Maan e klo e niaan mun kpa titi

‘Sa kwlaa nga amún yó’n, an yo i sran klolɛ’n ti kɛ Krist kusu kloli ye’n sa.’—EFƐZFUƐ MUN 5:2.

1. ?Zezi waan like cinnjin benin yɛ bé fá síe i sɔnnzɔnfuɛ’m be nzɔliɛ ɔ?

ƝANMIƐN SIELƐ’N i jasin fɛ’n i bolɛ awloawlo’m be nun’n, yɛ be fa sie Zoova i Lalofuɛ’m be nzɔliɛ ɔ. Sanngɛ, Klist Zezi fali Klistfuɛ yolɛ’n i wafa uflɛ fa sieli i sɔnnzɔnfuɛ kpa’m be nzɔliɛ. Ɔ seli kɛ: “Ḿ mán amun mmla kun ekun: an klo amun wiengu. Klolɛ nga n fa kloli amun’n, amun kusu an fa klo amun wiengu sɔ. Sɛ an klo amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ-ɔ.”—Zan 13:34, 35.

2, 3. ?Kɛ e klo e wun aniaan klolɛ’n, ɔ yo be nga be ba Klistfuɛ aɲia’m be bo’n be sɛ?

² Sran fi kloman sran kɛ nga Klistfuɛ kpa’m be fa klo be wun’n sa. Wafa nga dinanmo’n cuɛn blalɛ’n, i kunngba’n yɛ sran klolɛ’n yo maan Zoova i sufuɛ’m be bo yo kun be cuɛn sran mun Ɲanmiɛn i sulɛ kpafuɛ’n nun ɔn. I wie yɛle Maselino m’ɔ fin Cameroun’n i liɛ’n. I junman ng’ɔ di’n ɔ sili i ɲin. Kɛ ɔ yoli sɔ’n, sran’m be kɛnnin i kɛ ɔ ti baefuɛ ti yɛ i ɲin sili ɔ. Kɛ ɔ yo naan i asɔnun’n nun lɔfuɛ mun nin be pastɛli’n be fɔnvɔ i’n, b’a yoman sɔ. Be fuɛnnin i asɔnun’n nun. Kɛ Zoova i Lalofuɛ kun yiali Maselino i aɲia kun bo’n, ɔ sisili i bo. Afin ɔ kunndɛman kɛ be fuɛn i ekun.

³ Sa ng’ɔ juli Ɲanmiɛn Sielɛ Blɛ Sua’n nun lɔ’n, ɔ fuli Maselino i nun. Asɔnun’n nunfuɛ’m be sɔli i nun klanman kpa. Kpɛkun like nga be kleli i Biblu’n nun’n, ɔ cicili i wla. Ɔ wa ɔli asɔnun aɲia’m be kwlaa be bo. Ɔ suannin Biblu’n nun like ɔli i ɲrun. Kpɛkun afuɛ nga be flɛ i 2006 nun’n be yoli i batɛmu. Siɛn’n, ɔ kan ndɛ nanwlɛ’n kle i awlofuɛ mun nin i wiengu mun, yɛ ɔ kle sran kpanngban be Biblu’n nun like. Maselino kunndɛ kɛ be kwlaa ng’ɔ nin be suan Biblu’n nun like’n, be wun klolɛ ng’ɔ wunnin i Ɲanmiɛn i sran’m be afiɛn’n wie.

4. ?Ngue ti yɛ Pɔlu i afɔtuɛ nga i waan ‘sa kwlaa nga e yo’n e yo i sran klolɛ’n ti’n,’ ɔ fata kɛ e fa su ɔ?

