Like nga ti yɛ ɔ fata kɛ e nzuɛn’n fa Ɲanmiɛn liɛ’n
“Maan amun nzuɛn liɛ’n ɔ fa min liɛ’n.”—SAU. 11:45.
?WAFA SƐ YƐ AMÚN TƐ́ SU Ɔ?
?Ngue yɛ wunnzinlɛ mɔ Aarɔn nin i mma’m be wunnzinnin’n, ɔ kle e kwlakwla ɔ?
?Kɛ e yo aɲinyiɛfuɛ’n, ngue yɛ i sɔ’n kle ɔ?
?Wafa sɛ yɛ ɔ fata kɛ e bu mmoja’n i su mmla nga Ɲanmiɛn mannin’n niɔn?
1. ?Ngue yɛ é yó naan Nyanmiɛn Nyrun Saun Yolɛ fluwa’n w’a uka e ɔ?
ZOOVA kunndɛ kɛ i sufuɛ’m be nzuɛn’n fɛ i liɛ’n. Yɛle kɛ maan be yo sanwun. Biblu’n nun fluwa nga be flɛ i Nyanmiɛn Nyrun Saun Yolɛ’n, ɔ kɛn i sɔ liɛ’n i ndɛ kpɛ sunman. Sɛ e kanngan fluwa sɔ’n nun naan e si nun kpa’n, ɔ́ úka e dan. Yɛle kɛ, é wún wafa nga é yó naan e nzuɛn’n w’a fa Ɲanmiɛn liɛ’n.
2. ?Ngue yɛ Nyanmiɛn Nyrun Saun Yolɛ fluwa’n kle e ɔ?
2 Moizi yɛ ɔ klɛli Nyanmiɛn Nyrun Saun Yolɛ fluwa’n niɔn. Fluwa sɔ’n wo “Ɲanmiɛn Ndɛ nga be klɛli’n” mɔ be fa kle like’n, i nun wie. (2 Tim. 3:16) Ɔ kle e kɛ ɔ fata kɛ e ɲin yi Ɲanmiɛn titi. Yɛle kɛ, nán e yo like m’ɔ́ sáci Ɲanmiɛn dunman’n. (Sau. 22:32) I sɔ’n ti, fluwa sɔ’n nun’n, Ɲanmiɛn se kpɛ sunman kɛ: “Min yɛ n ti Anannganman nin-ɔn.” Like suanlɛ nga, ɔ nin ng’ɔ́ bá lɛ’n, bé wá fá e ɲin síe Nyanmiɛn Nyrun Saun Yolɛ fluwa’n i nun ndɛ wie’m be su. Ɔ maan, é wún wafa nga é yó naan e nzuɛn’n w’a fa Ɲanmiɛn liɛ’n.
ƝANMIƐN ƝRUN SAUN YOLƐ’N
3, 4. ?Ngue yɛ wunnzinlɛ mɔ Aarɔn nin i mma’m be wunnzin’n, ɔ ti i nzɔliɛ ɔ? (An nian desɛn ng’ɔ o kan like suanlɛ’n bo i bo lɛ’n.)
3 An kanngan Saun Yolɛ 8:5, 6 nun. Zoova kpali Aarɔn kɛ ɔ yo i ɲrun jranfuɛ’m be su kpɛn. Kpɛkun, ɔ kpali Aarɔn i mma mun kɛ be yo i ɲrun jranfuɛ. Junman nga Aarɔn wá dí’n, ɔ ti junman nga Zezi wá dí’n i nzɔliɛ. Yɛ Aarɔn i mma’m be junman liɛ’n, ɔ ti junman mɔ Zezi i sɔnnzɔnfuɛ nga Ɲanmiɛn kpali be sieli be ngunmin’n bé wá dí’n i nzɔliɛ. ?Ngue ti yɛ Aarɔn wunnzinnin ɔ kploli i wun fiɛn’n niɔn? ?I sɔ’n kle kɛ Zezi kusu wá kpló i wun fiɛn’n wie ti ɔ? Cɛcɛ. Afin Zezi timan sa tɛ yofuɛ, yɛ “fiɛn kaan sa nun-mɛn i wun.” (Ebr. 7:26; 9:14) Sanngɛ Aarɔn liɛ’n, ɔ fata kɛ ɔ wunnzin ɔ kplo i wun fiɛn’n. I liɛ’n, ɔ́ yó kɛ Zezi mɔ fiɛn kaan sa nunmɛn i wun’n sa. ?Yɛ Aarɔn i mma’m be li? ?Ngue ti yɛ be wunnzin wie ɔ?
