NDƐ TRE NSAN
Like nɲɔn nga mɔ maan aja’n kwla cɛ’n
1, 2. (a) ?Le nɲɛ yɛ aja’n kwla di ɔ? (b) ?Wafa sɛ yɛ i sɔ’n kwla yo ye ɔ?
KƐ ƝANMIƐN wlá yasua’n nin bla klikli’n be aja’n nun’n, w’a seman be kɛ be aja’n yó le nɲɔn kun liɛ cɛ. Adam nin Ɛvu yɛ bé trán lele naan kɛ ɔ́ fá yó’n w’a yo ɔ. (Bo Bolɛ 2:24) Aja ng’ɔ ti kpa Ɲanmiɛn ɲrun’n, yɛle kɛ yasua kun ja bla kun. Ɲanmiɛn Ndɛ’n waan saan kɛ be nun kun w’a yo sa tɛ dan kpa kɛ i wiengu bo bla annzɛ bian kunndɛlɛ sa, yɛ sran kun kwla se kɛ ɔ́ rá ɔ. I liɛ sɛ ɔ klo’n, ɔ kwla kunndɛ sran uflɛ ja.—Matie 5:32.
2 ?Aja nun’n, sran nɲɔn be kwla tran aklunjuɛ nun sa trilili? Ɛɛn. Biblu’n kan like nɲɔn m’ɔ kwla uka be naan b’a kwla yo i sɔ’n i ndɛ. Sɛ bla’n nin yasua’n be yo like nɲɔn sɔ’n, bé kwlá dí aklunjuɛ yɛ bé ɲán suralɛ kpanngban. ?Ngue yɛle like nɲɔn sɔ’n?
LIKE KLIKLI’N
Be wiengu klolɛ’n nin i sran bulɛ’n yo maan aja’n yo kpa.
3. ?Sran klolɛ’n i wafa nsan benin yɛ ɔ fata kɛ be tran aja’n nun ɔn?
3 Like klikli’n yɛle sran klolɛ’n. Nán e wla fi su kɛ Biblu’n kan sran klolɛ’n i wafawafa ndɛ. Kun yɛle klolɛ ng’ɔ o janvuɛ nɲɔn mɔ be ti koko nɲa nun’n ɔ timan’n, be afiɛn’n. (Zan 11:3) I kun ekun yɛle ng’ɔ o awlobofuɛ’m be afiɛn’n. (Rɔmfuɛ Mun 12:10) I nsan su’n yɛle ng’ɔ o bla kun nin yasua kun be afiɛn’n. (Nyanndra Mun 5:15-20) Ɔ nin i fata kɛ klolɛ’n i wafa nsan sɔ’n be tran yasua kun nin i yi’n be afiɛn. Sanngɛ ɔ le klolɛ i nnan su’n mɔ i cinnjin tra be ngba ngalɛ’n niɔn.
4. ?Sran klolɛ i nnan su’n yɛle benin?
4 Glɛki aniɛn’n nun’n, ndɛ mma nga be fa kan sran klolɛ i nnan su’n i ndɛ’n yɛle agapɛ. Ndɛ mma sɔ’n yɛ ɔ o 1 Zan 4:8 nun’n niɔn. Be klɛli i kɛ: “Nyanmiɛn’n yɛ ɔ ti sran klofuɛ nin-ɔn.” Nanwlɛ, “e klo Nyanmiɛn, afin [Ɲanmiɛn] dun mmua kloli ye.” (1 Zan 4:19) Klistfuɛ kun dun mmua yi i sɔ klolɛ’n i nglo Ɲanmiɛn Zoova i lika. I sin’n ɔ yi i nglo i wiengu sran onga’m be lika wie. (Mark 12:29-31) Ndɛ mma agapɛ o Efɛzfuɛ Mun 5:2 nun wie. I waan: “Sa kwlaa nga amún yó’n, an yo i sran klolɛ’n ti kɛ Krist kusu kloli ye b’ɔ fɛ i wun mannin Nyanmiɛn e ti [...] sa.” Zezi seli kɛ sran klolɛ i wafa sɔ’n yɛ bé fá síe i sɔnnzɔnfuɛ kpa’m be nzɔliɛ ɔ. I waan: “Sɛ an klo [agapɛ] amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ-ɔ.” (Zan 13:35) Be kan agapɛ i ndɛ wie 1 Korɛntfuɛ Mun 13:13 nun. Be klɛli i kɛ: “Like nsan nga be ka lɛ’m be yɛ: Nyanmiɛn su lafilɛ, e wla bɔ e fa guɛ i Nyanmiɛn su’n, nin klolɛ bɔ e fa klo Nyanmiɛn nin sran’n, sanngɛ be nun dan’n yɛlɛ Nyanmiɛn nin sran be klolɛ [agapɛ].”
