Zezi “maan sa nuan su sɛsɛ yolɛ’n w’a tran asiɛ’n su”

1, 2. ?Blɛ benin nun yɛ Zezi fali ya-ɔ? ?Yɛ ngue ti-ɔ?

ZEZI w’a fa ya kpa. Kɔlɛ’n e kwlá bumɛn i kɛ ɔ kwla fa ya, afin ɔ ti sran wɛtɛɛfuɛ. (Matie 21:5) Ya sɔ’n m’ɔ fali’n ɔ ti su, sanngɛ ɔ sili i wun su nian.a ?Yɛ ngue sa ti yɛ Zezi m’ɔ kloman ndɛnngan’n, ɔ fali ya sɔ-ɔ? Sa tɛ dan kpa kun ti-ɔ.

² Zezi klo Ɲanmiɛn i sulɛ sua m’ɔ o Zerizalɛmun lɔ’n i kpa. Asiɛ wunmuan’n su’n, sua sɔ’n i kunngba yɛ ɔ ti i Si m’ɔ o ɲanmiɛn su lɔ’n, i liɛ klonglo-ɔ. Zifu’m be fɛ i nvlenvle’m be nun mmuammua kpa be wa su Ɲanmiɛn sua sɔ’n nun. Be nga be timan Zifu bɔbɔ’n mɔ be lafi Ɲanmiɛn su’n, be ba be wa su Ɲanmiɛn sua’n i lika nga be fa mannin be’n nun. Kɛ Zezi boli i Ɲanmiɛn junman’n i dilɛ bo’n, cɛn kun’n ɔ wluli Ɲanmiɛn i sua’n nun lɔ. Like ng’ɔ ko wunnin i lɔ’n ɔ yoli i ya dan. Afin lika sɔ m’ɔ fata kɛ be su Ɲanmiɛn lɔ’n, w’a kaci i liɛ aata diwlɛ. Aata difuɛ nin sika kacifuɛ’m b’a yi lɔ piɛ. Yɛ i tɛ lika’n yɛle kɛ be di sran’m be lufle yɛ be wua be Ɲanmiɛn i sua’n nun lɔ. ?Wafa sɛ?—Zan 2:14.

3, 4. ?Lufle benin yɛ be dili sran mun Zoova i sua’n nun lɔ-ɔ? ?Ajalɛ benin yɛ Zezi fali naan sran’m b’a yaci i sɔ yolɛ-ɔ?

³ Zifu’m be Ɲanmiɛn sulɛ wafa’m be su kpɛnngbɛn’m be waan sika mma wafa kun ngunmin yɛ sran’m be fa tua Ɲanmiɛn sua’n i ti sika’n niɔn. Ɔ maan ɔ fata kɛ aofuɛ’m be kaci be sika’n naan b’a ɲan sika mma sɔ’n wie. I ti’n, sika kacifuɛ’m be siesie be tabli mun Ɲanmiɛn sua’n i klun lɔ naan bé káci sran’m be sika’n. Kɛ be yo sɔ’n, be ɲan su kpa. Asa ekun’n, aata difuɛ wie’m be yo nnɛn’m be atɛ lɔ, yɛ be ɲan su kpa wie. Aofuɛ nga be kunndɛ kɛ bé yí tɛ’n, be kwla ko to nnɛn klɔ’n nun lɔ. Sanngɛ sɛ be yo sɔ’n, Ɲanmiɛn sua’n i su kpɛnngbɛn’m be kwla se kɛ nnɛn sɔ’m be nin tɛ yilɛ fataman. I ti’n, Ɲanmiɛn i sua’n nun lɔ yɛ be to be nnɛn mun-ɔn, i liɛ’n Ɲanmiɛn sua’n i su kpɛnngbɛn’m bé kwlá kplín su kɛ be fa yi tɛ. Kɛ mɔ Ɲanmiɛn sua’n nun lɔ aata difuɛ’m be wun kɛ sran’m b’a mian’n ti’n, be di nnɛn’m be gua kekle kpa.b Nanwlɛ, aata dilɛ wafa sɔ’n timan kpa. Sran’m be wualɛ yɛle i sɔ’n!

