Ndɛ tre ablaɔn
Nán maan e wla fi Zoova i cɛn’n su
1. ?Kɛ be kleli e kɛ, ɲrɛnnɛn nga e wun i mɛn tɛ nga nun’n, é wá fín nun fíte’n, i sɔ’n yoli ɔ sɛ?
BIBLU’N i nun ninnge nga e suannin be i bo bolɛ nun’n, be nun kun yɛle kɛ Zoova waan ɔ́ yó naan asiɛ wunmuan’n kaci mɛn klanman kun. Mɛn uflɛ sɔ nun’n, alɛ dilɛ’n nin sran kunlɛ’n, ɔ nin yalɛ dilɛ’n, ɔ nin tukpacɛ’n, ɔ nin ɲrɛnnɛn’n, ɔ nin wie’n be su tranman lɛ kun. Be nga be wuli’n bɔbɔ, bé cɛ́n be. Nanwlɛ, mɛn sɔ’n yó klanman! Ɔ ka kaan sa’n, é wá wlú mɛn klanman sɔ’n nun. Like ng’ɔ kle sɔ’n yɛle kɛ, afuɛ nga be flɛ i 1914 nun’n, Klist yoli famiɛn ɲanmiɛn su lɔ. Ɔ maan kɛ ɔ fin i lɛ’n, e o mɛn tɛ nga’n i awieliɛ blɛ nun. Kɛ blɛ sɔ’n fá wíe’n, Zoova núnnún mɛn tɛ ng’ɔ o yɛ’n. Kpɛkun, ɔ́ fá e wlú mɛn uflɛ ng’ɔ seli kɛ ɔ́ fá mán e’n i nun.
2. ?Ngue yɛle ‘Zoova i cɛn’n’?
2 Blɛ sɔ mɔ bé wá núnnún mɛn tɛ nga’n, yɛ Biblu’n flɛ i “e Min’n i balɛ’n” annzɛ ‘Zoova i cɛn’n’ niɔn. (2 Piɛr 3:10) Ɔ ti ‘Zoova i ya cɛn’n,’ m’ɔ́ núnnún Satan i mɛn wunmuan’n niɔn. (Sofoni 2:3) Blɛ nga cɛn sɔ’n jrán cinnjin kpa’n, yɛle blɛ mɔ ‘bé kún alɛ Anannganman Ɲanmiɛn m’ɔ kwla like kwlaa yo’n i cɛn dan’n nun’n.’ “Ebre nun be flɛ i Armagedɔn.” Alɛ sɔ nun’n, bé núnnún “asiɛ’n su famiɛn’m be kwlaa.” (Sa Nglo Yilɛ 16:14, 16) ?E nantilɛ wafa’n kle kɛ e lafi su kpa kɛ ‘Zoova i cɛn dan’n’ w’a mantan koko?—Sofoni 1:14-18; Zeremi 25:33.
3. (a) ?Blɛ benin nun yɛ Zoova i cɛn’n jú ɔ? (b) ?Ngue ti yɛ kɛ mɔ Zoova w’a kleman “cɛn sɔ’n nin dɔ sɔ’n,” i sɔ’n ti like kpa’n niɔn?
3 Blɛ mɔ Zezi Klist wá yó fɔ mɔ Zoova buli mɛn tɛ nga’n i nuan su like’n, Biblu’n w’a kleman su cɛn nin dɔ trele kun sa. Zezi seli kɛ ‘cɛn sɔ’n nin dɔ sɔ’n sran fi simɛn i, anzi mun mɔ be o ɲanmiɛn su lɔ’n nin m mɔ n ti i Wa’n bɔbɔ e simɛn i, saan n Si kunngba cɛ yɛ ɔ si i ɔ.’ (Mark 13:32) Sran ng’ɔ kloman Zoova nanwlɛ su’n, i akunndan nun lɔ’n, ɔ yo i kɛ cɛn sɔ’n te o mmua sa. Ɔ maan, ɔ fɛ i wun wlɛ i mɛn’n nun ninnge’m be kunndɛlɛ’n nun. Sanngɛ be nga be klo Zoova sakpa’n, sɛ mɛn tɛ nga núnnún koko nga nun o annzɛ ɔ́ cɛ́ o, be liɛ nga be si i’n yɛle kɛ, bé tú be klun bé sú Zoova.—Jue Mun 37:4; 1 Zan 5:3.
