Blɛ mɔ amun te yo gbanflɛn nin talua’n, maan amun wla kpɛn amun yifuɛ’n su
‘Blɛ mɔ a te yo gbanflɛn’n, maan ɔ wla kpɛn ɔ yifuɛ’n i su.’—AKU. 12:1.
1. ?Wafa sɛ yɛ Zoova kle kɛ ɔ lafi i sufuɛ gbanflɛn nin talua’m be su ɔ?
GBANFLƐN nin talua nga be ti Klistfuɛ’n, Zoova bu be sran sakpa. Yɛ, ɔ fa be sunnzun nglɛmun bɔlɛ m’ɔ gua mɔ lika’n yo fɔun. Ɔ seli kɛ, kɛ i wa Klist wá ‘yíɛyíɛ i alɛ kunfuɛ’ mun’n, gbanflɛn nin talua’m be bɔbɔ be klunklo “bé bá,” bé wá dí i junman’n. (Jue. 110:3) E blɛ nga nun mɔ sran’m be buman Ɲanmiɛn like fi’n, mɔ be bu be bɔbɔ be wun akunndan yɛ be klo sika’n, yɛ ndɛ sɔ’n kpɛn su ɔ. Zoova si kɛ i sufuɛ gbanflɛn nin talua’m be su yoman kɛ sran nga’m be sa. ?Gbanflɛn nin talua mun, amun wunman kɛ Zoova lafi amun su’n?
2. ?Ngue yɛ sran nga i wla kpɛn Zoova su’n, ɔ yo ɔ?
2 Kɛ Ɲanmiɛn wun kɛ gbanflɛn nin talua’m be wla kpɛn i su’n, i fɛ m’ɔ yo i i’n, amun bu i akunndan be nian. (Aku. 12:1) Sanngɛ, nán be wla m’ɔ kpɛn Ɲanmiɛn su sa ngbɛn’n i ndɛ yɛ e kan ɔn. Sran nga i wla kpɛn Ɲanmiɛn su’n, ɔ yi i nglo i nzuɛn’n nun. Yɛle kɛ, ɔ yo like ng’ɔ jɔ Ɲanmiɛn klun’n. Cɛn kwlaa, ɔ nanti i mmla’m be su. Asa ekun’n, ɔ fɛ i wla’n kwlaa gua Zoova su, afin ɔ si kɛ Zoova kunndɛ kɛ i liɛ yo ye. (Jue. 37:3; Eza. 48:17, 18) ?Gbanflɛn nin talua mun, kɛ amun nin amun yifuɛ’n amun afiɛn’n ti sɔ ɔ?
“Anannganman i su yɛ lafi ɔ”
3, 4. ?Wafa sɛ yɛ Zezi kleli kɛ ɔ fɛ i wla’n kwlaa gua Zoova su ɔ? ?Ngue ti yɛ ɔ ti cinnjin kpa kɛ andɛ e fa e wla’n gua Zoova su ɔ?
3 Kɛ be se kɛ sran lafi Ɲanmiɛn su’n, yɛle Zezi liɛ’n. Nyanndra Mun 3:5, 6 waan: ‘Nán lafi ɔ bɔbɔ wɔ akunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman, yɛ bo ɔ. Sɛ a bo i dunman’n, ɔ́ bó ɔ ɲrun atin’n.’ Kɛ nga e fa kɛnngɛn i lɛ’n, i sɔ yɛ Zezi yoli ɔ. Yɛle kɛ, kɛ be yoli i batɛmu w’a cɛman, Satan ko fali mɛn’n i famiɛn diwlɛ’n kleli i naan ɔ́ lɛ́kɛ i. (Lik 4:3-13) Sanngɛ, Satan w’a ɲɛnmɛn i. Afin, Zezi si kɛ ‘sran nga m’ɔ kɛn i wun ase mɔ i ɲin yi Anannganman’n, ɔ ɲɛn i wun. Sran wun i ɔ, i ɲin yi i. Ɔ cɛ.’—Nya. 22:4.
