Ndɛ tre nɲɔn

Maan e manman Zoova mɔ i kunngba cɛ yɛ ɔ ti Ɲanmiɛn’n

1. ?Wan yɛ i kunngba cɛ yɛ ɔ ti Ɲanmiɛn’n niɔn?

KANNZƐ bɔbɔ Biblu’n se kɛ amuɛn nga sran’m be sɔ be’n be sɔnnin’n, sanngɛ ‘e liɛ’n, e Si Ɲanmiɛn ti kunngba cɛ.’ (1 Korɛntfuɛ Mun 8:5, 6) ‘Ɲanmiɛn’ sɔ’n yɛle Zoova. I yɛ ɔ ti like kwlaa be Yifuɛ’n niɔn. (Mmla’n 6:4; Sa Nglo Yilɛ 4:11) Kɛ Zezi kɛ́n i ndɛ’n, i waan ‘min nin amun e Ɲanmiɛn’n.’ (Zan 20:17) Ɔ fali ndɛ nga Moizi kannin’n su, afin Moizi seli kɛ: ‘I kunngba cɛ yɛ ɔ ti Ɲanmiɛn naan be fa like fi sunnzun i ɔ, ɔ yoman ye.’ (Mmla’n 4:35) Ninnge kɛ amuɛn mun sa annzɛ sran mɔ be yo be wun kɛ Ɲanmiɛn sa’n, annzɛ kusu Ɲanmiɛn i kpɔfuɛ Bae Satan m’ɔ ti “mɛn nga i min’n,” mɔ sran’m be su be’n, be kwlá faman be wun sunnzunman Zoova mlɔnmlɔn. (2 Korɛntfuɛ Mun 4:3, 4) Sanngɛ ngbaciɛ ng’ɔ o Zoova nin be kwlaa sɔ’m be afiɛn’n yɛle kɛ Zezi waan Zoova ‘i kunngba cɛ yɛ ɔ ti Ɲanmiɛn’ ɔn.—Zan 17:3.

2. ?Kɛ é súan Ɲanmiɛn i su like’n, wafa sɛ yɛ ɔ fata kɛ i sɔ liɛ’n kaci e mɛn dilɛ’n niɔn?

² Sran kpa’m be fa be wun mantan Zoova, afin Ɲanmiɛn i nzuɛn fanunfanun mɔ be yo ɲɛnmɛn’n, ɔ nin ninnge ng’ɔ yoli be’n, ɔ nin nga ɔ́ wá yó be’n, be su like mɔ be suannin’n ɔ kannin be awlɛn’n. Kɛ bé kló Zoova kɔ́ i ɲrun’n nn bé kúnndɛ kɛ bé mɛ́nmɛ́n i. ?Wafa sɛ? I kun yɛle kɛ be kan Zoova i su ndɛ kle be wiengu mun. Rɔmfuɛ Mun 10:10 waan ‘kɛ be lafi su kpa’n, Ɲanmiɛn bu be sran kpa, yɛ kɛ ɔ fite be nuan’n, be fite nun.’ I kun ekun yɛle wafa nga e sɔnnzɔn i e ijɔlɛ nun’n nin e ayeliɛ nun’n. Efɛzfuɛ Mun 5:1 se kɛ: ‘Kɛ an ti Ɲanmiɛn i awlɛn su ba’n, an nian like ng’ɔ yo’n su, an yo.’ Kɛ ɔ ko yo naan y’a yo i sɔ liɛ’n i kpa’n, ɔ fata kɛ e si sran’n i wafa nga Zoova ti’n sakpasakpa.

3. ?Ɲanmiɛn i nzuɛn cinnjin nnan’n yɛle benin?

