-
?Bian nin bla nna’n i su ndɛ benin yɛ Biblu’n kan-ɔn?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 41
?Bian nin bla nna’n i su ndɛ benin yɛ Biblu’n kan-ɔn?
Bian nin bla nna’n i ndɛ kanlɛ’n ɔ yo sran wie’m be kɛnsrɛn. Sanngɛ kɛ Biblu’n kán bian nin bla nna’n i ndɛ’n, ɔ yo i sɔ kɛ ng’ɔ nin i fata’n sa. Yɛ kusu ndɛ ng’ɔ kan’n ɔ yo e ye. I sɔ’n boman e nuan, afin Zoova yɛ ɔ yili e-ɔ. Ɔ maan ɔ si like ng’ɔ ti kpa man e’n. Ɔ kle e ninnge nga sɛ e yo’n i klun jɔ́ e wun’n, ɔ nin like ng’ɔ kwla uka e naan y’a di aklunjɔɛ tititi’n.
1. ?Wafa sɛ yɛ Zoova bu bian nin bla nna’n niɔn?
Bian nin bla nna’n ɔ ti like mɔ Ɲanmiɛn fa cɛli klɔ sran mun-ɔn. Be nga be o aja nun’n yɛ ɔ fɛli i sɔ like mannin be-ɔ. Like sɔ mɔ Zoova fa man be nga b’a ja bla annzɛ bian’n, ɔ yo maan be kwla wu ba yɛ kusu be kwla yi be wiengu klolɛ’n i nglo. I sɔ’n ti’n, Ɲanmiɛn Ndɛ’n se kɛ: “Maan a nin ɔ gbanflɛn nun bla’n be di aklunjɔɛ.” (Ɲanndra Mun 5:18, 19) Zoova kunndɛman kɛ Klisifuɛ nga be o aja nun’n be kunndɛ bla annzɛ bian be wiengu bo.—Kanngan Ebre Mun 13:4 nun.
2. ?Ngue yɛle bla nin bian kunndɛlɛ sukusuku nin i wunsu ɲannzuɛn sa mun’n?
Biblu’n se kɛ ‘be nga be kunndɛ bla nin bian sukusuku annzɛ be yo i wunsu ɲannzuɛn sa mun’n, be su diman Ɲanmiɛn Sielɛ’n i aja’n wie.’ (1 Korɛntifuɛ Mun 6:9, 10) Be klɛli Biblu’n i bue sɔ’n Glɛki nun. Yɛ Glɛki nun’n, bla nin bian kunndɛlɛ sukusuku nin i wunsu ɲannzuɛn sa mun’n be flɛ i kɛ pɔɔneia. Kɛ be se kɛ pɔɔneia’n i wie yɛle (1) be nga b’a jaman mɔ be si sua’n,a (2) be nga be nin be wiengu yasua annzɛ be wiengu bla be la’n, yɛ (3) be nga be nin nnɛn’m be la’n. Kɛ e faman e wun e wlaman ‘bla nin bian kunndɛlɛ sukusuku nin i wunsu ɲannzuɛn sa mun’ be yolɛ nun’n, Zoova i klun jɔ e wun, kpɛkun e bɔbɔ e ɲan su ye.—1 Tesalonikifuɛ Mun 4:3.
SI NDƐ’N NUN KPA EKUN
Like nga e kwla yo naan y’a faman e wun y’a wlaman bla nin bian kunndɛlɛ sukusuku nin i wunsu ɲannzuɛn sa’m be yolɛ nun’n, ɔ nin i su ye nga é ɲɛ́n i’n é wá kɛ́n i ndɛ wie.
3. Kpalo bla nin bian kunndɛlɛ sukusuku’n
Bian kun mɔ be flɛ i Zɔzɛfu’n, ɔ mɛnnin i ɲin naan w’a fɛmɛn i wun w’a wlaman bla nin bian kunndɛlɛ sukusuku’n nun. An kanngan Bo Bolɛ 39:1-12 nun, i sin’n an koko kosan yɛ’m be su yalɛ.
