Zoova kacimɛn i ndɛ ng’ɔ kan’n
Neemi fluwa’n i nun ndɛ cinnjin mun
KƐ SA kasiɛn nga Ɛsdras fluwa’n kɛn i ndɛ’n yoli’n, i afuɛ blu nin ngwlan w’a sin. Ɔ cɛ kaan’n, bé wá kán ‘Zerizalɛmufuɛ’m be sin salɛ’n, nin Zerizalɛmu klɔ’n i uflɛ kplanlɛ’n i ndɛ.’ Blɛ sɔ’n nun yɛ afuɛ 70 sɔ nso’n nga be awieliɛ su yɛ Mɛsi’n bá’n, bé wá bó be kalɛ’n bo ɔ. (Daniɛl 9:24-27) Neemi fluwa’n kan Ɲanmiɛn i nvle’n nunfuɛ’m be Zerizalɛmu klɔ’n i wun talɛ’n kplanlɛ’n i ndɛ. Neemi fluwa’n nun ndɛ’m be boli be bo afuɛ 456 nun ka naan y’a ju Zezi blɛ su. Kpɔkun be wieli afuɛ 443 nun ka naan y’a ju Zezi blɛ su. I sɔ’n kwlaa dili afuɛ 12. Afuɛ 12 sɔ’m be ti cinnjin kpa.
Nvle siefuɛ Neemi i fluwa sɔ’n kle e kɛ, kɛ be tu be klun be fa ajalɛ mɔ be lafi Ɲanmiɛn Zoova su’n, Ɲanmiɛn i sulɛ kpa’n ɲan ɲrun dan. Ɔ kle wafa nga Zoova siesie sa mun naan like nga i waan ɔ́ yó’n w’a kpɛn su’n. Asa ekun’n, fluwa sɔ’n kan nvle siefuɛ juejue nin yakpafuɛ kun ndɛ. Neemi fluwa’n i nun ndɛ’m be man andɛ Ɲanmiɛn i sufuɛ kpa’m be kwlaa be afɔtuɛ ‘afin Ɲanmiɛn i ndɛ nga ɔ ko kan’n, nn w’a kan ɔ kacimɛn i, ɔ maan sran’m be kaci.’—Ebre Mun 4:12.
“TALƐ’N WIELI”
Neemi o famiɛn klɔ nga be flɛ i Sizi’n su. Ɔ ti Famiɛn Artaksɛrksɛsi Sa tɛnndɛn i awlɛn su junman difuɛ kpa. Be seli Neemi kɛ i nvle’n nunfuɛ’m ‘be o ɲrɛnnɛn nin ɲannzuɛn’n nun. Yɛ be seli i ekun kɛ Zerizalɛmu klɔ’n i talɛ’n wie w’a bu, yɛ be wɔli i anuan’m be nun.’ Kɛ Neemi tili ndɛ sɔ’n, i angunndan’n sanngannin dan kpa. Ɔ srɛli Ɲanmiɛn kɛ ɔ kle i ajalɛ ng’ɔ kwla fa’n. (Neemi 1:3, 4) Famiɛn’n wunnin kɛ Neemi i ɲrun’n ti mlanwa. Lɛ’n nun yɛ Neemi ɲannin atin ɔli Zerizalɛmu ɔ.
Kɛ Neemi juli Zerizalɛmu lɔ’n, ɔ jasoli kɔnguɛ naan w’a ko kpla Zerizalɛmu i talɛ’n w’a nian. I sin’n, wafa nga bé wá bó klɔ’n i wun talɛ’n i kplanlɛ’n bo’n, ɔ kannin kleli Zuifu mun. Kɛ be boli talɛ’n i kplanlɛ’n bo’n, yɛ be kpɔfuɛ’m be kusu be boli be ɲrun tanndanlɛ’n bo ɔ. Sanngɛ Neemi m’ɔ ti yakpafuɛ’n, m’ɔ dun be ɲrun mmua’n ti’n, “talɛ’n wieli.”—Neemi 6:15.