⁴ E wun klolɛ kɛ aniaan mun sa’n, ɔ yo ɲɛnmɛn. Ɔ maan, ɔ fata kɛ e tinuntinun e mian e ɲin naan ɔ yo sɔ titi. Ɔ ti kɛ sin m’ɔ jue kɔnguɛ mɔ sran’m be yiɛ i wun be tɔn’n sa. Sɛ be ng’ɔ yo be wun nglɛnglɛ’n b’a guaman nun yie’n, ɔ́ núan. I kunngba’n, sɛ Klistfuɛ’m be tinuntinun b’a yoman naan asɔnun’n nun be wun klolɛ m’ɔ maan be bo sɛ’n w’a tra ndin kpa’n, klolɛ sɔ’n wie. ?Wafa sɛ yɛ e kwla yo sɔ ɔ? Akoto Pɔlu tɛ su kɛ: “Sa kwlaa nga amún yó’n, an yo i sran klolɛ’n ti kɛ Krist kusu kloli ye b’ɔ fɛ i wun mannin Nyanmiɛn e ti kɛ tɛ nnɛn bɔ be yrɛ i b’ɔ bɔn fannin Nyanmiɛn bue nun’n sa.” (Efɛzfuɛ Mun 5:2) E kunndɛ kɛ é bú kosan nga i akunndan. ?Wafa sɛ yɛ sa kwlaa nga ń yó’n n kwla yo i klolɛ’n ti ɔ?

“Maan e ndɛ lo amun kpa”

5, 6. ?Ngue ti yɛ Pɔlu wlali Korɛnti lɔ Klistfuɛ’m be fanngan kɛ ‘maan be ndɛ lo be’ ɔ?

⁵ Akoto Pɔlu klɛli Klistfuɛ nga be o laa Korɛnti lɔ’n be fluwa kɛ: “Korɛntfuɛ mun, y’a fia-man ndɛ fi su amun wun, amun ndɛ lo ye kpa. Ɔ maan sɛ ɔ yo kɛ e nin amun di-man kpa sa’n, ɔ fin-man ye, ɔ fin amun. I sɔ’n ti’n, ń kán ndɛ klé amun kɛ n klun ba sa, an bu ye akunndan kɛ e fa bu amun’n sa, maan e ndɛ lo amun kpa!” (2 Korɛntfuɛ Mun 6:11-13) ?Ngue ti yɛ Pɔlu wlali Korɛntifuɛ’m be fanngan kɛ maan be ndɛ lo be ɔ?

⁶ Maan e nian wafa nga laa Korɛnti lɔ asɔnun’n ɔ boli i bo’n. Kɛ afuɛ nga be flɛ i 50 wá wíe’n, Pɔlu ɔli Korɛnti lɔ. Kannzɛ bɔbɔ i bo bolɛ nun’n, jasin fɛ’n i bolɛ’n w’a yoman pɔpɔ w’a mɛnmɛn i’n, sanngɛ i sa sin w’a bubumɛn i. W’a cɛman, kpɛkun klɔ sɔ’n nunfuɛ kpanngban be wa lafili jasin fɛ’n su. Pɔlu kleli asɔnun uflɛ sɔ’n i nunfuɛ’m be like yɛ ɔ wlali be fanngan lele “afuɛ kun anglo nsiɛn.” I sɔ’n kle weiin kɛ ɔ kloli Korɛnti lɔ Klistfuɛ mun kpa. (Sa Nga Be Yoli’n 18:5, 6, 9-11) Ɔ maan, ɔ ti su kɛ be kusu be klo i wie naan be ɲin yi i. Sanngɛ asɔnun’n nun’n, sran wie’m be cuɛnnin be wun. Atrɛkpa’n, be wie’m b’a kloman afɔtuɛ nga ɔ́ mán be ɔ, ɔ tu i ɲin weinwein kle be’n. (1 Korɛntfuɛ Mun 5:1-5; 6:1-10) Wie’m be kusu atrɛkpa ato ndɛ nga ‘be sran kpakpa bɔ be bu be kɛ Nyanmiɛn yɛ ɔ sunmannin be’n’ be kan’n, be fa be su sieli i bo. (2 Korɛntfuɛ Mun 11:5, 6) Pɔlu kunndɛli kɛ i niaan’m be klo i klolɛ kpa. Ɔ maan, ɔ wlali be fanngan kɛ ‘maan be ndɛ lo be.’ Yɛle kɛ be fa be wun mɛntɛn i nin be wiengu Klistfuɛ mun.

