Ɲanmiɛn klo kɛ amun yo i janvuɛ. ?Amun a bu i le kɛ an kwla yo nglo’n nin asiɛ’n be su sran danfuɛ’n i janvuɛ? Be flɛ Abraamun lalafuɛ sran’n Ɲanmiɛn i janvuɛ. (Zak 2:23) Biblu’n kan sran uflɛ wie mɔ be yoli Ɲanmiɛn i janvuɛ’n be ndɛ, ɔ maan ɔ yrali be su klanman kpa. Andɛ’n, asiɛ’n su nvlenvle kwlaa nun sran wie’m be yoli Ɲanmiɛn i janvuɛ. Amun kusu an kwla yo Ɲanmiɛn i janvuɛ wie.

Ɲanmiɛn i janvuɛ tralɛ’n ti kpa tra klɔ sran i janvuɛ tralɛ’n. Ɲanmiɛn sokpɛmɛn i gbanflɛn difuɛ le. (Jue Mun 18:26) Ɲanmiɛn i janvuɛ tralɛ’n ti kpa tra be wun ɲanlɛ. Sɛ aɲanbeunfuɛ kun wu’n, sran uflɛ mun yɛ bé dí i sika’n niɔn. Sanngɛ, be nga be nin Ɲanmiɛn be tra janvuɛ’n, be le be awlɛn su like mɔ sran fi kwlá faman-ɔn.—Matie 6:19.

Sran wie’m be kwla kunndɛ kɛ bé tánndán amun ɲrun naan amun yaci Ɲanmiɛn i su like suanlɛ. Amun janvuɛ wie annzɛ amun osufuɛ wie kwla yo i sɔ like bɔbɔ. (Matie 10:36, 37) Sɛ sran wie sri amun annzɛ ɔ fua amun ti’n, amun usa amun wun kɛ: ‘?Wan ɲrun dunman yɛ n kunndɛ ɔ, klɔ sran ɲrun annzɛ Ɲanmiɛn ɲrun ɔn?’ Amun bu ndɛ nga sin: ?Sɛ sran kun se amun kɛ amun yaci aliɛ dilɛ’n, amún kplín su? Ɔ si’ɛ! Ɔ fata kɛ amun di aliɛ naan amun a ka nguan nun. Sanngɛ Ɲanmiɛn kwla yo naan amun a ɲan anannganman nguan! I sɔ’n ti, nán amun yaci sran fi nun naan ɔ tanndan amun ɲrun naan amun yaci Ɲanmiɛn i su like suanlɛ.—Zan 17:3.

Janvuɛ i kpafuɛ nga amun kwla ɲɛn i’n, yɛle Ɲanmiɛn. Ɲanmiɛn klé amun wafa nga amún ɲán aunjuɛ nin fɔundi’n. Ɔ́ dé amun ninnge nga sran’m be lafi su mɔ be timan nanwlɛ’n ɔ nin ayeliɛ tɛtɛ’m be sa nun. Ɔ́ síe i su amun Ɲanmiɛn srɛlɛ’n i bo. Ɔ́ úka amun naan amun di aklunjuɛ naan amun fa amun wla guɛ i su. (Jue Mun 71:5; 73:28) Sɛ ɲrɛnnɛn tɔ amun su’n, Ɲanmiɛn súan amun bo. (Jue Mun 18:19) Kpɛkun Ɲanmiɛn fá anannganman nguan’n cɛ́ amun.—Rɔmfuɛ Mun 6:23.

Sɛ an fa amun wun mantan Ɲanmiɛn’n, amun nin Ɲanmiɛn i janvuɛ’m be afiɛn mántan wie. Be kusu bé káci amun janvuɛ wie. Nanwlɛ, be nin amun yó kɛ aniaan sa. Amun Ɲanmiɛn su ninnge klelɛ, nin amun ukalɛ, ɔ nin amun fanngan wlalɛ’n, ɔ́ yó be fɛ.

Nán e wiengu tukpɛ yɛle Ɲanmiɛn. Kɛ mɔ amun kunndɛ kɛ amun nin Ɲanmiɛn bé trá janvuɛ ti’n, nán amun ɲin kpa ndɛ kpɔlɛ cinnjin nga su. E nin Ɲanmiɛn e janvuɛ tralɛ’n timan kɛ e wiengu tukpɛ janvuɛ tralɛ sa. I kpɛnngbɛn’n ɔ nin i ngwlɛlɛ’n tra e lele, kpɛkun ɔ le tinmin tra e lele. I yɛ ɔ le atin Sie e ɔ. I ti’n, sɛ e kunndɛ kɛ é yó i janvuɛ’n, ɔ fata kɛ e tie ndɛ ng’ɔ kan’n, naan e yo like ng’ɔ se e kɛ e yo’n. I sɔ’n yó kpa mán e titi.—Ezai 48:18.