Ɲanmiɛn Ndɛ’n i su kosan’m be su tɛlɛ:
1:1; 2:1—?Blɛ kunngba’n nun yɛ be boli “afuɛ ablaɔn” nga be kan be ndɛ ndɛ mma nɲɔn nga’m be nun’n, be kalɛ’n bo ɔ? Ɛɛn. Famiɛn Artaksɛrksɛsi i famiɛn bia’n su tranlɛ’n i afuɛ 20 su i ndɛ yɛle nga bé kɛ́n i lɛ’n. Sanngɛ wafa nga be kali blɛ mun ndɛ mma nɲɔn nga’m be nun’n, ɔ timan kun. Laa ndɛ’m be kle kɛ afuɛ 475 nun ka naan y’a ju Zezi blɛ su’n, i nun yɛ Artaksɛrksɛsi trannin famiɛn bia’n su ɔ. Kɛ Babilɔni lɔ fluwa klɛfuɛ’m bé ká Pɛrsi mɛn su famiɛn’m be famiɛn dilɛ blɛ’n, be bo i bo Nisan anglo’n su (Marsi/Avrili) kpɔkun be guɛ i bo Nisan anglo’n su. I sɔ’n kle kɛ Artaksɛrksɛsi i famiɛn dilɛ’n i afuɛ klikli’n boli i bo afuɛ 474 Nisan anglo’n nun ka naan y’a ju Zezi blɛ su. I sɔ’n ti’n, famiɛn dilɛ afuɛ ablaɔn su nga be kɛnnin i ndɛ Neemi 2:1 nun’n, ɔ boli i bo afuɛ 455 nun Nisan anglo’n nun ka naan y’a ju Zezi blɛ su. Sɛ e waan é níɛn i sa’n, Kisle anglo (Novamblu/Desamblu) nga be kɛn i ndɛ Neemi 1:1 nun’n, yɛle afuɛ 456 nun Kisle anglo liɛ’n ka naan y’a ju Zezi blɛ su’n. Neemi waan anglo sɔ’n nun yɛ Artaksɛrksɛsi i famiɛn dilɛ’n i afuɛ 20 su’n boli i bo ɔ. Atrɛkpa’n famiɛn’n i bia’n su tranlɛ’n i su yɛ be boli afuɛ sɔ’m be kalɛ’n bo ɔ. Atrɛkpa kusu’n, wafa nga andɛ Zuifu’m be siesie be afuɛ’n, i su yɛ Neemi niannin kali blɛ sɔ’n niɔn. Zuifu’m be afuɛ sɔ’n bo i bo Tisri anglo’n su. Tisri anglo’n yɛle Sɛptamblu/Ɔktɔblu. I kwlaa yoli o, afuɛ 455 nun ka naan y’a ju Zezi blɛ su’n yɛ be kannin Zerizalɛmufuɛ’m be sin salɛ’n, i ndɛ ɔ.
4:11, 12—?Wafa sɛ yɛ Zerizalɛmu klɔ’n i wun talɛ’n i kplanlɛ uflɛ’n nun’n, be fali be sa kunngba yɛ be dili junman’n niɔn? I sɔ yolɛ’n w’a yoman kekle w’a manman be nga be fa trɔ’n sie be ti su annzɛ be wati su’n. Be fa be sa kun tra trɔ’n nun. Kpɔkun “alɛ kunlɛ like o be sa kun’n nun.” Talɛ i kplanfuɛ’m be liɛ’n, kɛ mɔ be sa nɲɔn’n yɛ be fa di junman’n ti’n, “kɛ bé dí junman’n, nn be tokofi’n san be bo.” I liɛ’n sɛ be kpɔfuɛ’m be fu be nun’n, be ja nun lɛ’n, be nin be kwla kun.
