?Amún yí Ɲanmiɛn i ɲrun ɲanɲanɲan’n i nglo?
“E wun wafa nga e Min’n i dan’n ti’n i kwlaa kɛ niannun nun sa.”—2 KORƐNTFUƐ MUN 3:18.
1. ?Ngue yɛ Moizi wunnin i ɔ? ?Yɛ i bo’n guali sɛ?
I NUN mɔ Moizi kunngba o Sinai oka’n su lɔ’n, like ng’ɔ kunndɛli kɛ ɔ́ wún i’n, sran’m be nin a kunndɛmɛn i le. Like m’ɔ kunndɛli’n kusu’n, ɔ wunnin i aolia nun. Ɔ yo sro yɛ sran fi nin a wunmɛn i le. Like sɔ’n, yɛle wafa nga Zoova i dan’n ti’n. Sanngɛ, nán Zoova bɔbɔ yɛ Moizi wunnin i ɔ. Afin sran ng’ɔ wun Ɲanmiɛn’n, ɔ kwlá kaman nguan nun. I sɔ’n ti’n, Zoova sinnin i anzi kun lika naan w’a kle wafa nga i dan’n ti’n. Kɛ anzi sɔ’n sín Moizi ɲrun’n, ɔ fɛ i “sa” katali Moizi su lele ɔ wieli sin. Ɔ maan, i kɔmin sin ɲanɲanɲan’n yɛ Moizi wunnin i ɔ. Asa ekun’n, Zoova sinnin i anzi kun lika naan w’a kan ndɛ w’a kle Moizi. Kɛ Biblu’n kán sa m’ɔ juli’n i ndɛ’n, i waan: ‘Moizi fin oka’n su lɔ jrali. Kɛ ɔ́ bá’n, ɔ siman kɛ ɔ nin Anannganman be ijɔli’n ti i ɲrun’n ti ɲanɲanɲan.’—Ezipt Lɔ Tulɛ 33:18–34:7, 29.
2. ?Like nga Klistfuɛ’m be yi i nglo’n i su ndɛ mennin yɛ Pɔlu klɛli ɔ?
2 Cɛn sɔ nun’n, maan ɔ yo e kɛ e nin Moizi yɛ be o oka’n su lɔ sa. ?Kɛ é nían Ɲanmiɛn mɔ like fi nunmɛn i sin’n i ɲanɲanɲan’n, mɔ é tíe i nɛn’n, nán usulɛ cɛ yɛ é úsu ɔ? ?Asa ekun’n, Moizi m’ɔ ti aenguɛ laa’n i nun jranfuɛ’n, kɛ e nin i e fin Sinai oka’n su lɔ é jrá sa’n, nán fɛ yɛ ɔ́ yó e ɔ? Afin, nán sran ngba yɛ ɔ ɲɛn i sɔ muae’n niɔn! ?Sanngɛ, e si kɛ wafa nga Klistfuɛ kpa’m be ɲrun ti ɲanɲanɲan’n, ɔ tra Moizi liɛ’n lele? I sɔ abonuan sa liɛ’n, akoto Pɔlu kɛnnin i ndɛ fluwa kun nun. Kɛ ɔ́ kán Klistfuɛ nga be kpali be sieli be ngunmin’n be ndɛ’n, ɔ seli kɛ be ‘wun wafa nga e Min’n i dan’n ti’n i kwlaa kɛ niannun nun sa [‘yi Ɲanmiɛn i ɲrun ɲanɲanɲan’n i nglo, NW].’ (2 Korɛntfuɛ Mun 3:7, 8, 18) Kpɔkun, Klistfuɛ nga be lafi su kɛ bé ká asiɛ’n su wa’n, be yo sɔ wie.
Wafa nga Klistfuɛ’m be yi Ɲanmiɛn i ɲrun ɲanɲanɲan’n i nglo’
3. ?Wafa sɛ yɛ e si Zoova tra wafa nga Moizi fa sili i’n niɔn?
