LIKE SUANLƐ 26
?Ngue ti yɛ e fɛ-ɔ?
Kɛ sa wie’m be ju’n, wie liɛ’n e usa e wun kɛ ngue ti yɛ sa sɔ’m be ju-ɔ. Biblu’n tɛ kosan sɔ’n su weiin. Nanwlɛ, i sɔ’n yo e fɛ dan.
1. ?Ngue yɛ Satan yoli mɔ i ti yɛ e fɛ-ɔ?
Satan m’ɔ ti Suɛn Tɔnfuɛ’n ɔ jasoli Ɲanmiɛn wun. Ɔ kunndɛ kɛ ɔ́ síe sran mun. I sɔ’n ti’n, ɔ lakali Ɛvu. Yɛ ɔ yoli maan Adan nin Ɛvu be yoli ɲin kekle Ɲanmiɛn su. (Bo Bolɛ 3:1-5) Ɔ yoli maan Ɛvu buli i kɛ Zoova kunndɛman kɛ i liɛ yo ye. Ɔ seli kɛ, sɛ klɔ sran’m be diman Ɲanmiɛn i mmla’n su’n yɛ bé dí aklunjɔɛ-ɔ. Ɔ seli Ɛvu kɛ ɔ su wuman. I lɛ nun yɛ ɔ buali ato klikli’n niɔn. I sɔ’n ti’n, Biblu’n se kɛ Satan “ti ato buafuɛ, kpɛkun ɔ ti ato buafuɛ’m be si.”—Zan 8:44.
2. ?Ngue yɛ Adan nin Ɛvu be yoli-ɔ?
Zoova yoli Adan nin Ɛvu be ye dan. Ɔ seli be kɛ be kwla di Edɛnin fie’n i nun waka mma’m be kwlaa. Saan kunngba cɛ yɛ i waan nán be di-ɔ. (Bo Bolɛ 2:15-17) Sanngɛ ɔ nin i sɔ’n ngba’n, be fali ajalɛ kɛ bé dí waka mma sɔ’n. Ɛvu “tili i su mma’n wie dili.” I sin’n Adan “kusu dili” wie. (Bo Bolɛ 3:6) Be nɲɔn’n be yoli ɲin kekle Ɲanmiɛn su. Blɛ sɔ’n nun’n, fɔ nunman Adan nin Ɛvu be nun. Ɔ maan sa kpa yolɛ’n timan kekle be sa nun. I lɛ nun’n, be ɲinfu yɛ be yoli ɲin kekle Ɲanmiɛn su-ɔ. Be yoli sa tɛ, yɛ be waan be kplinman su kɛ Ɲanmiɛn sie be kun. Like sɔ mɔ be yoli’n ti’n be wa wunnin be ɲrun dan.—Bo Bolɛ 3:16-19.
3. ?Kɛ Adan nin Ɛvu be yoli sa tɛ’n i bo’n guali sɛ mannin e?
Kɛ Adan nin Ɛvu be yoli sa tɛ’n, fɔ wa trannin be nun. Ɔ maan fɔ sɔ’n wluli be mma’m be nun wie. Biblu’n kan Adan i ndɛ se kɛ ‘sran kunngba ti yɛ sa tɛ yolɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Yɛ wie’n wo sran’m be kwlaa be su.’—Rɔmunfuɛ Mun 5:12.
Sa nga ti yɛ e wun e ɲrun’n ɔ sɔnnin. Wie liɛ’n ɔ fin ajalɛ nga e bɔbɔ e fa’n annzɛ e kwla wun ajalɛ mɔ sran uflɛ fa’n i su afɛ. Wie liɛ kusu’n, sa’m be ju e su sa ngbɛn.—Kanngan Akunndanfuɛ’n 9:11 nun.
SI NDƐ’N NUN KPA EKUN
É wá fá e ɲin é síe i sa nga ti yɛ e si kɛ nán Ɲanmiɛn ti yɛ e wun e ɲrun’n i su. Kpɛkun wafa nga Ɲanmiɛn bu afɛ ng’ɔ o e su’n, é wá kɛ́n i ndɛ wie.
4. Sran nga ti yɛ e wun e ɲrun’n
Sran kpanngban be bu i kɛ Ɲanmiɛn yɛ ɔ sie mɛn wunmuan’n niɔn. ?Be ndɛ sɔ’n ti nanwlɛ? An bo VIDEO’N.
An kanngan Zaki 1:13 nin 1 Zan 5:19 nun, i sin’n an koko kosan yɛ’n i su yalɛ:
?Ɲanmiɛn ti yɛ e wun e ɲrun-ɔn?
5. Kɛ Satan sie sran mun’n wafa nga i bo’n gua’n
An kanngan Bo Bolɛ 3:1-6 nun, i sin’n an koko kosan yɛ’m be su yalɛ:
?Ato ndɛ benin yɛ Satan kannin-ɔn?—Nian ndɛ mma 4 nin 5 nun.