⁴ Zezi kwlá kplinman su kɛ be di sran’m be lufle i bɔbɔ i Si’n i sua’n nun. Ɔ maan ɔ fali ɲanman wɔli ngble, yɛ ɔ fa kannin be kwlaa be nin be bua mun, nin be nannin mun be bo. Ɔ guali sika kacifuɛ’m be sika’n i ase, kpɛkun ɔ suli be tabli’m be bo guali. Sika mma sɔ’m be truli laso’n su sa gbeee! Ɔ kpannin be nga be yo okunmomo atɛ’n be su. Ɔ seli be yakpa su kɛ: “An isa ninnge nga mun fite lɔ!” (Zan 2:15, 16) Sran wie fi w’a kwlá jrɛnmɛn i ɲrun.

Ba’n ti kɛ i Si sa cɛ

5-7. (1) ?Ngue ti yɛ Zezi kloli sa nuan su sɛsɛ yolɛ’n niɔn? ?Yɛ wafa sɛ yɛ i ajalɛ’n i su like suanlɛ’n kwla uka e-ɔ? (2) ?Ngue yɛ Zezi yoli mɔ Zoova kwla jran su yo i dunman’n i sanwun-ɔn? ?Yɛ cɛn wie lele’n, ngue yɛ ɔ́ wá yó-ɔ?

⁵ Aata difuɛ’m be sali be sin Ɲanmiɛn i sua’n nun lɔ. I afuɛ kɔe nsan su’n, Zezi ɔli ko ijɔli be ekun. Ndɛ nga Zoova kannin fa buli be nga be fɛ i sua’n fa yo ‘awiefuɛ’m be lika’n’ be fɔ’n, i kunngba’n yɛ ɔ kannin-ɔn. (Zeremin 7:11; Matie 21:13) Nanwlɛ, kɛ Zezi wun wafa nga be di sran’m be lufle’n mɔ be yo Ɲanmiɛn i sua’n i finfin’n, ɔ yoli i ya kɛ i Si sa. I sɔ’n boman e nuan. Afin i Si’n m’ɔ o ɲanmiɛn su lɔ’n kleli i like lele afuɛ miliɔn kpanngban kpa ka naan w’a ba asiɛ’n su. Ɔ maan ɔ kloli sa nuan su sɛsɛ yolɛ’n kɛ Zoova sa. Zezi ti kɛ i Si sa cɛ. I sɔ’n ti’n, like ng’ɔ kwla uka e kpa naan y’a wun Zoova i sa nuan su sɛsɛ yolɛ’n i bo kpa’n, yɛle Zezi Klisi i ajalɛ’n i su akunndan bulɛ.—Zan 14:9, 10.

⁶ I nun nga Satan tɔ́n Ɲanmiɛn Zoova i suɛn kɛ ɔ ti ato buafuɛ’n, naan ɔ siman sran sie’n, nn Zoova i Wa kunngba cɛ’n o lɛ. I sin’n, kɛ Satan sé kɛ nán ngbɛn ti yɛ sran’m be su Zoova naan be klomɛn i’n, Ba’n tili. Ndɛ sɔ’m be yoli Ba’n i ya fiaan. Ɔ maan kɔlɛ’n kɛ ɔ wa tili i kɛ i yɛ Ɲanmiɛn fɛ́ i kɛ ɔ kpɛ ndɛ cinnjin sɔ’m be nun’n, i sɔ’n yoli i fɛ lele kpeli nun! (2 Korɛntifuɛ Mun 1:20) ?Ɔ́ yó sɛ naan ndɛ sɔ’n i nun w’a kpɛ?

