Sran kpanngban be yacili asɔnun kɔlɛ afin b’a wunman kosan cinnjin nga be usa be wun’n be su tɛlɛ’n, annzɛ kusu b’a ɲanman fɔnvɔlɛ. ?Ɔ maan ngue ti yɛ ɔ fata kɛ a wɔ Zoova i Lalofuɛ’m be asɔnun aɲia’m be bo ɔ? ?Ngue yɛ á wún i lɔ ɔ?

Á wún aklunjuɛ nga be di’n. Klistfuɛ klikli’m be blɛ su’n, kɛ be kɔ be asɔnun aɲia’m be bo’n, be suan Biblu’n nun like yɛ be wla be wiengu fanngan. (Ebre Mun 10:24, 25) Aklunjuɛ nga be di i be afiɛn lɔ’n, ɔ yo maan be wun i kɛ be tran aniaan tranlɛ. (2 Tɛsalonikfuɛ Mun 1:3; 3 Zan 14) Klistfuɛ klikli’m be ajalɛ kunngba’n su yɛ Zoova i Lalofuɛ’m be fa ɔ, ɔ maan be di aklunjuɛ kunngba sɔ’n wie.

Á súan Biblu’n nun mmla’m be su nantilɛ. Kɛ nga be yo i laa blɛ’n nun sa’n, i yasua o, i bla o, i bakan o, be kwlaa be yia likawlɛ. Be nga be sa w’a tɔ like klelɛ’n nun’n, be fa Biblu’n be uka e naan y’a wun wafa nga e mɛn dilɛ nun’n, é nánti Ɲanmiɛn i mmla’m be su’n. (Mmla’n 31:12; Neemi 8:8) Sran kwlaa nga ɔ klo’n, sɛ be fa ijɔlɛ’n wla nzrafuɛ’m be nuan, ɔ kwla kan wie, sɛ jue yɛ bé tó’n, ɔ kwla to wie fa yi i Ɲanmiɛn sulafilɛ’n i nglo.​—Ebre Mun 10:23.

Ɔ Ɲanmiɛn sulafilɛ’n i bo’n wlá ase kpa. Akoto Pɔlu seli i blɛ su asɔnun’m be nun kun kɛ: “N klo kɛ ń wún amun wun naan [...] e wla e wun fanngan Nyanmiɛn su bɔ e lafi’n ti’n.” (Rɔmfuɛ Mun 1:11, 12) Kɛ e kɔ aɲia’m be bo titi’n mɔ e nin aniaan mun e o’n, ɔ wla e fanngan naan y’a nanti Ɲanmiɛn i mmla’m be su.

Sɛ a klo’n, a kwla ba ainman sin aɲia’n i bo wie. I liɛ’n sɛ ndɛ nga e kan be lɛ’n be ti ato annzɛ nanwlɛ’n, ɔ bɔbɔ a kwla wun i. Bé sɔ́ wɔ nun klanman. Sran ngba kwla ba e aɲia’m be bo, be demɛn i ti sika.

• ?Ajalɛ benin su yɛ Zoova i Lalofuɛ’m be nian be yo be asɔnun aɲia mun ɔn?

• ?Wafa sɛ yɛ Klistfuɛ’m be aɲia’m be kwla yo ɔ ye ɔ?

Kannzɛ bɔɔ ɔ nin i fata kɛ Zoova i Lalofuɛ’m be sin bo ble wie nun o, annzɛ be nanti wia’n annzɛ nzue’n bo o, be kɔ be asɔnun aɲia’m be bo titi. Kannzɛ bɔɔ kekle’n o Zoova i Lalofuɛ’m be su annzɛ be fin junman naan b’a fɛ o, be kɔ aɲia’m be bo. ?Ngue ti yɛ be nin be wiengu Klistfuɛ’m be mian be ɲin be yo sɔ ɔ?

Ɔ yo maan be wun kpaja be. Kɛ akoto Pɔlu seli kɛ ‘maan e bu e wiengu’m be akunndan’n,’ be nga e nin be e kɔ aɲia bo’n be ndɛ yɛ ɔ kan ɔn. (Ebre Mun 10:24) Ndɛ sɔ’n i bo’n yɛle kɛ ɔ fata kɛ Klistfuɛ’m be si be wun. Ɔ maan akoto Pɔlu i ndɛ’n wla be fanngan kɛ be bu be wiengu akunndan. Sɛ be fa be wun be mantan be wiengu Klistfuɛ mun’n, bé wún kɛ sa kunngba nga be o be su’n, be nun wie’m be kwla jrannin be ɲrun kekle. Ɔ maan i sɔ’n kwla uka be kpa wie kusu.