5, 6. (a) ?Ngue ti yɛ klolɛ’n i dan tra Ɲanmiɛn sulafilɛ, nin e wla mɔ e fa guɛ i Ɲanmiɛn su’n niɔn? (b) ?Ngue ti yɛ klolɛ’n kwla yo naan aja’n w’a cɛ ɔ?
5 ?Ngue yɛ maan klolɛ agapɛ sɔ’n i dan tra Ɲanmiɛn sulafilɛ nin e wla mɔ e fa guɛ i Ɲanmiɛn su’n niɔn? Ɔ taka mmla seiin mɔ be fin Ɲanmiɛn Ndɛ’n be su ti ɔ. (Jue Mun 119:105) Klolɛ sɔ’n maan be tu be klun be yo be wiengu like ng’ɔ ti kpa Ɲanmiɛn ɲrun’n. Be nianman be sin naan b’a yo. Sran klolɛ wafa sɔ’n, ɔ yo maan be nga be o aja nun’n be kwla nanti Biblu’n nun mmla nga be klɛli i yɛ’n su: “Sa nga amun wiengu yo bɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i. Krist yacili sa nga an yoli i’n cɛli amun, ɔ maan amun kusu, sa nga be yo amun’n, an yaci cɛ.” (Kolɔsfuɛ Mun 3:13) Yasua nin bla nga be aja’n yo fɛ’n be ‘klo [agapɛ] be wun, afin sran ng’ɔ klo sran’n, ɔ yaci sa tɛ kpanngban nga be yo i cɛ.’ (1 Piɛr 4:8) Maan e sie i nzɔliɛ kɛ sran ng’ɔ klo sran’n, ɔ yaci sa cɛ. Nán kɛ sran klolɛ’n sɔ’n nunnun sa tɛ’n niɔn, afin ɔ leman klɔ sran kun sa m’ɔ fɔnman ɔn.—Jue Mun 130:3, 4; Zak 3:2.
6 Kɛ be klo Ɲanmiɛn mɔ be klo be wiengu kɛ ngalɛ’n sa’n, be aja’n cɛ́ yɛ ɔ́ yó fɛ, afin “sran b’ɔ klo sran’n, ɔ klo i guɛ i ti nin i bo.” (1 Korɛntfuɛ Mun 13:8) Sran klolɛ’n ‘ti kɛ ɲanman m’ɔ cici i kwlaa ju nuan yialɛ nun’n’ sa. (Kolɔsfuɛ Mun 3:14, Anuãsɛ Fuflɛ) ?Sɛ amun wo aja nun’n, wafa sɛ yɛ amun nin amun wun annzɛ amun yi amun kwla yi sran klolɛ kɛ ngalɛ sa’n i nglo ɔ? Amun kanngan Ɲanmiɛn Ndɛ’n nun likawlɛ naan amun koko su yalɛ. Amun suan Zezi i sran klolɛ’n i su ndɛ naan amun sɔnnzɔn i sran klolɛ sɔ’n nin i akunndan bulɛ’n nin i aeliɛ’n. Asa ekun, amun wɔ asɔnun aɲia’m be bo kɛ be suan Ɲanmiɛn Ndɛ’n lɔ’n. Kpɛkun amun srɛ Ɲanmiɛn kɛ ɔ uka amun naan amun yi sran klolɛ wafa sɔ’n mɔ i dan trɛ i ngba’n, m’ɔ ti sa nga Ɲanmiɛn wawɛ’n maan sran yo’n i nglo.—Nyanndra Mun 3:5, 6; Zan 17:3; Galasifuɛ Mun 5:22; Ebre Mun 10:24, 25.
LIKE’N I NƝƆN SU’N
7. ?Ngue yɛle aɲinyiɛ’n, yɛ wafa sɛ yɛ e kwla yi i nglo aja’n nun ɔn?