Sɛ amun kunndɛ kɛ amún yó Ɲanmiɛn i janvuɛ’n, ɔ fata kɛ amun suɛn i su like. ?Amun janvuɛ’m be siman amun dunman’n, yɛ be fa flɛman amun? Be yo i sɔ. Ɲanmiɛn kusu klo kɛ amun si i dunman’n naan amun fa flɛ i wie. Ɲanmiɛn i dunman’n yɛle Zoova. (Jue Mun 83:18, NW; Matie 6:9, NW) Kusu, ɔ fata kɛ amun suan like ng’ɔ klo i’n ɔ nin ng’ɔ klomɛn i’n. Maan amun si sran nga be ti i janvuɛ’n ɔ nin be nga be ti i kpɔfuɛ’n. Ɔ́ cɛ́ kɔ́’n, yɛ be si sran ɔn. Biblu’n se kɛ sɛ e fa blɛ e suan Zoova i su like’n, i sɔ’n ti ngwlɛlɛ ayeliɛ.—Efɛzfuɛ Mun 5:15, 16.

Ɲanmiɛn i janvuɛ’m be yo like ng’ɔ klo i’n. Amun bu amun janvuɛ’m be akunndan be nian. ?Sɛ amun yo be tɛtɛ’n naan amun yo be like nga be kpɔ i’n, bé ká amun janvuɛ titi? Cɛcɛ! I kunngba’n yɛle Ɲanmiɛn liɛ’n, sɛ amun klo kɛ amún yó i janvuɛ’n, ɔ fata kɛ amun yo like ng’ɔ klo i’n.—Zan 4:24.

Nán Ɲanmiɛn sulɛ wafa kwlaa yɛ ɔ kwla uka amun naan amun nin Ɲanmiɛn b’a tra janvuɛ-ɔ. Zezi m’ɔ ti Ɲanmiɛn i janvuɛ kpafuɛ’n kannin atin nɲɔn ndɛ. Atin kun ti tɛtrɛ kpɛkun i su sran’m be sɔnnin. Atin sɔ’n i awieliɛ’n yɛle wie’n. Atin kunfuɛ’n ti kaan kpɛkun sran nga be fa su’n b’a sɔnman. Atin sɔ’n i awieliɛ’n yɛle anannganman nguan’n. I bo’n yɛle kɛ sɛ amun kunndɛ kɛ amún yó Ɲanmiɛn i janvuɛ’n, ɔ fata kɛ amun su i kɛ ng’ɔ nin i fata sa.—Matie 7:13, 14.

Sɛ amun kanngan Biblu’n nun’n, amún kwlá súan Zoova i su like. I osu w’a cɛ kpa, Ɲanmiɛn kpali sran wie mun naan be klɛ i klun akunndan’n be sie. Ndɛ nga be klɛli’n, yɛ ɔ o Biblu’n nun-ɔn. Andɛ’n, sɛ e kanngan Biblu’n nun’n, é sí Ɲanmiɛn i su like. Kɛ mɔ Zoova i nuan ndɛ’n yɛ ɔ o Biblu’n nun ti’n, be flɛ i wie kɛ Ɲanmiɛn Ndɛ’n. E kwla lafi ndɛ nga Biblu’n kan’n su, afin Zoova buaman ato le. ‘Ɲanmiɛn kwlá buaman ato le.’ (Ebre Mun 6:18) Ɲanmiɛn Ndɛ’n ti nanwlɛ.—Zan 17:17.