7. ?Wafa sɛ yɛ aniaan’m be klolɛ’n nun’n, ‘be ndɛ [kwla] lo e’ ɔ?

⁷ ?Yɛ e li? ?Wafa sɛ yɛ e niaan’m be klolɛ’n nun’n, ‘be ndɛ [kwla] lo e’ ɔ? Sran nga be sɛ tukpɛ annzɛ be kan aniɛn kunngba’n be wun klolɛ’n timan kekle. Asa kusu’n, be nga be klo be ɲin su yiyilɛ like kunngba’n, kpɛ sunman be tran likawlɛ cɛ kpa. Wie liɛ’n, ninnge nga e nin Klistfuɛ wie mun e klo be’n ti’n, e nin e wiengu uflɛ mun e sanman nun kun. Sɛ ɔ yo sɔ’n, ɔ fata kɛ e wiengu sɔ’m ‘be ndɛ lo e.’ Ɔ ti ngwlɛlɛ aeliɛ kɛ e usa e wun kosan yɛ mun. ‘?Sɛ ɔ timan be nga e nin be e mantan kpa’n be ngunmin’n, e nin aniaan uflɛ mun e boman jasin fɛ annzɛ e yiaman e yoman like uflɛ? ?Ɲanmiɛn Sielɛ Blɛ Sua’n nun lɔ’n, m mantanman be nga b’a ba uflɛuflɛ mun afin m bu i kɛ, kɛ ɔ́ kɔ́ i ɲrun’n, ɔ fata kɛ be bɔbɔ yɛ be kaci min janvuɛ ɔ? ?Asɔnun’n nun’n, i kpɛnngbɛn o i bakan o, n yo be kwlaa be like?’

8, 9. ?Wafa sɛ yɛ Pɔlu i ndɛ ng’ɔ o Rɔmfuɛ Mun 15:7 nun’n, ɔ uka e naan e niaan’m be ndɛ w’a lo e kpa ɔ?

⁸ Be wun like yolɛ’n nun’n, Pɔlu i ndɛ ng’ɔ kan kleli Rɔmufuɛ mun’n kwla uka e naan y’a bu e wiengu Klistfuɛ’m be wun akunndan kpa. (An kanngan Rɔmfuɛ Mun 15:7 nun.) Glɛki nun ndɛ mma nga be kacili i kɛ ‘an fa amun wiengu bu amun niaan’n,’ i bo’n yɛle kɛ “an sɔ be nun klanman annzɛ an kplin su naan be wlu amun afiɛn naan be kaci amun janvuɛ wie.” Laa’n kɛ aklunyefuɛ kun sɔ i janvuɛ’m be nun i awlo lɔ’n, ɔ kle be weiin kɛ be balɛ’n yo i fɛ. Klist sɔli e nun klanman Klistfuɛ asɔnun’n nun. Ɔ maan be wla e fanngan kɛ e niɛn i ajalɛ’n su naan e sɔ e wiengu Klistfuɛ’m be nun klanman wie.

⁹ Ɲanmiɛn Sielɛ Blɛ Sua’n nun lɔ’n, annzɛ aɲia yowlɛ uflɛ bo’n, kɛ é yó aniaan’m be like’n, be nga e wunnin be w’a cɛ’n annzɛ be nga e nin be e ijɔli w’a cɛ’n, maan e fa e ɲin e sie be su. Wie liɛ’n e kwla fa blɛ kan naan e nin be e koko yalɛ. Aɲia kun ng’ɔ́ bɛ́ i sin’n, e nin aniaan uflɛ mun e kwla yo sɔ wie. Ɔ su cɛman naan e nin aniaan’m be sunman lika y’a koko yalɛ fɛfɛ. Sɛ e nin aniaan’m be kwlaa y’a kwlá ijɔman cɛn kunngba’n, nán maan srɛ kun e. Sɛ aɲia’m be bo y’a kwlá yoman aniaan’m be kwlaa be like’n, ɔ fataman kɛ sran kun fa su ya.