4 Wunnzinlɛ mɔ Aarɔn i mma’m be wunnzinnin’n, ɔ ti be nga Ɲanmiɛn kpali be sieli be ngunmin’n, be sanwun yolɛ’n i nzɔliɛ. ?Batɛmu mɔ be yoli Klistfuɛ sɔ mun’n, yɛ ɔ ti be sanwun yolɛ’n niɔn? Cɛcɛ. Batɛmu yolɛ’n, ɔ kploman sran wun fiɛn’n. Sanngɛ, ɔ kle kɛ sran kun w’a fɛ i wun w’a man Ɲanmiɛn. Klistfuɛ nga Ɲanmiɛn kpali be sieli be ngunmin’n, Ɲanmiɛn Ndɛ’n waan Klist yo be yɛiin “i ndɛ’n ti.” Yɛle kɛ, be nanti like nga Klist kleli’n su cɛn kwlakwla. (Efɛ. 5:25-27) Kɛ be yo sɔ’n, be yo sanwun yɛ be kaci Ɲanmiɛn liɛ mlɔnmlɔn. ?Yɛ Klistfuɛ nga be ti Zezi i “bua’m be wie” mun’n, be li?—Zan 10:16.
5. ?Kɛ be se kɛ Klistfuɛ nga be ti Zezi i bua’m be wie’m be ti yɛiin Ɲanmiɛn Ndɛ’n ti’n, i bo yɛle benin?
5 Junman nga Aarɔn i mma’m be dili’n, nɛ́n i wie yɛ Klistfuɛ nga be ti Zezi i bua’m be wie mun mɔ be ti ‘sran kpanngban kpa’n,’ be di ɔ. (Ngl. 7:9) Sanngɛ, be kusu be yo yɛiin Ɲanmiɛn Ndɛ’n ti. Kɛ be kanngan tɛ mɔ Zezi fɛli i wun yili’n i su ndɛ nga Biblu’n kan’n, be lafi su. Ɔ maan, be su Ɲanmiɛn “wia nun nin kɔnguɛ.” (Ngl. 7:13-15) Be nga Ɲanmiɛn kpali be sieli be ngunmin mun o, be nga be ti Klist i bua’m be wie mun o, kɛ be yo “sa ng’ɔ ti kpa’n” i titi’n, be ka yɛiin titi. (1 Piɛ. 2:12) Zoova i sufuɛ’m be kwlakwla be ti yɛiin, yɛ be bo ti kun be su Zezi m’ɔ ti be Tafuɛ’n i su. Kɛ Zoova wun i sɔ liɛ’n, ɔ yo i fɛ dan.
6. ?Ngue ti yɛ ɔ fata kɛ cɛn kunngun e bu e klun lɔ e nian ɔn?
