Maan e sasa e wun Satan kunndɛ kɛ ɔ́ sáci e
“An sasa amun wun, an nian-nian! Afin mmusu’m be si Satan b’ɔ ti amun kpɔfuɛ’n, ɔ ti kɛ asɔmɔli b’ɔ wlan-wlan ɔ kpan kunndɛ nnɛn’n sa.”—1 PIƐ. 5:8.
1. ?Ngue ti yɛ be wa flɛli Ɲanmiɛn i anzi kun kɛ Satan ɔn?
BLƐ WIE NUN’N, anzi kun o lɛ’n, ɔ nin Zoova be trannin klanman. Sanngɛ, kɛ ɔ́ kɔ́ i ɲrun’n, ɔ wa buli akunndan tɛ. Yɛle kɛ, ɔ kunndɛli kɛ sran’m be su i. Kɛ ɔ yo naan ɔ yaci akunndan tɛ sɔ’n i bulɛ’n, w’a yoman sɔ. Ɔ maan, ɔ yoli ɲin kekle Zoova su. (Zak 1:14, 15) Kɛ ɔ yoli sɔ’n, be flɛli i kɛ Satan. Satan “di-man nanwlɛ mlɔnmlɔn.” Ɔ ti “ato buafuɛ’m be si.”—Zan 8:44.
2, 3. ?Ngue yɛ dunman “Satan,” nin “Mmusu’m be si,” nin “wuo lalaa,” nin “dragɔn sroesroe,” be kle e ɔ?
2 Satan kpɔ Ɲanmiɛn Zoova nin klɔ sran mun tɛ kpa. I dunman’n kle weiin kɛ ɔ timan sran kpa mlɔnmlɔn. Afin dunman Satan’n i bo’n yɛle kɛ “ɲrun tanndanfuɛ.” Satan tanndan Ɲanmiɛn ɲrun tɛ kpa. Afin, ɔ kunndɛman kɛ Ɲanmiɛn sie nglo nin asiɛ’n.
3 Sa Nglo Yilɛ 12:9 kle kɛ Satan le dunman kaka. I dunman kun yɛle Mmusu’m be si. Dunman sɔ’n i bo’n yɛle “suɛn tɔnfuɛ.” Satan tɔnnin Ɲanmiɛn Zoova i suɛn. I waan Zoova ti ato buafuɛ. Ɔ sinnin wuo kun i lika lakali Ɛvu. I sɔ’n ti’n, be flɛ i wie kɛ “wuo lalaa.” Asa ekun’n, be flɛ i kɛ “dragɔn sroesroe.” Dunman sɔ’n, ɔ nin Satan fata. Afin Satan ti wlɛfuɛ, i klun yo wi. Ɔ kunndɛman kɛ Ɲanmiɛn klun sa’n kpɛn su. Yɛ ɔ kunndɛ kɛ ɔ́ núnnún Ɲanmiɛn i sufuɛ mun.
4. ?Ngue yɛ like suanlɛ nga wá kɛ́n i ndɛ ɔ?
4 Satan kunndɛ kpa kɛ e nin Ɲanmiɛn e afiɛn’n saci. I sɔ’n ti’n, Biblu’n se kɛ: “An sasa amun wun, an nian-nian! Afin mmusu’m be si Satan b’ɔ ti amun kpɔfuɛ’n, ɔ ti kɛ asɔmɔli b’ɔ wlan-wlan ɔ kpan kunndɛ nnɛn’n sa.” (1 Piɛr 5:8) Ɲanmiɛn nin i sufuɛ’m be kpɔfuɛ dan sɔ’n, like suanlɛ nga wá kɛ́n i nzuɛn nsan be ndɛ. I liɛ’n, é wún like nga ti yɛ ɔ fata kɛ e nian e wun su’n.