⁷ Kɛ nga e wunnin i Ndɛ tre 14 nun’n sa’n, Zezi Klisi kpɛli anzi nin sran’m be seiin nantilɛ’n i su ndɛ’n nun wieli. Ɔ maan Zoova kwla jrɛn i sɔ liɛ’n su yo i dunman mɔ be sacili i’n i sanwun, yɛ ɔ́ klé ekun kɛ i yɛ ɔ le atin sie nglo nin asiɛ’n niɔn. Zezi m’ɔ ti Zoova i Sran cinnjin kpafuɛ’n, ɔ́ wá yó naan sa nuan su sɛsɛ yolɛ’n ɔ tran nglo lɔ nin asiɛ’n su wa. (Sa Nga Be Yoli’n 5:31) Asiɛ’n su wa’n, wafa nga ɔ dili i mɛn’n, ɔ yili Ɲanmiɛn i sa nuan su sɛsɛ yolɛ’n i nglo. Zoova kɛnnin i ndɛ seli kɛ: “Ń fá min wawɛ’n ń síe i su, yɛ ɔ́ klé nvlenvle mun sa nuan su sɛsɛ yolɛ’n.” (Matie 12:18) ?Wafa sɛ yɛ Zezi yiali ndɛ sɔ’n i nuan-ɔn?

Zezi kleli like nga be flɛ i sa nuan su sɛsɛ yolɛ’n

8-10. (1) ?Zifu’m be Ɲanmiɛn sulɛ wafa’m be mmla benin mun yɛ be kle kɛ be buman be nga be timan Zifu’n ɔ nin bla’m be wie-ɔ? (2) ?Wafa sɛ yɛ be mmla sɔ’m be ti’n, Ɲanmiɛn i mmla’n i su nantilɛ’n wa yoli kekle-ɔ?

⁸ Zezi kloli Zoova i Mmla’n yɛ ɔ niannin su nantili. Sanngɛ Zuifu’m be Ɲanmiɛn sulɛ wafa’m be su kpɛnngbɛn’m be liɛ’n, be kpɛli Mmla’n i wun. Zezi seli be kɛ: “Mmla klɛfuɛ nin Farizifuɛ gblɛfuɛ mun, nanwlɛ, amun yako! […] Amun kpalo Moizi Mmla’n i nun ndɛ cinnjin kpafuɛ mun. Ndɛ sɔ mun yɛle sa i nuan su sɛsɛ yolɛ’n, aunnvɔɛ silɛ’n, ɔ nin nantilɛ mɔ be nin Ɲanmiɛn be nanti titi’n.” (Matie 23:23) Ɲanmiɛn i Mmla klefuɛ sɔ’m b’a kleman sran’m be like kɛ ɔ nin i fata’n sa naan b’a wun like nga be flɛ i sa nuan su sɛsɛ yolɛ’n i bo weiin. I sɔ’n ti’n, sran’m b’a wunman Ɲanmiɛn i sa nuan su sɛsɛ yolɛ’n i wlɛ kaan sa. Sa wie’m be kle sɔ. Maan e nian.

⁹ Zoova seli i nvlefuɛ’m be kɛ nán be fa be wun mantan nvle nga be bo sin yia be’n be nunfuɛ mɔ be ti amuin sɔfuɛ’n. (1 Famiɛn Mun 11:1, 2) Sanngɛ Zifu’m be Ɲanmiɛn sulɛ wafa’m be su kpɛnngbɛn wie’m be wlawlali sran’m be kɛ be fa be ɲin ci be nga be timan Zifu’n. Be klɛli Zifu’m be fluwa kun (Mishna) nun kɛ: “Ɔ fataman kɛ Zifu kun yaci i nnɛn mun be nga be timan Zifu’n be aofuɛ sua’n nun, afin be bu i kɛ be nin nnɛn’m be la.” Wafa nga Zifu’m be bu be kwlaa nga be timan Zifu’n, ɔ timan su mlɔnmlɔn. Yɛ ɔ nin Moizi i Mmla’n be kɔman likawlɛ bɔɔ kaan sa. (Sanwun Yolɛ 19:34) Asa ekun’n, mmla nga Zifu’m be kpɛli’n kle kɛ be buman bla’m be wie. Be nun kun se kɛ sɛ yasua kun nin i yi be su nanti bé kɔ́ lika’n, ɔ fata kɛ bla’n ka siɛn. Asa ekun’n, be waan nán yasua kun nin bla kun, ɔ wie i yi bɔbɔ’n be koko yalɛ nzra nun. Kpɛkun sɛ be su di sran jɔlɛ’n, bla’m be kwlá diman lalo nun. Be yo be kɛ kanga mun sa. Zifu’m be Ɲanmiɛn srɛlɛ kun nun bɔbɔ’n, yasua’m be la Ɲanmiɛn i ase, afin b’a wuman be bla.

