Maan e kle kɛ e aɲia’m be ti Ɲanmiɛn liɛ klonglo
‘Ń fá be ń bá m bɔbɔ min oka’n su wa, bé sú min min srɛwa sua’n nun, yɛ ń yó maan be klun jɔ́.’—EZAI 56:7.
1. ?Biblu’n nun ndɛ mennin ti yɛ ɔ fata kɛ e bu e aɲia mun kɛ be ti Ɲanmiɛn liɛ klonglo ɔ?
ZOOVA yiali Klistfuɛ ng’ɔ kpali be sieli be ngunmin’n, ɔ nin be janvuɛ mun kɛ be su i, i bɔbɔ i “oka’n su.” I bɔbɔ yo maan kɛ bé sú i i ‘srɛwa sua’n nun’n,’ be klun jɔ. Sua m’ɔ ti ‘nvlenvle’m be kwlaa be Ɲanmiɛn Srɛlɛ Sua’n,’ nán sran yɛ ɔ kplannin ɔn. (Ezai 56:7; Mark 11:17) Ndɛ nga e kan be lɛ’n be kle kɛ Zoova i sulɛ’n ti i liɛ klonglo, fiɛn kaan sa nunman nun, yɛ ɔ nin like uflɛ fi be sɛman. I sɔ’n ti’n, sɛ e ɲin yi yialɛ nga e yia e suan like’n, ɔ nin yialɛ nga e yia e su Ɲanmiɛn’n, nn ninnge nga be ti Zoova liɛ klonglo’n, be ti e liɛ sɔ wie.
2. ?Ngue yɛ ɔ kle kɛ Zoova waan maan i sulɛ’n yo i liɛ klonglo ɔ? ?Yɛ wafa sɛ yɛ Zezi kusu kleli sɔ wie ɔ?
2 Laa Izraɛli lɔ’n, Zoova waan maan i sulɛ’n yo i liɛ klonglo. Kɛ ɔ fɛ i tannin sua’n su lele m’ɔ́ fá jú i nun ninnge kwlaa be su’n, Ɲanmiɛn maan be guali be su ngo, ɔ maan be ‘yoli i liɛ klonglo.’ (Ezipt Lɔ Tulɛ 30:26-29) Tannin sua’n i nun sua ba’n ti nɲɔn. Be flɛ klikli’n kɛ ‘Ɲanmiɛn i lika,’ yɛ be flɛ i nɲɔn su’n kɛ ‘Ɲanmiɛn i lika kpa tra su.’ (Ebre Mun 9:2, 3) Kɛ ɔ́ kɔ́ i ɲrun’n, be kplannin Ɲanmiɛn i sua kun Zerizalɛmu lɔ be fa sieli tannin sua’n i osu. Kɛ ɔ fin lɛ’n, Zoova i sulɛ’n i bo’n takali Zerizalɛmu lɔ. Ɔ maan be flɛli klɔ sɔ’n kɛ ‘Ɲanmiɛn klɔ.’ (Neemi 11:1; Matie 27:53) I nun mɔ Zezi bɔbɔ o asiɛ’n su wa’n, ɔ kleli kɛ ɔ bu Ɲanmiɛn i sua’n i like dan kɛ ng’ɔ nin i fata’n sa. Afin be nga be buman sua sɔ’n i like fi mɔ be fa yo be aata diwlɛ lika, mɔ i awlo’n nun yɛ be sin be kɔ be lika mun’n, ɔ fali be wun ya dan kpa.—Mark 11:15, 16.
3. ?Ngue yɛ ɔ kle kɛ Izraɛlifuɛ’m be aɲia’m be ti Ɲanmiɛn liɛ klonglo ɔ?