4 Andɛ sran’m be ɲin yiman like, be bɔbɔ be wun akunndan yɛ be bu ɔ. I lɛ nun’n, sɛ e nian Zezi i ajalɛ’n su’n, yɛ e liɛ yó ye ɔ. Kusu nán amun wla fi su kɛ Satan o lɛ. Ɔ kunndɛman kɛ Zoova i sufuɛ’m be ka atin kaan fuɛ’n su naan be ɲan nguan. I sɔ’n ti’n, like kwlaa ng’ɔ kwla yo naan b’a fa atin dan su naan be liɛ w’a wie mlɔnmlɔn’n, yɛ ɔ fa sie be ɲrun ɔn. Sanngɛ, nán amun lo amun wun mɛn i! Amun jran kekle kpa kɛ amun wla kpɛ́n amun yifuɛ’n su. Amun fa amun wla’n kwlaa guɛ i su. I liɛ’n, amún ɲán “nguan sakpa” mɔ i ɲanlɛ’n w’a mantan koko’n.—1 Tim. 6:19.
Amun yo ngwlɛlɛfuɛ!
5. ?Kɛ amun bu wafa nga andɛ mɛn’n wá yó’n i akunndan’n, ɔ yo amun sɛ?
5 Gbanflɛn nin talua nga be wla kpɛn be yifuɛ’n su’n, be si ngwlɛlɛ tra be wiengu mun. (An kanngan Jue Mun 119:99, 100 nun.) Kɛ mɔ be nin Zoova yɛ be nanti’n ti’n, be wun i wlɛ kɛ ɔ ka kaan sa’n, mɛn’n wíe. Zoova i Lalofuɛ’m be ngunmin cɛ yɛ be wun i wlɛ sɔ ɔ. Kannzɛ amun te yo bakan’n, sanngɛ amun wun kɛ ngokoɛ’n kun sran’m be kpo. Asa ekun’n, amun wun kɛ lika’n bɔn. Yɛ asiɛ wunmuan’n i su mɔ lo dan’n, ɔ nin bo mɔ be su wie’n, ɔ nin sa wie ekun mɔ be kan be ndɛ’n, amun a ti be ndɛ le. Sa kwlaa ngalɛ’m be ti’n, sran’m be wla bo dan. Sanngɛ, Zoova i Lalofuɛ’m be liɛ’n, be wun be bo. Be wun i wlɛ kɛ, i sɔ’n kle kɛ Satan i mɛn’n su wa wie.—Ngl. 11:18.
6. ?Wafa sɛ yɛ gbanflɛn nin talua wie’m be mlinnin ɔn?
6 Ɔ nin i sɔ ngba’n, gbanflɛn nin talua wie’m be bu i kɛ e ɲrun te o mmua. Ɔ maan, be yaci be wun su nianlɛ. Nanwlɛ, i sɔ’n kpɛ awlɛn dan. (2 Piɛ. 3:3, 4) Wie’m be kusu, be nin sran tɛ san nun, yɛ be fa bian nin bla nna mɔ be fa fite nzra nun’n, be yiyi be ɲin su. Ɔ maan, be yo sa tɛ dan. (Nya. 13:20) ?Nanwlɛ, siɛn mɔ e ɲrun w’a ka koko’n, blɛ liɛ yɛ e nin Ɲanmiɛn é kó tí nun ɔn? I sɔ’n ti’n, maan e fa sa nga e tu e wun fɔ. Afuɛ nga be flɛ i 1473 nun ka naan y’a ju Zezi blɛ su’n, kɛ Izraɛlifuɛ’m be juli mɛn nga Ɲanmiɛn seli kɛ ɔ́ fá mán be’n i tiwa’n, yɛ sa sɔ’n juli ɔ. Kɛ ɔ́ yó sɔ’n nn be o Moabu lika kpɛtɛkplɛɛ nun.