¹⁰ Zifu’m be Ɲanmiɛn sulɛ wafa’m be su kpɛnngbɛn’m be kpɛli mmla kpanngban be fa ukali Ɲanmiɛn Mmla’n su. Ɲanmiɛn Mmla’n waan nán be di junman Wunmiɛn-lolɛ-cɛn’n nun, naan be fa cɛn sɔ’n be su i. Sanngɛ Farizifuɛ’m be ti’n, mmla sɔ’n i su nantilɛ’n wa yoli kekle. “Junman” ng’ɔ fataman kɛ wunmiɛn lolɛ cɛn’n nun’n be di’n, be waan ɔ ju i liɛ ablasan-nin-ngwlan (39). I wie yɛle fie su ninnge’m be tilɛ’n nin koniɛn dilɛ’n. Sanngɛ like nɲɔn sɔ’m be ti’n, sran wie’m be kwla usa be wun kɛ: ?Sɛ wunmiɛn lolɛ cɛn’n nun’n, sran kun ɔ kun sɔsɔwa’n, i sɔ’n ti koniɛn dilɛ? ?Annzɛ sɛ sran kun sin fie wie nun naan ɔ fian ble annzɛ like uflɛ wie i mma naan ɔ di’n, i sɔ’n ti fie su junman dilɛ? ?Sɛ kusu cɛn sɔ’n nun’n, be yo sran kun i juejue’n, nn ɔ ti kɛ junman yɛ b’a di-ɔ? Kɛ ɔ ko yo naan b’a tɛ kosan kwlaa sɔ’m be su’n, Zifu’m be Ɲanmiɛn sulɛ wafa’m be su kpɛn’m be kpɛli mmla tɛkɛtɛkɛ wie mun. Yɛ mmla sɔ’m be su nantilɛ’n ti kekle.

11, 12. ?Wafa sɛ yɛ Zezi kleli kɛ Farizifuɛ’m be mmla nga be kpɛli’n ɔ timan su-ɔ?

¹¹ ?Kɛ mɔ lika’n w’a yo kɛ ngalɛ sa’n niɔn, wafa sɛ yɛ Zezi kwla uka sran mun naan b’a wun sa nuan su sɛsɛ yolɛ’n i wlɛ-ɔ? Ndɛ ng’ɔ kannin ɔ nin i nzuɛn’n be kleli kɛ Zifu’m be Ɲanmiɛn sulɛ wafa’m be su kpɛnngbɛn’m be mmla’n timan su. Maan e dun mmua kan ndɛ nga Zezi kannin be’n be ndɛ. Ɔ buli be mmla kpanngban nga be kpɛli’n be fɔ. Ɔ seli kɛ: “Amun nannan’m be mmla mɔ amun kle sran mun’n ti’n, amun a yo maan sran’m be buman Ɲanmiɛn i ndɛ’n i like fi kun.”—Marki 7:13.

