Kɛ bla’m be wunnin kɛ sran fi nunman Zezi i ndia’n nun lɔ’n, i sɔ’n boli be nuan dan! Mari m’ɔ fin Magdala’n wanndi ɔli “Simɔn Piɛli nin Zezi i sɔnnzɔnfuɛ ng’ɔ klo i kpa’n,” be sin. Zezi i sɔnnzɔnfuɛ sɔ’n yɛle akoto Zan. (Zan 20:2) Sanngɛ anzi kun fiteli bla nga be kali asieliɛ’n su lɔ’n be ɲrun. Asa ekun’n, be wunnin kɛ anzi kun ekun o ndia’n nun lɔ, “tralɛ ufue tɛnndɛn kun wlɛ i wun.”​—Marki 16:5.

Anzi’m be nun kun seli bla’m be kɛ: “Nán srɛ kun amun. N si kɛ amun su kunndɛ Zezi mɔ be kunnin i waka’n su’n. Ɔ nunman wa. Afin be cɛnnin i kɛ ng’ɔ fa kannin’n sa. An bla be wa nian lika nga be lɛli i saka’n, naan amun wɔ ndɛndɛ, amun ko se i sɔnnzɔnfuɛ’m be kɛ be cɛnnin i. Ɔ su dun mmua amun ɲrun Galile klɔ’n su lɔ.” (Matie 28:5-7) Ɔ maan bla’m be wanndi ɔli naan bé kó kán klé Zezi i sɔnnzɔnfuɛ mun. Kɛ bé kɔ́’n, “srɛ kunnin be, kusu be klun jɔli dan.”​—Matie 28:8.

Mari ko toli Piɛli nin Zan be lɔ. I wunmiɛn’n kpu i wun, ɔ seli be kɛ: “B’a yi e Min’n asieliɛ’n nun b’a ɔ, yɛ e siman lika nga b’a ko sie i-ɔ.” (Zan 20:2) Yɛ Piɛli nin Zan bé wánndi bé kɔ́ ndia’n su lɔ-ɔ. Sanngɛ Zan wanndili ndɛndɛ kpa trali Piɛli, ɔ maan ɔ dun mmua juli asieliɛ’n su lɔ. Ɔ klu niɛnnin i klun lɔ. Ɔ wunnin kɛ lɛn tanmue’m be guagua lɛ. Sanngɛ w’a wluman lɔ.

Piɛli kusu juli lɛ wie. Ɔ wluli asieliɛ’n i klun lɔ trele, kpɛkun ɔ wunnin kɛ lɛn tanmue nga be fa cicili Zezi wun’n be guagua lɛ. I sin’n, Zan wluli lɔ wie. Ɔ wunnin i wlɛ kɛ ndɛ nga Mari kannin’n ti nanwlɛ. Kannzɛ bɔbɔ Zezi seli i sɔnnzɔnfuɛ’m be kɛ sɛ ɔ wu’n ɔ́ cɛ́n’n, sanngɛ Piɛli nin Zan b’a wunmɛn i wlɛ kɛ w’a cɛn sakpa. (Matie 16:21) I sɔ’n ti’n, kɛ bé sá be sin be awlo’n, be akunndan’n ti sannganwa. Sanngɛ Mari m’ɔ sɛli i sin asieliɛ’n su lɛ’n, ɔ kali lɛ.

Kɛ ɔ́ yó sɔ’n, nn bla wie’m be o atin’n su be su ko se Zezi i sɔnnzɔnfuɛ’m be kɛ Zezi w’a cɛn. Kɛ bé wánndi bé kɔ́’n, Zezi fiteli be ɲrun, kpɛkun ɔ seli be kɛ: “Amun aɲin-o!” Bla’m ‘be kotoli i bo be trɛli i ja’n.’ Yɛ Zezi seli be kɛ: “Nán srɛ kun amun! Amun wɔ naan amun ko kan kle min niaan mun naan be wɔ Galile. Lɔ yɛ bé wún min-ɔn.”​—Matie 28:9, 10.

