Sɛ bɔbɔ e ‘wun nyrɛnnɛn dan kpa’n,’ nán e yaci Ɲanmiɛn sulɛ
“Saan é wún nyrɛnnɛn dan kpa naan y’a kwla ju Nyanmiɛn mɛn’n nun.”—YOL. 14:22.
WAFA SƐ YƐ AMÚN TƐ́ SU Ɔ?
?Wan yɛ maan Klistfuɛ’m be wun ɲrɛnnɛn ɔn?
?Wafa sɛ yɛ e kwla buabua e wun naan sɛ be kle e ɲrɛnnɛn’n, y’a jran kekle ɔ? ?Wafa sɛ yɛ e kwla buabua e wun naan sɛ e wla bo e wun’n, y’a jran kekle ɔ?
?Mmlusuɛ benin yɛ Klistfuɛ nga be tra be awlɛn’n, bé ɲɛ́n i ɔ?
1. ?Kɛ Ɲanmiɛn Ndɛ’n se kɛ saan é wún ɲrɛnnɛn dan kpa’n, ngue ti yɛ i sɔ’n boman e nuan ɔn?
KƐ ƝANMIƐN NDƐ’N se kɛ saan é wún “nyrɛnnɛn dan kpa” naan y’a ɲan anannganman nguan’n, i sɔ’n boman e nuan. Afin, sɛ e boli Zoova i sulɛ bo w’a cɛ, annzɛ ɔ nin a cɛman’n, e wun ɲrɛnnɛn. Like nga ti yɛ ɔ ti sɔ’n yɛle kɛ, e o Satan i mɛn’n nun.—Ngl. 12:12.
2. (a) ?Kannzɛ sran kwlakwla be wun ɲrɛnnɛn’n, sanngɛ ɲrɛnnɛn benin yɛ Klistfuɛ’m be wun i ekun ɔn? (An nian foto ng’ɔ o kan like suanlɛ’n bo i bo lɛ’n.) (b) ?Wan yɛ ɔ wlawla sran mun mɔ be kle Klistfuɛ’m be ɲrɛnnɛn ɔn? (c) ?Ngue ti yɛ e se sɔ ɔ?
2 Sran kwlakwla wun ɲrɛnnɛn. Sanngɛ, Klistfuɛ’m be wun be ɲrun dan tra su. (1 Kor. 10:13) Ɲanmiɛn su mɔ be lafi’n ti’n, be kle be yalɛ. Zezi seli i sɔnnzɔnfuɛ mun kɛ: “Sran b’ɔ su sran’n ti-man kpa trɛ-mɛn i min’n. Sɛ be kleli n yalɛ’n, bé klé amun yalɛ wie.” (Zan 15:20) Satan yɛ ɔ wlawla sran mun yɛ be kle Klistfuɛ’m be ɲrɛnnɛn ɔn. Biblu’n waan Satan ti kɛ “asɔmɔli b’ɔ wlan-wlan ɔ kpan kunndɛ nnɛn’n sa.” (1 Piɛ. 5:8) Satan yo like kwlaa ng’ɔ kwla yo’n, naan Zoova i sufuɛ’m be yaci seiin nantilɛ. I lɛ’n nun’n, maan e kan sa wie mɔ be juli Pɔlu su’n, be ndɛ e nian.
BE KLELI PƆLU I ƝRƐNNƐN LISTRI LƆ
3-5. (a) ?Ɲrɛnnɛn benin yɛ Pɔlu wunnin i Listri lɔ ɔ? (b) ?Ngue ti yɛ ndɛ nga Pɔlu kannin’n, ɔ wlali Klistfuɛ’m be fanngan ɔn?