¹² Zezi kleli i sran kwlaa ɲrun kɛ Wunmiɛn-lolɛ-cɛn’n i su ndɛ’n nun’n, Farizifuɛ’m be dili fɔ, naan b’a wunman mmla sɔ’n i wlɛ. Ɔ yiyili nun kɛ Mesi’n “ti Wunmiɛn-lolɛ-cɛn’n i Min,” naan i sɔ’n ti’n, ɔ le atin yo sran’m be juejue cɛn sɔ’n nun. (Matie 12:8) Ɔ maan ɔ yoli sran’m be juejue nzra nun Wunmiɛn-lolɛ-cɛn’n nun ɔ fa yili i nglo kɛ ɔ le atin yo sɔ. (Liki 6:7-10) I sɔ m’ɔ yoli’n kle kɛ i Afuɛ Akpi Famiɛn Dilɛ Blɛ’n nun’n, ɔ́ yó asiɛ’n sufuɛ’m be kwlaa be juejue. Afuɛ akpi sɔ’n ɔ́ yó sran’m be Wunmiɛn-lolɛ-cɛn danfuɛ’n. Afin bé ɲán be ti sa tɛ’n nin wie’n be sa nun.

13. ?Kɛ Klisi wieli i junman’n i di asiɛ’n su wa’n, mmla benin yɛ be wa dili su-ɔ? ?Ngbaciɛ benin yɛ ɔ o mmla sɔ’n nin Moizi Mmla’n be afiɛn-ɔn?

¹³ Mmla uflɛ kun yɛ Zezi fa yiyili sa nuan su sɛsɛ yolɛ’n nun-ɔn. Kɛ ɔ wieli i junman’n i di asiɛ’n su wa’n, yɛ be boli mmla sɔ’n i su dilɛ bo-ɔ. Mmla sɔ’n yɛ be flɛ i “Klisi i mmla’n” niɔn. (Galasifuɛ Mun 6:2) Ɔ timan kɛ Moizi Mmla’n sa. Nán mmla kpanngban mɔ be klɛ be tɛɛn be guɛ i lɔ’n, be su yɛ “Klisi i mmla’n” taka-ɔ. I liɛ’n, akunndan nga Ɲanmiɛn bu’n i su yɛ ɔ taka-ɔ. Sanngɛ mmla trele wie’m be o nun. Be nun kun yɛ Zezi flɛli i ‘mmla uflɛ’n’ niɔn. Zezi kleli i sɔnnzɔnfuɛ’m be kwlaa be kɛ klolɛ nga ɔ fa kloli be’n, maan be nian su be klo be wiengu sɔ. (Zan 13:34, 35) Nanwlɛ, be klun mɔ be tu be klo be wiengu sɔ’n, yɛ be fa sie be kwlaa nga be di “Klisi i mmla’n” su’n be nzɔliɛ-ɔ.

Ɔ yoli sa nuan su sɛsɛ

14, 15. ?Wafa sɛ yɛ Zezi kleli kɛ i kwlalɛ’n ɔ le awɛ-ɔ? ?Yɛ ngue yɛ i sɔ’n kle e Zezi su-ɔ?

¹⁴ Nán be wiengu klolɛ’n i su like ngunmin yɛ Zezi kleli-ɔ. Sa kwlaa nun’n, ɔ kleli kɛ ɔ nantili i bɔbɔ ‘Klisi’n i mmla’n’ su wie. Maan e nian ndɛ ja nsan mɔ be kle weiin kɛ Zezi yoli sa nuan su sɛsɛ’n.

¹⁵ I klikli’n yɛle kɛ Zezi w’a yoman sa tɛ kaan sa le. Atrɛkpa’n, amun a sie i nzɔliɛ le kɛ sran nga be fa be kwlalɛ’n be tu be wun’n, mɔ be tin be wiengu’m be su’n, be yoman sa nuan su sɛsɛ. Zezi liɛ’n ɔ timan sɔ. Cɛn kun’n, sran kun usɛli i kɛ: “Like Klefuɛ, se min niaan bian’n kɛ ɔ nin min cɛ e aja’n nun.” Yɛ ɔ tɛli i su kɛ: “?Wan yɛ ɔ sieli min kɛ n yo amun sran nɲɔn’n amun su jɔlɛ difuɛ annzɛ amun afiɛn siesiefuɛ-ɔ?” (Liki 12:13, 14) ?Ngue yɛ ndɛ sɔ’n kle e-ɔ? Zezi i ngwlɛlɛ’n nin i sa wlɛ wunlɛ’n leman wunsu asiɛ’n su wa. Ɲanmiɛn w’a manman sran fi kwlalɛ kɛ Zezi sa. Sanngɛ ndɛ nga b’a tumɛn i kɛ ɔ siesie’n, w’a kplinman su kɛ ɔ́ fɛ́ i nuan wlá nun. Zezi yoli wun ase kanfuɛ titi. I nun ng’ɔ o ɲanmiɛn su lɔ bɔbɔ’n, ɔ yili nzuɛn sɔ’n i nglo. (Zidi 9) Zezi ti wun ase kanfuɛ, afin ɔ loli i wun mannin Zoova yɛ Zoova kusu kleli i sa ng’ɔ ti i nuan su sɛsɛ yolɛ’n niɔn.

