?Gbanflɛn mun, amun kunndɛ junman asɔnun’n nun?
1. ?Blɛ benin nun yɛ gbanflɛn kun kwla nanti 1 Timote 3:10 i su ɔ?
1 Biblu’n waan “Sran ng’ɔ klo kɛ ɔ́ yó asɔnun sunianfuɛ’n, wuun ɔ klo junman b’ɔ ti kpa.” (1 Tim. 3:1) Ndɛ sɔ mɔ Ɲanmiɛn maan be klɛli’n, ɔ wla gbanflɛn’m be fanngan kɛ be kunndɛ asɔnun’n nun junman be di. ?Ɔ nin i fata kɛ amun yo kaklaka kwlaa naan amun a bu i sɔ liɛ’n i akunndan? Cɛcɛ. Blɛ mɔ amun te yo gbanflɛn kan’n, i nun yɛ ɔ fata kɛ amun ɲin tran asɔnun’n nun junman dilɛ’n i sin ɔn. I liɛ’n, bé kwlá úka amun naan sɛ ɔ ju i ɲrun’n, amun a kwla yo asɔnunfuɛ’m be lika nianfuɛ. (1 Tim. 3:10) ?Sɛ amun ti gbanflɛn naan b’a yo amun batɛmu’n, wafa sɛ yɛ amun kwla kunndɛ kɛ amún dí junman asɔnun’n nun ɔn?
2. ?Wafa sɛ yɛ be kwla klɛn be wun be man, mɔ be kwla yi i nglo ɔ?
2 Amun klɛn amun wun be man: Maan ɔ kpɛn amun klun kɛ asɔnun’n nun junman dilɛ’n timan dunman kunndɛlɛ, sanngɛ ɔ ti aniaan’m be ukalɛ junman. Ninnge nga be kwla uka amun naan amun a yo sɔ’n, be nun kun yɛle Zezi i ajalɛ’n i su akunndan bulɛ’n. (Mat. 20:28; Zan 4:6, 7; 13:4, 5) Amun srɛ Zoova kɛ ɔ uka amun naan amun wiengu’m be ndɛ lo amun. (1 Kor. 10:24) ?Sɛ amun asɔnun’n nun’n aniaan wie’m b’a yo oke annzɛ kusu be ti cɛcɛwafuɛ’n, amun kwla fa ajalɛ wie mun naan amun a uka be? ?Sɛ ɔ fata kɛ be kuankuan Ɲanmiɛn Sielɛ Sua’n nun’n, annzɛ be yo ninnge uflɛ wie mun naan sua sɔ’n i nun w’a yo yɛiin’n, amun fa amun wun wla junman sɔ’n nun wie? ?Sɛ Ɲanmiɛn junman dilɛ suklu’n i bo’n lɔ’n, be se amun kɛ amun sin sran kun i osu be di i junman liɛ’n, amún kplín su? Sɛ amun yo i kwlaa sɔ’n, amún wá wún kɛ amun klun mɔ amun tu be uka sran uflɛ’n, ɔ́ mán amun aklunjuɛ.—Yol. 20:35.
3. ?Ngue ti yɛ Ɲanmiɛn ninnge’m be klolɛ’n ti cinnjin ɔn, yɛ wafa sɛ yɛ e kwla klo be ɔ?
3 Ɲanmiɛn ninnge’m be klolɛ: Sɛ Ɲanmiɛn sulɛ’n nun’n, aniaan kun i ja’n ti asiɛ’n kpa’n, ɔ flunman tra ninnge wie mɔ i sa si be nun ngwlɛlɛ’n. Sran nga Ɲanmiɛn wawɛ’n sie i’n, ɔ miɛn i ɲin naan ɔ nin Zoova nin Zezi be akunndan’n ɔ yo kun. (1 Kor. 2:15, 16) Asa ekun’n, “sa nga Nyanmiɛn wawɛ’n maan sran yo’n,” yɛ ɔ yo ɔ. (Gal. 5:22, 23) Ɔ bo jasin fɛ’n juejue su, kpɛkun ɔ fa Ɲanmiɛn sulɛ’n sie i like kwlaa ɲrun. (Mat. 6:33) I sɔ’n ti’n, maan amun ngunmin amun suan Biblu’n nun like titi. I sɔ yolɛ’n nun’n, maan amun kanngan Biblu’n nun cɛn kwlakwla, an kanngan Sasafuɛ Tranwlɛ’n nin Réveillez-vous! be nun kunngunngun. Kpɛkun an siesie amun wun ka naan amun a wɔ aɲia’m be bo. (Jue. 1:1, 2; Ebr. 10:24, 25) Kɛ Pɔlu wlá Timote fanngan kɛ ɔ wɔ i ɲrun Ɲanmiɛn sulɛ’n nun’n, ɔ seli i kɛ: “Nian [...] ninnge bɔ a kle’n su kpa.” (1 Tim. 4:15, 16) Ɔ maan an siesie amun wun naan amun a wɔ jasin fɛ’n i bolɛ, yɛ amun bo i titi. Ɲanmiɛn sulɛ nun’n, an fa ninnge wie mun sie amun ɲrun kɛ amún yó be. I wie yɛle kɛ amun kwla kaci titi atin bofuɛ annzɛ Betɛli lɔ junman difuɛ, annzɛ kusu amun kwla tran aniaan nga be nin a jaman bla’n be suklu’n i bo wie. Sɛ amun klo Zoova kpa’n, i sɔ’n úka amun naan amun a ‘buman like nga gbanflɛn’m be konvi sɔ i’n i akunndan.’—2 Tim. 2:22.