3 Ɲanmiɛn su mɔ Pɔlu lafi’n ti’n, ɔ wunnin ɲrɛnnɛn kpɛ sunman. (2 Kor. 11:23-27) I wie yɛle kɛ, kɛ ɔ nin Barnabasi be juli Listri lɔ’n, bian kun o lɛ be wuli i fɔlɛfuɛ, ɔ nin a nantiman le. Pɔlu maan bian sɔ’n, ɔ nantili. Kɛ ɔ yoli sɔ’n, sran’m be kunndɛli kɛ bé sɔ́ Pɔlu nin Barnabasi. Sanngɛ, b’a kplinman su. Kpɛkun Zuifu wie’m be bali, be sacili sran’m be ti nun. Ɔ maan, be finfinnin Pɔlu yɛbuɛ. Kɛ be buli i kɛ w’a wu’n, be yacili i lɛ be ɔli.—Yol. 14:8-19.
4 Kɛ Pɔlu nin Barnabasi be ɔli Dɛrbu’n, “be sali be sin Listri nin Ikoni yɛ Antiɔs, be wlali asɔnunfuɛ’m be fanngan, be tuli be fɔ kɛ be lafi Nyanmiɛn su kpa, yɛ be seli be ekun kɛ: ‘Saan é wún nyrɛnnɛn dan kpa naan y’a kwla ju Nyanmiɛn mɛn’n nun.’” (Yol. 14:21, 22) Ndɛ kɛ ngalɛ sa’n, ɔ kwla bubu sran sa sin. Sanngɛ, Pɔlu nin Barnabasi be kannin sɔ fa “wlali asɔnunfuɛ’m be fanngan.” ?Ngue ti yɛ ndɛ sɔ’n, ɔ wlali be fanngan ɔn?
5 Sɛ e nian ndɛ nga Pɔlu kannin’n i kpa’n, é wún kosan sɔ’n i su tɛlɛ’n. Pɔlu w’a seman ngbɛn kɛ: “Saan é wún nyrɛnnɛn dan kpa.” Sanngɛ, ɔ seli kɛ: “Saan é wún nyrɛnnɛn dan kpa naan y’a kwla ju Nyanmiɛn mɛn’n nun.” Ɔ maan, mmlusuɛ nga sɛ Klistfuɛ’m be jran kekle’n bé ɲɛ́n i’n, i su yɛ Pɔlu fali be ɲin sieli i ɔ. Bé ɲán mmlusuɛ sɔ’n i sakpa. Afin, Zezi seli kɛ: “Sran ng’ɔ trɛ i anwlɛn lele ju i awieliɛ’n, ɔ́ fíte nun.”—Mat. 10:22.
6. ?Mmlusuɛ benin yɛ Klistfuɛ nga be tra be awlɛn’n, bé ɲɛ́n i ɔ?
6 Sɛ e tra e awlɛn’n, é liɛ yó ye. Yɛle kɛ, Klistfuɛ nga Ɲanmiɛn kpali be sieli be ngunmin’n, be nin Zezi bé dí famiɛn ɲanmiɛn su lɔ. Yɛ be su wuman kun. Be nga Ɲanmiɛn Ndɛ’n flɛ be kɛ “bua’m be wie” mun’n, be liɛ’n, bé ɲán anannganman nguan asiɛ’n su wa. (Zan 10:16; 2 Piɛ. 3:13) Sanngɛ i kwlaa yoli o, e wun ɲrɛnnɛn kɛ é sé yɛ’n. Maan e kan ɲrɛnnɛn wafa nɲɔn mɔ be kwla tɔ e su’n, be ndɛ.
ƝRƐNNƐN NGA SRAN’M BE KLE E’N
7. ?Ɲrɛnnɛn wafa benin yɛ Klistfuɛ’m be wun i ɔ?