³ Kɛ Biblu’n bo i bo lele m’ɔ́ fá jú i awieliɛ’n, ɔ le ndɛ kpanngban mɔ be yi Ɲanmiɛn i nzuɛn fanunfanun mɔ be yo ɲɛnmɛn’n be nglo ɔ. I nzuɛn ng’ɔ yi i nglo’n be nun nnan be ti cinnjin. Be yɛle ngwlɛlɛ’n, ɔ nin sa’n i nuan su sɛsɛsɛ yolɛ’n, ɔ nin kwlalɛ’n. ‘Ngwlɛlɛ’n ti i liɛ.’ (Zɔb 12:13) “I atin’m be ti seiin.” (Mmla’n 32:4) Ɔ le ‘wunmiɛn dan.’ (Ezai 40:26) ‘Ɲanmiɛn’n yɛ ɔ ti sran klofuɛ’n niɔn.’ (1 Zan 4:8) ?Sanngɛ Ɲanmiɛn i nzuɛn cinnjin nnan sɔ’m be nun’n, kun nga ɔ yo ɲɛnmɛn dan’n, m’ɔ yi Ɲanmiɛn i sran’n i wafa ng’ɔ ti’n i nglo’n, yɛle benin?

‘Ɲanmiɛn’n yɛ ɔ ti sran klofuɛ’n niɔn’

4. ?Ɲanmiɛn i nzuɛn benin yɛ ɔ suli i bo m’ɔ yili nglo nin i asiɛ’n ɔ nin like kwlaa nga be le nguan’n niɔn?

⁴ Like ng’ɔ suli Zoova i bo m’ɔ yili nglo nin asiɛ’n, ɔ nin aolia nun sran mun nin klɔ sran mun’n, amun e bu i akunndan e nian. ?I ngwlɛlɛ’n yɛ annzɛ i wunmiɛn’n niɔn? Cɛcɛ, afin sɛ bɔbɔ Ɲanmiɛn fali nzuɛn sɔ mun yɛ ɔ yili ninnge mun’n, sanngɛ nán be yɛ be suli i bo maan ɔ yili ninnge sɔ mun ɔn. Asa ekun’n, nɛ́n i atin seiin’n ti yɛ ɔ man sran’m be nguan ɔn. Sanngɛ, klolɛ m’ɔ klo sran mun dan kpa’n, i ti yɛ ɔ yili aolia nun sran mun nin klɔ sran mun naan be tran nguan nun be di aklunjuɛ wie ɔ. I sran klolɛ’n ti yɛ i waan ɔ fata kɛ aɲinyiɛfuɛ’m be tran mɛn klanman’n nun tititi’n niɔn. (Bo Bolɛ 1:28; 2:15) Ɲanmiɛn i sran klolɛ’n ti yɛ sannzan nga Adam i sa tɛ’n fa yili sran’m be su’n, ɔ buli i nuan nɲa ɔ.

5. ?Kɛ nga Biblu’n fa kan’n sa’n, nzuɛn benin yɛ kɛ bé kɛ́n i ndɛ’n, Zoova su yɛ e akunndan’n kɔ’n niɔn? ?Yɛ ngue ti ɔ?

⁵ Ɔ maan Ɲanmiɛn i nzuɛn fanunfanun’m be nun ɲɛnmɛnfuɛ’n yɛle i sran klolɛ’n. Ɲanmiɛn i bɔbɔ ba’n i nzuɛn’n ti sran klolɛ ngunmin. Kannzɛ bɔbɔ i nzuɛn cinnjin nsan onga’m be ti nanndoliɛ sɛ’n, sanngɛ Biblu’n nin a seman le kɛ Ɲanmiɛn ti ngwlɛlɛ, annzɛ ɔ ti sa’n i nuan su sɛsɛsɛ yolɛ, annzɛ kusu ɔ ti kwlalɛ. Biblu’n se kɛ i yɛ ɔ ti sran klofuɛ’n niɔn. Nanwlɛ, kɛ be kan sran klolɛ’n i ndɛ’n, Ɲanmiɛn yɛ be wun i ɔ. I sran klolɛ sɔ’n taka i mmla’n su, nán like m’ɔ fu i ɔ. Sɛ Ɲanmiɛn i sran klolɛ’n ti sran’n, nn é sé kɛ ndɛ nanwlɛ’n nin ndɛnman yolɛ’n yɛ be sie i ɔ. Sran klolɛ m’ɔ lemɛn i wunsu’n, yɛ Ɲanmiɛn Zoova yi i nglo ɔ. Ɲanmiɛn tu i klun klo sran, kpɛkun ɔ yo like m’ɔ yi i sran klolɛ’n i nglo weiin titi’n.