7 Sɛ sran nɲɔn mɔ be o aja nun’n be klo be wun’n, saan kɛ be ɲin yí be wiengu. Aɲinyiɛ’n kusu yɛ ɔ ti like’n i nɲɔn su mɔ maan aja’n kwla yo ye’n niɔn. Kɛ be se kɛ be ɲin yi sran’n, yɛle kɛ be bu i sran. Klistfuɛ’m be kwlaa, i yasua o i bla o, Ɲanmiɛn Ndɛ’n man be afɔtuɛ yɛ’n: “An bu amun wiengu sran.” (Rɔmfuɛ Mun 12:10) Akoto Piɛli klɛli i kɛ: “Nja mun, kɛ bɔ an si kɛ amun yi’m be wunmiɛn’n ju-man amun liɛ nun’n, amun nin be tran kpa. An bu be sran.” (1 Piɛr 3:7) Be man bla’m be kusu be afɔtuɛ kɛ “be bu be wun’m be sran.” (Efɛzfuɛ Mun 5:33) Sɛ sran kun bu sran kun i sran’n, ɔ yo sran sɔ’n i kpa, ndɛ ng’ɔ kan’n ɔ bumɛn i finfin ndɛ, kpɛkun like ng’ɔ se i kɛ ɔ yo’n m’ɔ ti su’n, ɔ yo.
8-10. ?Ninnge benin wie’m be nun yɛ aɲinyiɛ’n kwla yo naan aja’n w’a taka kpa naan w’a yo fɛ ɔ?
8 Sran nga be kunndɛ kɛ be aja’n yo ye’n, be bu be wun’n annzɛ be yi’n i sran. Ɔ maan afɔtuɛ m’ɔ se kɛ ‘nán amun nun sran fi bu i bɔbɔ i ninnge’m be ngunmin be akunndan, sanngɛ maan amun wiengu’m be liɛ’n lo amun wie’n,’ be fa su. (Filipfuɛ Mun 2:4) Nán like ng’ɔ ti kpa man be bɔbɔ’n i ngunmin i akunndan yɛ be bu ɔ. Sanngɛ be bu like ng’ɔ ti kpa man be yi’n annzɛ be wun’n, i akunndan wie. I kpa’n, i lifuɛ’n yɛ ɔ ti be cinnjin ɔn.
9 Aɲinyiɛ’n yɛ maan aja’n nun’n, sran kun bu i kɛ i wiengu’n i akunndan liɛ ng’ɔ fa’n ɔ nin i liɛ’n be kwla sansan be wun ɔn. Ɔ timan su kɛ sran kun bu i kɛ ɔ nin i wiengu’n be nuan sɛ́ like kwlaa su. Atrɛkpa’n, like nga yasua’n bu i cinnjin’n, i yi su bumɛn i sɔ, yɛ nga kusu mɔ bla’n klo i’n yasua’n klomɛn i. Kannzɛ ɔ ti sɔ’n, sanngɛ sɛ Zoova i mmla’n nun’n ɔ timan like tɛ’n, ɔ fata kɛ sran kun i ɲin yi i wiengu i like liɛ’n. (1 Piɛr 2:16; an nian Filemɔn 14.) Asa ekun’n, be wiengu i sran bulɛ’n yɛle kɛ, maan ɔ yo be ngunmin be afiɛn lɔ annzɛ nzra nun o, be yomɛn i finfin.
10 Nanwlɛ, Ɲanmiɛn nin be wiengu klolɛ’n, ɔ nin be wiengu i sran bulɛ’n be ti like nɲɔn mɔ be yo maan aja’n taka kpa ɔ. ?Aja’n nun’n, wafa sɛ yɛ be kwla nanti i sɔ’n su ninnge cinnjin wie’m be nun ɔn?
MAAN YASUA’M BE SƆNNZƆN KLIST I SRAN SIELƐ’N
11. ?Aja’n nun’n, Ɲanmiɛn Ndɛ’n se kɛ wan yɛ ɔ ti siefuɛ’n niɔn?
11 Biblu’n kan kɛ wafa nga be yili yasua’n ti’n, ɔ kwla sie i awlobofuɛ mun kɛ ɔ nin i fata’n sa. Ɔ maan Zoova ɲrun’n, bla’n nin ba’m be lika nianlɛ’n nin be Ɲanmiɛn ninnge’m be nun kpa yolɛ’n ti yasua’n i trɔ. Ɔ fata kɛ ajalɛ ng’ɔ́ fá be’n, be yo i nuan su naan ɔ nin Zoova i klun sa yolɛ’n be wɔ likawlɛ. Yɛ ɔ fata kɛ i nantilɛ’n yo klanman naan be nian su. “Bla mun, an bu amun wun’m be sran, kɛ an bu e Min’n i sran’n sa. Nán an fa amun nyin wlawla be, afin yasua yɛ ɔ ti bla i su kpɛn kɛ Krist kusu ti Asɔnun i su kpɛn’n sa.” (Efɛzfuɛ Mun 5:22, 23) Sanngɛ Biblu’n se kɛ yasua’n kusu le i siefuɛ liɛ m’ɔ le ɲrun trɛ i ɔ. Akoto Pɔlu klɛli i kɛ: “N klo kɛ an wun i wlɛ kpa kɛ Krist yɛ ɔ sie yasua-a, yasua kusu yɛ ɔ sie bla-a, yɛ Nyanmiɛn kusu sie Krist.” (1 Korɛntfuɛ Mun 11:3) Yasua ng’ɔ si ngwlɛlɛ’n, i sran sielɛ nun’n, ɔ sɔnnzɔn Klist Zezi m’ɔ ti i bɔbɔ yasua’n i siefuɛ’n.