4. ?Ngue ndɛ yɛ Zezi kannin ɔn?
4 Zezi seli be nga be klo Zoova’n kɛ: ‘An fa sie amun klun kpa, an tran minndɛ, afin an siman cɛn nga sa sɔ’m bé yó’n.’ (Mark 13:33-37) Ɔ seli e kɛ nán e yo aliɛ safuɛ nin nzanbɔɛfuɛ. Kpɛkun, ‘nán e koko ninnge’m be ti.’ I liɛ’n, e ɲin su kpaman cɛn sɔ’n su naan w’a fu e nun.—Lik 21:34-36; Matie 24:37-42.
5. ?Kɛ nga Piɛli fa kannin’n sa’n, Zoova i cɛn’n i bo’n gúa sɛ?
5 Piɛli kusu seli e kɛ, ‘kɛ é mínndɛ kɛ Ɲanmiɛn i cɛn’n ju’n, e yo like kwlaa nga e kwla yo’n maan ɔ ju ndɛndɛ. Cɛn sɔ’n nun ɲanmiɛn su lɔ’n ɔ́ rá, yɛ ɲanmiɛn su lɔ ninnge’m bé kló.’ Klɔ sran’m be famiɛn diwlɛ mɔ be fa be sunnzun ‘ɲanmiɛn su lɔ’n,’ be kwlaa bé núnnún. I kunngba’n, klɔ sran nga be suman Zoova’n, mɔ be fa be sunnzun ‘asiɛ’n,’ bé wíe núnnún. Mɛn tɛ nga nun ‘ninnge mun,’ yɛle kɛ i nunfuɛ’m be akunndan nin be ayeliɛ mun’n, be kusu be su tranman lɛ kun. Mɛn’n i nun ninnge’m be wie mun yɛle ɲin kekle nga mɛn nunfuɛ’m be yo i Ɲanmiɛn su’n, ɔ nin sa sukusuku nga be yo be’n, ɔ nin aɲanbeun ninnge kunndɛlɛ mɔ be fa cici be ti’n. ‘Ɲanmiɛn su lɔ uflɛ’n,’ yɛle Ɲanmiɛn Sielɛ’n. Kpɛkun ‘asiɛ uflɛ’n,’ yɛle sran nga bé wá trán asiɛ’n su mɛn uflɛ’n nun’n. Be kwlaa sɔ’m bé yó “sa kpa.” (2 Piɛr 3:10-13) Abonuan sa kekleekle sɔ’m bé fú sran’m be nun.—Matie 24:44.
Nán maan e ɲin kpa nzɔliɛ’n su
6. (a) ?Wafa sɛ yɛ Zezi i sɔnnzɔnfuɛ’m be kosan’n i su tɛlɛ’n, ɔ kan Zuifu’m be mɛn’n i sacilɛ’n i ndɛ ɔ? (b) ?Zezi i ndɛ ng’ɔ kannin’n i bue benin yɛ ɔ kan sa nin ayeliɛ nga be wun be blɛ ng’ɔ boli i bo afuɛ nga be flɛ i 1914 nun’n, be ndɛ ɔ?