10. ?Like benin mɔ be ɲɛnmɛn i wunsu’n yɛ e kwlaa e kwla yo i asɔnun’n nun ɔn? ?Yɛ wafa sɛ yɛ e kwla niɛn i sɔ’n nun e yo i kpa ɔ?

¹⁰ E wiengu’m be nun sɔlɛ klanman’n i wun ajalɛ klikli’n, yɛle be like yolɛ. I sɔ ajalɛ’n kwla yo maan e koko yalɛ fɛfɛ kpɛkun e tra janvuɛ e cɛ kpa. I wie yɛle be nga be kɔ aɲia dandan’m be bo’n be liɛ’n. Kɛ be bo be dunman kle be wiengu mɔ be nin be koko yalɛ kan’n, ɔ yo maan be kunndɛ kɛ bé wún be wun ekun. Ɲanmiɛn Sielɛ Blɛ Sua kplanfuɛ mun, ɔ nin be nga be uka be nga kekle’n o be su’n, kpɛ sunman be kaci janvuɛ kpa. Afin be junman’n nin sa kunngba m’ɔ o be su’n ti’n, be si be wiengu i nzuɛn kpa mun. Zoova i anuannzɛ’n nun’n, be diman janvuɛ tralɛ blɛ’m be yalɛ. Sɛ e klo sran wafawafa kpanngban’n, be nun sunman lika bé káci e janvuɛ. Kpɛkun e wun klolɛ mɔ maan e bo ti kun Ɲanmiɛn i sulɛ kpafuɛ’n nun’n, ɔ́ yó tankaan kpa.

E yo sran mɔ be kwla mɛntɛn i ɔ

11. ?Kɛ nga e fa wun i Mark 10:13-16 nun sa’n, like benin wun ajalɛ yɛ Zezi kleli ɔ?

¹¹ Klistfuɛ’m be ngba be kwla mian be ɲin naan sran’m b’a kwla fa be wun b’a mantan be kɛ Zezi sa. Sran wie’m be fali be mma kanngan’m be blɛli Zezi sanngɛ i sɔnnzɔnfuɛ’m be waan be kplinman be su. Maan e nian ndɛ ng’ɔ kannin’n. I waan: “An yaci ba kanngan’m be nun maan be bla n sin, nán an fuan be, afin be bɔ be yo be wun kɛ ba kanngan nga mun sa’n, be yɛ Nyanmiɛn sie be-ɔ.” I sin’n, “ɔ to i sa blali be, ɔ fɛ i sa fuafuali be su, yɛ ɔ yrali be nguan.” (Mark 10:13-16) Kɛ ba kanngan sɔ’m be ndɛ loli Like Klefuɛ Danfuɛ’n, wafa ng’ɔ yoli be fɛ’n, maan e bu i akunndan e nian!

12. ?Ngue yɛ ɔ kwla yo naan e nin sran uflɛ mun y’a kwlá kokoman yalɛ ɔ?

¹² Ɔ fata kɛ Klistfuɛ’m be tinuntinun be usa be wun kɛ: ‘?Sran’m be fa be wun be mantan min ɔn ɔ yo ye? ?Annzɛ kpɛ sunman ɔ yo kɛ n ɲanman min ti sa?’ Nzuɛn wie’m be o lɛ’n nán kɛ be ti tɛ ɔ. Sanngɛ be kwla yo naan e nin sran y’a kokoman yalɛ. I wie yɛle kɛ sɛ kpɛ sunman kɛ e wiengu’m be o lɛ’n, e ijɔ e telefɔnu portablu’n nun, annzɛ likɛ nga be fa wla be sukpɔ nun be tie miziki’n ɔ o e su nun’n, be kwla bu i kɛ e kunndɛman kɛ e nin be é trán ti ɔ. Asa kusu sɛ kpɛ sunman e wiengu’m bé wún e ɔ, e ɔrdinatɛli’n yɛ e ɲin tɛ i’n, be kwla se be wun kɛ e kunndɛman kɛ e nin be é íjɔ. Ɔ ti su kɛ “ɔ lɛ blɛ kun bɔ be fa muan be nuan-an.” Sanngɛ kɛ sran’m be o e wun’n, kpɛ sunman’n ɔ ti “blɛ kun bɔ be fa ijɔ-ɔ.” (Akunndanfuɛ’n 3:7) Sran wie’m be kwla se be wun annzɛ be wiengu’m be kɛ “ɔ flunman kɛ m muan min nuan.” Annzɛ “ijɔlɛ yoman min fɛ nglɛmun nga.” Sanngɛ kannzɛ bɔbɔ ijɔlɛ yoman e fɛ naan e nin e wiengu mun e ijɔ kɛ sran kun nin i janvuɛ sa’n, ɔ kle kɛ e klo be naan e ‘bu-man e bɔbɔ wun akunndan.’—1 Korɛntfuɛ Mun 13:5.