3 ?E yi Ɲanmiɛn i ɲrun ɲanɲanɲan’n i nglo ɔ, ɔ yo ye? Afin, e nin a wunman Zoova le, yɛ e nin a timɛn i nɛn’n le kɛ ng’ɔ fa yoli Moizi blɛ su’n sa. Sanngɛ kusu’n, wafa nga e si Zoova’n, Moizi w’a simɛn i sɔ. Kɛ Moizi wuli’n, i osu kwla dili afuɛ 1.500 lele ka naan Zezi m’ɔ ti Mɛsi’n w’a ba asiɛ’n su wa. Ɔ maan Zezi m’ɔ wuli naan sran’m b’a ɲan be ti sa tɛ’n nin wie’m be sa nun’n, wafa nga Mmla’n kpɛnnin su i lika’n, Moizi w’a kwlá wunmɛn i wlɛ. (Rɔmfuɛ Mun 5:20, 21; Galasifuɛ Mun 3:19) Asa ekun’n, Ɲanmiɛn i klun sa’n m’ɔ ti abonuan’n, Moizi w’a kwlá wunman i ngba wlɛ. I bue kaan sa cɛ yɛ ɔ kwla wunnin i wlɛ ɔ. Afin Ɲanmiɛn klun sa’n taka Zezi i Sielɛ Blɛ’n su. Sielɛ Blɛ sɔ’n ti’n, asiɛ’n wá káci mɛn klanman. Ɔ maan e liɛ’n, sɛ e wun Zoova i ɲanɲanɲan’n, ɔ fin like nga Biblu’n kle’n mɔ e lafi su’n. Asa ekun’n, Zoova sinman anzi kun i lika naan w’a kan ndɛ w’a kle e. Biblu’n nun yɛ e tie i nɛn’n niɔn. I lɛ nun’n, Biblu’n nun fluwa nga be yiyi Zezi i jasin fɛ’n nun’n, be nun yɛ e tie Zoova i nɛn’n kpa liɛ su ɔ.
4. (a) ?Wafa sɛ yɛ Klistfuɛ nga be kpali be sieli be ngunmin’n be yi Ɲanmiɛn i ɲrun ɲanɲanɲan’n i nglo ɔ? (b) ?Be nga be lafi su kɛ bé ɲán anannganman nguan asiɛ’n su wa’n, wafa sɛ yɛ be kusu be yi Ɲanmiɛn i ɲrun ɲanɲanɲan’n i nglo wie ɔ?
4 Ɔ ti su kɛ Klistfuɛ’m be liɛ’n be ɲrun’n timan ɲanɲanɲan kɛ Moizi m’ɔ wunnin Zoova’n i liɛ’n sa. Sanngɛ kɛ bé kán Zoova i wafa m’ɔ ti’n, ɔ nin abonuan ninnge ng’ɔ yo be’n be ndɛ klé be wiengu mun’n, be ɲrun’n yo mlanmlanmlan. Kɛ Ɲanmiɛn nuan ijɔfuɛ Ezai kán e blɛ liɛ’n i ndɛ’n, ɔ seli kɛ Ɲanmiɛn i nvle nunfuɛ’m bé ‘kán Zoova i ɲrun m’ɔ le i’n i ndɛ klé nvlenvle’m be nunfuɛ mun.’ (Ezai 66:19) Kpɔkun 2 Korɛntfuɛ Mun 4:1, 2 nun’n, e kɛnngɛn i lɔ kɛ: ‘Ɲanmiɛn m’ɔ fa e wlali junman nga nun’n ti’n, e wla like nga be yo ɲannzuɛn ti be fiafia su’m be ase, e yoman like gblɛgblɛ nun, yɛ e sannganman Ɲanmiɛn ndɛ’n, sanngɛ kɛ e kan ndɛ weinwein Ɲanmiɛn ɲrun’n, ɔ maan sran’m be kwlaa be wun e wafa nga e ti’n.’ Klistfuɛ nga be kpali be sieli be ngunmin’n mɔ be ‘di aenguɛ uflɛ nga be nin sran’m be trali’n i junman’n,’ be ndɛ yɛ Pɔlu kan ɔn. (2 Korɛntfuɛ Mun 3:6) Yɛ jasin fɛ’n mɔ be bo’n ti’n, sran kpanngban kpa bé wá ɲán anannganman nguan asiɛ’n su wa. Be akpasua nɲɔn’n, nán sran’m be like klelɛ’n i nun ngunmin yɛ be yi Ɲanmiɛn i ɲrun ɲanɲanɲan’n i nglo ɔ. Sanngɛ be yi i sɔ liɛ’n i nglo be nzuɛn’n nun wie. Nanwlɛ, kɛ e yi Ɲanmiɛn i ɲrun ɲanɲanɲan’n i nglo kɛ niannun nun sa’n, i sɔ’n ti e cenjele like dan!