?Ngue ti yɛ Zozɛfu wanndili-ɔ?—Nian ndɛ mma 9 nun.
?Kɛ a niɛn i sa’n ajalɛ kpa yɛ Zozɛfu fɛli i lɛ-ɔ? ?Ngue ti-ɔ?
?Wafa sɛ yɛ gbanflɛn nin talua mun be kwla kpalo bla nin bian kunndɛlɛ sukusuku’n kɛ Zozɛfu sa-ɔ? An bo VIDEO’N.
Zoova kunndɛ kɛ e kpalo bla nin bian kunndɛlɛ sukusuku’n. An kanngan 1 Korɛntifuɛ Mun 6:18 nun, i sin’n an koko kosan yɛ’m be su yalɛ:
?Sa benin yɛ ɔ kwla fa sran kun yi i bla nin bian kunndɛlɛ sukusuku’n nun-ɔn?
?Ngue yɛ á yó naan w’a kpalo bla nin bian kunndɛlɛ sukusuku’n niɔn?
4. A kwla kpalo bla nin bian kunndɛlɛ sukusuku’n
?Ngue yɛ ɔ kwla yo maan bla nin bian kunndɛlɛ sukusuku’n i kpalolɛ’n kwla yo kekle-ɔ? An bo VIDEO’N, i sin’n an koko kosan yɛ’n i su yalɛ.
?Kɛ bian’n wunnin kɛ akunndan ng’ɔ bu’n ɔ nin i ayeliɛ’n ɔ kwla yo maan ɔ kunndɛ bla i yi bo’n ngue yɛ ɔ yoli-ɔ?
Klisifuɛ nga be su Zoova kpa bɔbɔ’n wie liɛ’n ɔ fata kɛ be mian be ɲin kpa naan b’a kwla kpalo akunndan tɛ’n. ?Ngue yɛ a kwla yo naan ɔ akunndan w’a tranman bla nin bian kunndɛlɛ sukusuku’n su-ɔ? An kanngan Filipufuɛ Mun 4:8 nun, i sin’n an koko kosan yɛ’m be su yalɛ:
?Ninnge wafa benin mun yɛ ɔ fata kɛ e bu be akunndan-ɔn?
?Wafa sɛ yɛ Biblu’n nun kannganlɛ’n ɔ nin Zoova i sulɛ juejue su’n be kwla uka e naan y’a tɔman sa tɛ yolɛ’n nun-ɔn?
5. Zoova i mmla’m be yo e ye
Zoova si like ng’ɔ ti kpa man e’n. Ɔ kle e like ng’ɔ fata kɛ e yo naan e ayeliɛ’n w’a yo kpa’n, ɔ nin i su ye nga e ɲɛn i’n. An kanngan Ɲanndra Mun 7:7-27 nun annzɛ an bo VIDEO’N, i sin’n an koko kosan yɛ’m be su yalɛ.
?Wafa sɛ yɛ gbanflɛn sɔ’n kpɛli ndɛ mɛnnin i wun-ɔn?—Nian Ɲanndra Mun 7:8, 9 nun.
Ɲanndra Mun 7:23, 26 kle kɛ bla nin bian kunndɛlɛ sukusuku’n ɔ kpɛ ndɛ ba. ?Sɛ e mian e ɲin naan e ayeliɛ’n w’a yo kpa’n, sa benin yɛ bé tó fúan e-ɔ?
?Sɛ e mian e ɲin naan e ayeliɛ’n yo kpa’n, wafa sɛ yɛ i sɔ’n úka e naan y’a tran nguan nun titi-ɔ?
Sran wie’m be waan yasua nga be nin be wiengu yasua be la’n, ɔ nin bla nga be nin be wiengu bla be la’n i su ndɛ nga Biblu’n kan’n ɔ timan su. Sanngɛ Zoova ti klolɛ, yɛ ɔ kunndɛ kɛ sran’m be kwlaa be ɲan nguan m’ɔ leman awieliɛ’n. Kɛ ɔ ko yo naan i sɔ’n w’a yo ye w’a man e’n, ɔ fata kɛ e di i mmla’m be su. An kanngan 1 Korɛntifuɛ Mun 6:9-11 nun, i sin’n an koko kosan yɛ’n i su yalɛ:
?Yasua mɔ be nin be wiengu yasua be la’n, ɔ nin bla mɔ be nin be wiengu bla be la’n, i sɔ’n ngunmin yɛ ɔ ti tɛ Ɲanmiɛn ɲrun-ɔn?
