LIKE SUANLƐ 2

Ndɛ’n i kanlɛ wafa ng’ɔ ti su’n

2 Korɛntifuɛ Mun 2:17

LIKE NG’Ɔ FATA KƐ A YO’N: Ijɔ kɛ a fa ijɔ titi’n sa. Bu ndɛ nga a su kan’n, ɔ nin ɔ ndɛ tiefuɛ’m be akunndan.

Srɛ Ɲanmiɛn yɛ siesie ɔ wun kpa. Srɛ Zoova naan ɔ ɲin tran ndɛ nga a su kan’n su, naan ɔ ɲin w’a tranman ɔ bɔbɔ ɔ su. Maan ɔ ɲin tran ndɛ cinnjin nga ɔ waan á yíyí be nun’n be su kpa. Ijɔ kɛ a fa ijɔ titi’n sa, nán ɔ yo kɛ a su kanngan fluwa nun sa.

Sɛ a sunnzun kɛ á kánngan Biblu’n nun’n, annzɛ fluwa uflɛ wie nun’n, ɔ fata kɛ a wun i nun ndɛ’n i wlɛ kpa. I liɛ’n á kwlá kánngan nun trele gúɛ i lɔ. Sɛ ndɛ wie mɔ sran kun kannin’n yɛ a su kanngan nun’n, wafa nga sran sɔ’n i wun fa yo i’n, maan i ɲin fite ɔ kannganlɛ’n nun. Sanngɛ nán yo sɔ tratra su.
Ɔ fata kɛ a wun ndɛ’n i wlɛ. Sa nga ti yɛ ɔ ti cinnjin kɛ ɔ ndɛ tiefuɛ’m be tie ɔ ndɛ’n, bu i akunndan. Bu ndɛ tiefuɛ’m be akunndan. Sɛ a yo sɔ’n, wafa nga á íjɔ’n, ɔ nin wafa nga á síesíe ɔ sa mun’n, ɔ nin wafa nga á yó ɔ ɲrun’n, ɔ́ yó kɛ a su kan ɔ klun ndɛ kle ɔ janvuɛ wie sa.

Nán maan ɔ yo kɛ ndɛ nga a su kan’n timan cinnjin sa. Kan ndɛ’n i weinwein kɛ ng’ɔ nin i fata’n sa.
Nian ɔ ndɛ tiefuɛ’m be ɲrun. Sɛ ɔ nin i fata’n, kɛ á kán ndɛ’n nian sran’m be ɲrun. Kɛ á íjɔ nzra nun’n, nian sran kun ɲrun kan ndɛ’n kle i. I sin’n nian sran uflɛ kan ndɛ’n kle i. Nán nian nzrafuɛ mun sa paplaa.