6 ?Ngue yɛ laa Izraɛli lɔ’n, wunnzinlɛ mɔ Ɲanmiɛn ɲrun jranfuɛ’m be wunnzin’n, ɔ kle e ɔ? Be nga e kle be Biblu’n nun like’n, be sie i nzɔliɛ kɛ e wlawla e wun kpa yɛ e ti yɛinyɛin. Asa ekun’n, be sie i nzɔliɛ kɛ e aɲia yowlɛ’m be ti yɛinyɛin wie. Wunnzinlɛ mɔ Aarɔn nin i mma’m be wunnzin’n, ɔ kle e ekun kɛ sran kwlaa ng’ɔ kunndɛ kɛ ɔ́ sú Ɲanmiɛn’n, ɔ fata kɛ ɔ yo sran mɔ “sa tɛ nun-mɛn i anwlɛn’n nun” ɔn. (An kanngan Jue Mun 24:3, 4 nun; Eza. 2:2, 3.) Ɔ maan, nán e wunnɛn’n i su ngunmin yɛ ɔ fata kɛ e yo sanwun ɔn. Sanngɛ, ɔ fataman kɛ sa tɛ tran e awlɛn’n nun. I lɛ’n nun yɛ e kwla su Zoova ɔ. I sɔ’n ti’n, ɔ fata kɛ cɛn kunngun e bu e klun lɔ e nian. I liɛ’n, sɛ sa tɛ wie su tran e awlɛn’n nun’n, é wlɛ́ i ase ndɛndɛ naan e nzuɛn’n w’a fa Ɲanmiɛn liɛ’n. (2 Kor. 13:5) Wienun ɔn, Klistfuɛ kun nian bian nin bla nna nga be fa fite nzra nun’n. I lɛ’n nun’n, ɔ fata kɛ ɔ usɛ i wun kɛ: “?Min nzuɛn’n fa Ɲanmiɛn liɛ’n?” Kpɛkun, maan ɔ kunndɛ ukalɛ naan ɔ wla sa tɛ yolɛ sɔ’n i ase.—Zak 5:14.
MAAN E YO AƝINYIƐFUƐ NAAN E KLE KƐ E NZUƐN’N FA ƝANMIƐN LIƐ’N
7. ?Ajalɛ kpa benin yɛ Zezi kleli ɔ?
7 Moizi sieli Aarɔn kɛ ɔ yo Ɲanmiɛn ɲrun jranfuɛ’m be su kpɛn. Kpɛkun, ɔ sieli Aarɔn i mma mun kɛ be yo Ɲanmiɛn ɲrun jranfuɛ. Kɛ Moizi síe be sɔ’n, ɔ kpɛli bua kɔmin. Kpɛkun, ɔ fali bua’n i mmoja’n wie kpɛnnin Aarɔn nin mma’m be su fama’n i pɛkɛpɛkɛ’m be su. Ɔ fa wie ekun kpɛnnin be sama kokotre fama’n nin be ja mma kokotre fama’n, be su. (An kanngan Saun Yolɛ 8:22-24 nun.) I sɔ’n kle kɛ Ɲanmiɛn ɲrun jranlɛ junman mɔ be su fa man be’n, ɔ fata kɛ be nian nun be di i weinwein. I sɔ yolɛ’n nun’n, Zezi m’ɔ ti Ɲanmiɛn ɲrun jranfuɛ’m be su kpɛn’n, ɔ kleli i sɔnnzɔnfuɛ nga Ɲanmiɛn kpali be sieli be ngunmin’n, ɔ nin be nga be ti i bua’m be wie mun’n, be ajalɛ kpa. Yɛle kɛ, Zezi sieli i su tieli Ɲanmiɛn i nuan ndɛ’n. Kpɛkun, ɔ nantili su kpa guɛli i ti nin i bo.—Zan 4:31-34.
8. ?Ngue yɛ e mɔ e ti Zoova i sufuɛ’n, ɔ fata kɛ e kwlakwla e yo ɔ?
8 Zezi m’ɔ ti Ɲanmiɛn ɲrun jranfuɛ danfuɛ’n, ɔ nin Ɲanmiɛn be nantili klanman. E mɔ e ti Zoova i sufuɛ’n, ɔ fata kɛ e kwlakwla e nian Zezi i ayeliɛ sɔ’n su. Atin nga Ɲanmiɛn Ndɛ’n kle e’n, ɔ fata kɛ e nanti su seiin. I liɛ’n, e su boman Ɲanmiɛn wawɛ’n i wla. (Efɛ. 4:30) Nanwlɛ, maan e sin atin ng’ɔ ti kpa’n nun naan e “ja’n w’a fɔnndɔn-man.”—Ebr. 12:13.