Kɛ ɔ ko yo naan Ɲanmiɛn i klun w’a jɔ e wun’n, ɔ fata kɛ e kaci e sa ninnge wie’m be yolɛ’n nun. ?Ɔ ti cinnjin kɛ e mian e ɲin e yo sɔ? An kanngan Jue Mun 19:8, 11 nun, i sin’n an koko kosan yɛ’m be su yalɛ.
?Kɛ a niɛn i sa’n, bian nin bla nna’n i su mmla nga Ɲanmiɛn kpɛli’n ɔ ti su? ?Ngue ti yɛ a bu i sɔ-ɔ?
Zoova ukali sran kpanngban naan b’a nanti i mmla’m be su. Ɔ kwla uka wɔ wie.
SRAN WIE’M BE WAAN: “Sɛ sran wie’m be klo be wun naan be si sua’n, kannzɛ be nunman aja nun’n i sɔ’n timan tɛ.”
“?Sɛ be se wɔ sɔ’n, á sé sɛ?
NDƐ’N I KPƆLƐ BOLƐ
Bian nin bla nna’n ɔ ti like mɔ Zoova fa cɛli be nga be o aja nun’n.
Ndɛ’n i nun flanlɛ
?Bian nin bla nna ng’ɔ timan su’n i wafa wie mun yɛle benin?
?Ngue yɛ ɔ́ úka e naan y’a kpalo bla nin bian kunndɛlɛ sukusuku nin i wunsu ɲannzuɛn sa mun-ɔn?
?Kɛ e nanti bian nin bla nna’n i su mmla nga Zoova kpɛli’n su’n, i su ye benin yɛ é ɲɛ́n i-ɔ?
NDƐ WIE MUN EKUN
Sa nga ti yɛ Zoova kunndɛ kɛ yasua nin bla nga be waan bé trán likawlɛ titi’n be ja’n.
“?Bla nin yasua nga be nin-a jaman’n be kwla tran likawlɛ?” (jw.org su ndɛ)
Biblu’n seman kɛ ɔ fata kɛ e kpɔ yasua nga be nin be wiengu yasua be la’n, annzɛ bla nga be nin be wiengu bla be la’n.
Wafa nga bian nin bla nna’n i su mmla nga Zoova kpɛli’n ɔ sasa e’n.
Like ng’ɔ ukali bian kun mɔ laa ɔ nin i wiengu yasua’m be la’n naan w’a kaci i ayeliɛ’n.
a Bian nin bla nna ng’ɔ timan su’n i wie ekun yɛle be nga be tafitafi sran wie i bla lika annzɛ i yasua lika wun’n, annzɛ be fa be yasua lika be wlɛ i sran wie i wuntuan nun’n, annzɛ be kan sran wie i yasua lika annzɛ i bla lika i nun ngowa’n.
-
-
Be nga be leman bla annzɛ bian’n ɔ nin be nga be o aja’n nun’nA kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 42
Be nga be leman bla annzɛ bian’n ɔ nin be nga be o aja’n nun’n
Lika wie’m be nun’n, sran wie’m be bu i kɛ sɛ sran kun nin-a jaman bla annzɛ bian’n ɔ kwlá diman aklunjɔɛ. Kusu nn nán be kwlaa nga b’a ja bla annzɛ bian’n yɛ be di aklunjɔɛ-ɔ. Yɛ nán be kwlaa nga be leman bla annzɛ bian’n yɛ be wla bo be wun-ɔn. Ndɛ nga Biblu’n kan’n yɛle kɛ, sɛ sran kun w’a ja bla annzɛ bian annzɛ ɔ nin-a yoman sɔ-o, ɔ ti like mɔ Ɲanmiɛn fa cɛli i-ɔ.