5:7—?Wafa sɛ yɛ Neemi ‘ijɔli kpɛnngbɛn nin jɔlɛ difuɛ mun ɔn’? Sran sɔ’m be bo be niaan Zuifu’m be akpo. I sɔ yolɛ’n nun’n be fɔnnin Moizi Mmla’n. (Saun Yolɛ 25:36; Mmla’n 23:20) I kpa’n bɔbɔ’n, be nga be kalɛ o sran su’n, mmlusuɛ nga be fa’n, ɔ cɛnnin ngboko. Sɛ é kwlá sé’n, sɛ sran kun fa like ya kalɛ nun’n, naan be se i kɛ anglo kwlaa nun’n ɔ yi like ng’ɔ fali’n i su mmlusuɛ kun’n, afuɛ kun nun’n, like ya sɔ m’ɔ fɛli i kalɛ nun’n, i su “mmlusuɛ” nga ɔ́ mán’n yó like blu nin nɲɔn. (Neemi 5:11) I sɔ yolɛ’n ti sran ɲrɛnnɛn klelɛ. Afin nvle’n nunfuɛ’m be su lapo man nvle ng’ɔ sie be’n, asa ekun awe’n o be su ekun. Neemi ijɔli aɲanbeunfuɛ sɔ mun. Yɛle kɛ ɔ fali Ɲanmiɛn Mmla’n i nun ndɛ mun tuli be fɔ. Kpɔkun ɔ yili be ayeliɛ tɛtɛ’m be nglo.
6:5—?Titi kɛ bé klɛ́ nvialiɛ nun sa mun fluwa kun su kɛ bé fá kó mán sran’n, be wlɛ i pata kun nun kpɔkun be cici i kpa. ?Sanngɛ ngue ti yɛ kɛ Sanbalati ɔ́ klɛ́ Neemi i fluwa’n, “ɔ klɛli fluwa kunngba sɔ’n sinnin lika sunman nun ɔn”? Atrɛkpa’n, Sanbalati kunndɛli kɛ sran’m be kwlaa be kanngan ato ndɛ ng’ɔ kɛnnin i Neemi su’n, m’ɔ o fluwa sɔ’n nun’n. Atrɛkpa’n, ɔ bu i kɛ i sɔ’n yó Neemi i ya lele maan ɔ́ yáci talɛ’n i kplanlɛ naan ɔ nin i bé kó kán. Annzɛ kusu Sanbalati kwla bu i ekun kɛ, kɛ Zuifu’m be kwlaa bé wá kánngan ndɛ sɔ’n, i nun jasin’n ɔ́ kún be srɛ dan. Ɔ maan be ngba bé yáci be junman’n i dilɛ. Neemi w’a lomɛn i wun w’a mɛnmɛn i mlɔnmlɔn. Ɔ guɛli i awlɛn ase yɛ ɔ dili junman nga Ɲanmiɛn fa mɛnnin i’n.
Afɔtuɛ ng’ɔ man e’n:
1:4; 2:4; 3:36, 37. Sɛ asamian wie o e su’n, annzɛ sɛ é fá ajalɛ cinnjin wie’n, maan ‘e nin Ɲanmiɛn e koko yalɛ titi, nán e kpɔnzɔ.’ Maan e nian ajalɛ nga be o Ɲanmiɛn i ndɛ’n nun’n be su e nanti.—Rɔmfuɛ Mun 12:12.
1:11–2:8; 3:36, 37; 4:9, 10; 6:16. Zoova tɛ i sufuɛ’m be srɛlɛ tankaan’n su.—Jue Mun 86:6, 7.
1:4; 4:13, 14; 6:3,15. Neemi ti aunnvuɛ sifuɛ. Sanngɛ ɔ yoli sran juejue. Sa i nuan su yolɛ’n nun’n, srɛ w’a kunmɛn i. I sɔ’n man e ajalɛ klanman kpa kun.