Be tɔli mɛn’n i tiwa
7, 8. (a) ?Ngue yɛ Satan fa sieli i Izraɛlifuɛ’m be ɲrun Moabu lika kpɛtɛkplɛɛ nun lɔ ɔ? (b) ?Ngue yɛ andɛ ɔ fa sie i sran’m be ɲrun ɔn?
7 Kɛ ɔ fin lalaa’n, Satan i ɲin ci Izraɛlifuɛ mun. Mɛn mɔ Ɲanmiɛn seli kɛ ɔ́ fá mán be’n, ɔ kunndɛman kɛ be ɲɛn i. I sɔ’n ti’n, ɔ sinnin Balaamu lika naan ɔ́ bó Izraɛlifuɛ’m be sannzan. Kɛ i sɔ’n kpili ase’n, ɔ ko fali like tɛ kpa uflɛ sieli Izraɛlifuɛ’m be ɲrun naan be nin Zoova be afiɛn sáci. Yɛle kɛ, ɔ yoli naan Moabu bla’m be ko laka Izraɛlifuɛ mun. I lɛfuɛ’n, Satan ɲannin be. Afin, be nin Moabu bla’m be boli tekle yɛ be sɔli amuin nga be flɛ i Baal-Pɛɔr’n! Ɔ maan, Izraɛlifuɛ 24.000 be wuli. Sanngɛ nn, be o mɛn mɔ Ɲanmiɛn seli kɛ ɔ́ fá mán be mɔ be yɛyɛ i’n, i tiwa. ?I sɔ’n timan ɲrɛnnɛn ngbɛn?—Kal. 25:1-3, 9.
8 Andɛ kusu’n, e o mɛn mɔ Ɲanmiɛn seli kɛ ɔ́ fá mán e’n m’ɔ ti kpa dan’n, i tiwa. Satan kusu w’a kaciman. Ɔ te fa bla kunndɛlɛ sukusuku’n te sie i Ɲanmiɛn i nvle nunfuɛ’m be ɲrun. I lɛ nun’n, andɛ mɛn’n w’a saci dan. Ɔ maan, sran mɔ b’a jaman be wun mɔ be si sua’n, ɔ nin yasua mɔ be kunndɛ be wiengu yasua’n, annzɛ bla mɔ be kunndɛ be wiengu bla’n, sran’m be buman be sa tɛ kun. Be waan sran kun liɛ ng’ɔ klo i yɛ ɔ yo ɔ. Ɔ maan, e niaan bla kun seli kɛ: “Sɛ ɔ timan kɛ awlo lɔ nin asɔnun lɔ e kɛn i ndɛ kɛ yasua annzɛ bla mɔ be kunndɛ be wiengu’n, ɔ nin sran mɔ b’a jaman be wun mɔ be si sua’n be ti sa tɛ Ɲanmiɛn ɲrun’n, nn ba’m be siman sɔ.”
9. ?Blɛ mɔ gbanflɛn nin talua’m be ɲin tran bla nin bian kunndɛlɛ su dan’n, ngue yɛ be kwla yo ɔ?
9 Gbanflɛn nin talua mɔ be wla kpɛn be yifuɛ’n su’n, be si kɛ Ɲanmiɛn yɛ ɔ yili yasua’n nin bla’n kɛ be si sua naan be wu ba ɔ. Asa ekun’n, be si kɛ sran nga b’a ja be wun’n, yɛ Ɲanmiɛn man be atin kɛ be si sua ɔ. (Ebr. 13:4) Sanngɛ, blɛ mɔ be ti gbanflɛn nin talua’n, be ɲin tran bla nin bian kunndɛlɛ’n su dan. Ɔ maan, be awlɛn tralɛ’n yo kekle. ?Gbanflɛn nin talua mun, sɛ ɔ yo amun sɔ’n, ngue yɛ amun kwla yo ɔ? Amun srɛ Zoova kpa naan ɔ fa amun ɲin sie i like kpa su. Be nga be tu be klun be srɛ sɔ’n, Zoova tɛ be su titi. (An kanngan Lik 11:9-13 nun.) Asa ekun’n, maan amun nin amun wiengu mun an koko yalɛ mɔ sran ti ɔ, ɔ yo sran’n. Sɛ amun yo sɔ’n, amun akunndan’n su tranman bla annzɛ bian kunndɛlɛ’n su.