5. ?Kɛ Zoova i ninnge’m be yo ye kpa e sa nun’n, i sɔ’n kle sɛ?
5 Kɛ nga Zezi fa kannin’n sa’n, dɔ nga su be kan Ɲanmiɛn Sielɛ Blɛ’n jasin fɛ’n i ndɛ asiɛ wunmuan’n su. (Matie 24:14) Kpɔkun sran mɔ be fin mɛnmɛn kwlaa nin nvlenvle’n kwlaa nun’n, mɔ be ijɔ aniɛn wafawafa’n mɔ be sɔ jasin fɛ’n nun klanman’n, be kaci be nzuɛn tɛ’n naan b’a kwla yo Ɲanmiɛn klun sa’n. (Rɔmfuɛ Mun 12:2; Sa Nglo Yilɛ 7:9) Kɛ Klistfuɛ klikli mun sa’n, be kusu be kwlá yaciman like nga be wunnin i’n, ɔ nin ndɛ nga be tili’n i ndɛ kanlɛ. (Sa Nga Be Yoli’n 4:20) Ɔ maan andɛ’n, sran miliɔn nsiɛn tra su be bo yo kun be yi Ɲanmiɛn i ɲrun ɲanɲanɲan’n i nglo kɛ niannun nun sa. I sɔ liɛ’n, awlanmannun be nin a wunmɛn i sɔ le asiɛ’n su. ?Sran kpanngban sɔ’n, e o be nun wie? Wafa nga Zoova i ninnge’m be yo ye i nvle nunfuɛ’m be sa nun’n, ɔ kle kɛ i sa o be su. Kpɔkun sɛ Zoova wawɛ’n nunman e su sakpa’n, nn mmusu m’ɔ b’a cici kɛ bé sáci e’n, e nin be e kwlá kunman. Amun e nian sa nga ti yɛ e se kɛ Ɲanmiɛn wawɛ’n wo e su’n.
Be kwlá kataman Ɲanmiɛn i nvle nunfuɛ’m be nuan su le
6. ?Ngue ti yɛ ɔ fata kɛ e lafi Zoova su yɛ e yo yakpafuɛ naan y’a kwla jran Zoova sin ɔn?
6 Maan ɔ yo e kɛ e o jɔlɛ difuɛ’m be ɲrun. Kpɔkun sa tɛ yofuɛ dan kpa kun i ndɛ’n nun’n, be seli e kɛ e yiyi i bo. Sa tɛ yofuɛ’n sɔ’n kusu’n, e si kɛ i sin jranfuɛ’m be sɔnnin. Kpɔkun, be le kwlalɛ kpa yɛ like kwlaa ng’ɔ kwla yo naan y’a yiyimɛn i bo’n, saan ɔ́ yó. Nanwlɛ, sɛ e timan yakpafuɛ’n, e kwlá dimɛn i sɔ lalo liɛ’n mlɔnmlɔn. Asa ekun’n, ka naan y’a di i sɔ lalo’n, saan e wun i wlɛ weiin kɛ awa kwlá sásá e. ?Nɛ́n i ɔ? I sɔ kunngba’n yɛ e yo ɔ. Yɛle kɛ, kɛ é kán Zoova nin sa ng’ɔ seli kɛ ɔ́ wá yó be’n be ndɛ’n, e yiyi mmusu’m be si Satan bo. E se kɛ ɔ ti ato buafuɛ naan ɔ laka mɛn wunmuan nunfuɛ’m be kwlaa. (Zan 8:44; Sa Nglo Yilɛ 12:9) Nanwlɛ, sɛ e lafiman Zoova su yɛ e timan yakpafuɛ’n, e kwlá jranman Zoova sin e yiyiman Satan bo kɛ ngalɛ’n sa mlɔnmlɔn.