16, 17. (1) ?Ɲanmiɛn Sielɛ jasin fɛ’n i bolɛ’n nun’n, wafa sɛ yɛ Zezi kleli kɛ ɔ yo sa nuan su sɛsɛ-ɔ? (2) ?Kɛ Zezi yó sa nuan su sɛsɛ’n, wafa sɛ yɛ ɔ fa aunnvɔɛ silɛ nannannin su-ɔ?

¹⁶ I nɲɔn su’n, wafa nga Zezi boli Ɲanmiɛn Sielɛ jasin fɛ’n ɔ kle kɛ ɔ yo sa nuan su sɛsɛ. W’a kpaman sran nun. Sanngɛ i aɲanbeunfuɛ-o, i yalɛfuɛ-o, ɔ tuli i klun boli jasin fɛ’n kleli be kwlaa kpan. Farizifuɛ’m be liɛ’n, b’a buman yalɛfuɛ mun nin sran ngbɛn’m be sran. Be flɛ be kɛ “amun-aarɛsi” yɛle kɛ “nvle’n i nunfuɛ mun.” Be flɛ be sɔ be fa yo be finfin. Zezi w’a yoman kɛ Farizifuɛ mun sa. Kɛ ɔ́ bó jasin fɛ’n klé sran mun-o, annzɛ ɔ nin bé dí like-o, annzɛ ɔ́ mán be aliɛ-o, annzɛ ɔ́ yó be juejue annzɛ ɔ́ cɛ́n be nguan -o, i kwlaa ngalɛ nun’n, ɔ yili Ɲanmiɛn i sa nuan su sɛsɛ yolɛ’n i nglo. Afin Ɲanmiɛn klo kɛ be kle “sran wafawafa kwlaa” be like.c—1 Timote 2:4.

¹⁷ I nsan su’n, kɛ Zezi yó sa nuan su sɛsɛ’n, ɔ fa aunnvɔɛ silɛ nannan su. Ɔ wlɛli i wun ase ukali sa tɛ yofuɛ mun. (Matie 9:11-13) Yɛ ɔ tu i klun ukali be nga be leman ɲrun’n. Zezi w’a yoman kɛ Zifu’m be Ɲanmiɛn sulɛ wafa’m be su kpɛnngbɛn mɔ be kloman kɛ bé fá be wun mántan be nga be timan Zifu’n be sa. Kannzɛ bɔbɔ Zifu’m be ti yɛ Zezi bali’n, sanngɛ i sran aunnvɔɛ silɛ’n ti’n, ɔ ukali nvle uflɛ nunfuɛ mun wie, yɛ ɔ kleli be like. Be nun kun yɛle Rɔmunfuɛ’m be sonja ya su kpɛn kun mɔ Zezi yoli i gbanflɛn’n i juejue’n. Zezi seli kɛ: “Izraɛli nvle’n nun’n, m’an wunman sran fi m’ɔ lafi Ɲanmiɛn su dan kɛ bian nga sa-ɔ.”—Matie 8:5-13.