Amun bu like nga amún wá yó’n i akunndan kpa!
10. ?Akunndan tɛ benin yɛ ɔ fataman kɛ e bu ɔ? ?Kosan benin yɛ e kwla fa usa e wun ɔn?
10 Like kun nga ti yɛ gbanflɛn nin talua nga be suman Ɲanmiɛn’n be kwlá traman be awlɛn mɔ be bo wlaka’n, yɛle kɛ ‘Ɲanmiɛn yiman sa nglo kleman’ be. Yɛle kɛ, be siman Ɲanmiɛn i atin’n, be ɲrun lɔ ti paloo. (Nya. 29:18) Be yo kɛ laa Izraɛlifuɛ mɔ be yacili Ɲanmiɛn sulɛ’n sa. Yɛle kɛ, be ‘klun ti jɔwa, yɛ able yɛ be si ɔ. Be di nnɛn, yɛ be nɔn nzan.’ (Eza. 22:13) Nán amun ɲin blo be wun. Sanngɛ, amun ɲin tran like kpa mɔ Ɲanmiɛn seli kɛ ɔ́ fá mɛ́n i sufuɛ nanwlɛfuɛ mun’n, i su titi. ?Amun kunndɛman kɛ mɛn klanman’n ju ndɛndɛ? Sɛ ɔ ti sɔ’n, Biblu’n waan ‘e yo sa ng’ɔ ti i nuan su’n. E yo sɔ naan e minndɛ cɛn kpa nga e wla o su’ mɔ Zoova fa sie e ɲrun’n. ?Amun mian amun ɲin be yo sɔ? (Tit 2:12, 13) Wafa nga amún tɛ́ kosan sɔ’m be su’n, yɛ maan amún wún like nga amún yó’n niɔn.
11. ?Ngue ti yɛ ɔ fata kɛ gbanflɛn nin talua nga be te kɔ suklu’n, be nian nun be di ɔ?
11 Like nga sran’m be kunndɛ’n, yɛle kɛ gbanflɛn nin talua’m be mian be ɲin naan cɛn wie lele’n b’a yo mɛn nga nun sran. I yo, amun mɔ an te kɔ suklu’n, ɔ fata kɛ amun nian nun be di naan amun a si fluwa kan. Sanngɛ kɛ amún yó sɔ’n, nán maan ɔ yo cɛn wie lele junman kpa i dilɛ ngunmin ti. Sanngɛ, wafa nga amun kwla fa suklu dilɛ sɔ’n be di asɔnun’n i nun junman’n, annzɛ amun kwla yo jasin fɛ’n bofuɛ kpa’n, amun bu i akunndan wie. Kɛ ɔ ko yo naan i sɔ’n w’a yo ye’n, ɔ fata kɛ amun si ijɔ, amun yo akunndanfuɛ, an si ndɛ’m be bo tu weiin amanniɛn su kle sran mun. I lɛ nun’n, gbanflɛn nin talua nga be suan Biblu’n nun like mɔ be nanti Ɲanmiɛn i mmla’m be su’n, bɛtrɔ kpa kun yɛ be kpɛ be sie ɔ, yɛ bé ɲán anannganman nguan.—An kanngan Jue Mun 1:1-3 nun.a
12. ?Wan mun yɛ ɔ fata kɛ andɛ siɛ nin niɛn’m be nian be liɛ’n su ɔ?