7. ?Wan mun yɛ Satan ti be min’n niɔn? ?Yɛ ngue yɛ ɔ miɛn i ɲin yo ɔ?
7 Zoova yɛ ɔ sie nglo nin asiɛ’n niɔn. Like fi nunmɛn i sin. I wunmiɛn’n tra Satan liɛ’n lele. Ɔ maan kɛ e su Zoova nanwlɛ nun’n, e kwla lafi i su kɛ ɔ́ sásá e. Yɛ i kpa bɔbɔ’n, i wun blibli i sɔ yolɛ’n nun. (2 Be Nyoliɛ 16:9) Sanngɛ, Satan m’ɔ ti mmusu’m be si’n i kunngba’n, ɔ sie mɛn’n nunfuɛ mɔ be kaci be sin be si Ɲanmiɛn’n. (Matie 12:24, 26; Zan 14:30) Yɛ kɛ mɔ be kannin mmusu’m be si Satan i bo guali asiɛ’n su wa’n m’ɔ bali “ya su” ti’n, ɔ tanndan Zoova i sufuɛ’m be ɲrun kekle kpa. I sɔ yolɛ nun’n, kɛ m’ɔ ti mɛn’n i siefuɛ’n ti’n, ɔ sin mɛn sɔ’n i lika naan Zoova i sufuɛ’m be yaci jasin fɛ’n i bolɛ. (Sa Nglo Yilɛ 12:7-9, 12, 17) ?Wafa sɛ yɛ ɔ yo ɔ? Ɔ fa ajalɛ nsan.
8, 9. ?Wafa sɛ yɛ Satan fa sran, annzɛ like klolɛ m’ɔ nin i fataman’n, ɔ mlin e ɔ? ?Yɛ sran nga e fa e wun mantan be’n, ngue ti yɛ ɔ fata kɛ e nian be nun kpa ɔ?
8 Ajalɛ kun nga Satan fa tanndan e ɲrun’n, yɛle ninnge nga e koko be ti’n. Blɛ kasiɛn nga nun’n, sran’m be ti sika klofuɛ, be bu be ngunmin be wun angunndan kpɔkun be klo mɛn dilɛ, be kloman Ɲanmiɛn. (2 Timote 3:1-4) Kɛ mɔ sran sunman be wun ninnge kunndɛlɛ’n yɛ ɔ lo be cɛn kwlaa’n ti’n, ‘be buman’ jasin fɛ’n nga e bo kle be’n, i angunndan. Ndɛ nanwlɛ’n m’ɔ o Biblu’n nun’n, ɔ timan be ndɛ. (Matie 24:37-39) Nzuɛn sɔ’n m’ɔ sa ndɛndɛ’n, ɔ kwla yo maan blɛblɛblɛ’n, Ɲanmiɛn junman’n i dilɛ nun’n, e cuɛncuɛn e ja ase. Nanwlɛ, sɛ e klo aɲanbeun ninnge’m be kunndɛlɛ nin mɛn dilɛ’n, e Ɲanmiɛn klolɛ’n kán ase.—Matie 24:12.
9 I sɔ ngalɛ’n ti’n, Klistfuɛ be nian sran nga be fa be wun mantan be’n i nun kpa. Famiɛn Salomɔn seli kɛ: “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu m’ɔ fɛ i wun mantan sinnglinfuɛ’n, ɔ kaci sinnglinfuɛ.” (Nyanndra Mun 13:20) I sɔ’n ti’n, be nga be yi Ɲanmiɛn i ɲrun ɲanɲanɲan’n i nglo’n, be yɛ ɔ fata kɛ e fa e wun “mantan” be ɔ. Nanwlɛ, sɛ e yo sɔ’n, ɔ ti kpa dan! Kɛ e nin e niaan mun e yia asɔnun aɲia’m be bo lɔ’n, annzɛ lika uflɛ nun’n, be sran klolɛ nin be Ɲanmiɛn sulafilɛ’n, ɔ nin be aklunjuɛ nin be ngwlɛlɛ’n, ɔ wla e fanngan. Ɔ maan e yaciman jasin fɛ’n i bolɛ.