7 Zezi seli kɛ: “Bé wá fá amun mán jɔlɛ difuɛ mun, yɛ bé bó amun Nyanmiɛn ndɛ suanlɛ nin i srɛlɛ sua’m be nun. Kɛ ɔ́ yó naan amu’an kan min ndɛ a kle kpɛnngbɛn mun nin famiɛn mun’n, min ti bé fá amun kɔ́ be ja su.” (Mar. 13:9) I sɔ mɔ Zezi kannin’n, ɔ kle kɛ sran’m bé wá klé Klistfuɛ’m be ɲrɛnnɛn. Wie liɛ’n, Ɲanmiɛn sulɛ wafa mun annzɛ mɛn siefuɛ mun yɛ bé wláwlá sran mun kɛ be kle be ɲrɛnnɛn ɔn. (Yol. 5:27, 28) Maan e fa Pɔlu i wun ndɛ ekun e nian. Pɔlu si kɛ bé klé i ɲrɛnnɛn. Sanngɛ, srɛ w’a kunmɛn i, yɛ i sa sin w’a bubumɛn i.—An kanngan Sa Nga Be Yoli’n 20:22, 23 nun.
8, 9. (a) ?Ngue ti yɛ kɛ bé klé Pɔlu i ɲrɛnnɛn’n, ɔ trɛli i awlɛn ɔn? (b) ?Wafa sɛ yɛ Klistfuɛ sunman be nanti Pɔlu i ajalɛ’n su andɛ ɔ?
8 Pɔlu jrannin sa nga Satan maan be tɔli i su’n, be ɲrun kekle. Ɔ seli kɛ: “M bu-man min wun like fi, n yo sɔ naan m’an wanndi a ju n juwlɛ, naan m’an wie junman nga e Min Jésus fa wlali n sa nun kɛ n yo’n i yo. Junman sɔ’n yɛlɛ kɛ n kan ye dan nga Nyanmiɛn yoli ye’n i ndɛ.” (Yol. 20:24) Nanwlɛ, srɛ w’a kunman Pɔlu. Sanngɛ, ɔ trɛli i awlɛn. Ɔ yoli sɔ naan w’a kwla “kan ye dan nga Nyanmiɛn yoli ye’n i ndɛ.”
9 Andɛ’n, Klistfuɛ sunman be nanti Pɔlu i ajalɛ’n su. Nvle kun nun’n, politiki mɔ Zoova i Lalofuɛ’m be waan be yoman ti’n, be wlali be nun wie’m be bisua. B’a diman be jɔlɛ naan b’a wla be bisua. Aniaan sɔ’m be nun wie’m be kali bisua lɔ afuɛ ko ju 20. Kɛ be o lɔ’n, be sunianfuɛ’m b’a kplinman su kɛ be osufuɛ mun, annzɛ sran uflɛ ko nian be osu. Be boli aniaan sɔ’m be nun wie mun, yɛ be kleli be ɲrɛnnɛn dan.
10. ?Kɛ ɲrɛnnɛn’n ka lɛ tɔ e su kpɛ kunngba’n, ngue ti yɛ ɔ fataman kɛ srɛ kun e ɔ?
10 Lika wie’m be nun’n, ɲrɛnnɛn’n ka lɛ tɔ aniaan’m be su kpɛ kunngba. Sɛ sa tɔ amun su sɔ wie’n, nán srɛ kun amun. Maan amun wla kpɛn Zozɛfu su. Be yoli i atɛ kɛ kanga sa. Sanngɛ, Zoova “deli i afɛ’n kwlaa nun.” (Yol. 7:9, 10) Zoova kwla nian e lika sɔ wie. Maan ɔ kpɛn e klun titi kɛ, “e Min’n kwla de be nga be sro i bɔ sa tɔ be su’n.” (2 Piɛ. 2:9) I sɔ’n ti’n, maan e lafi Zoova su kpa, yɛ e tra e awlɛn, nán e sa sin bubu e. Zoova kwla de e mɛn tɛ nga nun naan e ɲan anannganman nguan.—1 Piɛ. 5:8, 9.
E WLA M’Ɔ BO E WUN’N
11. ?Ɲrɛnnɛn nga be tɔ e su’n, be ti wafa nɲɛ?