3 Laa Izraɛlifuɛ’m be yia be su Zoova titi. Kpɔkun be tie i Mmla mɔ sran kun kanngan nun’n. Cɛn wie mɔ be di’n be nun’n, be yia Ɲanmiɛn dunman nun. Ɲanmiɛn dunman nun aɲia sɔ’m be ti aɲia dan. I sɔ’n kle kɛ aɲia sɔ’m be ti be liɛ Ɲanmiɛn i like klonglo kun. (Saun Yolɛ 23:2, 3, 36, 37) Ɛsdrasi nin Neemi be blɛ su aɲia dan kun bo’n, Levifuɛ’m be ‘tuli Ɲanmiɛn i mmla’n bo kleli sran mun.’ Kɛ ‘sran’m be tili ndɛ sɔ’n, kpɔkun be su sun.’ Levifuɛ’m be ‘fɔnvɔli sran mun be seli kɛ: “Amun muan amun nuan. Ndɛ cɛn’n ti Anannganman liɛ.”’ I sin’n, Izraɛlifuɛ’m be dili kpata cɛn le nso, yɛ “aklunjuɛ’n yoli dan.” Cɛn sɔ’m be nun’n, ‘be kanngannin Ɲanmiɛn mmla fluwa’n nun tititi. Be dili le nso, i le mɔcuɛ’n su’n, be kwlaa be yoli aɲia dan kpa kun likawlɛ kɛ mmla’n kannin’n sa.’ (Neemi 8:7-11, 17, 18) Nanwlɛ, aɲia sɔ mɔ be yo be Ɲanmiɛn dunman nun’n, ɔ fata kɛ be nga be bɛ i bo’n be tran koun be sie be su kpa.
E aɲia’m be ti Ɲanmiɛn liɛ klonglo
4, 5. ?Ngue yɛ ɔ kle kɛ e aɲia’m be ti Ɲanmiɛn liɛ klonglo ɔ?
4 Andɛ asiɛ’n su wa’n, ɔ leman klɔ kun m’ɔ ti Ɲanmiɛn klɔ mɔ be kplɛnnin i sua’n lɔ naan b’a su i nun ɔn. Sanngɛ Zoova i sulɛ aɲia nga e yo be’n, be ti i liɛ klonglo. Le mɔcuɛ kwlaa nun’n, e yia kpɛ nsan e kanngan Biblu’n nun, yɛ e suan nun like. Kɛ Neemi blɛ su’n sa’n, be kanngan Zoova i mmla’n nun “weinwein” kpɔkun ‘be tu i bo’ kle e. (Neemi 8:8) Aɲia kwlaa sɔ’m be bo bolɛ nin be agualiɛ su’n, e srɛ Ɲanmiɛn. Be nun wie’m be bo’n, e to jue e manman Zoova e lɛ i ase e uka su. (Jue Mun 26:12) E aɲia sɔ’m be ti e Ɲanmiɛn sulɛ aɲia. I sɔ’n ti’n, ɔ fata kɛ e tran koun e sie e su kpa be bo.
5 Kɛ Zoova i nvle nunfuɛ’m be yia be su i, be suan Biblu’n nun like, kpɔkun be tran aniaan tranlɛ’n, ɔ yra be su. Kɛ aɲia sɔ’m be blɛ ju’n, maan e si kɛ be bo lɔ yɛ ‘Zoova seli kɛ ye mɔ é ɲɛ́n i’n ɔ fin bla tititi ɔ.’ (Jue Mun 133:1, 3) Ɔ maan sɛ e waan é ɲán ye sɔ’n wie’n, ɔ fata kɛ e wɔ e aɲia’m be bo, kpɔkun e sie e su kpa be bo. Zezi kusu seli kɛ: ‘Lika nga sran nɲɔn annzɛ sran nsan be yia n dunman nun’n, n o be nun.’ Sɛ e niɛn kpa’n, ndɛ nga Zezi kɛnnin lɛ’n ɔ kan asɔnun kpɛnngbɛn mɔ kɛ ndɛ dan wie tɔ sran nɲɔn be afiɛn’n, be yiɛ i wun be siesie’n i ndɛ. Sanngɛ, ɔ kan e aɲia’m be ndɛ wie. (Matie 18:20) ?Kɛ Klistfuɛ’m be yia’n, sɛ Ɲanmiɛn wawɛ’n i fanngan nun Klist o be nun’n niɔn, ɔ fataman kɛ e bu e aɲia sɔ mun kɛ be ti Ɲanmiɛn liɛ klonglo’n?
