Zoova i dunman’n sanwun’n ɔ o Ɲanmiɛn Sielɛ Sua ngba su. Ɔ maan e wun i wlɛ kɛ Ɲanmiɛn sulɛ sua’n i yɛinyɛin nin i klanman yolɛ’n, ɔ nin i ye siesielɛ’n be ti e cenjele like. I sɔ’n ti e Ɲanmiɛn sulɛ’n nun like cinnjin kun. E ngba e kwla di junman sɔ’n wie.

Kɛ aɲia’n ko wie’n a kwla yo Ɲanmiɛn Sielɛ Sua’n i nun yɛiin wie. Kɛ aɲia kwlaa ko wie’n, aniaan’m be yo aɲia sua’n i nun yɛiin aklunjuɛ su. Anglo kun nun sa’n, be sie cɛn kun be yo lɔ sanwun kpa liɛ su. Asɔnun kpɛnngbɛn annzɛ asɔnunfuɛ’m be lika nianfuɛ kun yɛ ɔ nian junman sɔ’n su ɔ. Junman’n i jajalɛ’n i wun fluwa ng’ɔ o tabua’n su lɔ’n, i su yɛ be nian be di junman’n niɔn. Be kwla kuan laso’n su annzɛ be wunnzin su. Be nunnun bia’m be su. Be wunnzin abialiɛ’m be nun, be nunnun anuan nin fenɛtri ɔ nin niannun’m be su. Be gua wla’m be blo, kpɛkun be yo sua’n i awlo’n nun nin i nvɛnwunnvɛnwun’n i yɛiin wie. Afuɛ nuan kwlaa’n, be sie cɛn kun be yo Ɲanmiɛn Sielɛ Sua’n i nun yɛiin. Kɛ siɛ nin niɛn’m be nian be mma’m be su naan ba sɔ’m b’a di junman sɔ’n wie’n, i sɔ’n kle ba mun kɛ ɔ fata kɛ be ɲin yi lika nga e su Ɲanmiɛn lɛ’n.​—Akunndanfuɛ’n 5:1.

Kɛ bé síesíe aɲia sua’n i ye’n, a kwla yo wie. Afuɛ kwlaa’n, be niannian Ɲanmiɛn Sielɛ Sua’n i likalika wunmuan’n. Sɛ ɔ fata kɛ be siesie like wie ye annzɛ be kaci i’n, be yo i ndɛndɛ. I liɛ’n e ɲrun lɔ’n, asɔnun’n su boman kalɛ dan. (2 Be Nyoliɛ 24:13; 34:10) Ɲanmiɛn Sielɛ Sua nga be niɛn i lika kpa’n, ɔ nin Ɲanmiɛn i sulɛ’n fata kpa. Kɛ e tu e klun e di junman sɔ’n wie’n, e yi i nglo kɛ e klo Zoova, naan lika nga e su i lɛ’n ti lika cinnjin. (Jue Mun 122:1) Asa ekun’n, i sɔ’n yo maan sran’m be bo e dunman kpa.​—2 Korɛntfuɛ Mun 6:3.

• ?Ngue ti yɛ ɔ fataman kɛ e ɲin kpa e Ɲanmiɛn sulɛ lika’n su ɔ?

• ?Wafa sɛ yɛ be siesieli Ɲanmiɛn Sielɛ Sua’n i nun yɛiin yolɛ’n niɔn?

?A kunndɛ kɛ á níannían Biblu’n i akua’m be nun naan á sí Biblu’n nun ndɛ’n i kpa? ?A kunndɛ kɛ á sí Biblu’n nun ndɛ mma wie annzɛ sran kun i su ndɛ, annzɛ lika kun mɔ Biblu’n kɛn i ndɛ’n i kpa? ?Annzɛ a usa ɔ wun, sɛ sa wie nun’n Ɲanmiɛn Ndɛ’n kwla uka wɔ o? Sɛ ɔ ti sɔ’n, nn Ɲanmiɛn Sielɛ Sua’n nun Biblu’n i akua’m be siewlɛ’n kwla uka ɔ.