SATAN LE TINMIN
5, 6. (a) ?Ngue yɛ ɔ kle kɛ anzi’m be ti “tinwa” ɔ? (b) ?Ngue ti yɛ Ɲanmiɛn Ndɛ’n se kɛ Satan yɛ maan “wie’n kwla sran” mun ɔn?
5 Ɲanmiɛn Ndɛ’n se kɛ anzi’m be ti “tinwa.” (2 Piɛ. 2:11) Anzi’m be ngwlɛlɛ’n nin be wunmiɛn’n tra klɔ sran’m be liɛ’n lele. Anzi nanwlɛfuɛ’m be fa be tinmin’n be yo Ɲanmiɛn klun sa. I wie yɛle kɛ cɛn kun’n, Zoova i anzi kun ko kunnin Asirifuɛ’m be sonja 185.000. Klɔ sran fi kwlá yoman sɔ. Ɔ wie nvle kun i sonja’m be kwlakwla bɔbɔ’n, be kwlá dimɛn i sɔ junman’n. (2 Fam. 19:35) Blɛ wie nun’n, be wlali Zezi i sɔnnzɔnfuɛ wie’m be bisua. Kɛ ɔ yoli sɔ’n, anzi kun ko tikeli bisua’n i anuan’n. Ɔ fa be fiteli, kpɛkun, ɔ toli anuan’n nun ekun. Kɛ anzi’n yó i kwlaa sɔ’n, nn bisua sunianfuɛ’m be jin lɛ.—Yol. 5:18-23.
6 Satan fɛ i tinmin liɛ’n yo sa tɛ. ?Sa tɛ benin yɛ ɔ yo ɔ? Ɲanmiɛn Ndɛ’n kle kɛ “sran ng’ɔ sie mɛn nga’n,” annzɛ “mɛn nga i min’n” yɛle Satan. (Zan 12:31; 2 Kor. 4:4) Asa ekun’n, Satan yɛ maan “wie’n kwla sran” mun ɔn. (Ebr. 2:14) I sɔ’n kleman kɛ Satan tɔ sran’m be kwlaa be su kun be. Sanngɛ, i yɛ maan klunwi yolɛ’n nin sa tɛtɛ yolɛ’n, w’a tru mɛn’n nun ɔn. Asa ekun’n, ɔ lakali Ɛvu. Kpɛkun, Ɛvu nin Adam be yoli ɲin kekle Ɲanmiɛn su. I ti yɛ wie’n wo sran’m be kwlaa be su ɔ. (Rɔm. 5:12) Zezi waan Satan ti “sran kunfuɛ.” (Zan 8:44) Nanwlɛ, Satan kpɔ sran mun dan.
7. ?Wafa sɛ yɛ mmusu’m be kleli titi kɛ be le tinmin ɔn?
7 Kɛ e jran kekle Satan ɲrun’n, Ɲanmiɛn i kpɔfuɛ’m be kwlaa be ɲrun kekle yɛ e jran ɔn. Be wie yɛle anzi nga be jasoli Ɲanmiɛn wun’n. Be yɛ Ɲanmiɛn Ndɛ’n flɛ be kɛ mmusu’n niɔn. (Ngl. 12:3, 4) Mmusu’m be kleli sran’m be ɲrɛnnɛn. I sɔ’n kle kɛ be le tinmin tra sran mun. (Mat. 8:28-32; Mar. 5:1-5) Maan ɔ tran e klun titi kɛ mmusu mun nin be si Satan be le tinmin. (Mat. 9:34) Ɔ maan, sɛ Zoova suanman e bo’n, e nin Satan e kwlá kunman naan y’a fite nun.
SATAN TI WLƐFUƐ
8. (a) ?Ngue yɛ Satan kunndɛ kɛ ɔ́ yó ɔ? (An nian desɛn ng’ɔ o kan like suanlɛ’n bo i bo lɛ’n.) (b) ?Mɛn’n nun sa benin yɛ a sieli i nzɔliɛ m’ɔ kle kɛ Satan ti wlɛfuɛ ɔ?