1:11–2:3. Nán nzan sufuɛ junman m’ɔ le ɲrun kpa’n, yɛ ɔ man Neemi i aklunjuɛ ɔ. Ɲanmiɛn sulɛ kpa’n i trɛlɛ’n yɛ ɔ mɛnnin i aklunjuɛ ɔ. ?Ɔ nin i fataman kɛ Zoova i sulɛ’n i trɛlɛ’n, ɔ nin ninnge nga be kwla yo maan i sulɛ’n trɛ’n, be ndɛ lo e naan e di su aklunjuɛ?
2:4-8. Zoova yoli maan Artaksɛrksɛsi mannin Neemi atin kɛ ɔ wɔ Zerizalɛmu ko kplan klɔ’n i wun talɛ’n. Nyanndra Mun 21:1 se kɛ: ‘Famiɛn’n i klun angunndan’n, ɔ ti kɛ nzue ba sa. Kan Zoova tinndin i sa’n lɛ’n, lɛ yɛ ɔ kɔ ɔ.’
3:5, 27. Sɛ Ɲanmiɛn sulɛ kpa’n i trɛlɛ’n ti e di junman nga sran’m be bumɛn i like fi’n, nán maan e bu i kɛ i sɔ’n gua e ɲin ase kɛ nga Tekoafuɛ’m be “kpɛnngbɛn’m” be buli i’n sa. Sanngɛ maan e sɔnnzɔn Tekoafuɛ nga be tuli be klun dili junman’n.
3:10, 23, 28-30. Sran wie’m be kwla tu ajalɛ kɔ kan be le jasin fɛ’n bofuɛ’m be awuliɛ lɔ’n. E nun wie mun kusu e suan Ɲanmiɛn sulɛ kpa’n i bo kan e tran lɛ’n. Yɛle kɛ e kwla uka aniaan mun Ɲanmiɛn Sielɛ Blɛ sua’m be kplanlɛ’n nun. Asa ekun’n e kwla man e sa nun like fa uka be nga ɲrɛnnɛn sa w’a tɔ be su’n. Sanngɛ ng’ɔ ti cinnjin’n yɛle kɛ e bo Ɲanmiɛn Sielɛ Blɛ jasin fɛ’n.
4:8. Kɛ bé klé e yalɛ’n, sɛ e bu Zoova ‘m’ɔ ti dan m’ɔ yo sro’n’ i angunndan’n, é kwlá jrán kekle wie.
5:14-19. Nvle siefuɛ Neemi yoli wun ase kanfuɛ. W’a bumɛn i ngunmin i wun angunndan, kpɔkun ɔ yoli ngwlɛlɛfuɛ. I kwlaa sɔ’n nun’n, ɔ man Klistfuɛ nga be ti asɔnun sunianfuɛ’n be ajalɛ klanman kpa. Juejue su’n, ɔ yoli maan sran’m be niannin Ɲanmiɛn i Mmla’m be su nantili. Sanngɛ w’a tintinman be su naan w’a fa kunndɛ i bɔbɔ klunklo like. I kpa’n bɔbɔ’n, be nga sran’m be mianmian be’n, ɔ nin yalɛfuɛ’m be ndɛ loli i. Neemi yoli klun ufuefuɛ dan. I sɔ yolɛ’n man Ɲanmiɛn i sufuɛ’m be kwlaa be ajalɛ klanman kpa ekun.