Kɛ asiɛ’n kejeli mɔ anzi’m be fiteli sonja’m be ɲrun ndia’n su lɔ’n, be wun “usuli be, naan b’a kaci kɛ sran mɔ b’a wu’n sa.” Kɛ sonja’m be ɲin su titili’n, be wluli klɔ’n nun, kpɛkun be “ko kannin sa kwlaa ng’ɔ juli’n i ndɛ kleli Ɲanmiɛn ɲrun jranfuɛ’m be su kpɛn mun.” Be kusu be nin Zuifu’m be kpɛnngbɛn’m be yiali, be kokoli be wun. Be nuan sɛli be wun kɛ bé mán sonja’m be sika naan be fia ndɛ’n su, naan be se kɛ: “Kɛ é láfi kɔnguɛ’n, i sɔnnzɔnfuɛ’m be bali, be wa wuɛli i fuɛn’n.”​—Matie 28:4, 11, 13.

Rɔmunfuɛ’m be mmla’n nun’n, sɛ be sonja’m bé dí gladi naan be lafi’n, be kwla kun be. I sɔ’n ti’n, Ɲanmiɛn ɲrun jranfuɛ’m be seli sonja’m be kɛ: “Sɛ Pilati ti ndɛ sɔ’n, é yíyí nun é klé i. Ɔ maan be su yoman amun like fi.” Yɛle kɛ be waan sɛ Pilati ti i kɛ be lafili kɔnguɛ’n, bé yíyí ndɛ’n nun bé klé i. Ɔ maan be su kunman be. (Matie 28:14) Sonja’m be sɔli sika’n nun, kpɛkun be yoli like nga Ɲanmiɛn ɲrun jranfuɛ’m be seli be kɛ be yo’n. Ɔ maan be ato ndɛ mɔ yɛle kɛ Zezi i sɔnnzɔnfuɛ’m be ko wuɛli i fuɛn’n, ɔ truli dan Zuifu’m be afiɛn.

Mari m’ɔ fin Magdala’n te o asieliɛ’n su lɔ. Yɛ ɔ te sun. Ɔ klu niannin asieliɛ’n i klun lɔ. Kpɛkun ɔ wunnin anzi nɲɔn, be wun tralɛ’n ti ufue! Be titi lika nga be lali Zezi i fuɛn’n lɛ’n. Kun wo i ti lika, kpɛkun kun wo i ja lika. “Be usɛli i kɛ: “?Mmo, ngue ti yɛ a sun-ɔn?” Mari tɛli be su kɛ: “Be yili min Min’n be ɔli. N siman lika nga be ko sieli i’n.” Kɛ i nuan tɔli cɛ’n, ɔ kpɛli i wun kpɛkun ɔ wunnin kɛ sran kun ekun jin lɛ. Sran sɔ’n usɛli i kosan kunngba nga anzi’m be usali’n. I sin’n, ɔ usɛli i kɛ: “?Wan yɛ a su kunndɛ i-ɔ?” Mari buli i kɛ fie’n i sunianfuɛ’n niɔn. Ɔ maan ɔ tɛli i su kɛ: “Nja, sɛ wɔ yɛ a yili i ɔli’n, kle min lika nga a ko sieli i’n maan n ko fɛ i.”​—Zan 20:13-15.

Zezi yɛ Mari nin i be su koko yalɛ-ɔ. Sanngɛ Mari siman sɔ. Kɛ Zezi seli kɛ: ‘Mari’n,’ ɔ wunnin i wlɛ kɛ Zezi-ɔ. Afin kɛ Zezi flɛ i sɔ titi-ɔ. Mari klun jɔli dan. Ɔ maan ɔ kpɛli i ɲin naan w’a se i Ebre nun kɛ: “Rabuni!” (i bo’n yɛle “Like klefuɛ!”). Mari buli i kɛ Zezi wá ká lɛ kɔ́ ɲanmiɛn su. I sɔ’n ti’n, ɔ trali Zezi nun. Sanngɛ Zezi seli i kɛ: “Yaci min nun. Afin n nin-a fuman Siɛ’n i wun lɔ. Sanngɛ kɔ min niaan’m be wun lɔ naan se be kɛ: ‘N su fu kɔ min Si m’ɔ ti amun Si wie’n, ɔ nin min Ɲanmiɛn m’ɔ ti amun Ɲanmiɛn wie’n, i wun lɔ.’”​—Zan 20:16, 17.