8 Piɛli fali Satan sunnzunnin “asɔmɔli b’ɔ wlan-wlan ɔ kpan.” Sunnzun ase sɔ’n, ɔ nin Satan fata kpa. Afin Satan yɛ ɔ sie mɛn wunmuan’n niɔn. Ɔ nin i sɔ’n ngba’n, ɔ kle sran’m be ɲrɛnnɛn. (1 Zan 5:19) Sran nga i ɲin ci be kpa’n, yɛle Klistfuɛ nga Ɲanmiɛn kpa be sieli be ngunmin’n be onga mɔ be te o asiɛ’n su wa’n, ɔ nin be nga be ti Klist i ‘bua’m be wie mun’n.’ (Zan 10:16; Ngl. 12:17) Satan kunndɛ kɛ ɔ́ núnnún Zoova i sufuɛ mun. Wafa ng’ɔ kleli Klistfuɛ’m be ɲrɛnnɛn laa lele w’a fa ju andɛ’n, ɔ kle sɔ weiin.
9, 10. (a) ?Ngue yɛ ɔ kle kɛ Satan i ɲin cili Izraɛlifuɛ mun ɔn? (b) ?Like cinnjin kpa nga ti yɛ Satan i ɲin cili Izraɛlifuɛ mun’n yɛle benin? (c) ?Kɛ Zoova i sufuɛ kun yo sa tɛ’n, wafa sɛ yɛ i sɔ’n yo Satan ɔn?
9 Kɛ awe kun asɔmɔli’n, sɛ ɔ tra nnɛn kun’n, ɔ fa kanman ngowa. I wafa kunngba’n, Satan siman sran ng’ɔ ɲan be’n, be aunnvuɛ. I wie yɛle Izraɛlifuɛ’m be liɛ’n. Kɛ be yoli aɲinkplifuɛ nin bla nin bian kunndɛfuɛ’n, e kwla se kɛ ɔ yoli Satan i fɛ kpa. Kɛ Zimri kunndɛli bla mɔ be kunnin i’n, i sɔ’n yoli Satan fɛ. Asa ekun’n, kɛ Geazi wunnin i aɲinkpli yolɛ’n i su afɛ’n, e kwla se kɛ Satan klun jɔli.—Kal. 25:6-8, 14, 15; 2 Fam. 5:20-27.
10 Like cinnjin kpa kun ti yɛ Satan i ɲin cili Izraɛlifuɛ mun ɔn. Yɛle kɛ, Izraɛli nvle’n nun yɛ Mɛsi’n bá ɔ. Mɛsi’n kpɔ́tɔ Satan i ti’n. Kpɛkun, ɔ́ klé kɛ Zoova yɛ ɔ sie nglo’n nin asiɛ’n niɔn. (Bob. 3:15) Satan kunndɛli kɛ Izraɛlifuɛ’m be yo sa tɛ naan Zoova yi be blo. I sɔ’n ti’n, ɔ fali sa tɛ yolɛ’n sieli be ɲrun tititi. I wie yɛle Davidi liɛ’n. Kɛ ɔ kunndɛli sran uflɛ i yi’n, ɔ yoli Satan fɛ. I wie ekun yɛle Moizi liɛ’n. Mɛn’n nga Ɲanmiɛn seli kɛ ɔ́ fá mán Izraɛlifuɛ mun’n, Moizi w’a kwlá juman lɔ wie. Kɛ ɔ yoli sɔ’n, Satan w’a kokomɛn i mlɔnmlɔn. Nanwlɛ, kɛ Ɲanmiɛn i sufuɛ kun yo sa tɛ’n, Satan i klun jɔ dan. Yɛ ɔ fɛ i sɔ’n kan Ɲanmiɛn i wun ndɛ tɛ.—Nya. 27:11.
11. ?Ngue ti yɛ Satan i ɲin cili Sara ɔ?