‘MIN ƝANMIƐN, MAAN Ɔ WLA KPƐN MIN SU, NAAN YO MIN YE’
Kɛ be wieli Zerizalɛmu i wun talɛ’n kplan cɛ’n, Neemi wlɛli i anuan mun. Kpɔkun ɔ fali klɔ’n i sasalɛ’n i wun ajalɛ wie mun. Ɔ klɛklɛli nvle’n nunfuɛ’m be osufuɛ’m be dunman mun. Kɛ nvle’n nunfuɛ’m “be kwlaa be yiali anuan nga be flɛ i Nzue anuan’n i ɲrun lɛ gbaun’n nun’n,” Ɲanmiɛn ɲrun jranfuɛ Ɛsdrasi kanngannin Mmla fluwa nga Ɲanmiɛn maan Moizi klɛli’n nun. Kpɔkun Neemi nin Levifuɛ’m be tuli Mmla’n i bo kleli sran mun. (Neemi 8:1) Kɛ sran’m be tili kpata bo tranlɛ cɛn’n i dilɛ’n su ndɛ’n, be dili cɛn sɔ’n aklunjuɛ nun.
I sin’n, be yoli aɲia uflɛ kun ekun. Aɲia sɔ’n nun’n, “Izraɛlifuɛ’m” be kokoli be bɔbɔ be sa tɛ’n ɔ nin be nannan’m be liɛ’n. Kpɔkun wafa nga Ɲanmiɛn nin Izraɛlifuɛ’m be nantili’n, Levifuɛ’m be fa kpɛnnin be wla. I sin’n, nvle’n nunfuɛ’m be ‘kwlaa be tali nda yɛ be jrannin su kɛ bé fá Ɲanmiɛn i mmla’m be su.’ (Neemi 9:1, 2; 10:30) Kɛ mɔ sran’m be nin a sɔnman Zerizalɛmu lɔ’n ti’n, be tuli sran’m be wun fɔtɔ. Kɛ be tu sran blu be wun fɔtɔ’n, be nun kun trán Zerizalɛmu Ɲanmiɛn i klɔ’n su, yɛ be nun ngwlan bé trán klɔ uflɛ’m be su. I sin’n, be yili Zerizalɛmu talɛ’n i nglo. Be dili aklunjuɛ dan. Ɔ maan “be [kwla] tili Zerizalɛmufuɛ’m be aklunjuɛ kpanlɛ’n mmua.” (Neemi 12:43) Kɛ Neemi ɔli Zerizalɛmu’n m’ɔ dili afuɛ blu nin nɲɔn’n, ɔ sɛli i sin ko dili junman mannin Artaksɛrksɛsi ekun. Zuifu’m be wa tɔli sa tɛtɛ’m be yolɛ’n nun ekun. Kɛ Neemi sɛli i sin Zerizalɛmu lɔ ekun’n, ɔ fali ajalɛ cinnjin wie mun naan w’a siesie sa sɔ’n. Ɔ kɛnnin i wun ase srɛli Ɲanmiɛn. Ɔ seli kɛ: ‘Min Ɲanmiɛn, maan ɔ wla kpɛn min su, naan yo min ye.’—Neemi 13:31.
Ɲanmiɛn Ndɛ’n i su kosan’m be su tɛlɛ:
7:6-67—?Ngue ti yɛ awlobo nga be nin Zorobabɛli be sali be sin Zerizalɛmu lɔ’n, be nun sran’m be nuan nga Ɛsdrasi boli’n, ɔ nin Neemi liɛ’n timan kun’n niɔn? (Ɛsdras 2:1-65) Yɛle kɛ atrɛkpa’n, nán fluwa kunngba’m be su yɛ Ɛsdrasi nin Neemi be niannin be kali sran mun ɔn. Kun yɛle kɛ be nga be klɛli be dunman kɛ bé sá be sin’n, nán be ngba yɛ be sali be sin sakpasakpa ɔ. Asa ekun like ti mɔ ngbaciɛ trannin sran’m be kalɛ nɲɔn sɔ’m be afiɛn’n yɛle kɛ Zuifu nga klikli’n nun’n, b’a kwlá klɛman be osufuɛ’m be dunman’n, be wa klɛli i kasiɛn su. Sanngɛ sran’m be kalɛ nɲɔn sɔ’n nun’n like ng’ɔ ti kun’n yɛle kɛ Izraɛlifuɛ’m be kwlaa nga be sali be sin’n, be ti sran 42.360. Be sufuɛ mun nin jue tofuɛ’m be nunman nun.