Asɔnun’n i nunfuɛ’m be ukalɛ like ɔ. Atrɛkpa’n Biblu’n i akua nga Zoova i Lalofuɛ’m be yili’n, a lemɛn i kwlakwla ɔ aniɛn’n nun. Sanngɛ Ɲanmiɛn Sielɛ Sua’n nun Biblu’n i akua’m be siewlɛ’n i nun’n, fluwa nga be yili be koko nun wa’n, be sunman be o lɔ. Atrɛkpa’n Biblu’n i ngaciɛ wie’m be o lɔ wie. Asa’n, fluwa nga be tu ndɛ mma’m be bo nun’n, ɔ nin fluwa uflɛ wie mɔ be kwla uka sran naan w’a si sa nin ninnge wie mun’n, be o nun lɔ wie. Ka naan aɲia’n w’a bo i bo’n, annzɛ kɛ ɔ ko wie’n, a kwla ko di junman Ɲanmiɛn Sielɛ Sua’n i lika sɔ’n nun lɔ. Sɛ ɔrdinatɛli kun o lɔ’n, atrɛkpa’n, ɔrdinatɛli nun like kun mɔ Zoova i Lalofuɛ’m be klɛli be fluwa nga be yili be’n i dan lika be sieli su’n ɔ o nun. (Watchtower Library) Ɔ uka be naan ninnge’m be kunndɛlɛ’n w’a yo pɔpɔ.

Ɔ uka be nga be di junman Klistfuɛ mun nin be junman aɲia’n i bo’n mun kpa. Sɛ a ti suklu ba’m be nun kun naan be man wɔ junman’n, a kwla siesie ɔ wun Ɲanmiɛn Sielɛ Sua’n nun fluwa’m be siewlɛ’n nun lɔ. Klistfuɛ mun nin be junman aɲia’n i sunianfuɛ’n yɛ ɔ nian lika sɔ’n su ɔ. Ɔ fata kɛ ɔ yo naan fluwa nga be yili be koko nun wa’n, be tran lɔ wie, yɛ ɔ fata kɛ ɔ siesie lɔ fluwa’m be kpa wie. Suklu’n i sunianfuɛ’n annzɛ aniaan nga ɔ kle ɔ Biblu’n nun like’n, ɔ kwla kle ɔ wafa nga a kwla fa fluwa mun di ɔ junman’n. Sanngɛ, a leman atin faman fluwa sɔ’m be nun wie fi fiteman. Yɛ kusu sɛ a fa i nun fluwa wie mun dili junman’n, ɔ fata kɛ a siesie be kpa, yɛ ɔ fataman kɛ a klɛklɛ be nun like kaan sa.

Biblu’n se kɛ sɛ e waan é ‘sí Nyanmiɛn’n,’ ɔ fata kɛ e tu e klun e kunndɛ i ‘kɛ be fa kunndɛ anyanbeun’n sa.’ (Nyanndra Mun 2:1-5) Ɲanmiɛn Sielɛ Sua’n nun Biblu’n i akua’m be siewlɛ’n ɔ kwla uka ɔ naan w’a yo sɔ.

• ?Junman dilɛ ninnge benin mun yɛ be o Ɲanmiɛn Sielɛ Sua’n nun Biblu’n i akua’m be siewlɛ’n nun lɔ ɔ?

• ?Wan yɛ ɔ kwla uka ɔ naan w’a fa i nun fluwa mun w’a di junman kpa ɔ?

Zezi seli i sɔnnzɔnfuɛ’m be kɛ: “An yo kɛ kannin sa sran’m be nyrun, man be wun amun nyoliɛ kpa’n nan be man-man amun Si b’ɔ o nyanmiɛn su lɔ’n.” (Matie 5:16) I sɔ’n ti’n, Zoova i Lalofuɛ’m be fa ajulisu ninnge’m be di junman. I wie yɛle ɛntɛnɛti’n. Be ɛntɛnɛti adrɛsi’n yɛle www.pr2711.com. Ninnge nga be lafi su’n, ɔ nin junman nga be di’n, be o be ɛntɛnɛti lika sɔ’n nun. ?Ndɛ benin mun yɛ be fite lɔ ɔ?