11 Awlobo nga i nun yɛ Mɛsi’n bá’n, i nunfuɛ mun yɛ Satan i ɲin cili be kpa ɔ. Zoova seli Abraamu kɛ i osu’n wá yó “nvle dan kun.” (Bob. 12:1-3) Kɛ ɔ seli Abraamu sɔ’n, sa nga be juli’n be kleli kɛ w’a yoman Satan i fɛ. I wie yɛle kɛ, kɛ Abraamu nin Sara be juli Ezipti lɔ’n, Ezipti famiɛn’n fali Sara ɔli i awlo lɔ. Kpɛkun, ɔ kunndɛli kɛ Sara yo i yi. Sanngɛ, Zoova w’a kplinman su kɛ i sɔ sa’n ju. (An kanngan Bo Bolɛ 12:14-20 nun.) Kɛ Abraamu ko trannin Gerar lɔ kan’n, Abimelɛki m’ɔ ti Gerar famiɛn’n, ɔ kunndɛli kɛ Sara yo i yi. Sa kwlaa sɔ’m be juli lele naan Sara w’a wu Izaaki. (Bob. 20:1-7) ?Satan yɛ maan sa kwlaa sɔ’m be juli ɔ? Laa’n, Sara trannin Ir m’ɔ ti klɔ dan’n su. Sanngɛ siɛn’n, tannin sua bo yɛ ɔ tran ɔn. Atrɛkpa’n, Satan buli i kɛ Sara i ɲin wá trán Ezipti famiɛn nin Abimelɛki be awlo’n nun ninnge kpakpa’m be su. Naan ɔ́ kúnndɛ bian i wun’n i bo, naan ɔ nin Zoova be afiɛn’n sáci. Ɲanmiɛn Ndɛ’n kanman sɔ trele. Sanngɛ, sɛ Sara m’ɔ sro Ɲanmiɛn’n, ɔ yoli sa tɛ’n, nn ɔ yoli Satan i fɛ kpa. Afin Mɛsi’n su baman Sara i osu’n nun kun. Nanwlɛ, Satan ti tɛ dan.
12, 13. (a) ?Kɛ be wuli Zezi’n, wafa sɛ yɛ Satan kleli kɛ ɔ ti wlɛfuɛ ɔ? (b) ?Bakanngan nin gbanflɛn nin talua kanngan nga andɛ be klo Zoova mɔ be kunndɛ kɛ bé sú i’n, be wun akunndan benin yɛ Satan bu ɔ?
12 Kɛ Abraamu i blɛ liɛ’n sinnin’n, ɔ dili afuɛ ya kpanngban naan b’a wu Zezi. Nán maan e bu i kɛ Satan kloli ba nɔnman sɔ’n. Yɛ nán e bu i kɛ ɔ buli ba’n i sran nanndoliɛ. Afin, ɔ si kɛ ba sɔ’n yɛ ɔ́ yó Mɛsi mɔ Ɲanmiɛn nuan ijɔfuɛ’m be kɛnnin i ndɛ kɛ ɔ́ bá’n niɔn. Nanwlɛ, Zezi yɛ ɔ ti Abraamu osu’n i nun sran cinnjin’n niɔn. Ɔ “bali sa nga mmusu’m be si Satan yo’n i nuan nnya bulɛ.” (1 Zan 3:8) Sɛ Satan kun ba sɔ’n, ɔ su bumɛn i kɛ w’a yo sa tɛ. Afin sa tɛ yolɛ’n, ɔ ti i nzuɛn. I sɔ’n ti’n, ɔ yoli like ng’ɔ ko yo’n naan ba’n wu ndɛndɛ. ?Ngue yɛ ɔ yoli ɔ?