10. ?Be nga be yi Ɲanmiɛn i aɲrunɲan’n i nglo’n, wafa sɛ yɛ Satan yo maan be yo be finfin ɔn?
10 Ajalɛ’n i nɲɔn su nga Satan fa naan Klistfuɛ’m be kwlaa b’a yaci Ɲanmiɛn i aɲrunɲan’n i nglo yilɛ’n, yɛle be finfin yolɛ’n. Nanwlɛ, ɔ fataman kɛ i sɔ ajalɛ’n ɔ bo e nuan mlɔnmlɔn. Afin i nun mɔ Zezi Klist bó i jasin fɛ’n asiɛ’n su wa’n, sran’m be yoli i finfin, be srili i, be yoli i tɛtɛ, yɛ be guɛli i wun ngɔsrɛ bɔbɔ. (Mark 5:40; Lik 16:14; 18:32) Be yoli Klistfuɛ klikli’m be finfin wie. (Sa Nga Be Yoli’n 2:13; 17:32) Andɛ, like kunngba’n yɛ be fa yo Zoova i sufuɛ mun ɔn. Kɛ nga akoto Piɛli fa kannin’n sa’n, sran’m bé wá sé kɛ Zoova i sufuɛ’m be tɔn be wun suɛn kɛ Ɲanmiɛn yɛ ɔ sunmannin be ɔ. Piɛli seli kɛ: ‘Cɛn wie lele kɛ mɛn’n ɔ́ kɔ́ i bue nuan’n, sran wie’m bé bá, bé yó sa nga be klun klo’n, yɛ bé srí e, bé sé kɛ: “?Ɔ seli amun kɛ ɔ́ bá, nɛ́n i ɔ? ?Yɛ ɔ o nin? Kɛ ɔ fin lalaa’n, like nga Ɲanmiɛn yili be’n, be kwlaa be te o be osu’n nun.”’ (2 Piɛr 3:3, 4) Srilɛ mɔ be sri e’n yɛle kɛ, be waan e wunman sa wlɛ naan like nga Biblu’n kle’n ti lalafuɛ ndɛ. Sran sunman be liɛ’n, jasin fɛ’n ti be ɲrun sinnzin ndɛ. (1 Korɛntfuɛ Mun 1:18, 19) Suklu lɔ’n, ɔ nin junman diwlɛ lɔ’n, yɛ wie liɛ bɔbɔ e awlo lɔ’n, be sri e. Sanngɛ, e niɛnmɛn i sɔ’n ti naan é sé kɛ, é yáci e jasin fɛ’n mɔ e fa yi Ɲanmiɛn i aɲrunɲan’n i nglo’n, i bolɛ. Afin kɛ nga Zezi fa kannin’n sa’n, e si kɛ Ɲanmiɛn Ndɛ’n ti nanwlɛ.—Zan 17:17.
11. ?Wafa sɛ yɛ Satan kle Klistfuɛ’m be ɲrɛnnɛn naan be muan be nuan ɔn?