6. ?Kannzɛ lika nga e yia’n be ti kaan annzɛ dan o, e kwla se kɛ e aɲia sɔ’m be ti sɛ?
6 Zoova su tranman sua m’ɔ ti sran sa nuan like’n nun. Sanngɛ, e Sielɛ Blɛ sua’m be ti i suwlɛ sua. (Sa Nga Be Yoli’n 7:48; 17:24) E yia be nun e suan Ɲanmiɛn Ndɛ’n, e srɛ i, kpɔkun e to jue e mɛnmɛn i. Like kunngba’n yɛ e yo i aɲia sua dandan’m be nun ɔn. E aɲia dandan’m be ti’n, e yia lika dandan kɛ balɔn towlɛ lika, annzɛ jue tolɛ sua’m be nun. Kannzɛ lika sɔ’m be nun yɛ e yia’n, kɛ m’ɔ ti Ɲanmiɛn sulɛ’n ti’n, e bu aɲia sɔ mun kɛ be ti Ɲanmiɛn liɛ klonglo. Aɲia sɔ’m be nun’n, maan ɔ yo lika kaan nun o, annzɛ lika dan nun o, maan e wun wlawlalɛ’n nin e ayeliɛ’n be kle kɛ e bu e aɲia’m be ti be liɛ like ngunmin kun.
Wafa nga e kle kɛ e bu e aɲia’m be like dan’n
7. ?Like trele mennin yɛ e kwla yo naan y’a kle kɛ e bu e aɲia’m be like dan ɔn?
7 Ninnge wie’m be o lɛ mɔ e kwla yo e kle kɛ e bu e aɲia’m be like dan ɔn. Be nun kun yɛle kɛ, kɛ be bo jue tolɛ’n i bo’n, maan ɔ yo e ɲrun. Jue sɔ’m be nun sunman be ti Ɲanmiɛn srɛlɛ jue. Ɔ maan, ɔ fata kɛ e tu e klun e to be aɲinyiɛ su. Akoto Pɔlu boli Jue Mun 22 su fa kannin kɛ Zezi waan: ‘Ń bó wɔ dunman ń klé min niaan mun. Kɛ sran’m be yia lɛ’n, ń mánmán wɔ lɛ.’ (Ebre Mun 2:12) I sɔ’n ti’n, ɔ fata kɛ e mian e ɲin kpa naan kɛ bé bó aɲia’n i bo bolɛ jue su’n, ɔ yo e ɲrun naan ndɛ nga be o jue sɔ nun’n, e ɲin w’a tran su kpa. Maan wafa nga e to e jue mun’n, ɔ kle kɛ e bu angunndan nga jue tofuɛ’n buli’n wie. Ɔ seli kɛ: ‘Ń mánmán Anannganman! Ń tú n klun ń yí Anannganman i ayɛ i sufuɛ kpakpa’m mɔ b’a yia’n be afiɛn.’ (Jue Mun 111:1) Ɔ lemɛn i yowlɛ, jue mɔ e to e fa yi Zoova i ayɛ’n ti’n, maan e ju e aɲia’m be bo ndɛ nun. Yɛ e tran be bo lele e ju be awieliɛ.
8. ?Biblu’n nun sa mennin yɛ ɔ kle kɛ e aɲia’m be bo srɛlɛ nga e srɛ’n, ɔ fata kɛ e sie e su kpa be bo ɔ?