Mari wanndi ɔli kan Zezi i akoto mun nin i sɔnnzɔnfuɛ onga’m b’a yia lɔ’n. Ɔ seli be kɛ: “N wunnin e Min’n!” Ɔ maan be wunnin i wlɛ kɛ ndɛ nga bla wie’m be dun mmua kannin’n, ɔ ti nanwlɛ. (Zan 20:18) Ɔ nin i sɔ’n ngba’n, be waan “ɔ ti sinnzin ndɛ.”​—Liki 24:11.

Mɔnnɛn cɛn m’ɔ ti Nizan i le blu-nin-nsiɛn’n (16), Zezi i sɔnnzɔnfuɛ’m be wla boli be wun kpa. Afin be tili i kɛ Zezi nunmɛn i ndia’n nun kun. (Matie 28:9, 10; Liki 24:11) I sin’n, Kleopasi nin Zezi i sɔnnzɔnfuɛ’m be nun kun be jasoli Zerizalɛmun lɛ be fali Emaisi atin’n. Klɔ sɔ’n nin Zerizalɛmun be afiɛn’n ti nun kilo blu-nin-kun (11).

Kɛ bé kɔ́’n, nn bé kókó sa nga be juli’n, be su yalɛ. Kpɛkun bian kun wa toli be atin’n su naan w’a usa be kɛ: “?Yalɛ benin yɛ amun su koko-ɔ?” Kleopasi tɛli i su kɛ: “?A ti aofuɛ yɛ a tran ɔ liɛ ngunmin Zerizalɛmun wa mɔ i ti yɛ a siman sa nga be juli le nɲɔn nga nun’n niɔn?” Bian’n usali be kɛ: “?Sa onin-ɔn?”​—Liki 24:17-19.

Be tɛli i su kɛ: “Zezi m’ɔ fin Nazarɛti’n i su sa liɛ’n niɔn.” Kpɛkun be kan guali su kɛ: “E liɛ’n e buli i kɛ nn bian sɔ’n yɛ ɔ́ dé Izraɛli-ɔ.”​—Liki 24:19-21.

Kleopasi nin i wiengu kun’n be kannin sa nga be juli cɛn sɔ’n nun’n, i ndɛ kleli bian’n. Be seli i kɛ bla wie’m be ɔli Zezi i ndia’n su lɔ naan b’a wunmɛn i fuɛn’n. Be seli ekun kɛ bla’m be wunnin abonuan sa wie mun ndia’n su lɔ. Yɛle kɛ anzi’m be fiteli be ɲrun, yɛ be seli bla’m be kɛ Zezi w’a cɛn nguan. Kleopasi nin i wiengu kun’n be seli i ekun kɛ sran wie mun ekun be ɔli Zezi i ndia’n su lɔ naan “be wunnin i kɛ ndɛ nga bla’m be kannin’n ti nanwlɛ.”​—Liki 24:24.

Atrɛkpa’n, Kleopasi nin i wiengu kun sɔ’n be nin-a wunman sa sɔ’m be bo. Sanngɛ bian ng’ɔ toli be atin’n su’n tutuli sa sɔ’m be bo kleli be. Ɔ maan be kwla wunnin i bo kpa. Ɔ seli be kɛ: “Nanwlɛ, amun wunman sa wlɛ, yɛ amun faman ndɛ nga Ɲanmiɛn nuan ijɔfuɛ’m be kannin’n su ndɛndɛ! ?Ɔ fataman kɛ Klisi’n wun ɲrɛnnɛn sɔ mun naan ɔ ɲan ɲrun?” (Liki 24:25, 26) I sin’n, bian’n yiyili Klisi’n i su ndɛ nga be kɛnnin i Ɲanmiɛn Ndɛ’n nun’n, i kpanngban nun kleli be.