11 E wunnin kɛ Satan maan be kle e ɲrɛnnɛn. I sɔ ɲrɛnnɛn sa’m be ti kɛ seke m’ɔ tu, ɔ ka lɛ saci e sua’n sa. Sanngɛ, ɲrɛnnɛn wie o lɛ’n, ɔ́ tɔ́ e su ɔ, e wunman nun. E bli mɔ é bó’n, y’a wie kpɔtɔ. Ɔ ti kɛ nvɔlɛ mɔ be o sua’n i waka’m be nun’n sa. Be di waka sɔ’m be klun lɔ blɛblɛblɛ. Kpɛkun cɛn kun’n, sua’n w’a bu.
12. (a) ?Sa nga Satan fa wlu e bo, e wunman nun’n, i wie yɛle benin? (b) ?Awlaboɛ’n ti’n, ngue yɛ blɛblɛblɛ Klistfuɛ kun kwla yo ɔ? (c) ?Ngue yɛ ɔ kle kɛ Pɔlu i wla boli i wun ɔn?
12 Satan yo maan sran’m be kle e ɲrɛnnɛn. Annzɛ kusu’n, ɔ fa sa’n wlu e bo, e wunman nun. I wie yɛle e wla m’ɔ bo e wun’n. Awlaboɛ’n ti’n, blɛblɛblɛ Klistfuɛ kun kwla yaci Zoova sulɛ. Blɛ wie nun’n, Pɔlu i wla boli i wun. Ɔ seli kɛ ɔ ti ɲrɛnnɛnfuɛ dan. (An kanngan Rɔmfuɛ Mun 7:21-24 nun.) Pɔlu nin Ɲanmiɛn be nanti klanman. Asa ekun’n, ɔ ti i blɛ su anuannzɛ’n i ɲrun dunfuɛ’m be nun kun. ?Ɔ nin i sɔ’n ngba’n, ngue ti yɛ i wla ko bo i wun ɔn? Fɔ’n m’ɔ o i nun’n ti ɔ. Pɔlu kunndɛli kɛ ɔ́ yó sa ng’ɔ ti kpa’n, kpɛkun sa tɛ’n jin i bue. Sɛ ɔ yo e sɔ wie’n, maan e fa Pɔlu i wun ndɛ’n e cici e wla naan e jran kekle.
13, 14. (a) ?Ngue ti yɛ Ɲanmiɛn i sufuɛ wie’m be wla bo be wun ɔn? (b) ?Wan yɛ ɔ kunndɛ kɛ e wla bo e wun ɔn? (c) ?Ngue ti yɛ ɔ kunndɛ kɛ e wla bo e wun ɔn?
13 Aniaan sunman be wla bo be wun cɛn kunngun. Kɛ ɔ yo sɔ’n, be bu i kɛ be nunman sran’m be nun wie. I wie yɛle aniaan bla kun mɔ be flɛ i kɛ Debora, i liɛ’n. Ɔ ti atin bofuɛ, ɔ seli kɛ: “Sɛ n yo sa wie m’ɔ timan su’n, min klun titi min sa trilili. Kɛ m bu sa kwlaa nga n yoli be mɔ be timan su’n be akunndan’n, n se min klun lɔ kɛ sran fi kwlá kloman min. Naan Zoova bɔbɔ kwlá kloman min wie.”
14 ?Ngue ti yɛ sran kɛ Debora sa mɔ be su Zoova juejue su’n, be wla kwla bo be wun ɔn? Like nga ti yɛ ɔ ti sɔ’n, i bo’n sɔnnin. Wie liɛ’n, be se be klun lɔ kɛ ninnge nga be yo’n i wie fi timan kpa. Annzɛ be ti ɲrɛnnɛnfuɛ dan. (Nya. 15:15) Wie’m be liɛ kusu’n, tukpacɛ ng’ɔ o be su’n yɛ ɔ bo be wla ɔ. Sanngɛ i kwlaa yoli o, maan e wla kpɛn su kɛ sran kun yɛ ɔ kunndɛ kɛ e wla bo e wun ɔn. Sran sɔ’n, yɛle Satan. I bɔbɔ si kɛ Ɲanmiɛn buli i fɔ naan ɔ ka kan i liɛ wíe. Ɔ kunndɛ kɛ e kusu e bu i kɛ e liɛ su yoman ye le. (Ngl. 20:10) Satan kunndɛ kɛ e sa sin bubu e naan e yaci Zoova i sulɛ. Sanngɛ, nán e lo e wun e mɛn i. Afin, alɛ yɛ ɔ nin Ɲanmiɛn i sufuɛ’m be kun ɔn.
