n nun’n, i ɲin fite. (An kanngan Lik 11:13 nun.) Kannzɛ sran kun ti sɛ ti sɛ’n, Ɲanmiɛn wawɛ’n kwla yo maan ɔ si Ɲanmiɛn junman’n i di. I wie yɛle kɛ i nun mɔ Izraɛlifuɛ’m bé fín Ezipti bé fíte’n, be ti nnɛn tafuɛ nin kanga. Be siman alɛ kun. Sanngɛ Ɲanmiɛn wawɛ’n yoli maan be kwlali be kpɔfuɛ mun. (Tul. 17:8-13) Kɛ i sin lali nun’n, Ɲanmiɛn wawɛ kunngba’n yoli maan Bɛzaleɛli nin Ɔɔliabu be kwla niannin ndɛ nga Ɲanmiɛn kannin’n su be kplannin Ɲanmiɛn i tannin sua’n klanman kpa.—Tul. 31:2-6; 35:30-35.
14 E blɛ liɛ’n nun’n, kɛ ɔ fatali kɛ Ɲanmiɛn i sufuɛ’m be bɔbɔ be yi fluwa mun naan b’a fa di anuannzɛ’n i junman wie mun’n, wawɛ sɔ m’ɔ le tinmin dan’n, ɔ ukali be. Blɛ sɔ’n nun’n, aniaan ng’ɔ nian fluwa yiwlɛ’n su’n suan Robert Martin. Ɔ klɛli fluwa kun fa kannin junman nga be dili i afuɛ nga be flɛ i 1927 nun’n i ndɛ. I waan: “Kɛ i blɛ’n juli cɛ’n, e Min’n mannin atin. Ɔ maan e ɲannin mannzin dan kun mɔ be fa yi fluwa’n. Kusu nn e siman wafa nga be fa di junman’n. Sanngɛ e Min’n si wafa ng’ɔ kwla uka be nga be fali be wun be mɛnnin i mlɔnmlɔn’n naan b’a si ngwlɛlɛ kpa ekun. [...] Kɛ ɔ dili le mɔcuɛ nɲɔn kun cɛ’n, e kwla fali mannzin’n e dili junman. Dɔ nga su’n, ɔ te di junman kpa. Junman nga e fa di’n bɔbɔ’n, be nga be yili’n be siman kɛ ɔ kwla di i sɔ junman liɛ’n.” Lele nin andɛ’n, Zoova te ra e ɲin mianlɛ kɛ ngalɛ sa’n su.
15. ?Wafa sɛ yɛ ndɛ ng’ɔ o Rɔmfuɛ Mun 8:11 nun’n, ɔ kwla wla be nga sa wie tanndan be Ɲanmiɛn sulafilɛ’n i ɲrun’n be fanngan ɔn?
15 Junman nga Zoova i wawɛ’n di’n ti fanunfanun. Ɲanmiɛn i sufuɛ’m be ngba be kwla ɲan wawɛ sɔ’n. Ɔ uka be naan b’a kwla jran sa dandan kpa’m be ɲrun. ?Sɛ ninnge kpanngban be sa e Ɲanmiɛn sulafilɛ’n be nian’n, ngue yɛ e kwla yo ɔ? Pɔlu i ndɛ ng’ɔ o Rɔmfuɛ Mun 7:21, 25 ɔ nin 8:11 be nun’n, ɔ kwla wla e fanngan. “Nyanmiɛn b’ɔ cɛnnin Jésus’n i Wawɛ’n” kwla di junman e nun. Ɔ kwla wla e fanngan naan y’a jran ninnge nga e konvi sɔ be’n, be ɲrun. Klistfuɛ nga be kpali be sieli be ngunmin’n, be ti yɛ be klɛli ndɛ sɔ’n niɔn. Sanngɛ ɔ ti Ɲanmiɛn i sufuɛ’m be kwlaa be liɛ wie. Sɛ e tinuntinun e lafi Klist su naan e mian e ɲin e yaci ninnge nga be timan kpa mɔ e konvi sɔ be’n, naan e nian atin nga Ɲanmiɛn wawɛ’n kle e’n su e nanti’n, yɛ e kwla ɲan nguan ɔn.
16. ?Ngue yɛ ɔ fata kɛ e yo naan Ɲanmiɛn w’a fɛ i wawɛ’n w’a man e ɔ?
16 ?Sɛ e bubu e sa nin e ja e tran su’n, e kwla lafi su kɛ Ɲanmiɛn fɛ́ i wunmiɛn m’ɔ fa di junman’n fá wlá e fanngan? Cɛcɛ. Ɔ fata kɛ e srɛ i naan ɔ fa man e. Yɛ Ɲanmiɛn Ndɛ’n mɔ e kwla fa sunnzun aliɛ’n, ɔ fata kɛ e di i kpa liɛ su. (Nya. 2:1-6) Kusu Ɲanmiɛn wawɛ’n o asɔnun’n i su. Kɛ e kɔ aɲia’m be bo titi’n, ɔ kle kɛ e kunndɛ kɛ é ‘tíe ndɛ nga Nyanmiɛn Wawɛ’n kan kle asɔnun mun’n.’ (Ngl. 3:6) Asa ekun’n, ɔ fata kɛ e kan e wun ase e nanti ninnge nga e suan’n su. Nyanndra Mun 1:23 man e afɔtuɛ yɛ’n. I waan: “Sɛ an kpɛ amun nyin be ti min afɔtuɛ ndɛ’n, ń fá n wawɛ’n ń wlá amun nun, yɛ ń tíke min akunndan’m be su ń klé amun.” Ɛɛn, Ɲanmiɛn fɛ i wawɛ’n man “be bɔ be nyin yi i’n” sakpa. —Yol. 5:32.