6. ?Kannzɛ bɔbɔ e wunmiɛn’n juman Ɲanmiɛn liɛ’n nun’n, ngue ti yɛ e kwla sɔnnzɔn i ɔ?

⁶ Sran klolɛ m’ɔ yo ɲɛnmɛn sɔ’n yɛ ɔ ukali e maan e kwla sɔnnzɔnnin Ɲanmiɛn ɔn. Kɛ mɔ e ti klɔ sran mɔ e wunmiɛn’n juman Ɲanmiɛn liɛ’n nun mɔ e fɔn titi’n ti’n, e kwla bu i kɛ e su kwlá sɔnnzɔnman Ɲanmiɛn le mlɔnmlɔn. Sanngɛ Zoova i sran klolɛ dan’n i nuan su like kun ekun yɛ: Ɔ si kɛ nán ninnge ngba yɛ e kwla yo ɔ, ɔ maan ɔ seman e kɛ e yo like nga e wunmiɛn juman nun’n. Ɔ si kɛ sa tɛ nun yɛ be wuli e ɔ. (Jue Mun 51:7) I sɔ’n ti yɛ Jue Mun 130:3, 4 se kɛ: ‘?Anannganman, sɛ ɔ waan á nían tɛ nga e yo’n, wan cɛ yɛ ɔ ka lɛ ɔ, ɔ́ yó e ɔ? Afin wɔ yɛ a yaci sran i wun sa cɛ i ɔ.’ Nanwlɛ, Zoova ‘ti Ɲanmiɛn aklunyefuɛ, nin aunnvuɛ sifuɛ, ɔ faman ya ndɛndɛ. I aklunye’n ti dan.’ (Ezipt Lɔ Tulɛ 34:6) “Min Min [Zoova, NW], ɔ klun ti kpa, a yaci sran wun sa cɛ i.” (Jue Mun 86:5) Amun nian kɛ i sɔ’n cici e wla ɔ! Kɛ e su Ɲanmiɛn sɔ’n m’ɔ yo abonuan sa mun’n, m’ɔ klo e’n, m’ɔ nian e lika’n, nanwlɛ, i sɔ’n gua e awlɛn su nzue dan kpa!

7. ?Wafa sɛ yɛ Zoova i sran klolɛ’n i ɲin fite ninnge’m be yilɛ nun ɔn?

⁷ Zoova i sran klolɛ’n i ɲin fite wafa ng’ɔ yili ninnge mun’n, i nun wie. Ninnge kpa kpanngban kɛ oka nglanman mun, ɔ nin bo klanman mun, ɔ nin nzue mun, ɔ nin jenvie nga Zoova mannin e kɛ e di be su aklunjuɛ naan e fa uka e wun’n, amun e bu be akunndan e nian. Ɔ mannin e aliɛ kpakpa fanunfanun kɛ e di naan e wun kɛ be yo fɛ. Asa ekun, Zoova mannin e waka nɲrɛ wafawafa kpanngban mɔ be ti klanman kpa mɔ be bɔn fannin dan’n, ɔ nin nnɛn fanunfanun mɔ be yo ɲɛnmɛn kpa’n. Kannzɛ bɔbɔ ɔ timan cinnjin kɛ ɔ yo ninnge nga be kwla man sran’m be aklunjuɛ’n, sanngɛ ɔ yoli i sɔ liɛ’n. Nanwlɛ, kɛ mɔ e o mɛn tɛ nga nun mɔ fɔ’n o e nun’n ti’n, e kwlá diman ninnge nga Ɲanmiɛn yili be’n be su aklunjuɛ naan y’a fa uka e wun y’a guɛ i ti nin i bo. (Rɔmfuɛ Mun 8:22) Sanngɛ, like nga Zoova wá yó mán e Mɛn Klanman’n nun’n, maan e bu i akunndan e nian! Jue tofuɛ’n fɔnvɔ e kɛ: “A trɛ ɔ sa’n nun. A man ninnge nga nguan o be nun’n be kwlaa be like ng’ɔ ju be’n.”—Jue Mun 145:16.