Be sran nsan’n be juli Emaisi. Sanngɛ Zezi i sɔnnzɔnfuɛ nɲɔn’m be kunndɛli kɛ bé sí ndɛ sɔ’n nun kpa ekun. I sɔ’n ti’n, be jrannin su kpa seli bian’n kɛ: “Ka e wun wa. Afin wia’n su wa tɔ, yɛ lika’n w’a wie san.” Ɔ kplinnin su. Ɔ maan ɔ kali be wun lɛ naan ɔ nin be dí like. Yɛ kɛ ɔ nin bé dí like’n, ɔ fali kpanwun’n, ɔ srɛli Ɲanmiɛn kɛ ɔ yra su. Kɛ ɔ bubuli nun fa mannin be’n, be wunnin i wlɛ kɛ Zezi-ɔ. Kpɛkun ɔ mlinnin be ɲrun. (Liki 24:29-31) Siɛn’n, be si kɛ Zezi w’a cɛn nguan sakpa!

Nanwlɛ, sa sɔ’n yoli be fɛ dan. Be seli be wiengu kɛ: “Kɛ ɔ́ kán ndɛ’n klé e atin’n su lɔ’n, m’ɔ́ yíyí Ɲanmiɛn Ndɛ’n nun weinwein kpa klé e’n, ɔ wluwluli e wun dan. ?Nɛ́n i-ɔ?” (Liki 24:32) Zezi i sɔnnzɔnfuɛ nɲɔn’m be ka lɛ jasoli naan b’a sa be sin Zerizalɛmun lɔ. Kɛ bé jú lɔ’n, nn akoto blu-nin-kun (11) mun, ɔ nin be nga be nin be o lɛ’n, b’a yia. Ka naan Kleopasi nin i wiengu kun’n b’a uke be nuan b’a yiyi sa nga be wunnin i’n nun’n, sran nga be yiali lɛ’n be seli be kɛ: “E Min’n cɛnnin nguan sakpa. Ɔ yili i wun nglo kleli Simɔn!” (Liki 24:34) I sin’n, be sran nɲɔn’n be yiyili wafa nga Zezi yili i wun nglo kleli be’n, i nun kleli akoto mun. Be kusu be wunnin Zezi wie.

Be o lɛ be su kan ninnge sɔ’m be ndɛ, kpɛkun bé nían-ɔn, Zezi bɔbɔ w’a fite be afiɛn lɛ. Nanwlɛ, be wla tɔli blo! Yɛ i sɔ’n boli be nuan, afin Zuifu’m be ti’n, be totoli anuan’m be nun. Ɔ nin i sɔ’n ngba’n, Zezi kwla wluli lɔ, yɛ ɔ jin be afiɛn lɛ. Zezi seli be kɛ: “Maan amun wun jɔ amun fɔun.” Sanngɛ srɛ m’ɔ kunnin be dan kpa’n ti’n, be buli i ‘aolia nun sran’ kɛ nga blɛ wie nun’n, be fa buli i’n sa.​—Liki 24:36, 37; Matie 14:25-27.

Zezi kunndɛli kɛ ɔ́ klé be kɛ nán aolia nun sran yɛ be wunnin i-ɔ, annzɛ kusu nán laliɛ yɛ be su cɛn-ɔn. Kɛ ɔ ko yo naan b’a wun i wlɛ kɛ klɔ sran yɛle i’n, ɔ fɛli i sa nin i ja mun kleli be. Kpɛkun ɔ seli be kɛ: “Ngue ti yɛ srɛ kun amun-ɔn? ?Yɛ ngue ti yɛ amun akunndan’n su yo nɲɔnnɲɔn-ɔn? An nian min sa nin min ja mun. Min-ɔn. An kan min be nian. Afin aolia nun sran leman wunnɛn nin owie kɛ nga amun wun kɛ n le wie yɛ’n sa.” (Liki 24:36-39) I sɔ’n jɔli Zezi i sɔnnzɔnfuɛ’m be klun dan. Sanngɛ be wla m’ɔ tɔli blo’n ti’n, ɔ yoli be kɛ laliɛ nun sa-ɔ.

