Nowe blɛ su nzue dan m’ɔ tɔli’n: ɔ timan ngua dilɛ
?WAFA nga andɛ mɛn’n fa ti’n, ɔ yo amun fɛ? Sɛ ɔ yoman amun fɛ naan amun kunndɛ kɛ fɔundi tran asiɛ’n su naan alɛ dilɛ nin ɲrɛnnɛn kwlaa wie’n, maan amun wla gua ase. Nowe m’ɔ ti sran kpa’n, i su ndɛ ng’ɔ o Biblu nun’n, ɔ kwla cici amun wla. Afin, kɛ Nowe boboli mmeli’n mɔ i yi nin i mma’m be wluli nun’n, anannganman su nzue’n tɔli naan w’a nunnun sa tɛ yofuɛ’m be kwlaa kpan.
Nowe i su ndɛ sɔ’n wo Bo Bolɛ ndɛ tre 6-9 nun. Mɛn wunmuan nun’n, sran’m be si i kpa. Ɲanmiɛn flɛfuɛ’m be kla fluwa’n nun’n, be bo su, yɛ nvlenvle’m be laa ndɛ wie’m be nun’n, be kɛn i ndɛ. Sanngɛ nán andɛ sa yɛ Biblu’n su like sifuɛ nin siansifuɛ’m be si su akplowa ɔ. Yɛle kɛ, wie’m be waan nzue sɔ’n tɔli. Wie’m be kusu be waan w’a tɔman naan ndɛ sɔ’n ti kɛ ngua sa yɛ be dili naan bé fá klé sran’m be ngwlɛlɛ ɔ. Sanngɛ Ɲanmiɛn Ndɛ nun’n, Nowe blɛ su anannganman su nzue m’ɔ tɔli’n, ɔ timan ngua dilɛ. Maan e yiyi nun nian.
Ngua’n liɛ’n, ndɛ paloo ngbɛn sa yɛ be kan ɔn. Sanngɛ anannganman su nzue’n i ndɛ nga Bo Bolɛ fluwa’n kannin’n, ɔ timan sɔ. Afin afuɛ nin anglo ɔ nin cɛn nga sa sɔ’n juli’n, ɔ kɛnnin i ndɛ weiin. Like nga be fa yoli mmeli’n, ɔ nin wafa ng’ɔ ti’n, be yiyili i kwlaa nun. ika nga mmeli’n ko jrannin’n, ɔ nin blɛ nga nzue’n kannin ase kusu’n, w’a fiaman su. Sɛ ɔ ti kɛ ngua dilɛ nn ɔ su yoman sɔ.
Kɛ Ɛsdrasi nin Liki bé kán sran wie’m be osu’n i ndɛ Biblu’n nun’n, be boli Nowe i dunman. (1 Be Nyoliɛ 1:4; Lik 3:36) Liki klɛli kɛ Zezi ti Nowe i osu nunfuɛ. Ɛsdrasi nin Liki be dun mmua usausali nun kpa naan b’a klɛ be ndɛ’n.
Ɲanmiɛn nuan ijɔfuɛ Ezai nin Ezekiɛli ɔ nin akoto Piɛli nin Pɔlu be kannin Nowe nin nzue dan ng’ɔ tɔli i blɛ su’n be ndɛ.—Ezai 54:9; Ezekiɛl 14:14, 20; Ebre Mun 11:7; 1 Piɛr 3:19, 20; 2 Piɛr 2:5.
Zezi Klist kannin nzue dan m’ɔ tɔli Nowe blɛ su’n i ndɛ wie. Ɔ seli kɛ: ‘Kɛ m mɔ n kacili Sran’n ḿ má bá’n, sa nga sran’m be yoli i Nowe blɛ su’n, sa kunngba’n yɛ bé yó ɔ: Be di like, be nɔn nzan, be ja bla nin bian, be fa be mma mun man bian, lele fa ju cɛn nga Nowe wluli mmeli nun’n, nzue dan’n tɔli naan w’a nunnun be kwlaa.’ (Lik 17:26, 27) ?Sɛ ɔ ti kɛ nzue dan’n w’a tɔman nn ngue ti yɛ Zezi fɛ́ i sɔ sa’n, ɔ́ súnnzun sa ng’ɔ́ wá jú ‘i m’ɔ kacili Sran’n i balɛ’ blɛ nun ɔn?
Akoto Piɛli kannin sran wie mɔ ndɛ nga Biblu’n kan’n ti’n, ‘bé srí e’n’ be ndɛ. Kpɛkun i waan: ‘Sa kun o lɛ mɔ be kloman kɛ bé bú i akunndan. Sa sɔ’n yɛle kɛ Nowe blɛ su’n, nzue yi katali asiɛ’n su’n, ɔ nunnunnin laa mɛn liɛ’n.’ Sanngɛ e liɛ’n, ɔ fata kɛ e bu “sa” sɔ’n i akunndan. Afin Piɛli seli kɛ: ‘Be sieli ɲanmiɛn su lɔ’n nin asiɛ nga be o lɛ andɛ’n, be lɛ maan sin di be. Bé síe be lɛ lele fá jú cɛn nga bé bú sran nga be sroman Ɲanmiɛn’n be fɔ mɔ bé sáci be’n.’—2 Piɛr 3:3-7.
I yo, e blɛ liɛ nun kusu’n, Ɲanmiɛn wá núnnún sa tɛ yofuɛ mun. I sɔ ti, maan e nian Nowe i ajalɛ liɛ’n su. I liɛ’n, sɛ Ɲanmiɛn di su’n, kɛ asiɛ’n wá káci mɛn klanman mɔ sran kpa’m bé trán su’n, bé bó e dunman wie.