10:35—?Ngue ti yɛ be seli nvle’n nunfuɛ mun kɛ be bu yie’n niɔn? Moizi Mmla’n nun’n, b’a seman kɛ Izraɛlifuɛ’m be bu yie be bla Ɲanmiɛn i sua’n nun. Mianlɛ mɔ be miannin’n ti yɛ be seli nvle’n nunfuɛ’m be kɛ be yo i sɔ’n niɔn. Ɔ fata kɛ be ɲan yie kpanngban naan b’a kwla yi tɛ nga be yrɛ i nnɛn’n kɔlikɔli’n Ɲanmiɛn i tɛ yiwlɛ’n su. Kɛ e niɛn i sa kusu’n, Ɲanmiɛn i sua’n nun junman difuɛ nga be le su kpɛn’n, mɔ be timan Izraɛlifuɛ’n b’a sɔnman. I sɔ’n ti kɛ ɔ ko yo naan b’a ɲan yie titi’n ti’n, be tuli sran’m be wun fɔtɔ.
13:6, 7—?Afuɛ nɲɛ yɛ Neemi dili naan w’a ba Zerizalɛmu ekun ɔn? Biblu’n seli kɛ: “Kɛ afuɛ’n ɔ́ wá wíe’n,” famiɛn’n mannin Neemi i atin naan w’a ɔ Zerizalɛmu. I lɛ’n nun’n, e kwla siman blɛ ng’ɔ dili naan w’a ba Zerizalɛmu ekun’n. Kɛ Neemi sɛ́ i sin Zerizalɛmu lɔ’n nn Izraɛlifuɛ’m be diman Ɲanmiɛn ɲrun jranfuɛ junman’n kun, yɛ be diman wunmiɛn lolɛ cɛn’n mmla’n su kun. Be nun sran sunman b’a ja nvle uflɛ nun bla mun yɛ be mma’n be kanman Zuifu’m be aniɛn’n kun bɔbɔ. Nanwlɛ, ninnge’m be kacili dan. Ɔ maan e kwla se kɛ Neemi cɛli lɔ kpa naan w’a ba Zerizalɛmu ekun.
13:25, 28—?Kannzɛ bɔbɔ sɛ Neemi ‘ijɔli’ Zuifu nga be sisi be bo Ɲanmiɛn i ndɛ’m be su falɛ’n nun’n, wafa sɛ yɛ ɔ tuli be fɔ ekun ɔn? Neemi ‘boli be sannzan.’ Yɛle kɛ ɔ kannin Ɲanmiɛn i sran’m be jɔlɛ dilɛ ndɛ ng’ɔ o Ɲanmiɛn i Mmla’n nun’n kleli be. Ɔ “boli sran sɔ’m be nun wie mun.” I sɔ’n kle kɛ atrɛkpa’n, ɔ mannin atin kɛ be bo be nin ngble naan sran kwlaa si kɛ be dili be jɔlɛ. Kɛ ɔ ko yo naan b’a si kɛ sa nga be yoli’n yo i ya dan’n ti’n, ɔ “tutuli be timuɛn mun.” Asa ekun’n, ɔ fuannin Eliasibu m’ɔ ti Ɲanmiɛn ɲrun jranfuɛ’m be su kpɛn’n, i anunman’n. I yɛ ɔ jali Sanbalati m’ɔ fin Ɔrɔn’n i wa bla’n niɔn.
Afɔtuɛ ng’ɔ man e’n:
8:8. Kɛ mɔ e ti Ɲanmiɛn Ndɛ’n i klefuɛ’n ti’n, ‘e tu ndɛ’m be bo.’ Yɛle kɛ e flɛ ndɛ’m be kpa yɛ e tin be su kpa. Asa ekun’n, kɛ é kán ndɛ ng’ɔ o Ɲanmiɛn Ndɛ’n nun’n é klé sran mun’n, e kpɛmɛn i wun. Kpɔkun e yiyi nun weinwein naan sran’m b’a kwla nian su b’a nanti.