17. ?Kɛ Ɲanmiɛn ra e ɲin nga e mian’n su’n wafa ng’ɔ yo e’n, ngue yɛ e kwla fa e sunnzun i ɔ?
17 Ɔ ti su kɛ ɔ fata kɛ e mian e ɲin naan Ɲanmiɛn w’a ra e su. Sanngɛ nán junman mɔ e tu e klun e di’n i ngunmin ti yɛ Zoova fa ninnge kpakpa kpanngban mɛn i nvle’n nunfuɛ mun ɔn. Wafa nga e su m’ɔ ra’n ɔ yo e ye’n, e kwla fa sunnzun aliɛ dilɛ. E siman wafa nga aliɛ nga e di’n, ɔ yo e wunnɛn’n nun’n. Nga e si i’n, yɛle kɛ ɔ fata kɛ di aliɛ. Sɛ aliɛ kpakpa mun yɛ e di’n, ɔ kwla yo e ye kpa ekun. Ɲanmiɛn yɛ ɔ yili aliɛ mannin e ɔ. Asa ekun’n, ɔ yili e naan kɛ e di aliɛ’n, ɔ yo e fɛ naan ninnge nga be o aliɛ’n nun’n be wluwlu e wunnɛn’n nun naan y’a ɲan wunmiɛn. I kunngba’n, Zoova kle e ninnge ng’ɔ fata kɛ e yo naan y’a ɲan anannganman nguan’n. Kpɛkun ɔ uka e naan y’a kwla yia ninnge sɔ’m be nuan. I kpa’n i yɛ ɔ di junman’n i dan lika ɔ. Ɔ maan ɔ nin manmanlɛ fata. I ti ɔ fata kɛ e nin i e di junman likawlɛ. Yɛle kɛ maan e niɛn Ɲanmiɛn klun sa’n su e fa ajalɛ naan w’a ra e su.—Aze 2:18, 19.
18. ?Ngue yɛ amun a ta nda kɛ amún yó ɔ? ?Yɛ ngue ti ɔ?
18 I sɔ’n ti’n, junman kwlaa nga be man e’n, maan e tu e klun e di i dilɛ kpa. Kpɛkun e lafi su kɛ Zoova úka e naan y’a kwlɛ i di. (Mar. 11:23, 24) Kɛ é yó i sɔ liɛ’n, maan e lafi su kɛ “sran ng’ɔ kunndɛ like’n, ɔ nyɛn i.” (Mat. 7:8) Suralɛ nga be nga be kpa be sieli be ngunmin’n bé ɲɛ́n i’n, yɛle kɛ bé ɲán ‘nguan b’ɔ ti like kpa’n’ ɲanmiɛn su lɔ. (Zak 1:12) Klist i “bua’m be wie” mun be mian be ɲin naan b’a ɲan suralɛ. Abraamu i anunman’n i dunman nun ti yɛ maan i sɔ’n kwla yo ye ɔ. Kɛ Klist wá kán ndɛ yɛ’n klé be’n, bé wá dí aklunjuɛ. Ɔ́ sé be kɛ: “Amun mɔ n Si yoli amun ye’n, an bla be wa di famiɛn dilɛ’n i aja’n mɔ kɛ bé bó mɛn’n i bo’n be sie mannin amun’n.” (Zan 10:16; Mat. 25:34, NW) “Be nga Anannganman yra be nguan’n, mɛn’n ɔ́ yó be liɛ. [...] Bé trán nun tititi” sakpa.—Jue. 37:22, 29.
?Amun kwla yiyi nun?
• ?Wafa sɛ yɛ sran kun kwla fa Ɲanmiɛn nuan ndɛ’n su sakpa ɔ?
• ?Ngue yɛ ɔ fata kɛ sran kun yo naan Ɲanmiɛn w’a rɛ i su ɔ?
• ?Ngue yɛ e kwla yo naan y’a ɲan Ɲanmiɛn wawɛ’n niɔn? ?Yɛ wafa sɛ yɛ ɔ kwla di junman e nun ɔn?
[Foto mun, bue 12]
Zakɔbu nin anzi kun be kplili lele naan Zoova rɛ i su.
?Amun mian be ɲin be yo i sɔ kunngba’n?
[Foto, bue 13]
Ɲanmiɛn wawɛ’n maan Bɛzaleɛli nin Ɔɔliabu be sa tɔli junman’n nun kpa.