6 Kɛ mɔ blɛ nga e o nun’n ti cinnjin’n ti’n, ninnge nga be ti “mɛn’n i awieliɛ’n” i nzɔliɛ’n, ɔ fata kɛ e si be kpa. Nán maan e wla fi su kɛ, i nun mɔ Zezi tɛ́ kosan nga i sɔnnzɔnfuɛ’m be usɛli i Matie 24:3 nun’n i su’n, yɛ ɔ kannin ninnge nga be o ndɛ mma 4 lele 22 nun’n be ndɛ ɔ. Ninnge sɔ’m be bue kaan sa juli Zuifu’m be mɛn’n nun afuɛ nga be flɛ i 33 nun lele 70 nun Klistfuɛ klikli’m be blɛ su. Sanngɛ Zezi i ndɛ sɔ’n i su kpɛnlɛ’n i dan’n nun’n, ɔ boli i bo afuɛ nga be flɛ i 1914 nun. Blɛ sɔ’n yɛ ɔ ti blɛ mɔ be flɛ i Klist i ‘balɛ’n nin mɛn’n i awieliɛ’n’ niɔn. Blɛ ng’ɔ fɛ i afuɛ nga be flɛ i 70 nun lele Klist i balɛ’n nun’n, Matie 24:23-28 kle sa nga be juli’n. Sa nga be kan be ndɛ Matie 24:29—25:46 nun’n, be kpɛn su mɛn’n i awieliɛ blɛ nga nun.
7. (a) ?Ngue ti yɛ sa nin ayeliɛ nga be kle kɛ nzɔliɛ’n i nun ninnge’m be kpɛn su’n, ɔ fata kɛ e fa e ɲin e sie be su ɔ? (b) Maan e tɛ kosan nga be o ndɛ kpɔlɛ yɛ’n i awieliɛ’n be su. Be kle kɛ, kɛ ɔ fɛ i afuɛ nga be flɛ i 1914 nun’n, nzɔliɛ’n i nun ninnge’m be kpɛn su.
7 Sa nin ayeliɛ nga be kle kɛ nzɔliɛ’n i nun ninnge’m be kpɛn su’n, ɔ fata kɛ e fa e ɲin sie be su. Sɛ e fa ninnge sɔ mun e sunnzun ndɛ nga Biblu’n kan’n, i sɔ’n úka e naan e wla w’a fiman Zoova i cɛn’n su. Kpɛkun, i sɔ’n úka e ekun naan y’a kwla yiyi nun weiin y’a kle e wiengu mun kɛ Zoova i cɛn’n w’a mantan koko. (Ezai 61:1, 2) Maan i sɔ’n ka e klun naan e bu kosan nga be lɔngɔ su yɛ’n be su akunndan. Kosan sɔ’m be fa e ɲin sie i nzɔliɛ’n i nun ninnge nga be o Matie 24:7 nin Lik 21:10, 11 nun’n be su.
?Kɛ nga be dun mmua kɛnnin i ndɛ sa’n, wafa sɛ yɛ kɛ ɔ fɛ i afuɛ nga be flɛ i 1914 nun’n, ‘nvle kun jao nvle kun wun, yɛ famiɛn kun jao i wiengu famiɛn kun wun’ ɔn? ?Kɛ ɔ fɛ i blɛ sɔ nun’n, alɛ dilɛ’n i nun ndɛ’n w’a yo sɛ?
?Afuɛ nga be flɛ i 1918 nun’n, tukpacɛ benin yɛ ɔ kunnin sran trali alɛ dan klikli’n niɔn? ?Kannzɛ bɔbɔ sran’m be si are yo kpa andɛ’n, sanngɛ tukpacɛ benin mun yɛ be te kun sran kpanngban kpa ɔ?
?Kannzɛ bɔbɔ afuɛ ya kpɔlɛ kasiɛn nga nun sran’m be ngwlɛlɛ’n w’a yo dan kpa w’a tra laa’n, sanngɛ wafa sɛ yɛ awe’n te kun sran mun asiɛ’n su ɔ?
Ndɛ ng’ɔ o 2 Timote 3:1-5, 13 nun’n, nán lalafuɛ nunfuɛ’m be mɛn dilɛ’n i ndɛ yɛ ɔ kan ɔn, sanngɛ wafa nga mɛn’n i awieliɛ’n nun’n, sa’m bé wá yó tɛtɛ kɔ́ be ɲrun’n i ndɛ yɛ ɔ kan ɔn. ?Ngue ti yɛ e kwla lafi su kpa kɛ ɔ ti sɔ sakpa ɔ?