1. ?Kɛ sran kun leman bla annzɛ bian’n i su ye benin yɛ ɔ kwla ɲɛn i-ɔ?
Biblu’n se kɛ “sran nga w’a jaman bla annzɛ bian’n, w’a yo sa kpa w’a tra su.” (Kanngan 1 Korɛntifuɛ Mun 7:32, 33, 38 nun.) ?Ngue ti yɛ Biblu’n kan sɔ-ɔ? Sran ng’ɔ leman bla annzɛ bian’n i blɛ’n i wunmuan’n ti i liɛ. Ɔ maan ɔ kwla ɲɛn i ti yo ninnge kpanngban. I sɔ’n ti’n, wie’m be kwla tuli be klun be yoli ninnge kpanngban be mannin Zoova. I wie yɛle kɛ wie’m be ɔli nvle uflɛ nun naan bé kó bó jasin fɛ’n. Yɛ ng’ɔ ti kpa trɛ i kwlakwla’n yɛle kɛ be kwla fa blɛ kpanngban be suan Zoova i su like naan be nin i be afiɛn w’a mantan kpa.
2. ?Kɛ sran kun ja bla annzɛ bian’n i su ye benin yɛ ɔ ɲɛn i-ɔ?
Be nga b’a ja bla annzɛ bian’n be ɲan su ye, kɛ nga be nga be nin-a jaman bla annzɛ bian’n be ɲan su ye’n sa. Biblu’n se kɛ “sran nɲɔn flunman tra sran kunngba.” (Akunndanfuɛ’n 4:9) Kɛ yasua kun nin i yi be nanti afɔtuɛ nga Biblu’n mɛn i aja’n su’n i su’n, i bo’n gua kpa. Yasua nin bla nga be ja awa ɲrun’n, be ta be wiengu nda kɛ bé kló be wiengu, bé ɲin yí be wiengu, yɛ bé yó be wiengu cɛcɛ. Ɔ maan kpɛ sunman’n be wla gua ase tra be nga be tran likawlɛ mɔ b’a jaman awa ja su’n. Kɛ ɔ ti sɔ kusu’n ba’m be wun be wun fɛ wie.
3. ?Wafa sɛ yɛ Zoova bu aja’n niɔn?
Kɛ Zoova kpɛli aja klikli’n i ba’n, ɔ seli kɛ “yasua’n yáci i si nin i nin, yɛ ɔ́ fɛ́ i wun mɛ́ntɛn i yi kpɛkun bé káci sran wunmuan.” (Bo Bolɛ 2:24) Zoova kunndɛ kɛ yasua kun nin i yi be tran likawlɛ lele saan wie’n yɛ ɔ́ títí be nun-ɔn. Sɛ yasua’n kunndɛ bla i yi bo, annzɛ bla’n kunndɛ bian i wun bo’n, i lɛ nun ngunmin yɛ be kwla titi nun-ɔn. I lɛ nun’n, yasua annzɛ bla mɔ be yoli i tɛ’n yɛ ɔ́ fá ajalɛ kɛ be titi nun annzɛ nán be titi nun-ɔn.a (Matie 19:9) Zoova kunndɛman kɛ yasua kun ja bla kpanngban, annzɛ bla kun ja bian kpanngban.—1 Timote 3:2.
SI NDƐ’N NUN KPA EKUN
Sɛ w’a ja bla annzɛ bian annzɛ a nin-a yoman sɔ-o, nian like nga a kwla yo naan w’a di aklunjɔɛ naan Zoova i kun w’a jɔ ɔ wun wie’n.
4. Sɛ a leman bla annzɛ bian’n, like nga a kwla fa ɔ blɛ’n yo’n
Zezi kannin be nga be leman bla annzɛ bian’n be wun ndɛ kpa. (Matie 19:11, 12) An kanngan Matie 4:23 nun, i sin’n an koko kosan yɛ’n i su yalɛ.
?Kɛ mɔ Zezi w’a jaman bla’n wafa sɛ yɛ ɔ kwla fɛli i blɛ’n suli i wiengu mun-ɔn?