8 Like kun ekun nga ti yɛ e aɲia’m be kwlaa be ti be liɛ like dan’n, yɛle srɛlɛ mɔ e tu e klun e srɛ man sran kwlaa nga be o aɲia’n i bo’n. Cɛn kun’n, Zerizalɛmu lɔ Klistfuɛ klikli’m be yiali, kpɔkun ‘be kwlaa be mannin be nɛn’n su be srɛli Ɲanmiɛn’ kekle kpa. Ɔ maan kannzɛ bé klé be yalɛ sɛ’n, sanngɛ be ‘kannin Ɲanmiɛn ndɛ’n yakpa su.’ (Sa Nga Be Yoli’n 4:24-31) Amun e bu i sin kan e nian. ?Blɛ sɔ’n nun’n, amun bu i kɛ sran kun i angunndan trannin like uflɛ su? Ɔ si’ɛ. Afin, be “kwlaa be mannin be nɛn’n su” be srɛli. E aɲia’m be bo srɛlɛ nga e srɛ’n, be timan ndɛ kanlɛ ngbɛn. Be kwlaa nga be o aɲia’n i bo’n be klun ndɛ’n yɛ ɔ fite srɛlɛ’n nun ɔn. I sɔ’n ti’n, ɔ fata kɛ e sie e su kpa srɛlɛ sɔ’m be bo.
9. ?Wafa sɛ yɛ e ayeliɛ’n nin e wun wlawlalɛ’n be kwla kle kɛ e bu e aɲia mun kɛ be ti Ɲanmiɛn liɛ klonglo ɔ?
9 Like kun ekun nga e kwla yo e kle kɛ e aɲia’m be ti Ɲanmiɛn liɛ klonglo’n, yɛle wafa nga e wlawla e wun’n. Tralɛ nga e wla’n, ɔ nin wafa nga e yi e ti’n, be kwla kle kɛ e aɲia’m be ti e ɲrun like dan. Akoto Pɔlu seli kɛ: ‘Yasua mɔ sa tɛ kaan sa, nin ya, ɔ nin angunndan tɛ nunman be klun’n, lika kwlaa nga be o’n, n klo kɛ be man be sa’m be su be koko yalɛ kle Ɲanmiɛn. I kunngba’n, n klo kɛ tannin nga mmla’m be kla’n be klɛ i kpa, nán maan be fa be wun kle, sanngɛ maan be sie be wun kpa. Kɛ bé síesíe be wun’n, nán maan be fa be wla guɛ i be ti mɔ be yo’n, nin sika ɔkwlɛ, nin afle, nin tralɛ m’ɔ le gua’m be su, sanngɛ maan be yo sran ye, afin bla nga be sro Ɲanmiɛn’n, sɛ be yo sɔ ɔ ɔ ti kpa.’ (1 Timote 2:8-10) Sɛ lika gbaun wie nun kɛ balɔn towlɛ lika sa’n i nun yɛ e yo e aɲia dandan mun’n, kɛ mɔ aunmuan kwla fita annzɛ nzue kwla tɔ’n, annzɛ kusu awunyɛyɛ kwla kun e ti’n, maan e nian su e wlawla e wun. Sanngɛ maan e wun wlawlalɛ sɔ’n yo kpa. Asa ekun’n, kɛ mɔ e bu e aɲia’m be like dan ti’n, kɛ be yo aɲia sɔ mun’n, e su diman like, annzɛ e su kpisaman singɔmun. Nanwlɛ, e ayeliɛ’n nin e wun mɔ e wlɛwlɛ i klanman e aɲia’m be bo’n, ɔ manman Zoova nin i sulɛ’n, ɔ nin e niaan Klistfuɛ mun.
Ayeliɛ ng’ɔ nin Ɲanmiɛn i sua’n nun fata’n
10. ?Wafa sɛ yɛ akoto Pɔlu kleli kɛ e aɲia’n be bo lɔ’n, ɔ fata kɛ e yi ayeliɛ kpa nglo ɔ?
10 Akoto Pɔlu mannin Klistfuɛ’m be afɔtuɛ kpa kun 1 Korɛntfuɛ Mun ndɛ tre 14 nun. Ɔ kleli be wafa ng’ɔ fata kɛ be yo be aɲia mun’n. Kɛ ɔ kannin ndɛ’n lele’n, i agualiɛ su’n ɔ seli kɛ: ‘An yo i kwlaa i nuan su sɛsɛsɛ, nán maan ɔ yo sukusuku.’ (1 Korɛntfuɛ Mun 14:40) Aɲia’m be ti asɔnun’n i like cinnjin kpa kun. I sɔ’n ti maan kɛ e yia Zoova i sua nun’n, e yi ayeliɛ kpa nglo.