Ninnge nga Ɲanmiɛn man e’n, be nun cinnjin kpa kun yɛle Biblu’n. Ɔ ti kɛ lɛtri mɔ siɛ kpa kun m’ɔ klo i mma mun’n, ɔ klɛ man be’n sa. Ɔ kan nda nga Ɲanmiɛn tɛli i kɛ asiɛ’n káci lika klanman kpa kun mɔ i nun tranlɛ’n yó fɛ’n i ndɛ. Ɔ kan like ng’ɔ yoli i laa’n, ɔ nin ng’ɔ su yo i dɔ nga su’n, ɔ nin ng’ɔ́ wá yó i e ɲrun lɔ fá mɛ́n i mma nga be lafi i su’n, i ndɛ. Asa ekun’n, ɔ kle e like nga e ko yo naan asamian nun’n, y’a wun e wun fɛ naan y’a ɲan aunjuɛ’n.—2 Timote 3:16, 17

Zoova i Lalofuɛ’m be ti Ɲanmiɛn i janvuɛ, bé úka amun naan amun a wun ninnge nga Biblu’n kle’n be bo. Amun se be kɛ amun kunndɛ kɛ amun suan Biblu’n like. Be su deman amun i ti sika. (Matie 10:8) Kusu amun kwla kɔ be asɔnun aɲia’m be bo wie. Be asɔnun sua nga be flɛ be Ɲanmiɛn Sielɛ Blɛ sua’n, be nun yɛ be yia-ɔ. Sɛ amun kɔ asɔnun aɲia sɔ’m be bo’n, amún kɔ́ amun ɲrun ndɛndɛ kpa Ɲanmiɛn i silɛ’n nun.

Ninnge nga Ɲanmiɛn yili be’n be kwla uka amun i silɛ’n nun. Amun nian, Biblu’n se kɛ: ‘Ɲanmiɛn yili nglo nin asiɛ’n.’ (Bo Bolɛ 1:1) Kɛ Zoova yili “nglo’n,” ɔ yili wia’n. ?Ngue like yɛ wia’n kle e Ɲanmiɛn su ɔ? Ɔ kle e kɛ Zoova le tinmin dan kpa. I kunngba cɛ yɛ ɔ kwla yi like ng’ɔ le ta kɛ wia’n sa’n niɔn. Kusu ɔ kle e wie kɛ Zoova ti ngwlɛlɛfuɛ. Afin ngwlɛlɛ yɛ ɔ fata kɛ be fa yi like kɛ wia sa, m’ɔ yo maan lika’n lo, m’ɔ kpaja kpɛkun m’ɔ nuanman le’n niɔn.

Ninnge nga Zoova yili be’n be kle kɛ ɔ klo e

Mɛn klanman’n su yoman kɛ andɛ mɛn nga e o nun yɛ’n sa. Ɲanmiɛn kunndɛman kɛ lika’n sanngan naan awlabɔɛ, nin ɲrɛnnɛn nin sa kekleekle’m be tran asiɛ’n su. Cɛn wie lele, Ɲanmiɛn wá yó maan asiɛ’n káci Mɛn klanman kun. ?Ngue like yɛ Mɛn klanman’n i nun tranlɛ’n fɛ́ i ɔ? E nian ndɛ nga Biblu’n kan’n:

Sran kpa mun. Mɛn klanman’n yó Ɲanmiɛn i janvuɛ’m be liɛ’n. Bé yó ninnge kpa bé mán be wiengu. Bé nánti Ɲanmiɛn i atin seiin’n i su.—Nyanndra Mun 2:21.

Aliɛ’n bú. Mɛn klanman nun’n, awe su tranman lɛ kun. Biblu’n se kɛ: “Maan ble’n [yɛle kɛ aliɛ’n] ɔ su lele ɔ bu mɛn’n nun.”—Jue Mun 72:16.

Sua klanman mun ɔ nin junman nga ɔ jɔ be klun’n. Kɛ asiɛ’n wá káci Mɛn klanman’n, awlobo kun ɲɛ́n i tiaun sua. Sran kwlaa dí junman ng’ɔ́ mɛ́n i aklunjuɛ kpa’n.—Ezai 65:21-23.

Asiɛ wunmuan’n su fɔundi. Sran fi su diman alɛ kun, naan se kɛ ɔ́ wú alɛ nun. Ɲanmiɛn Ndɛ’n se kɛ: “[Ɲanmiɛn] w’a yo maan alɛ kunlɛ’n w’a wie.”—Jue Mun 46:9, 10.

Aunkpinndiɛ. Biblu’n se kɛ: “[Mɛn klanman nun] sran fi su seman kɛ: ‘N kpinndinman.’” (Ezai 33:24). Kpɛkun, sran fi su yoman cɛcɛwafuɛ, annzɛ aɲinsifuɛ, annzɛ sutrefuɛ, annzɛ bobofuɛ.—Ezai 35:5, 6.