11 Ajalɛ’n i nsan su nga Satan fa naan y’a muan e nuan’n yɛle e ɲrun tanndanlɛ’n, annzɛ e ɲrɛnnɛn klelɛ’n. Zezi seli i sɔnnzɔnfuɛ’m be kɛ: ‘Bé wá fá amun wlá ɲrɛnnɛn nun, bé kún amun, yɛ nvle’n kwlaa bé kpɔ́ amun n dunman nun.’ (Matie 24:9) Nanwlɛ, kɛ be se kɛ be wun ɲrɛnnɛn’n tɛtɛ kpa’n, e mɔ e ti Zoova i Lalofuɛ’n e si i sɔ liɛ. Afin asiɛ’n i lika sunman nun’n, be kleli e ɲrɛnnɛn yɛ be te kle e. Sanngɛ, i sɔ’n boman e nuan. Afin e si kɛ ɔ fin lalaa kpa’n, Zoova seli kɛ kpɔlɛ, annzɛ aɲinciɛ wá trán be nga be su Ɲanmiɛn’n, ɔ nin mmusu’m be si Satan i sufuɛ’m be afiɛn. (Bo Bolɛ 3:15) E si wie ekun kɛ sɛ yalɛ klelɛ’n nun e nanti sein e fɔnman’n, é klé kɛ Zoova yɛ ɔ fata kɛ ɔ sie nglo nin asiɛ’n niɔn. I sɔ’n ngalɛ’n kwlaa mɔ e si i’n ti’n, ɲrɛnnɛn’n i tɛtɛ kpa’n nun bɔbɔ’n, e jran kekle. Sɛ e ta nda kɛ é yí wafa nga Ɲanmiɛn i dan’n ti’n i nglo titi’n, ɲrɛnnɛn wunlɛ fi su tanninman e nuan’n sa trilili.
12. ?Kɛ Satan kle e yalɛ’n mɔ e jran kekle’n, ngue ti yɛ ɔ fata kɛ maan e klun jɔ ɔ?
12 Kɛ be yo e finfin kpɔkun be tanndan e ɲrun’n, e jran kekle yɛ e nanti seiin. ?Nɛ́n i ɔ? Sɛ e yo sɔ’n, maan e klun jɔ. Afin, Zezi guali be nga bé wá yó i sɔnnzɔnfuɛ’n be awlɛn su nzue kɛ: ‘Kɛ bé kpɛ́ amun nzowa, mɔ bé klé amun yalɛ, mɔ bé tɔ́n amun suɛn tɛtɛ’n kwlaa n dunman nun’n, amun liɛ su ti ye, yɛle kɛ amun mo’n ɔ́ wá yó dan ɲanmiɛn su lɔ. I sɔ’n ti, maan amun klun jɔ, maan amun wun blibli amun. Afin laa kɛ be kleli Ɲanmiɛn nuan ijɔfuɛ’m be yalɛ sɔ ɔ.’ (Matie 5:11, 12) Kekle mɔ e jran’n, ɔ kle weiin kɛ Zoova wawɛ’n o e su, yɛ ɔ wla e fanngan naan e yi i ɲrun ɲanɲanɲan’n i nglo.—2 Korɛntfuɛ Mun 12:9.
Zoova ti yɛ e jran kekle ɔ
13. ?Sa cinnjin mennin ti yɛ e tra e awlɛn e bo jasin fɛ’n niɔn?
13 Sa cinnjin nga ti yɛ e tra e awlɛn e bo jasin fɛ’n yɛle kɛ e klo Zoova, kpɔkun e fa i ɲrun ɲanɲanɲan’n i nglo yilɛ’n yo e awlɛn su like. Maan e sie i nzɔliɛ kɛ, sran nga be klo i mɔ be ɲin yi i’n, be sɔnnzɔn i. I lɛ nun’n, Zoova yɛ ɔ fata kɛ e sɔnnzɔn i ɔ. Afin, kɛ mɔ Zoova klo sran dan ti’n, ɔ sunmɛnnin i Wa’n asiɛ’n su wa naan ɔ kan ndɛ nanwlɛ’n kle be, naan ɔ kpɔ be ti. (Zan 3:16; 18:37) Kɛ Ɲanmiɛn sa’n, e kunndɛ kɛ sran’m be kwlaa be yaci sa tɛ’n yolɛ naan be fite nun. I sɔ’n ti yɛ e bo jasin fɛ’n e kle be’n niɔn. (2 Piɛr 3:9) Sran mɔ e kunndɛ kɛ be fite nun’n, ɔ nin Ɲanmiɛn mɔ e kunndɛ kɛ e sɔnnzɔn i nzuɛn’n, angunndan sɔ’n su e bo maan jasin fɛ’n mɔ e fa yi Ɲanmiɛn i ɲrun ɲanɲanɲan’n i nglo’n, e yacimɛn i bolɛ.