11, 12. (a) ?Ngue yɛ ɔ fata kɛ e yo naan ɔ ka bakanngan nga be ba e aɲia’m be bo’n be klun ɔn? (b) ?Wafa sɛ yɛ bakanngan’m be Ɲanmiɛn sulafilɛ’n kwla fite be nuan klanman e aɲia’m be bo ɔ?
11 Wafa ng’ɔ fata kɛ be nanti aɲia’m be bo lɔ’n, bakanngan mun yɛ ɔ fata kɛ be kle be kpa’n niɔn. Ɔ fata kɛ siɛ nin niɛn’m be kle be mma’m be kɛ Ɲanmiɛn Sielɛ Blɛ Sua’n nin asɔnun’n i fluwa nun ndɛ suanlɛ lika’n be timan ngowa kanlɛ lika. Naan lɔ yɛ e yia e su Zoova yɛ e suan Biblu’n nun like ɔ. Famiɛn Salomɔn m’ɔ ti ngwlɛlɛfuɛ’n seli kɛ: ‘Kɛ á wlú Ɲanmiɛn i sua nun’n lɔ’n, bu i angunndan. Kɔlɛ nga á kɔ́’n, kɔ ndɛ tilɛ.’ (Akunndanfuɛ’n 4:17) Moizi kleli Izraɛlifuɛ’m be kɛ, i kpɛnngbɛn mun o, i “bakan mun” o, ɔ fata kɛ be kwlaa be yia. Ɔ seli kɛ: ‘Amun yiayia sran mun maan be ti. Amun kle be kɛ be sro Anannganman amun Ɲanmiɛn’n, yɛ be fa Mmla’n nun ndɛ be sie be klun, yɛ be nian su be nanti. Kɛ ba nga be nin a timɛn i le’n bé tí’n, ɔ́ klé be kɛ be sro Anannganman amun Ɲanmiɛn.’—Mmla’n 31:12, 13.
12 Andɛ kusu’n, sɛ bakanngan mun nin be si nin be nin’m be yia’n, Ɲanmiɛn ndɛ’n i suanlɛ nin i tielɛ ti yɛ be yia. Sɛ ɔ́ kɔ́ i ɲrun naan ba’m be ɲin kwla tran like nga be kle’n su naan be wun Ɲanmiɛn ndɛ’n i bo bolɛ ninnge’m be wlɛ’n, nn be Ɲanmiɛn su mɔ be lafi’n ɔ kwla “fite be nuan.” Yɛle kɛ be kwla tɛ kosan nga be usa’n be su kpe kan. (Rɔmfuɛ Mun 10:10) I bo bolɛ nun’n, bakan kun kwla fa ndɛ mma wie tɛ kosan ng’ɔ wun i wlɛ’n su. Kɛ ɔ́ kɔ́ i ɲrun’n, ɔ kwla kanngan kosan’n i su tɛlɛ’n nun trele. Sanngɛ i sin’n, maan ɔ tu i klun yiyi kosan’m be su tɛlɛ’n nun. Bakan nga i Ɲanmiɛn sulafilɛ’n fite i nuan klanman kɛ ngalɛ’n sa’n, i bɔbɔ di su ye, yɛ ɔ mɛn i aklunjuɛ. Sran kpɛnngbɛn nga be ti i ijɔlɛ’n kusu’n, be klun jɔ. I lɛ nun’n, maan siɛ nin niɛn’m be kle be mma’m be ajalɛ kpa. Yɛle kɛ, maan be bɔbɔ be tu be klun be tɛ kosan’m be su, nán maan be kanngan nun. Sɛ ba’m be kwla ɲan be bɔbɔ be Biblu’n nin jue tolɛ fluwa liɛ’n, ɔ nin fluwa nga be suan nun like’n, ɔ ti kpa. I liɛ’n, bé wún kɛ fluwa sɔ’m be ti like nanndoliɛ. Sɛ e yo i kwlaa ngalɛ’n, ɔ́ ká ba’m be klun kɛ kannzu e aɲia’m be ti Ɲanmiɛn liɛ klonglo.