12. ?Zezi i wun ase kanlɛ’n nun o, annzɛ i sran sielɛ nun o, wafa sɛ yɛ ɔ kleli ajalɛ kpa ɔ?
12 Zezi kusu, Zoova yɛ ɔ sie i ɔ, yɛ i ɲin yi Zoova. Zezi seli kɛ: “Nán m bɔbɔ n klun sa yɛ n klo kɛ ń yó-ɔ, sanngɛ sran ng’ɔ sunmannin min’n i klun sa yɛ n yo-ɔ.” (Zan 5:30) Nanwlɛ, be ɲɛnmɛn i sɔ sran’n i wunsu! Zezi yɛ ɔ ti Ɲanmiɛn i “Wa Kpɛn bɔ i kpa’n tra like ng’ɔ yili be’n be kwlaa” ɔ. (Kolɔsfuɛ Mun 1:15) Ɔ kacili Mɛsi’n. I yɛ ɔ́ síe Klistfuɛ nga be kpali be sieli be ngunmin’n, kpɛkun ɔ́ yó Ɲanmiɛn Sielɛ’n i su Famiɛn’n niɔn. Ɔ maan ɔ́ síe anzi mun. (Filipfuɛ Mun 2:9-11; Ebre Mun 1:4) Ɔ nin i sɔ ngba ngalɛ’n, Zezi w’a yoman sran mɔ be kwlɛmɛn i ɲrun nian, annzɛ sran m’ɔ kle sran yalɛ ɔ. W’a tinman i sɔnnzɔnfuɛ’m be su, yɛ w’a kpɛnman be wla cɔcɔcɔ kɛ i yɛ ɔ sie be ɔ, naan ɔ fata kɛ be ɲin yi i. Zezi kloli be, ɔ sili be aunnvuɛ. Be nga be buman be wie’n be li yɛ ɔ yoli be sɔ’n niɔn. Ɔ seli kɛ: “Amun kwlaa bɔ an sua trɔ bɔ amu’an fɛ’n, an bla min sin, ń síke amun, yɛ amún dé wunmiɛn. An fa amun ti wla n kɔmin su waka’n bo, yɛ an fa min nzuɛn’n su, afin n ti sran wɛtɛɛ yɛ min anwlɛn’n ti flɔlɔ. Yɛ amun wla wá gúa ase. Afin n kɔmin su waka’n i sualɛ yo fɛ, yɛ n trɔ’n yo-man nɔnnin.” (Matie 11:28-30) I wun yoli sran kwlaa fɛ.
13, 14. ?Wafa sɛ yɛ yasua ng’ɔ klo i yi’n, ɔ nian Zezi i ajalɛ liɛ’n su sie i ɔ?
13 Yasua ng’ɔ kunndɛ kɛ i awlobo nun tranlɛ’n yo fɛ’n, ɔ fata kɛ ɔ nian Zezi i ajalɛ klanman’n su. Yasua ng’ɔ ti kpa’n, ɔ yoman sran kpokokpoko. Annzɛ ɔ timan sran mɔ be kacimɛn i nuan nun ndɛ ɔ. Ɔ timan sran m’ɔ sie i yi’n kɛ i kanga sa ɔ. Sanngɛ ɔ klo i, yɛ ɔ bu i sran. Sɛ Zezi mɔ fɔ nunmɛn i nun’n i ‘anwlɛn’n yoli flɔlɔ’n,’ ɔ fata kɛ i sɔ yolɛ’n yo yasua’n kusu i cinnjin kpa, afin i liɛ’n fɔ o i nun. Kɛ ɔ ko fɔn sɔ’n, ɔ klo kɛ i yi’n si i aunnvuɛ. Kannzɛ ndɛ kɛ “yaci, n fɔnnin” i selɛ’n kwla yo tankantankan yasua’n i nuan nun’n, sanngɛ yasua ng’ɔ kɛn i wun ase’n, kɛ ɔ fɔn’n, ɔ se kɛ w’a fɔn. Yasua ng’ɔ ti wɛtɛɛ m’ɔ lo i wun’n, i sran bulɛ’n timan kekle i yi’n i sa nun kɛ yasua ng’ɔ tu i wun’n mɔ i ndɛ kanlɛ yo ya’n sa. I kunngba’n, bla nga i ɲin yi sran’n kɛ ɔ yo sa tɛ’n ɔ si yaci se.
