?Klɔ sran’n fin nin?
?NGUE TI YƐ Ɔ FATA KƐ E WUN KOSAN SƆ’N I BO Ɔ? Be kan kle sran sunman kɛ asiɛ’n su ninnge’m be boli nun sa ngbɛn. Ɔ maan, be waan ninnge mun yɛ be kacikacili lele yɛ klɔ sran m’ɔ bu sa’m be sin akunndan’n, m’ɔ si ngwlɛlɛ’n, ɔ boli nun ɔn.
Sɛ ɔ ti sɔ mɔ nán sran yɛ ɔ yili e’n, nn e ti aika. ?Sɛ e ti sɔ kusu’n, wan yɛ é úsɛ i ngwlɛlɛ afɛ ɔ? ?Wan yɛ ɔ́ dé e ɲrɛnnɛn’n nun ɔn? Sa kɛ nzue m’ɔ tɔ di lika’n, annzɛ mɛn siefuɛ’m be afiɛn ndɛnnganndɛnngan’n, annzɛ e bɔbɔ e su sa’m be nun’n, saan e bɔbɔ yɛ é kplí e ti naan y’a wun be trawlɛ ɔ.
?Sɛ e bɔbɔ é kplí e ti sakpa’n, amún bú i sɔ liɛ’n sɛ? ?I sɔ’n yó maan amun wla gúa ase? Sɛ ɔ timan sɔ’n, ɔ fata kɛ amun kunndɛ atin uflɛ. Sɛ amun yo sɔ’n, i su ɔ. Afin, i sɔ’n ti ngwlɛlɛfuɛ aeliɛ.
Ndɛ nga Biblu’n kan’n
Biblu’n kle kɛ nán ninnge mun yɛ be kacikacili ngbɛn sa lele yɛ e boli nun ɔn. Sanngɛ, e Si Ɲanmiɛn m’ɔ klo sran’n yɛ ɔ yili e ɔ. Amun e nian ndɛ nga Ɲanmiɛn Ndɛ’n kan’n.
Bo Bolɛ 1:27. ‘Yɛ Ɲanmiɛn yili sran’n kɛ i bɔbɔ sa ɔ. Ɔ yili i kɛ i bɔbɔ Ɲanmiɛn’n sa. Ɔ yili yasua nin bla.’
Jue Mun 139:14. ‘Ń yó ɔ mo yilɛ klanman mɔ a yili min’n ti. Ɔ sa nuan ninnge be yo ɲɛnmɛn, n wun i wlɛ sɔ.’
Matie 19:4-6. ‘Kɛ Ɲanmiɛn yí sran’n, ɔ yili yasua nin bla naan w’a se kɛ: “I sɔ’n ti yɛ maan yasua kpáci i si nin i nin yɛ ɔ́ fɛ́ i wun mɛ́ntɛn i yi yɛ be nɲɔn’n bé káci sran wunmuan niɔn.” ?An nian kɛnngɛnmɛn i le? Kɛ ɔ ko yo sɔ’n, be timan sran nɲɔn kun, sanngɛ be ti sran wunmuan. Ɔ maan like nga Ɲanmiɛn kan be bo nun’n, nán maan sran fi ti be nun.’
Sa Nga Be Yoli’n 17:24, 25. ‘Ɲanmiɛn m’ɔ yili mɛn’n nin i nun like’n kwlaa’n, m’ɔ ti nglo lɔ nin asiɛ’n be Min’n, ɔ tranman sua mɔ sran kplan mɛn i’n nun. I m’ɔ man sran’m be kwlaa be nguan’n, m’ɔ man be wunmiɛn’n, m’ɔ man be like’n kwlaa’n, i sa mianman like fi wun mɔ sɛ sran’m be su i’n be kwla yo mɛn i ɔ.’
Sa Nglo Yilɛ 4:11. ‘E Min Ɲanmiɛn, kɛ bé yí wɔ ayɛ bé mánmán wɔ mɔ be se kɛ a kwla sa’n kwlaa yo’n i su ɔ, afin wɔ yɛ a yili like’n kwlaa ɔ, a klo kɛ á yí be ti yɛ a yili be ɔ, yɛ ɔ ti yɛ be o lɛ ɔ.’