12 Laa Izraɛli lɔ’n, siɛ nin niɛn’m be ɲin kpaman be mma’m be like klelɛ’n su kaan sa. I li Ɲanmiɛn sulɛ nin i mmla’m be su nantilɛ’n i klelɛ’n, yɛ ɔ ti be cinnjin kpa’n niɔn. (Mml. 6:6, 7) Ɔ maan, ba ng’ɔ sie i su kpa i si nin i nin, ɔ nin kpɛnngbɛn uflɛ mɔ be sro Ɲanmiɛn’n be nuan bo’n, ɔ si sa, ɔ si ngwlɛlɛ yɛ ɔ si akunndan. Nzuɛn sɔ mɔ be wunmɛn i sran ngba lika’n, be nga be si Ɲanmiɛn mɔ be nanti i mmla’m be su’n, be yi i nglo. (Nya. 1:2-4; 2:1-5, 11-15) I sɔ’n ti’n, ɔ fata kɛ andɛ siɛ nin niɛn mɔ be ti Klistfuɛ’n, be mma’m be like klelɛ’n yo be cinnjin kpa wie.
An sie amun su be mɔ be klo amun’n be nuan bo
13. ?Atin benin yɛ be fa sie i gbanflɛn nin talua wie’m be ɲrun ɔn? ?Ngue ti yɛ ɔ fata kɛ be bu i sin kpa ɔ?
13 Gbanflɛn nin talua’m be afɔtuɛ manfuɛ’m be sɔnnin. Suklu’m be nun’n, sran wie’m be o lɛ be ti be liɛ afɔtuɛ manfuɛ. Atin nga suklu ba kun ko fa su naan cɛn wie lele w’a fite sran dan’n, i ngunmin yɛ be fa sie i ɲrun ɔn. Gbanflɛn nin talua mun, sɛ be fɛ i sɔ atin sie amun ɲrun’n, amun srɛ Ɲanmiɛn naan ɔ kle amun atin’n. Amun nian Biblu’n nin fluwa nga sran kpa nanwlɛfuɛ m’ɔ si ngwlɛlɛ’n yi be’n, be nun. Amún wún kɛ sran nga Satan klo be yalɛ klelɛ’n yɛle gbanflɛn nin talua mun. Afin, be ɲin nin a timan. Kɛ ɔ yoli sɔ Edɛni fie’n nun lɔ ɔ. Yɛle kɛ, Ɛvu siman Satan. Sanngɛ ɔ yoli maan Ɛvu m’ɔ siman sa’n, ɔ fɛli i ndɛ’n su. ?Kɛ Ɛvu yoli sɔ’n, i bo’n guali sɛ? Zoova kleli kɛ ɔ klo i kpa sakpa. Sɛ ɔ ti kɛ i ndɛ liɛ’n su yɛ ɔ fali’n, nn ɔ yoli kpa mɛnnin i!—Bob. 3:1-6.
14. ?Ngue ti yɛ ndɛ nga Zoova nin e si nin e nin mɔ be ti i sufuɛ’n be kan’n, ɔ fata kɛ e tie i kpa ɔ?
14 Gbanflɛn nin talua mun, amun yifuɛ’n klo amun kpa wie. Ɔ kunndɛ kɛ amun yo kpa naan an di ye bikisa naan an di i tititi! I sɔ’n ti’n, kɛ siɛ kun m’ɔ klo i mma mun sa’n, ɔ se kɛ: “Atin’n yɛ ɔ o yɛ, amun fa su.” (Eza. 30:21) I lɛ nun’n, sɛ amun si nin amun nin’m be nian nun be su Zoova nanwlɛ su’n, maan ɔ yo amun fɛ. Like nga amun fa sie amun ɲrun kɛ amún yó’n, amun nin be koko i su yalɛ. I su afɔtuɛ nga be man amun’n, amun sie amun su tie i kpa. (Nya. 1:8, 9) Afin i kwlaa yoli o, like ng’ɔ ti kpa lele tra sika nin mɛn’n nun sran dan yolɛ’n, yɛ be kunndɛ kɛ amun ɲɛn i ɔ. Yɛle kɛ, amun ɲan nguan.—Mat. 16:26.
15, 16. (a) ?Ngue yɛ e lafi su kɛ Zoova su yoman ɔn? (b) ?Afɔtuɛ kpa benin yɛ Bariki i ndɛ’n man e ɔ?