15. ?Kɛ ɲrɛnnɛn’n tɔ e su’n, ngue yɛ e kunndɛ kɛ é yó ɔ?
15 Maan e tra e awlɛn, e jran kekle. Yɛ maan e ɲin tran mmlusuɛ nga é ɲɛ́n i’n su. Pɔlu seli Korɛnti lɔ Klistfuɛ’m be kɛ: “E sa sin bubu-man ye. Kannzɛ e wunnɛn ng’ɔ o yɛ’n ɔ saci’n, like nga bɔ maan be flɛ min sran’n, cɛn kwlaa Nyanmiɛn bo i mɔnnɛn. Nyrɛnnɛn kaan nga e wun i yɛ’n ɔ maan é nyán tranwlɛ kpa nyanmiɛn su lɔ, e su jao-man nun le.”—2 Kor. 4:16, 17.
MAAN E BUABUA E WUN E SIE
16. ?Ngue ti yɛ ɔ fata kɛ e buabua e wun ikisa ɔ?
16 Satan ‘kpɛ e gblɛ’ sunman naan ɔ́ ɲán e. (Efɛ. 6:11) I sɔ’n ti’n, ɔ fata kɛ e tinuntinun e nanti ndɛ ng’ɔ o 1 Piɛr 5:9 nun’n i su. Ɔ se kɛ: “Nán an lo amun wun mɛn i, an jran kekle Nyanmiɛn su bɔ an lafi’n ti.” Kɛ ɔ ko yo naan y’a kwla jran kekle’n, ɔ fata kɛ e buabua e wun ikisa e yo sa ng’ɔ ti kpa’n. Kwlaa naan sonja’m b’a ɔ alɛ kunlɛ’n, be dun mmua buabua be wun. Yɛle kɛ, be suan alɛ kunlɛ’n i wun ajalɛ wafawafa mun. I sɔ yɛ ɔ fata kɛ e yo ɔ. E siman sa nga Satan wá fá yí e su’n. I sɔ’n ti’n, dɔ nga su mɔ e tran fɔun’n, maan e buabua e wun kpa e sie. Akoto Pɔlu seli Korɛnti lɔ Klistfuɛ’m be kɛ: “Amun bɔbɔ an bu amun klun lɔ nian sɛ an lafi Krist su sakpa o.”—2 Kor. 13:5.
17-19. (a) ?Wafa sɛ yɛ e kwla bu e klun lɔ e nian sɛ e lafi Klist su sakpa ɔ? (b) ?Wafa sɛ yɛ Klistfuɛ suklu ba kun kwla buɛbuɛ i wun sie naan w’a bo jasin fɛ’n i suklu lɔ ɔ?
17 Wafa nga e kwla bu e klun lɔ e nian’n, i kun yɛle kɛ maan e fa kosan nga mun e usa e wun: ‘?N srɛ Ɲanmiɛn titi? ?Kɛ min wiengu’m be wlawla min kɛ n yo sa tɛ’n, n yo srongble annzɛ kusu n nanti Ɲanmiɛn i mmla’n su? ?N tran aɲia’m be bo titi? ?N bo jasin fɛ’n i juejue su? ?Kɛ min wiengu’m be yo min sa’n, n yaci n cɛ be kɛ nga n kunndɛ kɛ be yaci min liɛ’n be cɛ min’n sa? ?M bu asɔnun kpɛnngbɛn mɔ be kwlakwla be nian asɔnunfuɛ’m be lika’n, be sran?’