13. ?Ngue yɛ e kunndɛ kɛ be nga be ba e aɲia’m be bo uflɛuflɛ’n be wun i wlɛ ɔ?
13 Be nga be tɔn be wun suɛn kɛ be ti Klistfuɛ’m be Ɲanmiɛn sulɛ aɲia’m be bo lɔ’n, be nianman sran lɔ. Sran ng’ɔ bali’n, i bɔbɔ i balɛ yɛ ɔ bali ɔ. Be ɲrun dunfuɛ’m be yo be wun kɛ be ti kpa tra be nga mun sa. Jue nga be to be’n kusu’n, ɔ tra balo bo kɔlɛ. E liɛ’n, e kunndɛman kɛ e aɲia’m be yo sɔ. E kunndɛ kɛ e aɲia’m be bo lɔ’n, é sɔ́ sran’m be nun klanman. Sanngɛ nán maan ɔ yo kɛ janvuɛ wie mun yɛ b’a yia be su bo nzɛmunlɛ sa. Afin sɛ e yia’n, Zoova sulɛ ti yɛ e yia ɔ. Ɔ maan, ɔ fata kɛ e aɲia’m be ɲan ɲrun. Like nga e kunndɛ’n yɛle kɛ be nga be ba e aɲia’m be bo uflɛuflɛ’n, kɛ be ti aɲia’n i bo ndɛ’n, mɔ be wun e nin e mma mun e ayeliɛ kpa’n, be se kɛ kannzu: ‘Ɲanmiɛn o amun afiɛn sakpa.’—1 Korɛntfuɛ Mun 14:25.
Like ng’ɔ kle kɛ é sú Ɲanmiɛn tititi’n
14, 15. (a) ?É yó sɛ naan y’a ‘kpaman e Ɲanmiɛn i sua’n su?’ (b) ?Wafa sɛ yɛ Ezai 66:23 kpɛn su andɛ ɔ?
14 Like suanlɛ nga i bo bolɛ nun’n, e wunnin kɛ Zoova yiɛ i sufuɛ mun i “srɛwa sua” mɔ nán sran yɛ ɔ kplannin’n nun, naan i bɔbɔ yo maan be klun jɔ. (Ezai 56:7) Neemi m’ɔ ti sran kpa’n, ɔ kpɛnnin i wiengu Zuifu’m be wla kɛ maan be ɲin yi Ɲanmiɛn i sua mɔ sran yɛ ɔ kplannin’n, naan be fa be sa nun ninnge be fa suan Ɲanmiɛn i sua sɔ’n i nun junman’n i bo. Ɔ seli kɛ: ‘É yó sɔ naan y’a kpaman e Ɲanmiɛn i sua’n su.’ (Neemi 10:40) I sɔ’n ti’n, yialɛ nga Zoova yia e i ‘srɛwa sua’n’ nun kɛ e wa su i’n, ɔ fataman kɛ e ɲin kpa su.
15 Kɛ Ɲanmiɛn nuan ijɔfuɛ Ezai klé kɛ é yía é sú Ɲanmiɛn titi’n, ɔ seli kɛ: ‘Anglo le kun kwlakwla nin le mɔcuɛ’n nun wunmiɛn delɛ cɛn’n kwlaa nun’n, sran’m be kwlaa bé bá, bé wá kótó min bo.’ (Ezai 66:23) I sɔ yɛ e wun i andɛ ɔ. Yɛle kɛ le mɔcuɛ kwlakwla nin anglo kwlaa nun’n, be nga be fali be wun mannin Ɲanmiɛn’n be yia be su Zoova. Ɔ kwla yo asɔnun aɲia’m be bo, annzɛ kɛ bé bó jasin fɛ’n. ?Sran sɔ mɔ ‘be koto Ɲanmiɛn bo’ titi’n, amun o be nun wie?