8:10. Sɛ sran kun si kɛ ɔ di Ɲanmiɛn ninnge’m be yalɛ’n naan ɔ kunndɛ be’n, asa ekun sɛ ɔ nian Ɲanmiɛn i mmla’m be su nanti’n, ɔ́ dí ‘aklunjuɛ ng’ɔ fin Zoova’n.’ Ɔ ti cinnjin kpa kɛ e suan Biblu’n nun like cɛn kwlaa, e wɔ asɔnun aɲia’m be bo, e bo jasin fɛ’n juejue su naan e uka sran mun naan be yo Klist i sɔnnzɔnfuɛ.
11:2. Kɛ sran kun yáci i aja ninnge mun, m’ɔ́ kó trán Zerizalɛmu lɔ’n, ɔ kwla di yalɛ yɛ i ninnge wie’m be kwla fi i sa. Be nga be tuli be klun yoli i sɔ’n, be buli be wun klɛnlɛ angunndan. E kusu e kwla bu angunndan kunngba sɔ’n wie e aɲia dandan’m be bo ɔ nin blɛ uflɛ wie’m be nun. Yɛle kɛ sɛ e ɲɛn i wun atin’n, maan e uka sran uflɛ.
12:31, 38, 40-42. Jue tolɛ’n ti Zoova i manmanlɛ’n i wafa cinnjin kun. Ɔ yo maan e yi ye nga e si Zoova’n i nglo. Maan e aɲia’m be bo’n, e tu e klun e to jue.
13:4-31. Kɛ ɔ ko yo naan aɲanbeun ninnge’m be kunndɛlɛ ngboko’n, nin ndrunmun dilɛ’n, ɔ nin Ɲanmiɛn i wun jasolɛ’n b’a saciman e mɛn dilɛ’n ti’n, ɔ fata kɛ e nian e wun su.
13:22. Neemi si jrɛiin kɛ Ɲanmiɛn i kalɛ o i su. E kusu maan e si kɛ Zoova i kalɛ o e su wie.
Ɔ ti cinnjin kɛ Zoova klun jɔ e wun!
Jue tofuɛ’n seli kɛ: ‘Sua nga nán Zoova yɛ ɔ kplan’n, be nga be kplɛn i lɛ’n, be kle be wun yalɛ bɔ ngbɛn.’ (Jue Mun 127:1) Neemi fluwa’n kle weiin kɛ ndɛ sɔ’n ti nanwlɛ sakpa!
Afɔtuɛ nga e ɲɛn i fluwa sɔ’n nun’n ti weiin. Yɛle kɛ sɛ e kunndɛ kɛ ajalɛ kwlaa nga é fá’n yo ye man e’n, ɔ fata kɛ Zoova klun jɔ e wun. ?Sɛ e mɛn dilɛ’n nun’n, y’a dunman mmua y’a suman Zoova kɛ ng’ɔ nin i fata’n sa’n, é kwlá láfi su kɛ ɔ́ yrá e su? I sɔ’n ti’n, maan e fa Neemi i ajalɛ’n su. Yɛle kɛ maan Zoova i sulɛ’n ɔ nin i sulɛ’n i trɛlɛ’n be yo ninnge nga e bu be su angunndan’n be nun klikli’n.
[Foto, bue 28]
‘Famiɛn’n i klun angunndan’n, ɔ ti Zoova sa nun kɛ nzue ba sa.’
[Foto mun, bue 29]
Neemi, sran juejue m’ɔ si aunnvuɛ’n, i Zerizalɛmu balɛ’n.
[Foto mun, bue 30]
?Amun si wafa nga amun kwla ‘tu Ɲanmiɛn Ndɛ’n i nun ndɛ’m be bo’n’?