14 Wafa nga Ɲanmiɛn yili bla’n ti’n, ɔ kwla ukɛ i wun’n naan i awlobo nun tranlɛ’n w’a yo fɛ. Yasua ng’ɔ si ngwlɛlɛ’n, ɔ wun i sɔ’n i wlɛ yɛ ɔ tintinmɛn i yi’n su. Bla sunman be si aunnvuɛ tra yasua mun. I sɔ’n kusu yɛ maan sran nin sran be kwla tran klanman ɔn. Blɛ sunman’n, bla’n yɛ ɔ yo maan awlo nun tranlɛ’n yo fɛ ɔ. “Bla kpa’n” nga Nyanndra Mun ndɛ tre 31 kɛn i ndɛ’n, i nzuɛn’n i kpa liɛ’n be kanman. Yɛ i sɔ’n yo i awlobofuɛ’m be kwlaa be ye. ?Ngue ti ɔ? Afin i “wun fɛ i wla’n guɛ i su.”—Nyanndra Mun 31:10, 11.
15. ?Wafa sɛ yɛ yasua kun kwla yi klolɛ’n nin aɲinyiɛ’n be nglo kɛ Klist sa ɔ?
15 Nvle wie’m be nun’n, yasua’n i kwlalɛ m’ɔ tratra su ti’n, sɛ be usɛ i kosan’n ɔ ti kɛ nn b’a bumɛn i sran sa. Wie liɛ’n, ɔ nin i yi’n be tranlɛ’n kwla yo kɛ sran kun nin i kanga sa. I sɔ kwlalɛ liɛ’n ti’n, nán ɔ nin i yi’n kunngba yɛ be afiɛn’n sɛman ɔn. Sanngɛ ɔ nin Ɲanmiɛn kusu be afiɛn’n sɛman wie. (An nian 1 Zan 4:20, 21.) Wie liɛ kusu’n, yasua’m be nianman nun sieman be yi mun, be yaci bla mun yɛ be sie awlo’n niɔn. Yasua ng’ɔ lo i wun man Klist’n, ɔ dimɛn i yi’n i lufle, annzɛ kusu ɔ yomɛn i finfin. Sanngɛ ɔ nian wafa nga Zezi klɛnnin i wun fa kloli sran’n su, kpɛkun ɔ nanti Pɔlu i afɔtuɛ yɛ’n su. I waan: “Yasua mun, kɛ Krist kloli Asɔnun’n, amun kusu an klo amun yi mun sɔ. Afin Asɔnun’n ti, ɔ fɛ i wun mannin.” (Efɛzfuɛ Mun 5:25, 26) Klist Zezi kloli i sɔnnzɔnfuɛ mun lele ti’n, be dunman nun’n ɔ wuli. Yasua kpa’n kusu kɛ ɔ yo sɔ ɔ, ɔ kunndɛ like ng’ɔ ti kpa’n mɛn i yi’n, ɔ tintinmɛn i su. Kɛ yasua kun lo i wun man Klist m’ɔ niɛn i sran klolɛ’n nin i aɲinyiɛ’n su’n, yasua’n i sran bulɛ’n yó i yi’n i fɛ.—Efɛzfuɛ Mun 5:28, 29, 33.
MAAN BLA’M BE ƝIN YI BE WUN MUN
16. ?Kɛ bla’n wo i wun bo’n, ɔ fata kɛ i nzuɛn’n yo sɛ?