8. ?Zoova i sran klolɛ dan kpafuɛ m’ɔ leman wunsu’n yɛle benin?

⁸ ?Zoova i sran klolɛ dan kpafuɛ m’ɔ leman wunsu’n yɛle benin? Biblu’n waan: ‘Ɲanmiɛn kloli mɛn’n lele ɔ fɛ i Wa kunngba cɛ’n mannin nan sran kwlaa ng’ɔ lafi i su’n w’a mlinman, sanngɛ ɔ ɲan anannganman nguan.’ (Zan 3:16) ?Sran’m be kpa mɔ be ti’n, i ti yɛ Zoova yoli sɔ ɔ? Rɔmfuɛ Mun 5:8 tɛ su kɛ: ‘Ɲanmiɛn kle e kɛ ɔ klo e, afin kɛ e ti sa tɛ yofuɛ’n, e ti ɔ maan Klist wuli.’ Nanwlɛ, Ɲanmiɛn sunmɛnnin i Wa mɔ fɔ kaan sa nunmɛn i nun’n asiɛ’n su wa, naan ɔ fɛ i nguan’n ɔ kpɔ e ti naan y’a ɲan e ti sa tɛ’n nin wie’n be sa nun. (Matie 20:28) I sɔ liɛ’n mannin sran nga be klo Ɲanmiɛn’n be atin naan b’a ɲan anannganman nguan. Nga m’ɔ ti ndɛ fɛ’n, yɛle kɛ Ɲanmiɛn klo sran kwlaa nga be waan bé yó i klun sa’n, afin Biblu’n waan: ‘Ɲanmiɛn liɛ’n, ɔ kpaman sran nun, sanngɛ nvle kwlaa nun’n, sran ng’ɔ sro i m’ɔ yo i klun sa’n, i klun jɔ i wun.’—Sa Nga Be Yoli’n 10:34, 35.

9. ?Kɛ mɔ Zoova fɛli i Wa’n fa kpɔli e ti’n ti’n, wafa sɛ yɛ ɔ fata kɛ i sɔ liɛ’n kaci e mɛn dilɛ’n niɔn?

⁹ Zoova fɛli i Wa’n fa kpɔli e ti naan e ɲan anannganman nguan. ?Wafa sɛ yɛ ɔ fata kɛ i sɔ’n kaci e mɛn dilɛ’n andɛ ɔ? Ɔ fata kɛ Zoova mɔ i kunngba cɛ yɛ ɔ ti Ɲanmiɛn’n, i Wa m’ɔ fa kpɔli e ti’n, ɔ yo maan e klo i dan kpa e tra laa’n. I kunngba’n, ɔ fata kɛ i sɔ liɛ’n wla e fanngan naan e tie Zezi m’ɔ ti Ɲanmiɛn i janunfuɛ’n i nuan ndɛ’n. ‘Zezi wuli e ngba e ti, i sɔ’n ti’n, olɛ nga e o lɛ’n, nán e bɔbɔ e olɛ yɛ e wo ɔ, sanngɛ sran ng’ɔ wuli’n, i dunman nun yɛ e wo ɔ.’ (2 Korɛntfuɛ Mun 5:15) Nanwlɛ, Zezi m’ɔ sɔnnzɔnnin Zoova i sran klolɛ’n nin i sran aunnvuɛ silɛ’n kpa’n, i ajalɛ’n su falɛ yo fɛ! I sɔ’n ti Zezi kan kleli wun ase kanfuɛ mun kɛ: ‘Amun kwlaa mɔ an sua trɔ mɔ amun a fɛ’n, an bla min sin, ń síke amun, yɛ amún ló wunmiɛn. An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min awlɛn’n ti flɔlɔ. Yɛ amun wla wá gúa ase. Afin n kɔmin su waka’n i sualɛ yo fɛ, yɛ n trɔ’n yoman nɔnnin.’—Matie 11:28-30.

