Fluwa nun kannganfuɛ’m be usa kɛ...
?Cɛn wie lele’n, asiɛ’n su tranman lɛ kun?
▪ Sran wie’m be buli i kɛ afuɛ nga be flɛ i 2011 nun Ɔktɔblu 21 su’n, asiɛ’n su tranman lɛ kun. Sanngɛ w’a yoman sɔ. Ɔ maan bian nga be flɛ i kɛ Arɔld Kamping m’ɔ ijɔ aladio nun’n Amlɛnkɛn’m be lɔ’n, i ndɛ ng’ɔ kannin’n yoli ato. Ɔ seli kɛ Jɔlɛ Dilɛ Cɛn’n jú afuɛ nga be flɛ i 2011 nun Mɛ 21 su. I waan cɛn sɔ nun’n asiɛ’n kéje dan kpa mɛn wunmuan’n nun naan i sin’n, kɛ ɔ ko di anglo nnun’n, yɛle kɛ Ɔktɔblu i le 21 su’n be su wunman asiɛ’n i osu kun.
Sanngɛ asiɛ’n trán lɛ tititi. Asiɛ’n i Yifuɛ’n su kplinman su kɛ asiɛ’n i osu nunnun. I Ndɛ’n se kɛ: “A yili asiɛ’n, kɛ ɔ o lɛ’n yɛ ɔ wo-ɔ.”—Jue Mun 119:90.
Sanngɛ Biblu’n nun kannganfuɛ wie’m be kwla se kɛ asiɛ’n i osu núnnún mlɔnmlɔn, naan sin yɛ bé fá yó i sɔ liɛ’n niɔn. Naan ndɛ ng’ɔ o 2 Piɛr 3:7, 10 nun’n ɔ kle sɔ. Ndɛ sɔ’n waan: “Nyanmiɛn kunngba’n yɛ ɔ seli ekun kɛ maan be sie nyanmiɛn su lɔ’n nin asiɛ nga be o lɛ ndɛ’n, be lɛ maan sin di be. Bé síe be lɛ lele fá jú cɛn nga bé bú sran nga be sro-man Nyanmiɛn’n be fɔ bɔ bé sáci be’n. [...] E Min’n i balɛ’n ɔ́ fú e nun kɛ awiefuɛ sa. Cɛn sɔ’n nun nyanmiɛn su lɔ’n kplá wuu, kpɛkuun be su wun-mɛn i kun. Yɛ nyanmiɛn su lɔ ninnge’m bé yrá, yɛ asiɛ’n nin i su ninnge’n kwlaa bé núnnún.” ?Ɲanndra nun ndɛ yɛ akoto Piɛli kannin ɔn?
Ɛɛn. ?Ngue ti yɛ e kan sɔ ɔ? Afin ɔ fata kɛ ndɛ sɔ’n ɔ nin ndɛ kwlaa ng’ɔ kannin’n, ɔ nin Biblu’n nun ndɛ onga’m be wɔ likawlɛ. Sɛ nán ɲanndra nun ndɛ yɛ ɔ kannin’n, nn é sé kɛ i asiɛ’n nin o, i ɲanmiɛn m’ɔ la nglo lɔ plaii’n nin o, ɔ nin i su nzraama nga be tru lɔ mun o, ɔ nin i su lɔ ninnge uflɛ mun o, be kwlaa sɔ’n, sin dí be ngba sekeseke. Afin asiɛ m’ɔ ti kɛ aunɲan mma kun sa ninnge kwlaa sɔ’m be nun’n, i su sran wie’m be ti klunwifuɛ. ?Sɛ amun le ngatɛ bajɛ kun naan i nun ngatɛ mma kun sacili’n, amún níɛn i sɔ’n ti amún wɔ́ bajɛ wunmuan’n nun? Amun su yomɛn i sɔ, afin i sɔ nin i fataman. I kunngba’n, Zoova su seman kɛ, kɛ mɔ ninnge ng’ɔ yili be nglo lɔ nin asiɛ’n su wa’n, be nun kun yoli sa tɛ’n ti’n, ɔ́ sáci ninnge sɔ’m be ngba.
Asa ekun’n, i sɔ akunndan’n, ɔ nin ndɛ nga Zezi Klist kannin’n be sansan be wun. I waan: “Be nga be ti wɛtɛɛfuɛ’n, be liɛ su ti ye, afin mɛn’n ɔ́ wá yó be liɛ!” (Matie 5:5; Jue Mun 37:29) ?Siɛ kun m’ɔ klo i awlobofuɛ mun’n, ɔ kwla kplan sua klanman kpa kun man be naan i kunngba’n w’a wɔ nun ekun? (Jue Mun 115:16) Ɔ si’ɛ! Zoova ti like kwlaa Yifuɛ. Asa kusu ɔ ti Siɛ kun m’ɔ klo i mma mun ɔn.—Jue Mun 103:13; 1 Zan 4:8.
Piɛli i ndɛ nga ɔ kannin’n nun’n, “asiɛ’n” ti klunwifuɛ’m be nzɔliɛ. Maan e sie i nzɔliɛ kɛ Piɛli fali sa sɔ’n sunnzunnin Nowe blɛ su nzue dan ng’ɔ tɔli’n. (2 Piɛr 3:5, 6) Nowe blɛ su’n, klunwifuɛ’m be ngunmin yɛ Ɲanmiɛn nunnunnin be ɔ. Asiɛ bɔbɔ ba’n w’a nunnunman, yɛ Nowe nin i awlobofuɛ mun mɔ be ti sran kpa’n, be kali nguan nun. I kunngba’n yɛle “nyanmiɛn su lɔ’n” i ndɛ mɔ Piɛli kannin’n. Ɔ ti nzɔliɛ like wie. I ndɛ sɔ’n nun’n “nyanmiɛn su lɔ’n” ti klɔ sran’m be sran sielɛ’n i nzɔliɛ. Ɔ maan klunwifuɛ mɔ be kunndɛman kɛ bé káci’n, ɔ nin famiɛn mun be osu’n núnnún. Ɲanmiɛn i Famiɛn diwlɛ’n yɛ ɔ́ sín be osu ɔ.—Daniɛl 2:44.
?Kɛ e fa wunnin i lɛ’n niɔn, asiɛ’n i osu núnnún sekeseke? Cɛcɛ. Like nga i osu núnnún’n, yɛle klunwifuɛ mun mɔ asiɛ’n ti be nzɔliɛ like’n. Asiɛ’n bɔbɔ ba’n, ɔ nin sran kpafuɛ’m bé ká lɛ tititi.—Nyanndra Mun 2:21, 22.