Klisifuɛ mɔ be leman bla annzɛ bian’n be kwla nian Zezi i ajalɛ’n su. An bo VIDEO’N, i sin’n an koko kosan yɛ’n i su yalɛ.
?Wafa sɛ yɛ be nga be leman bla annzɛ bian’n be kwla fa be blɛ’n be yo sa kpa-ɔ?
Nian nga wie
Biblu’n kanman afuɛ trele ng’ɔ fata kɛ sran kun ɲɛn i naan w’a se kɛ ɔ́ já bla annzɛ bian’n. Sanngɛ ɔ se kɛ ɔ fata kɛ be minndɛ blɛ mɔ be “timan bakan kun’n.” I liɛ’n be konvi m’ɔ sɔ bla annzɛ bian dan’n ɔ su yoman naan sran kun w’a kpli w’a fa ajalɛ wie m’ɔ́ yó i nsisɔ kasiɛn su-ɔ. —1 Korɛntifuɛ Mun 7:36.
5. Bu sran nga á jɛ́ i’n i akunndan kpa
Ajalɛ nga a kwla fa’n be nun cinnjin kpa kun yɛle sran nga á jɛ́ i’n. An kanngan Matie 19:4-6, 9 nun, i sin’n an koko kosan yɛ’n i su yalɛ.
?Ngue ti yɛ ɔ fataman kɛ sran kun kpli naan w’a ja bla annzɛ bian-ɔn?
Biblu’n kwla uka e naan y’a si nzuɛn ng’ɔ fata kɛ sran kun yi i nglo naan w’a yo bla kpa, annzɛ bian kpa’n. Ng’ɔ ti cinnjin trɛ i kwlakwla’n yɛle kɛ ɔ fata kɛ sran nga á jɛ́ i’n, ɔ klo Zoova.b An kanngan 1 Korɛntifuɛ Mun 7:39 nin 2 Korɛntifuɛ Mun 6:14 nun. I sin’n an koko kosan yɛ’m be su yalɛ.
?Ngue ti yɛ ɔ fata kɛ sran nga é jɛ́ i’n ɔ yo Klisifuɛ-ɔ?
?Sɛ e ja sran ng’ɔ kloman Zoova’n kɛ a niɛn i sa’n wafa sɛ yɛ Zoova bú i sɔ liɛ’n niɔn?
Sɛ be fa trɔ kunngba’n be sua nnɛn nɲɔn mɔ be wafa’n timan kun’n bé fɛ́. I wafa kunngba’n, sɛ klisifuɛ kun ja sran ng’ɔ suman Zoova’n, sa sunman bé tɔ́ i su.
6. Bu aja’n kɛ nga Zoova fa bu i’n sa
Izraɛlifuɛ’m be blɛ su’n, yasua wie’m be jrannin ninnge ngbɛnngbɛn’m be su be yrali be yi mun. An kanngan Malasi 2:13, 14, 16 nun, i sin’n an koko kosan yɛ’n i su yalɛ:
?Ngue ti yɛ Zoova kloman kɛ be jran ninnge ngbɛnngbɛn’m be su naan be yra-ɔ?
Be wiengu bo bla annzɛ bian kunndɛlɛ’n, ɔ nin be wiengu yralɛ’n ɔ ti yasua annzɛ bla nga w’a yoman sa’n i lufle bulɛ, yɛ i bo’n gua tɛ man ba mun.
An bo VIDEO’N, i sin’n an koko kosan yɛ’n i su yalɛ.
?Sɛ ɔ wun annzɛ ɔ yi timan Zoova i Lalofuɛ’n á yó sɛ naan amun aja’n w’a taka kpa?
7. Nanti Zoova i mmla’m be su aja’n nun
Wie liɛ’n ɔ fata kɛ sran kun miɛn i ɲin kpa naan w’a kwla nanti Zoova i mmla’m be su aja’n nun.c Zoova wá yrá i ɲin m’ɔ mian’n su. An bo VIDEO’N.