Ɲrɛnnɛn, awlabɔɛ nin wie’n be su tranman lɛ kun. Ɲanmiɛn Ndɛ’n se kɛ: ‘Wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun. Laa ninnge sɔ’m be su tranman lɛ kun.’—Sa Nglo Yilɛ 21:4.

Klunwifuɛ’m bé wíe núnnún. Zoova se kɛ: “Klunwifuɛ’m be liɛ’n, bé trá be mɛn nga nun bé kɔ́. Bé tú gblɛfuɛ’m be bo.”—Nyanndra Mun 2:22.

Klɔ sran’m bé kló be wiengu kpɛkun bé bú i sran. Ndɛ kwlɛ dilɛ, ɲrɛnnɛn wunlɛ, be ɲin m’ɔ yiman like’n, ɔ nin sran kpɔlɛ, be su tranman lɛ kun. Klɔ sran’m be bo yó kun kpɛkun bé nánti Ɲanmiɛn i atin seiin’n su.—Ezai 26:9.

Ninnge tɛtɛ nga e wun be asiɛ’n su siɛn’n, be kle kɛ Mɛn klanman’n w’a mantan koko. Biblu’n seli kɛ é dún mmua é wún ɲrɛnnɛn ka naan Mɛn klanman’n w’a ba. E o i sɔ blɛ nun siɛn’n! Ninnge nga Biblu’n kannin be ndɛ kɛ bé wá jú’n, be nun wie mun yɛ:

Alɛ dandan mun. “Nvle kun wa jao nvle kun wun, yɛ famiɛn kun wa jao i wiengu famiɛn kun wun.” (Matie 24:7). Ndɛ sɔ mɔ Ɲanmiɛn nuan ijɔfuɛ’n kannin’n, ɔ kpɛnnin su. Kɛ ɔ fɛ i afuɛ 1914 nun’n, alɛ dandan nɲɔn ɔ nin i sin alɛ kpanngban wie’m be tɔli asiɛ’n su. Sran miliɔn kpanngban’m be wuli alɛ sɔ’m be nun.

Tukpacɛ i trulɛ. ‘Lika sunman be nun’n, tukpacɛ’ wá sɔ́n (Lik 21:11). ?I sɔ’n yoli nanwlɛ? Ɛɛn. Kansɛli, awlɛn ba ya, tanngɔ ufue, jɛkuajo, sida, ɔ nin tukpacɛ uflɛ wie’m b’a kun sran kpanngban kpa.

Aliɛ mɔ be ɲɛnmɛn i’n. Asiɛ wunmuan’n su sran wie’m be ɲanman aliɛ kaka be diman. Awe’n ti afuɛ kwlaa nun’n, sran kpanngban be wu. I sɔ’n ti nzɔliɛ kun ekun m’ɔ kle kɛ Mɛn klanman’n w’a mantan koko-ɔ. Afin Biblu’n se kɛ: “Awe wá kpɛ́n.”—Mark 13:8.

Asiɛ’n i kejelɛ’n. “Lika wie’m be nun’n [...] asiɛ’n kéje.” (Matie 24:7). Ngalɛ’n kusu kpɛnnin su wie e blɛ liɛ’n nun. Kɛ ɔ fɛ i afuɛ 1914 nun’n, sran miliɔn kun tra su be wuli asiɛ’n i kejelɛ’n be nun.

Klunwifuɛ mun. Sran’m bé yó ‘sika klofuɛ, bé bú be bɔbɔ be wun akunndan [...] bé kló mɛn dilɛ tra Ɲanmiɛn.’ Ba’m be ‘ɲin su yiman be si nin be nin mun.’ (2 Timote 3:1-5). ?Amun bɔbɔ be nian, ɔ timan su kɛ i sɔ sran’m b’a sɔn andɛ? Be ɲin yiman Ɲanmiɛn, kpɛkun be kle be nga be kunndɛ kɛ bé súan Ɲanmiɛn i su like’n be yalɛ.

Sran kunlɛ. “Sa tɛtɛ’n” yolɛ’n wá sɔ́n (Matie 24:12). Atrɛkpa’n, amun kwla wun i kɛ sran kunlɛ’n w’a sɔn w’a tra afuɛ nga be sinnin lɛ’n be nun liɛ’n. Lika kwlaa nga sran wo’n, be kwla wuɛ i, be kwla lɛkɛ i, annzɛ be kwla wɔ i laliɛ.