18 Kan kwlaa nga e o lɛ’n, sran’m be kunndɛ kɛ bé sáci e akunndan’n. I sɔ’n ti aniaan nga be kɔ suklu’n be nun sunman be kan Ɲanmiɛn su mɔ be lafi’n, i ndɛ juejue su suklu lɔ. Srɛ kunman be yɛ ɲannzuɛn kunman be. Be nian ajalɛ nga be o e fluwa’m be nun’n, be su yɛ be yo sɔ ɔ. Ajalɛ sɔ’n wie o afuɛ 2013 nun, Mɛ 1 Sasafuɛ Tranwlɛ’n i bue 9-10 nun. Ɔ kle wafa nga suklu ba kun kwla bo jasin fɛ’n i juejue su i suklu lɔ’n. Siɛ nin niɛn mun, amun nin amun mma’m be koko ndɛ kɛ ngalɛ sa’m be su yalɛ. I liɛ’n, bé kwlá kán Ɲanmiɛn su mɔ be lafi’n i ndɛ juejue su be suklu lɔ.
19 Like nga Zoova kunndɛ kɛ e yo’n, nán cɛn ngba yɛ i yolɛ’n ti pɔpɔ ɔ. I wie yɛle kɛ, kɛ e ko di junman lele m’ɔ fata kɛ nnɔsua nun e wɔ aɲia’m be bo’n, ɔ timan pɔpɔ. Kɛ ɔ yo naan e jaso nglɛmun e ko bo jasin’n, ɔ timan pɔpɔ. Sanngɛ dɔ nga su’n, maan e fa ninnge sɔ’m be yolɛ’n e cici e ti. I liɛ’n, kɛ lika’n ɔ́ wá yó kekle kpa e su’n, e su yaciman be yolɛ.
20, 21. (a) ?Wafa sɛ yɛ e ti kpɔlɛ tɛ’n i su akunndan bulɛ’n, ɔ kwla uka e ɔ? (b) ?Kannzɛ e wun ɲrɛnnɛn’n, ngue yɛ ɔ fata kɛ e yo ɔ?
20 ?Sɛ e wla bo e wun’n, ngue yɛ é yó naan y’a jran kekle ɔ? Like nga é yó’n i kun yɛle kɛ, maan e bu e ti kpɔlɛ tɛ mɔ Zezi fɛli i wun yili’n su akunndan. I sɔ yɛ Pɔlu yoli ɔ. Blɛ wie nun’n, ɔ seli kɛ ɔ ti ɲrɛnnɛnfuɛ. Sanngɛ, i wla kpɛnnin su kɛ sa tɛ yofuɛ’m be ti yɛ Klist wuli ɔ. Ɔ maan, ɔ seli kɛ: “Sulafilɛ bɔ n lafi Nyanmiɛn i Wa b’ɔ kloli min b’ɔ fɛ i wun mannin min ti’n, i ti yɛ n wo lɛ-ɔ.” (Gal. 2:20) Nanwlɛ, Pɔlu wunnin i wlɛ kɛ e ti kpɔlɛ tɛ mɔ Zezi yili’n, ɔ ti i liɛ wie.
21 Sɛ e kusu e wun i wlɛ kɛ e ti kpɔlɛ tɛ mɔ Zoova maan Zezi fɛli i wun yili’n, ɔ ti e liɛ wie’n, e wun kpája e. Sanngɛ, i sɔ’n kleman kɛ e wla su boman e wun mlɔnmlɔn kun. Sran wie’m be awlabɔɛ liɛ’n, saan mɛn klanman’n nun yɛ ɔ́ wíe ɔ. Maan e wla kpɛn su kɛ be nga be tra be awlɛn’n, be yɛ bé fíte nun ɔn. Ɔ ka kan Ɲanmiɛn Sielɛ blɛ’n jú. Blɛ sɔ’n nun’n, fɔundi trán asiɛ’n su. Yɛ fɔ’n su tranman sran’m be nun kun. I sɔ’n ti’n, kannzɛ e wun ɲrɛnnɛn dan’n, maan e tra e awlɛn lele e ju Ɲanmiɛn i mɛn’n nun.