Ɔ uka be maan be tra janvuɛ kpa mun. Aniaan nga be nin be yia aɲia’m be bo lɔ’n, be timan sran ngbɛn sa, be janvuɛ kpa mun ɔn. Blɛ wie nun be yia be yiyi be ɲin su. ?Mmlusuɛ benin yɛ be ɲɛn i i sɔ yolɛ’n nun ɔn? Be suan be wiengu’m be klolɛ, ɔ maan be afiɛn’n mantan kpa. Ɔ maan kɛ sa ɲan be niaan wie mun’n, be uka be ndɛndɛ kpa afin be klo be dan. (Nyanndra Mun 17:17) Kɛ be nin be niaan’m be kwlaa’n be yia’n, be kle kɛ be ‘kwlaa be uka be wun.’​—1 Korɛntfuɛ Mun 12:25, 26.

É wlá ɔ fanngan kɛ be nga be yo Ɲanmiɛn klun sa’n yɛ a tra be janvuɛ ɔ. A kwla wun sran sɔ mun Zoova i Lalofuɛ’m be nun. Nán man like wie fi atin naan ɔ tanndan ɔ ɲrun i sɔ yolɛ’n nun.

• ?Ngue ti yɛ ɔ ti cinnjin man e kɛ e nin e niaan Klistfuɛ mun e yia ɔ?

• ?Yɛ cɛn benin yɛ ɔ kusu á kɔ́ be aɲia’m be bo wie ɔ?

Klistfuɛ klikli’m be aɲia’m be bo’n, be to jue, be srɛ Ɲanmiɛn, be kanngan Ɲanmiɛn Ndɛ’n nun yɛ be koko su yalɛ. Be yoman like uflɛ fi ukaman su. (1 Korɛntfuɛ Mun 14:26) I kunngba’n yɛ á wún i Zoova i Lalofuɛ’m be lɔ ɔ.

Like nga be kle’n taka Biblu’n su yɛ be kwla nanti su. Le mɔcuɛ kwlaa nun’n, Zoova i Lalofuɛ’m be yia be tie nzra nun ijɔlɛ kun. Ijɔlɛ sɔ’n kle wafa nga e blɛ liɛ nga nun’n, Biblu’n nun mmla’m be kwla uka e’n. Ɔ di miniti 30. Kɛ ijɔfuɛ’n kánngan Biblu’n nun’n, e kwla nian e bɔbɔ e liɛ’n nun wie. I sin’n, be fa dɔ kun be suan “Sasafuɛ Tranwlɛ’n” i nun like. Sran kwlaa nga ɔ klo’n, ɔ kwla tɛ kosan’m be su wie. Like suanlɛ sɔ’n uka e naan y’a kwla nanti Biblu’n nun mmla’m be su. Mɛn wunmuan’n nun’n, Zoova i Lalofuɛ’m be asɔnun 110.000 tra su’n be nun’n, be suan fluwa kunngba sɔ’n i nun like.

Be uka be naan b’a si like kle kpa. Lemɔcuɛ kwlaa nun’n, Zoova i Lalofuɛ’m be yia likawlɛ be yo aɲia kun ekun. I liɛ’n be yo i nnɔsua nun. Be flɛ i kɛ Klistfuɛ mun nin be junman’n. Be fa Klistfuɛ mun nin be junman aɲia fluwa’n m’ɔ fite anglo kwlaa’n yɛ be fa yo aɲia sɔ’n niɔn. Be kpɛkpɛli aɲia sɔ’n nun nsan. I klikli’n yɛle Ɲanmiɛn Ndɛ’n nun ninnge kpakpa wie mun. Ɔ uka be naan b’a wun Biblu’n i nun ndɛ wie mɔ be dun mmua kanngannin nun’n i wlɛ kpa. I nɲɔn su’n yɛle Mian ɔ ɲin naan si jasin fɛ’n i bo kpa. I bue sɔ’n i bo’n, be yi wafa nga be nin sran’m be koko Biblu’n su yalɛ’n i nglo. I sin afɔtuɛ manfuɛ kun man be afɔtuɛ b’a si kanngan kpa, naan b’a si nzra nun ijɔ kpa wie’n. (1 Timote 4:13) Aɲia’n i bue kasiɛn’n yɛle Like nga Klistfuɛ’m be yo’n. Wafa nga Klistfuɛ’m be kwla nian Biblu’n nun mmla’m be su be nanti cɛn kwlakwla’n be yiyi nun. I wie yɛle kɛ be usa kosan yɛ aniaan’m be tɛ su naaan b’a wun Biblu’n i nun ndɛ’n i wlɛ kpa b’a tra laa’n.

Sɛ a tran Zoova i Lalofuɛ’m be aɲia’m be bo’n, wafa nga be kle Biblu’n nun like lɔ’n, ɔ́ yó ɔ ɲɛnmɛn kpa.​—Zan 6:45.

• ?Ngue like yɛ be kle i Zoova i Lalofuɛ’m be aɲia’m be bo lɔ ɔ?

• ?Zoova i Lalofuɛ’m be aɲia beninfuɛ’n yɛ a kunndɛ kɛ á trɛ́n i bo koko nga nun ɔn?