Ninnge wunmuan ngalɛ’n be kle kɛ Ɲanmiɛn Sielɛ’n w’a mantan koko. Biblu’n se kɛ: ‘Kɛ amun wun kɛ sa sɔ’m be su yo’n, an si kɛ Ɲanmiɛn Sielɛ’n w’a mantan koko.’ (Lik 21:31). ?Ngue yɛle Ɲanmiɛn Sielɛ’n? Yɛle Ɲanmiɛn Kpli i ɲanmiɛn su lɔ awa m’ɔ́ fá Mɛn klanman’n bá asiɛ’n su wa’n. Ɲanmiɛn Sielɛ’n wá núnnún klɔ sran’m be awa mun, kpɛkun ɔ́ trán be osu nun.—Daniɛl 2:44.

Zoova su manman atin kɛ sa tɛ yofuɛ’m be saci Mɛn klanman’n. Saan i janvuɛ mun cɛ yɛ bé trán nun ɔn. ?Ngue yɛ ɔ́ ɲán sran tɛfuɛ mun-ɔn? Sɛ amun waan amún sí i’n, amun bu Nowe i ndɛ’n i akunndan. Nowe dili i blɛ liɛ’n i afuɛ akpiakpi yɛ ɔ o yɛ. Ɔ yoli sran kpa m’ɔ miɛnnin i ɲin yoli Zoova i klun sa titi-ɔ. Sanngɛ i blɛ sufuɛ’m be yoli ninnge tɛtɛ mun. I ti’n, Zoova seli Nowe kɛ ɔ́ wá tɔ́ nzue fá núnnún klunwifuɛ sɔ’m be ngba. Ɔ seli Nowe kɛ ɔ bobo mmeli kun naan kɛ nzue’n wá yí dí lika’n, ɔ nin i awlofuɛ’m b’a wuman.—Bo Bolɛ 6:9-18.

Nowe nin i awlofuɛ’m be boboli mmeli kun. Nowe boli nzue dan’n i tɔlɛ’n i jɔ kleli sran mun, sanngɛ b’a tieman. Ninnge tɛtɛ mun yɛ be yo be sa titi-ɔ. Kɛ be wieli mmeli’n bobo’n, Nowe fali nnɛn mun wluli nun, yɛ ɔ nin i awlofuɛ’m be wluli nun wie. Zoova maan nzue tɔli dan kpa. Nzue’n tɔli cɛn ba klonglo 40, kɔnguɛ nin wia nun. Nzue’n dili asiɛ wunmuan’n.—Bo Bolɛ 7:7-12.

Klunwifuɛ’m be wuli, sanngɛ Nowe nin i awlofuɛ’m be ɲannin be ti. Zoova maan nzue’n w’a diman be. Be fiteli nun yɛ be trannin asiɛ mɔ klunwifuɛ nunman su kun’n, i su. (Bo Bolɛ 7:22, 23) Biblu’n se kɛ blɛ kun wá jú’n, be nga be waan be yoman sa kpa’n Zoova wá núnnún be ekun. Sran kpa’m be su wuman. Bé ɲán anannganman nguan Mɛn klanman’n nun asiɛ’n su.—2 Piɛr 2:5, 6, 9.

Andɛ sran kpanngban be yo ninnge tɛtɛ mun. Mɛn wunmuan’n w’a tɔ nvati. Zoova te sunman i Lalofuɛ mun kɛ be ko bo ndɛ’n i jɔ be kle sran mun. Sanngɛ sran’m be nun sunman lika be kloman kɛ bé tíe Zoova i ndɛ’n. Be waan be kaciman be ayeliɛ’n. Like nga Ɲanmiɛn waan ɔ ti tɛ’n annzɛ ɔ ti kpa’n, be waan be fɛmɛn i lifuɛ’n su. ?Ngue sa yɛ ɔ́ ɲán i sɔ sran mun-ɔn? ?Cɛn wie lele bé káci? Be nun sunman lika be su kaciman le. Cɛn nga klunwifuɛ’m bé núnnún mɔ be su ɲanman nguan kun’n, ɔ su ba.—Jue Mun 92:8.

Asiɛ’n su nunnunman, ɔ́ káci Mɛn klanman. Be nga be kaci Ɲanmiɛn i janvuɛ’n, bé ɲán anannganman nguan Mɛn klanman’n nun asiɛ’n su.—Jue Mun 37:29.