16 Kɛ be yili Adam mɔ i osu cɛli kan’n, ndɛ nga Ɲanmiɛn Zoova kannin’n yɛ: “Ɔ ti-man kpa kɛ sran ngunmin tran. Ń wá yó i ukafuɛ kun b’ɔ nin i bé kwlá trán.” (Bo Bolɛ 2:18) Ɲanmiɛn yili Ɛvu kɛ ɔ yo yasua’n “i ukafuɛ,” w’a seman kɛ ɔ yo i wla. W’a siesieman aja’n kɛ loto kun mɔ sran nɲɔn be trɛ i volan nun be kpli be kisan nun’n sa. Ɔ fata kɛ yasua’n sie i yi’n klolɛ su. Bla’n kusu ɔ fata kɛ ɔ klo i wun’n, naan ɔ bu i sran yɛ ɔ lo i wun mɛn i.
17, 18. ?Wafa sɛ yɛ bla kun kwla ukɛ i wun’n kpa ɔ?
17 Sanngɛ, bla ng’ɔ ti kpa’n, i ɲin yimɛn i wun’n ngunmin. Ɔ miɛn i ɲin ukɛ i wun’n, ɔ suan ajalɛ ng’ɔ fa’n i bo. E si kɛ, kɛ ajalɛ’n ti i liɛ’n su’n, i bo suanlɛ’n timan kekle. Sanngɛ sɛ ɔ timɛn i liɛ’n su bɔbɔ’n, ɔ suɛn i wun’n bo naan sa sɔ’n w’a yo ye.
18 Ninnge uflɛ wie’m be nun ekun’n, bla’n kwla ukɛ i wun’n naan w’a sie awlo’n kpa. Yasua’n i ɲin m’ɔ mian di junman wie mun’n ti’n, bla’n kwla yo i mo. Ɔ ijɔmɛn i, annzɛ ɔ yoman naan yasua’n w’a bu i kɛ ninnge nga ɔ yo’n ɔ su jɔmɛn i yi’n i klun le. Kɛ ɔ bu i wun’n i sran’n, ɔ yi i nglo kɛ ‘nzuɛn’n, nin anwlɛn wɛtɛɛ’n, be ti kpa Nyanmiɛn nyrun,’ naan nán i wun’n i ɲrun ngunmin yɛ be ti kpa ɔ. (1 Piɛr 3:3, 4; Kolɔsfuɛ Mun 3:12) ?Yɛ sɛ i wun’n suman Zoova’n nin? Kannzɛ ɔ su i annzɛ ɔ sumɛn i o, Ɲanmiɛn Ndɛ’n wla mmla’m be fanngan kɛ “be klo be wun nin be mma mun, be yo sa i nuan su, nán maan be yo sa sukusuku, maan be yo awlo bla kpa, maan be yo klun-ufuefuɛ, nán maan be fa be nyin wlawla be wun mun, maan be bu be sran, naan sran fi a se-man kɛ Nyanmiɛn ndɛ’n ti-man kpa.” (Tit 2:4, 5) Sɛ sa wie o lɛ naan ɔ sanngan bla’n i akunndan’n, sɛ ɔ kan kle i wun’n ‘amanniɛn su, maan be wun kɛ ɔ sro Nyanmiɛn’n,’ i wun’n m’ɔ suman Ɲanmiɛn’n kwla buɛ i wie klanman. Yasua mɔ be suman Ɲanmiɛn’n, be nun wie mun’n, “kɛ be wun amun nzuɛn kpa’n nin sran bɔ an bu be’n, an su kan-man ndɛ fi naan b’a yaci.”—1 Piɛr 3:1, 2, 15,16; 1 Korɛntfuɛ Mun 7:13-16.
19. ?Yɛ sɛ yasua kun se i yi’n kɛ ɔ yo like ng’ɔ timan Ɲanmiɛn liɛ su’n nin?
19 ?Yɛ sɛ yasua kun se i yi’n kɛ ɔ yo like ng’ɔ timan Ɲanmiɛn liɛ su’n nin? Sɛ i sɔ sa’n ju’n, maan ɔ kpɛn i klun kɛ Ɲanmiɛn yɛ ɔ ti i Siefuɛ klikli’n niɔn. I nun mɔ ngbɛn’m be seli akoto’m be kɛ be fɔn Ɲanmiɛn mmla’n, ajalɛ nga be fali’n i su yɛ ɔ nian ɔn. Sa Nga Be Yoli’n 5:29 waan: “Piɛr nin i wiengu kun mun be seli be kɛ: ‘Sɛ e nyin yi Nyanmiɛn tra sran mun’n, ɔ ti kpa tra kɛ e nyin yi sran’n.’
BE AFIƐN YALƐ KOKOLƐ
20. ?Like cinnjin benin nun yɛ ɔ nin i fata kɛ be klo be wiengu naan be bu i sran ɔn?