Kɛ mɔ Zezi kunndɛli kpa kɛ be wun i wlɛ kɛ ɔ timan aolia nun sran’n ti’n, ɔ seli be kɛ: “?Amun le like diwa wie lɛ?” Be fali jue kun mɔ be ɲintɔnnin’n i sin be mɛnnin i. Ɔ sɔli nun, yɛ ɔ dili i be ɲrun lɛ. I sin’n, ɔ usali be kɛ: “Ndɛ sɔ’n yɛ i nun nga e nin amun e o wa’n [i nun nga n nin-a wuman’n], n kan kleli amun’n niɔn. Yɛle kɛ min su ndɛ kwlaa nga be klɛli i Moizi i Mmla’n nun’n, ɔ nin ndɛ nga Ɲanmiɛn nuan ijɔfuɛ’m be klɛli’n, ɔ nin ndɛ nga be klɛli i Jue fluwa’n nun’n, ɔ fata kɛ be kwlaa be kpɛn su.”​—Liki 24:41-44.

Emaisi atin’n su lɔ’n, Zezi ukali Kleopasi nin i wiengu kun’n naan b’a wun Ɲanmiɛn Ndɛ’n i wlɛ. Ɔ yoli i kunngba’n mɛnnin i akoto nin i sɔnnzɔnfuɛ onga nga be yiali sua’n nun lɔ’n. Ɔ seli be kɛ: “Ndɛ nga be klɛli’n yɛ: Klisi’n wá wún i ɲrun, sanngɛ i cɛn nsan su’n, ɔ́ cɛ́n nguan. Yɛ i dunman nun’n, bé wá bó i jɔ nvlenvle kwlaa nun kɛ be kaci be akunndan’n, naan be yaci be wun sa’n cɛ be. Bé bó i bo Zerizalɛmun wa. Amún wá dí sa sɔ’m be ti lalo.”​—Liki 24:46-48.

Kɛ ɔ́ yó sɔ’n, nn sa wie ti’n, Zezi i akoto nga be flɛ i Toma’n nunman lɛ wie. Lemɔcuɛ kunngba sɔ’n nun’n, Zezi i sɔnnzɔnfuɛ onga’m be seli Toma kɛ: “E wunnin e Min’n!” Sanngɛ Toma seli be kɛ: “Sɛ m’an wunman kpɛngbɛ’m be osu i sa’m be klun’n, naan m’an faman min sama’n m’an wlɛmɛn i kpɛngbɛ’m be osu’n nun’n, yɛ sɛ m’an faman min sa m’an wlɛmɛn i nvɛnwun’n nun’n, n su lafiman ndɛ sɔ’n su le.”​—Zan 20:25.

Kɛ cɛn ba mɔcuɛ sinnin’n, Zezi i sɔnnzɔnfuɛ’m be yiali sua ba kun nun ekun, kpɛkun be toli be sin anuan. Cɛn sɔ’n nun’n, Toma o lɛ wie. Zezi fiteli be ɲrun ekun naan w’a jran be afiɛn lɛ. Kpɛkun ɔ yoli be like. Ɔ seli kɛ: “Maan amun wun jɔ amun fɔun.” Kpɛkun ɔ kpɛli i ɲin Toma wun lɔ naan w’a se i kɛ: “Fa ɔ sama’n sie i wa. Nian min sa mun. Fa ɔ sa wla min nvɛnwun’n nun. Yaci akplowa silɛ’n, sanngɛ lafi su.” Toma tɛli i su kɛ: “Min Min, min Ɲanmiɛn!” (Zan 20:26-28) Sa sɔ’n ti’n, Toma i akunndan w’a yoman nɲɔnnɲɔn kun. Siɛn’n, ɔ si kpa kɛ Ɲanmiɛn cɛnnin Zezi naan w’a kaci aolia nun sran, yɛ ɔ ti Ɲanmiɛn Zoova i janunfuɛ.

Zezi seli Toma kɛ: “?Kɛ mɔ a wunnin min’n, i ti yɛ a lafi su-ɔ?” I sin’n, ɔ seli ekun kɛ: “Be nga b’a wunman min mɔ sanngɛ be lafi su’n, be liɛ su ti ye.”​—Zan 20:29.