18, 19. (1) ?Wafa sɛ yɛ Zezi kleli kɛ ɔ bu bla’m be sran-ɔn? (2) ?Wafa sɛ yɛ Zezi i ajalɛ’n uka e naan y’a wun kɛ yakpa yolɛ’n nin sa nuan su sɛsɛ yolɛ’n be kɔ likawlɛ-ɔ?

¹⁸ I kunngba’n, wafa nga Zezi blɛ su sran’m be yo bla mun’n, w’a jɔmɛn i klun. Sanngɛ yakpa su, ɔ yoli sa nuan su sɛsɛ. Zifu’m be waan Samari bla’m be ti kɛ be nga be timan Zifu’n sa, be timan sanwun. Sanngɛ Zezi w’a jrɛnmɛn i sɔ’n su, ɔ boli jasin fɛ’n kleli Samari bla kun nzue gbo kun su Sikaa lɔ. Sran klikli nga Zezi seli i weiin kɛ i yɛ ɔ ti Mesi nga be waan ɔ́ bá’n, yɛle Samari bla sɔ’n. (Zan 4:6, 25, 26) Farizifuɛ’m be waan nán be fa Ɲanmiɛn i Mmla’n be kle bla mun. Sanngɛ Zezi fali blɛ kpanngban kleli bla’m be like. (Liki 10:38-42) Zifu’m be waan be kwlá faman lalo nga bla’m be di’n su. Sanngɛ kɛ Zezi cɛnnin nguan’n, bla kpanngban wie’m be ɲrun yɛ ɔ dun mmua fiteli-ɔ. I kpa’n, ɔ seli be kɛ be ko bo sa cinnjin sɔ’n su kle i sɔnnzɔnfuɛ yasua mun!—Matie 28:1-10.

¹⁹ Zezi kannin sa nuan su sɛsɛ yolɛ’n i ndɛ weiin kleli nvlenvle mun. I sɔ yolɛ’n nun’n, wie liɛ bɔbɔ’n ɔ fɛ i nguan’n sieli i wie nuan. Zezi i ajalɛ’n kle e kɛ sɛ e waan é yó sa nuan su sɛsɛ’n, ɔ fata kɛ e yo yakpa. Sa nuan su sɛsɛ yolɛ yakpa su’n, i nzɔliɛ like yɛle asɔmɔli’n. I sɔ’n ti yɛ be flɛli Zezi kɛ “Zida akpasua’n nun Asɔmɔli’n” niɔn. (Sa Nglo Yilɛ 5:5) Blɛ sunman’n, Biblu’n nun’n kɛ be kan asɔmɔli m’ɔ ti yakpafuɛ’n i ndɛ’n, sa nuan su sɛsɛ yolɛ’n i su yɛ be waan bé fá e ɲin síe-ɔ. Ɔ ka kan’n, Zezi wá yó sa dandan wie mun ekun naan ‘sa nuan su sɛsɛ yolɛ’n tran asiɛ’ wunmuan’n su tititi.—Ezai 42:4.

Mesi’n maan ‘asiɛ’n sufuɛ’m bé sí sa kpa yolɛ’n i atin’n’

20, 21. ?Dɔ nga su’n, wafa sɛ yɛ Mesi’n yili sa nuan su sɛsɛ yolɛ’n i nglo asiɛ’n su ɔ nin Klisifuɛ’m be afiɛn-ɔn?

²⁰ Kɛ ɔ fɛ i afuɛ 1914 nun mɔ Mesi’n yoli famiɛn’n, ɔ yili sa nuan su sɛsɛ yolɛ’n i nglo asiɛ’n su. ?Wafa sɛ yɛ ɔ yoli sɔ-ɔ? Ɔ yoli maan i nuan ndɛ ng’ɔ o Matie 24:14 nun’n, ɔ kpɛnnin su. I sɔnnzɔnfuɛ’m be boli Ɲanmiɛn Sielɛ’n i jasin’n be kleli sran mun asiɛ wunmuan’n su. Kɛ Zezi sa’n, kɛ bé bó jasin fɛ’n be kpaman sran nun. I gbanflɛn-o, i kpɛnngbɛn-o, i aɲanbeunfuɛ-o, i yalɛfuɛ-o, i yasua-o, i bla-o, be bo jasin fɛ’n kle be kwlaa naan be bla be wa si Ɲanmiɛn Zoova m’ɔ yo sa nuan su sɛsɛ’n.