13. ?Pɔlu wlali Timote i fanngan kɛ wafa sɛ yɛ ɔ bu i niaan Klistfuɛ mun ɔn?

¹³ I nun mɔ Timote te yo gbanflɛn’n, Pɔlu wlɛli i fanngan kɛ maan i ɲin yi asɔnun’n nunfuɛ’m be kwlaa. (An kanngan 1 Timote 5:1, 2 nun.) E kusu ɔ fata kɛ Klistfuɛ nga be ti kpɛnngbɛn’m be yo kɛ e si nin e nin mun sa. Kpɛkun be nga be te yo kanngan’n be yo kɛ e niaan mɔ e si kun e nin kun’n sa. Sɛ e yo sɔ’n, ɔ su yoman e niaan kpa sɔ’m be kɛ be kwlá faman be wun be mantanman e sa. Sanngɛ e nin be e afiɛn’n mántan.

14. ?Kɛ e nin e wiengu mun e koko yalɛ’n ngue mmlusuɛ yɛ e ɲɛn i ɔ?

¹⁴ Kɛ e nin aniaan mun e koko yalɛ kpakpa’n, e uka be naan be nin Ɲanmiɛn be afiɛn’n w’a sɛ kpa. Kpɛkun be wun yo be fɛ. Aniaan bian kun m’ɔ di junman Betɛli kun nun’n, i wla te kpɛn be nga be o lɔ laa’n be su. Kɛ ɔ juli lɔ uflɛuflɛ’n be nun kaka be fali blɛ be nin i kokoli yalɛ titi. Be ndɛ m’ɔ wlɛli i fanngan’n ti’n, ɔ wunnin kɛ ɔ ti Betɛli lɔfuɛ’m be nunfuɛ sakpa. Siɛn’n, ɔ miɛn i ɲin nian be ajalɛ’n su. Yɛle kɛ ɔ nin i wiengu Betɛli lɔfuɛ’m be koko yalɛ.

E wun ase kanlɛ’n uka e naan y’a siesie e afiɛn

15. ?Ngue yɛ ɔ kle kɛ e nin e wiengu mun e kwla kacikaci e nuan ɔn?

¹⁵ Laa Filipu lɔ’n, ndɛ kun tɔli Klistfuɛ bla nɲɔn, Evodi nin Sintisi be afiɛn. Ndɛ sɔ’n i siesielɛ’n yoli kekle. (Filipfuɛ Mun 4:2, 3) Akplowa dan kpa tɔli Pɔlu nin Barnabasi be afiɛn. Ɔ maan be titili nun kan. Sran’m be kwlaa be tili ndɛ sɔ’n. (Sa Nga Be Yoli’n 15:37-39) I sɔ ndɛ’m be kle kɛ ɔ ju wie’n Ɲanmiɛn sufuɛ kpa’m be nuan sɛman ndɛ wie su. Zoova uka e naan kɛ ndɛ tɔ’n y’a siesie e afiɛn naan y’a kaci janvuɛ ekun. Sanngɛ ɔ kunndɛ kɛ e yo like kun ekun.

16, 17. (a) ?E afiɛn siesielɛ’n nun’n, wafa sɛ yɛ e wun ase kanlɛ’n ti cinnjin ɔn? (b) ?Kɛ Zakɔbu nin Ezau bé wá yía nun’n, like ng’ɔ yoli’n, wafa sɛ yɛ ɔ kle kɛ e wun ase kanlɛ’n ti cinnjin ɔn?