Sran’m be nun bubulɛ
8. (a) ?Ngue ndɛ ekun yɛ ɔ o Matie 13:24-30 nin 36-43 be nun, mɔ Zezi seli kɛ ɔ ti mɛn’n i awieliɛ’n i nzɔliɛ’n wie ɔ? (b) ?Ɲanndra nga Zezi buli’n, i bo’n yɛle benin?
8 Zezi kannin sa cinnjin wie mun ekun mɔ be ti mɛn’n i awieliɛ’n i nzɔliɛ wie’n be ndɛ. Be nun kun yɛle ‘Ɲanmiɛn mma mun’ nin “Klunwifuɛ’n i mma mun” be nun bubulɛ’n. Awie ijre’n i su ɲanndra nga Zezi buli’n, i nun yɛ ɔ kannin ndɛ sɔ’n niɔn. Ɲanndra’n nun’n, “awie’n” yɛle Klistfuɛ kpa mɔ be kpali be sieli be ngunmin’n be nzɔliɛ’n. Kpɛkun, “awie ijre’n” yɛle be nga be tɔn be wun suɛn kɛ be ti Klistfuɛ’n sanngɛ nn be kle kɛ be ti ‘Klunwifuɛ’n i mma mun’n.’ Afin, be klo mɛn tɛ mɔ mmusu’m be si Satan sie’n. Be bubu be nin ‘Ɲanmiɛn mma mun’ be nun. Klunwifuɛ’n i mma’m be liɛ’n, be kpali be kɛ bé núnnún be. (Matie 13:24-30, 36-43) ?Dɔ nga su b’a bubu be nun sakpa?
9. (a) ?Kɛ alɛ dan klikli’n wieli’n, wafa sɛ yɛ be bubuli sran nga be waan be ti Klistfuɛ’n be kwlaa be nun ɔn? (b) ?Wafa sɛ yɛ Klistfuɛ nga be kpali be sieli be ngunmin’n be kleli kɛ be ti Ɲanmiɛn Sielɛ’n i junman difuɛ ɔ?
9 Kɛ alɛ dan klikli’n wieli’n, be bubuli sran nga be waan be ti Klistfuɛ’n be nun akpasua nɲɔn: (1) Yɛle be nga be tɔn be wun suɛn kɛ be ti Klistfuɛ’n be kpɛnngbɛn mun nin be nga be su be su’n. Be liɛ’n, be suannin nvlenvle’m be aenguɛ mɔ be flɛ i SDN i bo dan kpa (i yɛ siɛn’n ɔ ti nvlenvle’m be anuannzɛ mɔ be flɛ i ONU niɔn). Be kunngba’n be kloli be nvle’n trali Ɲanmiɛn. (2) Kɛ alɛ dandan’m be sinnin’n, i blɛ sɔ nun Klistfuɛ kpa’m b’a suanman mɛn’n nun nvlenvle’m be bo. Sanngɛ be liɛ’n, Ɲanmiɛn i Mɛsi’n i Sielɛ’n yɛ be jrɛnnin i sin ɔn. (Zan 17:16) Be kleli kɛ be ti Ɲanmiɛn Sielɛ’n i junman difuɛ, afin be ‘kannin Ɲanmiɛn sielɛ’n i jasin fɛ’n’ mɛn wunmuan’n nun. (Matie 24:14) ?I sɔ liɛ’n i bo’n guali sɛ?
10. ?Like klikli benin yɛ Ɲanmiɛn Sielɛ’n i jasin fɛ’n bolɛ’n ti ɔ kwla yoli ye ɔ?
10 I klikli su’n, be yiali be nga Ɲanmiɛn fɛli i wawɛ’n mannin be mɔ be nin Klist bé kó dí famiɛn ɲanmiɛn su lɔ’n, be nuan. I sɔfuɛ’m be fin nvle fanunfanun be nun. Sanngɛ ɔ nin i sɔ ngba’n, be yiali be nuan anuannzɛ kunngba nun naan be bo yo kun. Sran sɔ’m be ngban su nzɔliɛ sielɛ’n su wa wie.—Sa Nglo Yilɛ 7:3, 4.
11. ?Sran benin mun yɛ be te yia be nuan ɔn? ?Yɛ Ɲanmiɛn nuan ijɔfuɛ’n i ndɛ benin yɛ ɔ kɛnnin i sɔ liɛ’n i ndɛ ɔ?