9. (a) ?Ndɛ benin yɛ aniaan nsan mɔ be nin anuannzɛ’n i ɲrun dinfuɛ’m be dili junman likawlɛ’n, be kannin ɔn? (b) ?Ngue yɛ é yó naan ndɛ mɔ aniaan nsan sɔ’m be kannin’n, w’a uka e ɔ?
9 Aniaan nsan be nin anuannzɛ’n i ɲrun dinfuɛ’m be dili junman likawlɛ afuɛ kpanngban kpa. Maan e nian ndɛ nga be kannin’n. Kun seli kɛ: “Nanwlɛ, kɛ min nin aniaan nga be ti anuannzɛ’n i ɲrun dinfuɛ mun e di junman likawlɛ’n, min cenjele nun ɔn. N wunnin i wlɛ kɛ kannzɛ Ɲanmiɛn kpali aniaan sɔ mun sieli be ngunmin’n, sanngɛ fɔ o be nun wie. Ɔ nin i sɔ ngba’n, min ɲin yili be titi.” Kun ekun seli kɛ: “Ndɛ ng’ɔ o 2 Korɛntfuɛ Mun 10:5 nun’n, ɔ ukali min kpa. Ndɛ mma sɔ’n wla e fanngan kɛ maan e “nyin yi Klist.” N wunnin i wlɛ kɛ ɔ fata kɛ min nin be e di junman’n i kpa, yɛ maan min ɲin yi be. Ɔ maan, min ɲin w’a yiman be gblɛ nun.” Be nsan su’n seli kɛ: “Sɛ sran kun waan ɔ́ klé kɛ ɔ klo like nga Zoova klo i’n, naan ɔ kpɔ like nga Zoova kpɔ i’n, ɔ fata kɛ ɔ tran anuannzɛ’n nun klanman. Yɛ maan i ɲin yi be nga be dun e ɲrun mmua’n. I lɛ’n nun yɛ Zoova klun jɔ́ i wun ɔn. Afin be yɛ Zoova fali be kɛ be di i junman’n niɔn.” Aniaan sɔ’n wunnin kɛ Natan Nɔr m’ɔ yoli anuannzɛ’n i ɲrun dinfuɛ wie’n, w’a yoman kɛ aniaan wie mun sa. Yɛle kɛ, Natan Nɔr fali ndɛ nga afuɛ 1925 nun Sasafuɛ Tranwlɛ’n kannin’n su. Fluwa sɔ’n nun’n, be kannin nvle uflɛ kun i takalɛ ndɛ (Naissance d’une nation). Aniaan Natan Nɔr i ayeliɛ sɔ’n, ɔ yoli ɲɛnmɛn dan. Ndɛ nga aniaan nsan sɔ’m be kannin’n, maan e bu be su akunndan. I liɛ’n, e ɲin yí Ɲanmiɛn. Kpɛkun, e nzuɛn’n fɛ́ i liɛ’n titi.
MAAN E NANTI MMOJA’N I SU MMLA NGA ƝANMIƐN MANNIN’N SU
10. ?Ngue ti yɛ ɔ ti cinnjin kpa kɛ e nanti mmoja’n i su mmla nga Ɲanmiɛn mannin’n su ɔ?
10 An kanngan Saun Yolɛ 17:10 nun. Zoova seli Izraɛlifuɛ mun kɛ nán be di “mmoja’n, i wafa kwlaa.” Klistfuɛ’m be nanti mmla sɔ’n su wie. Yɛle kɛ, be diman nnɛn mmoja, yɛ be kplinman su kɛ be man be mmoja. (Yol. 15:28, 29) Kɛ mɔ e klo Zoova ti’n, e kunndɛ kɛ é ɲin yí i. E kunndɛman kɛ é yó sa wie mɔ i sɔ’n ti’n, Zoova klun su jɔman e wun naan be tu e asɔnun’n nun ɔn. Wie liɛ’n, sran wie mun, annzɛ dɔɔtrɔ’m be kwla se e kɛ sɛ b’a manman e mmoja’n, é wú. Sanngɛ, e kplinman su. E si kɛ sran wie’m bé yó e finfin i sɔ’n ti. Sanngɛ, Ɲanmiɛn nuan ndɛ’n su yɛ e nanti ɔ. (Zid 17, 18) ?Ngue yɛ ɔ́ úka e naan y’a diman mmoja naan kusu’n, y’a kplinman su kɛ be man e mmoja ɔ?—Mml. 12:23.