¹⁶ Maan ɔ yo e kɛ e nin e janvuɛ kun e su wa fu loto nun naan é kɔ́ lika sa. Ka naan y’a kwla wɔ’n, ɔ fata kɛ e fa loto lakle’n e wlɛ i loto’n i nuan sɔwlɛ’n nun naan loto’n w’a sɔ. Kɛ ndɛ tɔ e afiɛn’n, i siesielɛ’n nun kusu’n ɔ fata kɛ e ɲan lakle kun. Lakle sɔ’n yɛle e wun ase kanlɛ’n. (An kanngan Zak 4:10 nun.) Kɛ nga Biblu’n nun ndɛ nga fa kle’n sa’n, i sɔ lakle liɛ’n, ɔ yo maan be nga be ɲin ci be wiengu’n, be kwla fa Biblu’n nun mmla’m be su.

¹⁷ Kɛ Ezau i niaan bian Zakɔbu deli awuliɛ kpɛnngbɛn’n i sa nun m’ɔ fali ya’n, i afuɛ 20 w’a sin. Sanngɛ i blɛ sɔ’n nun’n, Ezau kunndɛli kɛ ɔ́ kún Zakɔbu. Aniaan nɲɔn sɔ mɔ be ti nda’n, be su wa yia nun ekun. Ɔ maan “srɛ kunnin Zakɔb dan kpa.” Ɔ yoli Zakɔbu kɛ ɔ cɛman naan Ezau w’a kun i sa. Sanngɛ kɛ be yiali’n, Zakɔbu yoli like kun mɔ Ezau w’a lafiman su kɛ ɔ́ yó ɔ. Kɛ ɔ́ mɛ́ntɛn i niaan bian lɔ’n, “ɔ kotoli.” ?I sin i bo guali sɛ? “Ezau wanndi wa kpɛli i atin, ɔ tɔli i nun. Kpɛkuun be sran nnyɔn’m be su sun.” Be yialɛ sɔ m’ɔ kwla yo tɛ’n, ɔ yoli kpa. Kannzɛ Ezau kpɔli Zakɔbu sɛ, sanngɛ Zakɔbu i wun ase kanlɛ’n, se é kwlá sé’n, ɔ kwlali kpɔlɛ sɔ’n.—Bo Bolɛ 27:41; 32:3-8; 33:3, 4.

18, 19. (a) ?Kɛ sa tɔ e nin e wiengu e afiɛn’n, ngue ti yɛ ɔ ti cinnjin kpa kɛ e bɔbɔ e fa ajalɛ naan y’a fa Ɲanmiɛn Ndɛ’n su ɔ? (b) ?Sɛ e afiɛn siesielɛ’n w’a yoman ye kpɛ kunngba’n, ngue ti yɛ ɔ fataman kɛ e sa sin bubu e ɔ?

¹⁸ E afiɛn siesielɛ’n su afɔtuɛ kpakpa o Biblu’n nun. (Matie 5:23, 24; 18:15-17; Efɛzfuɛ Mun 4:26, 27)a Sanngɛ sɛ y’a kanman e wun ase y’a nianman afɔtuɛ sɔ’m be su’n, e afiɛn siesielɛ’n yó kekle. Ɔ timan kpa kɛ e minndɛ kɛ e wiengu kun’n, ɔ kɛn i wun ase ka. Afin e bɔbɔ e kwla yo sɔ wie.

¹⁹ Sɛ like wie ti ɔ yo e kɛ ajalɛ nga e fali naan é síesíe e afiɛn’n w’a yoman ye’n, nán maan e sa sin bubu e. Ɔ fata kɛ e wiengu kun’n ɲan blɛ kan bu akunndan nian. Zozɛfu i niaan’m be yoli i tɛ. Ɔ cɛli kpa naan b’a wun i ekun. Kɛ ɔ́ yó sɔ’n, nn ɔ ti Ezipti lɔ famiɛn’n i mantanfuɛ’m be nun dan’n. Sanngɛ i agualiɛ’n su’n, be kacili yɛ be kpɛtɛli i. Zozɛfu yaci cɛli be. Kpɛkun Zakɔbu i mma’m be ɲannin cenjele like. Yɛle kɛ be kacili nvle kun mɔ Zoova fɛli i dunman’n sieli su ɔ. (Bo Bolɛ 50:15-21) Kɛ e yo mɔ e niaan’m be tran alaje’n nun’n, i sɔ’n yo maan anuannzɛ nin aklunjuɛ’n be tran asɔnun’n nun.—An kanngan Kolɔsfuɛ Mun 3:12-14 nun.