16. ?Ngue ti yɛ ɔ nin i fata kɛ dɔ nga su’n, aɲia’m be bo kɔlɛ’n kaci e nzuɛn ɔn?
16 Mɛn uflɛ’n nun yɛ ndɛ ng’ɔ o Ezai 66:23 nun’n, ɔ́ kpɛ́n su mlɔnmlɔnmlɔn ɔn. Blɛ sɔ nun’n, le mɔcuɛ kwlakwla nin anglo kwlaa nun’n, “sran’m be kwlaa bé bá” sakpasakpa “bé wá kótó,” annzɛ bé wá sú Zoova. Mɛn uflɛ’n nun lɔ’n, Zoova i sulɛ titi’n wá káci e nzuɛn. ?Sɛ ɔ ti sɔ’n niɔn, ɔ nin i fataman kɛ dɔ nga su’n, e aɲia mɔ be ti Ɲanmiɛn liɛ klonglo’n be bo kɔlɛ’n, ɔ kaci e nzuɛn?
17. ?Siɛn’n mɔ ‘e wun kɛ e Min’n i cɛn’n su mantan’n,’ ngue ti yɛ ɔ ti cinnjin kɛ e yia ɔ?
17 Mɛn’n su kɔ i bue nuan. I sɔ’n ti’n, ɔ fata kɛ e yo like kwlaa nga e kwla yo’n naan y’a yia y’a su Ɲanmiɛn’n. Kɛ mɔ e aɲia’m be ti Ɲanmiɛn liɛ klonglo’n ti’n, nán maan junman nga e di’n, annzɛ suklu lɔ junman mɔ é dí i awlo lɔ’n, annzɛ nnɔsua nun suklu kɔlɛ wie ti’n, e nin e wiengu Klistfuɛ mun e yaci yialɛ titi. Aɲia’n be bo lɔ’n, e wla e wiengu fanngan. E wiengu fanngan wlalɛ sɔ’n ti e cinnjin kpa. Kɛ e yia’n, e kwla si e wiengu, e kwla wla e wun fanngan kɛ e “klo e wun yɛ e yo sran ye.” Siɛn’n mɔ ‘e wun kɛ e Min’n i cɛn’n su mantan’n, maan e yo i sɔ tra su.’ (Ebre Mun 10:24, 25) I sɔ’n ti’n, e wun wlawlalɛ’n nun o, e ayeliɛ’n nun o, e aɲia’m be bo kɔlɛ titi’n nun o, maan e kle kɛ e bu e aɲia’m be like dan. Sɛ e yo sɔ’n, é klé kɛ ninnge nga Zoova bu be i liɛ klonglo’n, e bu be sɔ wie.
Wafa nga amún tɛ́ su’n
• ?Ngue yɛ ɔ kle kɛ Zoova bu i nvle nunfuɛ’m be aɲia mun kɛ be ti i liɛ klonglo ɔ?
• ?Ninnge mennin mun yɛ be kle kɛ e aɲia’m be ti Ɲanmiɛn liɛ klonglo ɔ?
• ?Wafa sɛ yɛ bakanngan’m be kwla kle kɛ be bu e aɲia mun kɛ be ti Ɲanmiɛn liɛ klonglo ɔ?
• ?Ngue ti yɛ ɔ fata kɛ aɲia’m be bo kɔlɛ titi’n ɔ kaci e nzuɛn ɔn?
[Foto, bue 28]
Lika kwlaa nga e yia e su Zoova lɛ’n, aɲia sɔ’n ti Ɲanmiɛn liɛ klonglo.
[Foto, bue 31]
Kɛ e mma’m be ba aɲia’m be bo’n, Ɲanmiɛn ndɛ’n i tilɛ nin i suanlɛ ti yɛ be ba ɔ.