An kanngan Ebre Mun 13:4 nun, i sin’n an koko kosan yɛ’m be su yalɛ:
?Kɛ a niɛn i sa’n, aja’n i su mmla nga Zoova kpɛli’n ɔ ti su? ?Ngue ti yɛ a bu i sɔ-ɔ?
Lika wie’m be nun’n, awa’n kunndɛ kɛ sɛ sran nɲɔn bé já annzɛ bé yrá’n be wɔ awa ja su. Sɛ ɔ ti sɔ’n, Zoova kunndɛ kɛ Klisifuɛ’m be nanti mmla sɔ mɔ awa’n kpɛli’n su. An kanngan Titi 3:1 nun, i sin’n an koko kosan yɛ’n i su yalɛ:
?Sɛ a nin bla annzɛ bian wie be o nun’n, awa’n i ɲrun’n amun a ja sakpa’n?
SRAN KUN KWLA USA KƐ: “?Sɛ e nin sran wie e o nun naan y’a jaman’n i tɛ lika’n o nin? ?E kwlá tranman likawlɛ lɛ sa ngbɛn?”
?Sɛ be kan sɔ be kle wɔ’n á tɛ́ su sɛ?
NDƐ’N I KPƆLƐ BOLƐ
Sɛ sran kun ɔ le bla annzɛ bian annzɛ ɔ leman wie-o, ɔ ti like mɔ Ɲanmiɛn fa cɛli i-ɔ. Zoova i mmla’m be su nantilɛ’n yɛ maan sran kun kwla di aklunjɔɛ-ɔ.
Ndɛ’n i nun flanlɛ
?Sɛ sran kun leman bla annzɛ bian’n wafa sɛ yɛ ɔ kwla fɛ i sɔ blɛ’n yo sa kpa-ɔ?
?Ngue ti yɛ ɔ fata kɛ sran ng’ɔ su Zoova’n yɛ e jɛ i-ɔ?
?Sa kunngba nga ti yɛ yasua kun nin i yi be kwla yra’n yɛle benin?
NDƐ WIE MUN EKUN
?Kɛ be se kɛ “e Min’n i sɔnnzɔnfuɛ” kun yɛ ɔ fata kɛ e jɛ i’n i bo’n yɛle benin?
“Fluwa’n nun kannganfuɛ’m be kosan mun” (Sasafuɛ Tranwlɛ’n, afuɛ 2004, Zuie 1)
Like ng’ɔ kwla uka e naan y’a fa ajalɛ kpa aja ndɛ’n nun’n.
Aniaan nga lafi su kpa kɛ like ng’ɔ ɲɛnnin i Zoova sulɛ nun’n, ɔ tra ninnge ng’ɔ kpɔcili be’n lele.
Kwlaa naan sran kun w’a se kɛ ɔ nin i yi annzɛ i wun bé títí nun’n, maan ɔ dun mmua bu ninnge nga’m be su akunndan.
“‘Like nga Ɲanmiɛn kan boli nun’n,’ nán e yo i finfin” (Sasafuɛ Tranwlɛ’n, afuɛ 2018, Desanblu)
a Nian Ndɛ Wie’m be nun Yiyilɛ 4 su’n nun. Sɛ yasua’n w’a kunndɛman bla i yi bo, annzɛ bla’n w’a kunndɛman bian i wun bo naan be waan bé títí nun’n, i su ndɛ nga Biblu’n kan’n.
b Lika wie’m be nun’n, siɛ nin niɛn mun yɛ be kle sran nga be wa’n jɛ́ i’n niɔn. Sɛ ɔ ti sɔ’n siɛ nin niɛn nga be klo Zoova’n, nán sika annzɛ ɲrun mɔ sran le i’n yɛ bé fá be ɲin síe su-ɔ. Sanngɛ bé nían sɛ sran ng’ɔ́ já be wa’n ɔ klo Zoova-o.
c Sɛ a nin sran kun be o nun naan amun nin-a jaman’n, sɛ á yáci i nun-o, sɛ a jɛ́ i-o, ɔ bɔbɔ yɛ ɔ fata kɛ a fɛ i sɔ ajalɛ’n niɔn.
-