Kosan nga sran’m be usa be titi’n, be fa Biblu’n be tɛ su lɔ. Zoova i Lalofuɛ’m be ɛntɛnɛti lika’n nun lɔ’n, a kwla wun kosan cinnjin nga sran’m be usa be titi’n, be nun wie’m be su tɛlɛ’n. I wie yɛle kɛ Fluwa nɲa ?Cɛn wie lele’n ɲrɛnnɛn’n wíe? ɔ nin ?Be nga be wuli’n be kwla sa be sin nguan nun ekun? be o ɛntɛnɛti adrɛsi’n su aniɛn­aniɛn 600 tra su nun. Asa’n, be kacili Biblu’n Traduction du monde nouveau i aniɛn­aniɛn 130 tra su nun, be diman be yalɛ lɔ wie. Kpɛkun fluwa ?Ngue like yɛ Biblu’n kle i sakpasakpa ɔ? mɔ be kwla fa suan Biblu’n nun like’n, i wie o lɔ. Asa kusu’n, Sasafuɛ Tranwlɛ’n nin Réveillez-vous ! be o lika sɔ’n nun lɔ wie ekun. Sɛ i nun ndɛ’n i tielɛ annzɛ i kannganlɛ o, annzɛ kusu i falɛ o, be kwla yo i kwlaa ngalɛ’n ɛntɛnɛti su lɔ. Ninnge nga be kwla fa be’n, be flɛ wie kɛ MP3 nin PDF ɔ nin EPUB. A kwla fa wie sie i fluwa su bɔbɔ fa ko kle sran nga Biblu’n nun ndɛ’n lo i’n, i bɔbɔ i aniɛn liɛ’n nun! Bobo’m be aniɛn kpanngban nun’n, be yili video be sieli i ɛntɛnɛti su lɔ wie. Ninnge nga a kwla fɛ i lɔ ekun’n, i wie ekun yɛle Biblu’n nun kannganlɛ m’ɔ ti kɛ anɔ yilɛ sa’n, ɔ nin anɔ yilɛ, yɛ miziki fɛfɛ wie mɔ a kwla fa yiyi ɔ ɲin su’n.

Zoova i Lalofuɛ’m be su nanwlɛ ndɛ’n. I koko nun wa jasin mun o, i mɛn wunmuan’n nun jasin fɛ’n bolɛ junman’n i su video mun o, i sa kekleekle mɔ be kan Zoova i Lalofuɛ mun o, i sran’m be nɛnnɛn nga Zoova i Lalofuɛ’m be tu be klun be di’n nin o, i kwlaa ngalɛ’n o ɛntɛnɛti su wie. A kwla wun aɲia dandan nga b’a mantan koko’n be su ndɛ mun, ɔ nin Betɛli’m be adrɛsi mun lɔ.

I sɔ mɔ Zoova i Lalofuɛ’m be yo’n maan nanwlɛ ndɛ’n kpaja kɛ kannin sa asiɛ’n i likalika mmuammua’m be nun lɔ. Kannzɛ bɔbɔ sran’m be o nvle mmuammua kɛ Antartiki sa o, ɔ kan be nun kpanngban. É srɛ́ kɛ ‘Zoova i ndɛ’n trɛ ndɛndɛ’ mɛn wunmuan’n nun, naan i sɔ’n yi Ɲanmiɛn i ayɛ.​—2 Tɛsalonikfuɛ Mun 3:1.

• ?Wafa sɛ yɛ ɛntɛnɛti adrɛsi jw.org su uka sran mun naan b’a suan Biblu’n nun nanwlɛ ndɛ’n niɔn?

• ?Zoova i Lalofuɛ’m be ɛntɛnɛti lika’n nun ninnge benin yɛ a kunndɛ kɛ á nían ɔn?