11. ?Sa tɛ’n i ti srɛlɛ’n i cɛn dan’n nun’n, ngue ti yɛ like nga be fa mmoja’n be yo’n, ɔ timan like kun yolɛ ngbɛn ɔn?
11 Laa Izraɛli lɔ sa tɛ’n i ti srɛlɛ’n i cɛn dan’n nun’n, like nga Ɲanmiɛn ɲrun jranfuɛ’m be su kpɛn’n yo’n, ɔ kle wafa nga Ɲanmiɛn bu mmoja’n. Cɛn sɔ’n nun’n, be kun bua annzɛ boli. Kpɛkun Ɲanmiɛn ɲrun jranfuɛ’m be su kpɛn’n, ɔ fa nnɛn mmoja’n wie kpɛntɛn-kpɛntɛn Ɲanmiɛn i alaka’n i ɲrun lɛ, ɔ nin i tre’n su. Ɔ yo sɔ fa tu Izraɛlifuɛ’m be wun sa tɛ’n naan Ɲanmiɛn nin be w’a di. (Sau. 16:14, 15, 19) Nanwlɛ, mmoja’n yɛ maan Ɲanmiɛn kwla yaci Izraɛlifuɛ’m be sa tɛ mun cɛ be ɔ. Asa ekun’n, Zoova seli kɛ sran kwlaa nga i waan ɔ́ kún nnɛn wie dí’n, maan ɔ guɛ i mmoja’n i ase naan ɔ bo fa kata su. Afin “ninnge nga be de wunmiɛn’n, be mmoja’n nun yɛ be nguan’n wo-ɔ.” (Sau. 17:11-14) Mmoja’n mɔ be guɛ i ase mɔ be bo fa be kata su’n, ɔ timan like kun yolɛ ngbɛn. Laa kpa nun Nowe blɛ su’n, Ɲanmiɛn seli Nowe nin i awlobo’n kɛ nán be di mmoja. (Bob. 9:3-6) ?Ngue yɛ mmoja’n i su mmla sɔ’n kle Klistfuɛ mun ɔn?
12. ?Ngue yɛ Pɔlu waan be fa nnɛn mmoja’n be yo ɔ?
12 Fluwa nga akoto Pɔlu klɛli ko mannin Ebre mun’n i nun’n, ɔ kannin like nga be fa mmoja’n be yo’n, i ndɛ. Ɔ seli kɛ: “Be klɛli i mmla’n nun kɛ be fa mmoja yo ninnge’m be kpanngban lika kpa be wun saun, ɔ maan sɛ be kun-man nnɛn bɔ i mmoja gua-man’n, Nyanmiɛn yaci-man be wun sa’n cɛ-man be.” (Ebr. 9:22) Sanngɛ, Pɔlu seli ekun kɛ tɛ mɔ Izraɛlifuɛ’m be yi be man Ɲanmiɛn’n, ɔ kwlá yoman naan b’a yo kpa mlɔnmlɔn. Kɛ be yi tɛ sɔ mun’n, be wla kpɛn su kɛ be ti sa tɛ yofuɛ naan ɔ fata kɛ Ɲanmiɛn yaci be sa tɛ mun cɛ be. Nanwlɛ, Mmla’n ti kɛ “like kpakpa nga bé bá’n be wawɛ sa, ɔ kle-man be wafa kpa’n.” (Ebr. 10:1-4) ?Sɛ ɔ ti sɔ’n, ngue yɛ maan Ɲanmiɛn kwla yaci sran’m be sa tɛ mun cɛ be ɔ?