²¹ Asa ekun’n, Zezi yo maan sa nuan su sɛsɛ yolɛ’n wo Klisifuɛ’m be afiɛn. Afin i yɛ ɔ sie asɔnun’n niɔn. Kɛ nga Ɲanmiɛn nuan ijɔfuɛ’m be fa kannin’n sa’n, “ɔ fali sran wie mun mannin.” Sran sɔ mun yɛle asɔnun kpɛnngbɛn mɔ be nian Ɲanmiɛn i bua fa’n i lika’n. (Efɛzifuɛ Mun 4:8-12) Junman sɔ’n i dilɛ’n nun’n, be nian Zezi Klisi i ajalɛ’n su, be yo sa i nuan su sɛsɛ. Maan Zezi i bua’m be yo aɲanbeunfuɛ annzɛ yalɛfuɛ-o, kɛ bé nían be su’n, be wla fiman su kɛ Zezi kunndɛ kɛ be yo be cɛcɛ naan be yo sa i nuan su sɛsɛ.

22. ?Kɛ andɛ sran’m be yoman sa i nuan su sɛsɛ’n, i sɔ’n yo Zoova sɛ? ?Yɛ junman benin yɛ ɔ fa wlɛli i Wa’n i sa nun-ɔn?

²² Ɔ ka kan’n Zezi wá yó naan sa i nuan su sɛsɛ yolɛ’n tran asiɛ wunmuan’n su mlɔnmlɔnmlɔn. Sa mɔ be yomɛn i nuan su sɛsɛ’n yɛ w’a tru lika’n nun-ɔn. Sa mɔ be yomɛn i nuan su sɛsɛ’n i ti yɛ bakanngan wie’m be ɲanman aliɛ diman mɔ be wu’n niɔn. Afin sran’m be fa be blɛ ɔ nin sika kpanngban be fa yi alɛ ninnge mun, be fa di mɛn lele be wunmɛn i diwlɛ kun. Afuɛ nuan kwlaa nun’n, sran miliɔn kpanngban be wu, kusu nn sran’m be kwla yo naan b’a wuman. I sɔ’n yɛ ɔ kun Zoova i ya kpa’n niɔn. I ti yɛ ɔ sieli i Wa’n kɛ ɔ nin mɛn siefuɛ’m be kun naan be nga be yoman sa i nuan su’n, ɔ nunnun be mlɔnmlɔn’n niɔn.—Sa Nglo Yilɛ 16:14, 16; 19:11-15.

23. ?Kɛ Aamagedɔn alɛ’n ko wie’n, ngue yɛ Klisi yó naan sa nuan su sɛsɛ yolɛ’n tran lɛ tititi-ɔ?

²³ Sanngɛ nán klunwifuɛ’m be nunnunlɛ ngunmin yɛ Zoova fá klé kɛ ɔ yo sa i nuan su sɛsɛ-ɔ. Ɔ sieli i Wa’n kɛ ɔ yo “Fɔundi Wlengbi.” Kɛ Aamagedɔn alɛ’n ko wie’n, “sa nuan su sɛsɛ yolɛ’n,” i su yɛ Zezi i famiɛn dilɛ’n táka-ɔ. (Ezai 9:6, 7) Sa kwlaa nga be kle sran’m be ɲrɛnnɛn asiɛ’n su’n, aklunjɔɛ su yɛ Zezi núnnún be-ɔ. Ɔ́ yó sa nuan su sɛsɛ titi kɛ Zoova sa. I sɔ’n ti yɛ dɔ nga su’n ɔ fata kɛ e sɔnnzɔn Zoova i sa nuan su sɛsɛ yolɛ’n niɔn. É wá wún wafa nga e kwla yo sɔ’n.