Maan e klo e wiengu mun

10. ?Wafa sɛ yɛ e kwla yi i nglo kɛ e klo e niaan Klistfuɛ mun ɔn?

¹⁰ ?Wafa sɛ yɛ e kwla kle kɛ e klo e niaan Klistfuɛ mun kɛ nga Zoova nin Zezi be fa klo e’n sa ɔ? Wafa kpanngban nga e kwla yo sɔ’n, maan e sie be nzɔliɛ e nian: ‘Sran m’ɔ klo sran’n, ɔ trɛ i awlɛn sran wun, sran m’ɔ klo sran’n, ɔ yo aklunye, yɛ i ɲin bloman sran like su, sran m’ɔ klo sran’n, ɔ diman tutre, ɔ tumɛn i wun, i nzuɛn ti kpa, ɔ bumɛn i bɔbɔ wun akunndan, ɔ faman ya finfin, ɔ faman sa siemɛn i klun, sa tɛ’n yomɛn i fɛ, nanwlɛ dilɛ’n yɛ ɔ yo i fɛ ɔ. Sran m’ɔ klo sran’n, sa’n kwlaa sɔn i nun, sa’n kwlaa nun ɔ lafi Ɲanmiɛn su, i wla’n wo i su, ɔ trɛ i awlɛn sa’n kwlaa nun, yɛ ɔ siman afɛ. Sran m’ɔ klo sran’n, ɔ klo i guɛ i ti nin i bo.’—1 Korɛntfuɛ Mun 13:4-8; 1 Zan 3:14-18; 4:7-12.

11. ?Wan mun ekun yɛ ɔ fata kɛ e yi i nglo kɛ e klo be ɔ? ?Yɛ wafa sɛ yɛ é yó i sɔ liɛ’n niɔn?

¹¹ ?Wan mun ekun yɛ ɔ fata kɛ e yi i nglo kɛ e klo be ɔ? ?Yɛ ngue ti ɔ? Zezi seli kɛ: “I sɔ’n ti, an wɔ ko kle nvlenvle’n kwlaa be like maan be kaci n sɔnnzɔnfuɛ, yɛ an yo be batɛmu e Si Ɲanmiɛn, nin i Wa’n, ɔ nin i wawɛ’n be dunman nun. Yɛ like kwlaa nga n kleli amun’n, amun kusu an kle be maan be fa su.’ (Matie 28:19, 20) I sɔ liɛ’n kle e kɛ e bo Ɲanmiɛn i mɛn uflɛ m’ɔ ti klanman kpa’n, m’ɔ́ wá bá’n i jasin fɛ’n e kle be nga be nin a kaciman e niaan Klistfuɛ’n. Zezi kleli weiin kɛ ɔ fataman kɛ e sran klolɛ’n ka be nga e nin be lafi Ɲanmiɛn su’n be su, afin ɔ seli kɛ: ‘?Sɛ an klo amun klofuɛ’m be ngunmin’n, ngue like yɛ amún ɲɛ́n i ɔ? ?Gua bo sika defuɛ mun bɔbɔ be kloman be klofuɛ mun? ?Sɛ an yo amun niaan’m be ngunmin be like’n, nn nzu like dan yɛ amun a yo ɔ? ?Be mɔ be timan Zuifu mun [annzɛ Klistfuɛ mun] bɔbɔ be yoman be niaan’m be like?’—Matie 5:46, 47; 24:14; Galasifuɛ Mun 6:10.

‘Maan e yo ninnge nga ɔ ko jɔ Zoova i klun’n’

12. ?Ngue ti yɛ Ɲanmiɛn i kunngba cɛ yɛ be kwla flɛ i Zoova ɔ?