13. ?Kɛ e si kɛ Zezi fɛli i bɔbɔ i mmoja’n yɛ ɔ ko jrannin Ɲanmiɛn ɲrun ɲanmiɛn su lɔ’n, wafa sɛ yɛ i sɔ’n yo e ɔ?
13 An kanngan Efɛzfuɛ Mun 1:7 nun. Tɛ mɔ Zezi fɛli i wun yili’n, ɔ kpɔ sran’m be kwlakwla be ti. Sanngɛ e mɔ e klo Zezi nin i Si’n, tɛ sɔ m’ɔ yili’n ti e cinnjin kpa. (Gal. 2:20) Kɛ Ɲanmiɛn cɛnnin Zezi’n, Zezi sɛli i sin Ɲanmiɛn wun lɔ. I sin’n, like nga Zezi yoli’n i ti yɛ e kwla fite nun ɔn. Like sɔ mɔ Zezi yoli’n, yɛ laa Izraɛli lɔ sa tɛ’n i ti srɛlɛ’n i cɛn dan’n nun’n, Ɲanmiɛn ɲrun jranfuɛ’m be su kpɛn’n yo’n niɔn. Cɛn sɔ’n nun’n, Ɲanmiɛn ɲrun jranfuɛ’m be su kpɛn’n, ɔ fa nnɛn mmoja’n, ɔ wlu Ɲanmiɛn sua’n i lika kpa’n nun lɔ. Kɛ ɔ wlu lɔ’n, ɔ ti kɛ ɔ jin Ɲanmiɛn bɔbɔ i ɲrun sa. (Sau. 16:11-15) Like kunngba’n yɛ Zezi yoli ɔ. Kɛ Ɲanmiɛn cɛnnin i m’ɔ sɛli i sin’n, ɔ ɔli Ɲanmiɛn wun lɔ. Ɔ fɛli i bɔbɔ i mmoja’n yɛ ɔ ko jrannin Ɲanmiɛn ɲrun ɔn. (Ebr. 9:6, 7, 11-14, 24-28) E ti kpɔlɛ tɛ mɔ Zezi yili’n ti’n, Ɲanmiɛn kwla yaci e sa tɛ mun cɛ e. Ɔ maan kɛ é sú Ɲanmiɛn’n, e klun titiman e. I sɔ’n yo e fɛ dan.
14, 15. ?Like nga ti yɛ Zoova mannin mmoja’n i su mmla’n, ngue ti yɛ ɔ ti cinnjin kpa kɛ e wun i wlɛ naan e nanti su ɔ?
14 ?Like nga ti yɛ Zoova se kɛ nán e di “mmoja’n, i wafa kwlaa” wie fi’n, y’a wun i wlɛ siɛn’n? (Sau. 17:10) ?Yɛ like nga ti yɛ Ɲanmiɛn bu mmoja’n kɛ ɔ ti i liɛ klonglo’n, y’a wun i wlɛ wie siɛn’n? Yɛle kɛ, mmoja’n i nun yɛ nguan’n wo ɔ. (Bob. 9:4) I sɔ’n ti’n, ɔ fata kɛ e bu mmoja’n i kɛ nga Ɲanmiɛn fa bu i’n sa. Ɔ maan, ɔ fataman kɛ e di mmoja. Yɛ nán e kplin su kɛ be man e mmoja. Nanwlɛ, ɔ fata kɛ e wun i wlɛ kɛ mmoja’n ti Ɲanmiɛn i ɲrun like nanndoliɛ dan. Yɛ ɔ fata kɛ e lafi e ti kpɔlɛ tɛ mɔ Zezi fɛli i wun yili’n su. I liɛ’n, Ɲanmiɛn nin e dí.—Kol. 1:19, 20.