13 Kɛ be wuli Zezi’n, mɛn’n nun sa sifuɛ’m be wa seli Famiɛn Erɔdu kɛ b’a wu “Zuif’m be famiɛn’n.” Kɛ ɔ tili ndɛ sɔ’n, ɔ fali ya dan kpa. Yɛ ɔ kunndɛli kɛ ɔ́ kún bakan’n. (Mat. 2:1-3, 13) I sɔ’n ti’n, ɔ sunmannin sran kɛ be wɔ Bɛtleɛmu nin i akpasua’n kwlaa su naan be kun ba yasua nga b’a di afuɛ nɲɔn’n, ɔ nin nga be nin a diman afuɛ nɲɔn’n be kwlaa. (An kanngan Matie 2:13-18 nun.) Sran’m be kunnin bakanngan mun sakpa. Sanngɛ Zezi liɛ’n, ɔ fiteli nun. Sa sɔ’n kle kɛ Satan buman sran’m be like fi. Ɔ siman bakanngan’m be aunnvuɛ. Satan ti kɛ “asɔmɔli b’ɔ wlan-wlan ɔ kpan kunndɛ nnɛn’n sa.” Nanwlɛ, maan ɔ tran e klun titi kɛ Satan ti wlɛfuɛ.
SATAN LAKA SRAN MUN
14, 15. ?Ngue yɛ Satan yo naan w’a saci sran’m be “akunndan’n” niɔn?
14 Satan laka sran mun naan b’a suman Ɲanmiɛn m’ɔ ti sran klofuɛ’n. (1 Zan 4:8) Kɛ ɔ laka sran mun’n, be wunmɛn i wlɛ kɛ be ‘di Nyanmiɛn ninnge’m be yalɛ.’ (Mat. 5:3) Satan saci “be akunndan’n naan Krist b’ɔ fa Nyanmiɛn’n i wafa ng’ɔ ti’n i kwlaa i jasin fɛ’n, b’a wunmɛn i wlɛ.”—2 Kor. 4:4.
15 Like nga Satan fa laka sran mun kpa’n yɛle Ɲanmiɛn i sulɛ wafa ng’ɔ timan su’n. Zoova seli kɛ: “N ti Anannganman ɔ Nyanmiɛn yɛ n si kwla.” (Tul. 20:5) Sanngɛ, kɛ Satan wun kɛ sran’m be sɔ wunmiɛn mun, nin nnɛn nin ninnge mun’n, ɔ yo i fɛ dan. Sran sunman be bu i kɛ be ti Ɲanmiɛn i sufuɛ kpa. Sanngɛ, be lafi ato ndɛ nin ninnge wie’m be su. Kpɛkun, be yo ninnge nga be timan Ɲanmiɛn liɛ’n su’n. Like kunngba’n yɛ Ɲanmiɛn nuan ijɔfuɛ Ezai blɛ su’n, Izraɛlifuɛ’m be yoli ɔ. I sɔ’n ti’n, Zoova seli be kɛ: “?Ɔ yo sɛ ti yɛ amun fa sika to aliɛ ng’ɔ ta-man sran nin-ɔn? ?Ɔ yo sɛ ti yɛ amun kle amun wun yalɛ be kunndɛ like ng’ɔ yi-man sran ku nin-ɔn? Sɛ amun ti ndɛ nga n kan be’n, amún ɲán like kpa bé dí, aliɛ kpakpa mun yɛ amún dí-ɔ.”—Eza. 55:2.
16, 17. (a) ?Ngue ti yɛ Zezi seli Piɛli kɛ: “Satan fa jao min wun lɛ” ɔ? (b) ?Ngue yɛ Satan yo naan y’a nianman e wun su ɔ?
