LIKE SUANLƐ 14
?Wafa sɛ yɛ e kwla su Ɲanmiɛn naan i klun w’a jɔ su-ɔ?
Kɛ nga e fa wunnin i like suanlɛ ng’ɔ sinnin lɛ’n nun’n sa’n, nán Ɲanmiɛn i sulɛ wafa kwlaa yɛ i klun jɔ su-ɔ. Sanngɛ kusu’n e kwla su i kɛ nga i bɔbɔ fa klo’n sa. ?Ɲanmiɛn i sulɛ wafa benin yɛ ɔ ti kpa mɔ i klun jɔ su-ɔ? (Zaki 1:27) Maan e nian ndɛ nga Biblu’n kan’n.
1. ?Ngue su yɛ ɔ fata kɛ sulɛ nga e su Ɲanmiɛn’n ɔ taka-ɔ?
Ɔ fata kɛ sulɛ nga e su Ɲanmiɛn’n ɔ taka ndɛ nga Biblu’n kan’n su. Zezi seli Ɲanmiɛn kɛ: “Ɔ ndɛ’n ti nanwlɛ.” (Zan 17:17) Ɲanmiɛn sulɛ wafa wie’m be faman be ɲin be siemɛn i ndɛ nanwlɛ ng’ɔ o Biblu’n nun’n su. Be fa be nannan’m be mmla’n ɔ nin like nga klɔ sran’m be kle’n, be fa kaci ndɛ nanwlɛ ng’ɔ o Biblu’n nun’n. Zoova i klun jɔman be nga be kpalo i mmla mun’n be wun. (Kanngan Marki 7:9 nun.) Sanngɛ kɛ e nian ndɛ nga Biblu’n kan’n su e su i mɔ e nanti i mmla’n su’n, i klun jɔ e wun.
2. ?Wafa sɛ yɛ ɔ fata kɛ e su Zoova-ɔ?
Kɛ mɔ Zoova yɛ ɔ yili e’n ti’n i kunngba cɛ yɛ ɔ fata kɛ e su i-ɔ. (Sa Nglo Yilɛ 4:11) Ɔ fata kɛ e klo i naan e su i kunngba cɛ. Ɔ fataman kɛ e sin ninnge nga be sɛli be’n annzɛ like uflɛ lika naan y’a su i.—Kanngan Ezai 42:8 nun.
Ɔ fataman kɛ “fiɛn kaan sa” tran sulɛ mɔ e su Zoova’n i wun. (Rɔmunfuɛ Mun 12:1) I sɔ’n kle kɛ ɔ fata kɛ e nanti i mmla’m be su. I wie yɛle kɛ be nga be klo Zoova’n be nanti aja’n i su mmla ng’ɔ man’n su. Asa ekun’n, be yoman ninnge wie m’ɔ kwla kpɛ be nguan’n i sin-ɔn. I wie yɛle kɛ be nɔnman siklɛti annzɛ drɔgi, yɛ be nɔnman nzan tratraman su.a
3. ?Ngue ti yɛ ɔ fata kɛ e nin e niaan Klisifuɛ mun e su Zoova likawlɛ-ɔ?
Aɲia nga e yo i lemɔcuɛ kwlaa’n, ɔ yo maan e ‘manman Zoova nzra dan’n nun.’ (Jue Mun 111:1, 2) Like nga e yo e fa kle sɔ’n yɛle kɛ e to Ɲanmiɛn i manmanlɛ jue. (Kanngan Jue Mun 104:33 nun.) Zoova wla e fanngan kɛ e tran aɲia’m be bo afin ɔ klo e. Yɛ ɔ si kɛ aɲia sɔ’m be kwla uka e naan y’a di aklunjɔɛ titi.
SI NDƐ’N NUN KPA EKUN
Maan e nian like nga ti yɛ Zoova kunndɛman kɛ e sin ninnge nga be sɛli be’n annzɛ like uflɛ lika e su i’n, ɔ nin ninnge wie mɔ e kwla yo e fa mɛnmɛn i’n.
4. Ɔ fataman kɛ e sin ninnge nga be sɛli be’n annzɛ like uflɛ lika e su Ɲanmiɛn
?Ngue ti yɛ e si kɛ sɛ e yo sɔ’n ɔ su jɔman Ɲanmiɛn klun-ɔn? An bo VIDEO’N, i sin’n an koko kosan yɛ’n i su yalɛ.
?Biblu’n nun’n, kɛ Ɲanmiɛn i sufuɛ wie’m be sinnin ninnge nga be sɛli be’n be lika be suli i’n, i bo’n guali sɛ?
