LIKE SUANLƐ 4

Biblu’n nun ndɛ mma’m be su fitilɛ klanman

Matie 22:41-45

LIKE NG’Ɔ FATA KƐ A YO’N: Kwlaa naan w’a kanngan Biblu’n nun ndɛ mma kun nun’n, yo naan ndɛ tiefuɛ’m be ɲin tran ndɛ nga á wá kánngan nun’n i su.

Bu like nga ti yɛ a klo kɛ á kánngan Biblu’n nun ndɛ mma’n nun’n i akunndan. Biblu’n nun ndɛ mma kwlaa nga á kánngan nun’n, i nun ndɛ cinnjin nga a kunndɛ kɛ ɔ ndɛ tiefuɛ’m be fa be ɲin be sie su’n, dun mmua bo su kle be.

Biblu’n nun ndɛ mma nga a dun mmua to be naan w’a to nga ɔ waan á kánngan nun’n, fa ɔ ɲin sie be su. Kpɛkun fa ɔ ɲin sie i ndɛ mma nga be su i su’n be su wie. Sɛ á bó sran kun m’ɔ klɛli Biblu’n nun fluwa kun i dunman’n, annzɛ sran ng’ɔ su ijɔ’n i dunman’n, nian ɔ wun su naan w’a fɔnman.
Yo naan sran’m be wun i wlɛ kɛ Biblu’n nun ndɛ’n leman wunsu. Sɛ ɔ ndɛ tiefuɛ’m be lafi Ɲanmiɛn su’n, kɛ á kán Biblu’n i ndɛ’n, se kɛ “Ɲanmiɛn Ndɛ’n.” I liɛ’n bé wún kɛ Biblu’n nun yɛ ngwlɛlɛ’n i kpafuɛ’n ɔ fin-ɔn.
Yo maan ndɛ tiefuɛ’m be klo kpa kɛ bé tíe ndɛ nga á wá kánngan’n. Usa kosan kun mɔ Biblu’n nun ndɛ mma’n ɔ́ tɛ́ su’n. Annzɛ sa kun mɔ Biblu’n nun ndɛ mma’n kwla uka be naan b’a wun i trawlɛ’n, bo su kle be. Annzɛ kusu’n, ndɛ cinnjin kun mɔ Biblu’n nun ndɛ mma sɔ’n kwla uka be naan b’a wun i wlɛ’n, kɛn i ndɛ.

Biblu’n nun ndɛ mma’n, ɔ nin ndɛ nga a su yiyi nun’n, be su like nga ɔ ndɛ tiefuɛ’m be si i’n, bu i akunndan. Kannzɛ bɔbɔ be si Biblu’n nun ndɛ mma sɔ’n i kpa’n, sanngɛ yo maan be klo kpa kɛ bé tíe i ekun.