15 Sran fi simɛn i ɲrun lɔ sa. Yɛle kɛ, sa wie kwla ɲan e. Kpɛkun, be kwla se kɛ bé mán e mmoja. Sɛ nán mmoja bɔbɔ ba’n yɛ be se kɛ bé fá mán e’n, mmoja’n i nun ninnge kanngan wie mun yɛ be kwla se kɛ bé fá mán e ɔ. Annzɛ kusu’n, be kwla se kɛ bé dí e mmoja’n i su junman wie mun naan e yo juejue. I sɔ sa’n kwla ɲan e osufuɛ, annzɛ e janvuɛ kpa wie. I sɔ’n ti’n, maan e kunndɛ mmoja’n i su ndɛ fluwa’m be nun naan ajalɛ nga é fá’n, e dun mmua bu i akunndan e sie. Yɛ maan e fa wlɛ i srɛlɛ’n nun. Andɛ’n, dɔɔtrɔ sunman nin sran wie mun ekun be bo i ndolo kɛ e ko fa e mmoja e man naan bé fá dé sran wie mun. Sanngɛ, e mɔ e ti Zoova i sufuɛ’n, e kunndɛman kɛ é yó like ng’ɔ́ bó i wla’n. Asa ekun’n, e si kɛ Ɲanmiɛn Zoova kunngba cɛ, yɛ ɔ le atin kle like ng’ɔ fata kɛ be fa mmoja’n be yo’n niɔn. I waan “mmoja’n, i wafa kwlaa” ɔ ti i liɛ klonglo. I sɔ’n ti’n, maan e fua kpa kɛ é nánti mmoja’n i su mmla nga Zoova mannin’n i su. Yɛ maan sa’n kwlaa nun’n, e kle kɛ e bu Zezi i mmoja’n i like dan. Afin i mmoja’n m’ɔ guɛli i ase’n ti yɛ Ɲanmiɛn kwla yaci e sa tɛ mun cɛ e, naan y’a ɲan anannganman nguan ɔn.—Zan 3:16.
LIKE NGA TI YƐ ZOOVA KUNNDƐ KƐ E NZUƐN’N FƐ I LIƐ’N
16. ?Ngue ti yɛ ɔ fata kɛ Zoova i sufuɛ’m be nzuɛn’n fɛ i liɛ’n niɔn?
16 Kɛ Zoova deli Izraɛlifuɛ mun Eziptifuɛ’m be sa nun’n, ɔ seli be kɛ: “M bɔbɔ min Anannganman’n, min yɛ n fali amun Ezipt mɛn’n nun lɔ m bali ɔ. Min waan ń fá amun ḿ bá naan ń yó amun Nyanmiɛn. Min nzuɛn nin klɔ sran liɛ’n timan kun. I sɔ’n ti maan amun nzuɛn liɛ’n ɔ fa min liɛ’n.” (Sau. 11:45) Ɲanmiɛn Zoova kunndɛli kɛ Izraɛlifuɛ’m be nzuɛn fɛ i liɛ’n. Andɛ kusu’n, ɔ kunndɛ kɛ e nzuɛn’n fɛ i liɛ’n wie. Nyanmiɛn Nyrun Saun yolɛ fluwa’n kle sɔ weiin.
17. ?Wafa sɛ yɛ siɛn’n, amun bu Nyanmiɛn Nyrun Saun Yolɛ fluwa’n niɔn?
17 Like suanlɛ nga w’a fa e ɲin w’a sie Nyanmiɛn Nyrun Saun Yolɛ fluwa’n i nun ndɛ wie’m be su. Ɔ maan, e wunnin kɛ fluwa sɔ’n ti cinnjin kpa. Yɛle kɛ, ɔ kle like nga ti yɛ ɔ fata kɛ e nzuɛn’n fa Ɲanmiɛn liɛ’n. ?Sanngɛ, ngue ekun yɛ Nyanmiɛn Nyrun Saun Yolɛ fluwa’n kwla kle e ɔ? ?Wafa sɛ yɛ fluwa sɔ’n m’ɔ o Ɲanmiɛn Ndɛ’n nga be klɛli’n i nun wie’n, ɔ kwla uka e naan y’a su Ɲanmiɛn kpa ɔ? Like suanlɛ ng’ɔ́ bá lɛ’n, ɔ́ wá tɛ́ kosan sɔ’m be su.