16 Be nga be ti Zoova i sufuɛ kpa bɔbɔ’n, Satan kwla laka be. Maan e fa sa kun e nian. Cɛn kun’n, Zezi seli i sɔnnzɔnfuɛ mun kɛ saan bé kún i. Kɛ Piɛli tili’n, ɔ fali Zezi ɔli aamiɛn naan w’a ijɔ i, ɔ seli i kɛ: “N kpla e! Nannan, nán maan Nyanmiɛn di su maan sa nga tɔ wɔ su.” Sanngɛ Zezi kpɛli i ɲin seli Piɛli kɛ: “Satan fa jao min wun lɛ.” (Mat. 16:22, 23) Zezi flɛli Piɛli kɛ “Satan” afin, ɔ kunndɛman kɛ Piɛli bubu i sa sin. Ɔ ka kan’n, Zezi fɛ́ i wun yí sran’m be ti tɛ. Kpɛkun, ɔ́ klé kɛ Satan ti ato buafuɛ. Ɔ maan, nán blɛ cinnjin kɛ ngalɛ’n sa’n i nun yɛ ɔ́ wá kúnndɛ kɛ nán “sa” tɔ i su ɔ. Nanwlɛ, sɛ Zezi w’a niɛnmɛn i wun su’n, nn ɔ yoli Satan i klun sa.
17 E o mɛn’n i bue nuan, yɛ lika’n w’a yo kekle. Satan kunndɛ kɛ e fa sika nin ninnge’m be kunndɛlɛ’n e cici e ti, naan e tran pɔɔ nun. I liɛ’n, e su bumɛn i kɛ e o mɛn’n i bue nuan. Ɔ maan, e su nianman e wun su. Sanngɛ, maan e wla kpɛn ndɛ nga Zezi kannin’n i su titi. Ɔ seli kɛ: “An tran minndɛ.” (Mat. 24:42) Nán e tran lɛ naan Satan laka e naan e bu i kɛ mɛn’n i awieliɛ’n te o mmua. Annzɛ kusu’n, ɔ su juman le.
18, 19. (a) ?Akunndan tɛ benin yɛ Satan kunndɛ kɛ e bu ɔ? (b) ?Ngue yɛ Zoova yo naan y’a kwla nian e wun su titi ɔ?
18 Satan laka e wafa kun ekun. Yɛle kɛ, ɔ yo maan e bu i kɛ Ɲanmiɛn kloman e, naan ɔ kwlá yaciman e wun sa cɛman e. Sanngɛ kɛ e niɛn i kpa sa’n, Satan bɔbɔ yɛ Ɲanmiɛn klomɛn i sa ɔ. I yɛ Ɲanmiɛn kwlá yacimɛn i wun sa cɛmɛn i ɔ. Sanngɛ e liɛ’n, Ɲanmiɛn Ndɛ’n gua e awlɛn su nzue kɛ: “Nyanmiɛn yo-man sa b’ɔ ti-mɛn i su’n, i wla fi-man junman nga an dili nin klolɛ nga an fa klo i b’ɔ maan an yoli i sran’m be ye bɔ an tɛ yo’n su’n.” (Ebr. 6:10) Wafa nga e tu e klun e su Ɲanmiɛn’n, ɔ jɔ i klun yɛ ɔ su kaman ngbɛn. (An kanngan 1 Korɛntfuɛ Mun 15:58 nun.) I sɔ’n ti’n, nán e tran lɛ naan Satan laka e.
19 E wunnin kɛ Satan le tinmin, ɔ ti wlɛfuɛ yɛ ɔ laka sran mun. Satan nin e kun. Sanngɛ Zoova fanngan nun’n, e kwla fite nun. Ɲanmiɛn Ndɛ’n kle e Satan i ninnge yolɛ wafa mun. Ɔ maan “e si i nzuɛn’n.” (2 Kor. 2:11) Kɛ e si wafa nga Satan nin e kun’n, i sɔ’n ti kpa. Afin, e kwla nian e wun su. Sanngɛ, ɔ fata kɛ e yo like kun ekun. Ɲanmiɛn Ndɛ’n se kɛ: ‘Nán an lo amun wun man mmusu’m be si Satan’n, an jran kekle yɛ ɔ́ wánndi amun.’ (Zak 4:7) E kwla yo like nsan naan e nin Satan y’a kun naan y’a fite nun. Like suanlɛ ng’ɔ́ bá lɛ’n wá kán like nsan sɔ’m be ndɛ.