20 Aja’n nun’n, be wiengu klolɛ nin i sran bulɛ’n ti cinnjin like kun ekun nun. Like sɔ’n yɛle be afiɛn yalɛ kokolɛ’n. Sa ng’ɔ o bla’n su nin i junman ng’ɔ di’n, ɔ nin wafa ng’ɔ wun ninnge mun’n, yasua ng’ɔ klo i yi’n, ɔ nin i be koko be su yalɛ. Bla’m be klo i sɔ’n dan. Yasua ng’ɔ fa blɛ ɔ nin i yi be koko yalɛ m’ɔ sie i su bla’n i nuan’n bo’n, ɔ kle kɛ ɔ klo i naan ɔ bu i sran. (Zak 1:19) Bla wie’m be fɛfɛ kɛ be wun’m be nin be kokoman yalɛ cɛman. I sɔ’n nin i fataman. Nanwlɛ, blɛ kekle nga nun’n, junman mɔ yasua’m be di’n ti be ɲanman be ti, kpɛkun sika ndɛ m’ɔ ti kekle’n ti’n, bla wie’m be di junman kusu. Sanngɛ ɔ nin i fata kɛ yasua’n nin i yi’n be fa blɛ be nian be wiengu lika. Sɛ w’a yoman sɔ’n ɔ cɛman naan sran kun w’a fɛ i atin liɛ. I sɔ’n kwla yo maan bian’n annzɛ bla’n fɛ i ɲin sie i sran uflɛ wie m’ɔ nin i kwla koko yalɛ’n i su.
21. ?Wafa sɛ yɛ be nuan nun ndɛ fɛ’n kwla yo naan b’a di aklunjuɛ aja’n nun ɔn?
21 Wafa nga bla nin yasua’m be koko yalɛ’n ti cinnjin. “Klolɛ ndɛ’n ti [...] nɛnkɛn-nɛnkɛn, yɛ ɔ yo be wunnɛn’n i juejue.” (Nyanndra Mun 16:24) Maan e wun’n annzɛ e yi’n ɔ yo sran m’ɔ su Ɲanmiɛn annzɛ ɔ suman Ɲanmiɛn o, e di Biblu’n i mmla’n nga su ɔ yo ye: “Maan amun ijɔlɛ wafa’n yo sran’m be fɛ, maan amun nuan nun ndɛ’n yo fɛ kɛ njin sa,” yɛle kɛ sɛ sran ti ɔ, maan ɔ yo i fɛ. (Kolɔsfuɛ Mun 4:6) Sɛ andɛ cɛn liɛ’n yoli kekle mannin e wun annzɛ e yi’n, sɛ e kan fɔnvɔlɛ ndɛ kan e kle i’n ɔ kwla yo i fɛ. “Ndɛ nga be kan b’ɔ kpɛn su sɛsɛ’n, ɔ yo nyɛnmɛn kɛ b’a fa sika ɔkwlɛ nin jɛtɛ ufue b’a di ajuin wie sa.” (Nyanndra Mun 25:11) Wafa nga e yo e nɛn’n, ɔ nin ndɛ nga e kan’n be ti cinnjin kpa. I wie yɛle kɛ sran wie kwla kan ndɛ’n ya su se kɛ: “Ɲin anuan’n!” Sanngɛ sɛ e kwla kɛn i wɛtɛɛ su kɛ: “?Yaci a kwla ɲin anuan’n man min?” e “ndɛ’n yó fɛ kɛ njin sa.”
22. ?Sɛ yasua’n nin bla’n be waan bé kókó yalɛ kpa titi’n, ngue yɛ ɔ nin i fata kɛ be yo ɔ?
22 Be nuan nun ndɛ fɛ’n nin be wiengu i nianlɛ wafa mɔ be niɛn i’n, ɔ nin wafa nga wie liɛ’n be kwla fa be sa’n be fua sran’n i wun’n, yɛ ɔ nin yalɛ kokolɛ’n ba ɔ. Sɛ yasua’n nin i yi’n be mian be ɲin kpa naan yalɛ kokolɛ’n tran be afiɛn’n, sran kun kwla kɛn i klun ndɛ kle i wiengu, kpɛkun blɛ kekle nun’n be kwla fɔnvɔ be wiengu. Ɲanmiɛn Ndɛ’n se kɛ: “An wla be nga be anwlɛn sɔ-man’n be yakpa.” (1 Tɛsalonikfuɛ Mun 5:14) Ɔ ju blɛ wie yasua’n i wla kwla bo i wun. Blɛ wie kusu’n, bla’n yɛ i wla’n kwla bo i wun ɔn. Be kwla “wla be” wiengu “yakpa” maan ɔ yo kpa.—Rɔmfuɛ Mun 15:2.