14. ?Wafa sɛ yɛ Zoova man e wunmiɛn naan y’a tra e awlɛn y’a bo jasin fɛ’n niɔn?
14 Kɛ e niɛn i kpa sa’n, Zoova yɛ ɔ man e wunmiɛn mɔ maan e tra e awlɛn e bo jasin fɛ’n niɔn. Yɛle kɛ ɔ fɛ i wawɛ’n, ɔ nin i anuannzɛ’n, ɔ nin Biblu’n m’ɔ ti i nuan ndɛ’n uka e kpɔkun ɔ fɔnvɔ e. Be nga be tu be klun be yi i ɲrun ɲanɲanɲan’n i nglo’n, ɔ wla be ‘fanngan maan be tra be awlɛn.’ Kɛ e srɛ i’n, ɔ tɛ su. Kpɔkun ɔ man e ngwlɛlɛ naan sa nga be tɔ e su’n, e wun be trawlɛ. (Rɔmfuɛ Mun 15:5; Zak 1:5) I kpa bɔbɔ’n, sa nga Zoova si kɛ ɔ kwlá sɔnman e nun’n, ɔ kplinman su kɛ ɔ tɔ e su. Ɔ maan sɛ e fa e wla’n gua Zoova su’n, ɔ́ yó maan é fíte nun naan y’a kwla yi i ɲrun ɲanɲanɲan’n i nglo tititi.—1 Korɛntfuɛ Mun 10:13.
15. ?Ngue yɛ ɔ uka e maan e tra e awlɛn’n niɔn?
15 E awlɛn mɔ e tra e bo jasin fɛ’n, ɔ kle weiin kɛ Ɲanmiɛn wawɛ’n o e su. Maan e fa sunnzun ase kun e nian. Sran kun w’a se e kɛ e fa kpaun e sin sran’m be awlo’m be nun naan e fa cɛcɛ be. Ɔ seli e wie ekun kɛ, e fa e blɛ’n ɔ nin e bɔbɔ e sika e di junman sɔ’n. Kpɔkun i kpa bɔbɔ’n, kalɛ ng’ɔ bɛ i sin’n, ɔ fata kɛ e bɔbɔ e yi. Sanngɛ kɛ ɔ́ kɔ́ i ɲrun’n, e wun kɛ sran sunman be kloman e kpaun. Kpɔkun wie liɛ bɔbɔ’n, be nun wie’m be tanndan e ɲrun. ?Nanwlɛ, amún kwlá dí junman sɔ’n i sa trilili lele ɔ́ dí anglo nin afuɛ? E kwlá bumɛn i sɔ. Sanngɛ nn, i sɔ yɛ e yo ɔ. Yɛle kɛ, e tu e klun e fa blɛ nga e le i’n e bo jasin fɛ’n. Yɛ e bo i sɔ titi w’a di afuɛ kpanngban kpa. Kɛ é yó sɔ’n, nn é fá e bɔbɔ e sika é fá súɛn i bo. ?Ngue ti ɔ? ?Nán Zoova mɔ e klo i’n, ɔ nin i wawɛ’n m’ɔ fa yra e su’n ti ɔ? Nanwlɛ, ɔ́ yó sɔ!
Junman kun mɔ be wla kpɛ́n su titi’n
16. ?E awlɛn mɔ e tra e bo jasin fɛ’n ti’n, ngue yɛ e bɔbɔ nin sran nga be tie e ndɛ’n e kwla ɲɛn i ɔ?