¹² Wafa cinnjin nga e kwla manman Ɲanmiɛn Kpli ekun’n, yɛle kɛ e si i dunman Zoova m’ɔ leman wunsu’n, naan e fa flɛ i kpɛkun e fa kle sran uflɛ mun. Jue tofuɛ’n kannin like ng’ɔ lo i’n i ndɛ kɛ: ‘Maan be si kɛ wɔ mɔ ɔ dunman’n yɛle Anannganman’n [Zoova’n, NW], ɔ kunngba cɛ yɛ like fi nunman ɔ sin asiɛ wunmuan’n su ɔ.’ (Jue Mun 83:19) Dunman Zoova’n i bo’n yɛle “Ɔ yo maan ɔ kpɛn su.” I yɛ ɔ ti Like Yofuɛ m’ɔ yo maan ninnge nga i waan ɔ́ yó be’n be kpɛn su tititi ɔ. Kpɛkun Ɲanmiɛn Kpli kunngba cɛ yɛ ɔ le atin suan dunman sɔ’n niɔn, afin klɔ sran’m be kwlá siman sɛ like nga be mian be ɲin yo’n ɔ́ gúa kpa mán be o. (Zak 4:13, 14) Zoova kunngba cɛ yɛ ɔ kwla se kɛ i ndɛ’n, ‘saan ɔ́ yó’ like nga mɔ i ti yɛ ɔ sunmɛnnin i’n niɔn. (Ezai 55:11) Kɛ sran kpanngban be wun Ɲanmiɛn i dunman’n be Biblu’n nun cɛ’n, mɔ be ko wun dunman sɔ’n i bo’n, be wun blibli be. Sanngɛ, sɛ e kunndɛ kɛ é ɲán like nga e suannin’n i su mmlusuɛ’n, ɔ nin i fata kɛ like ‘nga e ko yo naan ɔ ko jɔ Anannganman [Zoova, NW] e Ɲanmiɛn’n i klun titi’n,’ yɛ e yo ɔ.—Mise 4:5.

13. ?Kɛ be se kɛ be si Zoova i dunman’n naan be yo like nga ɔ jɔ i klun’n, i bo’n yɛle benin?

¹³ Ɲanmiɛn i dunman’n i su ndɛ nga Jue Mun 9:11 ɔ kan’n yɛ: ‘Be nga be si wafa mɔ a ti’n, be fa be wun wla ɔ sa nun.’ Dunman Zoova’n i silɛ ngbɛn’n, ɔ kleman kɛ be fa be wla guɛ i su. Ɲanmiɛn i dunman’n i silɛ’n i bo’n yɛle kɛ be si Ɲanmiɛn Zoova i sran’n i wafa ng’ɔ ti’n, kpɛkun be si i sɔ liɛ’n i su ye, yɛ be ɲin yi i ɲrun m’ɔ le i’n, be fɛ i ndɛ’n su, kpɛkun be lafi i su sa’n kwlaa nun. (Nyanndra Mun 3:5, 6) I kunngba’n, like nga e ko yo naan ɔ ko jɔ Zoova e Ɲanmiɛn’n i klun’n, i wie yɛle kɛ e fa e wun e mɛn i naan e yo i sufuɛ m’ɔ ti i janunfuɛ, mɔ i mɛn dilɛ’n nin Zoova klun sa yolɛ’n be kɔ likawlɛ’n. (Lik 10:27) ?I sɔ yɛ e yo ɔ?

14. ?Sɛ e waan é sú Zoova tititi’n, ngue like yɛ e su yomɛn i mianlɛ su ɔ?

¹⁴ Sɛ e waan é sú Zoova tititi’n, nán mianlɛ su yɛ é yó like ng’ɔ fata kɛ e yo’n niɔn. Timote m’ɔ ti Zoova sufuɛ i osu w’a cɛ’n, akoto Pɔlu wlɛli i fanngan kɛ: ‘Mian ɔ ɲin mantan Ɲanmiɛn kpa.’ (1 Timote 4:7) Be wun mɔ be fa mantan sran kun’n, ɔ fin be klun mɔ be tu be la sran nga be fa be wun mɛntɛn i’n, i ase’n. Be wun mɔ be fa ‘mantan Ɲanmiɛn’n,’ ɔ yi be ɲin m’ɔ yi Zoova tra like kwlaa’n i nglo. I sɔ liɛ’n kle kɛ klolɛ mɔ e fa klo i’n ti dan, afin wafa nga i wun fa yo e fɛ’n, ɔ nin wafa nga e fa klo i atin mun’n, ɔ leman awɛ mlɔnmlɔn. E ɲin m’ɔ yi Zoova’n ɔ su e bo maan e kunndɛman kɛ sran’m be saci i dunman’n. Sɛ e kunndɛ kɛ é yó like nga e ko yo naan ɔ ko jɔ Zoova mɔ i kunngba cɛ yɛ ɔ ti Ɲanmiɛn’n i klun tititi’n, ɔ fata kɛ e fa e wun mɛntɛn i titi, naan nán e yaci i sɔ yolɛ.—Jue Mun 37:4; 2 Piɛr 3:11.