23, 24. ?Sɛ yasua’n nin bla’n be nuan sɛman ndɛ kun su’n, wafa sɛ yɛ be wiengu klolɛ nin i sran bulɛ’n kwla uka be ɔ? An fa sunnzun ase kun.
23 Aja’n nun yasua nin bla nga be klo be wiengu mɔ be bu be wiengu sran’n, sɛ sa kan tɔ be afiɛn’n, be su fa yoman ndɛ dan. Bé mían be ɲin naan b’a yoman be “nyrun wiwi” be wiengu wun. (Kolɔsfuɛ Mun 3:19) Ɔ nin i fata kɛ ɔ kpɛn be nɲɔn’n be klun kɛ “sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ.” (Nyanndra Mun 15:1) Nán amun ijɔ amun wun annzɛ amun yi m’ɔ kɛn i klun ndɛ kle amun’n. Sanngɛ, maan blɛ sɔ’n yo naan amun wun i klun ndɛ’n i wlɛ. Maan amun nɲɔn’n, amun bo yo kun naan amun ti amun wun aniɛn.
24 Maan amun wla kpɛn blɛ mɔ sa wie su’n, Sara kɛnnin i klun ndɛ kleli i wun Abraamu’n, i su. Ndɛ sɔ m’ɔ kannin’n w’a yomɛn i fɛ. Sanngɛ Ɲanmiɛn seli Abraamu kɛ: “Ndɛ nga Sara kɛnnin i lɛ’n yɛ yo-ɔ.” (Bo Bolɛ 21:9-12) I sɔ yɛ Abraamu yoli ɔ, ɔ maan Zoova rɛli i su. I wafa kunngba’n, sɛ bla kun kan ndɛ kun kle i wun’n, naan ndɛ sɔ’n timan bian’n i liɛ’n su’n, i li maan ɔ sie i su tie. Asa kusu nán maan bla’n i nɛn’n liɛ’n tra yasua’n liɛ’n su, sanngɛ ɔ fata kɛ ɔ sie i su i wun’n i nuan bo. (Nyanndra Mun 25:24) Yasua annzɛ bla nga i waan saan fii i ndɛ liɛ’n su yɛ ɔ ka’n, ɔ klomɛn i wiengu’n, yɛ ɔ bumɛn i sran.
25. ?Wafa sɛ yɛ be afiɛn yalɛ kokolɛ’n kwla yo naan b’a di aklunjuɛ bian nin bla nna’n nun ɔn?
25 Bian nin bla nna nun’n, be afiɛn yalɛ kokolɛ’n ti cinnjin wie. Aja’n nun’n, be bɔbɔ be wun akunndan bulɛ’n nin be awlɛn’n mɔ be kwlá traman’n, ɔ kwla saci bian nin bla nna’n. Amanniɛn su yalɛ kokolɛ’n ti cinnjin. Sɛ sran kun bu i wiengu akunndan’n, bian nin bla nna ndɛ’n su kaciman ndɛnngan be afiɛn. I lɛ nun annzɛ like uflɛ nun o, “nán maan sran fi bu i bɔbɔ wun akunndan, sanngɛ maan ɔ bu i wiengu akunndan.”—1 Korɛntfuɛ Mun 7:3-5; 10:24.
26. ?Kannzɛ bɔbɔ ɔ le aja kun nin i nun ndɛ’n, wafa sɛ yɛ Ɲanmiɛn Ndɛ’n su falɛ’n kwla uka be nga be o aja’n nun naan b’a di aklunjuɛ ɔ?
26 Nanwlɛ, Ɲanmiɛn Ndɛ’n i nun afɔtuɛ’n ti kpa! Sakpa, ɔ le aja kun nin i nun ndɛ. Sanngɛ kɛ yasua nin bla’n be nanti Zoova i mmla’n ng’ɔ o Biblu’n nun’n su’n, mɔ be aja’n taka be wun klolɛ nin be wun sran bulɛ’n su’n, be kwla lafi su kɛ be aja’n cɛ́ kpa, yɛ bé kwlá dí aklunjuɛ. I liɛ’n bé mánmán be wiengu, sanngɛ kusu bé mánmán Ɲanmiɛn Zoova m’ɔ kpɛli aja’n i ba’n wie.