Wafa nga Biblu’n tɛ kosan’m be su’n, ɔ maan e wla gua ase
Biblu’n se kɛ ‘asiɛ’n su wa’n, Ɲanmiɛn i dunman’n wo osuosu’n kwlaa su.’ (Efɛzfuɛ Mun 3:15) Kɛ e si sɔ’n, sɛ laa e bu e wiengu’m be wun akunndan tɛ’n, e kaci. Asa ekun’n, wafa nga e bu e bɔbɔ e wun laa’n, ɔ nin e su sa mun’n, e bu i sɛsɛ siɛn’n. Akunndan nga e bu i siɛn’n yɛ:
Kɛ sa’n tin e su kekle’n, afɔtuɛ’n sɔnnin. Sanngɛ e liɛ’n, e si atin nga é fá’n. Ɔ maan, e wla gua ase. E fa e wla’n gua ndɛ nga Biblu’n kan’n su. Ɔ se kɛ: ‘Ɲanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli ɔ. Be fa kle like, be fa kle sran mun lele be wun nanwlɛ’n, be fa tu be fɔ, be fa kle be sa nga be yo ɔ ɔ ti kpa’n naan Ɲanmiɛn sran’n ɔ ɲan like m’ɔ kwla fa di junman kwlaa ng’ɔ ti kpa’n.’—2 Timote 3:16, 17.
I yo, Biblu’n nun afɔtuɛ’m be su nantilɛ’n, ɔ timan aɔwi. Ɔ fata kɛ e tra e awlɛn naan y’a kwla nanti su. Afin wie liɛ’n, afɔtuɛ nga Biblu’n man e’n, ɔ timan e liɛ’n su. (Bo Bolɛ 8:21) Sanngɛ, sɛ e si kɛ e Si m’ɔ o nglo lɔ’n, m’ɔ yili e’n klo e’n, é kplín like ng’ɔ se e kɛ e yo’n su kɛ ɔ ti kpa man e. (Ezai 55:9) I Ndɛ’n se e kɛ: ‘Nán lafi ɔ bɔbɔ wɔ akunndan liɛ’n su. Anannganman i su yɛ lafi ɔ. Sɛ á fín ase o á jáo o, Anannganman i dunman yɛ bo ɔ. Sɛ a bo i dunman’n, ɔ́ bó ɔ ɲrun atin’n.’ (Nyanndra Mun 3:5, 6) Sɛ e nanti afɔtuɛ sɔ’n su’n, kɛ sa wá tɔ́ e su kekle’n, e wla su boman e wun dan.
Kɛ sran’m be bu e lufle’n, e seman kɛ e nunman sran’m be nun wie e finwlɛ’n ti. Sanngɛ, e bɔbɔ é bú e wun sran. ?Ngue ti ɔ? Afin Zoova m’ɔ ti e Si m’ɔ o nglo lɔ’n, ‘ɔ kpaman sran nun, sanngɛ nvle kwlaa nun’n, sran ng’ɔ sro i m’ɔ yo i klun sa’n, i klun jɔ i wun.’—Sa Nga Be Yoli’n 10:34, 35.
Kɛ e wun i sɔ’n i wlɛ’n, e kusu e buman sran nga e nin be e fiman lika kunngba’n, be wun akunndan tɛ. E wun i wlɛ kɛ sɛ sran kun bu i kɛ nvle wie nunfuɛ’m be ti kpa tra be wiengu mun’n, ato ɔ. Afin “sran ng’ɔ yili be’n be kwlaa be osu’n ti kun. Ɔ yili be kɛ be tran asiɛ’n su.”—Sa Nga Be Yoli’n 17:26.
Nanwlɛ, kɛ e si kɛ y’a boman nun sa ngbɛn naan e ndɛ lo e Yifuɛ’n, e wla gua ase. Sanngɛ, kɛ ɔ ko yo naan e wla w’a gua ase kpa titi’n, like uflɛ o lɛ m’ɔ kwla uka e ɔ.
[Ndɛ kwle, bue 4]
?Ninnge mun yɛ be kacikacili lele yɛ klɔ sran’n boli nun ɔn?