15. ?Wafa sɛ yɛ e kwla su Ɲanmiɛn i ngunmin cɛ ɔ?

¹⁵ Kɛ ɔ ko yo naan Ɲanmiɛn klun w’a jɔ wafa nga e su i’n su’n, ɔ fataman kɛ e awlɛn’n yo nɲɔnnɲɔn, afin ɔ ti ‘e Ɲanmiɛn yɛ ɔ si kwla.’ (Ezipt Lɔ Tulɛ 20:5) E kwlá kloman Ɲanmiɛn naan e kunngba’n y’a klo mɛn tɛ nga mɔ Satan yɛ ɔ ti i min’n. (Zak 4:4; 1 Zan 2:15-17) Sran’n i wafa nga e tinuntinun e su mian e ɲin é káci’n, Zoova si i kpa. (Zeremi 17:10) Sɛ e klo nantilɛ seiin’n ɔ wun i, ɔ maan ɔ́ wá úka e naan sa nga be ju e su cɛn kwlakwla’n b’a sɔn e nun. Ɔ fɛ i wawɛ m’ɔ le wunmiɛn dan’n ɔ suan e bo. Ɔ maan, ɔ́ úka e naan y’a kwla jran kekle sa tɛ yolɛ mɔ w’a tru mɛn nga nun kpokpaa yɛ’n, i ɲrun. (2 Korɛntfuɛ Mun 4:7) Ɔ́ úka e ekun naan y’a lafi anannganman nguan nun tranlɛ asiɛ m’ɔ́ wá káci mɛn klanman’n nun’n, i su dan kpa. Nanwlɛ, like ɲɛnmɛn kpa yɛ e minndɛ i sɔ lɛ ɔ! Ɔ fata kɛ e si i sɔ liɛ’n i su ye naan e tu e klun e su Zoova mɔ i kunngba cɛ yɛ ɔ ti Ɲanmiɛn’n, afin i ti yɛ maan e kwla ɲan anannganman nguan’n niɔn.

16. ?Ngue like yɛ ɔ fata kɛ e kunndɛ kɛ e nin sran kpanngban kpa é yó i likawlɛ ɔ?

¹⁶ Yialɛ nga jue tofuɛ’n yiali mɛn wunmuan’n nun sran kpanngban kpa mun’n, be sɔli su klanman. I waan: ‘Amun uka min maan e manman Anannganman [Zoova, NW]. Amun maan e bo yo kun naan e yi i ayɛ.’ (Jue Mun 34:4) Zoova yia e kɛ e fa e wun wla nvlenvle’m be nunfuɛ nga be su sɔn kpa kɔ́ i ɲrun’n be nun wie, naan e mɛnmɛn i, yɛ e yi i ayɛ.

I nun flanlɛ

• ?Sran’n i wafa benin yɛle Zoova? ?Wafa sɛ yɛ kɛ e wun i nzuɛn’n i wlɛ’n, e ɲan su mmlusuɛ ɔ?

• ?Wafa sɛ yɛ e kwla uka sran uflɛ mun naan b’a si Zoova su ndɛ nanwlɛ’n niɔn?

• ?Kɛ be se kɛ be si Zoova i dunman’n naan be yo like nga ɔ jɔ i klun’n, i bo’n yɛle benin?

[Foto i su ndɛ, bue 14]

Klolɛ su, Zoova ‘trɛ i sa’n nun, ɔ man ninnge nga nguan o be nun’n be kwlaa be like ng’ɔ ju be’n’