11 I sin’n, Klist maan ‘sran kpanngban kpa mɔ be fin mɛnmɛn’n kwlaa nin nvlenvle’n kwlaa nun, mɔ sran wafawafa’n kwlaa o be nun, mɔ be ijɔ aniɛn wafawafa’n kwlaa’n,’ be boli be nuan yialɛ’n i bo. Sran sɔ mun yɛ be ti “bua’m be wie” mɔ ‘bé fín afɛ dan’n nun’ fíte’n niɔn. (Sa Nglo Yilɛ 7:9, 14; Zan 10:16) Lele naan mɛn nga w’a wie’n, be te bo Ɲanmiɛn Sielɛ’n i jasin fɛ’n. Sran kpanngban kpa mɔ be o bua’m be wie’m be nun’n, be ju akpinngbin kpanngban siɛn’n. Sran sɔ’m be uka be nga be kpa be sieli be ngunmin be onga’n titi, naan be bo Ɲanmiɛn Sielɛ’n i jasin fɛ’n mɔ maan sran’m bé kwlá ɲán nguan’n. Nvlenvle’n kwlaa be nun’n, sran’m be tie jasin fɛ’n sɔ’n.
E ɲrun lɔ sa mun
12. ?Jasin fɛ’n bolɛ junman benin yɛ ɔ fata kɛ e di i ekun lele naan Zoova i cɛn’n w’a ju ɔ?
12 I kwlaa nga y’a wun i lɛ’n, ɔ kle kɛ mɛn tɛ’n nga su wa wie, naan Zoova i cɛn’n w’a mantan koko kpa. ?Sanngɛ, ɔ nin i fata kɛ Ɲanmiɛn nuan ijɔfuɛ’m be ndɛ wie mun ekun be kpɛn su ka naan cɛn sroesroe sɔ’n w’a bo i bo? Ɛɛn, afin Ɲanmiɛn sielɛ’n i su akplowa ndɛ’n nun’n, sran’m be nun bubulɛ’n nin i a wieman. Nvle wie’m be nun’n, be tanndannin jasin fɛ’n bolɛ’n i ɲrun laa. Lika sɔ’m be nun’n, Zezi i sɔnnzɔnfuɛ’m be su sɔn kpa siɛn’n. Lika bɔbɔ nga sran’m be sieman be su jasin fɛ’n i bo’n, jasin fɛ’n nga e bo’n ɔ yi Zoova i sran aunnvuɛ silɛ’n i nglo. I sɔ’n ti’n, maan e di junman’n e wɔ e ɲrun! Zezi seli e kɛ, kɛ junman’n ko wie’n, yɛ mɛn’n nga ɔ́ wíe ɔ.
13. ?Kɛ nga 1 Tɛsalonikfuɛ Mun 5:2, 3, fa kan’n sa’n, ngue sa ekun yɛ ɔ́ wá jú ɔ? ?Yɛ ngue yɛ i sɔ liɛ’n kle e ɔ?
13 Biblu’n nun ndɛ cinnjin kun ekun yɛle kɛ: ‘Kɛ sran’m bé sé kɛ: “Y’a ɲan e ti, y’a di alaje’n,” kpɛkun ɲrɛnnɛn dan kpa tɔ́ be su kɛ wunnzɛfuɛ i ba wulɛ aklunya’n tɔ i su’n sa, ɔ su to fuanman be le.’ (1 Tɛsalonikfuɛ Mun 5:2, 3) Dɔ nga su’n, e nin a siman wafa nga bé sé kɛ ‘y’a ɲan e ti, y’a di alaje’n.’ Sanngɛ kɛ bé sé sɔ’n, nán kɛ mɛn siefuɛ’m bé yó maan sa nga be o sran’m be su’n bé wíe sakpa ti ɔ. Be nga be wla fiman Zoova i cɛn’n su’n, be su faman ndɛ sɔ’n su. Afin be si kɛ i sin’n, sran’m be nunnunlɛ’n tɔ́ be su kpɛ kunngba.