15 Be nga be wla kpɛn be yifuɛ’n su’n, be ɲin yi like nga be le i’n. Afin be si kɛ, Ɲanmiɛn seli kɛ ɔ su ‘yaciman be, ɔ su kpɔciman be mlɔnmlɔn.’ (An kanngan Ebre Mun 13:5 nun.) Sanngɛ kusu’n, ɔ fata kɛ e nian e wun kpa. Afin, ɔ cɛman naan akunndan nga sran’m be bu’n, y’a bu wie. (Efɛ. 2:2) Amun e fa Bariki m’ɔ ti Zeremi i fluwa klɛfuɛ’n i ndɛ’n e nian. I blɛ su’n, nn lika’n ti kekle kpa Zerizalɛmu lɔ, i sin naan afuɛ nga be flɛ i 607 nun ka naan y’a ju Zezi blɛ su’n, b’a saci klɔ’n.
16 Kɛ e niɛn sa’n, ɔ ti kɛ Bariki kunndɛ kɛ ɔ́ ɲɛ́n i wun. Zoova sieli i sɔ liɛ’n i nzɔliɛ naan w’a mɛn i afɔtuɛ kɛ nán ɔ kunndɛ ‘pɔɔ nun tranlɛ.’ Bariki kɛnnin i wun ase, ɔ yoli ngwlɛlɛfuɛ. Yɛle kɛ, ɔ tieli Zoova nuan ndɛ’n. Ɔ maan, kɛ bé sáci Zerizalɛmu klɔ’n, ɔ fiteli nun. (Zer. 45:2-5) Sanngɛ, i wiengu nga be yacili Zoova lɛ be dun mmua kunndɛli ‘pɔɔ nun tranlɛ’n,’ be tɔli Babilɔnifuɛ’m be sa nun naan b’a fɛn be bo ninnge mun. Kpɛkun be kunnin be nun sunman. (2 Nyo. 36:15-18) Bariki i ndɛ sɔ’n, ɔ man e afɔtuɛ kpa kun. Yɛle kɛ, be wun mɔ be fa mantan Ɲanmiɛn’n, ɔ ti kpa lele tra aɲanbeun nin mɛn’n nun sran dan yolɛ’n.
Amun nian be mɔ be nantili klanman’n be ajalɛ’n su
17. ?Ajalɛ kpa benin yɛ Zezi nin Pɔlu, ɔ nin Timote be kle andɛ Zoova i sufuɛ mun ɔn?
17 Biblu’n kan sran kpanngban kpa mɔ be nantili klanman’n be ndɛ naan e nian be ajalɛ’n su. Sran sɔ’m be nun kun yɛle Zezi. Ninnge ng’ɔ si be yo nun’n, sran fi tomɛn i. Sanngɛ, ‘Ɲanmiɛn sielɛ’n i ndɛ kanlɛ’ yɛ ɔ fa cicili i ti ɔ. Afin, i li ti yɛ sran’m be kwla fite nun ɔn. (Lik 4:43) Akoto Pɔlu kusu kunndɛli kɛ ɔ́ sú Ɲanmiɛn kpa. I sɔ’n ti’n, junman mɔ sɛ ɔ di’n ɔ kwla yo mɛn’n nun sran dan’n, ɔ yacili i lɛ ko boli jasin fɛ’n mlɔnmlɔn. Timote niannin Pɔlu i ajalɛ’n su kleli kɛ ‘ɔ ti i wa sakpa, afin i yɛ maan ɔ lafi Klist su ɔ.’ (1 Tim. 1:2) ?Be kwlaa sɔ’n, i Zezi o, i Pɔlu o, i Timote o, ɔ yoli be nzisɔ? Cɛcɛ! Afin Pɔlu bɔbɔ seli kɛ, kɛ ɔ bu Ɲanmiɛn junman’n i like kpa sakpa’n ti’n, ɔ ‘buman like’n wie fi like.’—Fil. 3:8-11.