Sran wie’m be waan kɛ be sin ninnge wie’m be lika su Ɲanmiɛn’n ɔ ti kɛ nn Ɲanmiɛn o be wun koko lɛ sa. ?Sanngɛ nɛ́n i sɔ mɔ be yo’n ti yɛ be nin Ɲanmiɛn be afiɛn ti nun-ɔn? An kanngan Ezipti Lɔ Tulɛ 20:4-6 nin Jue Mun 106:35, 36 nun. I sin’n an koko kosan yɛ’m be su yalɛ:
?Ninnge benin wie mun yɛ sran’m be sin be lika su Ɲanmiɛn mɔ a si i-ɔ?
?Kɛ sran’m be sin ninnge sɔ’m be lika be su Zoova’n wafa sɛ yɛ i sɔ’n yo i-ɔ?
?Yɛ ɔ li, a bu i sɛ?
5. Kɛ e su Zoova’n i sɔ’n yo maan e faman ato ndɛ’m be su
Wafa nga Zoova i sulɛ’n kwla uka e naan y’a lafiman ato ndɛ’m be su kun’n. An bo VIDEO’N.
An kanngan Jue Mun 91:14 nun, i sin’n an koko kosan yɛ’n i su yalɛ:
?Sɛ e klo Zoova naan e su i kunngba cɛ’n, ngue yɛ ɔ́ yó mán e-ɔ?
6. E su Zoova e aɲia’m be bo
Kɛ e to jue mɔ e tɛ kosan’m be su e aɲia’m be bo’n, i sɔ manman Zoova yɛ ɔ wla e wiengu’m be fanngan. An kanngan Jue Mun 22:22 nun, i sin’n an koko kosan yɛ’m be su yalɛ:
?Kɛ sran’m be tɛ kosan’m be su aɲia’m be bo’n i sɔ’n yo ɔ fɛ?
?A kunndɛ kɛ á síesíe ɔ wun naan á tɛ́ kosan’m be su wie?
7. Kɛ e kan like nga e suan’n i ndɛ e kle e wiengu mun’n i sɔ’n jɔ Zoova klun
Like nga e kwla yo naan y’a kan like nga e suɛn i Biblu’n nun’n i ndɛ y’a kle e wiengu mun’n ɔ sɔnnin. An kanngan Jue Mun 9:1 nin 34:1 nun, i sin’n an koko kosan yɛ’n i su yalɛ:
?Ngue yɛ a suɛnnin i Biblu’n nun mɔ a kunndɛ kɛ á bó su klé sran uflɛ-ɔ?
SRAN WIE’M BE WAAN: “Ɲanmiɛn i klun kwlá jɔman e wun le.”
?A bu i sɛ?
NDƐ’N I KPƆLƐ BOLƐ
Kɛ e su Zoova kunngba cɛ mɔ e mɛnmɛn i e aɲia’m be bo’n, mɔ e kan like nga e suan’n i ndɛ e kle e wiengu mun’n, i sɔ’n jɔ i klun.
Ndɛ’n i nun flanlɛ
?É yó sɛ naan y’a si wafa nga Ɲanmiɛn kunndɛ kɛ e su i’n?
?Ngue ti yɛ Zoova kunngba cɛ yɛ ɔ fata kɛ e su i-ɔ?
?Ngue ti yɛ ɔ fata kɛ e nin be nga be kunndɛ kɛ bé yó Ɲanmiɛn i klun sa’n e yia naan e su i likawlɛ-ɔ?
NDƐ WIE MUN EKUN
Like ng’ɔ ukali bla kun naan w’a yaci amuin sɔlɛ’n. I su ndɛ’n suan “N timan amuin’m be kanga kun.”
Like ng’ɔ kwla uka ɔ naan w’a tɛ kosan’m be su aɲia’m be bo’n.
“Manman Zoova aɲia’m be bo” (Sasafuɛ Tranwlɛ’n, afuɛ 2019, Zanvie)
Gbanflɛn kun mɔ aɲia’m be bo tranlɛ’n yoli kekle mɛnnin i’n, ɔ wa ɲannin aɲia’m be bo tranlɛ’n i su ye.
?Ɲanmiɛn sulɛ’n nun’n ɔ fata kɛ e fa waka nda?
“?Ngue ti yɛ Zoova i Lalofuɛ’m be faman waka nda be suman Ɲanmiɛn-ɔn?” (jw.org su ndɛ)
a Bé wá yíyí ndɛ sɔ’m be nun kpa like suanlɛ nga bé bá lɛ’n nun.