Maan e klo e wun “sakpa like nga e yo’n nun”

20, 21. ?Zezi i akoto’m be ja wun ng’ɔ wunnzinnin’n, ngue yɛ ɔ kle e ɔ?

²⁰ Ka naan Zezi w’a wu’n, ɔ seli i akoto’m be kɛ: “N yoli i sɔ kleli amun naan amun kusu an nian nga n yoli amun’n su yo.” (Zan 13:15) Kɛ ɔ́ kán sɔ’n, nn w’a wie be sran 12 be ja wun wunnzin. Nán like mɔ be yo i titi’n sa ngbɛn annzɛ nán aklunye ngbɛn yɛ Zezi yoli ɔ. Ka naan Zan w’a kan be ja wun wunnzinlɛ ndɛ sɔ’n, ɔ klɛli i kɛ: “Kɛ ɔ fin i bo bolɛ nun’n, Jésus klo i fuɛ nga be o mɛn’n nun’n, ɔ klo be lele guɛ i ti nin i bo.” (Zan 13:1) Klolɛ mɔ Zezi klo i sɔnnzɔnfuɛ mun’n, i ti yɛ ɔ yoli i sɔ like liɛ mɔ kanga mun yɛ be yo i titi’n niɔn. Siɛn’n, ɔ fata kɛ be kusu be yo klolɛ ninnge be man be wiengu. Ɔ fata kɛ e klolɛ mɔ e klo e wun kɛ sran nin i niaan sa’n, ɔ su e bo naan e nian e niaan Klistfuɛ’m be kwlaa be lika.

²¹ Akoto Piɛli mɔ Ɲanmiɛn i Wa’n wunnzinnin i ja wun’n, ɔ wunnin like nga Zezi yoli’n i wlɛ. Ɔ klɛli i kɛ: “Kɛ an fali ndɛ nanwlɛ’n su’n, bɔ amun wun sa’n wieli’n, ɔ maan an klo-man amun niaan Kristfuɛ mun amun nuan bui su. I sɔ’n ti, an klo amun wun kpa, an tu amun klun yo sa ng’ɔ kle kɛ an klo amun wun’n.” (1 Piɛr 1:22) Akoto Zan mɔ e Min’n wunnzinnin i ja wun wie’n, ɔ klɛli i kɛ: “M mma mun, nán maan amun sran klolɛ’n yo amun nuan bui su, nin nuan nun fɛ su, sanngɛ maan be wun i sakpa like nga amun yo’n nun.” (1 Zan 3:18) Maan klolɛ nga e klo e niaan mun’n, e yi i nglo e aeliɛ’n nun.

[Ja ngua lɛ ndɛ’n]

?Amun wla kwla kpɛn su?

• ?E wun klolɛ’n nun’n, wafa sɛ yɛ e niaan’m ‘be ndɛ [kwla] lo e’ ɔ?

• ?Ngue yɛ ɔ́ úka e naan y’a yo sran mɔ i wiengu kwla mɛntɛn i ɔ?

• ?E afiɛn siesielɛ’n nun’n, ngue yɛ e wun ase kanlɛ’n yo ɔ?

• ?Ngue yɛ ɔ fata kɛ ɔ su e bo naan y’a nian e wiengu Klistfuɛ’m be lika ɔ?

[Foto, bue 24]

Maan e sɔ e wiengu Klistfuɛ’m be nun klanman.

[Foto, bue 26]

Maan e yo sran mɔ be kwla mɛntɛn i ɔ.