18. ?Ajalɛ dan kpa benin yɛ gbanflɛn kun fali ɔ? ?Ngue ti yɛ w’a yomɛn i nzisɔ ɔ?
18 Andɛ’n, Klistfuɛ gbanflɛn nin talua kpanngban be nanti Zezi nin Pɔlu nin Timote be ajalɛ’n su. Amun e kan be nun kun ndɛ. Be flɛ i Zɔbu. Junman ng’ɔ di’n, be tuɛ i kalɛ dan. Ɔ seli kɛ: “Ɲanmiɛn mmla mɔ n nanti su’n ti’n, w’a cɛman naan b’a man min sa su. Sanngɛ, i kwlaa sɔ’n ti min ɲrun afɛ ngbɛn. Ɔ ti kɛ n su fuan aunmuan naan ń kó trɛ́ i sa. I sɔ’n ti’n, n ko seli junman i su kpɛn mun kɛ n diman junman’n kun naan ń kó bó jasin fɛ’n. Be buli i kɛ min akatua’n m’ɔ ti kaan ti ɔ. Ɔ maan be ja nun lɛ’n, be ukali su. Sanngɛ, be siman kɛ m’an dun mmua bu min like akunndan lalaa. Sran’m be wunman like nga ti yɛ junman mɔ be tua min kalɛ kpa’n, n yaci i dilɛ n kɔ blɛ kwlaa nun Ɲanmiɛn junman dilɛ’n. Sanngɛ min liɛ’n, n si kɛ n fali min wun mannin Ɲanmiɛn kɛ ń sú i mlɔnmlɔn. Andɛ Ɲanmiɛn junman dilɛ’n i nun aklunjuɛ nga n di’n, sika annzɛ mɛn’n nun sran dan yolɛ’n tomɛn i mlɔnmlɔn.”
19. ?Ajalɛ benin yɛ ɔ ti kpa kɛ gbanflɛn nin talua’m be fa ɔ?
19 Andɛ asiɛ wunmuan’n su’n, gbanflɛn nin talua kpanngban kpa b’a fa ajalɛ kunngba’n. Ɔ maan gbanflɛn nin talua mun, kɛ amún bú like nga cɛn wie lele amún wá yó’n i akunndan’n, nán amun wla fi Zoova i cɛn’n su. (2 Piɛ. 3:11, 12) Amun wiengu nga be klo mɛn dilɛ’n, nán amun ɲin blo be wun. Sanngɛ, amun tie be nga be klo amun sakpa’n, be nuan ndɛ’n. Amun sie ‘amun awlɛn su ninnge mun ɲanmiɛn su lɔ.’ Sɛ amun yo sɔ’n, bɛtrɔ kpa kun m’ɔ saciman’n yɛ amun a kpɛ b’a sie ɔ, yɛ amún ɲán nguan. (Mat. 6:19, 20; an kanngan 1 Zan 2:15-17 nun.) Nanwlɛ, maan amun wla kpɛn amun yifuɛ’n su. Sɛ amun yo sɔ’n, Zoova wla su fiman amun su le.
[Ja ngua lɛ ndɛ’n]
a Sɛ amun waan bé sí suklu dan dilɛ nin junman dilɛ’n be su ndɛ’n, an nian Sasafuɛ Tranwlɛ’n, afuɛ 2005 Ɔktɔblu 1 (w-AO) i bue 24-32 nun.
?Amun wla kwla kpɛn su?
• ?Wafa sɛ yɛ e kle kɛ e fa e wla’n gua Ɲanmiɛn su ɔ?
• ?Like’n i kpafuɛ’n mɔ be kwla kle sran’n yɛle benin?
• ?Afɔtuɛ benin yɛ Bariki i ndɛ’n man e ɔ?
• ?Wan mun yɛ be kleli ajalɛ kpa ɔ? ?Yɛ ngue ti ɔ?
[Foto mun, bue 21]
Like’n i kpafuɛ’n yɛ Zoova kle e ɔ.