14. ?Ɲrɛnnɛn dan’n nun’n, sa benin mun yɛ bé lɔ́ngɔ be wiengu su ɔ?
14 Kɛ ɲrɛnnɛn dan’n bó i bo’n, mɛn siefuɛ’m bé kpɛ́ be ɲin Babilɔni klɔ dan’n i wun lɔ kɛ bé núnnún i mlɔnmlɔnmlɔn. Babilɔni klɔ dan’n yɛle Ɲanmiɛn sulɛ wafa nga be timan su’n be kwlaa’n. (Matie 24:21; Sa Nglo Yilɛ 17:15, 16) I sin’n, be nga be jran Zoova sin nglo nin asiɛ’n be sielɛ ndɛ’n nun’n, nvlenvle’m be nin be ɲɛ́n i. I sɔ’n kusu wá yó maan Zoova i ya’n jáso politikifuɛ mun nin be minniɛn’m be wun. Ɔ maan, ɔ́ núnnún be kwlaa sɔ mun. Blɛ sɔ’n mɔ ɲrɛnnɛn dan’n ɔ́ jrán cinnjin kpa’n, be flɛ i Armagedɔn. I sin ekun’n, bé tó Satan nin i mmusu mun yí be kunman dan kun nun. Ɔ maan, be su kwlá lakaman sran mun kun. Blɛ sɔ nun mɔ Zoova i dunman’n yó sanwun’n, yɛ Zoova i cɛn’n, ɔ́ wíe ɔ.—Ezekiɛl 38:18, 22, 23; Sa Nglo Yilɛ 19:11–20:3.
15. ?Ngue ti yɛ ɔ fataman kɛ e bu i kɛ Zoova i cɛn’n te o mmua ɔ?
15 Blɛ nga Ɲanmiɛn sieli’n, i nun cɛ yɛ mɛn tɛ ng’ɔ o yɛ’n ɔ́ núnnún ɔn. I sɔ’n su sɛnmɛn i wun. (Abakik 2:3) Nán maan e wla fi su kɛ afuɛ nga be flɛ i 70 nun Klistfuɛ klikli’m be blɛ su’n, Zerizalɛmu klɔ’n i nunnunlɛ’n bali ndɛndɛ kpa. Blɛ mɔ Zuifu’m be sunnzunman’n, mɔ be buli i kɛ sa tɛ fi su kwlá ɲanman be kun’n, i nun yɛ i sɔ sa’n juli ɔ. ?Yɛ laa Babilɔni klɔ’n nin, i liɛ’n yoli sɛ? I blɛ sɔ nun’n, Babilɔnifuɛ mun yɛ be sie mɛn’n niɔn. Kpɛkun, talɛ dandan nglonglo kpa’m be sin yia be klɔ’n. Ɔ maan, be klun titiman be. Sanngɛ kɔnguɛ kunngba nun’n, klɔ sɔ’n tɔli. Kɛ mɛn tɛ ng’ɔ o yɛ’n kusu ɔ́ núnnún sɔ wie ɔ. Lele naan sa sɔ’n w’a ju’n, nán e wla fi Zoova i cɛn dan’n su le. Yɛle kɛ maan e nin Zoova i sufuɛ mun e bo yo kun e su i.
I nun flanlɛ
• ?Ngue ti yɛ ɔ ti cinnjin kpa kɛ nán e wla fi Zoova i cɛn’n su ɔ? ?Yɛ wafa sɛ yɛ é yó naan e wla w’a fiman su ɔ?
• ?Wafa sɛ yɛ sran’m be nun bubulɛ akpasuaakpasua’n, ɔ kan e wie ɔ?
• ?Lele naan Zoova i cɛn’n w’a bo i bo’n, sa benin mun ekun yɛ be te o e ɲrun lɔ ɔ? ?I sɔ’n ti’n, ngue yɛ ɔ fataman kɛ e yaci i yolɛ ɔ?
[Foto i su ndɛ, bue 180]
Ɔ ka kaan’n, Satan i mɛn tɛ’n ɔ́ wíe.