?Ngue ti yɛ e kwla se kɛ Satan waan Zoova kunndɛman kɛ klɔ sran’m be liɛ yo ye-ɔ?
?Ngue ti yɛ e kwla se kɛ Satan waan ɔ nunman nun kɛ Zoova sie sran mun naan b’a di aklunjɔɛ-ɔ?
An kanngan Akunndanfuɛ’n 8:9 nun, i sin’n an koko kosan yɛ’n i su yalɛ:
?Kɛ mɔ nán Zoova yɛ ɔ sie mɛn’n ti’n, sa benin yɛ e wun i-ɔ?
Fɔ nunman Adan nin Ɛvu be nun, yɛ be tran mɛn klanman kun nun. Sanngɛ be fali Satan i ndɛ’n su, yɛ be yoli ɲin kekle Zoova su.
Kɛ be yoli ɲin kekle Ɲanmiɛn su’n, sa tɛ yolɛ’n ɔ nin afɛ’n ɔ nin wie’n be bali mɛn’n nun.
Zoova wá núnnún sa tɛ’n, nin ɲrɛnnɛn’n, ɔ nin wie’n. Fɔ su tranman sran’m be nun kun. Kpɛkun bé kwlá trán mɛn klanman kun nun ekun.
6. E ndɛ lo Zoova
?Kɛ e wun e ɲrun’n i sɔ’n yo Ɲanmiɛn sɛ? Maan e nian ndɛ nga Famiɛn Davidi ɔ nin akoto Piɛli be kannin’n. An kanngan Jue Mun 31:7 nin 1 Piɛli 5:7 nun, i sin’n amun koko kosan yɛ’n i su yalɛ:
?Kɛ a si kɛ Zoova fɛ i ɲin sie i e su naan e ndɛ lo i’n, wafa sɛ yɛ i sɔ’n yo wɔ-ɔ?
7. Ɲanmiɛn wá yó maan e su sa’m be kwlaa bé wíe
An kanngan Ezai 65:17 nin Sa Nglo Yilɛ 21:3, 4 nun, i sin’n an koko kosan yɛ’n i su yalɛ:
?Kɛ a si kɛ Ɲanmiɛn wá yó maan e su sa’m be kwlaa bé wíe’n, wafa sɛ yɛ i sɔ’n yo wɔ-ɔ?
Nian nga wie
Kɛ Satan buali ato klikli’n, ɔ tɔnnin Zoova i suɛn. Yɛle kɛ ɔ yoli maan sran’m be bu i kɛ Zoova sieman sran mun kɛ ng’ɔ nin i fata’n sa. Ɔ maan kɛ Zoova wá yó maan e su afɛ’n be kwlaa bé wíe’n, sran’m bé wún i wlɛ kɛ Satan i ndɛ sɔ’n timan su. Bé wún i wlɛ kɛ Zoova i sielɛ liɛ’n yɛ ɔ ti kpa-ɔ. Zoova i dunman’n i sanwun yolɛ’n ɔ ti cinnjin kpa.—Matie 6:9, 10.
SRAN WIE’M BE WAAN: “Ɲanmiɛn bɔbɔ siesieli kɛ e wun e ɲrun.”
?Wafa sɛ yɛ á tɛ́ be su-ɔ?
NDƐ’N I KPƆLƐ BOLƐ
Satan m’ɔ ti Suɛn Tɔnfuɛ’n ɔ nin Adan nin Ɛvu be ti yɛ e wun e ɲrun andɛ-ɔ. E ndɛ lo Zoova yɛ ɔ́ wá yó maan e su afɛ’n kwlaa wíe.
Ndɛ’n i nun flanlɛ
?Ato ndɛ benin yɛ Satan kan kleli Ɛvu-ɔ?
?Wafa sɛ yɛ ɲin kekle nga Adan nin Ɛvu be yoli’n ɔ kan e wie-ɔ?
?Ngue ti yɛ e kwla se kɛ e ndɛ lo Zoova-ɔ?
NDƐ WIE MUN EKUN
Sa tɛ’n i su ndɛ nga Biblu’n kan’n.
Ndɛ nga Satan m’ɔ ti Suɛn Tɔnfuɛ’n kɛnnin i Edɛnin fie’n nun lɔ’n.
“?Ngue ti yɛ Ɲanmiɛn yaci sran’m be lɛ mɔ be wun ɲrɛnnɛn-ɔn?” (Sasafuɛ Tranwlɛ’n nun ndɛ)
Kosan cinnjin kun i su tɛlɛ.
“?Ngue ti yɛ Ɲanmiɛn yacili sran’m be lɛ mɔ be kunnin Zifu mun-ɔn?” (jw.org su ndɛ)
Sa nga ti yɛ ɲrɛnnɛn o mɛn’n nun’n i su like nga bian kun suannin’n.