Ɲanmiɛn i kpɔfuɛ’m be ti’n yɛle Satan. Ɔ ti aolia nun sran, ɔ yoli ɲin kekle Zoova su. Satan te yo Zoova i kpɔfuɛ, kpɛkun ɔ fa sa kekleekle yi i sran’m be su. Satan ti klunwifuɛ kpa. Ɔ ti gblɛfuɛ nin sran kunfuɛ.—Zan 8:44.

Aolia nun sran wie’m be suli Satan su be yoli ɲin kekle Ɲanmiɛn su. Biblu’n flɛ be mmusu. Mmusu’m be ti klɔ sran’m be kpɔfuɛ wie kɛ Satan sa. Be klo kɛ bé yó sran’m be tɛtɛ. (Matie 9:32, 33; 12:22) Zoova wá núnnún Satan nin i mmusu mun mlɔnmlɔn. Blɛ nga be fa kle sran’m be ɲrɛnnɛn’n w’a sɔnman kun.—Sa Nglo Yilɛ 12:12.

Sɛ amun klo kɛ amún yó Ɲanmiɛn i janvuɛ’n, ɔ fataman kɛ amun yo Satan i klun su like. Satan nin i mmusu’m be kpɔ Zoova. Be ti Ɲanmiɛn i kpɔfuɛ, kpɛkun be kunndɛ kɛ bé yó naan amun yo Ɲanmiɛn i kpɔfuɛ wie. Ɔ fata kɛ amun kle sran nga amun kunndɛ dunman i ɲrun’n, Satan-ɔn annzɛ Zoova-ɔ. Sɛ amun klo kɛ amún ɲán anannganman nguan’n, amun kle kɛ amún yó Ɲanmiɛn i klun sa. Satan i gblɛ ng’ɔ fa laka sran mun’n be sɔnnin. Sran sunman lika be yaci be wun lɛ maan Satan laka be. —Sa Nglo Yilɛ 12:9.

Zezi Klist ti Zoova Wa nin i awlɛn su janvuɛ kpafuɛ’n. I nun mɔ Zezi nin a baman asiɛ’n su wa’n, m’ɔ o ɲanmiɛn su lɔ’n, ɔ ti aolia nun sran, ɔ le tinmin. (Zan 17:5) Kpɛkun ɔ bali asiɛ’n su wa sran’m be Ɲanmiɛn i su nanwlɛ klelɛ. (Zan 18:37) Kusu kɛ ɔ ko yo naan klɔ sran aɲinyiɛfuɛ’m b’a ɲan be ti sa tɛ’n nin wie’n be sa nun ti’n, ɔ fɛli i nguan’n mannin. (Rɔmfuɛ Mun 6:23) Siɛn’n, Zezi yɛ ɔ ti Ɲanmiɛn Sielɛ’n m’ɔ ti ɲanmiɛn su lɔ awa’n ng’ɔ́ wá yó maan asiɛ’n káci mɛn klanman’n, i su famiɛn’n niɔn.—Sa Nglo Yilɛ 19:16.

Anzi’m be kusu be ti Zoova i janvuɛ wie. Anzi’m b’a tranman asiɛ’n su wa kɛ klɔ sran sa. Ɲanmiɛn dun mmua yili be ɲanmiɛn su lɔ ka naan w’a yi asiɛ’n. (Zɔb 38:4-7) Anzi’m be ti akpi sɔ lele akpi. (Daniɛl 7:10) Ɲanmiɛn i janvuɛ sɔ’m be klo kɛ sran’m be suan Zoova i su nanwlɛ’n.—Sa Nglo Yilɛ 14:6, 7.

Ɲanmiɛn le janvuɛ asiɛ’n su wa wie, ɔ flɛ be i lalofuɛ mun. Kɛ bé dí jɔlɛ’n, lalofuɛ’n i like ng’ɔ si i sran’n i su annzɛ sa’n i su’n, yɛ ɔ kan-ɔn. Zoova i Lalofuɛ’m be kle be wiengu mun like nga be si i Zoova ɔ nin i klun sa’n be su’n. (Ezai 43:10, NW) Kɛ anzi’m be liɛ’n sa’n, lalofuɛ sɔ’m be klo kɛ bé úka amun naan amun suan Zoova i su ndɛ nanwlɛ’n. Be klo kɛ amun yo Ɲanmiɛn i janvuɛ wie.