16 Aenguɛ uflɛ nga Ɲanmiɛn nin sran’m be trali i junman’n, ɔ leman wunsu. (2 Korɛntfuɛ Mun 4:7) I sɔ kunngba’n, Klistfuɛ junman nga be mɔ be ti bua’m be wie’m be di i asiɛ wunmuan’n su’n, ɔ ti like dan. Kɛ nga Pɔlu kan kleli Timote sa’n, sɛ e tra e awlɛn e bo jasin fɛ’n i titi’n, é kwlá ‘dé e bɔbɔ nin be nga be ti e ndɛ’n.’ (1 Timote 4:16) Amun e bu i sɔ liɛ’n i angunndan e nian. Jasin fɛ’n mɔ e bo’n ti’n, sran wie’m bé kwlá ɲán anannganman nguan. Be nga e uka be Ɲanmiɛn ninnge’m be nun sɔ’n, e nin be e kwla tra janvuɛ klanman kpa. Sran sɔ mɔ e ukali be mɔ be sili Ɲanmiɛn’n, kɛ e nin bé wá ɲán anannganman nguan Mɛn klanman’n nun lɔ’n, e bu aklunjuɛ nga é wá dí’n, i angunndan nian! Nanwlɛ, e ɲin mɔ e miannin ukali be’n, be wla su fiman su le. I sɔ’n man aklunjuɛ dan!
17. ?Ngue ti yɛ e blɛ liɛ’n nga ti i liɛ ngunmin kun’n niɔn?
17 Blɛ nga e o nun yɛ’n, ɔ ti i liɛ ngunmin kun. Yɛ jasin fɛ’n nga sran mɔ be kaci be sin be si Ɲanmiɛn be afiɛn’n nun yɛ’n nun e bo’n, ɔ́ wá wíe. Nowe blɛ su’n, kɛ mɛn’n yoli sɔ wie ɔ. Kusu’n, Nowe wunnin kɛ i sɔ mɛn liɛ’n sinnin. Mmeli nga Ɲanmiɛn seli Nowe kɛ ɔ bobo’n, kɛ m’ɔ niannin su yoli’n ti’n, i bɔbɔ ɔ nin i awlofuɛ’m be fiteli nun. Nanwlɛ, i sɔ’n yoli i fɛ dan! (Ebre Mun 11:7) E kusu’n, e kwla di aklunjuɛ sɔ’n wie. Mɛn klanman’n nun lɔ’n, kɛ e ɲin wá kpɛ́n junman nga blɛ kasiɛn’n nga nun e dili i su’n, wafa nga i sɔ liɛ’n wá yó e’n, amun bui i angunndan nian. Afin, e si kɛ like kwlaa nga e kwla yo naan sran’m b’a tie Ɲanmiɛn Sielɛ Blɛ’n i ndɛ’n, e yoli.
18. ?Ndɛ mennin yɛ Zoova kan fa gua i sufuɛ’m be awlɛn su nzue m’ɔ wla be fanngan ɔn?
18 I sɔ’n ti’n, maan e yi Ɲanmiɛn i ɲrun ɲanɲanɲan’n i nglo. I sɔ mɔ e yo’n, e wla su fiman su le. Zoova kusu’n, i wla su fiman su le. Biblu’n kan ndɛ kun fa wla e fanngan kpa. I waan: ‘Ɲanmiɛn yoman sa m’ɔ timɛn i su’n, i wla fiman junman nga an dili nin klolɛ nga an fa klo i mɔ maan an yoli i sran’m be ye mɔ an te yo’n su’n. Sanngɛ e klo kɛ e kwlakwla é mían e ɲin yó kɛ e yo i laa’n sa é gúɛ i ti nin i bo, yɛ é ɲán like nga e wla o su kɛ é ɲɛ́n i’n i kwlaa. E kloman kɛ an yo nvɛɛfuɛ, sanngɛ be nga be lafi Ɲanmiɛn su’n, mɔ be tra be awlɛn mɔ maan be ɲan like nga i waan ɔ́ fá mán be’n, an nian be liɛ’n su yo.’—Ebre Mun 6:10-12.
?Amun kwla yiyi nun?
• ?Wafa sɛ yɛ Klistfuɛ be yi Ɲanmiɛn i ɲrun ɲanɲanɲan’n i nglo ɔ?
• ?Ajalɛ mennin wie mun yɛ Satan fa be naan Ɲanmiɛn i sufuɛ’m b’a muan be nuan ɔn?
• ?Ngue yɛ ɔ kle weiin kɛ Ɲanmiɛn wawɛ’n o e su ɔ?