4. ?Ngue ti yɛ ɔ ti cinnjin kɛ be lafi e su yɛ e yo ndɛnmanfuɛ ɔ?
4 Maan be kwla lafi amun su, yɛ an yo ndɛnmanfuɛ: Klistfuɛ klikli’m be blɛ su’n, be seli aniaan wie’m be kɛ be cɛcɛ aniaan nga be sa w’a mian’n be aliɛ. Aniaan sɔ mɔ be fali junman’n wlali be sa nun’n be ti sran mɔ “be bo be dunman kpa” ɔ. Yɛle kɛ be kwla lafi be su, yɛ be ti ndɛnmanfuɛ. I sɔ’n ti’n, akoto’m be kwla fali be ɲin sieli i junman cinnjin uflɛ wie’m be su, yɛ be klun w’a titiman be. (Yol. 6:1-4) I kunngba’n, kɛ be man amun junman asɔnun’n nun’n, maan amun tu amun klun be di i kpa. An yo kɛ Nowe sa. Afin mmeli’n mɔ Ɲanmiɛn seli i kɛ ɔ bobo’n, ɔ niannin nun yoli i kpa. Sɛ amun ti sran ndɛnmanfuɛ’n, Zoova i klun wá jɔ́ amun wun, kpɛkun amún wá kɔ́ amun ɲrun Ɲanmiɛn sulɛ’n nun.—1 Kor. 4:2. An niaan kuku nga be flɛ i “Kɛ asɔnun kpɛnngbɛn’m be uka gbanflɛn mun’n, i bo’n gua kpa” nun.
5. ?Ngue ti yɛ ɔ fata kɛ gbanflɛn’m be kunndɛ kɛ bé dí junman asɔnun’n nun ɔn?
5 Kɛ nga Biblu’n fa kannin’n sa’n, Zoova su kɛn i wun yó ninnge mun. (Eza. 60:22) Sɛ be fa sran miliɔn kun naan be bubu be nun nnan’n, sɛ é kwlá sé’n, be yo i akpasua kun nunfuɛ’m be batɛmu afuɛ nuan kwlaa nun. Kɛ mɔ sran nga be ba Zoova i sulɛ’n be sɔnnin kpa’n ti’n, e le aniaan nga be ɲin w’a ti kpa mɔ be kwla di asɔnun’n nun junman’n be awuliɛ. Junman nga ɔ nin i fata kɛ be di i Zoova i anuannzɛ’n nun andɛ’n, anwlanmannun’n be nin a wunmɛn i wunsu le. (1 Kor. 15:58) ?Gbanflɛn mun, amun kunndɛ kɛ amún dí junman asɔnun’n nun’n? Sɛ amun kunndɛ i sɔ yolɛ’n i wun atin’n, nn amun klo junman m’ɔ ti kpa’n.
[Ndɛ kwle, bue 2]
Kɛ mɔ sran nga be ba Zoova i sulɛ’n be sɔnnin kpa’n ti’n, e le aniaan nga be ɲin w’a ti kpa mɔ be kwla di asɔnun’n nun junman’n be awuliɛ.
[Foto, bue 3]
Kɛ asɔnun kpɛnngbɛn’m be uka gbanflɛn mun’n, i bo’n gua kpa
Kɛ asɔnun kpɛnngbɛn’m be man gbanflɛn’n be junman mɔ be kle be wafa nga be kwla di junman sɔ’n, ɔ yo gbanflɛn’m be ye. Aɲia’n w’a wie, akpasua sunianfuɛ’n ti cenje’n su lɔ, ɔ su man jasin bofuɛ kun i afɔtuɛ. Kpɛkun ɔ sieli i nzɔliɛ kɛ gbanflɛn kaan kun jin i bue lɛ. Ɔ maan akpasua sunianfuɛ’n usɛli i kɛ ɔ kunndɛ kɛ ɔ́ wún i wun ti ɔ. Aniaan’n tɛli i su kɛ ɔ fata kɛ ɔ nunnun cenje’n su naan w’a ɔ. I si’n nin i nin’n be su wa kɔ awlo, sanngɛ i liɛ’n ɔ kunndɛ kɛ ɔ́ dí i junman’n kwlaa naan w’a ɔ. Kɛ ɔ kannin sɔ’n, akpasua sunianfuɛ’n jasoli cenje’n su lɛ aklunjuɛ su. Akpasua sunianfuɛ sɔ’n seli kɛ: “Asɔnun sɔ’n nun’n, asɔnun kpɛnngbɛn’m be fa be ɲin sie i gbanflɛn’m be su kpa. Be man be junman asɔnun’n nun naan be ɲin w’a ti kpa. I sɔ’n ti’n kɛ m ba be asɔnun’n i osu nianlɛ’n, blɛ sunman nun b’a uka gbanflɛn kun m’ɔ kwla yo asɔnunfuɛ’m be lika nianfuɛ ɔ.”